Fuqarolarning o‘zini o‘zi boshqarish organlarini yuqori malakali mutaxassislar bilan to‘ldirish, ushbu sohaning joylarda oliy ma’lumotli kadrlarga bo‘lgan ehtiyojini qondirish va ularni tayyorlash tizimini yanada takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Mahalla va oilani qo‘llab-quvvatlash vazirligi hamda Oliy va o‘rta maxsus ta’lim vazirligining 2021/2022 o‘quv yilidan boshlab pedagogika va moliya-iqtisod sohalaridagi oliy ta’lim muassasalarida “5520100 — Ijtimoiy ish (faoliyatning turli sohalari bo‘yicha)” bakalavriat ta’lim yo‘nalishi bo‘yicha fuqarolarning o‘zini o‘zi boshqarish organlari va mahalla xotin-qizlar faoli lavozimi uchun sirtqi ta’lim shaklida kadrlar tayyorlash tizimini joriy etish to‘g‘risidagi taklifi ma’qullansin.

2. O‘zbekiston Respublikasi Iqtisodiy taraqqiyot va kambag‘allikni qisqartirish vazirligi 2021/2022 o‘quv yili va undan keyingi o‘quv yillarida O‘zbekiston Respublikasi oliy ta’lim muassasalari bakalavriatining sirtqi ta’lim shakli bo‘yicha davlat buyurtmasi asosida o‘qishga qabul qilish parametrlarini shakllantirishda pedagogika va moliya-iqtisod sohalaridagi oliy ta’lim muassasalarida mazkur qarorning 1-bandida ko‘rsatilgan bakalavriat ta’lim yo‘nalishi bo‘yicha fuqarolarning o‘zini o‘zi boshqarish organlari va mahalla xotin-qizlar faoli lavozimi uchun sirtqi ta’lim shakliga qo‘shimcha qabul ko‘rsatkichlarini nazarda tutsin.

3. O‘zbekiston Respublikasi Mahalla va nuroniylarni qo‘llab-quvvatlash vazirligi, Oila va xotin-qizlar qo‘mitasi Oliy va o‘rta maxsus ta’lim vazirligi hamda Moliya vazirligi bilan birgalikda 2021-yil 1-martga qadar tegishincha fuqarolarning o‘zini o‘zi boshqarish organlarida va mahalla xotin-qizlar faoli lavozimlari uchun kadrlarga bo‘lgan joriy va istiqboldagi ehtiyojni to‘liq tahlil qilgan holda 2021/2022 o‘quv yilida O‘zbekiston Respublikasi oliy ta’lim muassasalari bakalavriatining sirtqi ta’lim shakli bo‘yicha davlat buyurtmasi asosida o‘qishga qabul qilish parametrlariga kiritish uchun, keyinchalik har yili 1-martga qadar asoslantirilgan takliflarni O‘zbekiston Respublikasi Iqtisodiy taraqqiyot va kambag‘allikni qisqartirish vazirligiga taqdim etsin.

4. Belgilab qo‘yilsinki, mazkur qaror asosida joriy etilayotgan fuqarolarning o‘zini o‘zi boshqarish organlari va mahalla xotin-qizlar faoli lavozimi uchun sirtqi ta’lim shakli doirasida:

o‘qitish to‘lov-kontrakt asosida tashkil etiladi;

kadrlar tayyorlash bo‘yicha malaka talablari, o‘quv rejalari, fan dasturlari hamda o‘quv va o‘quv-metodik adabiyotlarni ishlab chiqish uchun Mirzo Ulug‘bek nomidagi O‘zbekiston Milliy universiteti tayanch oliy ta’lim muassasasi hisoblanadi;

tegishincha O‘zbekiston Respublikasi Mahalla va nuroniylarni qo‘llab-quvvatlash vazirligi, Oila va xotin-qizlar qo‘mitasi tomonidan berilgan tavsiyanomaga ega bo‘lgan hamda kirish imtihonlaridan muvaffaqiyatli o‘tgan fuqarolarning o‘zini o‘zi boshqarish organlari xodimlari va mahalla xotin-qizlar faollari belgilangan tartibda talabalikka tavsiya etiladi;

tavsiyanoma berish ushbu qaror talablarini inobatga olgan holda Vazirlar Mahkamasining 2020-yil 23-iyundagi 402-son qarori bilan tasdiqlangan Oliy ta’lim muassasalariga qo‘shimcha davlat granti asosidagi qabul ko‘rsatkichlari doirasida xotin-qizlarga tanlovda ishtirok etish uchun tavsiyanoma berish va ularni o‘qishga qabul qilishni tashkil etish tartibi to‘g‘risidagi nizomga muvofiq amalga oshiriladi;

tavsiyanoma asosida o‘qiyotgan talabalar o‘qishini boshqa bakalavriat ta’lim yo‘nalishiga ko‘chirishga ruxsat berilmaydi.

5. Fuqarolarning o‘zini o‘zi boshqarish organlari xodimlariga va mahalla xotin-qizlar faollariga tavsiyanomalar berish tegishincha O‘zbekiston Respublikasi Mahalla va nuroniylarni qo‘llab-quvvatlash vazirligi hamda Oila va xotin-qizlar qo‘mitasi tomonidan quyidagi mezonlar asosida amalga oshiriladi:

egallab turgan lavozimida so‘nggi bir yil davomida faoliyat yuritayotganligi;

mahalla tizimida kamida uch yillik ish stajiga ega bo‘lganligi;

faoliyat yuritayotgan fuqarolar yig‘ini va xotin-qizlar faolining reyting ko‘rsatkichi bo‘yicha “namunali” deb topilganligi;

tegishincha viloyat, tuman (shahar) mahalla va nuroniylarni qo‘llab-quvvatlash hamda oila va xotin-qizlar boshqarmalari, bo‘limlari tomonidan ijobiy tavsiflanganligi;

xalq deputatlari tuman (shahar) kengashlari tomonidan ish faoliyati ijobiy deb baholanganligi;

intizomiy jazo chorasi qo‘llanilmaganligi.

6. O‘zbekiston Respublikasi Oliy va o‘rta maxsus ta’lim vazirligi, Mahalla va oilani qo‘llab-quvvatlash vazirligi 2021-yil 1-iyunga qadar:

pedagogika va moliya-iqtisod sohalaridagi oliy ta’lim muassasalarida bakalavriat ta’lim yo‘nalishi bo‘yicha o‘quv reja va fan dasturlarini fuqarolarning o‘zini o‘zi boshqarish organlarida ish yuritishni tashkil etishni hisobga olgan holda qayta ko‘rib chiqish, shuningdek, ularni tegishli fanlar bo‘yicha zarur o‘quv adabiyotlari bilan ta’minlash;

pedagogika va moliya-iqtisod sohalaridagi oliy ta’lim muassasalarining ta’lim jarayoniga tegishli soha yo‘nalishlarida yuqori amaliy ish tajribasiga ega bo‘lgan amaliyotchi xodimlarni, shu jumladan, xorijiy oliy ta’lim va ilmiy muassasalari bilan hamkorlik doirasida xorijiy professor-o‘qituvchilar va mutaxassislarni shartnoma asosida jalb etish choralarini ko‘rsin.

7. O‘zbekiston Respublikasi Bandlik va mehnat munosabatlari vazirligi Mahalla va oilani qo‘llab-quvvatlash vazirligi bilan birgalikda ikki oy muddatda Xizmatchilarning asosiy lavozimlari va ishchilar kasblari klassifikatorini fuqarolarning o‘zini o‘zi boshqarish organlari xodimlari uchun oliy ma’lumot zarur bo‘lgan lavozimlar ro‘yxatini qayta ko‘rib chiqsin.

8. O‘zbekiston Respublikasi Mahalla va oilani qo‘llab-quvvatlash vazirligi bir oy muddatda:

fuqarolarning o‘zini o‘zi boshqarish organlari uchun sirtqi ta’lim shaklida o‘qishga qabul qilish uchun tavsiyanoma shaklini tasdiqlasin;

manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni ushbu qarorga muvofiqlashtirsin.

9. Mazkur qarorning bajarilishini nazorat qilish O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari, O‘zbekiston Respublikasi mahalla va nuroniylarni qo‘llab-quvvatlash vaziri v.b. T. Xudayberganov, Oila va xotin-qizlar davlat qo‘mitasi raisi Z.B. Maxkamova hamda oliy va o‘rta maxsus ta’lim vaziri A.H. Toshqulov zimmasiga yuklansin.