Oʻzbekiston Respublikasi Prezidentining 2022-yil 12-yanvardagi PQ-81-son “Korrupsiyaga qarshi kurashish ishlarining samaradorligini reyting baholash tizimini joriy etish chora-tadbirlari toʻgʻrisidagi” qaroriga asosan buyuraman:

1. Korrupsiyaga qarshi kurashish ishlarining samaradorligini reyting baholashni mustaqil amalga oshiruvchi ekspertlar guruhi tarkibini shakllantirish va uning faoliyatini tashkil etish tartibi ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Tartib Korrupsiyaga qarshi kurashish ishlarining samaradorligini reyting baholashni mustaqil amalga oshiruvchi ekspertlar guruhi (bundan buyon matnda Ekspertlar guruhi deb yuritiladi) tarkibini shakllantirish va uning faoliyatini tashkil etish tartibini belgilaydi

1. Ushbu Tartibda quyidagi asosiy tushunchalardan foydalaniladi:

dastlabki reyting baholash natijalari — Korrupsiyaga qarshi kurashish agentligi (bundan buyon matnda Agentlik deb yuritiladi) tomonidan elektron platforma orqali shakllantirilgan reyting baholashning dastlabki natijalari;

manfaatlar toʻqnashuvi — shaxsning shaxsiy (bevosita yoki bilvosita) manfaatdorligi uning oʻz lavozim yoki xizmat majburiyatlarini lozim darajada bajarishiga taʼsir koʻrsatayotgan yoxud taʼsir koʻrsatishi mumkin boʻlgan hamda shaxsiy manfaatdorlik bilan fuqarolarning, tashkilotlarning, jamiyatning yoki davlatning huquqlari, qonuniy manfaatlari oʻrtasida qarama-qarshilik yuzaga kelayotgan (mavjud manfaatlar toʻqnashuvi) yoki yuzaga kelishi mumkin boʻlgan (ehtimoliy manfaatlar toʻqnashuvi) vaziyat;

elektron platforma — Agentlik tomonidan yuritiladigan “E-Anticor.uz” elektron platformasi.

2. Dastlabki reyting baholash natijalarining xolisligini taʼminlash maqsadida har yili 9 kishidan iborat boʻlgan tarkibda Ekspertlar guruhi Agentlik tomonidan shakllantiriladi hamda oʻz faoliyatini jamoatchilik asosida olib boradi.

Bunda, Ekspertlar guruhi tarkibida kamida 3 kishi fuqarolik jamiyati institutlari vakillaridan boʻlishi lozim.

3. Ekspertlar guruhi aʼzolari korrupsiyaga qarshi kurashish ishlarining samaradorligini reyting baholash boʻyicha oʻz faoliyatini amalga oshirishda mustaqildir.

4. Ekspertlar guruhi Agentlik tomonidan shakllantirilgan dastlabki reyting baholash natijalarini koʻrib chiqadi.

5. Ekspertlar guruhi tarkibi Agentlik tomonidan davlat organlari va tashkilotlari, shu jumladan mahalliy ijro etuvchi hokimiyat organlarining (bundan buyon matnda davlat tashkilotlari deb yuritiladi) takliflariga asosan shakllantiriladi.

6. Agentlik har yili 1-noyabrga qadar davlat tashkilotlari tomonidan elektron platformaga har chorakda (10-aprel, 10-iyul va 10-oktabrga qadar) kiritilgan maʼlumotlar tahlili asosida davlat tashkilotlariga Ekspertlar guruhi tarkibini shakllantirish uchun nomzod taqdim etish haqida murojaat qiladi.

7. Agentlikning murojaatiga asosan davlat tashkilotlari har yili 15-noyabrga qadar Agentlikka korrupsiyaga qarshi kurashish boʻyicha ikki nafar malakali mutaxassisni ularning obyektivka-maʼlumotnomalari bilan birgalikda taqdim qiladi.

8. Agentlik fuqarolik jamiyati instituti vakillari tomonidan Ekspertlar guruhiga nomzodlar taqdim etilishi uchun har yili 1-noyabrga qadar oʻzining rasmiy veb-saytida eʼlon joylashtiradi.

Bunda, Ekspertlar guruhida ishtirok etish xohishini bildirgan fuqarolik jamiyati instituti vakillari har yili 15-noyabrga qadar Agentlikning rasmiy veb-saytidagi maxsus shaklni toʻldirishi hamda unga oʻzlarining obyektivka-maʼlumotnomalarini ilova qilishi lozim.

9. Agentlik har yili 25-dekabrga qadar davlat tashkilotlari tomonidan taqdim etilgan nomzodlar va Ekspertlar guruhida ishtirok etish xohishini bildirgan fuqarolik jamiyati instituti vakillarini quyidagi mezonlar asosida saralab olish orqali Ekspertlar guruhi tarkibini shakllantiradi:

Oʻzbekiston Respublikasi fuqarosi boʻlishi;

oliy maʼlumotga ega boʻlishi;

mutaxassisligi boʻyicha kamida 5 yillik ish stajiga ega boʻlishi;

korrupsiyaning oldini olish va unga qarshi kurashish sohasida bilim va koʻnikmalarga ega boʻlish.

10. Quyidagilar Ekspertlar guruhi tarkibiga kiritilishi mumkin emas:

muomala layoqati cheklangan yoki muomalaga layoqatsiz deb topilganligi toʻgʻrisida sudning qonuniy kuchga kirgan hal qiluv qarori mavjud boʻlgan shaxs;

qasddan sodir etgan jinoyati uchun sudlanganlik holati tugallanmagan yoki sudlanganligi olib tashlanmagan shaxs;

oʻziga nisbatan surishtiruv, dastlabki tergov yoki sud muhokamasi yuritilayotgan shaxs.

11. Agentlik nomzodlarning oliy maʼlumoti toʻgʻrisidagi diplom maʼlumotlari hamda ish stajini tasdiqlovchi maʼlumotlarni masʼul davlat organlari va tashkilotlaridan mustaqil ravishda “Elektron hukumat” tizimi idoralararo integratsiyalashuv platformasi orqali soʻrab oladi.

12. Ekspertlar guruhi 9 kishidan iborat tarkibda Agentlik direktorining buyrugʻi bilan tasdiqlanadi.

13. Ekspertlar guruhi rahbari Ekspertlar guruhi aʼzolarining birinchi yigʻilishida ochiq ovoz berish yoʻli bilan Ekspertlar guruhi aʼzosi hisoblanuvchi fuqarolik jamiyati institutlari vakillari orasidan saylanadi.

14. Quyidagilar Ekspertlar guruhining vazifalari hisoblanadi:

Agentlik tomonidan shakllantirilgan dastlabki reyting baholash natijalarini belgilangan muddatlarda va sifatli koʻrib chiqish;

dastlabki reyting baholash natijalarini oʻzgarishsiz qoldirish yoki qisman oʻzgartirish haqidagi xulosani yoki muqobil reyting baholash natijalarini taqdim etish.

15. Ekspertlar guruhi quyidagi huquqlarga ega:

dastlabki reyting baholash natijalarini koʻrib chiqish uchun zarur boʻlgan maʼlumotlarni taqdim etish boʻyicha Agentlikka takliflar kiritish;

dastlabki reyting baholash natijalari boʻyicha oʻz fikrlarini bildirish;

elektron platformani takomillashtirish va modernizatsiya qilish boʻyicha Agentlikka takliflar kiritish.

16. Ekspertlar guruhi quyidagilarga majbur:

oʻz faoliyatini vijdonan va xolislik tamoyillariga tayangan holda amalga oshirish, qonunchilik hujjatlariga va mazkur Tartib talablariga qatʼiy rioya qilish;

dastlabki reyting baholash natijalarini koʻrib chiqish vaqtida oʻziga maʼlum boʻlgan maʼlumotlarni oshkor qilmaslik;

manfaatlar toʻqnashuviga yoʻl qoʻymaslik hamda mazkur holatlar yuzaga kelgan taqdirda bu haqida Ekspertlar guruhi rahbariga maʼlum qilish;

korrupsiyaga qarshi kurashish ishlarining samaradorligini reyting baholash natijalari eʼlon qilingunga qadar ommaviy axborot vositalari va ijtimoiy tarmoqlarda bu haqida chiqishlar qilmaslik.

17. Agentlik Ekspertlar guruhining faoliyatini samarali tashkil etish uchun oʻz binosidan stol, stullar, kompyuter, skaner, oʻquv va ilmiy jihozlar hamda statsionar telefon aloqasi bilan jihozlangan tegishli xonalarni ajratib beradi.

18. Ekspertlar guruhi rahbari ishni samarali tashkil etish maqsadida dastlabki reyting baholash natijalari Ekspertlar guruhining barcha aʼzolari tomonidan koʻrib chiqilishini taʼminlaydi, Ekspertlar guruhi yigʻilishlarini chaqiradi va unga raislik qiladi, Ekspertlar guruhi aʼzolariga oʻz fikrlarini taqdim etish muddatini belgilaydi.

19. Ekspertlar guruhi aʼzolari belgilangan muddat ichida davlat tashkilotlarining dastlabki reyting baholash natijalarini koʻrib chiqadi. Bunda, Ekspertlar guruhiga qoʻshimcha materiallar zarur boʻlgan taqdirda ushbu maʼlumotlar Ekspertlar guruhi rahbarining soʻroviga koʻra Agentlik tomonidan darhol taqdim etilishi lozim.

20. Agentlik tomonidan shakllantirilgan dastlabki reyting baholash natijalari Ekspertlar guruhining barcha aʼzolari tomonidan koʻrib chiqilgach Ekspertlar guruhi yigʻilishi chaqiriladi.

21. Ekspertlar guruhining yigʻilishi, agar unda Ekspertlar guruhi aʼzolarning kamida besh nafari (kvorum) ishtirok etgan taqdirda vakolatli hisoblanadi.

Bunda, Ekspertlar guruhining yigʻilishida ishtirok etmagan guruh aʼzosining dastlabki reyting baholash natijalarini oʻzgarishsiz qoldirish yoki qisman oʻzgartirish haqida xulosasi yoki muqobil reyting baholash natijalari (agar taqdim qilgan boʻlsa) koʻrib chiqiladi.

22. Ekspertlar guruhi aʼzolarining xulosa va muqobil reyting baholash natijalari Ekspertlar guruhida ovoz berish natijalariga koʻra shakllantiriladigan fikr sifatida taqdim etiladi. Ovozlar teng boʻlib qolganda guruh rahbarining fikri hal qiluvchi ahamiyatga ega boʻladi.

Ekspertlar guruhida qabul qilingan qarorga qoʻshilmagan guruh aʼzosi oʻz fikrini alohida bildirish huquqiga ega.

23. Ekspertlar guruhi har yili 15-fevralga qadar dastlabki reyting baholash natijalarini koʻrib chiqish boʻyicha quyidagilardan birini Agentlikka taqdim etadi:

dastlabki reyting baholash natijalarini oʻzgarishsiz qoldirish yoki qisman oʻzgartirish haqida xulosa;

muqobil reyting baholash natijalari.

24. Agentlik Ekspertlar guruhi tomonidan taqdim etilgan xulosa yoki muqobil reyting baholash natijalarini har yili 20-fevralga qadar puxta tahlil qiladi.

Bunda, Agentlik Ekspertlar guruhi tomonidan taqdim etilgan xulosa yoki muqobil reyting baholash natijalari yakuniy baholash natijalarida inobatga olinganligi yoki inobatga olinmaganligi toʻgʻrisida guruh rahbarini xabardor qilishi lozim.

25. Ekspertlar guruhi rahbari guruh faoliyatida manfaatlar toʻqnashuvining oldini olish boʻyicha choralar koʻrishga masʼul hisoblanadi.

26. Eksperlar guruhi ishida manfaatlar toʻqnashuvini oldini olish maqsadida guruh aʼzosiga koʻrib chiqish uchun oʻzi faoliyat yuritayotgan yoki ilgari ishlagan davlat tashkilotining dastlabki reyting baholash natijalari taqdim etilmaydi.

27. Ekspertlar guruhi aʼzosi quyidagi hollarda, u yoki bu davlat tashkilotining dastlabki reyting baholash natijalarini koʻrib chiqishda manfaatlar toʻqnashuvi oʻziga maʼlum boʻlib qolgan paytdan eʼtiboran bir ish kuni ichida oʻzini ushbu davlat tashkilotining dastlabki reyting baholash natijalarini koʻrib chiqishdan ozod qilish boʻyicha Ekspertlar guruhi rahbariga xabar beradi:

ushbu davlat tashkilotida ekspert yaqin qarindoshi masʼul mansabdor shaxs sifatida ishlayotgan boʻlsa yoki dastlabki reyting baholash natijalarini koʻrib chiqish obyekti (yuridik shaxs) unga aloqador shaxs boʻlsa;

ekspertning ushbu davlat tashkilotining jamoatchilik tuzilmalariga aʼzo ekanligi;

tegishli davlat tashkilotining litsenziyalar taqdim etish, mahsulotlar sotib olish va boshqa davlat xizmati koʻrsatish faoliyati bilan ekspertning bogʻliqligi mavjud boʻlsa;

boshqa har qanday mavjud manfaatlar toʻqnashuvi oʻziga maʼlum boʻlib qolsa.

Bunda, Ekspertlar guruhi rahbari tomonidan ushbu ekspertga manfaatlar toʻqnashuvi yuzaga kelishi mumkin boʻlgan davlat tashkilotining dastlabki reyting baholash natijalari taqdim etilmasligi lozim.

Bunda, Ekspertlar guruhi rahbari tomonidan ushbu ekspertga manfaatlar toʻqnashuvi yuzaga kelishi mumkin boʻlgan davlat tashkilotining dastlabki reyting baholash natijalari taqdim etilmasligi lozim.

28. Ushbu Tartib buzilishida aybdor boʻlgan shaxslar qonunchilik hujjatlariga muvofiq javob beradilar.