O‘zbekiston Respublikasi Prezidentining “Yuridik kadrlar tayyorlash tizimini yanada takomillashtirish chora-tadbirlari to‘g‘risida” 2013-yil 28-iyundagi PQ-1990-son va “Toshkent davlat yuridik universitetida kadrlar tayyorlash tizimini tubdan takomillashtirish va samaradorligini oshirish chora-tadbirlari to‘g‘risida” 2017-yil 28-apreldagi PQ-2932-son qarorlariga muvofiq, shuningdek Toshkent davlat yuridik universitetida modul tizimiga asoslangan o‘quv jarayonini yanada takomillashtirish maqsadida Vazirlar Mahkamasi qaror qiladi:

1. Toshkent davlat yuridik universiteti bakalavriatiga xorijiy fuqarolarni qabul qilish tartibi to‘g‘risida nizom 1-ilovaga muvofiq tasdiqlansin.

1¹. Quyidagilar:

O‘zbekiston Respublikasi Prezidentining “Iqtidorli yoshlarni saralab olish tizimi va akademik litseylar faoliyatini takomillashtirish chora-tadbirlari to‘g‘risida” 2020-yil 3-dekabrdagi PQ-4910-son qaroriga muvofiq akademik litseylarga iqtidorli yoshlarni test sinovlari asosida saralab olish uchun test sinovlari ikki bo‘limlardan tashkil topganligi hamda I bo‘lim — tanlangan yo‘nalishga mos 2 ta fan bo‘yicha test sinovlaridan iborat bo‘lishi belgilanganligi;

O‘zbekiston Respublikasi Prezidentining “O‘zbekiston Respublikasida yuridik ta’lim va fanni tubdan takomillashtirish bo‘yicha qo‘shimcha chora-tadbirlar to‘g‘risida” 2020-yil 29-apreldagi PF-5987-son Farmoniga muvofiq Toshkent davlat yuridik universiteti (keyingi o‘rinlarda — TDYU) huzuridagi akademik litseyning (keyingi o‘rinlarda — akademik litsey) barcha fanlar bo‘yicha yuqori natijalarga ega bitiruvchilari TDYUga kirish test sinovlarisiz, yakka tartibda suhbat o‘tkazish orqali, to‘lov-kontrakt asosida, qabul parametrlaridan tashqari kirish huquqiga egaligi ma’lumot uchun qabul qilinsin.

1². Belgilansinki:

Akademik litseyda I bo‘lim — tanlangan yo‘nalishi bo‘yicha test sinovlari topshiriladigan mos fanlar TDYU tomonidan belgilanadi;

akademik litseyda kamida uch yil ishlagan, bazaviy oliy yuridik ma’lumotga ega pedagog va rahbar xodimlarga TDYU magistratura mutaxassisligiga test sinovlarisiz, to‘lov-kontrakt asosida, qabul parametrlaridan tashqari kirish huquqi beriladi. Bunda ushbu xodimlarga o‘qishni tugatgandan so‘ng taqsimot bo‘yicha adliya organlari va muassasalarida, birinchi navbatda, akademik litseyda kamida uch yil uzluksiz ishlash majburiyati yuklanadi;

akademik litseyga xodimlar adliya organlari va muassasalari uchun belgilangan tartibda ishga qabul qilinadi;

akademik litsey o‘quvchilarining bilimlarini baholash, yakuniy davlat attestatsiyasini o‘tkazish, shuningdek, akademik litseyning barcha fanlar bo‘yicha yuqori natijalarga ega bitiruvchilari TDYUga kirish test sinovlarisiz, yakka tartibda suhbat o‘tkazish orqali, to‘lov-kontrakt asosida, qabul parametrlaridan tashqari o‘qishga qabul qilish O‘zbekiston Respublikasi Adliya vazirligi tomonidan belgilangan tartibda amalga oshiriladi. Bunda, yakka tartibdagi suhbatdan muvaffaqiyatli o‘tgan abituriyentlarni o‘qishga qabul qilish adliya vazirining buyrug‘i bilan amalga oshiriladi.

2. O‘zbekiston Respublikasi Hukumatining ayrim qarorlariga 2-ilovaga muvofiq o‘zgartish va qo‘shimchalar kiritilsin.

3. O‘zbekiston Respublikasi Adliya vazirligi vazirlik va idoralar bilan birgalikda bir oy muddatda ular tomonidan qabul qilingan idoraviy normativ-huquqiy hujjatlarni bir oy ichida mazkur qarorga muvofiqlashtirsin.

4. Mazkur qarorning bajarilishini nazorat qilish O‘zbekiston Respublikasi adliya vaziri M.M. Ikramov zimmasiga yuklansin.

1. Mazkur Nizom O‘zbekiston Respublikasining “Ta’lim to‘g‘risida”gi Qonuni va O‘zbekiston Respublikasi Prezidentining “Toshkent davlat yuridik universitetida kadrlar tayyorlash tizimini tubdan takomillashtirish va samaradorligini oshirish chora-tadbirlari to‘g‘risida” 2017-yil 28-apreldagi PQ-2932-son qaroriga muvofiq xorijiy davlatlar fuqarolari bo‘lgan jismoniy shaxslar, shuningdek xorijiy davlat hududida doimiy ravishda istiqomat qiladigan fuqaroligi bo‘lmagan shaxslar (keyingi o‘rinlarda xorijiy fuqarolar deb yuritiladi)ni Toshkent davlat yuridik universiteti (keyingi o‘rinda TDYU deb ataladi) bakalavriatiga qabul qilish tartibini belgilaydi.

2. Xorijiy fuqarolarni qabul qilish TDYU bakalavriatiga qabul kvotalaridan tashqari O‘zbekiston Respublikasi ta’lim muassasalariga o‘qishga qabul qilish Davlat komissiyasi (keyingi o‘rinda Davlat komissiyasi deb ataladi) tomonidan belgilanadigan joylarga muvofiq amalga oshiriladi.

Talabalar o‘qishi qonunchilikda xorijiy fuqarolar uchun nazarda tutilgan to‘lov-kontrakt asosida amalga oshiriladi.

O‘zbekiston Respublikasida yashash guvohnomasiga yoki “IT-visa” yoxud investitsiya vizasiga ega bo‘lgan xorijiy fuqarolar hamda ularning oila a’zolari (turmush o‘rtog‘i, ota-onasi va farzandlari) O‘zbekiston Respublikasi fuqarolari uchun nazarda tutilgan shartlarda o‘qishga kirishga va ta’lim olishga haqlidir.

3. TDYU bakalavriatiga xorijiy fuqarolarni qabul qilish test sinovlarisiz, TDYUda o‘tkaziladigan suhbat natijalariga ko‘ra va reyting tizimiga muvofiq to‘plangan ballarni hisobga olgan holda amalga oshiriladi.

4. TDYU bakalavriatida o‘qish uchun hujjatlarni topshirgan xorijiy fuqarolar, ularning dunyoqarashi, kasbiy layoqati va motivatsiyasi, umumiy intellektual va ma’naviy-axloqiy darajasini aniqlash nuqtai nazaridan suhbatdan o‘tkaziladi.

5. TDYU bakalavriatiga xorijiy fuqarolarni qabul qilishni tashkil etish mazkur Nizomga ilovaga muvofiq sxema bo‘yicha amalga oshiriladi.

6. TDYU bakalavriatiga xorijiy fuqarolarni qabul qilishni tashkil etish tegishli o‘quv yili uchun tuzilgan TDYU qabul komissiyasi (keyingi o‘rinda qabul komissiyasi deb yuritiladi) tomonidan amalga oshiriladi.

Xorijiy fuqarolarni qabul qilish to‘g‘risidagi arizalar Adliya vazirligi bilan kelishgan holda TDYU tomonidan belgilangan muddatlarda qabul qilinadi.

7. TDYU bakalavriatiga qabul qilish uchun hujjatlar Internet jahon axborot tarmog‘i orqali topshiriladi.

Xorijiy fuqarolar aniq vaqt rejimida elektron shakldagi qabul qilish to‘g‘risidagi arizani to‘ldirib, unda: ta’lim yo‘nalishi, ta’lim tili va shakli; xorijiy fuqaro tomonidan oliy ta’lim muassasasini tugatganligi yoki unda oliy ma’lumoti mavjud emasligi; xorijiy fuqaro suhbat o‘tkazish qoidalari bilan tanishganligi xususida belgi ko‘rsatiladi.

8. Qabul qilish to‘g‘risidagi elektron arizaga quyidagilar elektron shaklda ilova qilinadi:

xorijiy fuqaroning pasporti yoki uning o‘rnini bosuvchi hujjat;

belgilangan tartibda legalizatsiya qilingan yoki apostil qo‘yilgan xorijiy davlatning vakolatli organlari tomonidan berilgan, o‘rganilgan fanlar va ular bo‘yicha imtihonlarda olingan baholar (ballar) ko‘rsatilgan ta’lim haqidagi hujjat;

Arizaga ilova qilinayotgan har bir hujjat haqiqiyligi saqlanishini ta’minlovchi (har bir duymga 200 nuqtadan kam bo‘lmagan) alohida fayl ko‘rinishida bo‘lishi kerak. Har bir fayl o‘lchami 10 Mbdan oshmasligi lozim.

Arizani hujjatlar “PDF” (portable document format) formatida skaner qilingan nusxalari ko‘rinishida ilova qilingan holda jo‘natishga yo‘l qo‘yiladi.

Qabul qilish to‘g‘risidagi arizaning shakli O‘zbekiston Respublikasi Adliya vazirligi tomonidan Oliy va o‘rta maxsus ta’lim vazirligi va TDYU bilan kelishilgan holda tasdiqlanadi.

9. Mazkur Nizomning 7 va 8-bandlarida nazarda tutilgan talablarga muvofiq barcha hujjatlar taqdim etilgan taqdirda, 72 soat ichida noyob raqam berish orqali ariza ro‘yxatga olinadi va xorijiy fuqaroga belgilangan muddatda hujjatlarning asl nusxalarini taqdim etish haqida xabar beriladi.

Qabul komissiyasi tomonidan hujjatlarni qabul qilish vaqti etib arizaga noyob raqam berish payti hisoblanadi.

10. Taqdim qilingan hujjatlar mazkur Nizomning 7 va 8-bandlarida nazarda tutilgan talablarga muvofiq bo‘lmagan taqdirda, 72 soat ichida arizada ko‘rsatilgan elektron pochta manzil bo‘yicha xorijiy fuqaroga tegishli xabarnoma yuboriladi. Bunda xorijiy fuqaroga ko‘rsatib o‘tilgan kamchiliklarni tuzatish va hujjatlarni qabul qilishning belgilangan muddati tugagunga qadar ularni takroran taqdim etish imkoni beriladi.

Hujjatlarni qabul qilishning belgilangan muddati tugagandan so‘ng ularga o‘zgartish va qo‘shimchalar kiritish qat’iyan man qilinadi.

11. Ro‘yxatga olingan qabul qilish to‘g‘risidagi arizalar soni har kuni TDYU saytida joylashtiriladi.

12. Xorijiy fuqarolar hujjatlarning asl nusxalarini suhbat o‘tkazilishidan 3 kun oldin taqdim etadi.

Bunda chop etilgan va imzolangan ariza xorijiy fuqaro tomonidan taqdim etiladi, bu hujjatlarda ko‘rsatilgan ma’lumotlar haqiqiyligini tasdiqlaydi.

Hujjatlarning soxta yoki qalbakiligi aniqlangan taqdirda, xorijiy fuqaro suhbatdan (talaba TDYU talabalari safidan) chetlashtiriladi hamda hujjatlar esa o‘rnatilgan tartibda huquqni muhofaza qiluvchi organlarga yuboriladi.

13. Xorijiy fuqarolarni qabul qilish joylarining soni haqidagi ma’lumot TDYU veb-saytida, qoida tariqasida, hujjatlarni qabul qilish muddatidan bir oy oldin joylashtiriladi.

14. TDYU bakalavriatiga qabul qilinishi uchun xorijiy fuqarolar TDYUda ta’lim beriladigan tillarni bilishi kerak. Ta’lim beriladigan tillarni bilmaydigan xorijiy fuqarolar O‘zbekiston Respublikasi Oliy va o‘rta maxsus ta’lim vazirligi tomonidan belgilanadigan tegishli muassasalarda o‘qiydi va til o‘rganish bo‘yicha tayyorgarlikni muvaffaqiyatli tugatish natijalariga ko‘ra, belgilangan namunadagi guvohnoma (sertifikat) va o‘qishga yo‘llanma beriladi.

15. Suhbat Adliya vazirligi bilan kelishgan holda TDYU tomonidan belgilangan muddatlarda o‘tkaziladi.

Suhbat o‘tkazish muddatlari to‘g‘risida ma’lumot TDYU tomonidan uning rasmiy veb-saytida suhbat o‘tkazilishidan kamida 1 oy oldin e’lon qilinadi.

Xorijiy fuqarolar bilan suhbat bevosita yoki zaruratga ko‘ra masofaviy (onlayn) tarzda amalga oshiriladi.

16. Suhbat o‘tkazilishiga qadar maslahatlar tashkil etiladi, maslahatlar jadvali qabul komissiyasi tomonidan ishlab chiqiladi va TDYU rektori tomonidan tasdiqlanadi.

17. Suhbat o‘tkazish jadvallari TDYU rektori tomonidan tasdiqlanadi va TDYU veb-saytida, qoida tariqasida, suhbat boshlanishidan bir oy oldin joylashtiriladi.

18. Suhbat TDYU rektori buyrug‘i bilan tashkil etiladigan maxsus komissiya tomonidan o‘tkaziladi. Komissiya tarkibiga TDYU xodimlari bilan bir qatorda boshqa tashkilotlar vakillari ham ularning rahbarlari bilan kelishilgan holda kiritilishi mumkin.

Suhbat natijalari xorijiy fuqaroga ballarni qo‘yishni (0 dan 100 gacha) nazarda tutadigan reyting tizimi bo‘yicha aniqlanadi hamda maxsus komissiya majlisining TDYU rektori tomonidan tasdiqlanadigan bayonida qayd etiladi.

Suhbat o‘tkazish va uning natijalarini belgilash tartibi O‘zbekiston Respublikasi Adliya vazirligi tomonidan Oliy va o‘rta maxsus ta’lim vazirligi va TDYU bilan kelishilgan holda belgilanadi.

Masofaviy (onlayn) suhbat kommunikatsiya texnologiyalaridan foydalangan holda real vaqt rejimida amalga oshiriladi. Bunda, ushbu kommunikatsiya texnologiyalari abituriyentning shaxsini tasdiqlash imkonini beradigan texnik talablarga javob berishi lozim.

Masofaviy (onlayn) suhbat natijalarini baholash umumiy tartibda amalga oshiriladi.

19. Xorijiy fuqarolarni qabul qilish quyidagi hollarda amalga oshirilmaydi:

jadval bo‘yicha suhbatga kelmaganda (0 ball qo‘yiladi);

suhbatda belgilangan maksimal ballning 55 foizi va undan kam ball to‘plaganda.

20. TDYU bakalavriatiga xorijiy fuqarolarni qabul qilish uchun suhbatni qayta o‘tkazish taqiqlanadi.

21. Suhbat natijalari shikoyat qilinishi va apellyatsiya tartibida ko‘rilishi mumkin emas.

22. Suhbat natijalariga ko‘ra TDYU bakalavriatiga xorijiy fuqarolarni qabul qilish haqida TDYU rektori tomonidan buyruq qabul qilinadi.

23. TDYU bakalavriatiga xorijiy fuqarolarni qabul qilish to‘g‘risidagi TDYU rektorining buyrug‘i, qoida tariqasida, 2-sentabrdan kechiktirmasdan qabul qilinadi.

24. TDYU rektori tomonidan xorijiy fuqarolarni qabul qilish to‘g‘risida buyruq qabul qilingandan keyin TDYU bilan jismoniy yoki yuridik shaxslar o‘rtasida belgilangan tartibda kontraktlar tuziladi.

25. Belgilangan namunadagi kontrakt blankalari qabul komissiyasi tomonidan TDYU rektori buyrug‘i qabul qilingan kundan boshlab beriladi va TDYU rektori va bosh buxgalter tomonidan imzolangan holda (yuridik shaxslar uchun 3 nusxada, jismoniy shaxslar uchun 2 nusxada) rasmiylashtiriladi.

26. Xorijiy fuqarolar o‘qish uchun to‘lovni har yili kontrakt shartlarida ko‘rsatilgan muddatlarda amalga oshiradi.

27. TDYU rektorining o‘qishga qabul qilish to‘g‘risidagi buyrug‘i qabul qilinganidan boshlab xorijiy fuqarolarga darslarga qatnashishga ruxsat etiladi.

28. TDYU bakalavriatiga qabul qilingan xorijiy fuqarolarga stipendiya to‘lanmaydi.

29. TDYU bakalavriatiga qabul qilingan xorijiy fuqarolarni o‘qishga qabul qilish to‘g‘risidagi buyruq va suhbat natijalaridan tegishli ko‘chirmalar ularning shaxsiy hujjatlar yig‘ma jildlariga tikib qo‘yiladi.

TDYU bakalavriatiga qabul qilinmagan xorijiy fuqarolarning suhbat natijalari 6 oy davomida saqlanadi va keyinchalik belgilangan tartibda yo‘q qilinadi.

30. Mazkur Nizom talablari buzilishida aybdor bo‘lgan shaxslar qonunchilikda belgilangan tartibda javob beradi.

2. O‘zbekiston Respublikasi Vazirlar Mahkamasining “Oliy ta’lim muassasalariga pedagog xodimlarni tanlov asosida ishga qabul qilish tartibi to‘g‘risidagi nizomni tasdiqlash haqida” 2006-yil 10-fevraldagi 20-son qarorining ilovasida (O‘zbekiston Respublikasi qonun hujjatlari to‘plami, 2006-y., 6-7-son, 36-mod.):

a) 10-band quyidagi mazmundagi ikkinchi xatboshi bilan to‘ldirilsin:

“Toshkent davlat yuridik universitetiga pedagog xodimlar adliya organlari va muassasalari uchun belgilanadigan tartibda o‘tkaziladigan tanlov asosida qabul qilinadi”;

b) II bo‘lim quyidagi mazmundagi 11¹-band bilan to‘ldirilsin:

“11¹. Toshkent davlat yuridik universitetida o‘qituvchi va katta o‘qituvchi lavozimlariga oliy ma’lumotga ega bo‘lgan shaxs (qoida tariqasida, magistr, diplomli mutaxassis), shuningdek ilmiy daraja (shu jumladan, xorijiy mamlakatlarning falsafa doktori (Ph.D) darajasiga yoki unga tenglashtirilgan boshqa ilmiy darajalariga) va ilmiy unvonga ega bo‘lgan hamda bunday daraja va unvonga ega bo‘lmagan, biroq o‘qituvchilik, ilmiy-tadqiqot va amaliy ish tajribasiga ega bo‘lgan shaxslar qabul qilinishi mumkin”.

3. O‘zbekiston Respublikasi Vazirlar Mahkamasining “Respublika oliy ta’lim muassasalari xodimlari mehnatiga haq to‘lashning takomillashtirilgan tizimini tasdiqlash to‘g‘risida” 2008-yil 1-avgustdagi 164-son qarorida (O‘zbekiston Respublikasi qonun hujjatlari to‘plami, 2008-y., 31-32-son, 302-modda):

a) 2-ilovaga izohning ikkinchi xatboshisida “Bakalavriat darajasida fakultet dekanati nazarda tutilmaydigan” so‘zlari “Qonun hujjatlariga muvofiq o‘quv jarayoni modul tizimiga asoslangan” so‘zlari bilan almashtirilsin;

b) 4-ilovada:

7-bandning ikkinchi xatboshisida “Bakalavriat darajasida fakultet dekanati nazarda tutilmaydigan” so‘zlari “Qonun hujjatlariga muvofiq o‘quv jarayoni o‘qitishning modul tizimiga asoslangan” so‘zlari bilan almashtirilsin;

17-bandda:

quyidagi mazmundagi uchinchi xatboshi bilan to‘ldirilsin:

“Qonun hujjatlariga muvofiq o‘quv jarayoni o‘qitishning modul tizimiga asoslangan oliy ta’lim muassasalarida yillik shaxsiy ish rejasi faqat o‘quv tusdagi tadbirlarni, ularning soatlar miqdorini ko‘rsatgan holda, o‘z ichiga oladi. Ushbu soatlarning eng kam miqdori oliy ta’lim muassasasi Kengashi tomonidan belgilanadi”;

uchinchi va to‘rtinchi xatboshilar tegishli ravishda to‘rtinchi va beshinchi xatboshilar deb hisoblansin;

quyidagi mazmundagi xatboshi bilan to‘ldirilsin:

“Mazkur bandning to‘rtinchi va beshinchi xatboshlari talablari qonun hujjatlariga muvofiq o‘quv jarayoni o‘qitishning modul tizimiga asoslangan oliy ta’lim muassasalariga tatbiq etilmaydi”.

4. O‘zbekiston Respublikasi Vazirlar Mahkamasining “Xorijiy fuqarolarni O‘zbekiston Respublikasi ta’lim muassasalariga o‘qishga qabul qilish va o‘qitish tartibini takomillashtirish to‘g‘risida” 2008-yil 4-avgustdagi 169-son qarorida (O‘zbekiston Respublikasi QT, 2008-y., 8-son, 42-modda):

a) 1-bandning to‘rtinchi xatboshiga “agar” so‘zidan keyin “qonun hujjatlari yoki” so‘zlari qo‘shilsin;

b) ilovada:

8-banddagi “agar” so‘zidan keyin “qonun hujjatlari yoki” so‘zlari qo‘shilsin;

12-bandda:

birinchi xatboshiga quyidagi mazmundagi jumla bilan qo‘shilsin:

“Mustaqil Davlatlar Hamdo‘stligi mamlakatlaridan kelgan xorijiy fuqarolar oliy ta’lim muassasalari bakalavriatiga oliy ta’lim muassasasi tomonidan belgilanadigan tartibda o‘tkaziladigan suhbat natijasida qabul qilinadi”;

ikkinchi xatboshiga “test sinovi” so‘zlaridan keyin “(suhbat)” so‘zi qo‘shilsin;

uchinchi xatboshiga “Test sinovlari” so‘zlaridan keyin “(suhbat)” so‘zi qo‘shilsin.

6. O‘zbekiston Respublikasi Vazirlar Mahkamasining “Oliy ta’lim muassasalari pedagog kadrlarini qayta tayyorlash va ularning malakasini oshirish tizimini yanada takomillashtirish chora-tadbirlari to‘g‘risida” 2012-yil 26-sentabrdagi 278-son qarorining 1-ilovasidagi (O‘zbekiston Respublikasi qonun hujjatlari to‘plami, 2012-y., 39-son, 453-modda) “Pedagog kadrlarni qayta tayyorlash va ularning malakasini oshirish tarmoq markazlari” bo‘limi “Mintaqaviy va tarmoq markazining nomi” ustunining 15-pozitsiyasi quyidagi tahrirda bayon etilsin:

“Toshkent davlat yuridik universiteti huzuridagi pedagog kadrlarni qayta tayyorlash va malakasini oshirish tarmoq markazi”.

7. O‘zbekiston Respublikasi Vazirlar Mahkamasining 2013-yil 23-dekabrdagi “Toshkent axborot texnologiyalari universiteti va Toshkent davlat yuridik universitetlarida o‘quv yuklamasining hajmlarini tasdiqlash to‘g‘risida” 337-son qarori 2-ilovasining rus tilidagi matnida (O‘zbekiston Respublikasi qonun hujjatlari to‘plami, 2013-y., 52-son, 691-modda):

a) 1-bo‘lim quyidagi tahrirda bayon etilsin:

“1. Bakalavriat

Maksimalniy obyem auditornix zanyatiy pri ochnoy forme obucheniya doljen bit ustanovlen v obyeme 30 chasov v nedelyu.

Pri normativnom sroke obucheniya v 4 goda prodoljitelnost uchebnogo protsessa doljna sostavlyat 204 nedeli.

Obshiy obyem uchebnogo vremeni doljen raspredelyatsya na:

teoreticheskoye obucheniye — 40 — 55%;

attestatsiyu — 10 — 20%;

kanikuli — 12 — 18%;

Samostoyatelnuyu podgotovku — 6 — 14%;

kvalifikatsionnuyu praktiku — 8 — 12%;

vipusknuyu rabotu — 2 — 4%.

Obyem vremeni teoreticheskogo obucheniya doljen raspredelyatsya po blokam dissiplin sleduyushim obrazom:

neprofilnie dissiplini — 10 — 30%;

profilnie dissiplini — 60 — 80%;

dopolnitelnie dissiplini — 5 — 10%.

Obshiy obyem kanikulyarnogo vremeni v uchebniy god ustanavlivayetsya 5 — 14 nedel”;

b) 2-bo‘limda:

ikkinchi xatboshi quyidagi tahrirda bayon etilsin:

“Maksimalniy obyem auditornix zanyatiy i nauchnoy deyatelnosti pri ochnoy forme obucheniya doljen bit ustanovlen v obyeme 30 chasov v nedelyu”;

beshinchi xatboshidagi “25 — 30” raqamlari “20 — 25” raqamlari bilan almashtirilsin;

oltinchi xatboshidagi “4 — 7” raqamlari “8 — 12” raqamlari bilan almashtirilsin;

quyidagi mazmundagi yettinchi xatboshi bilan to‘ldirilsin:

“samostoyatelnuyu podgotovku — 6 — 10%”;

yettinchi — o‘n oltinchi xatboshilar tegishli ravishda sakkizinchi — o‘n yettinchi xatboshilar deb hisoblansin.