O‘zbekiston Respublikasi Prezidentining “Qishloq va suv xo‘jaligi davlat boshqaruvi tizimini tubdan takomillashtirish chora-tadbirlari to‘g‘risida” 2018-yil 17-apreldagi PF-5418-son Farmoni hamda O‘zbekiston Respublikasi Vazirlar Mahkamasining “Agrosanoat majmui va oziq-ovqat ta’minoti sohasidagi loyihalarni amalga oshirish agentligi faoliyatini tashkil etish to‘g‘risida” 2018-yil 21-noyabrdagi 940-son qarorini bajarish yuzasidan Vazirlar Mahkamasi qaror qiladi:

1. O‘zbekiston Respublikasi Qishloq xo‘jaligi vazirligi huzuridagi Agrosanoat majmui va oziq-ovqat ta’minoti sohasidagi loyihalarni amalga oshirish agentligi to‘g‘risidagi nizom 1-ilovaga muvofiq tasdiqlansin.

2. O‘zbekiston Respublikasi Hukumatining 2-ilovaga muvofiq ayrim qarorlariga o‘zgartirish va qo‘shimchalar kiritilsin.

3. Vazirlar Mahkamasining “Xalqaro tiklanish va taraqqiyot banki qarzi doirasida “O‘zbekiston Respublikasi qishloq xo‘jaligi korxonalarini tarkibiy qayta tuzish” loyihasi amalga oshirilishini jadallashtirish chora-tadbirlari to‘g‘risida” 1998-yil 19-avgustdagi 356-son qarori o‘z kuchini yo‘qotgan deb hisoblansin.

4. Mazkur qarorning bajarilishini nazorat qilish O‘zbekiston Respublikasi Bosh vazirining Investitsiyalar va tashqi iqtisodiy aloqalar bo‘yicha o‘rinbosari E.M. G‘aniyev zimmasiga hamda O‘zbekiston Respublikasi Vazirlar Mahkamasining Agrar va oziq-ovqat sohalarini rivojlantirish masalalari kotibiyatiga yuklansin.

1. Ushbu Nizom O‘zbekiston Respublikasi Qishloq xo‘jaligi vazirligi huzuridagi Agrosanoat majmui va oziq-ovqat ta’minoti sohasidagi loyihalarni amalga oshirish agentligining (keyingi o‘rinlarda Agentlik deb ataladi) maqomi, asosiy vazifalari, funksiyalari, huquqlari va majburiyatlarini hamda faoliyatini tashkil etish tartibini, shuningdek, Agentlik rahbariyatining asosiy funksional majburiyatlarini belgilaydi.

2. Agentlik tadbirkorlikni faol rivojlantirishni va qo‘llab-quvvatlash maqsadida agrosanoat majmui va oziq-ovqat ta’minoti sohasidagi yirik loyihalarni, shu jumladan, investitsiya loyihalarini ishlab chiqishga va ularni amalga oshirishni tashkil etishga ko‘maklashish uchun mas’ul bo‘lgan vakolatli davlat organi hisoblanadi.

Agentlik tarkibiga uning Qoraqalpog‘iston Respublikasi va viloyatlardagi loyihalarni amalga oshirish hududiy guruhlari kiradi.

3. Agentlik o‘z faoliyatida tadbirkorlikni rivojlantirish va qo‘llab-quvvatlash ustuvorligini inobatga olgan holda, agrosanoat majmui va oziq-ovqat ta’minoti sohasidagi investitsiya loyihalarini amalga oshirish maqsadida O‘zbekiston Respublikasi Konstitutsiyasiga va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlariga hamda boshqa qonun hujjatlariga hamda Xalqaro moliya institutlari va xorijiy moliya tashkilotlari bilan tuzilgan bitimlarga, shuningdek, mazkur Nizomga amal qiladi.

4. Agentlik yuridik shaxs hisoblanadi, mustaqil balansga, O‘zbekiston Respublikasi Moliya vazirligining G‘aznachiligida g‘azna hisobraqamlariga va bank hisobraqamlariga, O‘zbekiston Respublikasi Davlat gerbi tasviri tushirilgan, o‘z nomi davlat tilida yozilgan muhrga, shuningdek, o‘z faoliyatini amalga oshirish uchun zarur bo‘lgan O‘zbekiston Respublikasi Davlat gerbi tasviri tushirilgan va Agentlik nomi yozilgan blankalarga ega bo‘ladi.

5. Agentlik o‘z faoliyatini bevosita hamda loyihalarni amalga oshirish hududiy guruhlari orqali Qoraqalpog‘iston Respublikasi Vazirlar Kengashi, viloyatlar va tumanlar (shaharlar) hokimliklari, davlat va xo‘jalik boshqaruvi organlari, shuningdek, xalqaro moliya institutlari va xorijiy hukumat moliya tashkilotlari (keyingi o‘rinlarda XMI va XHMT deb ataladi) bilan hamkorlikda amalga oshiradi.

6. Agentlikning rasmiy nomi:

davlat tilida — “O’zbekiston Respublikasi Qishloq xo’jaligi vazirligi huzuridagi Agrosanoat majmui va oziq-ovqat ta`minoti sohasidagi loyihalarini amalga oshirish agentligi”, qisqartirilgan nomi — Agrosanoat agentligi;

ingliz tilida — “Agency for Implementation of Projects in the Field of Agroindustry and Food Security of Ministry of Agriculture of the Republic of Uzbekistan”, qisqartirilgan nomi — Agroindustry Agency “UZAIFSA”;

rus tilida — “Agentstvo po realizatsii proyektov v oblasti agropromishlennogo kompleksa i prodovolstvennogo obespecheniya pri Ministerstva selskogo xozyaystvo Respubliki Uzbekistan”, qisqartirilgan nomi — Agropromishlennoye agentstvo.

7. Agentlik joylashgan manzil: Toshkent shahri, Shayxontohur tumani, Labzak ko‘chasi, 1A-uy, A-blok (1 va 2 qavatlar yerto‘lasi bilan).

8. Quyidagilar Agentlikning asosiy vazifalari hisoblanadi:

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda, agrosanoat majmui va oziq–ovqat ta’minoti sohasidagi loyihalarni, shu jumladan investitsiya loyihalarini ishlab chiqish va shakllantirishga ko‘maklashish;

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda, agrosanoat majmui va oziq–ovqat ta’minoti sohasidagi loyihalarni, shu jumladan investitsiya loyihalarini amalga oshirish maqsadida chet el investitsiyalarini, XMI va XHMT qarzlari, grantlari va texnik ko‘maklashish mablag‘larini jalb qilish;

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda, agrosanoat majmuini modernizatsiya qilish, tashkiliy–infrastruktura bazasini texnik va texnologik yangilashga hamda oziq–ovqat ta’minotiga qaratilgan loyihalarni amalga oshirish;

loyihalar va subloyihalarning amalga oshirilishini tizimli monitoring qilish, ularni samarali amalga oshirishga to‘sqinlik qiluvchi muammolarni aniqlash hamda ularni hal etish bo‘yicha amaliy yordam ko‘rsatish;

startap-loyihalar tashabbuskorlari bilan hamkorlik qilish, innovatsion g‘oya va texnologiyalarni joriy etish, energiya tejamkor va yuqori samarali loyihalarni amalga oshirish, agrosanoat majmui va oziq–ovqat ta’minoti sohasida xalqaro sifat standartlariga muvofiq laboratoriyalar va tajriba-konstruktorlik byurolarini tashkil etishga ko‘maklashish;

agrosanoat majmui va oziq-ovqat ta’minoti sohasidagi loyihalar, shu jumladan investitsiya loyihalarini amalga oshirish doirasida davlat va xo‘jalik boshqaruvi organlari, mahalliy davlat hokimiyati organlariga va boshqa tashkilotlarga ko‘maklashish.

9. Agentlik o‘ziga yuklangan vazifalarga muvofiq quyidagi funksiyalarni amalga oshiradi:

a) tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq–ovqat ta’minoti sohasidagi loyihalarni, shu jumladan investitsiya loyihalarini ishlab chiqish va shakllantirishga ko‘maklashish sohasida:

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda, agrosanoat majmui va oziq-ovqat ta’minoti, sohasidagi ustuvor investitsiya loyihalari portfelini shakllantirishda ishtirok etadi;

XMI va XHMT talablari asosida agrosanoat majmui va oziq-ovqat ta’minoti sohasidagi loyihalarni amalga oshirishni tartibga soladigan texnik-iqtisodiy asoslarni, loyiha hujjatlarini va boshqa hujjatlarni manfaatdor vazirlik, idora va tashkilotlar bilan hamkorlikda ishlab chiqadi;

XMI va XHMT bilan hamkorlik doirasida agrosanoat majmui va oziq-ovqat ta’minoti sohasida investitsiya loyihalarni amalga oshirish to‘g‘risida manfaatdor vazirlik va idoralar bilan birgalikda Vazirlar Mahkamasiga takliflar kiritadi.

b) tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq–ovqat ta’minoti sohasidagi loyihalarni, shu jumladan investitsiya loyihalarini amalga oshirish maqsadida chet el investitsiyalarini, XMI va XHMT qarzlari, grantlari va texnik ko‘maklashish mablag‘larini jalb qilish sohasida:

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda, agrosanoat majmui va oziq-ovqat ta’minoti, sohasidagi loyihalarni moliyalashtirish uchun XMI va XHMT kreditlari va grantlarini jalb qilishda ishtirok etadi;

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq-ovqat ta’minoti, sohasidagi loyihalarni moliyalashtirishda ehtiyojlarni baholash yuzasidan XMI va XHMT missiyalari faoliyatida ishtirok etadi.

v) tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmuini modernizatsiya qilish, tashkiliy–infrastruktura bazasini texnik va texnologik yangilashga hamda oziq–ovqat ta’minotiga qaratilgan loyihalarni amalga oshirish sohasida:

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda, agrosanoat majmui va oziq-ovqat ta’minoti, sohasidagi loyihalarni tayyorlash va amalga oshirilishini tahlil qilishda XMI va XHMT missiyalariga ko‘maklashadi;

O‘zbekiston Respublikasi Vazirlar Mahkamasiga, shuningdek, XMI va XHMTga taqdim etish uchun tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq-ovqat ta’minoti, sohasidagi jalb qilingan loyihalarni yakunlash bo‘yicha yakuniy hisobotlarni tayyorlash choralarini ko‘radi;

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq-ovqat ta’minoti sohasidagi loyihalarni amalga oshirish uchun jalb etilayotgan Davlat budjeti mablag‘laridan, qarzlar, kreditlar va grantlardan samarali foydalanish choralarini ko‘radi.

g) loyihalar va subloyihalarning amalga oshirilishini tizimli monitoring qilish, ularni samarali amalga oshirishga to‘sqinlik qiluvchi muammolarni aniqlash hamda ularni hal etish bo‘yicha amaliy yordam ko‘rsatish sohasida:

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq-ovqat ta’minoti sohasidagi loyihalarning amalga oshirilishini tizimli, shu jumladan pulli asosda monitoring qiladi;

ularni amalga oshirishda to‘sqinlik qiluvchi muammolarni aniqlaydi hamda tadbirkorlik subyektlariga ushbu muammolarni hal etish bo‘yicha amaliy yordam ko‘rsatadi, shuningdek, ishtirok etadigan moliya tashkilotlariga bu boradagi monitoringni olib borish yuzasidan xizmatlar ko‘rsatadi;

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq-ovqat ta’minoti sohasidagi loyihalar ishtirokchilari o‘rtasida zarur hujjatlar, axborot va belgilangan hisobotlar almashishini ta’minlaydi.

d) startap-loyihalar tashabbuskorlari bilan hamkorlik qilish, innovatsion g‘oya va texnologiyalarni joriy etish, energiya tejamkor va yuqori samarali loyihalarni amalga oshirish, agrosanoat majmui va oziq–ovqat ta’minoti sohasida xalqaro sifat standartlariga muvofiq laboratoriyalar va tajriba-konstruktorlik byurolarini tashkil etishga ko‘maklashish sohasida:

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq-ovqat ta’minoti sohasidagi loyihalarni amalga oshirish uchun kreditlar va grantlar olish uchun zarur bo‘lgan hujjatlarni tijorat banklariga taqdim etishda tadbirkorlik subyektlarga konsalting xizmatlari va amaliy yordam ko‘rsatadi;

tadbirkorlik subyektlarini marketing, qishloq xo‘jaligi tovarlarini ishlab chiqarish, qayta ishlash va qadoqlash, saqlash, sifatini baholash, ularni sotish, shu jumladan eksportga, logistika va iste’molchilarga yetkazib berishning zamonaviy samarali texnologiyalariga o‘qitish bo‘yicha treninglar o‘tkazilishini va uslubiy materiallar tarqatilishini tashkil qiladi;

mahsulotlarning ichki va tashqi bozorlarda raqobatbardoshligini ta’minlash uchun tadbirkorlik subyektlariga mahsulot sifatini baholashning umume’tirof etilgan xalqaro standartlar talablariga javob beradigan tizimlarini joriy etishga ko‘maklashadi.

e) agrosanoat majmui va oziq-ovqat ta’minoti sohasidagi loyihalar, shu jumladan investitsiya loyihalarini amalga oshirish doirasida davlat va xo‘jalik boshqaruvi organlari, mahalliy davlat hokimiyati organlariga va boshqa tashkilotlarga ko‘maklashish sohasida:

Qoraqalpog‘iston Respublikasi Vazirlar Kengashi, viloyatlar va tumanlar xokimliklari, Milliy teleradiokompaniya bilan birgalikda tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq-ovqat ta’minoti, sohasida loyihalarni moliyalashtirish uchun jalb etilgan kredit va grant mablag‘lari to‘g‘risidagi ma’lumotlarni ijtimoiy reklama axboroti shartlari asosida keng tarqatishni ta’minlaydi;

vazirliklar, idoralar, mahalliy davlat hokimiyati organlari, tijorat banklari, boshqa tashkilotlarning XMI va XHMT baholash missiyalari bilan o‘zaro hamkorligini muvofiqlashtiradi.

10. Agentlik o‘ziga yuklangan vazifa va funksiyalarni bajarish uchun quyidagi huquqlarga ega:

agrosanoat majmui va oziq-ovqat ta’minoti sohasidagi loyihalarni amalga oshirish uchun zarur bo‘lgan ma’lumotlar va axborotlarni mahalliy ijro etuvchi hokimiyat organlaridan, davlat va xo‘jalik boshqaruvi organlaridan va boshqa tashkilotlardan o‘rnatilgan tartibda so‘rash va olish;

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda, agrosanoat majmui va oziq-ovqat ta’minoti sohasidagi loyihalarni samarali amalga oshirish bilan bog‘liq masalalarni hal etish uchun vazirlik va idoralar Qoraqalpog‘iston Respublikasi Vazirlar Kengashi, viloyatlar va tumanlar hokimliklarini jalb etish;

Agentlikning faoliyatini moliyalashtirish, shuningdek, moddiy-texnik ta’minlash uchun XMI va XHMTning qarzlari, kreditlari va grant mablag‘larini, shuningdek, qonun hujjatlari bilan taqiqlanmagan boshqa manbalardan mablag‘larni jalb etishda ishtirok etish;

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq-ovqat ta’minoti sohasida amalga oshiriladigan loyihalarda nazarda tutilgan vazifalarni bajarish uchun shartnoma asosida mahalliy va xorijiy konsalting va autsorsing kompaniyalarini, shu jumladan alohida mutaxassislar va konsultantlarni jalb etish;

Agentlikka yuklangan vazifalarni amalga oshirish bilan bog‘liq masalalar bo‘yicha mamlakatda va uning tashqarisida XMI bilan uchrashuvlar tashkil qilish, muzokaralar o‘tkazish, yozishmalar olib borish;

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq-ovqat ta’minoti, sohasidagi loyihalar ishtrokchilari uchun O‘zbekiston Respublikasida hamda chet elda treninglar, seminarlar va boshqa o‘quv dasturlarini tashkil etish;

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq-ovqat ta’minoti, sohasidagi xalqaro ko‘rgazmalarda tarmoqlar doirasida loyihalar ishtirokchilarining mahsulotlari taqdimotlarini tashkil etish;

O‘zbekiston Respublikasining xalqaro shartnomalariga muvofiq qishloq xo‘jaligi, oziq-ovqat xavfsizligi, shuningdek tadbirkorlikni rivojlantirish va qo‘llab-quvvatlash sohasida loyihalarni amalga oshirishga jalb qilingan tashkilotlar tomonidan qarzlar, kreditlar va grant mablag‘laridan samarali foydalanilishi yuzasidan monitoring tashkil etish;

O‘zbekiston Respublikasining xalqaro shartnomalariga muvofiq XMI va XHMTga hisobot va boshqa ma’lumotlarni taqdim etish;

Agentlik tomonidan amalga oshiriladigan loyihalarning, shu jumladan korporativ plastik kartalarni to‘ldirish, soliqlarni hamda ish haqini to‘lash uchun tijorat banklarida hisob-kitob va maxsus depozit hisob raqamlarini ochish;

Agentlik va loyihalar ishtirokchilari ehtiyojlari uchun O‘zbekiston Respublikasi qonunchiligi hamda XMI va XHMT qoidalari, tartib-taomillariga muvofiq tovarlar (ish, xizmatlarni) xarid qilish;

shu’ba korxonalarini ochishdan, birgalikdagi faoliyatni amalga oshirishdan, komissiyalar shaklida tovarlar (ishlarni, xizmatlarni) sotishdan, ko‘rgazma uchastkalari faoliyatidan va birgalikdagi faoliyatdan hamda qonunchilikda taqiqlanmagan boshqa manbalardan daromad olish;

Agentlik O‘zbekiston Respublikasining boshqa qonun hujjatlari va Xalqaro shartnomalariga muvofiq boshqa huquqlarga ham ega bo‘lishi mumkin.

11. Agentlik:

tadbirkorlikni rivojlantirish va qo‘llab-quvvatlashning ustuvor yo‘nalishlarini inobatga olgan holda agrosanoat majmui va oziq-ovqat ta’minoti, sohasidagi loyihalarni, shu jumladan investitsiya loyihalarini amalga oshirish uchun chet el investitsiyalarini, XMI va XHMT qarzlar, grantlar va texnik ko‘maklashish mablag‘lari jalb qilinishi;

ishtirok etuvchi moliya tashkilotlari bilan birgalikda (tijorat banklari, lizing va mikrokredit tashkilotlari) — loyiha va subloyihalarning o‘z muddatida va sifatli amalga oshirilishi, shu jumladan, kredit liniyalarining samarali o‘zlashtirilishi;

Agentlikka yuklangan vazifalar va funksiyalarning samarali bajarilishi uchun javob beradi.

12. Agentlikka O‘zbekiston Respublikasi Prezidentining iqtisodiyot tarmoqlari, investitsiya va tashqi savdo siyosatini amalga oshirish masalalari bo‘yicha maslahatchisining bo‘linmalari bilan kelishgan holda O‘zbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod etiladigan bosh direktor rahbarlik qiladi.

13. Bosh direktorning O‘zbekiston Respublikasi Bosh vazirining Investitsiyalar va tashqi iqtisodiy aloqalar bo‘yicha o‘rinbosari bilan kelishilgan holda Agentlik bosh direktori tomonidan lavozimga tayinlanadigan va lavozimdan ozod etiladigan uch nafar o‘rinbosari, shu jumladan bir nafar birinchi o‘rinbosari bo‘ladi.

14. Agentlik O‘zbekiston Respublikasining qonun hujjatlari, XMI va XHMT qoidalari va tartib-taomillariga muvofiq hisob yuritadi va hisobot taqdim etadi.

15. Agentlik Bosh direktori:

1) O‘zbekiston Respublikasi qonunchiligi, XMI va XHMT qoidalari va tartib-taomillariga muvofiq Agentlik faoliyatini boshqaradi;

2) Agentlik faoliyatiga umumiy rahbarlik qiladi, O‘zbekiston Respublikasi Prezidentining hujjatlari, Vazirlar Mahkamasining qarorlari va boshqa qonun hujjatlarida hamda XMI va XHMT bilan bitimlarda Agentlikka yuklangan vazifa va funksiyalarning bajarilishini tashkil etadi;

3) Agentlik vakolatiga kiruvchi masalalar bo‘yicha buyruqlar va farmoyishlar chiqaradi;

4) o‘z o‘rinbosarlari o‘rtasida vazifalarni taqsimlaydi, Agentlik xodimlarini lavozimga tayinlaydi va lavozimdan ozod qiladi, xodimlarning lavozim yo‘riqnomasini tasdiqlaydi, shuningdek, Agentlikni malakali kadrlar bilan ta’minlash choralarini ko‘radi.

5) O‘zbekiston Respublikasi Prezidenti va Vazirlar Mahkamasining hujjatlari va topshiriqlarini bajarishni tashkil etishning amaliy tizimini yaratish va monitoringini yuritish, O‘zbekiston Respublikasi Prezidentining “O‘zbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun O‘zbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xo‘jalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi to‘g‘risida” 2017-yil 11-apreldagi PQ-2881-son qaroriga, “Davlat organlari va tashkilotlarida ijro intizomini yanada mustahkamlash chora-tadbirlari to‘g‘risida” 2018-yil 5-oktabrdagi PQ-3962-son qaroriga hamda Vazirlar Mahkamasining “Ijro intizomini mustahkamlash chora-tadbirlari to‘g‘risida” 1999-yil 12-yanvardagi 12-son qaroriga muvofiq Agentlik faoliyatida ijro intizomini mustahkamlash bo‘yicha kompleks amaliy chora-tadbirlarni amalga oshiradi;

6) xodimlarni moddiy rag‘batlantirish va intizomiy jazoga tortish tartibini belgilaydi, ularning lavozim maoshlariga ustamalarni belgilaydi;

7) Agentlik faoliyatini tashkil etish va rivojlantirish bilan bog‘liq masalalarni hal etadi, agrosanoat majmui va oziq-ovqat ta’minoti, shuningdek, tadbirkorlikni rivojlantirish va qo‘llab-quvvatlash sohasidagi loyihalarga umumiy rahbarlik qiladi, barcha loyihalar bo‘yicha moliyaviy va bank hujjatlariga birinchi imzo qo‘yish huquqiga ega;

8) Agentlik vakolatiga tegishli bo‘lgan masalalar bo‘yicha respublikaning barcha tashkilotlari va xalqaro tashkilotlarda Agentlik nomidan ishonchnomasiz ish ko‘radi;

9) qonun hujjatlariga muvofiq boshqa vakolatlarni amalga oshiradi.

16. Bosh direktor Agentlikka yuklangan vazifalar amalga oshirilishi uchun to‘liq javob beradi.

17. Bosh direktor bo‘lmagan paytda uning funksiyalarini birinchi o‘rinbosar bajaradi.

18. Quyidagilar Bosh direktor o‘rinbosarlarining funksional vazifalari hisoblanadi:

1) Agentlik xodimlari tomonidan O‘zbekiston Respublikasi Konstitutsiyasi va qonunlari, agrosanoat majmui va oziq-ovqat ta’minoti, shuningdek, tadbirkorlikni rivojlantirish va qo‘llab-quvvatlash sohasida amalga oshiriladigan loyihalarni amalga oshirish uchun XMI va XHMT bilan tuzilgan bitimlar va boshqa normativ-huquqiy hujjatlar talablariga rioya qilinishini ta’minlash;

2) tarkibiy bo‘linmalar faoliyatiga bevosita rahbarlik qilish, ushbu bo‘linmalarga yuklangan vazifalar va funksiyalarning bajarilishini tashkil etish;

3) Agentlik Bosh direktorining buyruqlari va topshiriqlari o‘z vaqtida sifatli bajarilishini ta’minlash;

4) tarkibiy bo‘linmalarga yuklangan vazifalarning bajarilishini nazorat qilish va muvofiqlashtirish;

5) Agentlik tarkibiy bo‘linmalariga kadrlarni tanlash va tayinlash jarayonida Bosh direktorga takliflar taqdim etish, ularning professionalligi, o‘z ishini bilishi, amaliy ish tajribasi, yuqori ishchanlik darajasi va ma’naviy-axloqiy sifatlari kafolatlanganligini ta’minlash, ularning kasbiy malakasini oshirish choralarini ko‘rish, tarkibiy bo‘linmalarda kadrlar zaxirasini shakllantirish;

6) Agentlik tarkibiy bo‘linmalari xodimlarining faoliyati samaradorligi va natijadorligini tizimli ravishda tanqidiy tahlil qilish, ularning shaxsiy hisobotlarini yig‘ilishlarda eshitish, yakunlari bo‘yicha zarur choralar ko‘rish;

7) O‘zbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari” 2014-yil 5-martdagi PQ-2142-son va “Mansabdor shaxslarning xorij mamlakatlariga xizmat safarlari samarasi uchun shaxsiy mas’uliyatlarini yanada oshirish va xorijiy delegatsiyalarning O‘zbekiston Respublikasiga tashriflarini tashkil etish chora-tadbirlari to‘g‘risida” 2017-yil 3-avgustdagi PQ-3170-son qarorlariga to‘liq muvofiq holda xizmat safarlarini tashkil etish, xizmat safarlarining asoslanganligi, samaradorligi va natijadorligini, xizmat safarlari xarajatlariga ajratilgan mablag‘lardan maqsadli va oqilona foydalanilishini ta’minlash;

8) “Korrupsiyaga qarshi kurashish to‘g‘risida”gi O‘zbekiston Respublikasi Qonuni talablariga muvofiq Agentlik tizimida korrupsiya va boshqa huquqbuzarliklarning oldini olish chora-tadbirlarini ko‘rish, shuningdek, huquqni qo‘llash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga ko‘maklashadigan sabablar va sharoitlarni aniqlash, tahlil qilish hamda bartaraf etish.

19. Loyiha rahbarlari va Agentlikning boshqa xodimlari o‘z faoliyatini Bosh direktor tomonidan tasdiqlanadigan funksional vazifalarga muvofiq amalga oshiradi.

20. Agentlik faoliyati uning samaradorligi va natijadorligi bo‘yicha muntazam baholanadi.

21. Agentlik faoliyatining samaradorligi va natijadorligi XMI va XHMT bilan kelishilgan Agentlik faoliyatining samaradorligi va natijadorligini baholash mezonlari va amaliy ko‘rsatkichlari asosida baholanadi.

22. Agentlik faoliyatining samaradorligi va natijadorligini baholash yakunlariga ko‘ra quyidagi choralar ko‘riladi:

Agentlik rahbarlari va xodimlarini rag‘batlantirish (mukofotlash) yoki ularga nisbatan tegishli intizomiy javobgarlikning choralarini ko‘rish;

aniqlangan kamchiliklarni bartaraf etish va Agentlik faoliyatini yanada takomillashtirish.

23. Quyidagilar Agentlik faoliyatini moliyalashtirish manbalari hisoblanadi:

O‘zbekiston Respublikasi Davlat budjeti mablag‘lari, XMI va XHMT hamda boshqa donorlarning grantlari va kreditlari (qarzlari);

yuridik va jismoniy shaxslar — O‘zbekiston Respublikasi rezidentlari va norezidentlarining xayriya mablag‘lari;

shartnoma asosida ko‘rsatiladigan xizmatlardan olinadigan daromadlar;

qonun hujjatlarida taqiqlanmagan boshqa manbalar.

24. Agentlik milliy valyutada maxsus talab qilinguniga qadar depozit hisob raqamlari ochadi, unga faoliyatning ixtisosligi bo‘yicha tovarlarni (ishlarni, xizmatlarni) realizatsiya qilishdan olingan daromadlar, Agentlik mol-mulklarini o‘rnatilgan tartibda sotishdan, tuzilgan shartnomalar doirasida jarima sanksiyalaridan, sug‘urta to‘lovlaridan tushgan tushumlar, bo‘sh mablag‘larni vaqtincha depozitlarga joylashtirishdan olingan daromadlar, xayriya mablag‘lari va qonunchilikda taqiqlanmagan boshqa manbalardan mablag‘lar tushiriladi.

Mazkur hisob raqamidagi mablag‘lar Agentlik tomonidan belgilangan tartibda moddiy — texnika bazasini mustahkamlash va xodimlarni moddiy rag‘batlantirishga, vakillik xarajatlariga, XMI va XHMT vakillarini qabul qilish xarajatlariga va ushbu Nizomda nazarda tutilgan boshqa maqsadlarga yo‘naltiriladi.

Ushbu mablag‘lardan maqsadli va samarali foydalanilishi yuzasidan javobgarlik bosh direktor zimmasiga yuklanadi.

25. O‘zbekiston Respublikasi norezidentlari bo‘lgan Agentlikning jalb etilgan xodimlari, ekspertlari va maslahatchilari xizmatlariga tuzilgan kontraktlarga muvofiq qonun hujjatlarida belgilangan tartibda xorijiy valyutada haq to‘lanadi.

26. Agentlik qonun hujjatlarida belgilangan tartibda qayta tashkil etiladi va tugatiladi.

1. Vazirlar Mahkamasining “Osiyo taraqqiyot banki ishtirokida “Infratuzilmalarni rivojlantirishni, shuningdek Sirdaryo viloyati Oq oltin tumanidagi tarkibiy o‘zgartirilgan xo‘jaliklarni qo‘llab-quvvatlash” loyihasini amalga oshirishga doir birinchi navbatdagi chora-tadbirlar to‘g‘risida” 1999-yil 3-sentabrdagi 416-son qarori 4-bandining uchinchi va to‘rtinchi xatboshilari o‘z kuchini yo‘qotgan deb hisoblansin.

3. Vazirlar Mahkamasining 2006-yil 26-apreldagi 180-F-sonli farmoyishida:

a) Islom Karimov nomidagi “Toshkent” xalqaro aeroportining alohida yo‘lovchilarga xizmat ko‘rsatish zali to‘g‘risidagi nizomga 1-ro‘yxatning “8. Boshqa tashkilotlar” bo‘limiga quyidagi mazmundagi 8.4-kichik band qo‘shilsin:

“8.4. Agrosanoat majmui va oziq-ovqat ta’minoti sohasidagi loyihalarni amalga oshirish agentligi bosh direktori va uning o‘rinbosarlari”;

b) O‘zbekiston Respublikasi aeroportlarida rasmiy delegatsiyalarga xizmat ko‘rsatish zali to‘g‘risidagi nizomga 1-ro‘yxatning “5. Markaziy muassasalar va boshqa tashkilotlar” bo‘limiga quyidagi mazmundagi 5.17-kichik band qo‘shilsin:

“5.17. Agrosanoat majmui va oziq-ovqat ta’minoti sohasidagi loyihalarni amalga oshirish agentligi bosh direktori va uning o‘rinbosarlari”.

4. Vazirlar Mahkamasining “Agrosanoat majmui va oziq-ovqat ta’minoti sohasidagi loyihalarni amalga oshirish agentligi faoliyatini tashkil etish to‘g‘risida” 2018-yil 21-noyabrdagi 940-son qarorida:

4-bandda:

uchinchi xatboshi chiqarib tashlansin;

to‘rtinchi — oltinchi xatboshilari tegishli ravishda uchinchi — beshinchi xatboshilari deb hisoblansin;

to‘rtinchi xatboshidagi “O‘zbekiston Respublikasi Vazirlar Mahkamasining Investitsiyalar, innovatsion rivojlanish, erkin iqtisodiy va kichik sanoat zonalari faoliyatini muvofiqlashtirish masalalari bo‘yicha kompleksi” so‘zlari “O‘zbekiston Respublikasi Bosh vazirining Investitsiyalar va tashqi iqtisodiy aloqalar bo‘yicha o‘rinbosari” so‘zlari bilan almashtirilsin.