O‘zbekiston Respublikasi Prezidentining “O‘zbekiston elektr energetika, neft-gazni qayta ishlash, kimyo va og‘ir sanoat davlat loyiha institutini tashkil etish to‘g‘risida” 2006-yil 13-iyundagi PQ-377-son qarorini bajarish yuzasidan Vazirlar Mahkamasi qaror qiladi:

1. O‘zbekiston Respublikasi Iqtisodiyot vazirligi bir oy muddatda O‘zbekiston elektr energetika, neft-gazni qayta ishlash, kimyo va og‘ir sanoat davlat loyiha instituti (“O‘zog‘irneftgazkimyoloyiha” instituti) ustavini tasdiqlasin va uning davlat ro‘yxatidan o‘tkazilishini ta’minlasin.

2. “O‘zog‘irneftgazkimyoloyiha” instituti O‘zbekiston Respublikasi Iqtisodiyot vazirligi va Moliya vazirligi bilan kelishgan holda:

ikki hafta muddatda Institutning shtat jadvalini ishlab chiqsin va belgilangan tartibda tasdiqlasin;

bir oy muddatda budjet mablag‘lari hisobiga 2006-yil uchun daromadlar va xarajatlar smetasini ishlab chiqsin va tasdiqlasin, unda “O‘zog‘irneftgazkimyoloyiha” institutini ta’minlash, shuningdek, ajratilgan binoni mukammal ta’mirlash, zarur asbob-uskunalar, inventarlar, kompyuter texnikasi, transport vositalari sotib olish, Internet tarmog‘iga ulash, davriy va maxsus nashrlarga obuna bo‘lish, ilmiy-texnika adabiyotlari kutubxonasi fondini shakllantirish uchun zarur mablag‘larni nazarda tutsin.

3. O‘zbekiston Respublikasi Moliya vazirligi:

“O‘zog‘irneftgazkimyoloyiha” institutiga uchta yengil avtomobil saqlashga limitlar ajratsin;

“O‘zog‘irneftgazkimyoloyiha” instituti ta’minoti uchun davlat budjetidan har yili, belgilangan tartibda mablag‘lar ajratilishini nazarda tutsin.

4. O‘zbekiston Respublikasi Iqtisodiyot vazirligi O‘zbekiston Respublikasi “Davarxitektqurilish” qo‘mitasi bilan birgalikda qisqa muddatlarda institutni uning oldiga qo‘yilgan vazifalardan kelib chiqqan holda yuqori malakali mutaxassislar bilan ta’minlash bo‘yicha tashkiliy tadbirlarni amalga oshirsin.

5. O‘zbekiston aloqa va axborotlashtirish agentligi belgilangan tartibda, ikki oy muddatda “O‘zog‘irneftgazkimyoloyiha” institutini zarur aloqa turlari va vositalari, shu jumladan Hukumat aloqasi bilan, shuningdek, Internet tarmog‘iga ulashni ta’minlasin.

6. “O‘zog‘irneftgazkimyoloyiha” instituti O‘zbekiston Respublikasi Prezidentining farmonlari, qarorlari va farmoyishlari, Oliy Majlis palatalari materiallari, Vazirlar Mahkamasining qarorlari va farmoyishlari, vazirliklar va idoralarning normativ hamda yo‘riqnoma hujjatlari, statistika axborotlari majburiy tartibda yuboriladigan tashkilotlar ro‘yxatiga kiritilsin.

7. O‘zbekiston Respublikasi “Davarxitektqurilish” qo‘mitasi bir oy muddatda “O‘zog‘irneftgazkimyoloyiha” institutini unga yuklangan vazifalarni amalga oshirish uchun barcha zarur hujjatlar bilan ta’minlasin.

8. “O‘zog‘irneftgazkimyoloyiha” instituti Toshkent shahar, Pushkin ko‘chasi, 66-uyga joylashtirilsin.

O‘zbekiston Respublikasi Davlat mulki qo‘mitasi Toshkent shahar hokimligi bilan birgalikda bir hafta muddatda ko‘rsatib o‘tilgan binoni belgilangan tartibda “O‘zog‘irneftgazkimyoloyiha” institutiga bepul berishni amalga oshirsin.

9. O‘zbekiston Respublikasi Iqtisodiyot vazirligi manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida O‘zbekiston Respublikasi Vazirlar Mahkamasiga takliflar kiritsin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S.Azimov zimmasiga yuklansin.