Ўзбекистон Республикаси Ҳукумати ва Греция Республикаси Ҳукумати,

даромад ва мол-мулк солиқларига нисбатан иккиёқлама солиқ солинишининг олдини олиш тўғрисида Конвенция тузиш истагини билдириб,

қуйидагилар ҳақида аҳдлашиб олдилар:

Мазкур Конвенция Аҳдлашувчи Давлатларнинг бири ёки ҳар иккисининг резиденти бўлган шахсларга нисбатан қўлланилади.

1. Мазкур Конвенция Аҳдлашувчи Давлат ёки унинг маҳаллий ҳокимиятлари номидан олинаётган даромад ва мол-мулк солиқларига нисбатан, уларни ундириш услубидан қатъи назар, татбиқ этилади.

2. Даромад ва мол-мулк солиқларига умумий даромаддан ёки даромаднинг бир қисмидан, бутун мол-мулк ёки унинг бир қисмидан олинадиган барча солиқлар, шу жумладан кўчар ва кўчмас мулкни сотишдан олинган даромадлардан, шунингдек мол-мулк қийматининг ошишидан олинган даромадлардан ундириладиган солиқлар киради.

3. Ушбу Конвенция қўлланиладиган амалдаги солиқлар,жумладан, қуйидагилардир:

а) Ўзбекистон Республикасига нисбатан:

i) корхоналар, бирлашмалар ва ташкилотлар даромадидан олинадиган солиқ;

ii) жисмоний шахслардан олинадиган даромад солиғи;

iii) мол-мулк солиғи;

(бундан кейин — «Ўзбекистон солиқлари» деб аталади);

b) Греция Республикасига нисбатан:

i) жисмоний шахслардан олинадиган даромад солиғи ва сармоя солиғи;

ii) юридик шахслардан олинадиган даромад солиғи ва сармоя солиғи;

(бундан кейин — «Греция солиқлари» деб аталади).

4. Ушбу Конвенция имзолангандан сўнг солиқларга қўшимча ёки мавжудлари ўрнига киритилган ҳар қандай муносиб ёки аслида ўхшаш исталган Аҳдлашувчи Давлат оладиган солиқларга нисбатан ҳам қўлланилади. Аҳдлашувчи Давлатларнинг ваколатли органлари ўзларининг тегишли солиқ қонунчилигида бўлган ҳар қандай катта ўзгаришлар ҳақида бир-бирларига хабар берадилар.

1. Ушбу Конвенциянинг мақсадлари учун, агар матннинг мазмунидан ўзга маъно чиқмаса:

а) «Аҳдлашувчи Давлат» ва «бошқа Аҳдлашувчи Давлат» атамалари матнда ишлатилиш ўрнига қараб Ўзбекистонни ёки Греция Республикасини англатади;

b) «Ўзбекистон» атамаси Ўзбекистон Республикасини билдиради ва жуғрофий маънода ишлатилганда унинг ҳудудини, ҳудудий сувларини ва осмон кенгликларини ўз ичига олади, ана шу ҳудудларда Ўзбекистон Республикаси халқаро ҳуқуққа ва Ўзбекистон Республикаси қонунларига мувофиқ, ўзининг суверен ҳуқуқлари ва юрисдикциясини, шу жумладан ер ости бойликлардан ва табиий ресурслардан фойдаланиш ҳуқуқини амалга оширади;

с) «Греция Республикаси» атамаси Греция Республикаси ҳудудини, ва Греция Республикаси халқаро ҳуқуққа мувофиқ шундай зоналардаги табиат ресурсларини разведка қилиш, қазиб олиш ва ишлатиш мақсадида суверен ҳуқуқларга эга бўлган денгизнинг бир қисмини, денгиз тубини ва унинг Ўрта ер денгизидаги ер остини англатади;

d) «шахс» атамаси жисмоний шахсни, компанияни ёки шахсларнинг бошқа ҳар қандай бирлашмасини англатади;

е) «компания» атамаси солиққа тортиш мақсадларида ҳар бир Аҳдлашувчи Давлатнинг қонунларига мувофиқ корпоратив тузилма сифатида қараладиган ҳар қандай корпоратив тузилма, ёки ҳар қандай ташкилотни англатади;

f) «Аҳдлашувчи Давлатлардан бирининг корхонаси» ва «бошқа Аҳдлашувчи Давлат корхонаси» атамалари ўз ўрни билан Аҳдлашувчи Давлатлардан бирининг резиденти бошқаруви остида иш юритаётган корхонани ва бошқа Аҳдлашувчи Давлатнинг резиденти бошқаруви остида иш юритаётган корхонани англатади;

g) «миллий шахс» атамаси:

а) Аҳдлашувчи Давлат фуқаролигига эга бўлган ҳар қандай жисмоний шахсни;

b) Аҳдлашувчи Давлатнинг амалдаги қонунларига мувофиқ ўз мақомини олган ҳар қандай юридик шахсни, ширкат ёки ассоциацияни англатади;

h) «халқаро ташиш» атамаси денгиз ёки ҳаво кемасида ҳар қандай ташишни англатади, денгиз ва ҳаво кемалари фақат бошқа Аҳдлашувчи Давлатдаги пунктлар ўртасидагина фойдаланилиши бундан мустасно;

i) «ваколатли орган» атамаси:

i) Ўзбекистон Республикасига нисбатан — Ўзбекистон Республикаси Давлат солиқ қўмитасини англатади;

ii) Греция Республикасига нисбатан — Молия вазирини ёки унинг ваколатли вакилини англатади.

2. Аҳдлашувчи Давлатлардан бири ушбу Конвенцияни қўллаганда, унда белгиланмаган атама Конвенция татбиқ этиладиган солиқларга нисбатан шу Давлатнинг қонунида эга бўлган аҳамиятга эгадир, шу Давлатнинг солиқ қонунчилигида қўлланиладиган ҳар қандай атама шу Давлатнинг бошқа қонунида мазкур атамага берилган аҳамиятдан устун бўлади.

1. Ушбу Конвенциянинг мақсадлари учун «Аҳдлашувчи Давлат резиденти» атамаси шу Давлатнинг қонунчилиги бўйича ўзининг турар жойи, доимий истиқомат қилиши, бошқарув жойи ёки ўзга ҳар қандай шунга ўхшаш мезонлар асосида солиққа тортиладиган ҳар қандай шахсни англатади ва шу Давлатни ва унинг ҳар қандай маҳаллий ҳокимият органини ўз ичига олади. Бироқ бу атама ушбу Аҳдлашувчи Давлатда фақат мазкур Давлатда жойлашган манбалардан ёки мол-мулкдан даромад олаётгани учун солиққа тортиладиган ҳар қандай шахсни ўз ичига қамрамайди.

2. Агар 1-банд қоидаларига мувофиқ жисмоний шахс Аҳдлашувчи Давлатларнинг ҳар иккисининг резиденти бўлса, унинг мақоми қуйидаги тарзда белгиланади:

а) жисмоний шахс тўсиқсиз яшаши мумкин бўлган доимий уйи жойлашган Аҳдлашувчи Давлатнинг резиденти ҳисобланади; агар у ҳар икки Аҳдлашувчи Давлатда тўсиқсиз яшаши мумкин бўлган доимий уйга эга бўлса, у шахсий ва иқтисодий алоқалари энг чуқур бўлган (ҳаётий манфаатлар маркази) Давлатнинг резиденти ҳисобланади;

b) агар унинг ҳаётий манфаатлари маркази жойлашган Давлатни аниқлаб бўлмаса, ёки Давлатларнинг ҳеч бирида тўсиқсиз яшаши мумкин бўлган доимий уйи бўлмаса, у одатда яшаб турган Давлатининг резиденти ҳисобланади;

с) агар шахс одатда ҳар икки Давлатда яшаса ёки уларнинг ҳеч бирида яшамаса, у Аҳдлашувчи Давлатларнинг қай бирининг миллий шахси бўлса, шу Давлатнинг резиденти ҳисобланади;

d) агар у ҳар иккала Давлатнинг миллий шахси бўлса ёки шундай бўлмаса, Аҳдлашувчи Давлатларнинг ваколатли ташкилотлари бу масалани ўзаро келишув йўли билан ҳал қиладилар.

3. Агар 1-банд қоидаларига мувофиқ шахс, жисмоний шахсдан ташқари, Аҳдлашувчи Давлатларнинг ҳар иккисининг резиденти бўлса, у ўзининг амалдаги бошқарув органи жойлашган Аҳдлашувчи Давлатнинг резиденти ҳисобланади.

1. Мазкур Конвенция мақсадлари учун «доимий муассаса» атамаси Аҳдлашувчи Давлатлардан бирининг корхонаси бошқа Аҳдлашувчи Давлатларда тўлиқ ёки қисман тадбиркорлик фаолиятини олиб борадиган доимий фаолият жойини билдиради.

2. «Доимий муассаса» атамаси, жумладан, қуйидагиларни ўз ичига олади:

а) бошқарув жойи;

b) бўлим;

с) офис;

d) фабрика;

е) устахона, ва

f) шахта, нефть ёки газ кони, карьер ёки табиий ресурслар қазиб олинадиган ҳар қандай бошқа жой.

3. а) Қурилиш майдончаси, монтаж ёхуд йиғма объект ўз фаолиятини 12 ойдан кўпроқ давом эттириб турган бўлсагина, доимий муассаса деб ҳисобланади.

b) Корхонада банд бўлган хизматчилар ёки бошқа ходимлар орқали корхона томонидан хизматлар, шу жумладан, маслаҳат хизматларини кўрсатиш, бироқ бундай хизматни шу турдаги фаолият Давлат доирасида ҳар қандай 24 ойлик давр доирасида жами 12 ойдан кўпроқни ташкил этувчи давр ва даврлар мобайнида давом этган тақдирда (худди шундай ёки у билан боғлиқ объект учун).

4. Ушбу модданинг аввалги қоидаларига қарамай, «доимий муассаса» атамаси қуйидагиларни ўз ичига олмайди:

а) иншоотлардан шу корхонага тегишли товарлар ёки буюмларни фақат сақлаш, намойиш қилиш мақсадларида фойдаланиш;

b) шу корхонага тегишли товарлар ёки буюмлар захирасининг фақат сақлаш ёки намойиш қилиш мақсадларида ушлаб турилиши;

с) шу корхонага тегишли товарлар ёки буюмлар захирасини фақат бошқа корхона томонидан қайта ишлов берилиши мақсадларида ушлаб турилиши;

d) доимий фаолият жойининг фақат товарлар ёки буюмлар сотиб олиш ёки мазкур корхона учун ахборот йиғиш мақсадларида ушлаб турилиши;

е) доимий фаолият жойининг ушбу корхона учун фақат бошқа ҳар қандай тайёргарлик ёки ёрдамчи тусдаги фаолиятни амалга ошириш мақсадларида ушлаб турилиши;

f) доимий фаолият жойининг а)-е) кичик бандларида эслатиб ўтилган фаолият турларини ҳар қандай уйғунлашуви учунгина сақлаб турилиши, бундай уйғунлашув натижасида вужудга келган ана шу доимий фаолият жойининг бутун фаолияти тайёргарлик ёки ёрдамчи тусда бўлган тақдирда.

5. 1- ва 2-бандлардаги қоидаларига қарамай, агар 7-бандда кўрсатилган мустақил мақомли агентдан ўзга бўлган шахс Аҳдлашувчи Давлатлардан бирида бошқа Аҳдлашувчи Давлат корхонаси номидан иш юритса ва шу Давлатда корхона номидан шартномалар тузиш ваколатига эга бўлса ва шу ваколатлардан одатда фойдаланса, бу корхона биринчи эслатилган Давлатда доимий муассасага, унинг учун шахс томонидан кўрсатилган хизмат доирасида эга деб ҳисобланади, лекин ушбу шахснинг фаолияти 4-бандда кўрсатилган фаолият турлари билан чекланиб қолмаса ва бу фаолият доимий фаолият жойи орқали амалга оширилса, бу доимий фаолият жойини ушбу банднинг қоидаларига асосан доимий муассасага айлантирмайди.

6. Ушбу модданинг аввалги қоидаларига қарамай, Аҳдлашувчи Давлатлардан бирининг суғурта компанияси, қайта суғурта қилиш бундан мустасно, бошқа Аҳдлашувчи Давлатда доимий муассасага эга деб ҳисобланади, агар у бошқа Давлат ҳудудида мукофот тўпласа ёки 7-банд тааллуқли бўлган мустақил мақомли агентдан ўзга шахс орқали таваккални суғурта қилса.

7. Аҳдлашувчи Давлатдан бирининг корхонаси, агар бошқа Аҳдлашувчи Давлатда брокер, комиссионер ёки ҳар қандай бошқа мустақил мақомли агент орқали тадбиркорлик фаолиятини амалга оширса, бу шахслар ўзининг одатдаги фаолияти чегарасида иш юритган тақдирда, бу Аҳдлашувчи Давлатда доимий муассасага эга деб қаралмайди.

8. Аҳдлашувчи Давлатлардан бирининг резиденти бўлган компания бошқа Аҳдлашувчи Давлатнинг резиденти бўлган, ёки ана шу бошқа Давлатда тижорат фаолиятини амалга ошираётган (доимий муассаса орқали ёки бошқа тарзда) компания назорат қилса ёки назорат қилинса, бу факт ўз-ўзидан бу компанияларнинг бирини бошқаси учун доимий муассасага айлантириб қўймайди.

1. Аҳдлашувчи Давлатлардан бирининг резиденти бошқа Аҳдлашувчи Давлатда жойлашган кўчмас мулкдан олган даромадлари (қишлоқ ва ўрмон хўжалигидан олинадиган даромадлар ҳам шу жумлага киради) ана шу бошқа Давлатда солиққа тортилиши мумкин.

2. «Кўчмас мулк» атамаси кўриб чиқилаётган мулк жойлашган Аҳдлашувчи Давлатнинг солиқ қонунчилигида ифодаланган аҳамиятга эгадир. Ҳар қандай ҳолда ҳам ушбу атама ер устидаги мулк ҳақидаги умумий қонунчиликнинг қоидалари билан ҳақ-ҳуқуқи белгиланган кўчмас мулкка тегишли бўлган мулкни, чорва моллари, қишлоқ хўжалиги ва ўрмон хўжалиги воситалари, кўчмас мулк натижаси бўлган атроф мулкни (узуфрукт) ишлатганлик учун бадал сифатида тўланадиган ўзгарувчан ёки қатъий белгиланган тўловларга бўлган ҳуқуқ ёки минераллар, манбалар жойлашган ерга ва бошқа табиий ресурсларни ишлашга бўлган ҳуқуқни ўз ичига қамрайди: кемалар ва ҳаво кемалари кўчмас мулк сифатида қаралмайди.

3. 1-банд қоидалари кўчмас мулкдан тўғридан-тўғри фойдаланиш, ижарага бериш ёки ўзга ҳар қандай шаклда фойдаланиб олинган даромадга нисбатан қўлланилади.

4. 1- ва 3-банд қоидалари корхонанинг кўчмас мулкдан олган даромадига ва мустақил хусусий хизматларни амалга оширишда ишлатиладиган кўчмас мулкдан олган даромадларига ҳам қўлланилади.

1. Аҳдлашувчи Давлатлардан бирининг корхонасининг фойдаси фақат шу Давлатда солиққа тортилади, фақат корхона ўз тадбиркорлик фаолиятини бошқа Аҳдлашувчи Давлатда у ерда жойлашган доимий муассаса орқали амалга оширмаётган бўлса. Агар корхона юқорида айтилганидек, ўз фаолиятини амалга ошираётган бўлса, корхонанинг фойдаси бошқа Аҳдлашувчи Давлатда солиққа тортилади, аммо шу доимий муассасага тегишли бўлган қисмидагина солиққа тортилиши мумкин.

2. 3-банд қоидаларига мувофиқ, агар Аҳдлашувчи Давлатлардан бирининг корхонаси тадбиркорлик фаолиятини бошқа Аҳдлашувчи Давлатда, у ерда жойлашган доимий муассаса орқали, амалга ошираётган бўлса, фойда ҳар бир Аҳдлашувчи Давлатда шу доимий муассасага ўтказилади, доимий муассаса алоҳида ва мустақил корхона сифатида фаолияти худди шундай ёки шунга ўхшаш фаолиятни, худди шундай ёки шунга ўхшаш шартлар асосида амалга ошираётган бўлса ва у корхонанинг доимий муассасаси бўлгани ҳолда, мутлақо мустақил равишда иш кўрса, ушбу фойдани олиши мумкин.

3. Доимий муассаса фойдасини аниқлашда мазкур доимий муассаса мақсадлари учун сарфланган харажатларни, шунингдек доимий муассаса жойлашган Давлатда, ҳамда ҳар қандай ўзга ерда сарфланган бошқарув ва умумий маъмурий харажатлар чиқариб ташлашга йўл қўйилади. Бироқ доимий муассаса томонидан корхонанинг бош офисига ёки унинг исталган бошқа офисларидан бирига роялти, гонорарлар ёки бошқа шунга ўхшаш тўловлар тарзида патентлардан ёки бошқа ҳуқуқлардан фойдаланганлик ўрнига ёки муайян хизматлар учун ёки менеджментлик учун комиссион тўловлар тарзида, ёхуд, банк корхонасидан ташқари, доимий муассасага берилган қарз учун фоизлар тарзида тўланган суммаларга, агар улар умуман бўлса (ҳақиқий харажатларни қоплашдан ташқари), нисбатан ҳеч қандай чегирмаларга йўл қўйилмайди.

4. Аҳдлашувчи Давлатда корхона фойдасининг умумий суммасини унинг турли бўлинмаларига мутаносиб тарзда тақсимлаш негизида доимий муассасага тегишли фойдани белгилаш оддий ҳол эканлигига қарамай, 2-банддаги ҳеч нарса Аҳдлашувчи Давлатга солиққа тортиладиган фойдани амалдаги шундай тақсимот воситасида аниқлашга халақит бермайди; танланган тақсимот услуби ушбу моддага тегишли тамойилларга муносиб натижалар бериши лозим.

5. Корхона учун доимий муассаса томонидан товарлар ёки буюмларнинг харид қилинишигагина асосланиб доимий муассасага бирон-бир фойда ёзилмайди.

6. Аввалги бандлар мақсадлари учун доимий муассасага тегишли фойда, агар бошқаси учун салмоқли ва етарли сабаблар бўлмаса, ҳар йили бир хил услубда аниқланади.

7. Агар фойда, мазкур Конвенциянинг бошқа моддаларида алоҳида айтиб ўтилган фойда турларини қамраб оладиган бўлса, мазкур моддаларнинг қоидаларига ушбу модда қоидалари таъсир этмайди.

1. Халқаро ташишларда денгиз кемаларидан фойдаланишдан олинган даромадга, ана шу денгиз кемалари Аҳдлашувчи Давлатда рўйхатдан ўтказилган ёки кема ҳужжатлари билан таъминланган бўлса, фақат шу Давлатда солиқ солинади.

2. Халқаро ташишда ҳаво кемаларидан фойдаланишдан олинган фойда корхонанинг самарали бошқарув жойи жойлашган Аҳдлашувчи Давлатдагина солиққа тортилиши мумкин.

3. 1- ва 2-бандларнинг қоидалари қуйидагиларга нисбатан қўлланилади:

а) халқаро ташишларда фойдаланиладиган денгиз ва ҳаво кемаларини ижарага беришдан (экипажсиз кемаларни фрахт қилиш асосида ҳам) олинган кутилмаган фойдага;

b) контейнерлардан (шу жумладан трейлерлар ва контейнерларни ташиш учун бошқа ускуналар) фойдаланиш, уларни сақлаб туриш ва ижарага беришдан олинган фойдага, агар бундай фойда 1- ва 2-бандлар татбиқ этиладиган фойдага нисбатан қўшимча ёки кутилмаган бўлса.

4. 1- ва 2-бандлар қоидалари транспорт воситаларидан фойдаланиш бўйича пульда халқаро ташкилотда ёки қўшма корхонада иштирок этишдан олган фойдаларига ҳам қўлланилади.

1. Агар:

а) Аҳдлашувчи Давлатнинг корхонаси бошқа Аҳдлашувчи Давлат корхонасини бошқаришда, назорат қилишда ёки унинг сармоясида бевосита ёки билвосита қатнашса, ёки

b) ўша шахслар Аҳдлашувчи Давлатларнинг унисининг ҳам корхонасини, бунисининг ҳам корхонасини бошқаришда, назорат қилишда ёки унинг сармоясида бевосита ёки билвосита қатнашса, икки корхона ўртасида уларнинг тижорат ва молиявий муносабатларида мутлақо мустақил бўлган корхоналар ўртасида бўладигандан фарқли шароитлар вужудга келтирилса ёки белгиланса, уларнинг бирортасига ҳисобланиши мумкин бўлган, лекин юқоридаги шароитлар туфайли зарур ҳажмда ҳисобланмаган ҳар қандай фойда ушбу корхона фойдасига қўшилиши ва умумий миқдорда солиққа тортилиши мумкин.

2. Аҳдлашувчи Давлатлардан бири шу давлат корхонаси фойдасига бошқа Аҳдлашувчи Давлат корхонаси бўйича ана шу бошқа Давлатда солиққа тортиладиган фойдани киритса шу тариқа киритилган фойда биринчи эслатилган Давлат корхонасига ҳисобланиши мумкин бўлган фойдалар деб ҳисобланади, агар иккала корхона ўртасида вужудга келтирилган муносабатлар икки мустақил корхона ўртасидаги муносабатлар каби бўлса, у ҳолда ана шу бошқа Давлат тегишли фойдадан солиқлар суммасига тегишли тузатишларни киритиши керак. Бунда шундай тузатишларни белгилашда ушбу Конвенциянинг бошқа қоидаларига тегишлича эътиборни қаратиш керак ва Аҳдлашувчи Давлатларнинг ваколатли органлари, зарур бўлса, ўзаро маслаҳатлашувларни бошлашлари лозим.

1. Аҳдлашувчи Давлатлардан бирининг резиденти бўлган компания томонидан бошқа Аҳдлашувчи Давлат резидентига тўланган дивидендлар ана шу бошқа Давлатда солиққа тортилиши мумкин.

2. Бироқ бундай дивидендлар уларни тўлаётган компания қайси Аҳдлашувчи Давлатнинг резиденти бўлса, мазкур Давлатнинг қонунларига биноан ҳам солиққа тортилиши мумкин, аммо дивидендларни олувчи уларнинг ҳақиқий эгаси бўлса, ундириладиган солиқ миқдори дивидендлар ялпи суммасининг 8% дан ошмаслиги керак.

Аҳдлашувчи Давлатларнинг ваколатли органлари ана шу чеклашларни қўллаш усулини ўзаро келишувга биноан белгилайдилар. Бу банд дивидендлар тўланадиган фойдага нисбатан компанияни солиққа тортишга тааллуқли эмас.

3. «Дивидендлар» атамаси мазкур моддада қўлланилганда, акциялардан ёки акциялардан «фойдаланишдан» ёки ҳуқуқлардан «фойдаланишдан», кон қазиш саноати акциялари, муассисларнинг акциялари ёки қарз талаблари ҳисобланмаган ва фойдада иштирок этиш ҳуқуқини берувчи бошқа ҳуқуқлардан олинадиган даромадни, шунингдек фойдани тақсимловчи компания резидент бўлган Давлатнинг қонунларига мувофиқ, акциялардан олинадиган даромад сингари солиқ билан бошқариладиган даромадни англатади.

4. Агар дивидендларнинг ҳақиқий эгаси Аҳдлашувчи Давлатлардан бирининг резиденти бўлгани ҳолда ана шу дивидендларни тўлаётган компания резиденти бўлган бошқа Аҳдлашувчи Давлатда фаолиятини унда жойлашган доимий муассаса орқали амалга оширса ёки ушбу бошқа Давлатда у ерда жойлашган доимий базадан мустақил хусусий хизматлар кўрсатса ва холдинг, дивидендлар унга нисбатан тўланади, аслида шу доимий муассаса ёки доимий база билан боғлиқ бўлса, 1- ва 2-банд қоидалари қўлланилмайди. Бундай ҳолда вазиятга қараб 7-модда ёки 14-модда қоидалари қўлланилади.

5. Агар Аҳдлашувчи Давлатлардан бирининг резиденти бўлган компания бошқа Аҳдлашувчи Давлатда фойда ёки даромад олаётган бўлса, бу бошқа Аҳдлашувчи Давлат компания тўлаётган дивидендлардан солиқ олиши мумкин эмас, ана шу бошқа Давлат резидентига тўланадиган бундай дивидендлар ёки холдинг, дивидендлар унга нисбатан тўланади, шу бошқа Аҳдлашувчи Давлатда жойлашган доимий муассаса ёки доимий база билан ҳақиқатда боғлиқ бўлган холлардан ташқари, шунингдек компаниянинг тақсимланмаган фойдасидан солиқлар олинмайди, ҳатто-ки тўланаётган дивидендлар ёки тақсимланмаган фойда ана шу бошқа Давлатда тўла ёки қисман ҳосил бўлган фойда ёки даромаддан ташкил топган бўлса ҳам.

1. Аҳдлашувчи Давлатларнинг бирида ҳосил бўлган ва бошқа Аҳдлашувчи Давлатнинг резидентига тўланадиган фоизлар ана шу бошқа Давлатда солиққа тортилиши мумкин.

2. Аммо бундай фоизлар улар ҳосил бўлган Аҳдлашувчи Давлатда шу Давлатнинг қонунларига биноан ҳам солиққа тортилиши мумкин, аммо фоизларни олувчи уларнинг ҳақиқий эгаси бўлса, у холда солиқ миқдори фоизлар ялпи суммасининг 10 фоизидан ошмаслиги керак. Аҳдлашувчи Давлатларнинг ваколатли органлари бундай чеклашларни қўллаш усулини ўзаро келишувга биноан белгилайдилар.

3. 2-банднинг қоидаларига қарамай, Аҳдлашувчи Давлатлардан бирида ҳосил бўлган фоизлар ана шу давлатда солиқ тўлашдан озод қилиниши керак, агар фоизларга бошқа Аҳдлашувчи Давлат ёки унинг маҳаллий ҳокимият органлари ёки шу Давлатнинг Марказий банки эга бўлса.

4. «Фоизлар» атамаси мазкур моддада қўлланилганда қарздор фойдасида қатнашишга ҳуқуқ берадиган ёки бермайдиган, бадал билан таъминланган ёки таъминланмаган ҳар қандай турдаги қарз талабларидан олинадиган даромадни ва, хусусан, ҳукумат қимматбаҳо қоғозлари, облигациялар ёки қарз мажбуриятларидан олинадиган даромадни, шу жумладан, ушбу қимматбаҳо қоғозлар, облигациялар ва қарз мажбуриятлари бўйича олинадиган мукофотлар ва ютуқларни, шу жумладан бундай даромад пайдо бўладиган ўша Аҳдлашувчи Давлатнинг солиқ қонунлари бўйича фоизлар сифатида кўриб чиқиладиган ҳар қандай даромадни билдиради. Ўз вақтида тўланмаган тўловлар учун жарималар ушбу модда мақсадларида фоизлар сифатида кўриб чиқилмайди.

5. Агар фоизларнинг ҳақиқий эгаси Аҳдлашувчи Давлатлардан бирининг резиденти бўла туриб, у ерда жойлашган доимий муассаса орқали фоизлар ҳосил бўлаётган бошқа Аҳдлашувчи Давлатда тадбиркорлик фаолияти олиб бораётган бўлса, ёки мазкур бошқа Давлатда жойлашган доимий база орқали мустақил шахсий хизматлар кўрсатаётган бўлса ва фоизлар тўланаётган қарз талабномалари шундай доимий муассаса ёки доимий база билан ҳақиқатан ҳам боғлиқ бўлса, 1- ва 2-банд қоидалари қўлланилмайди. Бу ҳолда вазиятга қараб 7-модда ёки 14-модда қоидалари қўлланилади.

6. Фоизларни тўловчи Аҳдлашувчи Давлатнинг резиденти бўлса, фоизлар мазкур Давлатда ҳосил бўлган деб ҳисобланади. Лекин фоизларни тўловчи шахс, Аҳдлашувчи Давлатнинг резиденти бўлиши ёки бўлмаслигидан қатъи назар, Аҳдлашувчи Давлатда доимий муассасага ёки доимий базага эга бўлиб, шу туфайли қарзлар учун фоизларни тўлаш мажбурияти вужудга келган бўлса, ва бу фоизлар доимий муассаса ёки доимий база томонидан тўланадиган бўлса, бундай ҳолда фоизлар доимий муассаса ёки доимий база жойлашган Аҳдлашувчи Давлатда вужудга келган, деб ҳисобланади.

7. Агар тўловчи ва амалда фоизлар ҳуқуқига эга бўлган шахс ўртасидаги, ёки улар иккаласи ва қандайдир ўзга шахс ўртасидаги алоҳида муносабатлар оқибатида қарз талабномасига нисбатан тўланаётган фоизлар миқдори тўловчи ва амалда фоизлар ҳуқуқига эга шахс ўртасида келишилган миқдордан ошиқ бўлса, бундай муносабатлар йўқ бўлган тақдирда мазкур модда қоидалари фақат охирги эслатилган миқдорга нисбатан қўлланилади. Бундай ҳолда тўловнинг ортиқча қисмидан мазкур Конвенциянинг бошқа қоидалари инобатга олинган ҳолда, ҳар бир Аҳдлашувчи Давлат қонунчилигига мувофиқ илгаригидек солиқ олинади.

1. Аҳдлашувчи Давлатлардан бирида ҳосил бўладиган ва бошқа Аҳдлашувчи Давлатнинг резидентига тўланадиган роялтилар ушбу ўзга Давлатда солиққа тортилиши мумкин.

2. Бироқ бундай, роялтилар улар вужудга келадиган Аҳдлашувчи Давлатда унинг қонунларига мувофиқ ҳам солиққа тортилиши мумкин, лекин агар роялтининг эгаси бошқа Аҳдлашувчи Давлатнинг резиденти бўлса, унда бу тариқа ундириладиган солиқ роялтининг ялпи суммасининг 8 фоизидан ортиқ бўлмаслиги керак. Аҳдлашувчи Давлатларнинг ваколатли органлари бундай чеклашни қўлланиш усулини ўзаро келишув бўйича белгилайдилар.

3. «Роялти» атамаси мазкур моддада қўлланилганда адабий, бадиий ёки илмий асарлар, шу жумладан киноматографик фильмлар, радиоэшиттириш ёки телевидение учун тасмалар ёки кассеталарга муаллифлик ҳуқуқларидан фойдаланиш ёки бундай ҳуқуқлардан фойдаланиш ҳуқуқларини берганлик учун, ҳар қандай патент, товар белгиси, чизма ёки модель, режа, махфий формула ёки жараён ёки саноат, тижорат ёки илмий ускунадан фойдаланишга муаллифлик ҳуқуқлари ёки саноат, тижорат ёки илмий тажрибага мансуб ахборот учун мукофот тарзида олинган ҳар қандай кўринишдаги тўловларни билдиради.

4. Роялтига нисбатан амалда ҳуқуққа эга бўлган шахс Аҳдлашувчи Давлатлардан бирининг резиденти бўлиб, роялти ҳосил бўлаётган бошқа Аҳдлашувчи Давлатда у ерда жойлашган доимий муассаса орқали тадбиркорлик фаолиятини юритаётган бўлса ёки ушбу бошқа Давлатда у ерда жойлашган доимий база орқали мустақил шахсий хизматларни амалга оширса ва роялти тўланаётган ҳуқуқ ёки мулк амалда шундай доимий муассаса ёки доимий база билан боғлиқ бўлса, 1- ва 2-банд қоидалари қўлланилмайди. Бундай ҳолда 7-модда ёки 14-модда қоидалари вазиятга қараб қўлланилади.

5. Агар тўловчи Аҳдлашувчи Давлатнинг резиденти бўлса, роялти шу Аҳдлашувчи Давлатда ҳосил бўлган, деб ҳисобланади. Бироқ, агар, роялтини тўловчи шахс Аҳдлашувчи Давлатнинг резидентими, йўқми, бундан қатъи назар, Аҳдлашувчи Давлатда роялтини тўлаш мажбурияти зиммасига тушган доимий муассасага ёки доимий базага эга бўлса ва бу доимий муассаса ёки доимий база тўлов харажатларини тўласа, бундай роялти доимий муассаса ёки доимий база жойлашган шу Аҳдлашувчи Давлатда ҳосил бўлган, деб ҳисобланади.

6. Агар тўловчи билан амалда роялти ҳуқуқига эга шахс ўртасидаги, ёки уларнинг иккови ва бошқа бирон бир шахс ўртасидаги алоҳида муносабатлар оқибатида роялтидан фойдаланишга, фойдаланиш ҳуқуқига ёки роялти тўланадиган ахборотга тааллуқли роялтининг тўланган миқдори тўловчи ва амалдаги шу даромадлар ҳуқуқига эга шахс ўртасида келишилиши мумкин бўлган миқдордан ошиқ бўлса, бундай муносабатлар йўқ бўлган тақдирда, мазкур модда қоидалари фақат охирги эслатилган миқдорга нисбатан қўлланилади. Бундай ҳолда тўловнинг ортиқча қисмига мазкур Конвенциянинг бошқа қоидалари инобатга олинган ҳолда, ҳар бир Аҳдлашувчи Давлат қонунчилигига мувофиқ аввалгидек солиқ солинади.

7. Агар роялти тўланадиган ҳуқуқларни яратиш ёки ўзгага ўтказиш билан боғлиқ бўлган ҳар қандай шахснинг асосий мақсади ёки асосий мақсадларидан бири мазкур моддадан ҳуқуқларни яратиш ёки ўзгага ўтказиш орқали наф орттириш бўлса, мазкур модданинг қоидалари қўлланилмайди. Бундай ҳолда ҳар бир Аҳдлашувчи Давлатнинг ички қонунлари қўлланилади.

1. Аҳдлашувчи Давлатлардан бирининг резиденти 6-моддада эслатиб ўтилган ва бошқа Аҳдлашувчи Давлатда бўлган кўчмас мулкни сотишдан олинадиган даромадларга ўша бошқа Давлатда солиқ солиниши мумкин.

2. Аҳдлашувчи Давлатлардан бирининг корхонаси бошқа Аҳдлашувчи Давлатда эга бўлган доимий муассаса амалий мулкининг бир қисмини ташкил этувчи кўчар мулкни бегоналаштиришдан олинган ёки Аҳдлашувчи Давлатлардан бирининг резиденти бошқа Аҳдлашувчи Давлатда мустақил шахсий хизматларни амалга оширишида бемалол фойдаланиши мумкин бўлган доимий базага тегишли кўчар мулкни бегоналаштиришдан олинган даромадларга, бунга шу доимий муассасани (алоҳида ёки корхона билан биргаликда) ёки шундай доимий базани бегоналаштиришдан олинган даромадни ҳам қўшиб мана шу бошқа Давлатда солиқ солиниши мумкин.

3. Халқаро ташишларда фойдаланиладиган кемалар ёки самолётларни бегоналаштириш ва шундай кемалар ёки самолётлардан фойдаланишга тааллуқли кўчар мол-мулкни сотишдан олинган даромадлар фақат ана шундай денгиз ёки ҳаво кемаларидан олинадиган фойда 8-модданинг қоидаларига мувофиқ солиқ солинадиган Аҳдлашувчи Давлатда солиққа тортилади.

4. Аҳдлашувчи Давлат резиденти бўлган компанияда 15 фоиз иштирок этган акцияларни бегоналаштиришдан олинган даромадларга шу Аҳдлашувчи Давлатда солиқ солиниши мумкин.

5. 1-, 2-, 3- ва 4-бандларда эслатилганлардан фарқли ўлароқ, Аҳдлашувчи Давлатнинг мол-мулкни бегоналаштирувчи шахс ҳисобланган резиденти ҳар қандай мулкни бегоналаштиришдан олган даромадга фақат шу Давлатда солиқ солинади.

1. Аҳдлашувчи Давлатлардан бирининг резиденти касб хизматларини кўрсатиш ёки мустақил тусдаги бошқа фаолиятдан олган даромадига фақат мана шу Давлатдагина солиқ солиниши мумкин, агар у ўз хизмати мақсадлари учун бошқа Аҳдлашувчи Давлатда ўзи учун доимий қулай бўлган доимий базага эга бўлса. Агар унинг шундай доимий базаси бўлса, солиқ бошқа Давлатда, фақат доимий базага тааллуқли ҳажмдагина олинади.

2. «Касб хизматлари» ибораси жумладан мустақил илмий, адабий, бадиий, маърифий ёки ўқитувчилик фаолиятларини, шунингдек врачлар, юристлар, муҳандислар, меъморлар, стоматологлар ва бухгалтерларнинг мустақил фаолиятини ҳам қамраб олади.

1. 16-, 18- ва 19-моддалар қоидаларини ҳисобга олиб, Аҳдлашувчи Давлатлардан бирининг резиденти ёллаш бўйича оладиган маоши, иш ҳақи ва шунга ўхшаш тақдирлаш пулларига, ёллаш билан боғлиқ иш бошқа Аҳдлашувчи Давлатда амалга оширилмаётган бўлса, мана шу Аҳдлашувчи Давлатда солиқ солиниши мумкин. Агар ёлланма иш шу тариқа бажариладиган бўлса, унда шу муносабат билан олинган тақдирлаш пулига ана шу ўзга Давлатда солиқ солиниши мумкин.

2. 1-банднинг қоидаларига қарамай, Аҳдлашувчи Давлатлардан бирининг резиденти Аҳдлашувчи Давлатлардан бошқасида амалга оширадиган ёллаш бўйича иши учун оладиган тақдирлаш пулларига фақат биринчи эслатилган Давлатда солиқ солинади, бунда:

а) тақдирлаш пули олувчи бошқа Аҳдлашувчи Давлатда кўриб чиқилаётган тақвимий йилда бошланаётган ёки тугаётган исталган 12 ойлик давр доирасида жами 183 кундан ошмайдиган давр ёки даврлар мобайнида яшаётган бўлса;

b) тақдирлаш пули ёлловчи томонидан ёки бошқа Аҳдлашувчи Давлат резиденти бўлмаган ёлловчи номидан тўланади; ва

с) тақдирлаш пули бўйича харажатларни ёлловчи бошқа Аҳдлашувчи Давлатда эга бўлган доимий муассаса ёки доимий база ўз зиммасига олмайди.

3. Мазкур модданинг аввалги қоидаларига қарамай, Аҳдлашувчи Давлат корхонаси халқаро юк ташишларда фойдаланадиган денгиз, ҳаво кемалари, темир йўл ёки автомобиль транспорти воситасида амалга ошириладиган ёлланма иш учун олинадиган тақдирлашларга ана шундай денгиз ёки ҳаво кемаларидан олинадиган фойда 8-модданинг қоидаларига мувофиқ солиқ солинадиган Аҳдлашувчи Давлатда солиқ солиниши мумкин.

Аҳдлашувчи Давлатлардан бирининг резиденти бошқа Аҳдлашувчи Давлат резиденти бўлган компаниянинг Директорлар Кенгаши аъзоси сифатида оладиган гонорарлар ва бошқа шу каби тўловлар ана шу бошқа Давлатда солиққа тортилиши мумкин.

1. 14- ва 15-моддалар қоидаларига қарамай, Аҳдлашувчи Давлатлардан бирининг резиденти театр, кино, радио ёки телевидение артисти ёки мусиқачи каби санъат ходими сифатида ёки спортчи сифатида бошқа Аҳдлашувчи Давлатда амалга ошираётган шахсий фаолияти туфайли оладиган даромадига шу бошқа Давлатда солиқ солиниши мумкин.

2. Санъат ходими ёки спортчи амалга оширган шахсий фаолиятидан олинадиган даромад санъат ходими ёки спортчининг ўзига эмас, бошқа шахсга ёзилса, 7-, 14- ва 15-моддалар қоидаларига қарамай, ушбу даромадга санъат ходими ёки спортчи фаолият кўрсатаётган ўша Аҳдлашувчи Давлатда солиқ солиниши мумкин.

3. Ушбу модданинг 1- ва 2-бандларининг қоидаларига қарамай, Аҳдлашувчи Давлатлар ўртасидаги маданий битим ёки келишувга мувофиқ амалга ошириладиган 1-бандда кўрсатилган фаолиятдан олинадиган даромад ушбу фаолият амалга ошириладиган Аҳдлашувчи Давлатда солиқдан озод қилинади.

1. 19-модданинг 2-банди қоидаларига мувофиқ, Аҳдлашувчи Давлатнинг резидентига унинг илгариги ёлланиш бўйича ишлаган иши учун товон сифатида тўланадиган пенсиялар ва бошқа шу сингари рағбатлантириш пулларига фақат шу Давлатда солиқ солинади.

1. а) Аҳдлашувчи Давлатнинг ўзи ёки унинг маҳаллий ҳокимиятлари Аҳдлашувчи Давлатнинг ўзи ёки унинг маҳаллий ҳокимиятларига кўрсатган хизматларига нисбатан жисмоний шахсга тўлайдиган пенсиядан ташқари маош, иш ҳақи ва шу каби тақдирлаш пулига фақат ана шу Давлатда солиқ солинади.

b) Бироқ бундай маош, иш ҳақи ва шу каби тақдирлаш пулига агар хизматлар мана шу Давлатда амалга оширилса ва жисмоний шахс шу Давлатнинг резиденти:

i) ва шу Давлатнинг миллий шахси бўлса; ёки

ii) фақат хизматларни амалга ошириш мақсадида шу Давлатнинг резиденти бўлмаган бўлса, фақат ана шу бошқа Аҳдлашувчи Давлатда солиқ солиниши мумкин.

2. а) Аҳдлашувчи Давлатнинг ўзи ёки унинг маҳаллий ҳокимиятлари тузган фондлардан шу Давлатга ёки унинг маҳаллий ҳокимиятларига кўрсатган хизматларига нисбатан ҳар қандай жисмоний шахсга тўланадиган ҳар қандай пенсияга фақат мана шу Давлатдагина солиқ солинади.

b) Бироқ агар жисмоний шахс ушбу Давлатнинг резиденти ва миллий шахси бўлса, унда бундай пенсияга фақат бошқа Аҳдлашувчи Давлатда солиқ солиниши мумкин.

3. 15-, 16-, 17- ва 18-моддаларнинг қоидалари Аҳдлашувчи Давлат ёки унинг маҳаллий ҳокимиятлари амалга оширадиган амалий фаолияти муносабати билан кўрсатиладиган хизматларга нисбатан тўланадиган маошлар, иш ҳақи ва шунга ўхшаган тақдирлаш пулларига нисбатан қўлланади.

1. Аҳдлашувчи Давлатлардан бирининг резиденти бошқа Аҳдлашувчи Давлатда олий даражада илмий ёки тадқиқотчилик фаолиятини оширганлиги ёки университет, илмий тадқиқотчилик институти ёки шунга ўхшаган бошқа муассасада икки йилдан ошмайдиган давр мобайнида олий маълумот учун таълим берганлиги учун оладиган тақдирлаш пулларига ушбу бошқа Давлатда солиқ солинмайди.

2. Аҳдлашувчи Давлатга келгунга қадар бошқа Аҳдлашувчи Давлатнинг ҳозирда резиденти ҳисобланиб турган ёки бўлган ва биринчи эслатилган Давлатда фақат ўқиш ёки маълумот олиш мақсадлардагина яшаб турган студент ёки практикантнинг яшаш, ўқиш ва маълумот олиш учун мўлжалланиб оладиган тўловларига мана шу биринчи эслатилган Давлатда, агарда бундай тўловлар шу Давлат ҳудудидан ташқаридаги манбалардан олиб тўланадиган бўлса, солиқ солинмайди.

1. Аҳдлашувчи Давлат резидентининг мазкур Конвенциянинг олдинги моддаларида тилга олинмаган даромад турларига фақат мана шу Давлатдагина солиқ солиниши мумкин.

2. 1-банднинг қоидалари 6-модданинг 2-бандида белгиланган даромадга нисбатан, кўчмас мулкдан олинган даромаддан ташқари, қўлланилмайди, агарда бундай даромадни олувчи Аҳдлашувчи Давлат резиденти бўла туриб, бошқа Аҳдлашувчи Давлатда у ердаги доимий муассаса орқали ўз фаолиятини амалга оширса ёки у ердаги доимий база орқали мустақил шахсий хизматларни амалга оширса ва даромад тўланадиган ҳуқуқ ёки мулк ҳақиқатан ҳам бундай доимий муассаса ёки база билан боғланган бўлса. Бу ҳолатда вазиятга қараб 7-модда ёки 14-модда қоидалари қўлланилади.

1. 6-моддада эслатиб ўтилган кўчмас мол-мулк тарзидаги ва Аҳдлашувчи Давлат резидентига тегишли бўлган ва бошқа Аҳдлашувчи Давлатда жойлашган мол-мулк ана шу бошқа Давлатда солиққа тортилиши мумкин.

2. Аҳдлашувчи Давлатлардан бирининг корхонасининг бошқа Аҳдлашувчи Давлатдаги доимий муассасасининг тадбиркорликка оид мол-мулкининг бир қисми бўлган кўчар мулкка ёки Аҳдлашувчи Давлатлардан бирининг резидентига бошқа Аҳдлашувчи Давлатда мустақил якка тартибдаги хизматларини кўрсатиш учун лозим бўлган доимий базага тегишли мол-мулкка ушбу бошқа Давлатда солиқ солиниши мумкин.

3. Халқаро ташишларда фойдаланиладиган денгиз ёки ҳаво кемалари сифатидаги мулкка ва бундай денгиз ва ҳаво кемаларидан фойдаланиш билан боғлиқ бўлган кўчар мулкка ана шундай денгиз ёки ҳаво кемаларидан олинадиган фойда 8-модданинг қоидаларига мувофиқ солиқ солинадиган Аҳдлашувчи Давлатда солиқ солиниши мумкин.

4. Аҳдлашувчи Давлат резиденти мулкининг бошқа барча элементларига фақат ушбу Давлатда солиқ солинади.

1. Агар Аҳдлашувчи Давлатлардан бирининг резидент мазкур Конвенция қоидаларига мувофиқ бошқа Аҳдлашувчи Давлатда солиққа тортилиши мумкин бўлган даромад олса ва мол-мулкка эга бўлса, унда олдин тилга олинган Давлат:

а) ушбу резидентнинг даромадидан олинадиган солиқдан бошқа Давлатда тўланган даромад солиғига тенг суммани чегириб қолиши,

b) ушбу резидентнинг мол-мулк солиғидан бошқа Давлатда тўланган мол-мулк солиғига тенг суммани чегириб қолиши мумкин.

Бундай ҳисоблар ҳар қандай ҳолда ҳам вазиятга қараб бошқа Давлатда солиққа тортилиши мумкин бўлган даромад ёки мулкка тааллуқли ҳисоблар тақдим қилингунга қадар ҳисоблаб чиқиладиган даромад ёки мол-мулкдан олинадиган солиқ қисмидан ортиқ бўлмаслиги керак.

2. Агар Аҳдлашувчи Давлатлардан бирининг резиденти мазкур Конвенциянинг 7-модда ва 14-модда қоидаларига мувофиқ бошқа Аҳдлашувчи Давлатда солиққа тортилиши мумкин бўлган даромад олса, унда олдин тилга олинган Давлат бундай даромадни солиққа тортишдан озод қилади.

3. Агар Аҳдлашувчи Давлатлардан бирининг резиденти бўлган компания бошқа Аҳдлашувчи Давлат резидентига дивидендларни тўласа, унда компаниянинг дивидендлар тўланадиган фойдага нисбатан тўлаган солиғи кредитда ҳисобга олиниши лозим (1-банднинг (а) кичик банди қоидаларига мувофиқ кредитланиши лозим бўлган ҳар қандай солиққа қўшимча равишда).

4. Агар бир Аҳдлашувчи Давлатнинг қонунларига мувофиқ ушбу Конвенция тегишли бўлган ҳар қандай солиқ ушбу Давлатнинг иқтисодий ривожлантирилишини чуқурлаштириш учун алоҳида қоидалар оқибатида тўлашдан тўлиқ ёки қисман озод қилинган бўлса, унда бошқа Аҳдлашувчи Давлатда бундан олдинги бандларда кўрсатилганидек солиқдан чегирмани ҳисоб-китоб қилиш мақсадларида тўлашдан озод қилинган солиқ тўланган деб ҳисобланади.

1. Аҳдлашувчи Давлатлардан бирининг миллий шахслари бошқа Аҳдлашувчи Давлатда бошқа Давлат миллий шахсларига айни бир хил шароитларда, жумладан резиденцияга нисбатан солиниши мумкин бўлгандан ортиқ ҳар қандай солиқ ёки унга алоқадор мажбуриятларга, солиқ солишдан кўра мушкулроқ ёки унга алоқадор ҳолатларга дучор қилинмайдилар. 1-модданинг қоидаларига қарамасдан ушбу қоидалар, шунингдек бир ёки иккала Аҳдлашувчи Давлат резидентлари бўлмаган шахсларга нисбатан ҳам қўлланади.

2. Аҳдлашувчи Давлатлардан бирининг резидентлари бўлган фуқароликка эга бўлмаган шахслар кўриб чиқилаётган Давлатда бошқа Давлат миллий шахсларига айни бир хил шароитларда солиниши мумкин бўлгандан ортиқ ҳар қандай солиқ ёки унга алоқадор мажбуриятларга, солиқ солишдан кўра мушкулроқ ёки унга алоқадор ҳолатларга дучор қилинмайдилар.

3. Аҳдлашувчи Давлатлардан бирининг корхонасининг бошқа Аҳдлашувчи Давлатда эга бўлган доимий муассасасига солиқ солиш ана шу бошқа Аҳдлашувчи Давлатда ушбу Аҳдлашувчи бошқа Давлатнинг айнан шундай фаолиятни амалга оширувчи корхоналарига солиқ солишдан кўра ёмонроқ бўлмайди. Мазкур қоида бир Аҳдлашувчи Давлатни бошқа Аҳдлашувчи Давлат резидентига солиқ солиш мақсадларида ўз резидентларига уларнинг фуқаролик мавқеи ёки оилавий мажбуриятлари асосида берадиган ҳар қандай хусусий имтиёзлар, озод қилишлар ёки чегирмалар беришга мажбурловчи тарзида талқин қилинмаслиги лозим.

4. 9-моддасининг 1-банди, 11-моддасининг 6-банди ёки 12-моддасининг 6-банди қоидалари қўлланиладиган ҳоллардан ташқари, Аҳдлашувчи Давлат корхонаси бошқа Аҳдлашувчи Давлатлардан бирининг резидентига бундай корхонанинг солиққа тортиладиган даромадини аниқлаш мақсадида тўлайдиган фоизлар, роялтилар ва бошқа қарз тўловлари, агар бундай тўловлар биринчи эслатилган Давлат резидентига тўланган бўлса, бундай шароитда чегириб ташланади. Шу сингари Аҳдлашувчи Давлатлардан бирининг корхонасининг бошқа Аҳдлашувчи Давлат резидентига ҳар қандай қарзлари шу корхонанинг солиққа тортиладиган мол-мулкини аниқлаш мақсадида биринчи эслатилган Давлат резидентининг қарзи сингари шартлар асосида чегириб ташланиши керак.

5. Аҳдлашувчи Давлатлардан бирининг корхоналари, қайсики уларнинг капитали тўлиқ ёки қисман бошқа Аҳдлашувчи Давлатнинг бир ёки ундан кўп резидентларига тегишли бўлса ёки улар томонидан бевосита ёки билвосита назорат қилинса, биринчи эслатилган Давлатда биринчи эслатилган Давлатнинг шундай корхоналарига солинадиган ёки солиниши мумкин бўлган ҳар қандай солиқ ёки унга алоқадор ҳолатлар, бошқа ёки солиқ солишдан кўра мушкулроқ ҳолатларга дучор қилинмайди.

6. Мазкур модданинг қоидалари 2-модда қоидаларига қарамай, турли хил ва таърифдаги солиқларга нисбатан қўлланилади.

1. Агар шахс Аҳдлашувчи Давлатлардан бири ёки ҳар иккаласининг хатти-ҳаракатлари унга мазкур Конвенция қоидаларида назарда тутилганга мувофиқ келмайдиган солиқ солинишига олиб келади ёки олиб келиши мумкин деб ҳисобласа, у мазкур Давлатларнинг солиқ қонунчилигида назарда тугилган ҳимоя воситаларидан қатъи назар, ўз аризасини ўзи резидент бўлган Аҳдлашувчи Давлатнинг ваколатли органига ёки агарда унинг ҳолати 24-модда 1-бандига мувофиқ келса, ўзи миллий шахси бўлган Аҳдлашувчи Давлатга тақдим этиши мумкин. Бундай ариза мазкур Конвенция қоидаларига номувофиқ солиқ солинишига олиб келувчи хатти-ҳаракатлар тўғрисида биринчи бор билдирилган кундан бошлаб уч йил мобайнида берилиши керак.

2. Ваколатли орган ушбу эътирозни асосли деб топса ва унинг ўзи қониқтирадиган қарорга кела олмаса, масалани Конвенцияга мувофиқ келмайдиган солиқ солинишидан қочиш мақсадларида бошқа Аҳдлашувчи Давлатнинг ваколатли органи билан ўзаро келишиб ҳал қилишга ҳаракат қилади. Эришилган ҳар қандай келишув Аҳдлашувчи Давлат ички қонунчилигида назарда тутилган ҳар қандай вақтинча чеклашлардан қатъи назар, бажарилиши керак.

3. Аҳдлашувчи Давлатларнинг ваколатли органлари мазкур Конвенцияни талқин қилиш ёки қўллашда юзага келадиган ҳар қандай қийинчилик ва иккиланишларни ўзаро келишув асосида ҳал қилишга ҳаракат қиладилар. Улар мазкур Конвенцияда кўзда тутилмаган ҳолларда икки томонлама солиққа тортишни бартараф этиш мақсадида ҳам бир-бирлари билан маслаҳатлашишлари мумкин.

4. Аҳдлашувчи Давлатларнинг ваколатли органлари аввалги қоидалар хусусида келишувга эришиш мақсадида бир-бирлари билан бевосита мулоқотга киришишлари мумкин, шу жумладан, улар ёки уларнинг вакилларидан иборат қўшма комиссия доирасида.

1. Аҳдлашувчи Давлатларнинг ваколатли органлари мазкур Конвенция ёки Аҳдлашувчи Давлатларнинг ушбу Конвенция қўлланиладиган солиқларга тегишли бўлган ички қонунлари қоидаларини қўллаш учун ушбу қонунларга мувофиқ солиқ солиниши мазкур Конвенцияга зид келмайдиган даражада зарур ахборот билан алмашиб турадилар. Ахборот алмашиш 1-модда билан чекланиб қолмайди. Аҳдлашувчи Давлат олаётган ҳар қандай ахборот ушбу Давлатнинг ички қонунларига биноан олинган ахборот сингари махфий ҳисобланади ҳамда фақат аниқлаш, олиб қўйиш, мажбурий чора кўриш, суд орқали таъқиб этиш билан боғлиқ ёки мазкур Конвенция тааллуқли бўлган солиқларга нисбатан апелляцияларни кўриб чиқувчи шахслар ва органларгагина (судлар ва маъмурий органларга ҳам) очилади. Бундай шахслар ёки органлар ахборотдан фақат шундай мақсадларда фойдаланадилар. Улар бундай ахборотни очиқ суд мажлиси пайтида ёки юридик қарорларни қабул қилишда очиши мумкин.

2. Ҳеч қандай ҳолатда ҳам мазкур модданинг 1-банди қоидалари Аҳдлашувчи Давлатлар ваколатли органлари зиммасига қуйидаги мажбуриятларни юкловчи қоидалар сифатида талқин қилинмайди:

а) у ёки бошқа Аҳдлашувчи Давлат қонунчилиги ёки маъмурий амалиётига зид маъмурий чоралар ўтказиш;

b) у ёки бу Аҳдлашувчи Давлат қонунчилигига кўра ёки одатдаги маъмурий амалиётга мувофиқ олиниши мумкин бўлмаган ахборотни тақдим этиш;

с) савдо, саноат, тижорат ёки хизмат сири ёки савдо жараёнини фош этувчи ахборотни ёки очилиши давлат сиёсатига зид келувчи ахборотни тақдим этиш.

Мазкур Конвенциянинг ҳеч бир қоидаси дипломатик ваколатхоналар ходимлари ёки консуллик муассасалари ходимларининг халқаро ҳуқуқ умумий нормаларига ёки махсус битимлар қоидаларига мувофиқ белгилаб қўйилган солиқ имтиёзларига дахл қилмайди.

Аҳдлашувчи Давлатларнинг ҳар бири мазкур Конвенциянинг кучга кириши учун уларнинг ички қонунларига кўра талаб қилинадиган зарур расмиятчиликлар тугаганлиги тўғрисида бир-бирларига дипломатик йўллар орқали маълум қиладилар. Мазкур Конвенция айтиб ўтилган ана шундай охирги хабар олинган кундан бошлаб кучга киради ва шундан кейин ушбу Конвенция кучга кирган йилдан кейинги тақвимий йилнинг биринчи январидан бошлаб ёки шу санадан кейин олинадиган даромадга ёки эгаликдаги мол-мулкка нисбатан таъсир кучига эга бўлади.

Мазкур Конвенция Аҳдлашувчи Давлатлардан бири унинг амал қилишини тўхтатгунигача ўз кучини сақлаб қолади. Ҳар бир Аҳдлашувчи Давлат Конвенциянинг амал қилишини бошқа Аҳдлашувчи Давлатга дипломатия йўллари бўйича Конвенция амал қилинишини тўхтатиш тўғрисида Конвенция кучга кирган кундан бошлаб беш йил ўтганидан кейин ҳар қандай тақвимий йилнинг тугашига камида олти ой қолгунигача ёзма хабарнома юбориш орқали тўхтатиши мумкин. Бундай ҳолда Конвенциянинг амал қилиши унинг амал қилишини тўхтатиш тўғрисидаги хабарнома берилган йилдан кейинги тақвимий йилнинг биринчи январида ёки биринчи январидан сўнг олинадиган даромадга ёки эгалигидаги мол-мулкка нисбатан ўз таъсирини тўхтатади.

Тегишли тартибда ваколат берилган қуйидаги имзо чекувчилар шунга гувоҳлик бериб мазкур Конвенцияни имзоладилар.

Афина шаҳрида 1997 йил 1 апрелда икки нусхада, ҳар бири ўзбек, грек ва инглиз тилларида тузилди, бунда ҳамма матнлар ҳам бир хил кучга эга. Шубҳалар пайдо бўлганида инглиз тилидаги матн асос учун қабул қилинади.