Mamlakatimizda soʻnggi yillarda fuqarolik holati dalolatnoma yozuvlarini qayd etish sohasida bir qator islohotlar amalga oshirildi. Xususan, Oʻzbekiston Respublikasi Prezidentining 2021-yil 23-martdagi PF-6191-son Farmoniga asosan fuqarolik holati dalolatnomalarini qayd etish va nikohlanuvchi shaxslarni tibbiy koʻrikdan oʻtkazish eksterritorial tamoyil asosida amalga oshirilishi belgilandi.

Tugʻilish va oʻlim holatini kompleks davlat xizmati sifatida koʻrsatish tartibi joriy etildi va statistika organlariga qogʻoz shaklidagi dalolatnoma yozuvlari haqidagi hisobotlarni topshirish amaliyoti bekor qilindi.

Fuqarolik holati dalolatnomalarini yozish organlarining arxivlarida qogʻoz tashuvchilarda saqlanayotgan qariyb 60 mln fuqarolik holati dalolatnoma yozuvlari raqamlashtirildi.

Shu bilan birga, ushbu sohada ayrim tizimli muammolar mavjud. Xususan, fuqarolar tomonidan eksterritorial tamoyil asosida respublika boʻyicha oʻzlari xohlagan FHDY organiga murojaat qilinib, davlat xizmatlaridan foydalanishlari natijasida Toshkent shahri va viloyatlar markazlaridagi FHDY boʻlimlariga fuqarolarning murojaatlari soni tobora ortib boryapti.

Ayni vaqtda, respublikada faoliyat yuritayotgan 8 ta nikoh uylarida esa jami 20 ta shtat birligi mavjud boʻlgan holda, ular tomonidan faqat nikohni qayd qilish bilan bogʻliq harakatlar amalga oshirilmoqda. FHDY boʻlimlarida esa nikohni qayd etish bilan birga, tugʻilish, nikohdan ajratish va oʻlimni qayd etish boʻyicha ham davlat xizmatlari koʻrsatiladi.

Shunga koʻra, ayrim hududlardagi FHDY boʻlimlarini respublikadagi mavjud nikoh uylari shtat birliklari hisobidan qoʻshimcha shtat birliklari bilan taʼminlashga ehtiyoj yuzaga kelmoqda.

Oʻzbekiston Respublikasi Prezidentining 2021-yil 23-martdagi PF-6191-son Farmoniga muvofiq fuqarolik holati dalolatnomalarini eksterritorial tamoyil asosida qayd etish tartibi joriy etilganligi munosabati bilan fuqarolik holati dalolatnomalarini yozish organlarining shtat birliklarini maqbullashtirish, ushbu sohada fuqarolarga koʻrsatilayotgan davlat xizmatlari sifatini oshirish maqsadida Vazirlar Mahkamasi qaror qiladi:

1. Vazirlar Mahkamasining 2011-yil 30-dekabrdagi 346-son qarori bilan tasdiqlangan Fuqarolik holati dalolatnomalarini yozish organlari xodimlarining sonini belgilash tartibi toʻgʻrisidagi nizomning 2-bandiga muvofiq tuman va shahar fuqarolik holati dalolatnomalarini yozish (keyingi oʻrinlarda — FHDY) boʻlimlari, nikoh uylari hamda Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalarining FHDY arxivlari FHDY organlari hisoblanishi maʼlumot uchun qabul qilinsin.

2. Toshkent, Samarqand, Buxoro, Qarshi va Guliston shaharlaridagi mavjud nikoh uylari faoliyati tugatilib, ushbu nikoh uylari FHDY boʻlimlari etib qayta nomlansin.

3. Adliya vazirligi:

ushbu qarorning 2-bandida nazarda tutilgan FHDY boʻlimlari faoliyatini samarali yoʻlga qoʻyish choralarini koʻrsin;

joriy yil yakuni bilan ushbu qarorning 2-bandida nazarda tutilgan FHDY boʻlimlarining ish hajmini oʻrgansin va zaruratga koʻra, xodimlar sonini belgilash toʻgʻrisidagi takliflarni Vazirlar Mahkamasining 2011-yil 30-dekabrdagi 346-son qarori bilan tasdiqlangan Fuqarolik holati dalolatnomalarini yozish organlari xodimlarining sonini belgilash tartibi toʻgʻrisidagi nizomga muvofiq Moliya vazirligiga kiritsin;

boshqa manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

4. Oʻzbekiston Respublikasi Hukumatining ayrim qarorlariga ilovaga muvofiq oʻzgartirish va qoʻshimchalar kiritilsin.

5. Mazkur qarorning bajarilishini nazorat qilish Oʻzbekiston Respublikasi adliya vaziri R.K. Davletov zimmasiga yuklansin.

1. Vazirlar Mahkamasining 2011-yil 29-martdagi 93-son qarori bilan tasdiqlangan Oʻzbekiston Respublikasi adliya organlari va muassasalari xodimlarining martaba darajalari toʻgʻrisidagi nizomning 4-bandi sakkizinchi xatboshisidan “va nikoh uylari” soʻzlari chiqarib tashlansin.

2. Vazirlar Mahkamasining 2011-yil 30-dekabrdagi 346-son qarori bilan tasdiqlangan Fuqarolik holati dalolatnomalarini yozish organlari xodimlarining sonini belgilash tartibi toʻgʻrisidagi nizomda:

a) 2-bandning ikkinchi xatboshisidan “hamda nikoh uylari” soʻzlari chiqarib tashlansin;

b) 4-bandda:

birinchi xatboshidan “nikoh uylari” soʻzlari chiqarib tashlansin;

quyidagi mazmundagi ikkinchi xatboshi bilan toʻldirilsin:

“FHDY boʻlimlari Oʻzbekiston Respublikasi adliya vaziri tomonidan mavjud shtatlar doirasida tashkil etiladi va tugatiladi”;

ikkinchi va uchinchi xatboshilar tegishlicha uchinchi va toʻrtinchi xatboshilar deb hisoblansin;

v) 5-bandning “a” kichik bandidagi “FHDY boʻlimlari va nikoh uylarida” soʻzlari “FHDY boʻlimlarida” soʻzlari bilan almashtirilsin;

g) 6-bandda:

birinchi xatboshidan “va nikoh uylari” soʻzlari chiqarib tashlansin;

“a” kichik band quyidagi tahrirda bayon etilsin:

“a) tegishli tuman va shahar hududida roʻyxatdan oʻtkazilgan quyidagi fuqarolik holati dalolatnomalari (tugʻilish, oʻlim, nikoh va nikohni bekor qilish), dalolatnoma yozuvlariga kiritilgan oʻzgartirish, tuzatish va qoʻshimchalar, familiya, ism va ota ismini oʻzgartirishlar, berilgan takroriy guvohnomalar va maʼlumotnomalar, xalqaro shartnomalar boʻyicha koʻrsatilgan huquqiy yordamlar va eksterritorial tamoyil asosida koʻrsatilgan xizmatlarning oʻrtacha oylik soni.

Bunda, bir xodimga (mudir va ish yurituvchi bundan mustasno) roʻyxatdan oʻtkazilgan fuqarolik holati dalolatnomalari, dalolatnoma yozuvlariga kiritilgan oʻzgartirish, tuzatish va qoʻshimchalar, familiya, ism va ota ismini oʻzgartirishlar, berilgan takroriy guvohnoma va maʼlumotnomalar, xalqaro shartnomalar boʻyicha koʻrsatilgan huquqiy yordamlar va eksterritorial tamoyil asosida koʻrsatilgan xizmatlarning soni oyiga kamida 250 — 300 ta boʻlishi kerak”;

d) 8-banddagi “FHDY boʻlimi yoki nikoh uyidagi” soʻzlari “FHDY boʻlimidagi” soʻzlari bilan almashtirilsin;

e) 9-bandning uchinchi xatboshisidagi “FHDY boʻlimlari va nikoh uylaridan” soʻzlari “FHDY boʻlimlaridan” soʻzlari bilan almashtirilsin;

j) 11-banddan “, nikoh uylari” soʻzlari chiqarib tashlansin;

z) 12-bandda:

birinchi xatboshidan “va nikoh uylari” soʻzlari chiqarib tashlansin;

ikkinchi xatboshi quyidagi tahrirda bayon etilsin:

“oxirgi uch yilda FHDY boʻlimlari tomonidan roʻyxatdan oʻtkazilgan fuqarolik holati dalolatnomalari, dalolatnoma yozuvlariga kiritilgan oʻzgartirish, tuzatish va qoʻshimchalar, familiya, ism va ota ismini oʻzgartirishlar, berilgan takroriy guvohnomalar va maʼlumotnomalar, xalqaro shartnomalar boʻyicha koʻrsatilgan huquqiy yordamlar va eksterritorial tamoyil asosida koʻrsatilgan xizmatlarning soni”.

3. Vazirlar Mahkamasining “Gerbli guvohnomalar berganlik uchun gerb yigʻimi miqdorini tasdiqlash toʻgʻrisida” 2012-yil 25-apreldagi 119-son qarori quyidagi mazmundagi 5¹-band bilan toʻldirilsin:

“5¹. Fuqarolik holati dalolatnomalarini yozish (FHDY) organlarining arxiv maʼlumotlarini raqamlashtirish natijasida turli yillar davomida bir xil seriya va raqamli tugʻilganlik haqidagi guvohnomalar rasmiylashtirib berilganligi holatlari aniqlangan taqdirda, ushbu guvohnomalarni qayta rasmiylashtirganlik uchun gerb yigʻimi undirilmaydi”.

4. Vazirlar Mahkamasining “Viloyatlar, shaharlar va tumanlar hokimliklari boshqaruv apparatlari toʻgʻrisidagi namunaviy nizomlarni tasdiqlash haqida” 2016-yil 27-apreldagi 123-son qaroriga 1-ilovaning 6-bandi oʻn ikkinchi xatboshisidan, 2-ilovaning 6-bandi oʻninchi xatboshisidan hamda 3-ilovaning 6-bandi oʻninchi xatboshisidan “va nikoh uylari” soʻzlari chiqarib tashlansin.

5. Vazirlar Mahkamasining 2016-yil 14-noyabrdagi 387-son qarori bilan tasdiqlangan Fuqarolik holati dalolatnomalarini qayd etish qoidalarida:

a) 1-bandning uchinchi xatboshisidan “, shuningdek, nikoh uylari” soʻzlari chiqarib tashlansin;

b) 192-bandning birinchi va ikkinchi xatboshilaridan “va nikoh uylari” soʻzlari chiqarib tashlansin;

v) 194-banddan “va nikoh uylari” soʻzlari chiqarib tashlansin;

g) 207-bandda:

birinchi xatboshidan “yoki nikoh uyiga” soʻzlari chiqarib tashlansin;

ikkinchi xatboshidan “yoki nikoh uyi” soʻzlari chiqarib tashlansin.

6. Vazirlar Mahkamasining “Huquqiy axborotni tarqatish va undan foydalanishni taʼminlash toʻgʻrisida”gi Oʻzbekiston Respublikasi Qonunini amalga oshirish chora-tadbirlari toʻgʻrisida” 2017-yil 22-dekabrdagi 1013-son qarorining 5-bandi quyidagi mazmundagi xatboshi bilan toʻldirilsin:

“vazirlik va idoralar, mahalliy ijro etuvchi hokimiyat organlari tomonidan huquqiy axborotni tarqatish va undan foydalanishni taʼminlash boʻyicha idoraviy normativ-huquqiy baza shakllantirilganligi hamda ushbu sohada qabul qilingan buyruq (qaror)lar asosida amalga oshirilayotgan ishlarning holatini muntazam monitoring va tahlil qilib borsin”.

7. Vazirlar Mahkamasining 2018-yil 3-iyuldagi 498-son qarori bilan tasdiqlangan Fuqarolik holati dalolatnomalarini yozish organlari toʻgʻrisidagi nizomda:

a) 2-bandda:

ikkinchi xatboshidan “, shuningdek Nikoh uylari” soʻzlari chiqarib tashlansin;

uchinchi xatboshi quyidagi tahrirda bayon etilsin:

“Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari (keyingi oʻrinlarda adliya boshqarmalari deb ataladi) FHDY arxivlari”;

b) 3-banddagi “Agentlikning hududiy” soʻzlari “adliya” soʻzi bilan almashtirilsin;

v) 4-banddagi “Adliya vazirligi huzuridagi Davlat xizmatlari agentligi (keyingi oʻrinlarda Agentlik deb ataladi) direktori” soʻzlari “adliya vaziri” soʻzlari bilan almashtirilsin;

g) 9-bandning oltinchi xatboshisidagi “Agentlik,” soʻzi “Oʻzbekiston Respublikasi Adliya vazirligi (keyingi oʻrinlarda Vazirlik deb ataladi),” soʻzlari bilan almashtirilsin;

d) 10-bandning beshinchi xatboshisidan “, shu jumladan nikoh uylarida” soʻzlari chiqarib tashlansin;

e) 13 va 14-bandlardagi “Agentlik”, “uning hududiy” soʻzlari tegishlicha “Vazirlik”, “adliya” soʻzlari bilan almashtirilsin;

j) 16-banddagi “Agentlikning hududiy”, “Agentlik” soʻzlari tegishlicha “adliya”, “Vazirlik” soʻzlari bilan almashtirilsin;

z) 19-banddagi “Agentlik”, “Agentlikning hududiy” soʻzlari tegishlicha “Vazirlik”, “adliya” soʻzlari bilan almashtirilsin;

i) 20, 28, 31 va 34-bandlardagi “Agentlikning hududiy” soʻzlari “adliya” soʻzi bilan almashtirilsin.

8. Vazirlar Mahkamasining 2019-yil 15-fevraldagi 134-son qarori bilan tasdiqlangan Fuqarolik holati dalolatnomalarini yozish organlari tomonidan arxiv hujjatlarini berish boʻyicha davlat xizmati koʻrsatishning maʼmuriy reglamentining 1-bandidan “nikoh uylari,” soʻzlari chiqarib tashlansin.