Xalqaro tiklanish va taraqqiyot banki bilan hamkorlikni yanada kengaytirish, qishloq xo‘jaligidagi iqtisodiy islohotlarni chuqurlashtirish, “Qishloq xo‘jaligi korxonalarini qo‘llab-quvvatlash” loyihasi samarali amalga oshirilishini ta’minlash hamda Vazirlar Mahkamasining 2001-yil 26-noyabrdagi 461-son qaroriga muvofiq Vazirlar Mahkamasi qaror qiladi:

1. Xalqaro tiklanish va taraqqiyot banki Direktorlar Kengashi “Qishloq xo‘jaligi korxonalarini qo‘llab-quvvatlash” loyihasini amalga oshirish uchun O‘zbekiston Respublikasi Hukumatiga besh yillik imtiyozli davrni o‘z ichiga olgan 20 yil muddatga 36,14 mln. AQSH dollari miqdorida qarz berilishini ma’qullaganligi ma’lumot uchun qabul qilinsin.

2. Quyidagilar:

O‘zbekiston Respublikasi Moliya vaziri O‘zbekiston Respublikasi Hukumati nomidan qarz bitimini imzolashga va Qarz berish to‘g‘risidagi bitimga va loyihani amalga oshirish jadvaliga muvofiq qayta kreditlash to‘g‘risida shartnomalar tuzishga;

“Agrobank” aksiyadorlik tijorat banki loyihani amalga oshirish doirasida jalb qilinadigan xorijiy kreditga hisob-kitob-bank xizmati ko‘rsatishga vakil qilinsin.

3. O‘zbekiston Respublikasi Adliya vazirligi O‘zbekiston Respublikasi Hukumati bilan Xalqaro tiklanish va taraqqiyot banki o‘rtasidagi qarz bitimiga belgilangan tartibda yuridik xulosa bersin.

4. Qarzni qaytarish jadvali 1-ilovaga* muvofiq ma’qullansin.

5. Belgilansinki:

loyiha bo‘yicha xarajatlar 2-ilovaga* muvofiq Xalqaro tiklanish va taraqqiyot bankining mablag‘lari, loyihada ishtirok etuvchi xo‘jaliklar va xususiy korxonalar mablag‘lari, shuningdek markazlashtirilgan kapital mablag‘lar hisobiga mablag‘ bilan ta’minlanadi;

qarzning asosiy qismi, qarz bo‘yicha foizlar va vositachilik haqi 3-ilovaga* muvofiq loyihada qatnashuvchi xo‘jaliklarning mablag‘lari va loyiha doirasida tashkil etiladigan moliyaviy tuzilmalar, xo‘jalik hisobidagi korxonalar, shuningdek O‘zbekiston Respublikasi davlat budjeti mablag‘lari hisobiga qaytariladi.

6. O‘zbekiston Respublikasi Qishloq va suv xo‘jaligi vazirligi huzuridagi Qishloq xo‘jaligi korxonalarini tarkibiy qayta qurish agentligiga Xalqaro tiklanish va taraqqiyot banki tartibotlariga muvofiq loyihaning samarali amalga oshirilishini, loyiha mablag‘lari o‘zlashtirilishi va ulardan maqsadli foydalanilishini, shuningdek loyihani amalga oshirish bo‘yicha zarur hujjatlar, shu jumladan qarz mablag‘larini qayta kreditlash to‘g‘risidagi shartnomalar loyihalari o‘z vaqtida ishlab chiqilishi va tegishli idoralarga kiritilishini ta’minlash yuklansin.

7. Mazkur loyihani amalga oshirishda qatnashuvchi tashkilotlar va xo‘jalik yurituvchi subyektlar uni amalga oshirish davrida loyiha doirasida import bo‘yicha respublikaga olib kelinadigan asbob-uskunalar, tovarlar (xizmatlar)dan olinadigan bojxona to‘lovlari to‘lashdan ozod qilinsin (bojxonada rasmiylashtirganlik yig‘imlaridan tashqari).

8. O‘zbekiston Respublikasi Qishloq xo‘jaligi vazirligi:

loyihaning samarali amalga oshirilishini va qarzning belgilangan qismi loyiha qatnashchilari tomonidan o‘z vaqtida qaytarilishini ta’minlasin;

mablag‘lardan maqsadli va samarali foydalanilishini muntazam nazorat qilsin.

9. O‘zbekiston Respublikasi Iqtisodiyot vazirligi, Moliya vazirligi Qishloq va suv xo‘jaligi vazirligi bilan birgalikda investitsiya dasturlarini shakllantirishda 2002-yildan boshlab “Qishloq xo‘jaligi korxonalarini qo‘llab-quvvatlash” loyihasini amalga oshirish bo‘yicha O‘zbekiston Respublikasi Hukumatining 2-ilovaga* muvofiq ulushini mablag‘ bilan ta’minlashni nazarda tutsin.

10. O‘zbekiston Respublikasi Ichki ishlar vazirligi loyihani amalga oshirishda qatnashuvchi chet ellik mutaxassislar davlat boji to‘lashdan ozod etilgan holda ularga ko‘p martalik vizalar berilishi va uzaytirilishini, shuningdek ular vaqtincha turgan joyi bo‘yicha ro‘yxatga olinishini va uning muddati uzaytirilishini ta’minlasin.

11. O‘zbekiston Respublikasi Tashqi ishlar vazirligi loyihani amalga oshirishda qatnashuvchi chet ellik mutaxassislarga kirish vizalari belgilangan tartibda rasmiylashtirilishini ta’minlasin.

12. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari R.S. Azimov va T.X. Xoltoyev zimmasiga yuklansin.