Ushbu Qonunning maqsadi investitsiya va pay fondlari faoliyati sohasidagi munosabatlarni tartibga solishdan iborat.

Investitsiya va pay fondlari toʻgʻrisidagi qonunchilik ushbu Qonun va boshqa qonunchilik hujjatlaridan iboratdir.

Oʻzbekiston Respublikasining Konstitutsiyaviy Qonuni bilan maxsus huquqiy rejim oʻrnatilgan hududda investitsiya va pay fondlari faoliyati sohasidagi munosabatlar ushbu Qonunda belgilanganidan boshqacha qoidalar bilan tartibga solinadi.

Agar Oʻzbekiston Respublikasining xalqaro shartnomasida Oʻzbekiston Respublikasining investitsiya va pay fondlari toʻgʻrisidagi qonunchiligida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

Investorlarning pul mablagʻlarini jalb etish va ularni investitsiya aktivlariga qoʻyish maqsadida aksiyalar chiqarishni amalga oshiruvchi yuridik shaxs — aksiyadorlik jamiyati investitsiya fondidir.

Investitsiya fondi quyidagi turda boʻlishi mumkin:

oʻzi chiqargan aksiyalarni qaytarib sotib olish majburiyatiga ega boʻlgan investitsiya fondi;

oʻzi chiqargan aksiyalarni qaytarib sotib olish majburiyatiga ega boʻlmagan investitsiya fondi.

Investitsiya fondining turi fondning taʼsis hujjatlarida koʻrsatiladi.

Investitsiya faoliyatini amalga oshirish maqsadida ikki va undan ortiq shaxslarning — investorlarning oʻzi ishonchli boshqaruvga bergan pul mablagʻlari yigʻindisi pay fondidir.

Pay fondi quyidagi turda boʻlishi mumkin:

chiqarilgan investitsiya paylarini ishonchli boshqaruvchi tomonidan fondning mablagʻlari hisobidan qaytarib sotib olish majburiyatiga ega boʻlgan pay fondi;

chiqarilgan investitsiya paylarini ishonchli boshqaruvchi tomonidan fondning mablagʻlari hisobidan qaytarib sotib olish majburiyatiga ega boʻlmagan pay fondi.

Pay fondining turi pay fondini ishonchli boshqarish shartnomasida koʻrsatiladi.

Pay fondi yuridik shaxs boʻlmaydi.

Oʻz egalarining pay fondidagi ulushini tasdiqlovchi hujjatsiz qimmatli qogʻoz investitsiya payidir.

Investitsiya payiga boʻlgan huquqlar Qimmatli qogʻozlar markaziy depozitariysi tomonidan investitsiya paylari egasining depo hisobvaragʻidan beriladigan koʻchirma bilan tasdiqlanadi.

Investitsiya fondining yoki pay fondining investitsiya portfelini tashkil etuvchi qimmatli qogʻozlar, ulushlar, pul mablagʻlari (shu jumladan chet el valyutasi), omonatlar va koʻchmas mulk investitsiya aktivlaridir.

Investitsiya fondining yoki pay fondining toʻliq nomi tegishincha “investitsiya fondi” yoki “pay fondi” degan soʻz birikmasini oʻz ichiga olgan boʻlishi kerak hamda boshqa investitsiya va pay fondlarining nomiga oʻxshash boʻlishi mumkin emas. Bunda pay fondining nomida investitsiya qilish obyekti (aksiya, obligatsiya, xom ashyo bozorlari, yuqori texnologiyalar va boshqalar) koʻrsatilishi kerak.

Investitsiya va pay fondlari qisqartirilgan nomga ega boʻlishi mumkin.

Investitsiya fondi boʻlmagan yuridik shaxslar oʻz nomida “investitsiya fondi” degan soʻz birikmasidan foydalanishga haqli emas.

Investitsiya fondi oʻzining toʻliq nomi davlat tilida ifodalangan va oʻz joylashgan yeri koʻrsatilgan yumaloq muhrga ega boʻlishi shart. Muhrda uning nomi ayni vaqtning oʻzida boshqa istalgan tilda ham koʻrsatilishi mumkin.

Investitsiya fondi oʻzining nomi yozilgan shtamplariga va blankalariga, oʻz emblemasiga ega boʻlishga haqli.

Ishonchli boshqaruvchi deganda ushbu Qonunda investitsiya fondlarini va (yoki) pay fondlarini ishonchli boshqarish shartnomasi asosida ishonchli boshqarishni amalga oshiruvchi yuridik shaxs tushuniladi.

Ishonchli boshqaruvchi qimmatli qogʻozlar bozorining professional ishtirokchisidir.

Ishonchli boshqaruvchi oʻzi boshqaradigan investitsiya aktivlari oʻrtacha yillik qiymatining kamida 5 foizi miqdorida oʻz kapitaliga (ustav kapitaliga qoʻyilgan nomoddiy aktivlarni chegirib tashlagan holda) ega boʻlishi kerak.

Investitsiya fondini va (yoki) pay fondini boshqaruvga qabul qilgan ishonchli boshqaruvchi ishonchli boshqarish shartnomasida nazarda tutilgan doirada bu fondlarga (fondga) nisbatan mulkdorning huquqlarini amalga oshiradi.

Ishonchli boshqaruvchining huquq va majburiyatlari qonunchilikda, investitsiya fondining ustavida, ishonchli boshqarish shartnomasida hamda investitsiya fondining ijroiya organi toʻgʻrisidagi nizomida belgilanadi.

Ishonchli boshqaruvchi oʻzining ustavida belgilangan tarkibda va tartibda ichki audit xizmatini tashkil etishi shart.

Ishonchli boshqaruvchi oʻz boshqaruvida boʻlgan investitsiya fondlarining aksiyalarini va pay fondlarining investitsiya paylarini olishga haqli emas.

Investitsiya va pay fondlari toʻgʻrisidagi qonunchilik buzilgan taqdirda, ishonchli boshqaruvchi investitsiya fondi aksiyalarining va pay fondi investitsiya paylarining egalari oldida yetkazilgan haqiqiy zarar miqdorida javobgar boʻladi.

Xizmatlar koʻrsatganlik uchun ishonchli boshqaruvchiga investitsiya fondining va (yoki) pay fondining mablagʻlari hisobidan ishonchli boshqarish shartnomasiga muvofiq haq toʻlanadi. Haqning umumiy miqdori va uni toʻlashning oʻziga xos xususiyatlari ushbu shartnomada belgilanadi.

Ishonchli boshqaruvchi va investitsiya fondi oʻrtasida yoxud ishonchli boshqaruvchi va pay fondining investorlari oʻrtasida tuziladigan, ishonchli boshqarish chogʻidagi cheklovlarni, haq toʻlash va xarajatlarning oʻrnini qoplash tartibini, shartnomaning amal qilishini tugatish asoslari va shartlarini, taraflarning javobgarligini hamda qonunchilikka muvofiq boshqa qoidalarni nazarda tutadigan shartnoma ishonchli boshqarish shartnomasidir.

Pay fondini ishonchli boshqarish shartnomasi qoʻshilish shartnomasidir.

Ishonchli boshqaruv ishonchli boshqarish shartnomasiga muvofiq amalga oshiriladi, ishonchli boshqaruvchining rahbari tomonidan ushbu shartnoma:

aksiyadorlar umumiy yigʻilishining qaroriga asosan investitsiya fondining kuzatuv kengashi raisi bilan;

shartnomani imzolash va unga qoʻshilish orqali pay fondining investorlari bilan tuziladi.

Investitsiya fondi tomonidan bir vaqtning oʻzida bir nechta ishonchli boshqaruvchi bilan ishonchli boshqarish shartnomasi tuzishga yoʻl qoʻyilmaydi.

Ishonchli boshqarish shartnomasida uning ajralmas qismi boʻlgan va investitsiya aktivlarining tarkibiga nisbatan talablar qoʻyadigan investitsiya deklaratsiyasi boʻlishi kerak.

Pay fondini ishonchli boshqarish shartnomasining amal qilish muddati besh yildan oshmasligi kerak. Agar investitsiya paylarining egalari oʻzlariga tegishli barcha investitsiya paylarini muomaladan chiqarishni talab qilmagan boʻlsa, shartnomaning amal qilish muddati investitsiya paylari egalari umumiy yigʻilishining qarori bilan bir yilga uzaytirilishi mumkin.

Investitsiya deklaratsiyasida quyidagilar boʻlishi kerak:

investitsiya fondini yoki pay fondini tashkil etish va uning faoliyatini amalga oshirish maqsadi;

investitsiya fondining yoki pay fondining pul mablagʻlari va boshqa mablagʻlari investitsiya qilinadigan investitsiya aktivlarining roʻyxati;

investitsiya tavakkalchiliklarining tavsifi;

ishonchli boshqaruvchi saqlab turishi shart boʻlgan investitsiya aktivlarining tarkibi toʻgʻrisidagi maʼlumotlar (har xil turdagi qimmatli qogʻozlar va emitentlar oʻrtasidagi, shuningdek qimmatli qogʻozlar, pul mablagʻlari va boshqa investitsiya aktivlari oʻrtasidagi nisbat);

investitsiya deklaratsiyasining investitsiya fondi yoki pay fondi va ishonchli boshqaruvchi tomonidan rioya etilishi shart boʻlgan qoidalarining amal qilish muddati;

pay fondining investitsiya paylari egalari umumiy yigʻilishining vakolatlari toʻgʻrisidagi qoidalar, investitsiya payi har bir egasining huquq va majburiyatlari, shuningdek pay fondini ishonchli boshqaruvchining huquq va majburiyatlari.

Investitsiya fondining investitsiya deklaratsiyasi, shu jumladan unga kiritilgan oʻzgartish va qoʻshimchalar investitsiya fondi aksiyadorlari umumiy yigʻilishining qarori bilan tasdiqlanadi.

Pay fondining investitsiya deklaratsiyasi, shu jumladan unga kiritilgan oʻzgartish va qoʻshimchalar pay fondi investorlarining (investitsiya paylari egalarining) qarori bilan tasdiqlanadi.

Investitsiya deklaratsiyasi, shu jumladan unga kiritilgan oʻzgartish va qoʻshimchalar qimmatli qogʻozlar bozorini tartibga solish boʻyicha vakolatli davlat organiga ushbu deklaratsiya tasdiqlangan kundan eʼtiboran oʻn kalendar kun ichida taqdim etiladi.

Investitsiya fondi yangi yuridik shaxsni taʼsis etish yoki boshqa investitsiya fondini qayta tashkil etish yoʻli bilan tashkil etiladi. Investitsiya fondini investitsiya fondi boʻlmagan boshqa yuridik shaxsni qayta tashkil etish orqali tashkil etishga yoʻl qoʻyilmaydi.

Investitsiya fondi tijorat tashkiloti boʻlib, u oʻzining alohida hisobga olinadigan mol-mulkiga, shu jumladan ustav kapitaliga berilgan mol-mulkka ega boʻladi.

Yuridik va jismoniy shaxslar investitsiya fondining muassislari (aksiyadorlari) sifatida ish yuritishi mumkin.

Investitsiya fondini davlat roʻyxatidan oʻtkazish davlat xizmatlari markazlari tomonidan amalga oshiriladi.

Investitsiya fondini tashkil etishda uning aksiyalari qiymatini toʻlash pul mablagʻlari, qimmatli qogʻozlar, ulushlar, shuningdek koʻchmas mulk va boshqa mol-mulk, mulkiy huquqlar bilan amalga oshiriladi. Bunda uning ustav kapitalining kamida 75 foizi pul shaklida toʻlanishi kerak.

Investitsiya fondining aksiyalarini joylashtirish fond birjasida amalga oshiriladi, bundan ushbu fond muassislari oʻrtasida yopiq obuna boʻyicha joylashtiriladigan aksiyalarning dastlabki chiqarilishi mustasno.

Aksiyadorlarning umumiy yigʻilishi va kuzatuv kengashi, shuningdek vakolatlarini ishonchli boshqaruvchi amalga oshiradigan ijroiya organi investitsiya fondining boshqaruv organlaridir.

Investitsiya fondi:

korporativ obligatsiyalar va infratuzilma obligatsiyalari, shuningdek imtiyozli aksiyalar chiqarishga;

investitsiya fondi sof aktivlarining 10 foizidan ortigʻini bir emitentning qimmatli qogʻozlariga yoki masʼuliyati cheklangan jamiyatning ulushiga investitsiya qilishga;

toʻlanishi lozim boʻlgan qarzlarning jami hajmi kredit va (yoki) qarz bitimi imzolangan sanadagi investitsiya fondi sof aktivlari qiymatining 15 foizidan oshib ketgan taqdirda, kredit va (yoki) qarz mablagʻlarini jalb etishga (bunda kredit va (yoki) qarz muddati uch oydan oshib ketmasligi kerak);

kafil boʻlishga, mol-mulkni yoki mulkiy huquqlarni garovga qoʻyishga;

tashkiliy-huquqiy shakli oʻz ishtirokchilarining qoʻshimcha javobgarligini nazarda tutadigan xoʻjalik jamiyatlarining qimmatli qogʻozlariga va ulushlariga investitsiyalarni amalga oshirishga;

ishonchli boshqaruvchi, auditorlik tashkilotlari tomonidan chiqarilgan qimmatli qogʻozlarga investitsiyalarni amalga oshirishga, shuningdek ularning ustav kapitalidagi ulushlarini olishga;

boshqa investitsiya fondlarining aksiyalarini olishga va ularga ega boʻlishga;

investitsiya faoliyati bilan bogʻliq boʻlmagan bitimlar tuzishga, opsionlar yoki fyucherslar olishga;

umumiy summasi fond sof aktivlarining 10 foizidan ortiq investitsiyalarni amalga oshirishga (bundan qimmatli qogʻozlarga qoʻyish mustasno) haqli emas.

Investitsiya fondi investitsiya fondi sifatida oʻz faoliyatini tugatmasdan yuridik shaxsning boshqa tashkiliy-huquqiy shakllariga oʻzgartirilishga haqli emas.

Ishonchli boshqaruvchi boʻlmagan taqdirda, investitsiya fondining kuzatuv kengashi uch oy ichida ishonchli boshqaruvchi yollashi yoxud investitsiya fondini tugatish tashabbusi bilan chiqishi shart.

Investitsiya fondlari tomonidan chiqarilgan va ularga tegishli qimmatli qogʻozlarga boʻlgan huquqlarni hisobga olish, shuningdek ularni saqlash, agar qonunchilikda boshqacha qoida belgilanmagan boʻlsa, Qimmatli qogʻozlar markaziy depozitariysi tomonidan amalga oshiriladi.

Investitsiya aktivlari ishonchli boshqaruvchida alohida balansda aks ettiriladi va u boʻyicha mustaqil hisob yuritiladi. Ishonchli boshqarish bilan bogʻliq faoliyat boʻyicha hisob-kitoblar uchun alohida bank hisobvaragʻi ochiladi.

Investitsiya fondining buxgalteriya hisobini yuritish hamda moliya, soliq hisobotlarini va boshqa hisobotlarni tuzish ishonchli boshqaruvchi tomonidan amalga oshiriladi.

Ishonchli boshqaruvchi fond investitsiya aktivlarining alohida hisobini yuritadi, ularning yaxlitligini va but saqlanishini taʼminlaydi, shuningdek investitsiya fondining moliya, soliq hisobotlari hamda boshqa hisobotlarining toʻgʻriligi va ishonchliligi uchun javobgar boʻladi.

Pay fondini tashkil etish toʻgʻrisidagi qaror ishonchli boshqaruvchi tomonidan qabul qilinadi.

Investor ishonchli boshqaruvchi bilan tuziladigan, investorlarning pul mablagʻlarini umumiy ulushli mulk huquqi asosida pay fondiga birlashtirish nazarda tutiladigan shartnoma asosida pay fondiga pul mablagʻlarini kiritadi.

Ishonchli boshqaruvchi oʻzining alohida bank hisobvaragʻiga investorlar pul mablagʻlarini kiritganidan keyin ikki ish kuni ichida ularga investitsiya paylarini beradi.

Investitsiya paylarini joylashtirish barcha investorlar uchun yagona narx boʻyicha amalga oshiriladi.

Pay fondining pul mablagʻlari investitsiya deklaratsiyasiga binoan investitsiya qilinadi.

Pay fondini ishonchli boshqarish jarayonida olingan daromadlar ishonchli boshqaruvchining alohida bank hisobvaragʻida jamlanadi.

Pay fondi u Pay fondlarining yagona reyestriga kiritilgan va tegishli axborot qimmatli qogʻozlar bozorini tartibga solish boʻyicha vakolatli davlat organining hamda Qimmatli qogʻozlar markaziy depozitariysining rasmiy veb-saytlarida eʼlon qilingan paytdan eʼtiboran tashkil etilgan deb hisoblanadi.

Pay fondlarining yagona reyestrini yuritish qimmatli qogʻozlar bozorini tartibga solish boʻyicha vakolatli davlat organi tomonidan belgilangan tartibda amalga oshiriladi.

Pay fondining hisobi pay fondi Pay fondlarining yagona reyestriga kiritilganidan keyin investitsiya paylarini hisobga qoʻyish orqali Qimmatli qogʻozlar markaziy depozitariysi tomonidan amalga oshiriladi.

Investitsiya paylari pay fondini tashkil etish toʻgʻrisida qaror qabul qilingan paytdan eʼtiboran bir hafta ichida hisobga qoʻyilishi kerak.

Investitsiya paylarini hisobga qoʻyish chogʻida investorlarga Qimmatli qogʻozlar markaziy depozitariysida depo hisobvaraqlari ochiladi, bu hisobvaraqlarda investorlarga tegishli investitsiya paylariga boʻlgan huquqlarning hisobi yuritiladi.

Ishonchli boshqaruvchi pay fondi Qimmatli qogʻozlar markaziy depozitariysida hisobga qoʻyilganidan keyin investorlarning pul mablagʻlarini tasarruf etishga haqli.

Pay fondining pul mablagʻlari ishonchli boshqaruvchining rahbari va Qimmatli qogʻozlar markaziy depozitariysining vakolatli mansabdor shaxsi tomonidan imzolanadigan toʻlov hujjati asosida sarflanadi.

Pul mablagʻlaridan hamda boshqa investitsiya aktivlaridan foydalanishning maqsadi va yoʻnalishlari ishonchli boshqarish shartnomasi shartlariga, shu jumladan investitsiya deklaratsiyasiga muvofiq boʻlishi kerak.

Investitsiya aktivlari boʻyicha olingan daromadlar pay fondining investitsiya paylari egalari oʻrtasida yilda bir marta taqsimlanadi yoxud investitsiya paylarining barcha egalari roziligiga koʻra qayta investitsiya qilinadi. Pay fondining investitsiya paylari egalariga daromadlarni toʻlash ishonchli boshqaruvchi tomonidan amalga oshiriladi.

Ishonchli boshqaruvchi tomonidan pay fondi nomidan va ushbu fond mablagʻlari hisobidan tuziladigan shartnomalar Qimmatli qogʻozlar markaziy depozitariysida roʻyxatdan oʻtkazilishi kerak.

Pay fondining pul mablagʻlari:

fond investitsiya aktivlarining 10 foizidan ortiq miqdorda bir emitentning qimmatli qogʻozlariga yoki masʼuliyati cheklangan jamiyatning ulushlariga investitsiya qilinishi;

tashkiliy-huquqiy shakli oʻz ishtirokchilarining qoʻshimcha javobgarligini nazarda tutadigan xoʻjalik jamiyatlarining qimmatli qogʻozlariga va ulushlariga investitsiya qilinishi;

ishonchli boshqaruvchi, auditorlik tashkilotlari tomonidan chiqarilgan qimmatli qogʻozlarga, shuningdek ularning ustav kapitalidagi ulushlarini olishga investitsiya qilinishi;

investitsiya faoliyati bilan bogʻliq boʻlmagan yoʻnalishlar boʻyicha foydalanilishi;

fond investitsiya aktivlari umumiy summasining 10 foizidan ortiq miqdorda investitsiya qilinishi (bundan qimmatli qogʻozlarga qoʻyish mustasno) mumkin emas.

Investitsiya payining muomalasi uning fond birjasidagi oldi-sotdisi va investitsiya payining egasi almashishiga olib keladigan boshqa harakatlarni bajarish orqali amalga oshiriladi.

Ishonchli boshqarish shartnomasida pay fondining investitsiya paylarini ularning egasi talabiga koʻra, ayni bir ishonchli boshqaruvchining ishonchli boshqaruvida boʻlgan boshqa pay fondining investitsiya paylariga almashtirish imkoniyati nazarda tutilishi mumkin. Bunda bir pay fondining investitsiya paylarini boshqa pay fondining investitsiya paylariga almashtirish almashtirilishi lozim boʻlgan investitsiya paylarini muomaladan chiqarish sanasi almashtirilayotgan investitsiya paylarini berish sanasiga mos kelgan taqdirdagina amalga oshirilishi mumkin.

Pay fondini tugatish quyidagi hollarda amalga oshiriladi:

ishonchli boshqarish shartnomasining amal qilish muddati tugaganda;

barcha investitsiya paylarini muomaladan chiqarish uchun buyurtmalar kelib tushganda;

ishonchli boshqaruvchining litsenziyasi bekor qilinganda, agar uning pay fondini ishonchli boshqarish shartnomasi boʻyicha huquq va majburiyatlari litsenziya bekor qilingan kundan eʼtiboran uch oy ichida boshqa ishonchli boshqaruvchiga berilmagan boʻlsa;

pay fondi hujjatlarida koʻrsatilgan pay fondini tashkil etish va uning faoliyatini amalga oshirish maqsadiga erishilganda;

investitsiya paylari egalarining pay fondini tugatish toʻgʻrisida bir ovozdan qabul qilingan qarori mavjud boʻlganda.

Pay fondining investitsiya aktivlari ishonchli boshqaruvchi tomonidan fond birjasida (qimmatli qogʻozlar uchun) va kimoshdi savdosida realizatsiya qilinishi lozim. Pay fondining investitsiya aktivlarini realizatsiya qilishdan tushgan mablagʻlar pay fondining investitsiya paylari egalariga oʻzlariga tegishli boʻlgan investitsiya paylari soniga mutanosib ravishda toʻlanishi kerak.

Pay fondi investitsiya paylari egalarining pay fondi negizida investitsiya fondini taʼsis etish toʻgʻrisida bir ovozdan qabul qilingan qarori pay fondini tugatish haqidagi qaror deb eʼtirof etiladi.

Pay fondi tugatilganda mazkur pay fondi ishonchli boshqaruvchisining faoliyati auditorlik tashkiloti tomonidan majburiy auditdan oʻtkazilishi kerak.

Investitsiya payini muomaladan chiqarish pay fondi tugatilganda amalga oshiriladi.

Investitsiya payini muomaladan chiqarish quyidagilar orqali amalga oshirilishi mumkin:

investitsiya payining qiymatini ishonchli boshqaruvchi tomonidan pay fondi mablagʻlari hisobidan pul mablagʻlari bilan toʻlash;

investitsiya payini pay fondi negizida tuzilgan investitsiya fondining aksiyalariga ayirboshlash.

Investitsiya va pay fondlari faoliyatini tartibga solish qimmatli qogʻozlar bozorini tartibga solish boʻyicha vakolatli davlat organi tomonidan quyidagilar orqali amalga oshiriladi:

investitsiya va pay fondlarini ishonchli boshqarish tartibini, shu jumladan ushbu fondlarning investitsiya aktivlari hisobini yuritish hamda ularning faoliyati toʻgʻrisidagi axborotni oshkor etish tartibini belgilash;

ishonchli boshqaruvchi mansabdor shaxslarining hamda affillangan shaxslarining investitsiya va pay fondlari operatsiyalarida ishtirok etishini cheklash;

investitsiya deklaratsiyasining mazmuniga hamda investitsiya va pay fondlarining boshqa hujjatlariga doir talablarni belgilash;

investitsiya va pay fondlarining, ishonchli boshqaruvchilarning va Qimmatli qogʻozlar markaziy depozitariysining faoliyatini nazorat qilish.

Ishonchli boshqaruvchi bilan tuzilgan shartnoma asosida ishonchli boshqaruvchi nomidan va uning hisobidan faoliyat yurituvchi Qimmatli qogʻozlar markaziy depozitariysigina investitsiya paylarini berish, muomaladan chiqarish va almashtirish boʻyicha agent boʻlishi mumkin. Qimmatli qogʻozlar markaziy depozitariysining investitsiya paylarini berish, muomaladan chiqarish va almashtirishga doir faoliyati tartibi qimmatli qogʻozlar bozorini tartibga solish boʻyicha vakolatli davlat organi tomonidan belgilanadi.

Investitsiya aktivlarining hisobini yuritish va ushbu aktivlar boʻyicha hisobotlar tuzish ishonchli boshqaruvchi tomonidan amalga oshiriladi.

Investitsiyalar pay fondining mablagʻlari hisobidan amalga oshirilgan taqdirda, qimmatli qogʻozlar egalarining reyestrida va xoʻjalik jamiyatlarining taʼsis hujjatlarida ishonchli boshqaruvchi koʻrsatilib, u pay fondining ishonchli boshqaruvchisi sifatida faoliyat yuritayotganligi toʻgʻrisida belgi qoʻyiladi.

Investitsiya va pay fondlarining faoliyati toʻgʻrisidagi axborotni oshkor etish ishonchli boshqaruvchi tomonidan quyidagilar orqali amalga oshiriladi:

axborotni investitsiya fondlarining, pay fondlari ishonchli boshqaruvchisining, qimmatli qogʻozlar bozorini tartibga solish boʻyicha vakolatli davlat organining, shuningdek fond birjasining rasmiy veb-saytlarida qonunchilikka muvofiq eʼlon qilish;

axborotni belgilangan tartibda soʻrovga koʻra taqdim etish.

Qimmatli qogʻozlar bozorini tartibga solish boʻyicha vakolatli davlat organi va fond birjasi ushbu moddada nazarda tutilgan axborotni oʻz rasmiy veb-saytlarida eʼlon qilganlik uchun haq olishga haqli emas.

Investitsiya va pay fondlari faoliyati sohasidagi nizolar qonunchilikda belgilangan tartibda hal etiladi.

Investitsiya va pay fondlari toʻgʻrisidagi qonunchilikni buzganlikda aybdor shaxslar belgilangan tartibda javobgar boʻladi.

Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

Ushbu Qonun rasmiy eʼlon qilingan kundan eʼtiboran kuchga kiradi.

Ushbu Qonunning 3-bobi qoidalari 2017-yil 1-iyuldan eʼtiboran amalga kiritiladi.