O‘zbekiston Respublikasining 2016-yil 23-sentabrdagi “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘RQ-411-sonli Qonuniga muvofiq:

1. O‘zbekiston Respublikasi Prezidentining 1992-yil 20-noyabrdagi PF-500-sonli Farmoni bilan tasdiqlangan O‘zbekiston Respublikasining fuqaroligi bilan bog‘liq masalalarni ko‘rib chiqish tartibi to‘g‘risidagi nizomga ilovaga muvofiq o‘zgartish kiritilsin.

2. Mazkur Farmonning ijrosini nazorat qilish O‘zbekiston Respublikasi Prezidentining Davlat maslahatchisi O. Murodov zimmasiga yuklansin.

IV bobning matni quyidagi tahrirda bayon etilsin:

“1. “O‘zbekiston Respublikasining fuqaroligi to‘g‘risida”gi O‘zbekiston Respublikasi Qonuniga asosan O‘zbekiston Respublikasi fuqaroligi quyidagi hollarda yo‘qotilishi mumkin:

a) O‘zbekiston Respublikasi fuqarosiga nisbatan uning chet el davlati armiyasiga harbiy xizmatga, xavfsizlik xizmatiga, shuningdek politsiyasiga, adliya organlariga yoki davlat hokimiyati va boshqaruvining boshqa organlariga ishga kirganligini tasdiqlovchi hujjatlar yoxud boshqa ishonchli ma’lumotlar mavjud bo‘lganda.

Konsullik muassasalari hujjatlarni Tashqi ishlar vazirligiga yuboradilar, Tashqi ishlar vazirligi olingan ma’lumotlarni va Ichki ishlar vazirligi hamda Milliy xavfsizlik xizmatining xulosalarini o‘zining hujjatlari va xulosasi bilan birga O‘zbekiston Respublikasi Prezidenti huzuridagi fuqarolik masalalari bo‘yicha Komissiyaga taqdim etadi.

b) agar chet elda doimiy yashovchi shaxs uch yil mobaynida uzrli sabablarsiz konsullik hisobiga turmagan bo‘lsa.

Tashqi ishlar vazirligi Ichki ishlar vazirligi hamda konsullik muassasalarining hujjatlari asosida hujjatlar va xulosani ko‘rib chiqish uchun O‘zbekiston Respublikasi Prezidenti huzuridagi fuqarolik masalalari bo‘yicha Komissiyaga yuboradi.

Uch yillik muddat tartibi faqatgina 16 yoshga to‘lgan shaxslarga nisbatan qo‘llaniladi, ularning ota-onalari yoki ulardan birining iltimosnoma berganligi hollari bundan mustasno. Iltimosnomaga 14 yoshdan 18 yoshgacha bo‘lgan bolalarning notarial tasdiqlangan roziligi ilova qilinadi.

Konsullik muassasasi rahbari holatga qarab obyektiv ma’lumotlarga asoslangan holda O‘zbekiston Respublikasi fuqarosining o‘z vaqtida konsullik hisobiga turmaganlik sabablarining uzrli ekanligiga mustaqil baho beradi;

v) agar O‘zbekiston Respublikasi fuqaroligi oldindan bila turib yolg‘on ma’lumotlar yoki soxta hujjatlar taqdim etish natijasida olingan bo‘lsa.

Ichki ishlar organlari yoki konsullik muassasalari O‘zbekiston Respublikasi fuqaroligi oldindan bila turib yolg‘on ma’lumotlar yoki soxta hujjatlar taqdim etish natijasida olinganligi haqida ma’lumotlar yoki arizalar kelib tushgan taqdirda, shaxsning haqiqatdan ham O‘zbekiston Respublikasi fuqarosi ekanligini aniqlash uchun zarur tekshiruvlarni olib boradilar. O‘zbekiston Respublikasi fuqaroligi oldindan bila turib yolg‘on ma’lumotlar yoki soxta hujjatlar taqdim etish natijasida olinganligi holati tasdiqlangan taqdirda, Ichki ishlar vazirligi yoki Tashqi ishlar vazirligi hujjatlarni O‘zbekiston Respublikasi Prezidenti huzuridagi fuqarolik masalalari bo‘yicha Komissiyaga taqdim etadilar;

g) agar shaxs chet el davlati foydasini ko‘zlab faoliyat yuritish yoki tinchlik va xavfsizlikka qarshi jinoyatlar sodir etish orqali jamiyat va davlat manfaatlariga jiddiy zarar yetkazgan bo‘lsa.

Shaxsning chet davlat foydasini ko‘zlab faoliyat yuritish yoki O‘zbekiston Respublikasi Jinoyat kodeksining Maxsus qismi ikkinchi bo‘limida nazarda tutilgan tinchlik va xavfsizlikka qarshi jinoyatlarni sodir etish natijasida jamiyat va davlat manfaatlariga jiddiy ziyon yetkazganligini tasdiqlaydigan, sudning qonuniy kuchga kirgan hukmi bilan aniqlangan hujjatlar shaxsning fuqaroligini yo‘qotish yuzasidan tashabbuskor organning asoslantirilgan taqdimnomasi bilan birga O‘zbekiston Respublikasi Ichki ishlar vazirligiga yuboriladi.

Ichki ishlar vazirligi fuqarolikni yo‘qotish tashabbusi yuzasidan hujjatlar nusxalarini Tashqi ishlar vazirligi va Milliy xavfsizlik xizmatiga taqdim etadi. Ushbu tashkilotlar kelib tushgan hujjatlar asosida o‘zlarining xulosalarini O‘zbekiston Respublikasi Prezidenti huzuridagi fuqarolik masalalari bo‘yicha Komissiyaga taqdim etadilar.

Ichki ishlar vazirligi fuqarolikni yo‘qotish haqidagi xulosani tegishli hujjatlarni ilova qilgan xolda O‘zbekiston Respublikasi Prezidenti huzuridagi fuqarolik masalalari bo‘yicha Komissiyaga taqdim etadi;

d) agar shaxs chet el davlati fuqaroligini olgan bo‘lsa.

Manfaatdor vazirlik va idoralar chet elda doimiy yashovchi fuqarolarga nisbatan hujjatlarni Tashqi ishlar vazirligiga yuboradilar. Tashqi ishlar vazirligi hujjatlarni va Ichki ishlar vazirligi hamda Milliy xavfsizlik xizmatining xulosasini qabul qilib, ularni o‘zining hujjatlari va xulosasi bilan birga O‘zbekiston Respublikasi Prezidenti huzuridagi fuqarolik masalalari bo‘yicha Komissiyaga taqdim etadi.

Manfaatdor vazirlik va idoralar O‘zbekiston Respublikasi hududida doimiy yashovchi fuqarolarga nisbatan hujjatlarni Ichki ishlar vazirligiga yuboradilar. Ichki ishlar vazirligi hujjatlarni va Tashqi ishlar vazirligi hamda Milliy xavfsizlik xizmatining xulosasini qabul qilib, ularni o‘zining hujjatlari va xulosasi bilan birga O‘zbekiston Respublikasi Prezidenti huzuridagi fuqarolik masalalari bo‘yicha Komissiyaga taqdim etadi.

2. Manfaatdor vazirlik va idoralar tomonidan O‘zbekiston Respublikasi Prezidenti huzuridagi fuqarolik masalalari bo‘yicha Komissiyaga ko‘rib chiqishga taqdim etiladigan xulosalar asoslantirilgan bo‘lishi kerak.

Xulosalarda quyidagi ma’lumotlar alohida ko‘rsatilishi kerak:

shaxsning davlat oldidagi bajarilmagan (ijro etilmagan) majburiyati yoki fuqarolar yoxud davlat va jamoat tashkilotlarining jiddiy manfaatlari bilan bog‘liq bo‘lgan mulkiy majburiyati mavjudligi;

shaxsning ayblanuvchi sifatida jinoiy javobgarlikka tortilganligi;

shaxsning qidiruvda ekanligi;

shaxsga nisbatan qonuniy kuchga kirgan va ijro qilinishi lozim bo‘lgan sud hukmining mavjudligi;

shaxsning O‘zbekiston Respublikasidan tashqarida ozodlikdan mahrum qilish joylarida ekanligi;

shaxsning O‘zbekiston Respublikasi fuqaroligini yo‘qotishi O‘zbekiston Respublikasi davlat xavfsizligining manfaatlariga nomuvofiq ekanligi.

3. O‘zbekiston Respublikasi Prezidenti huzuridagi fuqarolik masalalari bo‘yicha Komissiya taqdim etilgan hujjatlarni hamda manfaatdor vazirlik va idoralarning xulosalarini ko‘rib chiqadi va O‘zbekiston Respublikasi Prezidenti tomonidan qaror qabul qilish uchun taklif kiritadi.

4. O‘zbekiston Respublikasi fuqaroligini yo‘qotishni rasmiylashtirish masalalariga oid hujjatlarni tayyorlashda fuqarolikni yo‘qotgan deb topilayotgan shaxsni bu borada amalga oshirilayotgan ishlar haqida xabardor qilish choralari ko‘riladi.

Xabardor qilish o‘rnatilgan tartibda shaxsning yashash joyi bo‘yicha amalga oshiriladi. Shaxsning turar joyi haqidagi ma’lumotlar mavjud bo‘lmagan taqdirda, uning oxirgi yashash joyi bo‘yicha fuqarolarning o‘zini-o‘zi boshqarish organlarini yoki yaqin qarindoshlarini xabardor qilish orqali amalga oshiriladi.

O‘zbekiston Respublikasi fuqaroligi O‘zbekiston Respublikasi Prezidentining Farmoni chiqqan kundan boshlab yo‘qotiladi.

5. O‘zbekiston Respublikasi fuqaroligining yo‘qotilganligi fakti “O‘zbekiston Respublikasining fuqaroligi to‘g‘risida”gi O‘zbekiston Respublikasi Qonunining 31, 32-moddalariga muvofiq, O‘zbekiston Respublikasi hududida shaxsning doimiy yashash joyi bo‘yicha ichki ishlar organlari tomonidan, chet elda doimiy yashovchi shaxslar uchun esa, konsullik muassasalari tomonidan ro‘yxatga olinadi.

6. O‘zbekiston Respublikasi fuqaroligini yo‘qotishni rasmiylashtirish masalalariga oid hujjatlarni tayyorlash tartibi Ichki ishlar vazirligi va Tashqi ishlar vazirligi tomonidan manfaatdor vazirlik va idoralar bilan birgalikda belgilanadi”.