2004-2009-yillarda Maktab taʼlimini rivojlantirish Davlat umummilliy dasturini muvaffaqiyatli amalga oshirish, shuningdek, Islom taraqqiyot banki bilan hamkorlikni rivojlantirish maqsadida Vazirlar mahkamasi qaror qiladi:

1. “Oʻzbekiston Respublikasi umumtaʼlim maktablarini qurish va jihozlash” loyihasini (keyingi oʻrinlarda loyiha deb ataladi) amalga oshirish uchun Islom taraqqiyot banki tomonidan Oʻzbekiston Respublikasiga yetti yillik imtiyozli davrni qoʻshgan holda 25 yil muddat bilan 10,287 mln. AQSH dollariga teng boʻlgan 7 mln. islom dinori miqdorida kredit berish toʻgʻrisida qaror qabul qilinganligi maʼlumot uchun qabul qilinsin.

2. Belgilab qoʻyilsinki:

Oʻzbekiston Respublikasi Xalq taʼlimi vazirligi kredit mablagʻlaridan maqsadli foydalanilishi, shuningdek, loyihaning samarali amalga oshirilishi uchun masʼul ijro etuvchi agentlik hisoblanadi;

Islom taraqqiyot banki kreditini qaytarish bilan bogʻliq xarajatlar, shuningdek, unga xizmat koʻrsatish boʻyicha vositachilik toʻlovlari davlat budjeti mablagʻlari hisobiga amalga oshiriladi;

oʻquv-laboratoriya asbob-anjomlari va mebellar sotib olish bilan bogʻliq xarajatlar Oʻzbekiston Respublikasi Moliya vazirligi huzuridagi budjetdan tashqari Maktab taʼlimi jamgʻarmasi mablagʻlari hisobiga qoplanadi.

3. Quyidagilar:

loyihaning asosiy texnik-iqtisodiy koʻrsatkichlari bilan birga texnik-iqtisodiy hisob-kitoblari 1-ilovaga* muvofiq;

loyihani moliyalashtirish rejasi 2-ilovaga* muvofiq;

loyihani amalga oshirish uchun berilayotgan Islom taraqqiyot banki krediti boʻyicha asosiy qarzni va unga xizmat koʻrsatish uchun vositachilik toʻlovlarini toʻlashning prognoz jadvali 3-ilovaga* muvofiq tasdiqlansin.

4. Oʻzbekiston Respublikasi Tiklanish va taraqqiyot jamgʻarmasining ijrochi direktori U.Rozuqulov Islom taraqqiyot banki bilan qarz bitimini Oʻzbekiston Respublikasi Hukumati nomidan imzolashga vakil qilinsin.

5. Oʻzbekiston Respublikasi Adliya vazirligi Oʻzbekiston Respublikasi Hukumati va Islom taraqqiyot banki oʻrtasidagi qarz bitimi yuzasidan belgilangan tartibda yuridik xulosa bersin.

6. Oʻzbekiston Respublikasi Xalq taʼlimi vazirligi qarz bitimi imzolangandan keyin bir oy muddatda cheklangan soni 5 kishidan iborat boʻlgan, Islom taraqqiyot banki krediti hisobiga mablagʻ bilan taʼminlanadigan, loyihani amalga oshirish guruhini tashkil qilsin, guruhga kredit mablagʻlaridan Islom taraqqiyot banki talablariga va Oʻzbekiston Respublikasi qonun hujjatlariga muvofiq foydalanishni nazorat qilish va hisobga olib borish yuzasidan javobgarlikni yuklasin.

7. Loyihani amalga oshirish davrida:

loyiha doirasida import boʻyicha keltiriladigan tovarlar, bajariladigan ishlar (koʻrsatiladigan xizmatlar) bojxona toʻlovlari toʻlashdan (bojxonada rasmiylashtirish yigʻimlaridan tashqari);

Islom taraqqiyot banki kredit berilishi munosabati bilan Oʻzbekiston Respublikasidagi toʻlov manbaida daromad (foyda) soligʻi toʻlashdan ozod qilinsin.

8. Oʻzbekiston Respublikasi Tashqi ishlar vazirligi Xalq taʼlimi vazirligi buyurtmanomalariga binoan loyihani amalga oshirishda qatnashadigan xorijiy mutaxassislarga kelish vizalarini loyihani amalga oshirishning butun davri mobaynida konsullik va boshqa yigʻimlar undirmasdan belgilangan tartibda rasmiylashtirishni taʼminlasin.

9. Oʻzbekiston Respublikasi Ichki ishlar vazirligi Xalq taʼlimi vazirligi buyurtmanomalariga binoan ushbu loyihani amalga oshirishda qatnashadigan xorijiy mutaxassislarga davlat boji toʻlovisiz koʻp martalik vizalar berilishini va vizalar muddati uzaytirilishini, shuningdek, ularning vaqtinchalik roʻyxatdan oʻtkazilishini va roʻyxatdan oʻtkazish muddati uzaytirilishini taʼminlasin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov va R.S. Qosimov zimmasiga yuklansin.