O‘zbekiston Respublikasi Prezidentining “O‘zbekiston Respublikasining Tiklanish va taraqqiyot jamg‘armasini tashkil etish to‘g‘risida” 2006-yil 11-maydagi PF–3751-sonli Farmoniga muvofiq hamda ustuvor investitsiya loyihalarini samarali moliyalashtirishni ta’minlash maqsadida:

1. Quyidagilar belgilansin:

Jamg‘armaning ijro etuvchi direksiyasi Jamg‘arma ijroiya organi va uning mablag‘larini tasarruf etuvchi hisoblanadi;

Jamg‘armaning ijro etuvchi direksiyasi tarkibida tegishli loyihalarni moliyalashtirish bo‘yicha tavsiyanomalar berilishi uchun mas’ul bo‘lgan ekspert guruhi tashkil qilinadi;

Jamg‘armaning ijro etuvchi direktori O‘zbekiston Respublikasi Vazirlar Mahkamasi tomonidan lavozimga tayinlanadi va undan ozod qilinadi, maqomi bo‘yicha esa Vazir o‘rinbosariga tenglashtiriladi;

Jamg‘armaning ijro etuvchi direksiyasi faoliyati Jamg‘armani boshqarish bo‘yicha Kengash tomonidan tasdiqlanadigan xarajatlar smetasi asosida Jamg‘arma mablag‘lari hisobidan ta’minlanadi.

2. Quyidagilar:

boshqaruv xodimlarining cheklangan soni 32 nafardan iborat bo‘lgan Jamg‘armaning ijro etuvchi direksiyasi.

O‘zbekiston Respublikasining Tiklanish va taraqqiyot jamg‘armasi, Jamg‘arma mablag‘larini shakllantirish va ulardan foydalanish prinsiplari to‘g‘risidagi nizom 2-ilovaga muvofiq tasdiqlansin.

3. Belgilansinki, quyidagilar har oyda Jamg‘arma hisobiga o‘tkazib turiladi:

O‘zbekiston Respublikasining asosiy makroiqtisodiy ko‘rsatkichlari prognozi va Davlat budjeti parametrlarini tasdiqlash vaqtida O‘zbekiston Respublikasi Prezidentining qarorlari bilan strategik resurslarga belgilanadigan chegara narxdan jahon narxining oshishi natijasida tushadigan mablag‘lar;

davlat mulkini xorijiy investorlarga chet el valyutasiga sotishda O‘zbekiston Respublikasining Davlat budjeti daromadlarini shakllantirishda hisobga olingan hajmlardan ortiqcha tushadigan mablag‘lar;

Jamg‘armaning aktivlarini boshqarishdan, shu jumladan Jamg‘arma mablag‘larining bo‘sh qoldiqlarini joylashtirishdan keladigan daromadlar;

qonun hujjatlariga muvofiq boshqa manbalar.

4. Quyidagilar belgilansin:

O‘zbekiston Respublikasi Tiklanish va taraqqiyot jamg‘armasining mablag‘lari uning O‘zbekiston Respublikasi Markaziy bankida ochilgan hisobvaraqlarida xorijiy valyutada shakllantiriladi.

Jamg‘arma tijorat banklarni moliyalashtirishni taklif etiladigan investitsiya loyihalari hamda ochiladigan kredit liniyalarining samaradorligi va o‘zini qoplash muddatlarini hisobga olgan holda moliyalashtirish shartlari va Jamg‘arma mablag‘larini qaytarish mexanizmi to‘g‘risida imzolanadigan bosh bitimlar asosida amalga oshiradi.

Jamg‘arma tomonidan beriladigan kredit resurslari bo‘yicha foiz stavkasi yiliga 6 foizgacha tabaqalashtirilgan miqdorlarda belgilanadi.

Jamg‘arma hisobvarag‘iga tushgan milliy valyutadagi mablag‘lar ular tushgan sanadagi O‘zbekiston respublika valyuta birjasining savdo sessiyalarida o‘rnatilgan joriy kurs bo‘yicha chet el valyutasiga konvertatsiya qilinadi va Jamg‘armaning valyuta hisobvarag‘iga o‘tkaziladi;

Jamg‘arma hisobidan moliyalashtiriladigan (qo‘shma moliyalashtiriladigan) import kontraktlari Davlat budjeti mablag‘lari hisobiga moliyalashtiriladigan import kontraktlari uchun belgilangan tartibda ekspertizadan o‘tadi.

O‘zbekiston Respublikasi Tiklanish va taraqqiyot jamg‘armasi hisobidan kreditlar berish va kredit liniyalarini ochish, shuningdek, kreditlar va kredit liniyalar tarkibini o‘zgartirish faqat O‘zbekiston Respublikasi Prezidentining qarorlari asosida amalga oshiriladi.

5. Jamg‘arma aktivlarining barqarorligi va ularning daromadliligini ta’minlash uchun O‘zbekiston Respublikasi Markaziy banki Jamg‘arma bilan ishonchli boshqaruv to‘g‘risidagi bosh bitim asosida Jamg‘arma mablag‘larining bo‘sh qoldiqlarini yuqori likvidli, ishonchli xorijiy moliya vositalariga joylashtirishni amalga oshirsin.

O‘zbekiston Respublikasi Moliya vazirligi va Markaziy banki bir oy muddatda:

Jamg‘armaning bo‘sh qoldiqlarini xorijiy moliya vositalariga, investitsiya operatsiyalariga joylashtirish tartibini, jumladan Jamg‘arma mablag‘larining bir qismini ishonchli tashqi boshqaruvchi tomonidan boshqarishga topshirishni belgilab beradigan me’yoriy hujjatlarni ishlab chiqsin va Jamg‘armani boshqarish bo‘yicha Kengashga tasdiqlash uchun kiritsin;

Jamg‘arma manbalaridan biri sifatida — alohida soliq stavkalari bo‘yicha O‘zbekiston Respublikasining Tiklanish va taraqqiyot jamg‘armasi mablag‘larini shakllantirish Tartibini ishlab chiqsin va tasdiqlasin.

6. Jamg‘armaning ijro etuvchi direksiyasi zarur aloqa vositalari bilan ta’minlangan holda O‘zbekiston Respublikasi Tashqi iqtisodiy faoliyat milliy banki binosiga joylashtirilsin.

Tiklanish va taraqqiyot jamg‘armasi ijrochi direksiyasi O‘zbekiston Respublikasi Milliy statistika qo‘mitasi, Iqtisodiyot va moliya vazirligi, Investitsiyalar, sanoat va savdo vazirligi, Raqobatni rivojlantirish va iste’molchilar huquqlarini himoya qilish qo‘mitasining statistik axborotnomalari yuborilishi shart bo‘lgan ro‘yxatga kiritilsin.

7. O‘zbekiston Respublikasi Adliya vazirligi Moliya vazirligi, Markaziy banki, boshqa manfaatdor vazirliklar va idoralar bilan birgalikda bir oy muddatda idoraviy normativ hujjatlarga ushbu qarordan kelib chiqadigan o‘zgarishlar kiritilishini ta’minlasin.

8. Mazkur qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.

1. O‘zbekiston Respublikasining Tiklanish va taraqqiyot jamg‘armasi (keyingi o‘rinlarda “Jamg‘arma” deb yuritiladi) O‘zbekiston Respublikasi Prezidentining “O‘zbekiston Respublikasining Tiklanish va taraqqiyot Jamg‘armasini tashkil etish to‘g‘risida”gi 2006-yil 11-maydagi PF–3751-sonli Farmoniga muvofiq tashkil etilgan. Jamg‘arma Vazirlar Mahkamasi huzuridagi moliyaviy muassasa bo‘lib, faoliyatining asosiy maqsadi iqtisodiyotning yetakchi, eng avvalo bazaviy tarmoqlarini modernizatsiyalash va texnikaviy qayta qurollantirish bo‘yicha loyihalarning amalga oshirilishini ta’minlash, shuningdek mamlakatni muttasil, barqaror va mutanosib ravishda ijtimoiy-iqtisodiy rivojlantirishga erishish hamda samarali tarkibiy va investitsiyaviy siyosatni amalga oshirishdan iborat.

2. Jamg‘arma o‘z faoliyatini O‘zbekiston Respublikasi Konstitutsiyasi, O‘zbekiston Respublikasi qonunlari, O‘zbekiston Respublikasi Oliy Majlisi palatalari qarorlari, O‘zbekiston Respublikasi Prezidenti farmonlari, qarorlari va farmoyishlari, O‘zbekiston Respublikasi Vazirlar Mahkamasi qaror va farmoyishlari, O‘zbekiston Respublikasining boshqa qonun hujjatlari va ushbu Nizomga muvofiq amalga oshiradi.

3. Jamg‘arma O‘zbekiston Respublikasi Vazirlar Mahkamasi huzurida tashkil etilib, yuridik shaxs huquqlariga, o‘zining mustaqil balansiga, O‘zbekiston Respublikasi Markaziy bankida hisobvaraq, shu jumladan xorijiy valyutadagi hisobvarag‘iga, O‘zbekiston Respublikasi Davlat gerbi tushirilgan muhriga ega bo‘ladi.

4. O‘zbekiston Respublikasi Hukumati O‘zbekiston Respublikasi Moliya vazirligi timsolida Jamg‘arma muassisi hisoblanadi.

5. Jamg‘arma mablag‘lari O‘zbekiston Respublikasi Markaziy bankining Toshkent shahar Bosh boshqarmasi QKKMda Jamg‘armaning maxsus hisobvaraqlarida jamlanadi.

6. Jamg‘arma loyihalarni moliyalashtirish (qo‘shma moliyalashtirish) quyidagi yo‘llar bilan amalga oshiriladi:

Jamg‘armani boshqarish bo‘yicha Kengash qarori bilan tasdiqlanadigan ro‘yxatga kiritilgan tijorat banklarning (keyingi o‘rinlarda — tijorat banklari) buyurtmanomalariga binoan — muddatli, to‘lovli va qaytarish asosida kreditlar berish va kredit liniyalarini ochish;

O‘zbekiston Respublikasi Prezidentining qarorlari bo‘yicha ayrim investitsiya loyihalarining dastlabki yoki yakuniy texnik-iqtisodiy asoslarini ishlab chiqish uchun Iqtisodiy taraqqiyot va kambag‘allikni qisqartirish vazirligi buyurtmanomalariga binoan — grantlar yoki foizsiz kreditlar berish (yiliga Jamg‘armaning o‘tgan yildagi foydasining 5 foizidan ko‘p bo‘lmagan miqdorda);

O‘zbekiston Respublikasi Moliya vazirligi bilan kelishilgan tijorat banklari va qarz oluvchining buyurtmanomalari bo‘yicha hamda O‘zbekiston Respublikasi Prezidenti qarorlari asosida — Davlat budjeti mablag‘lari hisobidan qoplanadigan imtiyozli kreditlar berish;

tashkil etilayotgan korxona va tashkilotlarning ta’sis hujjatlariga va ularni tashkil etish to‘g‘risidagi Hukumat qarorlariga muvofiq — yangi tashkil etilayotgan moliyaviy institutlar hamda iqtisodiyotning bazaviy tarmoqlarida xorijiy investitsiyalar ishtirokida strategik ahamiyatga ega bo‘lgan korxonalarning ustav kapitaliga investitsiya kiritish (korxona yoki tashkilot ustav kapitali (fondi)ning 25 foizidan ko‘p bo‘lmagan miqdorda).

Shuningdek, Jamg‘arma mablag‘lari quyidagilarga ishlatilishi mumkin:

Moliya vazirligining buyurtmanomalari bo‘yicha va tegishli O‘zbekiston Respublikasi Prezidenti qarorlariga asosan — davlatning tashqi qarzlari bo‘yicha xalqaro moliya institutlari va xorijiy kreditorlar oldidagi majburiyatlarni muddatidan oldin to‘lash;

tasdiqlangan davlat dasturlariga muvofiq O‘zbekiston Respublikasi Prezidenti qarorlari bo‘yicha — yangi zamonaviy xorijiy texnologiyalar, texnika va uskunalar hamda strategik ahamiyatga ega bo‘lgan boshqa tovarlarni xarid qilish uchun imtiyozli kreditlar berish.

7. Jamg‘armaning ijro etuvchi direksiyasi Jamg‘arma mablag‘larini tasarruf etuvchi hisoblanadi.

8. Jamg‘arma manzili: O‘zbekiston Respublikasi, Toshkent shahri, Amir Temur ko‘chasi, 101-uy.

9. Jamg‘armaning asosiy vazifalari quyidagilardan iborat:

davlatning Jamg‘armaga yo‘naltiriladigan moliyaviy mablag‘larini jamlash;

iqtisodiyotni rivojlantirish hamda ishlab chiqarishni tarkibiy jihatdan o‘zgartirish va modernizatsiya qilishdagi ustuvor vazifalarni amalga oshirishda hal qiluvchi ahamiyatga ega bo‘lgan g‘oyat muhim loyihalarni moliyalashtirish;

strategik jihatdan muhim ahamiyatga ega bo‘lgan korxonalarni, birinchi navbatda iqtisodiyotning bazaviy tarmoqlarini yangilash va texnik jihatdan qayta qurollantirish dasturlarini kreditlash;

yoqilg‘i-energetika kompleksi, kimyo sanoati, mashinasozlik va rangli metallurgiya tarmoqlarini texnik jihatdan qayta qurollantirishga hamda ishlab chiqarish sur’at va hajmlarini oshirishga yo‘naltirilgan loyihalar moliyalashtirilishini ta’minlash;

yetakchi tarmoqlarni modernizatsiya qilish uchun muhim ustuvor ahamiyatga ega investitsiya loyihalarini birgalikda moliyalashtirish, eksportga mo‘ljallangan va import o‘rnini bosadigan ishlab chiqarishlar uchun xorijiy texnologiyalar va uskunalarni sotib olishga mablag‘larni maqsadli yo‘naltirgan holda respublikaning tijorat banklariga Jamg‘armani boshqarish bo‘yicha Kengash qarori bilan belgilangan tartibda kredit liniyalarini ochish.

birinchi navbatda istiqbolli, ammo yetarlicha rivojlanmagan hududlarda ishlab chiqarish va noishlab chiqarish infratuzulmasini shakllantirish bo‘yicha ijtimoiy jihatdan ahamiyatli milliy davlat dasturlari va loyihalarning amalga oshirilishini moliyalashtirish;

kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini imtiyozli asosda, shu jumladan keyinchalik Davlat budjeti mablag‘lari hisobidan qoplash yo‘li bilan moliyalashtirish;

respublikaning xalqaro kommunikatsiyalar tarmog‘iga integratsiyalashuvi uchun shart-sharoitlar yaratadigan, xalqaro transport yo‘laklari va jahon bozorlariga eng qisqa yo‘l bilan chiqishni ta’minlaydigan transport hamda telekommunikatsiyalar infratuzilmasini modernizatsiyalash va rivojlantirishni moliyalashtirish;

davlatning tashqi qarzlari bo‘yicha xalqaro moliya institutlari va xorijiy kreditorlar oldidagi majburiyatlarni muddatidan oldin to‘lashni moliyalashtirish;

xalqaro moliya institutlari, respublika va xorijiy mamlakatlarning kredit muassasalari bilan loyihalarning qo‘shma moliyalashtirilishini tashkil etishni ta’minlash.

10. Yuklatilgan vazifalardan kelib chiqqan holda Jamg‘arma quyidagi funksiyalarni bajaradi:

navbatdagi yil uchun mo‘ljallangan makroiqtisodiy va pul-kredit ko‘rsatkichlari, Davlat budjeti hamda rivojlanish davlat dasturlarining asosiy parametrlari bilan bog‘liq holda Jamg‘arma mablag‘larining kelib tushish va ulardan foydalanish prognozlarini ishlab chiqadi va belgilangan muddatlarda Jamg‘armani boshqarish bo‘yicha Kengashga taqdim etadi;

kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini tuziladigan shartnomalar asosida kreditlaydi;

davlatning tashqi qarzlari bo‘yicha xalqaro moliya institutlari va xorijiy kreditorlar oldidagi majburiyatlarni muddatidan oldin to‘lash uchun O‘zbekiston Respublikasi Moliya vazirligiga qaytarib bermaslik asosida mablag‘larni beradi;

yangi tashkil etilayotgan moliyaviy institutlar hamda iqtisodiyotning bazaviy tarmoqlarida xorijiy investitsiyalar ishtirokida strategik ahamiyatga ega bo‘lgan korxonalarning ustav kapitaliga investitsiya kiritadi (korxona yoki tashkilot ustav kapitali (fondi)ning 25 foizidan ko‘p bo‘lmagan miqdorda);

O‘zbekiston Respublikasi Prezidentining qarorlari bo‘yicha va Iqtisodiy taraqqiyot va kambag‘allikni qisqartirish vazirligi buyurtmanomalariga binoan ayrim investitsiya loyihalarining dastlabki yoki yakuniy texnik-iqtisodiy asoslarini ishlab chiqish uchun grantlar hamda foizsiz kreditlar beradi, ajratilgan kreditlar miqdori keyinchalik loyihaning umumiy qiymatiga va loyiha Jamg‘arma kreditini jalb qilish yo‘li bilan amalga oshirilgan taqdirda, ajratilayotgan kreditning umumiy qiymatiga qo‘shiladi;

yangi zamonaviy xorijiy texnologiyalar, texnika va uskunalar hamda strategik ahamiyatga ega bo‘lgan boshqa tovarlarni tasdiqlangan davlat dasturlariga muvofiq xarid qilish uchun O‘zbekiston Respublikasi Prezidenti qarorlari bo‘yicha imtiyozli kreditlar beradi;

moliyalashtirish shartlari va Jamg‘arma mablag‘larini qaytarish mexanizmi to‘g‘risida imzolanadigan bosh bitimlar asosida, har bir tijorat banki uchun har yili belgilanadigan limitlar doirasida tijorat banklarini moliyalashtirishni amalga oshiradi;

Jamg‘arma mablag‘laridan maqsadli va samarali foydalanilishi va tijorat banklariga berilgan mablag‘larning o‘z vaqtida qaytarilishi ustidan doimiy ravishda monitoring olib boradi hamda kelib tushish manbalari va ulardan foydalanishning asosiy yo‘nalishlari bo‘yicha Jamg‘arma mablag‘larining hisobini yuritadi;

tijorat banklarida ochilgan hisobvaraqlar va ular bo‘yicha amalga oshirilayotgan operatsiyalar to‘g‘risidagi har qanday ma’lumotni olish huquqiga ega bo‘lgan holda, tijorat banklari va qarz oluvchi korxonalar zimmasiga yuklatilgan majburiyatlarning bajarilishi yuzasidan ularning faoliyatini o‘rganadi.

Jamg‘arma mablag‘larini shakllantirish va ulardan foydalanish tartibini takomillashtirish bo‘yicha aniq maqsadli ishlarni amalga oshiradi;

Jamg‘arma faoliyatini takomillashtirish yuzasidan o‘z vakolatlari doirasida choralar ko‘radi yoki belgilangan tartibda takliflar kiritadi;

O‘zbekiston Respublikasi Markaziy banki bilan Jamg‘arma mablag‘larining bo‘sh qoldiqlarini ishonchli boshqarish to‘g‘risida shartnomalar tuzadi;

Jamg‘arma zimmasiga yuklatilgan vazifalarni bajarish bilan bog‘liq bo‘lgan boshqa funksiyalarni amalga oshiradi.

11. Jamg‘armani boshqarish bo‘yicha Kengash Jamg‘armaning yuqori boshqaruv organi hisoblanadi, uning tarkibi O‘zbekiston Respublikasi Prezidenti tomonidan tasdiqlanadi.

12. Jamg‘armani boshqarish bo‘yicha Kengash:

Jamg‘arma faoliyatining asosiy yo‘nalishlarini ishlab chiqadi;

Jamg‘armaning e’lon qilingan ustav kapitalini qayta ko‘rib chiqish to‘g‘risida qaror qabul qiladi, biroq u O‘zbekiston Respublikasi Prezidentining “O‘zbekiston Respublikasining Tiklanish va taraqqiyot jamg‘armasini tashkil etish to‘g‘risida” 2006-yil 11-maydagi PF-3751-son Farmonida belgilangan darajadan past bo‘lmasligi kerak;

Jamg‘armaga mablag‘lar kelib tushishi va ulardan foydalanish prognozlarini ko‘rib chiqadi hamda ularni navbatdagi yilga mo‘ljallangan makroiqtisodiy va pul-kredit ko‘rsatkichlarining asosiy parametrlari, Davlat budjeti hamda rivojlanish davlat dasturlari bilan bog‘liq holda belgilangan tartibda tasdiqlash uchun kiritadi;

qarz olgan korxonalarni qayta moliyalashtirish (qo‘shma moliyalashtirish) uchun tijorat banklariga Jamg‘arma mablag‘larini berish muddatlari va shartlari bo‘yicha qarorlar qabul qiladi, xalqaro sarmoya bozorlarida amal qilayotgan foiz stavkalaridan kelib chiqib Jamg‘arma tomonidan berilayotgan mablag‘lar bo‘yicha foiz stavkalarining aniq miqdorlarini tasdiqlaydi;

kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini moliyalashtirish uchun imtiyozli kreditlarni berish muddatlari va shartlari bo‘yicha qarorlar qabul qiladi;

davlatning tashqi qarzlari bo‘yicha xalqaro moliya institutlari va xorijiy kreditorlar oldidagi majburiyatlarni muddatidan oldin to‘lash uchun O‘zbekiston Respublikasi Moliya vazirligiga mablag‘lar ajratib berish to‘g‘risida qarorlar qabul qiladi;

yangi tashkil etilayotgan moliyaviy institutlar hamda iqtisodiyotning bazaviy tarmoqlarida xorijiy investitsiyalar ishtirokida strategik ahamiyatga ega bo‘lgan korxonalarning ustav kapitaliga Jamg‘arma mablag‘laridan investitsiya kiritish bo‘yicha qarorlar qabul qiladi;

ayrim loyihalarning dastlabki yoki yakuniy texnik-iqtisodiy asoslarini ishlab chiqish uchun grantlar va foizsiz kreditlarni ajratish to‘g‘risida qarorlar qabul qiladi;

yangi zamonaviy xorijiy texnologiyalar, texnika va uskunalar hamda strategik ahamiyatga ega bo‘lgan boshqa tovarlarni tasdiqlangan davlat dasturlariga muvofiq xarid qilish uchun O‘zbekiston Respublikasi Prezidenti qarorlari bo‘yicha imtiyozli kreditlar berish to‘g‘risida qaror qabul qiladi;

Jamg‘armaning ijro etuvchi direksiyasi faoliyati, ayniqsa Jamg‘arma mablag‘larining maqsadli yo‘naltirilganligi, tijorat banklariga moliyalashtirishni o‘z vaqtida ochish hamda ularga berilgan mablag‘larning qaytarilishini ta’minlash ustidan nazoratni amalga oshiradi;

Jamg‘arma mablag‘larining ishlatilishi to‘g‘risida Jamg‘arma ijro etuvchi direktorining hamda qarz olgan korxonalar tomonidan Jamg‘arma mablag‘laridan samarali foydalanilishini ta’minlashga qaratilgan chora-tadbirlar to‘g‘risida manfaatdor vazirliklar, idoralar va tashkilotlar rahbarlarining hisobotlarini muntazam ravishda eshitib boradi;

Jamg‘armaga aktivlarni boshqarish, ekspertiza qilish va investitsiya loyihalarini moliyalashtirish sohasidagi yuqori malakali mutaxassislarni jalb qiladi.

13. Ijro etuvchi direksiya Jamg‘armaning ijroiya organi hisoblanadi, uning tarkibi va soni o‘rnatilgan tartibda belgilanadi.

14. Jamg‘armaning ijro etuvchi direksiyasi faoliyati bilan bog‘liq xarajatlar Jamg‘armani boshqarish bo‘yicha Kengash tomonidan tasdiqlangan xarajatlar smetasi asosida Jamg‘arma mablag‘lari hisobidan qoplanadi.

15. Ijro etuvchi direksiya:

Jamg‘armaga mablag‘larning kelib tushish va ulardan foydalanish prognozlarini ishlab chiqadi;

qarz oluvchi korxonalarni qayta moliyalashtirish uchun muddatli, to‘lovli va qaytarish shartlari asosida tijorat banklariga moliyaviy mablag‘larni taqdim etadi;

kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini moliyalashtirish uchun imtiyozli kreditlar berish to‘g‘risida shartnomalar tuzadi;

davlatning tashqi qarzlari bo‘yicha xalqaro moliya institutlari va xorijiy kreditorlar oldidagi majburiyatlarni muddatidan oldin to‘lash uchun Moliya vazirligiga mablag‘lar ajratadi;

yangi tashkil etilayotgan moliyaviy institutlar hamda iqtisodiyotning bazaviy tarmoqlarida xorijiy investitsiyalar ishtirokida strategik ahamiyatga ega bo‘lgan korxonalarning ustav kapitaliga Jamg‘arma mablag‘laridan investitsiya kiritadi;

ayrim investitsiya loyihalarining dastlabki yoki yakuniy texnik-iqtisodiy asoslarini ishlab chiqish uchun loyiha tashabbuskorlariga grantlar va foizsiz kreditlarni, ajratilgan kreditlar miqdorini keyinchalik loyihaning umumiy qiymatiga va loyiha Jamg‘arma kreditini jalb qilish yo‘li bilan amalga oshirilgan taqdirda ajratilayotgan kreditning umumiy qiymatiga qo‘shish sharti bilan berish to‘g‘risida bitimlar tuzadi;

yangi zamonaviy xorijiy texnologiyalar, texnika va uskunalar hamda strategik ahamiyatga ega bo‘lgan boshqa tovarlarni tasdiqlangan davlat dasturlariga muvofiq O‘zbekiston Respublikasi Prezidenti qarorlari bo‘yicha xarid qilish uchun imtiyozli kreditlar beradi;

Jamg‘arma mablag‘laridan maqsadli va samarali foydalanilishi, tijorat banklariga berilgan mablag‘larning o‘z vaqtida qaytarilishi ustidan tizimli ravishda monitoring olib boradi;

tijorat banklarida ochilgan hisobvaraqlar holati va ular bo‘yicha amalga oshirilayotgan operatsiyalar to‘g‘risidagi har qanday ma’lumotni olish huquqiga ega bo‘lgan holda, qarz oluvchi korxonalar tomonidan Jamg‘arma kreditlari bo‘yicha majburiyatlarining bajarilishi masalalari yuzasidan ular faoliyatining monitoringini olib boradi.

Jamg‘arma daromadlari va xarajatlarining ijrosi to‘g‘risidagi hisobotni ishlab chiqadi va Jamg‘armani boshqarish bo‘yicha Kengash tomonidan maqullangandan so‘ng uni belgilangan muddatlarda O‘zbekiston Respublikasi Moliya vazirligi, Iqtisodiy taraqqiyot va kambag‘allikni qisqartirish vazirligi va Hisob palatasiga taqdim etadi.

16. Jamg‘armaning ijro etuvchi direktori O‘zbekiston Respublikasi Vazirlar Mahkamasi tomonidan lavozimga tayinlanadi va lavozimidan ozod etiladi, maqomi bo‘yicha vazir o‘rinbosariga tenglashtiriladi;

17. Jamg‘armaning ijro etuvchi direktori:

Jamg‘armaga yuklatilgan vazifa va funksiyalarga binoan ijrochi direksiyaning faoliyatini tashkil etadi va shaxsan mas’ul bo‘ladi, xodimlarning belgilangan cheklangan umumiy soni doirasida ijrochi direksiyaning shtat jadvalini shakllantiradi, Jamg‘arma nomidan kredit, xo‘jalik va mehnat shartnomalarini imzolaydi;

Jamg‘armani boshqarish bo‘yicha Kengash bilan kelishgan holda Jamg‘arma mablag‘laridan maqsadli va samarali foydalanilishi ustidan belgilangan tartibda tekshiruvlar tashkil qiladi, ularning natijalarini ko‘rib chiqadi va ular bo‘yicha qarorlar qabul qiladi hamda aniqlangan kamchiliklarni bartaraf etish yuzasidan zarur choralarni ko‘radi;

qonun hujjatlarida ko‘zda tutilgan boshqa vakolatlarni amalga oshiradi.

18. Jamg‘arma apparati tarkibida tegishli loyihalarni moliyalashtirish bo‘yicha xulosa yoki tavsiyalar berishga mas’ul bo‘lgan yuqori malakali ekspertlar guruhi tashkil qilinadi.

19. Jamg‘arma mablag‘larini shakllantirish manbalari quyidagilardan iborat:

O‘zbekiston Respublikasining asosiy makroiqtisodiy ko‘rsatkichlari prognozi va Davlat budjeti parametrlarini tasdiqlash vaqtida O‘zbekiston Respublikasi Prezidentining qarorlari bilan strategik resurslarga belgilanadigan chegara narxdan jahon narxining oshishi natijasida tushadigan mablag‘lar;

davlat mulkini xorijiy investorlarga chet el valyutasiga sotishda O‘zbekiston Respublikasining Davlat budjeti daromadlarini shakllantirish chog‘ida hisobga olingan hajmlardan ortiqcha tushadigan mablag‘lar;

Jamg‘armaning aktivlarini boshqarishdan, shu jumladan Jamg‘arma mablag‘larining bo‘sh qoldiqlarini joylashtirishdan keladigan daromadlar;

qonun hujjatlariga muvofiq boshqa manbalar.

20. Jamg‘armaning mablag‘lari uning O‘zbekiston Respublikasi Markaziy bankida ochilgan hisobvaraqlarida xorijiy valyutada shakllantiriladi.

O‘zbekiston Respublikasi Markaziy banki Jamg‘arma hisobvarag‘iga tushgan milliy valyutadagi mablag‘larni ular tushgan sanadagi O‘zbekiston respublika valyuta birjasining savdo sessiyalarida o‘rnatilgan joriy kurs bo‘yicha chet el valyutasiga konvertatsiya qiladi va Jamg‘armaning valyuta hisobvarag‘iga o‘tkazadi.

21. Soliq va to‘lovlarning ayrim turlari bo‘yicha mablag‘larni Jamg‘arma hisobvarag‘iga o‘tkazish belgilangan tartibda amalga oshiriladi.

22. Jamg‘arma mablag‘lari tushumi manbalari va ulardan foydalanish yo‘nalishlari har yili belgilangan tartibda O‘zbekiston Respublikasi rivojlanish davlat dasturlariga kiritiladi va Jamg‘arma balansida aks ettiriladi.

23.Jamg‘arma mablag‘lari quyidagi maqsadlar uchun foydalaniladi:

a) avvalo yoqilg‘i-energetika kompleksi, kimyo sanoati, mashinasozlik, rangli metallurgiya va iqtisodiyotning boshqa bazaviy tarmoqlarida, shuningdek transport va telekommunikatsiya sohasida rivojlanish davlat dasturlariga kiritilgan g‘oyat muhim loyihalarni moliyalashtirish, shu jumladan xalqaro va xorijiy moliyaviy institutlar ishtirokidagi loyihalarda O‘zbekiston Respublikasi ulushini qo‘shma moliyalashtirish;

b) kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini moliyalash maqsadida, shu jumladan Davlat budjeti mablag‘lari hisobidan qoplanadigan imtiyozli kreditlar berish;

v) yangi tashkil etilayotgan moliyaviy institutlar hamda iqtisodiyotning bazaviy tarmoqlarida xorijiy investitsiyalar ishtirokida strategik ahamiyatga ega bo‘lgan korxonalarning ustav kapitaliga investitsiya kiritish;

g) davlatning tashqi qarzlari bo‘yicha xalqaro moliya institutlari va xorijiy kreditorlar oldidagi majburiyatlarni muddatidan oldin to‘lash;

d) O‘zbekiston Respublikasi Prezidenti tomonidan tasdiqlangan modernizatsiyalash, texnik va texnologik qayta jihozlash dasturlari doirasida tijorat banklariga xorijiy valyutada ochilayotgan kredit liniyalari orqali investitsiya loyihalarini jadal moliyalashtirish hamda amalga oshirish;

e) ayrim loyihalarning dastlabki yoki yakuniy texnik-iqtisodiy asoslarini ishlab chiqishni grant asosida yoki foizsiz kreditlar ajratish yo‘li bilan moliyalashtirish;

j) yangi zamonaviy xorijiy texnologiyalar, texnika va uskunalar hamda strategik ahamiyatga ega bo‘lgan boshqa tovarlarni tasdiqlangan davlat dasturlariga muvofiq xarid qilish uchun imtiyozli kreditlar berish;

z) birinchi navbatda istiqbolli, ammo yetarlicha rivojlanmagan hududlarda ishlab chiqarish va noishlab chiqarish infratuzilmasini shakllantirish bo‘yicha ijtimoiy jihatdan ahamiyatli milliy davlat dasturlari va loyihalarini, Davlat budjeti va rivojlanish davlat dasturlarining tasdiqlangan parametrlari doirasida, grant asosida moliyalashtirish (qo‘shma moliyalashtirish);

i) tijorat banklari bilan birgalikda qarz oluvchi korxonalarning investitsiya dasturi (biznes-rejalari)ni, shu jumladan ishlab chiqarishni texnik jihatdan qayta jihozlash, ishlab chiqarish quvvatlarining ishlatilishini ko‘paytirish, raqobatbardosh mahsulot ishlab chiqarish va uni eksport qilish hajmlarini oshirish hamda qo‘shilgan qiymat o‘sishini ta’minlashga imkoniyat beruvchi loyihalarni qo‘shma moliyalashtirish;

k) Jamg‘arma boshqaruvi va ijro etuvchi apparatining ta’minoti bilan bog‘liq bo‘lgan xarajatlarni qoplashga.

24. Mablag‘larni berish muddati va shartlari Jamg‘armani boshqarish bo‘yicha Kengash qarori bilan belgilanadi. Jamg‘arma tomonidan beriladigan kredit resurslari bo‘yicha foiz stavkasi yiliga 6 foizgacha tabaqalashtirilgan miqdorlarda belgilanadi.

Jamg‘armaning kredit resurslari shartnomada belgilangan chet el valyutasida ajratiladi.

Tijorat banki marjasining eng yuqori chegarasi Jamg‘arma va tijorat banki o‘rtasida tuziladigan kredit shartnomasida har bir loyiha bo‘yicha alohida belgilanadi.

Ajratilgan mablag‘larning qaytarilishi tijorat banklari tomonidan kechiktirilgan holatlarda har bir kechiktirilgan kun uchun muddati kechiktirilgan to‘lovlar bo‘yicha qarzdorlik summasining 0,01 foizi miqdorida (qarzga olingan mablag‘lar hajmining 10 foizidan oshmagan holda) penya undiriladi.

Jamg‘arma mablag‘lari hisobidan birgalikda moliyalashtiriladigan import kontraktlari bo‘yicha avans to‘lovlarini to‘lash, qoidaga ko‘ra, yetkazib beruvchi tomonidan qayta moliyalashtiruvchi tijorat bankiga birinchi darajali xorijiy bank tomonidan, avans to‘lovini qaytarishga berilgan kafolatnomani taqdim etgan holda amalga oshiriladi.

25. Tijorat banklariga ajratiladigan kredit mablag‘larining hajmi ularning buyurtmanomalari asosida belgilanadi va ushbu buyurtmanomalarda qarz oluvchi korxonalarning kredit olish uchun tijorat banki tomonidan ma’qullangan loyihalar mablag‘larining umumiy miqdori aks ettiriladi.

Tijorat banklariga har bir loyiha (modernizatsiya, qayta qurish yoki ishlab chiqarishni texnik jihatdan qayta qurollantirish) uchun beriladigan kredit hajmi loyiha qiymati umumiy miqdorining 75 foizidan oshmasligi kerak.

Qarz oluvchi korxonalar (tashkilotlar)ga kredit berish Jamg‘armani boshqarish bo‘yicha Kengash tomonidan tasdiqlanadigan O‘zbekiston Respublikasining Tiklanish va taraqqiyot jamg‘armasi mablag‘lari hisobidan moliyalashtirish uchun investitsiya loyihalarini tanlab olish shartlari, ko‘rib chiqish tartibi va ekspertizasi to‘g‘risidagi Nizom va O‘zbekiston Respublikasi Markaziy bankning hujjatlari va boshqa qonun hujjatlariga muvofiq amalga oshirib boriladi.

26. Jamg‘armani boshqarish bo‘yicha Kengash tomonidan tijorat banklarining buyurtmanomalarini ko‘rib chiqish muddati ariza olingan kundan boshlab 30 kundan oshmasligi lozim. Ushbu muddatda Jamg‘armani boshqarish bo‘yicha Kengash tijorat banki tomonidan taklif qilingan loyihani moliyalashtirish to‘g‘risida ijobiy qaror chiqaradi yoki tijorat bankiga yozma ravishda asoslangan raddiyanoma beradi.

27. Jamg‘armani boshqarish bo‘yicha Kengashning ijobiy xulosasi qabul qilinganidan so‘ng Jamg‘armaning ijro etuvchi direksiyasi 5 ish kuni mobaynida tijorat banki bilan kredit shartnomasini tuzadi.

Kredit shartnomasida tijorat bankiga berilayotgan kredit resurslarining miqdori, foiz stavkasi va maqsadi (yo‘naltirish manzili), muddati va shartlari, shuningdek tomonlarning qonun hujjatlari talablariga muvofiq huquq va burchlari hamda boshqa masalalar aks ettiriladi.

28. Jamg‘armani boshqarish bo‘yicha Kengash tomonidan O‘zbekiston Respublikasi Moliya vazirligi va Iqtisodiy taraqqiyot va kambag‘allikni qisqartirish vazirligining buyurtmanomalarini ko‘rib chiqish muddati buyurtmanoma olingan sanadan boshlab 15 kundan oshmasligi lozim.

Jamg‘armani boshqarish bo‘yicha Kengashning ijobiy qarori qabul qilinganidan so‘ng Jamg‘armaning ijro etuvchi direksiyasi 5 ish kuni mobaynida taqdim etilgan buyurtmanoma va Kengash qaroriga binoan:

1) Moliya vazirligi bilan — qaytarib bermaslik asosida buyurtmanomada va ushbu Nizomda belgilangan maqsadlar uchun mablag‘ ajratish to‘g‘risida bitim;

2) Iqtisodiy taraqqiyot va kambag‘allikni qisqartirish vazirligi va tegishli loyihaning tashabbuskori bilan — buyurtmanomada va ushbu Nizomda belgilangan maqsadlar uchun grant asosida mablag‘ ajratish yoki foizsiz kredit berish to‘g‘risida bitim tuzadi.

29. Jamg‘armaning vaqtincha bo‘sh mablag‘lari ularni birinchi darajali xalqaro moliya vositalariga joylashtirish maqsadida O‘zbekiston Respublikasi Markaziy bankiga ishonchli boshqaruv uchun belgilangan tartibda o‘tkaziladi.

Jamg‘arma mablag‘lari bo‘sh qoldiqlarining umumiy hajmi uning jami aktivlarining kamida qirq foizini tashkil etishi lozim.

O‘zbekiston Respublikasi Markaziy banki har chorakda Jamg‘armani boshqarish bo‘yicha Kengashga Jamg‘arma mablag‘larini ishonchli boshqarish natijalari, jumladan operatsiyalar bo‘yicha daromadlilik, hisobot davrida olingan daromad miqdori, joylashtirilgan Jamg‘arma mablag‘lari portfeli tarkibi, foiz stavkalarining joriy holati to‘g‘risidagi ma’lumotlarni taqdim etadi.

30. Jamg‘armaning ijro etuvchi direksiyasi har yili O‘zbekiston Respublikasi Moliya vazirligi, Iqtisodiy taraqqiyot va kambag‘allikni qisqartirish vazirligi, Markaziy banki, tijorat banklari va boshqa idoralardan olingan dastlabki ma’lumotlar hamda hisobot davrida o‘tkazilgan tizimli monitoring asosida keyingi kalendar yil uchun Jamg‘armaga mablag‘lar kelib tushishi va ulardan foydalanish prognozi loyihasini ishlab chiqadi hamda uni Jamg‘armani boshqarish bo‘yicha Kengash tasdiqlashi uchun taqdim etadi.

31. Jamg‘arma mablag‘larining kelib tushishi va ulardan foydalanishning prognoz loyihalarini tayyorlash, ko‘rib chiqish va tasdiqlashda O‘zbekiston Respublikasi Davlat budjeti va rivojlanish davlat dasturlarining kelgusi yil parametrlarini ishlab chiqish va tasdiqlash bilan uzviy bog‘liq holda amalga oshiriladi.

Respublikaning strategik resurslari bo‘yicha jahon bozorlaridagi qulay narxlar natijasida hosil bo‘ladigan prognozdan yuqori tushumlarning pul massasi hajmiga va inflyatsiya darajasiga ta’sirini bartaraf qilish maqsadida Jamg‘arma mablag‘laridan foydalanishning yuqori chegarasi asosiy makroiqtisodiy va pul-kredit ko‘rsatkichlarining prognoz parametrlaridan kelib chiqqan holda ishlab chiqiladi va tasdiqlanadi.

32. Jamg‘arma mablag‘lari kelib tushishi va ulardan foydalanish prognozlarida umuman prognoz qilinayotgan yil uchun, shu jumladan choraklar bo‘yicha quyidagilar aks ettiriladi:

jumladan, har bir manba bo‘yicha mablag‘ tushumlarining umumiy hajmi;

ustuvor investitsiyaviy va ijtimoiy yo‘naltirilgan loyihalarni, qarz oluvchi korxonalarning investitsiya dasturlarini moliyalashtirish, olinayotgan uzoq muddatli kredit va investitsiyalarga xizmat ko‘rsatish hamda Jamg‘armaning ijro etuvchi direksiyasi faoliyatini moliyaviy ta’minlash bilan bog‘liq xarajatlarni qoplashga mablag‘lar ajratib berish bo‘yicha sarf-xarajatlar.

33. Jamg‘armaning huquqlari:

a) tijorat banklari hamda qarz olgan tashkilotlarda Jamg‘arma mablag‘laridan maqsadli va samarali foydalanish ustidan tekshiruvlar o‘tkazish;

b) Jamg‘arma mablag‘larining maqsadli foydalanilishi monitoringini olib borish uchun zarur bo‘ladigan ma’lumotlarni, jumladan, Jamg‘arma tomonidan ajratilgan mablag‘lar ishlatilishining holati va prognozi to‘g‘risidagi hamda boshqa ma’lumotlarni tijorat banklaridan olish;

v) loyihalarning birlamchi texnik-iqtisodiy asoslanganligini ko‘rib chiqish, shu jumladan Jamg‘arma mablag‘larining maqsadli va samarali foydalanilishi monitoringi hamda tekshiruvini olib borish maqsadida yuqori malakali mustaqil ekspertlar va soha mutaxassislarini jalb qilish.

34. Jamg‘arma majburiyatlari:

a) yuklatilgan vazifalarga muvofiq holda:

Jamg‘arma mablag‘larini jalb etish va jamlashga qaratilgan ishlarning olib borilishini;

Jamg‘arma mablag‘larining aniq belgilangan maqsadlarga yo‘naltirilishini ta’minlash.

b) Jamg‘armani boshqarish bo‘yicha Kengashga choraklik va yillik hisobotlarni belgilangan tartibda va muddatlarda taqdim etish.

35. Jamg‘armaning ijro etuvchi direksiyasi zimmasiga Jamg‘arma mablag‘larining qat’iyan maqsadli va qonuniy yo‘naltirilishi, shuningdek buxgalterlik hisobining yuritilishi va Jamg‘arma faoliyati bo‘yicha hisobotlarning tuzilishi uchun javobgarlik yuklanadi.

36. Tijorat banklari Jamg‘arma mablag‘laridan to‘g‘ri va maqsadli foydalanish hamda ularni o‘z vaqtida qaytarish uchun mas’uldirlar.

37. Jamg‘armaning ijro etuvchi direksiyasi Jamg‘arma mablag‘larining maqsadli yo‘naltirilishi monitoringini doimiy ravishda belgilangan tartibda o‘tkazib boradi.

Tijorat banklari tomonidan Jamg‘arma mablag‘larining maqsadga muvofiq bo‘lmagan holda foydalanish holatlari aniqlanganda, maqsadga nomuvofiq foydalanilgan mablag‘larning umumiy hajmi muddatidan oldin undirib olinib, Jamg‘arma hisobvarag‘iga o‘tkaziladi hamda Jamg‘arma va tijorat banki o‘rtasida tuzilgan shartnomada belgilangan jarima sanksiyalari qo‘llaniladi.

38. Jamg‘arma mablag‘larining Jamg‘arma ijro etuvchi direksiyasi tomonidan qonuniy va qat’iyan maqsadli yo‘naltirilishi ustidan nazorat Jamg‘armani boshqarish bo‘yicha Kengash tomonidan amalga oshiriladi.

39. Jamg‘armaning har yilgi auditi mustaqil xalqaro auditor tomonidan amalga oshiriladi, Jamg‘arma mablag‘larining shakllantirilishi va foydalanilishi O‘zbekiston Respublikasi hisob palatasi tomonidan tekshirib turiladi.

40. Tijorat banklari tomonidan o‘z vaqtida qaytarilmagan Jamg‘arma mablag‘lari qonun hujjatlarida belgilangan tartibda undiriladi.

41. Jamg‘armani qayta tuzish va tugatish qonun hujjatlarida belgilangan tartibda amalga oshiriladi.