Ўзбекистон Республикаси Президентининг «Ўзбекистон Республикасида туризм инфратузилмасини яхшилаш ва хорижий туристлар оқимини янада оширишга қаратилган қўшимча чора-тадбирлар тўғрисида» 2024 йил 18 июлдаги ПФ-102-сон Фармони ижроси юзасидан, шунингдек, тижорат банклари томонидан кредитлар ажратилиши ҳамда улардан самарали ва манзилли фойдаланилишини таъминлаш мақсадида Вазирлар Маҳкамаси қарор қилади:

1. Қуйидагилар маълумот учун қабул қилинсин:

2024 йил 1 сентябрдан бошлаб кириш туризми фаолиятини амалга оширувчи Ўзбекистон Республикаси резиденти бўлган туроператорларни (кейинги ўринларда — туроператорлар) уларнинг хорижий мамлакатлардан республикага туристларни олиб келиш билан боғлиқ харажатларини молиялаштириш учун айланма маблағ билан таъминлаш мақсадида Тикланиш ва тараққиёт жамғармаси томонидан республика тижорат банклари (кейинги ўринларда — иштирокчи тижорат банклари) орқали 50 млн АҚШ доллари эквивалентида миллий валютада йиллик 14 фоиз ставкада кредит линияси (кейинги ўринларда — мақсадли кредит линияси) очилганлиги;

кредит ресурслари тижорат банкларига 3 йиллик имтиёзли давр билан 12 йил муддатга ажратилиши;

тижорат банклари томонидан ажратиладиган кредитлар бўйича йиллик фоиз ставкаси таркибидаги банк маржаси 3 фоиздан ошмаган миқдорда ўрнатилиб, кредитлар туроператорларга 2 йиллик имтиёзли давр (фоиз ва асосий қарздан) билан 10 йил муддатга берилиши.

2. Белгилансинки, туроператорларга кредитлар бевосита уларнинг бирламчи ҳисобварақлари мавжуд тижорат банклари орқали ажратилади.

3. Тикланиш ва тараққиёт жамғармаси кредит ресурсларининг иштирокчи тижорат банклари талабномалари келиб тушган кундан эътиборан уч кун муддатда тасдиқланган тақсимот бўйича тегишли тижорат банклари кесимида жойлаштирилишини таъминласин.

4. Белгилаб қўйилсинки:

тижорат банклари томонидан кредитлар туроператорларни уларнинг хорижий мамлакатлардан республикага туристларни олиб келиш билан боғлиқ харажатларини молиялаштириш учун айланма маблағ билан таъминлаш мақсадида битта тадбиркорлик субъектига 25 млрд сўмгача миқдорда;

мақсадли кредит линияси доирасида кредитлар 1 йилдан ортиқ фаолият юритаётган, камида 15 фоиз миқдорида ўз маблағлари (шу жумладан, бино ва иншоотлар кўринишида) жалб этилишини таъминлай оладиган туроператорларига ажратилади.

Бунда иштирокчи тижорат банки томонидан мақсадли кредит линияси ҳисобидан ажратилган кредитлар тўлиқ тақсимланганидан кейин туроператорлардан қўшимча талабномалар келиб тушганда, кредит линияси ресурслари Тикланиш ва тараққиёт жамғармаси томонидан тижорат банклари ўртасида қайта тақсимланиши мумкин.

5. Шундай тартиб ўрнатилсинки, унга мувофиқ мазкур қарор доирасида ажратилган кредитлардан самарали ва манзилли фойдаланилишини таъминлаш мақсадида туроператорлар куйидаги мажбуриятларни ўз зиммасига олади (айланма кредит ажратилган санадан бошлаб навбатдаги йил якуни бўйича):

хизмат кўрсатилаётган хорижий сайёҳлар сонини камида 25 фоизга ошириш;

туристик хизматлар кўрсатишдан тушадиган даромадларни камида 25 фоизга ошириш.

Ушбу банднинг иккинчи ва учинчи хатбошиларида кўрсатилган талаблар бажарилмаганда, туроператорларга ажратилган имтиёзли кредит ставкаси банкнинг амалдаги тижорий ставкасига ўзгартирилади.

6. Мақсадли кредит линияси ҳисобидан ажратилган кредитларнинг қуйидагиларга йўналтирилишига йўл қўйилмаслиги белгилаб қўйилсин:

илгари олинган кредитларни ёки бошқа қарзларни қайтариш;

алкоголь ва тамаки маҳсулотларини ишлаб чиқариш;

ишлаб чиқариш (хизмат кўрсатиш) мақсадлари учун ишлатилмайдиган шахсий мол-мулк (мебел, уяли телефон, маиший техника ва бошқалар) сотиб олиш;

автотранспорт воситаларини харид қилиш (қиймати кредит суммасининг 40 фоизигача бўлган саккиз ва ундан ортиқ ўринли йўловчи ташувчи автомобиллар сотиб олиш бундан мустасно);

маъмурий харажатларни тўлаш, шу жумладан хизмат автомобилларини сақлаш;

бино ва иншоотлар сотиб олиш ва қуриш.

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Ж.А. Қўчқоров ва Ж.А. Ходжаев зиммасига юклансин.