Ўзбекистон Республикаси Ҳукумати ва Корея Республикаси Ҳукумати (кейинги ўринларда биргаликда «Томонлар», алоҳида «Томон» деб аталувчилар),

соғлиқни сақлаш соҳасида, шу жумладан, касалликларнинг олдини олиш ва уларга қарши жавоб чораларини кўришдаги ҳамкорлик, иккала давлатнинг умумий манфаатларига жавоб беришини инобатга олган ҳолда,

соғлиқни сақлаш соҳасидаги халқаро аҳамиятга эга бўлган фавқулодда вазиятлар (PНEIC)га жавоб қайтаришда Жаҳон Соғлиқни Сақлаш Ташкилотининг Халқаро тиббий-санитария қоидаларига (2005 йил) асосланиб трансчегаравий ҳамкорлик ва мувофиқлаштиришни амалга ошириш муҳимлигини таъкидлаган ҳолда,

хусусан, COVID-19 га қарши жавоб чораларини кўриш ва олинган сабоқлар бўйича Томонлар ўртасида улар давлатлари Ҳукуматлари ва хусусий секторларининг тажрибаларини алмашиш заруриятини тасдиқлаган ҳолда,

касалликларни олдини олиш ва уларга қарши жавоб чораларини кўришда инсон ҳуқуқларининг фундаментал қадриятларини ҳурмат қилиш зарурлигини таъкидлаб,

ҳамжиҳатлик ва ҳамкорлик аҳамиятини тасдиқлаган ҳолда, ҳамда

Томонлар ўртасида мавжуд дўстлик муносабатларини янада ривожлантириш ва келажакка қаратилган ҳар томонлама ҳамкорликни кенгайтириш истагида,

қуйидагилар тўғрисида келишиб олдилар:

Мазкур Битим мақсадида:

(а) «Халқаро тиббий-санитария қоидалари» Жаҳон Соғлиқни Сақлаш Ассамблеяси томонидан 2005 йилда қабул қилинган Халқаро тиббий-санитария қоидаларини ва уларга киритилган барча ўзгартиришларни англатади;

(b) «касалликларнинг олдини олиш ва уларга қарши жавоб чораларини кўриш» бу касалликларнинг, шу жумладан, юқумли касалликларнинг авж олишини олдини олиш ёки бу касалликлар авж олганда уларнинг тарқалишини олдини олиш бўйича ҳаракатларни, шу жумладан касалликларни илмий жиҳатдан ўрганиш бўйича тадқиқотларни англатади;

(с) «соғлиқни сақлашга қаратилган чора-тадбирлар» касалликларнинг олдини олиш ва уларга қарши жавоб чораларини кўришга қаратилган қонунчилик, маъмурий ва сиёсий чораларни англатади; ва

(d) «ваколатли органлар» Томонларнинг мазкур Битим доирасидаги ҳамкорлик чораларини амалга ошириш учун масъул бўлган соғлиқни сақлаш ёки ташқи ишларга жавобгар бўлган давлат органларини англатади.

Мазкур Битимнинг мақсади касалликларнинг олдини олиш ва уларга қарши жавоб чораларини кўриш, ҳамда Халқаро тиббий-санитария қоидаларини бажаришда Томонлар ўртасида ҳамкорликни рағбатлантиришдан иборат.

1. Томонлар касалликларнинг олдини олиш ва уларга қарши жавоб чораларини кўриш бўйича ҳамкорликни мазкур Битим қоидалари ва амалдаги халқаро шартномалар, ўзларининг ички қонунлари ва қоидалари ҳамда тегишли лицензиялаш талабларига асосан олиб борадилар.

2. Мазкур Битимдаги ҳеч нарса, Томонлар ўртасидаги амалдаги халқаро шартномалардан келиб чиқувчи ҳуқуқ ва мажбуриятларга дахл қилмайди.

1. Мазкур Битим доирасида ҳамкорлик тенглик, ўзаро манфаатдорлик ва ўзаролик тамойилларига асосланган ҳолда олиб борилади.

2. Томонлар касалликларнинг олдини олиш ва уларга қарши жавоб чораларини кўришда Халқаро тиббий-санитария қоидаларига мувофиқ, халқаро ташувлар ва савдога ортиқча чекловлар келтириб чиқармаслигини таъминлаш мақсадида ҳамкорлик қиладилар.

3. Томонлар касалликларнинг олдини олиш ва уларга қарши жавоб чораларини кўришда, Халқаро тиббий-санитария қоидаларига, амалдаги шартномалар ва ўзларининг тегишли миллий қонунчилиги ва қоидаларга мувофиқ, инсон ҳуқуқларининг фундаментал қадриятларини ҳурмат қиладилар. Томонлар, хусусан, касалликларнинг олдини олиш ва уларга қарши жавоб чораларини қўллаш аҳолининг ижтимоий ҳимояга муҳтож қатламига номутаносиб равишда таъсир кўрсатишини, шунингдек, соғлиқни сақлаш чораларини қўллашда ирқига, танасининг рангига, жинсига, тилига, динига, сиёсий қарашларига, жинсий ўзига хослигига, миллати ёки ижтимоий келиб чиқишига ёки молиявий, ижтимоий ёки бошқа мақомига қараб нафрат ва камситиш билан муносабатда бўлмасликни таъминлаш лозимлигини ҳисобга оладилар.

4. Томонлар касалликларнинг олдини олиш ва уларга қарши жавоб чораларини кўришда очиқлик ва шаффофлик муҳим омил эканлигини ва шу муносабат билан аниқ ахборотни тўплаш, текшириш, тарқатиш ва алмашишнинг муҳимлигини эътироф этадилар.

5. Томонлар касалликларнинг олдини олиш ва уларга қарши жавоб чораларини кўришда ихтисослаштирилган муассасаларнинг ва соғлиқни сақлаш соҳасидаги экспертларнинг ўрни ўта муҳимлигини тан оладилар ва шу муносабат билан нодавлат ташкилотлар ва фуқаролик жамияти билан ҳамкорлик қилиш зарурлигини эътироф этадилар.

Томонлар касалликларнинг олдини олиш ва уларга қарши жавоб чораларини кўриш бўйича ҳамкорлик қилишда Томонлар учун амал қиладиган Халқаро тиббий-санитария қоидаларига риоя қилиш мажбуриятини оладилар.

Томонлар имкон даражасида қуйидагилар бўйича ҳамкорлик қиладилар:

(а) Халқаро тиббий-санитария қоидаларининг 2-иловасида келтирилган соғлиқни сақлаш соҳасидаги халқаро аҳамиятга эга бўлган фавқулодда вазиятларни келтириб чиқарувчи ҳодисаларни аниқлаш ва баҳолаш ҳамда уларга қарши жавоб чораларини кўриш;

(b) Халқаро тиббий-санитария қоидаларига мувофиқ талаб этилган Соғлиқни сақлаш салоҳиятини ривожлантириш, кучайтириш ва қўллаб-қувватлашда техник ҳамкорлик ва моддий-техник ёрдам кўрсатишни таъминлаш ёки кўмак кўрсатиш; ва

(с) соғлиқни сақлаш соҳасидаги халқаро ташкилотларда икки томонлама ҳамкорликни кенгайтириш.

1. Башарти Халқаро тиббий-санитария қоидаларига асосан, соғлиқни сақлаш билан боғлиқ халқаро аҳамиятга эга бўлган фавқулодда вазият Томонлардан бирининг ҳудудида ёки юрисдикциясида юзага келган бўлса, ушбу Томон ҳар қандай восита билан тегишли ахборотни самарали алмашишда ҳамкорлик қилади.

2. Мазкур Битимнинг 1-моддасида белгилаб ўтилган ахборот алмашинуви, ҳудудида ёки юрисдикциясида ушбу вазият юзага келган Томон Халқаро тиббий-санитария қоидаларига асосан, Жаҳон Соғлиқни Сақлаш Ташкилотига берилган ахборотни мумкин қадар тез фурсатларда бошқа Томонга тақдим этади.

3. Томонлардан бири соғлиқни сақлашда халқаро аҳамиятга эга бўлган фавқулодда вазиятга жавобан халқаро ташувни амалга оширишга жиддий тўсқинлик қиладиган ёки чеклайдиган чораларни қўллаган тақдирда, бошқа Томонга тегишли маълумотларни имкон қадар тез фурсатларда тақдим этади.

1. Томонлар 7-моддада келтирилган соғлиқни сақлаш билан боғлиқ чораларни Халқаро тиббий-санитария қоидалари, амалдаги шартномалар ва ўзларининг миллий қонунлари ва қоидаларига мувофиқ, касалликларни олдини олиш ва уларга қарши жавоб чораларини кўришда оқилона даражада зарур бўлган, хусусан, икки давлат фуқароларининг иқтисодий эҳтиёжларига жавоб берган ҳолда татбиқ этадилар ва икки давлат ўртасида бошқа муҳим алмашинув ва ҳамкорлик 4-моддада акс эттирилган тамойилларга мувофиқ амалга оширилади.

2. Томонлардан бири аҳоли саломатлигини таъминлашда, хорижий фуқароларнинг ўз ҳудудига кириши ва (ёки) чиқиб кетишини чегараловчи чоралар қўллаган тақдирда, Томонлар бошқа Томоннинг мурожаатига асосан, ушбу давлатлар муҳим шахсларининг алмашинувини таъминлаш учун керакли бўлган тегишли чоралар кўрилиши бўйича маслаҳатлашувни амалга оширадилар. Бундай чоралар Томонларнинг миллий қонунчилиги ва қоидаларига асосан амалга оширилади.

3. Томонлар касалликларнинг олдини олиш ва уларга жавоб чораларини кўришда икки давлат фуқароларининг ва тадбиркорлик корхоналарининг иқтисодий ҳамкорлигига, шу жумладан, тегишли рухсатномалар берилишида ҳамкорликка кўмаклашадилар.

1. Томонлар илғор тажрибаларни, шу жумладан, ўзларининг соғлиқни сақлаш чора-тадбирларини алмашадилар ҳамда касалликларни олдини олиш ва уларга қарши жавоб чораларини кўришда аҳолини хабардор қилиш ва билимини оширишда ҳамкорлик қилишлари мумкин.

2. Томонлар касалликларнинг олдини олиш ва уларга қарши самарали жавоб чораларини кўриш мақсадида, ўзаро келишувга биноан, мазкур Битимда белгилангандан ташқари зарур бўлган қўшимча ҳамкорликни, шу жумладан, касалликларни даволашни амалга оширишлари мумкин.

1. Томонлар ўз ваколатлари доирасида тўғридан-тўғри ёки минтақавий ҳамкорлик механизмлари ва (ёки) халқаро ёки минтақавий ташкилотлар орқали соғлиқни сақлаш, шу жумладан, касалликларни олдини олиш ва уларга қарши жавоб чоралари кўриш соҳасида техник ёрдам ва салоҳиятни ошириш бўйича ҳамкорлик қилишга интиладилар.

2. Томонлар, зарур ҳолларда, мазкур модданинг 1-бандига мувофиқ барча даражаларда, шу жумладан, фуқаролик жамияти ва хусусий секторда алоқаларни кучайтириш ҳамда минтақавий ҳамкорлик механизмлари ва (ёки) халқаро ёки минтақавий ташкилотлар доирасида мувофиқлаштиришни кучайтириш орқали техник ёрдам ва салоҳиятни ошириш бўйича ҳамкорлик қилишлари мумкин.

3. Томонлар мазкур модданинг 1-бандига мувофиқ техник ёрдам ва салоҳиятни ошириш бўйича ҳамкорликни амалга оширишда, ўзларининг миллий эҳтиёжлари ҳамда ҳуқуқий ва сиёсий талабларини ҳисобга оладилар.

4. Мазкур модданинг 1-бандига мувофиқ техник ёрдам ва салоҳиятни ошириш бўйича ҳамкорлик шакллари қуйидагиларни ўз ичига олиши мумкин, бироқ ушбулар билан чегараланмайди:

(а) ўзаро учрашувлар, анжуманлар, симпозиумлар, маърузалар, семинарлар, вебинарлар ва бошқа тегишли тадбирларни ташкиллаштириш ва уларда иштирок этиш;

(b) экспертлар алмашинуви ҳамда қўшма тадқиқот ва лойиҳалар ишлаб чиқилишини амалга ошириш;

(с) тегишли ҳужжатлар ва ахборот алмашинуви, шу жумладан, онлайн шаклдаги мулоқотлар;

(d) соғлиқни сақлаш соҳасида айни шу каби ҳолатга дуч келган бирон бир давлат ёки учинчи давлатлар учун ихтисослашган таълим ва тайёрлов дастурлари; ва

(е) ҳамкорликнинг Томонлар ўзаро келишиши мумкин бўлган бошқа ҳар қандай шакллари.

1. Касалликларнинг олдини олиш ва уларга қарши жавоб чораларини кўришда техник ёрдам ва салоҳиятни ошириш Томонлар ўртасидаги ўзаро келишувга асосан самарали ва ошкора усулда амалдаги дастурларни такрорламаган ҳолда, лекин ҳар бир давлатдаги аниқ вазиятга мувофиқ равишда амалга оширилади.

2. Томонлар мазкур модданинг 1-бандида белгиланган техник ёрдам ва салоҳиятни ошириш масалаларини самарали амалга ошириш мақсадида, қабул қилувчи давлатнинг техник ва сиёсий эҳтиёжларини баҳолаш ишларини олиб боришлари мумкин.

3. Техник ёрдам ва салоҳиятни ошириш масалалари бўйича ҳамкорликни олиб боришда, Томонлар амалдаги шартномалар ва ўзларининг тегишли миллий қонунчилиги ва қоидаларига мувофиқ, интеллектуал мулк ҳуқуқларини ҳимоя қиладилар.

1. Агар Халқаро тиббий-санитария қоидаларига асосан, халқаро аҳамиятга эга бўлган соғлиқни сақлаш билан боғлиқ фавқулодда вазият Томонлар ҳудудларида ёки юрисдикциясида содир бўлса, Томонлар мазкур Битимга, жумладан, 4, 5, 7 ва 8-моддаларга мувофиқ, улар ўз ҳудудларида бўлиб турган бошқа Томон фуқароларининг ҳуқуқлари, манфаатлари ва қадр-қимматини ҳимоя қилишга интиладилар.

2. Консуллик муносабатлари тўғрисидаги Вена конвенциясига, бошқа амалдаги шартномалар ва халқаро одат ҳуқуқларига мувофиқ, хар бир Томон бошқа Томоннинг ўз фуқароларини ҳимоя қилиши учун консуллик фаолиятини олиб боришини таъминлайди.

3. Касалликларнинг олдини олиш ва уларга қарши жавоб чораларини кўришда бир Томон бошқа Томондан унинг ҳудудида бўлиб турган ёки истиқомат қилувчи фуқароларининг саломатлиги ва хавфсизлигини ҳимоя қилиш учун зарур бўлган маълумотларни тақдим этишни сўраши мумкин. Бундай мурожаатга асосан, бошқа Томон тегишли ахборотни имкон қадар тўлиқ ҳажмда тўплаш ва тақдим этишга интилади.

4. Томонлардан бири бошқа Томоннинг ҳудудида бўлиб турган ёки истиқомат қилаётган фуқароларига касалликларнинг олдини олиш ва жавоб чораларини кўриш мақсадида бошқа Томон ҳудудида зудлик билан ҳаракат қилишга ёки ундан чиқиб кетишга шароит яратилиши бўйича ҳамкорлик тўғрисида мурожаат қилиши мумкин. Бошқа Томон бундай мурожаатга биноан, имкон қадар тўлиқ ҳамкорликни таъминлашга ҳаракат қилади.

5. Томонлар мазкур модданинг 1-бандига мувофиқ ўзларининг тегишли ҳудудларидаги маҳаллий ҳукуматлари ва хусусий секторлари бошқа Томон фуқароларининг ҳуқуқлари, манфаатлари ва қадр-қимматини ҳимоя қилинишини таъминланиши учун имкон қадар тўлиқ ҳаракат қиладилар.

1. Томонлар мазкур Битим, шу жумладан, 7, 10 ва 12-моддалар доирасида ҳамкорликни амалга оширишда, ўзларининг тегишли миллий қонунчилиги ва қоидаларига мувофиқ махфий ҳисобланган маълумотларни ёки ушбу турдаги бошқа маълумотларни, шу жумладан шахсий маълумотларни талаб қилмайдилар ва тақдим этмайдилар.

2. Мазкур модданинг 1-бандидан қатъи назар, Томонлар ўзларининг тегишли миллий қонунчилиги ва қоидаларига кўра махфий ҳисобланган маълумотни, башарти бундай маълумот ушбу Битимни амалга оширишда самарадорликка эришиш учун зарур бўлган тақдирда, фақат ўзларининг миллий қонунчилиги ва қоидаларига зид бўлмаса, алмашишлари мумкин.

Бундай ҳолда, маълумотни қабул қилувчи Томон, уларни тайинланган агентлик ва жисмоний шахслардан ташқари, ҳар қандай учинчи томонга ошкор қилмаслиги, тақдим этмаслиги ёки ахборотдан фойдаланишга йўл қўймаслиги лозим.

3. Томонлар мазкур Битимни амалга ошириш жараёнида шахсий маълумотларни амалдаги шартномалар ва ўзларининг миллий қонунчилиги ва қоидаларига мос келадиган тарзда ҳимоя қиладилар ва касалликларни олдини олиш ва уларга қарши жавоб чораларини кўришда ўзбошимчалик билан, ҳамда қонунга хилоф равишда шахсий ҳаётга аралашишга йўл қўйилмаслигини кафолатлайдилар.

Томонлар касалликларнинг олдини олиш ва уларга қарши жавоб чораларини кўришда Дипломатик алоқалар тўғрисидаги Вена конвенцияси, Консуллик муносабатлари тўғрисидаги Вена конвенцияси ва тегишли халқаро одат ҳуқуқига риоя қиладилар ва халқаро ҳамжиҳатликни ҳурмат қиладилар.

Томонлар, шунингдек, ўзаро келишувга мувофиқ, касалликларнинг олдини олиш ва уларга қарши жавоб чораларини кўришдан ташқари, соғлиқни сақлашнинг бошқа соҳаларида ҳам ҳамкорликни ривожлантиришга ҳаракат қиладилар.

1. Томонлар мазкур Битимни самарали амалга оширилишини таъминлаш мақсадида, ҳар бир Томоннинг тайинланган вакилларидан ташкил топган Соғлиқни сақлаш соҳасидаги ҳамкорлик бўйича Қўшма қўмита (кейинги ўринларда «Қўшма қўмита» деб аталади) тузадилар. Битим доирасида тартибга солинадиган турли соҳаларни самарали муҳокама қилиш мақсадида Қўшма қўмита таркибига Томонлар соғлиқни сақлаш сиёсатига ва ташқи ишларига ваколатли органларининг вакиллари киритилади.

2. Қўшма қўмитанинг мажлислари навбати билан Томонлар тарафидан ўтказилади.

3. Қўшма қўмитанинг вазифалари қуйидагилардан иборат:

(а) Томонлар миллий қонунчилиги, қоидалари ва сиёсатига кўра ҳамкорлик йўналишларини аниқлаш;

(b) мазкур Битимга риоя қилиш ва (ёки) уни амалга ошириш билан боғлиқ ҳар қандай масалани муҳокама қилиш;

(с) мазкур Битим доирасида қўшма дастур ва лойиҳаларни аниқлаш, қўллаб-қувватлаш ва рағбатлантириш;

(d) соғлиқни сақлаш соҳасидаги ҳамкорликка тааллуқли нормаларни, шу жумладан Халқаро тиббий-санитария қоидаларини самарали қўллаш масалаларини муҳокама қилиш;

(е) 7 ва 8-моддалар, 9-модданинг 1-банди ҳамда 10-модда ижросини муҳокама қилиш ва кўриб чиқиш;

(f) 9-модданинг 2-бандига биноан ҳамкорликнинг қўшимча йўналишларини аниқлаш ва амалга оширилишини муҳокама қилиш;

(g) мазкур Битимга ўзгаришлар киритиш зарурлигини ёки уни амалга ошириш учун қўшимча келишувлар имзолашни муҳокама қилиш; ва

(h) Томонлар ўзаро келишиб олишлари мумкин бўлган кун тартибининг бошқа масалаларини муҳокама қилиш.

4. Мазкур Битимни амалга ошириш бўйича Томонлар ўзларининг ваколатли органларини тайинлайдилар ва бу тўғрисида бир-бирларини хабардор қиладилар.

5. Мазкур Битимни самарали бажарилишини таъминлаш учун, Томонлар исталган вақтда бир-бирлари билан дипломатик каналлар орқали маслаҳатлашишлари мумкин.

6. Мазкур Битим доирасида муайян тадбирларни амалга ошириш бўйича Томонлар ўзларининг тегишли ташкилотлари ўртасида келишувлар имзолашлари мумкин. Бундай келишувлар ёки соғлиқни сақлаш соҳасидаги мавжуд келишувларга ўзгартириш киритиш масалалари Қўшма қўмита томонидан муҳокама қилинади.

1. Ҳар бир Томон мазкур Битим доирасидаги ҳамкорлик билан боғлиқ бўлган ўз харажатларини ўзлари қоплайдилар. Зарур ҳолларда, Томонлар харажатларнинг аниқ молиявий жавобгарлик тафсилотлари кўрсатиб ўтилган қўшимча келишувлар тузишлари мумкин.

2. Мазкур Битим доирасида амалга ошириладиган барча ҳаракатлар, ҳар бир Томоннинг молиявий ресурслари мавжудлигини ҳисобга олган ҳолда амалга оширилади.

Мазкур Битимнинг талқин қилиниш ёки амалга оширишда юзага келадиган ҳар қандай низо Томонлар ўртасида ўзаро маслаҳатлашув орқали тинч йўл билан ҳал этилади.

1. Ҳар бир Томон мазкур Битимнинг кучга кириши учун зарур бўлган ўзининг ички давлат тартиб-таомиллари якунланганлиги тўғрисида бошқа Томонни дипломатик каналлар орқали бошқа Томонни хабардор қилади.

Мазкур Битим сўнгги хабарнома олинган санадан бошлаб ўттиз (30) кундан сўнг кучга киради.

2. Мазкур Битим беш (5) йил давомида амал қилади ва Томонлардан бири мазкур Битимнинг амал қилиш муддати тугашидан камида олти (6) ой олдин уни тугатиш нияти тўғрисида бошқа Томонга ёзма хабарнома юбормаган тақдирда, у ўз-ўзидан навбатдаги беш (5) йиллик муддатларга узаяверади.

3. Мазкур Битимга Томонларнинг ўзаро ёзма келишувига кўра, ўзгартириш ва қўшимчалар киритилиши мумкин. Бундай ўзгартириш ва қўшимчалар мазкур Битимнинг ажралмас қисми ҳисобланадиган ва мазкур модданинг 1-бандида назарда тутилган тартибда кучга кирадиган алоҳида баённомалар орқали ёки Томонлар келишган ҳар қандай бошқа шаклда киритилади.

Ушбуни тасдиқлаган ҳолда, ўзларининг тегишли ҳукуматлари томонидан лозим даражада ваколатланган қуйида имзо чекувчилар мазкур Битимни имзоладилар.

Сеул шаҳрида 2021 йил 17 декабрда икки нусхада, ўзбек, корейс ва инглиз тилларида тузилди, бунда барча матнлар тенг аутентикдир.

Талқин қилишда тафовутлар юзага келган тақдирда, инглиз тилидаги матн устувор ҳисобланади.