Ўзбекистон Республикасининг «Таълим тўғрисида»ги (Ўзбекистон Республикаси Олий Мажлисининг Ахборотномаси, 1997 й., 9-сон, 225-модда) ва «Кадрлар тайёрлаш миллий дастури тўғрисида»ги (Ўзбекистон Республикаси Олий Мажлисининг Ахборотномаси, 1997 й., 11-12-сон, 295-модда) қонунларига ҳамда Ўзбекистон Республикаси Вазирлар Маҳкамасининг 2012 йил 29 декабрдаги 367-сон «Ўрта махсус, касб-ҳунар таълими муассасалари ўқувчилари ўқишини кўчириш, қайта тиклаш ва ўқишдан четлаштириш тартибини такомиллаштириш ҳақида»ги қарорига (Ўзбекистон Республикаси қонун ҳужжатлари тўплами, 2013 й., 1-сон, 6-модда) мувофиқ буюраман:

1. Касбий таълим ташкилотлари ўқувчиларини тегишли таълим дастурида такроран ўқитиш учун курсда қолдириш тартиби тўғрисидаги низом иловага мувофиқ тасдиқлансин.

2. Мазкур буйруқ расмий эълон қилинган кундан эътиборан кучга киради.

Мазкур Низом касбий таълим ташкилотларининг (бундан буён матнда таълим ташкилоти деб юритилади) ўқувчиларини тегишли таълим дастурида такроран ўқитиш учун курсда қолдириш тартибини белгилайди.

Мазкур Низом хорижий таълим ташкилотлари ва уларнинг филиаллари (марказ, бўлим, ўқув-маслаҳат пункти ва шу кабилар) ва ҳарбий академик лицейлар ҳамда олимпия ва паралимпия спорт турларига тайёрлаш марказларига татбиқ этилмайди.

1. Ўқувчиларни тегишли таълим дастурида такроран ўқитиш учун курсда қолдириш уларни таълим ташкилотидан четлаштириш деб ҳисобланмайди.

2. Таълим ташкилотида ҳар бир ўқув йилга ўқувчиларни тегишли таълим дастурида такроран ўқитиш учун курсда қолдириш ва уларни қайта ўқишини расмийлаштириш тўғрисидаги мурожаатларни кўриб чиқиш комиссияси (бундан буён матнда Комиссия деб юритилади) ташкил этилади.

Комиссияга таълим ташкилотининг директори раҳбарлик қилади.

Комиссиянинг таркиби таълим ташкилотининг Педагогик кенгаши қарори билан тасдиқланади ҳамда таълим ташкилоти директорининг буйруғи билан расмийлаштирилади.

3. Комиссия таркибига маънавий-маърифий, ўқув ва ишлаб чиқариш ишлари бўйича директор ўринбосарлари, кафедра мудирлари, бўлим бошлиқлари, гуруҳ раҳбарлари ҳамда тааллуқли фан ўқитувчилари киради.

4. Қорақалпоғистон Республикаси Касбий таълим агентлиги, вилоятлар ва Тошкент шаҳар касбий таълим бошқармалари (бундан буён матнда ҳудудий касбий таълим бошқармаси деб юритилади) таълим ташкилоти томонидан тақдим этилган ўқувчиларни тегишли таълим дастурида такроран ўқитиш учун курсда қолдиришга тегишли ҳужжатларнинг ҳаққонийлигини ўрганиш ҳуқуқига эга.

5. Ўқувчиларни тегишли таълим дастурида такроран ўқитиш учун курсда қолдириш қуйидаги ҳолларда амалга оширилади:

академик қарздорликка (ўзлаштирилмасликка) эга бўлганда;

ягона ишлаб чиқариш амалиётларидан ўтмаганда;

курс ишини топширмаганда;

3 ва ундан ортиқ фан бўйича «қониқарсиз» якуний йиллик баҳо олганда.

6. Ҳар бир гуруҳ раҳбари томонидан ҳар бир курсларни тамомлаш якунлари бўйича академик қарздорликка (ўзлаштирилмасликка) эга бўлган, ягона ишлаб чиқариш амалиётларидан ўтмаган, курс ишини топширмаган ҳамда 3 ва ундан ортиқ фан бўйича «қониқарсиз» якуний йиллик баҳо олган ўқувчилар тўғрисидаги маълумотлар Комиссияга кўриб чиқиш учун тақдим этилади.

Тегишли таълим дастурида такроран ўқитиш учун курсда қолдирилиши мумкин бўлган ўқувчиларнинг ота-оналари (ёки уларнинг ўрнини босувчи шахслар) ўқув йили давомида мунтазам равишда таълим ташкилоти томонидан ўқувчиларни ўзлаштириш ва дарслардаги иштироки кўрсаткичлари тўғрисида хабардор қилиб борилади.

7. Тегишли таълим дастурида такроран ўқитиш учун курсда қолдирилиши кўзда тутилган ўқувчиларнинг ота-оналари (ёки уларнинг ўрнини босувчи шахслар) яшаш манзили ва фуқаролар йиғинига ушбу масалани Комиссияда кўриб чиқиш вақти кўрсатилган ҳолда таълим ташкилоти директорининг расмий хабарномаси юборилади.

Курсда қолдирилаётган ўқувчиларнинг ота-оналари (ёки уларнинг ўрнини босувчи шахслар) ва фуқаролар йиғини вакили Комиссия ишида иштирок этмаганликлари Комиссия ишининг тўхтатилишига ёки тегишли хулосалар чиқармасликка асос бўлмайди.

8. Ўқувчиларни тегишли таълим дастурида такроран ўқитиш учун курсда қолдириш юзасидан ҳар йили ўқув йили якуни бўйича 1 июлга қадар Комиссия қуйидаги ишларни амалга оширади:

тегишли курсни тамомлаш якунлари бўйича академик қарздорликка (ўзлаштирилмасликка) эга бўлган, курс ишини топширмаган, ягона ишлаб чиқариш амалиётларидан ўтмаган ҳамда 3 ва ундан ортиқ фан бўйича «қониқарсиз» якуний йиллик баҳо олган ўқувчиларни тегишли таълим дастурида такроран ўқитиш учун курсда қолдириш тўғрисидаги ҳужжатларни ўрганади;

Комиссиянинг масъул котиби томонидан тегишли таълим дастурида такроран ўқитиш учун курсда қолдириш кўзда тутилган ўқувчиларни рўйхати шакллантирилади;

Комиссия тегишли таълим дастурида такроран ўқитиш учун курсда қолдириш кўзда тутилган ўқувчиларнинг ҳужжатларини ҳудудий касбий таълим бошқармаси билан келишиб Педагогик кенгашга тақдим этади.

9. Педагогик кенгаш тақдим этилган ҳужжатларини ўрганиб чиқиб, тегишли таълим дастурида такроран ўқитиш учун курсда қолдириладиган ўқувчиларга нисбатан тегишли қарор қабул қилади.

Педагогик кенгаш қарорига ўқувчиларни ўқитиш курсини тамомлаш якунлари бўйича рейтинг кўрсаткичи ва курс ишини топшириш натижалари, шунингдек ягона ишлаб чиқариш амалиёти натижалари илова қилинади.

10. Педагогик кенгаш қарори асосида ўқувчиларни тегишли таълим дастурида такроран ўқитиш учун курсда қолдириш тўғрисида таълим ташкилоти директорининг буйруғи расмийлаштирилади.

11. Ўқувчиларни тегишли таълим дастурида такроран ўқитиш учун курсда қолдиришга асос бўлган ҳужжатларнинг асл нусхалари таълим ташкилотининг ходимлар бўлими ёки архивида сақланади.

12. Курсда қолдирилган ўқувчиларнинг шахсий ҳужжатлари ўқувчи ёки ота-оналари (ёки уларнинг ўрнини босувчи шахслар)га берилмайди.

13. Ўқувчиларнинг ўқув йили бошлангунга қадар қайта ўқишини расмийлаштириш тўғрисидаги аризалари улар таълим олаётган таълим ташкилотида қабул қилинади ва ушбу аризалар Комиссия томонидан кўриб чиқилади.

Тегишли таълим дастурида такроран ўқитиш учун курсда қолдирилган ўқувчиларнинг қайта ўқишини расмийлаштириш учун ўқувчи вояга етмаган бўлса, ота-онаси (ёки уларнинг ўрнини босувчи шахслар) томонидан таълим ташкилоти директори номига ариза берилади.

14. Таълим ташкилотининг Педагогик кенгаши тегишли таълим дастурида такроран ўқитиш учун курсда қолдирилган ўқувчиларнинг қайта ўқишини расмийлаштириш тўғрисида қарор қабул қилади. Ушбу қарор асосида таълим ташкилоти директорининг тегишли буйруғи расмийлаштирилади.

Мазкур буйруқда ўқувчилар ўқийдиган ўқув курси, тайёрлов йўналиши ва гуруҳ рақами кўрсатилиши шарт.

15. Агар тегишли таълим дастурида такроран ўқитиш учун курсда қолдирилган ўқувчини қайта ўқишини расмийлаштириш даврида уни ўқиган таълим йўналиши (мутахассислиги) тугатилган бўлса, ўқувчининг хоҳишига кўра шу таълим ташкилотидаги мос ва турдош йўналиши (мутахассислиги) бўйича расмийлаштириш масаласи ҳам ариза билан бирга таълим ташкилоти Педагогик кенгаши томонидан кўриб чиқилиши ва ҳал этилиши лозим.

16. Мажбурий таълимни давом эттириш учун ўқувчиларга тўсқинлик қилаётган таълим ташкилоти раҳбарлари, масъул ходимлар, шунингдек ўқувчиларнинг ота-оналари (ёки уларнинг ўрнини босувчи шахслар) қонунчилик ҳужжатларига мувофиқ жавобгардир.

17. Курсда қолдирилиши ёки қайта ўқишини расмийлаштиришдан норози бўлган ўқувчиларнинг масаласини кўриб чиқиш бўйича уларнинг ота-оналари (ёки уларнинг ўрнини босувчи шахслар) ҳудудий касбий таълим бошқармасига ёзма мурожаат қилишлари мумкин.

18. Мазкур Низом Ўзбекистон Республикаси Соғлиқни сақлаш вазирлиги, Маданият ва спорт ишлари вазирлиги ва Ўзбекистон Бадиий академияси билан келишилган.