O‘zbekiston Respublikasi Vazirlar Mahkamasining 2001-yil 19-dekabrdagi 477-sonli, 2002-yil 29-avgustdagi 306-sonli va 2003-yil 19-fevraldagi 93-sonli qarorlari ijrosini ta’minlash maqsadida hamda Qishloq va suv xo‘jaligi vazirligi to‘g‘risidagi nizomga muvofiq buyuraman:

1. “Paxta xomashyosini sanoat yo‘li bilan qayta ishlash natijasida olinadigan paxta iste’mol yog‘i, sheluxa va kunjarani xo‘jaliklarga qaytarish tartibi haqidagi Nizom” 1-ilovaga asosan tasdiqlansin.

2. Qishloq xo‘jaligida iqtisodiy islohotlarni chuqurlashtirish va ichki xo‘jalik munosabatlarni takomillashtirish boshqarmasi (O.Mansurov), Yuridik boshqarma (B.Husenov) 3 kun muddat ichida mazkur buyruqni O‘zbekiston Respublikasi Adliya vazirligiga davlat ro‘yxatidan o‘tkazish uchun taqdim qilsinlar va rasmiylashtirilgandan so‘ng qo‘llanma uchun joylarga yetkazilishini ta’minlasinlar.

3. Mazkur buyruq Adliya vazirligida davlat ro‘yxatiga olingan kundan boshlab 10 kun o‘tgandan so‘ng kuchga kiradi.

Mazkur buyruq kuchga kiritilgan vaqtdan boshlab O‘zbekiston Respublikasi Qishloq va suv xo‘jaligi vazirligining 2002-yil 19-sentabrdagi “Paxta xomashyosini sanoat yo‘li bilan qayta ishlash natijasida olinadigan paxta iste’mol yog‘i, sheluxa va kunjarani xo‘jaliklarga qaytarish tartibi haqida Nizom”ni tasdiqlash to‘g‘risidagi 159-sonli buyrug‘i (O‘zbekiston Respublikasi vazirliklari, davlat qo‘mitalari va idoralarining me’yoriy hujjatlari axborotnomasi, 2002-yil oktyabr, 20-son) o‘z kuchini yo‘qotgan deb hisoblansin.

4. Mazkur buyruqning ijrosini nazorat qilishni o‘z zimmamda qoldiraman.

Ushbu Nizom O‘zbekiston Respublikasi Vazirlar Mahkamasining 2001-yil 19-dekabrdagi 477-son, 2002-yil 29-avgustdagi 306-son, 2003-yil 19-fevraldagi 93-son qarorlari ijrosini ta’minlash maqsadida ishlab chiqilgan bo‘lib, paxta yetishtiruvchi xo‘jaliklar hamda qishloq xo‘jalik korxonalari tarkibidagi ichki xo‘jalik bo‘linmalari (kelgusida — pudratchi va boshqa bo‘linma) ixtiyorida qoldiriladigan paxta iste’mol yog‘i, sheluxa va kunjarani berish tartibini belgilaydi.

1. Qishloq xo‘jalik korxonalari paxta tayyorlash mavsumi tugagandan keyin 10 kunlik muddat ichida xo‘jalikdagi pudratchi va boshqa bo‘linmalar bo‘yicha, kontraktatsiya shartnomalari bo‘yicha sotilgan paxta xomashyosi (urug‘lik paxtadan tashqari) miqdori ko‘rsatilgan ro‘yxatni tuman Qishloq va suv xo‘jaligi boshqarmasiga beradi. Tuman qishloq va suv xo‘jaligi boshqarmasi 5 kun muddat ichida ushbu ro‘yxatni tuman statistika bo‘limiga tasdiqlatib, paxtani qayta ishlash korxonasiga taqdim qiladi.

2. Fermer xo‘jaliklari kontraktatsiya shartnomalari bo‘yicha yetishtirilgan paxta xomashyosi (urug‘lik paxtadan tashqari) miqdori ko‘rsatilgan ma’lumotni 10 kun muddatda tuman statistika bo‘limiga tasdiqlatib, paxtani qayta ishlash korxonasiga taqdim qiladi.

Paxtani qayta ishlash korxonalariga berilgan ma’lumotlar yakuniy bo‘lib, paxta iste’mol yog‘i, sheluxa va kunjarani xo‘jaliklarga qaytarish bo‘yicha shartnomani tuzish uchun asos hisoblanadi.

3. Paxtani qayta ishlash korxonasi ro‘yxat va ma’lumotni olgandan so‘ng, 5 kunlik muddat ichida tayyorlangan paxta hosili bo‘yicha har bir pudratchi va boshqa bo‘linma hamda fermer xo‘jaliklariga berilishi kutiladigan texnik chigit miqdorini belgilangan me’yorlar asosida hisoblab chiqib, bu to‘g‘rida hududiy “Paxtasanoat” aksiyadorlik birlashmasiga yozma ravishda xabar beradi.

Hududiy “Paxtasanoat” aksiyadorlik birlashmasi 3 kunlik muddat ichida ushbu ma’lumotni “O‘zpaxtasanoat” uyushmasiga beradi. “O‘zpaxtasanoat” uyushmasi esa o‘z navbatida olingan ma’lumotni 2 kunlik muddat ichida O‘zbekiston Respublikasi Iqtisodiyot vazirligiga taqdim qiladi.

4. Hududiy “Paxtasanoat” aksiyadorlik birlashmasi, tuzilgan shartnomalarga asoslanib, paxtani qayta ishlash korxonalarida texnik chigitni yog‘-moy korxonasiga jo‘natishni ta’minlab beradi.

5. Paxtani qayta ishlash korxonalari ishlab chiqarilgan jami texnik chigitni, shu jumladan kontraktatsiya shartnomalarida ko‘rsatilganidan ortiq paxta xomashyosidan olinadigan chigitni ham, yog‘-moy korxonalariga to‘liq hajmda jo‘natishlari shart.

6. Paxtani qayta ishlash korxonalari fermer xo‘jaliklari va qishloq xo‘jalik korxonalariga tegishli texnik chigit aynan qaysi yog‘-moy korxonalariga jo‘natilishi aniqlangandan so‘ng, 5 kun muddat ichida bu to‘g‘rida tegishli fermer xo‘jaliklari, qishloq xo‘jalik korxonalari, tuman Qishloq va suv xo‘jaligi boshqarmasini xabardor qiladi.

7. Fermer xo‘jaliklari va qishloq xo‘jalik korxonalari ushbu xabarnomani olgandan keyin tegishli paxtani qayta ishlash korxonasi va yog‘-moy korxonasi bilan 1-yanvargacha uch tomonlama shartnoma tuzadi.

8. Yog‘-moy korxonalariga yuborilayotgan texnik chigitning hamda uni qayta ishlash natijasida hosil bo‘lgan va qaytarib berilayotgan paxta iste’mol yog‘i, sheluxa va kunjaraning sifat ko‘rsatkichlari davlat standartlari va texnik shartlari talablariga mos bo‘lishi zarur.

Qayta ishlash uchun yuborilayotgan texnik chigitga, shuningdek qaytarib berilayotgan paxta iste’mol yog‘i, sheluxa va kunjaraga ularning sifat sertifikati ilova qilinishi shart.

9. Qaytarib berilishi lozim bo‘lgan paxta iste’mol yog‘i, sheluxa va kunjaraning shartnomada ko‘rsatiladigan hajmi, ushbu mahsulotlar chiqishining so‘nggi uch yillik o‘rtacha ko‘rsatkichlari asosida belgilanishi mumkin. Yog‘-moy korxonalari korxonadagi uch yillik o‘rtacha ko‘rsatkichlar to‘g‘risida viloyat Qishloq va suv xo‘jaligi boshqarmasi hamda Dehqon va fermer xo‘jaliklari uyushmasi vakilligiga ma’lumot taqdim qiladi.

Shartnomada ko‘rsatilgan mahsulotlarning chiqish hajmlari, texnik chigit qayta ishlangan davrdagi yog‘-moy korxonasining haqiqiy ko‘rsatkichlari asosida qayta aniqlanishi shart.

10. Fermer xo‘jaliklariga hamda pudratchi va boshqa bo‘linmalariga tegishli bo‘lgan yog‘-moy mahsulotlari belgilangan tartibda oldindan pul ko‘chirish yo‘li bilan fermer xo‘jaliklariga hamda tegishli qishloq xo‘jalik korxonalariga shartnomada belgilangan muddatlarda qaytariladi.

Fermer xo‘jaliklari va qishloq xo‘jalik korxonalarining topshirig‘iga binoan yoki ishonchnomalari bo‘yicha ularga qaytariladigan paxta iste’mol yog‘ini boshqa xo‘jalik yurituvchi subyektlarga sotilishi taqiqlanadi.

11. Qishloq xo‘jalik korxonalari tomonidan olinadigan yog‘-moy mahsulotlari oilaviy pudratchi va boshqa xo‘jalik bo‘linmalariga to‘liq ravishda yetkazib beriladi.

12. Qishloq xo‘jalik korxonalari tomonidan olingan yog‘-moy mahsulotlari, ular olishlari lozim bo‘lgan mahsulotlar miqdoriga nisbatan mutanosib ravishda taqsimlanib, to‘liq hajmda sotiladi.

Yog‘-moy mahsulotlarini sotish bahosi, mahsulotni keltirish bilan bog‘liq transport xarajatlari qo‘shilgan holda hisoblanadi. Yog‘-moy mahsulotlarini sotish bahosiga boshqa xarajatlar va foydani qo‘shishga yo‘l qo‘yilmaydi.

13. Hisob raqamida mablag‘i bo‘lmagan qishloq xo‘jalik korxonalari uchun yog‘-moy korxonalari tuman hokimlari bilan kelishgan holda har bir tumanda kamida bitta paxta iste’mol yog‘i, sheluxa va kunjarani pudratchi va boshqa bo‘linmalariga sotish shoxobchasini ochadi.

14. Har bir tumanda tashkil etilgan shoxobcha tomonidan pudratchi va boshqa bo‘linmalarga tegishli bo‘lgan paxta iste’mol yog‘i, sheluxa va kunjara mahsulotlari miqdori ko‘rsatilgan va xo‘jalik rahbari tasdiqlagan ro‘yxat asosida naqd pulga sotiladi.

Yog‘-moy mahsulotlari shoxobcha orqali sotilganda, mahsulotning sotish bahosiga faqat mahsulotni keltirish bilan bog‘liq transport xarajatlari va shoxobchani ochish bilan bog‘liq xarajatlarigina qo‘shiladi.

Yog‘-moy mahsulotlarini sotish bahosiga boshqa xarajatlar va foydani qo‘shishga yo‘l qo‘yilmaydi.

15. Tuman Qishloq va suv xo‘jaligi boshqarmasi tomonidan pudratchi va boshqa bo‘linmalarga hamda Dehqon va fermer xo‘jaliklari vakilligi tomonidan fermerlarga paxta iste’mol yog‘i, sheluxa va kunjaraning tarqatilishi ahvoli har oyda monitoring qilinadi va tarqatilish mahsulotlar bo‘yicha tuman va viloyat hokimligiga axborot beriladi.

16. Mazkur Nizom Iqtisodiyot vazirligi, “Yog‘moytamakisanoat”, “O‘zpaxtasanoat” hamda Dehqon va fermer xo‘jaliklari uyushmalari bilan kelishilgan.