Ushbu Qonunning maqsadi gidrotexnika inshootlarining xavfsizligi sohasidagi munosabatlarni tartibga solishdan iborat.

Gidrotexnika inshootlarining xavfsizligi to‘g‘risidagi qonunchilik ushbu Qonun va boshqa qonunchilik hujjatlaridan iboratdir.

Agar O‘zbekiston Respublikasining xalqaro shartnomasida O‘zbekiston Respublikasining gidrotexnika inshootlari xavfsizligi to‘g‘risidagi qonunchiligida nazarda tutilganidan boshqacha qoidalar belgilangan bo‘lsa, xalqaro shartnoma qoidalari qo‘llaniladi.

Ushbu Qonunda quyidagi asosiy tushunchalar qo‘llaniladi:

gidrotexnika inshootlari — suv omborlari to‘g‘onlari, daryolar, soylar, kanallar va kollektorlardagi to‘g‘onlar, daryolarning o‘zanlarini to‘suvchi inshootlar, suv olish, suv o‘tkazish, suv tashlash hamda qirg‘oqlarni himoya qilish inshootlari, gidroelektrostansiyalar, nasos stansiyalari;

gidrotexnika inshootlarini konservatsiyalash — gidrotexnika inshootlarini qurishni yoki ulardan foydalanishni vaqtincha to‘xtatgan holda ularni saqlab turishga doir chora-tadbirlar majmui;

gidrotexnika inshootlarining xavfsizligi — gidrotexnika inshootlarining fuqarolar hayoti, sog‘lig‘i va qonuniy manfaatlari, jismoniy hamda yuridik shaxslarning mol-mulki, atrof-muhit va xo‘jalik obyektlari himoya qilinishini ta’minlash imkonini beruvchi holati;

gidrotexnika inshootlarining xavfsizligi deklaratsiyasi — gidrotexnika inshootlarining xavfsizligini asoslovchi hujjat;

gidrotexnika inshootlarining xavfsizligi mezonlari — gidrotexnika inshootlari holatining va ulardan foydalanish shartlarining gidrotexnika inshootlari avariyasi xavfining yo‘l qo‘yiladigan darajasiga muvofiq bo‘lgan miqdor va sifat ko‘rsatkichlarining cheklangan qiymati;

foydalanuvchi tashkilot — balansida gidrotexnika inshooti mavjud bo‘lgan yoki undan foydalanish huquqiga ega bo‘lgan tashkilot.

Gidrotexnika inshootlari xavfsizligining asosiy prinsiplari quyidagilardan iborat:

qonuniylik;

fuqarolarning hayoti va sog‘lig‘ini, jismoniy hamda yuridik shaxslarning mol-mulkini himoya qilishning, shuningdek atrof-muhitni himoya qilishning ustuvorligi.

Gidrotexnika inshootlarining loyiha ko‘rsatkichlari parametrlariga, ularga yuklamalar hamda ta’sir ko‘rsatish omillariga, shuningdek qurilishda ishlatiladigan materiallarga, foydalanish sharoitlariga qarab gidrotexnika inshootlari I, II, III va IV sinflarga bo‘linadi. Gidrotexnika inshootlarining tasnifidan kelib chiqqan holda gidrotexnika inshootlari xavfsizligini ta’minlashning asosiy talablari belgilanadi.

Gidrotexnika inshootlarining xavfsizligi sohasidagi davlat siyosatining asosiy yo‘nalishlari quyidagilardan iborat:

gidrotexnika inshootlarining xavfsizligi sohasidagi davlat dasturlarini ishlab chiqish va amalga oshirish;

gidrotexnika inshootlarida tabiiy hamda texnogen xususiyatli favqulodda vaziyatlar (bundan buyon matnda favqulodda vaziyatlar deb yuritiladi) yuzaga kelishining oldini olish, shuningdek ularning oqibatlarini tugatish bo‘yicha chora-tadbirlar majmuini ishlab chiqish va amalga oshirish;

ilmiy-tadqiqot faoliyatini rivojlantirish, amaliy va innovatsion loyihalar natijalarini ishlab chiqarish amaliyoti bilan integratsiya qilish;

gidrotexnika inshootlarining xavfsizligi sohasidagi kadrlarni tayyorlash, qayta tayyorlash va ularning malakasini oshirish;

xalqaro hamkorlikni rivojlantirish.

O‘zbekiston Respublikasi Vazirlar Mahkamasi:

gidrotexnika inshootlarining xavfsizligi sohasida yagona davlat siyosati amalga oshirilishini ta’minlaydi;

O‘zbekiston Respublikasi Suv xo‘jaligi vazirligi huzuridagi Suv xo‘jaligi obyektlari xavfsizligini va suvdan foydalanishni nazorat qilish inspeksiyasi tomonidan nazorat qilinadigan gidrotexnika inshootlarining ro‘yxatini tasdiqlaydi;

gidrotexnika inshootlarining xavfsizligi sohasidagi davlat dasturlari ishlab chiqilishini va amalga oshirilishini tashkil etadi;

gidrotexnika inshootlarining xavfsizligi ustidan davlat nazoratini tashkil etadi;

o‘z vakolatlari doirasida gidrotexnika inshootlarining xavfsizligi sohasida xalqaro hamkorlikni tashkil etadi va ta’minlaydi.

O‘zbekiston Respublikasi Vazirlar Mahkamasi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Suv xo‘jaligi vazirligi huzuridagi Suv xo‘jaligi obyektlari xavfsizligini va suvdan foydalanishni nazorat qilish inspeksiyasi gidrotexnika inshootlarining xavfsizligi sohasidagi maxsus vakolatli davlat organidir (bundan buyon matnda maxsus vakolatli davlat organi deb yuritiladi).

Maxsus vakolatli davlat organi:

gidrotexnika inshootlari xavfsizligining davlat nazoratini va tekshiruvini amalga oshiradi;

gidrotexnika inshootlarini qurish va rekonstruksiya qilishga doir loyihaoldi, loyiha hujjatlarini, shuningdek ulardan foydalanish qoidalarini kelishadi;

gidrotexnika inshootlarining xavfsizligi qoidalarini ishlab chiqadi va tasdiqlaydi;

gidrotexnika inshootlarining xavfsizligi mezonlarini tasdiqlaydi;

gidrotexnika inshootlarining xavfsizligi deklaratsiyalarini ko‘rib chiqadi va tasdiqlaydi;

gidrotexnika inshootlarining xavfsizligi sohasidagi kadrlarni tayyorlash, qayta tayyorlash va ularning malakasini oshirishni tashkil etadi;

daryolarning, soylarning o‘zanlarida, gidrotexnika inshootlariga tutash bo‘lgan yuqori va quyi hududlarda suv xo‘jaligi obyektlaridan foydalanishni amalga oshiruvchi yoxud xo‘jalik faoliyati yoki boshqa faoliyat bilan shug‘ullanuvchi tashkilotlarning xo‘jalik faoliyatini yoxud boshqa faoliyatini, agar bu faoliyat gidrotexnika inshootlarining xavfsizligiga salbiy ta’sir ko‘rsatsa, taqiqlaydi, to‘xtatib turadi yoki cheklaydi. Tadbirkorlik subyektlarining faoliyatini taqiqlash, to‘xtatib turish yoki cheklash sud tartibida amalga oshiriladi, bundan ularning faoliyatini favqulodda vaziyatlar, epidemiyalar, pandemiyalar, shuningdek aholining hayoti va sog‘ligi, jismoniy hamda yuridik shaxslarning mol-mulki uchun haqiqiy xavf yuzaga kelishining oldini olish zaruriyati munosabati bilan o‘n ish kunidan ko‘p bo‘lmagan muddatga to‘xtatib turish yoki cheklash hollari mustasno;

o‘z vakolatlari doirasida gidrotexnika inshootlarining xavfsizligi sohasida xalqaro hamkorlikni tashkil etadi;

gidrotexnika inshootlarining qo‘riqlanishi, shuningdek ularning xavfsizlik deklaratsiyasiga muvofiqligi ustidan davlat nazoratini amalga oshiradi;

gidrotexnika inshootlarining xavfsizligini va ishonchli ishlashini ta’minlash to‘g‘risida ko‘rsatmalar beradi;

favqulodda vaziyatlar xavfi darajasi yuqori bo‘lgan gidrotexnika inshootlarini loyihalashtirish hamda qurish ishlarini amalga oshirishda xavfsizlik qoidalari qo‘pol ravishda buzilgan hollarda, loyihalashtirish va qurishga doir litsenziyaning amal qilishini to‘xtatib turish yoki tugatish haqida takliflar kiritadi;

gidrotexnika inshootlariga moneliksiz kiradi, gidrotexnika inshootlarining xavfsizligini ta’minlashga taalluqli barcha hujjatlar va materiallar bilan tanishadi;

gidrotexnika inshootlari xavfsizligi ta’minlanishining davlat nazoratini va tekshiruvini amalga oshirish chog‘ida gidrotexnika inshootidan foydalanuvchini, loyiha hamda pudrat tashkilotlarini, shuningdek manfaatdor vazirliklarni va boshqa respublika ijro etuvchi hokimiyat organlarini jalb etishi mumkin;

favqulodda vaziyatlarning aholiga va iqtisodiyot tarmoqlariga salbiy ta’sirini yumshatish bo‘yicha chora-tadbirlar majmuini ishlab chiqish hamda amalga oshirishda ishtirok etadi;

gidrotexnika inshootlarini qurish, rekonstruksiya qilish, foydalanishga qabul qilish, konservatsiyalash va tugatishda ishtirok etadi, shuningdek tegishli xulosalar beradi;

gidrotexnika inshootlarining texnik holatini joyiga chiqqan holda o‘rganadi va diagnostika ishlarini amalga oshiradi;

o‘z nazorati ostidagi gidrotexnika inshootlarining tekshiruvini bir yil ichida kamida ikki marta amalga oshiradi;

O‘zbekiston Respublikasi Vazirlar Mahkamasi tomonidan tasdiqlangan ro‘yxatga kiritilgan gidrotexnika inshootlarining davlat nazoratini amalga oshiradi.

Maxsus vakolatli davlat organi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Suv xo‘jaligi vazirligi:

gidrotexnika inshootlarining xavfsizligi sohasidagi yagona davlat siyosatini amalga oshiradi;

gidrotexnika inshootlarining xavfsizligi sohasidagi davlat organlarining va boshqa tashkilotlarning faoliyatini muvofiqlashtiradi;

gidrotexnika inshootlaridan foydalanish qoidalariga muvofiq ularning xavfsiz ishlashini ta’minlaydi;

gidrotexnika inshootlarini modernizatsiya qilish, qurish, rekonstruksiya qilishga doir ishlarning sifatli bo‘lishini ta’minlaydi, shuningdek loyihalarning davlat ekspertizasini hamda ularga ilmiy-texnika hujjatlari ilova qilinishini ta’minlaydi;

gidrotexnika inshootlarining xavfsizligi sohasida fan-texnika yutuqlarining amaliyotga tizimli ravishda joriy etilishini tashkil qiladi, ta’lim tashkilotlari va ilmiy-tadqiqot muassasalari o‘rtasidagi integratsiyani kuchaytiradi;

xalqaro hamkorlikni amalga oshiradi, chet el investitsiyalari va texnik yordam mablag‘larini jalb etadi, loyihalashtirish va davlat ekspertizasini o‘tkazish uchun malakali chet el ekspertlarini hamda konsalting tashkilotlarini jalb etadi;

gidrotexnika inshootlarining xavfsizligi sohasidagi zamonaviy texnologiyalarning, qurilish materiallarining hamda ilg‘or xorijiy tajribaning qo‘llanilishini ta’minlaydi.

O‘zbekiston Respublikasi Suv xo‘jaligi vazirligi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Favqulodda vaziyatlar vazirligi:

gidrotexnika inshootlarida yuzaga kelishi mumkin bo‘lgan favqulodda vaziyatlarning oldini olish va ularni bartaraf etish, shuningdek favqulodda vaziyatlar oqibatlari to‘g‘risida xabardor qilish bo‘yicha birgalikdagi o‘quv mashg‘ulotlarida ishtirok etadi;

gidrotexnika inshootlarida favqulodda vaziyatlar yuzaga kelgan taqdirda, aholini va hududlarni himoya qilish bo‘yicha harakatlar rejasini ishlab chiqishda foydalanuvchi tashkilotlarga uslubiy yordam ko‘rsatadi;

xavf darajasi yuqori bo‘lgan gidrotexnika inshootlarini qurishga doir loyiha hujjatlarining favqulodda vaziyatlar talablariga muvofiqligi nuqtai nazaridan davlat ekspertizasini amalga oshiradi;

transchegaraviy ahamiyatga ega gidrotexnika inshootlaridagi favqulodda vaziyatlar oqibatlarini tugatish bo‘yicha avariya-qutqaruv ishlarida O‘zbekiston Respublikasining qonunchiligi va xalqaro shartnomalariga muvofiq ishtirok etadi;

asoslangan prognozlar bo‘yicha gidrotexnika inshootlaridagi ehtimol tutilgan favqulodda vaziyatlarning oldini olish, aholining hayoti va sog‘lig‘ini, jismoniy hamda yuridik shaxslarning mol-mulkini himoya qilish, moddiy va madaniy qimmatliklarni muhofaza qilish, shuningdek favqulodda vaziyatlar oqibatlarini tugatish hamda ularning zararli ta’sirini kamaytirish bo‘yicha chora-tadbirlarni ishlab chiqadi.

O‘zbekiston Respublikasi Favqulodda vaziyatlar vazirligi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Qurilish va uy-joy kommunal xo‘jaligi vazirligi:

gidrotexnika inshootlarini qurish va rekonstruksiya qilishda shaharsozlik hujjatlariga, shaharsozlik normalari va qoidalariga, milliy standartlarga, qurilish ishlari texnologiyalariga, qurilish materiallarining va buyumlarining sifatiga rioya etilishi ustidan davlat nazoratini amalga oshiradi;

gidrotexnika inshootlarini loyihalashtirish va qurish sohasidagi texnik jihatdan tartibga solishga doir normativ hujjatlarni belgilangan tartibda tasdiqlaydi;

gidrotexnika inshootlarini sinflarga bo‘lish normalari va qoidalarini tasdiqlaydi;

gidrotexnika inshootlarini qurishda buyurtmachi tashkilotning texnik nazoratni amalga oshirish bo‘yicha ishlari, loyiha tashkilotlarining mualliflik nazoratini amalga oshirishga doir ishlari, shuningdek pudrat tashkiloti tomonidan ichki nazoratni amalga oshirish bo‘yicha ishlar tekshirilishini tashkil etadi;

qurilishi tugallangan gidrotexnika inshootlarini foydalanishga qabul qilishda ishtirok etadi;

gidrotexnika inshootlarini seysmik jihatdan zaiflik darajasi bo‘yicha tasniflashda, shuningdek ularning instrumental-texnik tekshiruvida hamda zilzilabardoshligini oshirishga doir tadbirlarda ishtirok etadi;

gidrotexnika inshootlarini qurish, rekonstruksiya qilish va ta’mirlash-tiklash ishlari loyihalarining davlat ekspertizasini ta’minlaydi;

gidrotexnika inshootlarining loyihalashtirilishi va qurilishi jarayonida ishlarning sifati ustidan tekshiruv hamda texnik nazorat amalga oshirilishini ta’minlaydi, qurilish jarayonida kamchiliklar va nuqsonlar aniqlangan hollarda esa ularni bartaraf etish yuzasidan choralar ko‘radi.

O‘zbekiston Respublikasi Qurilish va uy-joy kommunal xo‘jaligi vazirligi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Milliy gvardiyasi va O‘zbekiston Respublikasi Mudofaa vazirligi:

qo‘riqlanadigan obyektlarda gidrotexnika inshootlarining qo‘riqlanishini shartnoma asosida ta’minlaydi;

qo‘riqlanadigan obyektlardagi gidrotexnika inshootlarida obyektning ichki rejimiga va nazorat rejimiga rioya etilishini ta’minlaydi, jamoat tartibini saqlashda, favqulodda vaziyatlarning oldini olishda hamda ularning oqibatlarini tugatishda ishtirok etadi;

gidrotexnika inshootlarining qo‘riqlanadigan obyektlarida huquqbuzarliklar profilaktikasiga va ularning oldini olishga qonunchilikda belgilangan tartibda ko‘maklashadi;

gidrotexnika inshootlarining qo‘riqlanadigan obyektlarida fuqarolarning hayoti va sog‘lig‘ini, shuningdek jismoniy va yuridik shaxslarning mol-mulkini tajovuzlardan himoya qiladi;

gidrotexnika inshootlarini qo‘riqlashga zamonaviy axborot-kommunikatsiya texnologiyalari joriy etilishini tashkil qiladi.

O‘zbekiston Respublikasi Milliy gvardiyasi va O‘zbekiston Respublikasi Mudofaa vazirligi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon, geologiya va sanoat xavfsizligini nazorat qilish inspeksiyasi:

Xavfli ishlab chiqarish obyektlarining davlat reyestrida gidrotexnika inshootlarining xavfli ishlab chiqarish obyektlarini ro‘yxatdan o‘tkazadi;

gidrotexnika inshootlaridagi xavfli ishlab chiqarish obyektlarini loyihalashtirish, qurish va foydalanishga topshirish chog‘ida sanoat xavfsizligi talablariga rioya etilishi ustidan davlat nazoratini amalga oshiradi;

gidrotexnika inshootlaridagi xavfli ishlab chiqarish obyektlari xodimlarining sanoat xavfsizligi to‘g‘risidagi qonunchilikda belgilangan talablarga, shuningdek normativ-texnik hujjatlar talablariga rioya etishi ustidan davlat nazoratini amalga oshiradi;

gidrotexnika inshootlarida sanoat xavfsizligi talablariga rioya etilishi ustidan davlat nazoratini amalga oshiradi;

gidrotexnika inshootlarida sanoat xavfsizligi talablarini belgilaydi;

gidrotexnika inshootlarining xavfli ishlab chiqarish obyektlarida qo‘llaniladigan texnik qurilmalar sertifikatlashtirilishini tashkil etadi.

O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon, geologiya va sanoat xavfsizligini nazorat qilish inspeksiyasi qonunchilikka muvofiq boshqa vakolatlarni ham amalga oshirishi mumkin.

Mahalliy davlat hokimiyati vakillik organlari:

gidrotexnika inshootlarining xavfsizligi sohasidagi hududiy dasturlarni tasdiqlaydi va ijrosi ustidan nazoratni amalga oshiradi;

gidrotexnika inshootlarini joylashtirish haqida, shuningdek gidrotexnika inshootlarining xavfsizligi to‘g‘risidagi qonunchilik buzilgan hollarda ulardan foydalanishni cheklash haqida qonunchilikda belgilangan tartibda qarorlar qabul qiladi.

Mahalliy ijro etuvchi hokimiyat organlari:

gidrotexnika inshootlarining xavfsizligi sohasidagi davlat dasturlarini ishlab chiqish va amalga oshirishda ishtirok etadi;

gidrotexnika inshootlarining xavfsizligi sohasidagi hududiy dasturlarni ishlab chiqadi va tasdiqlash uchun mahalliy davlat hokimiyati vakillik organlariga kiritadi hamda amalga oshiradi;

suv resurslaridan foydalanishda va atrof-muhitni muhofaza qilish tadbirlarini amalga oshirishda gidrotexnika inshootlarining xavfsizligini ta’minlaydi;

gidrotexnika inshootlarining avariyalari oqibatlarini tugatishda ishtirok etadi;

gidrotexnika inshootlarining favqulodda vaziyatlarni yuzaga keltirishi mumkin bo‘lgan avariyalari xavfi to‘g‘risida aholini xabardor qiladi;

gidrotexnika inshootlarining xavfsizligini ta’minlash sohasida xalqaro hamkorlikni amalga oshirishda o‘z vakolatlari doirasida ishtirok etadi;

gidrotexnika inshootlarini saqlab turish uchun O‘zbekiston Respublikasining Budjet kodeksida belgilangan tartibda mablag‘lar ajratadi.

Mahalliy davlat hokimiyati organlari qonunchilikka muvofiq boshqa vakolatlarni ham amalga oshirishi mumkin.

Foydalanuvchi tashkilotlar quyidagi huquqlarga ega:

gidrotexnika inshootlarini ta’mirlash va rekonstruksiya qilishda ishtirok etish hamda amalga oshirilayotgan ishlarning tasdiqlangan loyihaga muvofiq bajarilishini talab qilish;

gidrotexnika inshootlarida xavf yuzaga kelganda gidrotexnika inshootlarining xavfsizligi qoidalariga muvofiq mustaqil ravishda choralar ko‘rish;

gidrotexnika inshootlarining hududiga kirish huquqiga ega bo‘lmagan fuqarolarning (shaxslarning) gidrotexnika inshootlariga kirishiga yo‘l qo‘yilmasligini ta’minlash;

qo‘riqlash faoliyatini amalga oshiruvchi subyektlardan gidrotexnika inshootlarini qo‘riqlash talablariga rioya etilishini talab qilish;

jismoniy va yuridik shaxslardan gidrotexnika inshootlari hududida xavfsizlikni ta’minlash qoidalariga rioya etilishini talab qilish.

Foydalanuvchi tashkilotlar:

gidrotexnika inshootlaridan foydalanish, ularni ta’mirlash, tiklash, rekonstruksiya qilish, yakunlangan ishlarni qabul qilish, konservatsiyalash, gidrotexnika inshootlarini foydalanishdan chiqarish hamda tugatish chog‘ida gidrotexnika inshootlarining xavfsizligi normalari va qoidalariga rioya etilishini ta’minlashi;

gidrotexnika inshootlarining suvni muhofaza qilish zonalari, sohil bo‘yi mintaqalari, shuningdek sanitariya muhofazasi zonalari va sanitariya himoya hududlari loyiha ko‘rsatkichlariga muvofiq aniqlanishini hamda belgilanishini ta’minlashi;

gidrotexnika inshootlarining holati, shuningdek ularga nisbatan tabiiy-texnogen ta’sirlar ustidan nazorat va monitoringni amalga oshirishi;

gidrotexnika inshootlarining xavfsizligini baholashni ularga nisbatan barcha zararli ta’sirlarni hisobga olgan holda amalga oshirishi;

gidrotexnika inshootlarining xavfsizligi mezonlari ishlab chiqilishini va ularga o‘z vaqtida aniqliklar kiritilishini ta’minlashi;

gidrotexnika inshootlarining texnik holatini monitoring qilish va gidrotexnika inshootlarining ma’lumotlar bazasini shakllantirish chog‘ida zamonaviy axborot texnologiyalaridan hamda tezkor aloqa vositalaridan foydalanilishini ta’minlashi;

gidrotexnika inshootlari xavfsizligining pasayishi sabablarining doimiy tahlilini o‘tkazishi, ularning texnik jihatdan soz holatda bo‘lishini ta’minlashi, gidrotexnika inshootlarining xavfsizligini ta’minlash bo‘yicha chora-tadbirlarni amalga oshirishi, shuningdek gidrotexnika inshootlarida avariyalarning oldini olishga doir tadbirlar ishlab chiqilishini va o‘z vaqtida bajarilishini ta’minlashi;

gidrotexnika inshootlarining muntazam tekshiruvlari o‘tkazilishini ta’minlashi;

gidrotexnika inshootlarida favqulodda vaziyatlarni bartaraf etish uchun moliyaviy va moddiy resurslar zaxiralarini yaratishi;

gidrotexnika inshootlaridan foydalanishni tashkil etish chog‘ida xodimlarning malakasi belgilangan talablar va qoidalarga muvofiq bo‘lishini ta’minlashi;

aholini gidrotexnika inshootlarida favqulodda vaziyat xavfi yuzaga kelishi mumkinligi yoki favqulodda vaziyat yuzaga kelganligi to‘g‘risida xabardor qilishning avtomatlashtirilgan tizimi doimiy shay holatda bo‘lishini ta’minlashi;

mahalliy davlat hokimiyati organlari bilan birgalikda aholini gidrotexnika inshootlarining xavfsizligi masalalari bo‘yicha xabardor qilishi;

maxsus vakolatli davlat organi bilan hamkorlik qilishi;

gidrotexnika inshootlaridan foydalanish xavfsizligini oshirish uchun ularni zamonaviy uskunalar, nazorat-o‘lchov va kuzatuv asboblari bilan jihozlashi, shuningdek raqamli texnologiyalarni joriy etishi;

gidrotexnika inshootlarida favqulodda vaziyat yuzaga kelishi xavfi yoki favqulodda vaziyat yuzaga kelganligi to‘g‘risida respublika ijro etuvchi hokimiyat organlarini, mahalliy ijro etuvchi hokimiyat organlarini, korxonalar, muassasalar va tashkilotlarni, shuningdek aholini darhol xabardor qilishi;

gidrotexnika inshootlarining nazorat-o‘lchov va kuzatuv asboblari ishlash holatida saqlanishini, ularning takomillashtirilishini, shuningdek ulardan maqsadli foydalanilishini ta’minlashi;

gidrotexnika inshootlarining xavfsizligi deklaratsiyasi ishlab chiqilishi va tasdiqlanishini ta’minlashi;

maxsus vakolatli davlat organiga o‘z vakolatlarini amalga oshirishida ko‘maklashishi;

gidrotexnika inshootlaridan foydalanish uchun ajratiladigan mablag‘larni birinchi navbatda ularning xavfsizligini ta’minlash, favqulodda vaziyatlarning oldini olish va oqibatlarini bartaraf etish ishlarini moliyalashtirish uchun yo‘naltirishi;

gidrotexnika inshootlarini rekonstruksiya qilish, ulardan foydalanish chog‘ida ishlarni tasdiqlangan gidrotexnika inshootlaridan foydalanish normalari va qoidalariga qat’iy muvofiq holda tashkil etishi;

O‘zbekiston Respublikasi aholisi va hududining seysmik xavfsizligini ta’minlash to‘g‘risidagi qonunchilik talablariga hamda seysmik xavfsizlik ta’minlanishini texnik jihatdan tartibga solish qoidalariga rioya etishi;

gidrotexnika inshootlari xavfsizligini ta’minlashga oid qismida maxsus vakolatli davlat organining ko‘rsatmalarini bajarishi shart.

Foydalanuvchi tashkilotlar qonunchilikka muvofiq boshqa huquqlarga ega bo‘lishi va ularning zimmasida o‘zga majburiyatlar ham bo‘lishi mumkin.

Gidrotexnika inshootlarining xavfsizligini ta’minlash maqsadida buyurtmachi tashkilotlar gidrotexnika inshootlarini qurish, rekonstruksiya qilish, ta’mirlash, konservatsiyalash va tugatish chog‘ida:

loyihaoldi va loyiha hujjatlarini tayyorlashi, shuningdek ularning davlat ekspertizasidan o‘tkazilishini ta’minlashi, shaharsozlik to‘g‘risidagi qonunchilik talablariga rioya etishi;

loyiha hujjatlarini davlat ekologik ekspertizasidan o‘tkazishi, shuningdek gidrotexnika inshootlarini qurish va rekonstruksiya qilish davrida davlat ekologik ekspertizasining xulosasida ko‘rsatilgan talablarni bajarishi;

O‘zbekiston Respublikasi Qurilish va uy-joy kommunal xo‘jaligi vazirligi huzuridagi qurilish sohasidagi hududiy nazorat inspeksiyalarida obyektlarning ro‘yxatdan o‘tkazilishini ta’minlashi;

texnik nazorat va monitoringni amalga oshirishi;

loyiha talablariga muvofiq ishlarning o‘z vaqtida va sifatli bajarilishini nazorat qilishi hamda yo‘l qo‘yilgan kamchiliklarni bartaraf etishi;

loyihalarni amalga oshirish uchun ajratilgan mablag‘lardan maqsadli va samarali foydalanilishini ta’minlashi;

loyihada nazarda tutilgan ishlar tugallanganidan keyin gidrotexnika inshootlarining o‘z vaqtida foydalanishga qabul qilinishini belgilangan tartibda ta’minlashi;

gidrotexnika inshootlarini foydalanishga qabul qilish chog‘ida ularning zilzilabardoshligiga doir instrumental-texnik tekshiruvdan o‘tkazilishini tashkil etishi;

qurilishi tugallangan gidrotexnika inshootlaridan foydalanishning kafolatli davri mobaynida aniqlangan kamchiliklarning bartaraf etilishini ta’minlashi;

loyiha hujjatlarini ishlab chiqishga mazkur sohadagi ixtisoslashgan nufuzli loyiha tashkilotlarining jalb etilishini ta’minlashi;

I, II va III sinfga mansub gidrotexnika inshootlarining loyihaoldi va loyiha hujjatlarini maxsus vakolatli davlat organi bilan kelishishi;

loyihalarni amalga oshirish chog‘ida mualliflik va geotexnik nazoratni tashkil etishi hamda ta’minlashi;

I va II sinfga mansub gidrotexnika inshootlarini loyihalashtirish hamda ekspertizadan o‘tkazish chog‘ida ilmiy muassasalarning va ta’lim tashkilotlarining, shuningdek xalqaro tashkilotlarning, chet el kompaniyalarining yuqori malakali mutaxassislarini ekspertlar sifatida jalb etishi;

O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon, geologiya va sanoat xavfsizligini nazorat qilish inspeksiyasi nazorati ostidagi gidrotexnika inshootlariga o‘rnatilgan texnik qurilmalarni qo‘llash uchun ruxsatnoma olishi;

tender yoki tanlov hujjatlarida ishtirokchilarga gidrotexnika inshootlarining xavfsizligini ta’minlash sohasidagi amaliy tajriba, qurilish uskunalari, laboratoriyalar, mashinalar va mexanizmlar, shuningdek malakali mutaxassislar mavjud bo‘lishi to‘g‘risidagi talablarni belgilashi shart.

Gidrotexnika inshootlarini qurish, rekonstruksiya qilish, ta’mirlash, konservatsiyalash va tugatish chog‘ida buyurtmachi tashkilotlarning zimmasida qonunchilikka muvofiq boshqa majburiyatlar ham bo‘lishi mumkin.

Gidrotexnika inshootlarining xavfsizligini ta’minlash maqsadida loyiha tashkilotlari gidrotexnika inshootlarini qurishni, rekonstruksiya qilishni, ta’mirlashni, konservatsiyalash va tugatishni loyihalashtirish chog‘ida:

loyihalarni O‘zbekiston Respublikasining Shaharsozlik kodeksiga, “Ekologik ekspertiza to‘g‘risida”gi hamda “O‘zbekiston Respublikasi aholisi va hududining seysmik xavfsizligini ta’minlash to‘g‘risida”gi O‘zbekiston Respublikasi qonunlari talablariga va boshqa tegishli normativ-huquqiy hujjatlarga muvofiq ishlab chiqishi;

loyiha hujjatlarida yuqori samarali mashinalar va mexanizmlar, zamonaviy qurilish materiallari, texnologiyalari hamda uskunalari qo‘llanilishini nazarda tutishi;

gidrotexnika inshootlaridan foydalanish qoidalarini buyurtmachi tashkilotning talabnomasiga ko‘ra ishlab chiqishi;

loyiha-smeta hujjatlarining ekspertizasida, shu jumladan davlat ekologik ekspertizasida ishtirok etishi;

loyihalashtirish chog‘ida muhandislik-geologik qidiruv ishlarining sifatli bajarilishini ta’minlashi;

loyihani bajarishda shartnomaga asosan mualliflik nazoratini amalga oshirishi;

loyihalashtirish chog‘ida gidrotexnika inshootlarining xavfsizligi mezonlarini inobatga olishi shart.

Gidrotexnika inshootlarini qurishni, rekonstruksiya qilishni, ta’mirlashni, konservatsiyalash va tugatishni loyihalashtirish chog‘ida loyiha tashkilotlarining zimmasida qonunchilikka muvofiq boshqa majburiyatlar ham bo‘lishi mumkin.

Gidrotexnika inshootlarining xavfsizligini ta’minlash maqsadida pudrat tashkilotlari gidrotexnika inshootlarini qurish, rekonstruksiya qilish, ta’mirlash, konservatsiyalash va tugatish loyihalarini amalga oshirish chog‘ida:

loyihada nazarda tutilgan ishlarning loyiha talablariga muvofiq o‘z vaqtida va sifatli bajarilishini ta’minlashi;

loyihani amalga oshirish davrida nazorat hujjatlari yuritilishini, loyiha tashkilotlarining va buyurtmachi tashkilotning, O‘zbekiston Respublikasi Qurilish va uy-joy kommunal xo‘jaligi vazirligi huzuridagi qurilish sohasidagi hududiy nazorat inspeksiyalarining, shuningdek maxsus vakolatli davlat organining ko‘rsatmalari bajarilishini ta’minlashi;

loyihalarni amalga oshirish chog‘ida buyurtmachi tashkilotga ijro hujjatlarini, qurilish materiallari va uskunalarining tegishli muvofiqlik sertifikatlarini hamda texnik pasportlarini taqdim etishi;

qurilish jarayonida, shuningdek foydalanishning kafolatli davrida mualliflik va texnik nazorat natijasida aniqlangan kamchiliklarni o‘z vaqtida bartaraf etishi;

qurilishga oid tavakkalchiliklar xavfini majburiy sug‘urta qilishni amalga oshirishi, qurilish davrida obyektning qo‘riqlanishini ta’minlashi shart.

Gidrotexnika inshootlarini qurish, rekonstruksiya qilish, ta’mirlash, konservatsiyalash va tugatish loyihalarini amalga oshirish chog‘ida pudrat tashkilotlarining zimmasida qonunchilikka muvofiq boshqa majburiyatlar ham bo‘lishi mumkin.

Gidrotexnika inshootlarining xavfsizligini ta’minlashga nisbatan quyidagi asosiy talablar qo‘yiladi:

texnik jihatdan tartibga solish sohasidagi gidrotexnika inshootlarining xavfsizligini ta’minlashga doir normativ hujjatlarga rioya etish;

gidrotexnika inshootlarining xavfsizligini deklaratsiyalash;

xavflilik darajasi yuqori bo‘lgan obyektlar jumlasiga kiruvchi gidrotexnika inshootlarini loyihalashtirishga, qurishga va ulardan foydalanishga doir faoliyatni litsenziyalash;

gidrotexnika inshootlaridan foydalanishning uzluksizligi;

gidrotexnika inshootlarining xavfsizligini ta’minlash bo‘yicha chora-tadbirlarni amalga oshirish, shu jumladan ularning xavfsizlik mezonlarini belgilash, gidrotexnika inshootlarining holatini nazorat qilish maqsadida ularni zamonaviy texnik uskunalar bilan jihozlash, gidrotexnika inshootlariga zarur malakaga ega bo‘lgan xodimlar tomonidan xizmat ko‘rsatilishini ta’minlash;

gidrotexnika inshootlarida favqulodda vaziyatlarning yuzaga kelishi xavfini eng ko‘p darajada kamaytirish bo‘yicha profilaktika tadbirlarini amalga oshirish;

gidrotexnika inshootlaridan foydalanish qoidalariga rioya etish;

maxsus vakolatli davlat organining hamda foydalanuvchi tashkilotlarning xavfsizlikni ta’minlashga doir ko‘rsatmalari gidrotexnika inshootlari hududida jismoniy va yuridik shaxslar tomonidan bajarilishi.

Gidrotexnika inshootlarini bir vaqtning o‘zida (muvoziy) loyihalashtirish va qurish, rekonstruksiya qilish taqiqlanadi.

Gidrotexnika inshootlarini bir vaqtning o‘zida (muvoziy) loyihalashtirilgan holda qurish mudofaa qobiliyatini hamda davlat xavfsizligini, aholining hayoti va sog‘lig‘i, jismoniy hamda yuridik shaxslarning mol-mulki xavfsizligini ta’minlashga doir tadbirlar, tabiiy va ekologik ofatlar oqibatlarini bartaraf etish, O‘zbekiston Respublikasining xalqaro majburiyatlarini bajarish bilan bog‘liq bo‘lgan alohida hollarda, shuningdek moliyalashtirish manbalari mavjud bo‘lgan taqdirda O‘zbekiston Respublikasi Prezidentining farmonlari va qarorlariga hamda O‘zbekiston Respublikasi Vazirlar Mahkamasining qarorlariga ko‘ra amalga oshirilishi mumkin.

Gidrotexnika inshootlaridagi loyiha-qidiruv ishlarini ilmiy-texnik jihatdan ta’minlash quyidagilarni o‘z ichiga oladi:

mavjud vaziyatlar va muammolar loyihada to‘g‘ri baholanganligini o‘rganish;

bajarilgan loyiha-qidiruv ishlarining sifati va to‘liqligini tahlil qilish;

geologik, gidrologik va gidrogeologik ma’lumotlarning sifatini o‘rganish va tahlil qilish;

qabul qilingan loyihaviy yechimning to‘g‘riligini, yakuniy yechimning ilmiy-texnik jihatdan asoslanganligini, yuqori samarali mashinalar va mexanizmlar, zamonaviy qurilish materiallari, texnologiyalari hamda uskunalari qo‘llanilganligini tahlil qilish;

ilg‘or xorijiy tajribadan foydalanilganligini o‘rganish;

gidrotexnika inshootlarining xavfsiz ishlashi, shuningdek atrof-muhitga ta’sirining baholanganligini, muhofaza zonalari va sohil bo‘yi mintaqalarining belgilanganligini ta’minlash.

Loyiha-qidiruv ishlarini ilmiy-texnik jihatdan ta’minlashga ta’lim tashkilotlari, ilmiy-tadqiqot muassasalari va olimlar jalb etilishi mumkin.

Gidrotexnika inshootlarining davlat kadastri Davlat kadastrlarining yagona tizimiga kiradi.

Gidrotexnika inshootlari to‘g‘risidagi ma’lumotlar Gidrotexnika inshootlarining davlat kadastriga kiritiladi.

Maxsus vakolatli davlat organi nazoratidagi gidrotexnika inshootlarining davlat kadastri maxsus vakolatli davlat organi tomonidan, qolgan barcha gidrotexnika inshootlarining davlat kadastri esa foydalanuvchi tashkilotlar tomonidan yuritiladi.

Gidrotexnika inshootlarining davlat kadastrini yuritish ishlari O‘zbekiston Respublikasi Davlat budjeti, shuningdek foydalanuvchi tashkilotlar mablag‘lari hisobidan moliyalashtiriladi.

Gidrotexnika inshootlarining davlat kadastrini yuritishda qo‘llaniladigan shakllar maxsus vakolatli davlat organi tomonidan belgilangan tartibda tasdiqlanadi.

Gidrotexnika inshootlarining xavfsizligi deklaratsiyasi:

gidrotexnika inshootlaridan foydalanish, ularni rekonstruksiya qilish, ta’mirlash, shuningdek konservatsiyalash, tugatish davrida — foydalanuvchi tashkilotlar tomonidan;

gidrotexnika inshootlarini foydalanishga topshirishda — buyurtmachi tashkilotlar tomonidan tuziladi.

Gidrotexnika inshootlarining xavfsizligi deklaratsiyasini tuzish tartibi O‘zbekiston Respublikasi Vazirlar Mahkamasi tomonidan belgilanadi.

Foydalanuvchi tashkilotlar va buyurtmachi tashkilotlar gidrotexnika inshootlarining xavfsizligi deklaratsiyasini maxsus vakolatli davlat organiga davlat ekspertizasini o‘tkazish uchun taqdim etadi.

Gidrotexnika inshootlari xavfsizligi deklaratsiyasining maxsus vakolatli davlat organi tomonidan tasdiqlanishi gidrotexnika inshootlarini davlat kadastriga kiritish hamda ularni foydalanishga topshirishga yoki ularni foydalanishdan chiqarishga, rekonstruksiya qilishga, kapital ta’mirlashga, tiklashga yoki konservatsiyalashga ruxsatnoma olish uchun asos bo‘ladi.

Gidrotexnika inshootlari xavfsizligi deklaratsiyasining davlat ekspertizasi maxsus vakolatli davlat organi tomonidan o‘tkaziladi va uning huzurida tashkil etilgan Ekspertlar kengashi tomonidan tasdiqlanadi.

Maxsus vakolatli davlat organi tomonidan davlat ekspertizasi xulosasiga asosan gidrotexnika inshootining xavfsizligi deklaratsiyasini tasdiqlash to‘g‘risida, tegishli ruxsatnoma berish haqida yoki ruxsatnoma berishni rad etish to‘g‘risida qarorlar qabul qilinishi mumkin.

Foydalanuvchi tashkilotlar maxsus vakolatli davlat organining ruxsatnoma berishni rad etish haqidagi qarori ustidan sud tartibida shikoyat qilishi mumkin.

Foydalanuvchi tashkilotlarning, loyiha va pudrat tashkilotlarining gidrotexnika inshootlaridan foydalanish, ularni qurish, rekonstruksiya qilish, ta’mirlash, tiklash yoki konservatsiyalash bo‘yicha faoliyati gidrotexnika inshootlarining xavfsizligini ta’minlash normalari va qoidalariga rioya etilishi maqsadida vakolatli organlar tomonidan tekshiriladi.

Gidrotexnika inshootlarini tekshirish chog‘ida foydalanuvchi tashkilotlar, loyiha va pudrat tashkilotlari tekshiruvchilarga barcha zarur hujjatlarni taqdim etishi, ularning gidrotexnika inshootlari joylashgan hududga moneliksiz kirishini ta’minlashi shart.

Gidrotexnika inshootlaridagi favqulodda vaziyatlarni bartaraf etish uchun moliyaviy va moddiy resurslar zaxiralari ulardan shoshilinch tarzda foydalanish maqsadida foydalanuvchi tashkilotlar tomonidan oldindan yaratiladi.

Gidrotexnika inshootlaridagi favqulodda vaziyatlarni bartaraf etish uchun moliyaviy va moddiy resurslar zaxiralarini yaratish tartibi O‘zbekiston Respublikasi Vazirlar Mahkamasi tomonidan belgilanadi.

Gidrotexnika inshootlaridagi favqulodda vaziyatlarni bartaraf etish uchun moliyaviy va moddiy resurslar zaxiralari oziq-ovqat mahsulotlarining, kiyim-kechaklarning, dori vositalarining, tibbiy buyumlarning, tibbiy texnikaning, qurilish materiallarining, neft mahsulotlarining, umumiy va yakka himoyalanish vositalarining, avariyadan himoyalanishga doir boshqa vositalarning maxsus zaxiralarini, shu jumladan moddiy resurslarni, shuningdek favqulodda vaziyatlarni bartaraf etish chog‘idagi kutilmagan xarajatlarning o‘rnini qoplash uchun mo‘ljallangan mablag‘larni o‘z ichiga oladi.

Gidrotexnika inshootlaridagi favqulodda vaziyatlarni bartaraf etish uchun moliyaviy va moddiy resurslar zaxiralari daxlsiz hisoblanadi hamda moddiy boyliklarni har yili inventarizatsiyadan o‘tkazish chog‘ida normadan ortiqcha qoldiq hisobotga kiritilmaydi.

Gidrotexnika inshootlaridan foydalanish davrida favqulodda vaziyat yuzaga kelishi natijasida boshqa shaxslarning hayotiga, sog‘lig‘iga va (yoki) mol-mulkiga, shuningdek atrof-muhitga zarar yetkazilganligi uchun foydalanuvchi tashkilotlarning fuqarolik javobgarligini sug‘urta qilish qonunchilikda belgilangan tartibda amalga oshiriladi.

Foydalanuvchi tashkilotlarning fuqarolik javobgarligini sug‘urta qilish tartibi va Sug‘urta obyektlarining ro‘yxati O‘zbekiston Respublikasi Vazirlar Mahkamasi tomonidan belgilanadi.

Gidrotexnika inshootlaridan foydalanish davrida favqulodda vaziyatlar natijasida fuqarolarning hayoti va sog‘lig‘iga, jismoniy hamda yuridik shaxslarning mol-mulkiga yetkazilgan zararning o‘rni qonunchilikda belgilangan tartibda sug‘urta summasi doirasida qoplanadi.

Transchegaraviy ahamiyatga ega bo‘lgan gidrotexnika inshootlaridagi favqulodda vaziyatlar natijasida yetkazilgan zararning o‘rni O‘zbekiston Respublikasining qonunchiligida va xalqaro shartnomalarida belgilangan tartibda qoplanadi.

Gidrotexnika inshootlaridan foydalanish davrida favqulodda vaziyat natijasida yetkazilgan zararning sug‘urta summasidan ortig‘ining o‘rnini qoplash tartibi O‘zbekiston Respublikasi Vazirlar Mahkamasi tomonidan belgilanadi.

Gidrotexnika inshootlarining xavfsizligini ta’minlash sohasida chet davlatlar, xalqaro tashkilotlar bilan axborot almashish O‘zbekiston Respublikasining qonunchiligiga va xalqaro shartnomalariga muvofiq amalga oshiriladi.

Transchegaraviy ta’sir ko‘rsatadigan yoki transchegaraviy zarar yetkazishga qodir bo‘lgan transchegaraviy gidrotexnika inshootlarida favqulodda vaziyat yuzaga kelganligi yoki yuzaga kelishi mumkinligi to‘g‘risida chet davlatlarni xabardor qilish O‘zbekiston Respublikasining qonunchiligiga va xalqaro shartnomalariga muvofiq vakolatli davlat organlari tomonidan amalga oshiriladi.

Gidrotexnika inshootlarida favqulodda vaziyat yuzaga kelgan hollarda uning oqibatlarini bartaraf etish, aholining hayoti va sog‘lig‘ini, jismoniy va yuridik shaxslarning mol-mulkini himoya qilish, shuningdek atrof-muhitni muhofaza qilish maqsadida xalqaro yordam berish va olish O‘zbekiston Respublikasining qonunchiligiga va xalqaro shartnomalariga muvofiq amalga oshiriladi.

Gidrotexnika inshootlarining xavfsizligi to‘g‘risidagi qonunchilikni buzganlikda aybdor shaxslar belgilangan tartibda javobgar bo‘ladi.

O‘zbekiston Respublikasining 1994-yil 22-sentabrda qabul qilingan 2015-XII-sonli Qonuni bilan tasdiqlangan O‘zbekiston Respublikasining Ma’muriy javobgarlik to‘g‘risidagi kodeksiga (O‘zbekiston Respublikasi Oliy Kengashining Axborotnomasi, 1995-yil, № 3, 6-modda; O‘zbekiston Respublikasi Oliy Majlisining Axborotnomasi, 1995-yil, № 9, 193-modda, № 12, 269-modda; 1996-yil, № 5-6, 69-modda, № 9, 144-modda; 1997-yil, № 2, 56-modda, № 4-5, 126-modda, № 9, 241-modda; 1998-yil, № 3, 38-modda, № 5-6, 102-modda, № 9, 181-modda; 1999-yil, № 1, 20-modda, № 5, 124-modda, № 9, 229-modda; 2000-yil, № 5-6, 153-modda, № 7-8, 217-modda; 2001-yil, № 1-2, 23-modda, № 9-10, 165, 182-moddalar; 2002-yil, № 1, 20-modda, № 9, 165-modda; 2003-yil, № 1, 8-modda, № 5, 67-modda, № 9-10, 149-modda; 2004-yil, № 1-2, 18-modda, № 5, 90-modda, № 9, 171-modda; 2005-yil, № 1, 18-modda; O‘zbekiston Respublikasi Oliy Majlisi palatalarining Axborotnomasi, 2005-yil, № 9, 312-modda, № 12, 413, 417, 418-moddalar; 2006-yil, № 6, 261-modda, № 9, 498-modda, № 10, 536-modda, № 12, 656, 659-moddalar; 2007-yil, № 4, 158, 159, 164, 165-moddalar, № 9, 416, 421-moddalar, № 12, 596, 604, 607-moddalar; 2008-yil, № 4, 181, 189, 192-moddalar, № 9, 486, 488-moddalar, № 12, 640, 641-moddalar; 2009-yil, № 1, 1-modda, № 9, 334, 335, 337-moddalar, № 10, 380-modda, № 12, 462, 468, 470, 472, 474-moddalar; 2010-yil, № 5, 175, 179-moddalar, № 6, 231-modda, № 9, 335, 339, 341-moddalar, № 10, 380-modda, № 12, 468, 473, 474-moddalar; 2011-yil, № 1, 1-modda, № 4, 104, 105-moddalar, № 9, 247, 252-moddalar, № 12/2, 365-modda; 2012-yil, № 4, 108-modda, № 9/1, 242-modda, № 12, 336-modda; 2013-yil, № 4, 98-modda, № 10, 263-modda; 2014-yil, № 1, 2-modda, № 5, 130-modda, № 9, 244-modda, № 12, 341, 343-moddalar; 2015-yil, № 6, 228-modda, № 8, 310, 312-moddalar, № 12, 452-modda; 2016-yil, № 1, 2-modda, № 4, 125-modda, № 9, 276-modda, № 12, 383, 385-moddalar; 2017-yil, № 4, 137-modda, № 6, 300-modda, № 9, 510-modda, № 10, 605-modda; 2018-yil, № 1, 1, 4, 5-moddalar, № 4, 224-modda, № 7, 430, 431, 432-moddalar, № 10, 671, 673, 679-moddalar; 2019-yil, № 1, 1, 3, 5-moddalar, № 2, 47-modda, № 3, 161, 165, 166-moddalar, № 5, 259, 261, 267, 268-moddalar, № 7, 386-modda, № 8, 469, 471-moddalar, № 9, 591, 592-moddalar, № 10, 674, 676-moddalar, № 11, 787, 791-moddalar, № 12, 880, 891-moddalar; 2020-yil, № 1, 4-modda, № 3, 203, 204-moddalar, № 7, 449-modda, № 9, 539, 540-moddalar, № 10, 593, 596-moddalar, № 11, 651-modda, № 12, 691-modda; 2021-yil, № 1, 5, 7, 12, 13, 14-moddalar, № 2, 142-modda, № 3, 217-modda, № 4, 290, 293-moddalar, 4-songa ilova, № 8, 800, 802, 803-moddalar, № 9, 903-modda, № 10, 966, 967, 968, 973-moddalar, № 11, 1066-modda; 2022-yil, № 1, 1, 2-moddalar, № 2, 80, 81-moddalar, № 3, 215, 216-moddalar, № 4, 337-modda, № 5, 464, 465, 466, 467-moddalar, № 8, 787-modda, № 10, 981, 984-moddalar, № 12, 1188-modda; 2023-yil, № 3, 184, 185, 188, 189-moddalar, № 4, 265, 266, 268-moddalar) quyidagi o‘zgartirishlar kiritilsin:

1) 76-modda:

nomi quyidagi tahrirda bayon etilsin:

ikkinchi qismining dispozitsiyasi quyidagi tahrirda bayon etilsin:

“Suv xo‘jaligi obyektlari va qurilmalaridan foydalanish qoidalarini buzish, shuningdek gidrotexnika inshootlarining xavfsizligi to‘g‘risidagi qonunchilikni buzish”;

2) 245-moddaning birinchi qismidagi “76-moddasida (suv xo‘jaligi inshootlarini shikastlantirishga oid qismida)” degan so‘zlar “76-moddasida (suv xo‘jaligi obyektlarini shikastlantirish va gidrotexnika inshootlarining xavfsizligi to‘g‘risidagi qonunchilikni buzish bilan bog‘liq qismida)” degan so‘zlar bilan almashtirilsin.

Quyidagilar o‘z kuchini yo‘qotgan deb topilsin:

1) O‘zbekiston Respublikasining 1999-yil 20-avgustda qabul qilingan “Gidrotexnika inshootlarining xavfsizligi to‘g‘risida”gi 826-I-sonli Qonuni (O‘zbekiston Respublikasi Oliy Majlisining Axborotnomasi, 1999-yil, № 9, 223-modda);

2) O‘zbekiston Respublikasi Oliy Majlisining 1999-yil 20-avgustda qabul qilingan “Gidrotexnika inshootlarining xavfsizligi to‘g‘risida”gi O‘zbekiston Respublikasi Qonunini amalga kiritish haqida”gi 827-I-sonli Qarori (O‘zbekiston Respublikasi Oliy Majlisining Axborotnomasi, 1999-yil, № 9, 224-modda);

3) O‘zbekiston Respublikasining 2002-yil 13-dekabrda qabul qilingan “O‘zbekiston Respublikasining ayrim qonun hujjatlariga o‘zgartishlar va qo‘shimchalar kiritish to‘g‘risida”gi 447-II-sonli Qonunining (O‘zbekiston Respublikasi Oliy Majlisining Axborotnomasi, 2003-yil, № 1, 8-modda) XXIII bo‘limi;

4) O‘zbekiston Respublikasining 2006-yil 10-oktabrda qabul qilingan “Tadbirkorlik subyektlarini huquqiy himoya qilish tizimi takomillashtirilganligi hamda ularning moliyaviy javobgarligi erkinlashtirilganligi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘RQ-59-sonli Qonunining (O‘zbekiston Respublikasi Oliy Majlisi palatalarining Axborotnomasi, 2006-yil, № 10, 536-modda) 26-moddasi;

5) O‘zbekiston Respublikasining 2021-yil 21-aprelda qabul qilingan “O‘zbekiston Respublikasining ayrim qonun hujjatlariga o‘zgartishlar kiritish to‘g‘risida”gi O‘RQ-683-sonli Qonunining (O‘zbekiston Respublikasi Oliy Majlisi palatalarining Axborotnomasi, 2021-yil, 4-songa ilova) 112-moddasi.

O‘zbekiston Respublikasi Suv xo‘jaligi vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini ta’minlasin.

O‘zbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlasin.

Ushbu Qonun rasmiy e’lon qilingan kundan e’tiboran uch oy o‘tgach kuchga kiradi.

Ushbu Qonunning 26 va 27-moddalari 2024-yil 1-yanvardan e’tiboran amalga kiritiladi.