Oʻzbekiston Respublikasi Vazirlar Mahkamasining
qarori
Intellektual mulk obyektlariga oid muhofaza hujjatlarining amal qilish muddatini uzaytirish boʻyicha davlat xizmatini koʻrsatishning maʼmuriy reglamentini tasdiqlash toʻgʻrisida
Oʻzbekiston Respublikasining “Ixtirolar, foydali modellar va sanoat namunalari toʻgʻrisida”gi, “Tovar belgilari, xizmat koʻrsatish belgilari va tovar kelib chiqqan joy nomlari toʻgʻrisida”gi, “Geografik koʻrsatkichlar toʻgʻrisida”gi va “Seleksiya yutuqlari toʻgʻrisida”gi qonunlariga muvofiq Vazirlar Mahkamasi qaror qiladi:
1. Quyidagilarni nazarda tutuvchi Intellektual mulk obyektlariga oid muhofaza hujjatlarining amal qilish muddatini uzaytirish boʻyicha davlat xizmatini koʻrsatishning maʼmuriy reglamenti ilovaga muvofiq tasdiqlansin:
muhofaza hujjatlarining amal qilish muddatini uzaytirish shartlari va muddatlari;
muhofaza hujjatlarining amal qilish muddatini uzaytirish toʻgʻrisidagi arizani Oʻzbekiston Respublikasi Adliya vazirligiga (keyingi oʻrinlarda — vakolatli organ) topshirish tartibi va shartlari;
Oldingi tahrirga qarang.
arizani rezidentlar uchun — davlat xizmatlari markazi, vakolatli organning maxsus axborot tizimi yoki Yagona interaktiv davlat xizmatlari portali, norezidentlar uchun — davlat xizmatlari markazi, vakolatli organning maxsus axborot tizimi orqali topshirish;
(1-bandning toʻrtinchi xatboshisi Oʻzbekiston Respublikasi Vazirlar Mahkamasining 2026-yil 9-iyuldagi 375-sonli qarori tahririda — Qonunchilik maʼlumotlari milliy bazasi, 13.07.2026-y., 09/26/375/0726-son)
davlat xizmatini koʻrsatishda ariza beruvchi tomonidan Oʻzbekiston Respublikasining “Davlat boji toʻgʻrisida”gi Qonunida belgilangan miqdorlarda patent bojini toʻlash tartibi;
arizani vakolatli organ tomonidan koʻrib chiqish tartibi va muddatlari.
2. Oʻzbekiston Respublikasi Adliya vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
3. Mazkur qarorning bajarilishini nazorat qilish Oʻzbekiston Respublikasi adliya vaziri A.D. Tashkulov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 1-avgust,
468-son
Vazirlar Mahkamasining 2024-yil 1-avgustdagi 468-son qaroriga
ILOVA
Intellektual mulk obyektlariga oid muhofaza hujjatlarining amal qilish muddatini uzaytirish boʻyicha davlat xizmatini koʻrsatishning
MAʼMURIY REGLAMENTI
1-bob. Umumiy qoidalar
1. Mazkur Reglament Oʻzbekiston Respublikasining “Ixtirolar, foydali modellar va sanoat namunalari toʻgʻrisida”gi, “Tovar belgilari, xizmat koʻrsatish belgilari va tovar kelib chiqqan joy nomlari toʻgʻrisida”gi, “Geografik koʻrsatkichlar toʻgʻrisida”gi va “Seleksiya yutuqlari toʻgʻrisida”gi qonunlariga asosan intellektual mulk obyektlariga oid muhofaza hujjatlarining (patent, guvohnoma) amal qilish muddatini uzaytirish boʻyicha davlat xizmatini (keyingi oʻrinlarda — davlat xizmati) koʻrsatish tartibini belgilaydi.
2. Davlat xizmati Oʻzbekiston Respublikasi Adliya vazirligi (keyingi oʻrinlarda — vakolatli organ) tomonidan koʻrsatiladi.
3. Quyidagi intellektual mulk obyektlariga oid muhofaza hujjatlarining amal qilish muddati vakolatli organ tomonidan uzaytirilishi mumkin:
ixtiro;
foydali model;
sanoat namunasi;
seleksiya yutugʻi;
tovar belgisi va xizmat koʻrsatish belgisi (keyingi oʻrinlarda — tovar belgisi);
geografik koʻrsatkich;
tovar kelib chiqqan joy nomi.
4. Davlat xizmati mazkur Reglamentga 1-ilovaga muvofiq sxema boʻyicha koʻrsatiladi.
2-bob. Muhofaza hujjatlarining amal qilishini uzaytirish muddatlari
5. Patent berish haqidagi talabnoma topshirilgan sanadan eʼtiboran ixtiro patenti yigirma yil mobaynida amal qiladi.
Qoʻllanilishi uchun belgilangan tartibda tegishli davlat tashkilotidan ruxsatnoma olinishi lozim boʻlgan dori vositasi yoki pestitsidga taalluqli ixtiro patentining amal qilishi ixtiroga talabnoma berish sanasidan boshlab mahsulotni qoʻllash uchun birinchi ruxsatnoma olingan sanaga qadar hisoblanadigan muddatga uzaytiriladi. Bunda ixtiro patentning amal qilishining uzaytiriladigan muddati besh yildan oshmasligi kerak.
6. Patent berish haqidagi talabnoma topshirilgan sanadan eʼtiboran foydali model patenti besh yil mobaynida va sanoat namunasi patenti oʻn yil mobaynida amal qiladi.
Foydali model va sanoat namunasi patentining amal qilish muddati vakolatli organ tomonidan tegishlicha uch yilga hamda besh yilga uzaytirilishi mumkin.
7. Seleksiya yutugʻi patentining amal qilish muddati seleksiya yutugʻi tegishli davlat reyestrida roʻyxatga olingan sanadan eʼtiboran yigirma yilga teng.
Tok, yogʻochbop, manzarali, mevali va oʻrmon daraxtlarining navlari, shu jumladan, ularning payvandtaglari uchun bu muddat yigirma besh yilni tashkil etadi.
Seleksiya yutugʻi patentining amal qilish muddati koʻpi bilan oʻn yilga uzaytirilishi mumkin.
8. Tovar belgisiga doir guvohnoma va geografik koʻrsatkich yoki tovar kelib chiqqan joy nomidan foydalanish huquqi toʻgʻrisidagi guvohnoma talabnoma berilgan sanadan eʼtiboran oʻn yil mobaynida amal qiladi.
Mazkur bandning birinchi xatboshisida nazarda tutilgan guvohnomalarning amal qilish muddati har safar oʻn yilga uzaytirilishi mumkin.
3-bob. Arizani berish va koʻrib chiqish tartibi
9. Intellektual mulk obyektlariga oid muhofaza hujjatlarining amal qilish muddatini uzaytirish toʻgʻrisidagi arizalar intellektual mulk obyektiga boʻlgan huquq egasi hisoblangan yuridik va jismoniy shaxs (keyingi oʻrinlarda — ariza beruvchi) tomonidan bevosita yoki vakili (patent vakili yoki ishonchli shaxs) orqali beriladi.
10. Ixtiro patentining amal qilishini uzaytirish toʻgʻrisidagi ariza vakolatli organga patentni berish sanasidan yoki patentning amal qilishi davomida mahsulotni qoʻllash uchun birinchi ruxsatnoma olingan sanadan olti oy oʻtguniga qadar, mazkur muddatlarning qaysi biri kechroq tugashiga bogʻliq holda beriladi.
Foydali model va sanoat namunasi patentining amal qilishini uzaytirish toʻgʻrisidagi ariza vakolatli organga patentning amal qilishi tugagunga qadar soʻnggi uch oy ichida yoki qoʻshimcha davlat bojini (patent boji) toʻlash sharti bilan patentning amal qilishi tugagandan keyingi olti oy ichida beriladi.
Seleksiya yutugʻi patentining amal qilishini uzaytirish toʻgʻrisidagi ariza vakolatli organga patentning amal qilishi tugagunga qadar soʻnggi uch oy ichida yoki patentning amal qilishi tugagandan keyin olti oy ichida qoʻshimcha patent bojini toʻlash sharti bilan beriladi.
Tovar belgisiga doir guvohnoma va geografik koʻrsatkich yoki tovar kelib chiqqan joy nomidan foydalanish huquqi toʻgʻrisidagi guvohnomaning amal qilish muddatini uzaytirish toʻgʻrisidagi ariza guvohnoma amal qilayotgan oxirgi yil mobaynida yoki qoʻshimcha patent boji toʻlash sharti bilan guvohnomaning amal qilish muddati tugagandan keyingi olti oy mobaynida beriladi.
11. Intellektual mulk obyektlariga oid muhofaza hujjatlarining amal qilish muddatini uzaytirish toʻgʻrisidagi arizalar mazkur Reglamentga 2-ilovaga muvofiq shaklda beriladi.
Ariza bitta intellektual mulk obyektiga tegishli boʻlishi va unda xorijiy ismlar va nomlarning transliteratsiyasi keltirilishi lozim.
12. Dori vositasi yoki pestitsidga taalluqli ixtiro patentining amal qilish muddatini uzaytirish toʻgʻrisidagi arizaga qoʻllanilishi uchun tegishli davlat tashkiloti tomonidan berilgan ruxsatnoma (guvohnoma) ilova qilinadi.
Ruxsatnoma (guvohnoma) patentlangan ixtiro formulasida tavsiflangan mahsulot bilan identifikatsiya qilish imkoniyatini beradigan mahsulot, uning roʻyxatga olingan raqami va ushbu mahsulotni qoʻllash uchun birinchi ruxsatnoma (guvohnoma) olingan sana toʻgʻrisidagi maʼlumotlarni oʻz ichiga olishi lozim.
13. Vakil orqali berilgan arizaga vakilning vakolatlarini tasdiqlaydigan ishonchnoma ilova qilinadi. Ishonchnoma oddiy yozma shaklda rasmiylashtiriladi.
Ishonchnoma ariza bilan bir vaqtda taqdim etiladi.
Qonunchilik hujjatlarida belgilangan hollarda ariza vakolatli organda roʻyxatga olingan patent vakili orqali beriladi.
14. Davlat xizmatidan foydalanishda:
Oldingi tahrirga qarang.
rezidentlar — davlat xizmatlari markazi, vakolatli organning maxsus axborot tizimi (keyingi oʻrinlarda — axborot tizimi) yoki Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali;
(14-bandning ikkinchi xatboshisi Oʻzbekiston Respublikasi Vazirlar Mahkamasining 2026-yil 9-iyuldagi 375-sonli qarori tahririda — Qonunchilik maʼlumotlari milliy bazasi, 13.07.2026-y., 09/26/375/0726-son)
norezidentlar — axborot tizimi orqali vakolatli organga ariza beradi.
Ariza berilgandan keyingi bosqichlardagi barcha harakatlar axborot tizimi orqali amalga oshiriladi.
15. Arizani axborot tizimi yoki YIDXP orqali berishda ariza shakli toʻldirilganidan soʻng ariza beruvchi maʼlumotlarning toʻgʻriligini tekshirib, arizani tasdiqlaydi.
Oldingi tahrirga qarang.
Ariza beruvchi davlat xizmatlari markaziga kelib murojaat etganda, ariza davlat xizmatlari markazi xodimi tomonidan toʻldirilib, ariza beruvchi tomonidan tasdiqlangandan soʻng vakolatli organga elektron shaklda yuboriladi.
(15-band Oʻzbekiston Respublikasi Vazirlar Mahkamasining 2026-yil 9-iyuldagi 375-sonli qaroriga asosan ikkinchi xatboshi bilan toʻldirilgan — Qonunchilik maʼlumotlari milliy bazasi, 13.07.2026-y., 09/26/375/0726-son)
Yuridik shaxs nomidan ariza tashkilot rahbari yoki boshqa vakolatli shaxs tomonidan tasdiqlanadi.
16. Davlat xizmatini koʻrsatishda Oʻzbekiston Respublikasining “Davlat boji toʻgʻrisida”gi Qonunida nazarda tutilgan miqdorda patent boji toʻlanadi hamda qonunchilik hujjatlarida belgilangan tartibda taqsimlanadi.
Patent boji yagona billing tizimi orqali elektron shaklda toʻlanadi.
17. Ariza beruvchi tomonidan arizani tasdiqlashning rad etilishi, shuningdek, davlat xizmatini koʻrsatish uchun patent bojini toʻlamaslik davlat xizmati koʻrsatishni rad etish uchun asos boʻlib hisoblanadi.
Davlat xizmatini koʻrsatishni boshqa asoslar boʻyicha rad etish taqiqlanadi.
18. Vakolatli organ arizani qabul qilib, roʻyxatga olgandan soʻng ariza beruvchiga arizaning qayd raqami va kelib tushgan sanasi koʻrsatilgan xabarnomani tegishli ravishda axborot tizimi yoki YIDXP orqali avtomatik tarzda yuboradi.
19. Ariza vakolatli organga kelib tushgan kundan eʼtiboran oʻn besh kun muddat ichida koʻrib chiqiladi.
Arizani koʻrib chiqish davomida zarur hujjatlarning mavjudligi va mazkur Reglamentda belgilangan talablarga muvofiqligi tekshiriladi.
20. Tekshiruv davomida zarur hujjatlarning mavjud emasligi yoki arizaga ilova qilingan hujjatlar belgilangan talablar buzilgan holda rasmiylashtirilganligi aniqlanganda yoxud patent boji toʻloviga aniqlik kiritish zarurati vujudga kelganda ariza beruvchiga soʻrovnoma yuboriladi.
21. Soʻrovnoma yuborilgan sanadan eʼtiboran uch oy ichida ariza beruvchi zarur hujjatlarni taqdim etishi va (yoki) koʻrsatilgan kamchiliklarni bartaraf etishi lozim.
Ariza beruvchiga soʻrovnoma yuborilganda arizani koʻrib chiqish muddati toʻxtatib turiladi.
Soʻrovnomaga belgilangan muddatda toʻliq javob taqdim etilmaganda ariza chaqirib olingan deb hisoblanadi.
22. Taqdim etilgan hujjatlar belgilangan talablarga muvofiq boʻlganda vakolatli organ muhofaza hujjatining amal qilish muddatini uzaytiradi va bu toʻgʻrisidagi maʼlumotlarni tegishli davlat reyestriga kiritadi.
Ariza beruvchiga muhofaza hujjatining amal qilish muddati uzaytirilganligi toʻgʻrisidagi xabarnoma muhofaza hujjatiga ilova shaklida axborot tizimi orqali yuboriladi.
23. Taqdim etilgan hujjatlar belgilangan talablarga muvofiq boʻlmagan hollarda, shuningdek, patent boji toʻlanmaganda (toʻliq toʻlanmaganda), vakolatli organ muhofaza hujjatining amal qilish muddatini uzaytirishni rad etadi.
Bunda vakolatli organ tomonidan ariza beruvchiga muhofaza hujjatining amal qilish muddatini uzaytirish rad etilganligi toʻgʻrisidagi huquqiy asoslar koʻrsatilgan xabarnoma yuboriladi.
24. Muhofaza hujjatining amal qilish muddati uzaytirilganligi toʻgʻrisidagi maʼlumotlar rasmiy axborotnomada eʼlon qilinadi.
4-bob. Yakunlovchi qoidalar
25. Ariza beruvchi arizaga aloqador ish yuritish bilan axborot tizimi orqali tanishib chiqishi mumkin.
26. Soʻrovnoma va xabarnomalar vakolatli organ tomonidan QR-kod (matrik shtrixli kod) qoʻyish orqali tasdiqlanib yuboriladi.
27. Vakolatli organning muhofaza hujjatining amal qilish muddatini uzaytirishni rad etish boʻyicha harakatlari yuzasidan qonunchilik hujjatlarida belgilangan tartibda shikoyat qilish mumkin.
 LexUZ sharhi
Qarang: Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi va “Sudlar toʻgʻrisida”gi qonunlari.
28. Mazkur Reglament talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladilar.
 LexUZ sharhi
Qarang: Oʻzbekiston Respublikasi Maʼmuriy javobgarlik toʻgʻrisidagi kodeksining 2155-moddaci.
Intellektual mulk obyektlariga oid muhofaza hujjatlarining amal qilish muddatini uzaytirish boʻyicha davlat xizmatini koʻrsatishning maʼmuriy reglamentiga
1-ILOVA
Intellektual mulk obyektlariga oid muhofaza hujjatlarining amal qilish muddatini uzaytirish boʻyicha davlat xizmatini koʻrsatish
SXEMASI
Oldingi tahrirga qarang.

Bosqichlar

Subyektlar

Tadbirlar

Ijro muddati

1-bosqich

Ariza beruvchi

Davlat xizmatidan foydalanish uchun davlat xizmatlari markazi, vakolatli organning axborot tizimi yoki Oʻzbekiston Respublikasi Yagona interaktiv davlat xizmatlari portali orqali ariza beradi.

Zaruratga koʻra

2-bosqich

Ariza beruvchi

Muhofaza hujjatining amal qilish muddatini uzaytirish uchun patent bojini toʻlaydi.

Ariza berish bilan bir vaqtda

3-bosqich

Vakolatli organ

1. Arizani qabul qiladi.

2. Arizaning qayd raqami va kelib tushgan sanasi koʻrsatilgan xabarnomani ariza beruvchiga yuboradi.

Patent boji toʻlanganidan soʻng avtomatik tarzda

4-bosqich

Vakolatli organ

1. Arizani koʻrib chiqadi.

2. Muhofaza hujjatining amal qilish muddatini uzaytiradi va bu toʻgʻrisidagi maʼlumotlarni tegishli davlat reyestriga kiritadi.

Ariza kelib tushgan sanadan boshlab 15 kun ichida

5-bosqich

Vakolatli organ

Ariza beruvchiga muhofaza hujjatining amal qilish muddati uzaytirilganligi toʻgʻrisidagi xabarnomani muhofaza hujjatiga ilova shaklida axborot tizimi orqali yuboradi.

Muddatni uzaytirish bilan bir vaqtda

(1-ilova Oʻzbekiston Respublikasi Vazirlar Mahkamasining 2026-yil 9-iyuldagi 375-sonli qarori tahririda — Qonunchilik maʼlumotlari milliy bazasi, 13.07.2026-y., 09/26/375/0726-son)
Intellektual mulk obyektlariga oid muhofaza hujjatlarining amal qilish muddatini uzaytirish boʻyicha davlat xizmatini koʻrsatishning maʼmuriy reglamentiga
2-ILOVA
Intellektual mulk obyektiga oid muhofaza hujjatining amal qilish muddatini uzaytirish toʻgʻrisida
ARIZA

Ariza kelib tushgan sana:

___________________________________________

(vakolatli organ tomonidan avtomatik tarzda toʻldiriladi)

Arizaning qayd raqami:

___________________________________________

(vakolatli organ tomonidan avtomatik tarzda toʻldiriladi)

Intellektual mulk obyektiga oid muhofaza hujjatining amal qilish muddatini uzaytirish toʻgʻrisida

ARIZA

Oʻzbekiston Respublikasi

Adliya vazirligi

Ariza beruvchi:

_____________________________________________________________________________________________

_____________________________________________________________________________________________

_____________________________________________________________________________________________

_____________________________________________________________________________________________

(yuridik shaxslarning taʼsis hujjatlari boʻyicha toʻliq nomi, joylashgan yeri yoki jismoniy shaxslar uchun F.I.O. hamda yashash joyi manzillari koʻrsatiladi)

Telefon: ____________________

STIR yoki JSHSHIR

(rezidentlar uchun):

___________________________

BIMT ST. 3 standarti boʻyicha mamlakat kodi

(agar u oʻrnatilgan boʻlsa):

___________________________

Intellektual mulk obyekti turi

Muhofaza hujjatining raqami

• ixtiro

• foydali model

• sanoat namunasi

• seleksiya yutugʻi

• tovar belgisi (xizmat koʻrsatish belgisi)

• geografik koʻrsatkich

• tovar kelib chiqqan joy nomi

___________________________________________

Ilova qilingan hujjatlar:

•maʼmuriy reglamentning 12-bandida nazarda tutilgan ruxsatnoma (guvohnoma);

•huquqiy vorislikni tasdiqlaydigan hujjat nusxasi;

•ishonchnoma;

•boshqa hujjatlar (koʻrsatilsin).

________________________________________________________________

________________________________________________________________

QR-kod

________________________________________________________________

ariza beruvchi yoki vakil

(Qonunchilik maʼlumotlari milliy bazasi, 02.08.2024-y., 09/24/468/0570-son; 13.07.2026-y., 09/26/375/0726-son)