Oʻzbekiston Respublikasi Prezidentining 2009-yil 13-iyuldagi PQ–1157-sonli “Olis aholi punktlaridagi umumtaʼlim maktablari 9-sinf bitiruvchilari oʻqishini davom ettirishini taʼminlash chora-tadbirlari toʻgʻrisida”gi qarori hamda Vazirlar Mahkamasining 2004-yil 24-iyundagi 293-sonli “Oʻzbekiston Respublikasi Vazirlar Mahkamasi huzuridagi Davlat test markazi faoliyatini takomillashtirish toʻgʻrisida”gi qaroriga muvofiq, Oʻzbekiston Respublikasi Vazirlar Mahkamasi huzuridagi Davlat test markazi, Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi qaror qiladi:

1. Oʻzbekiston Respublikasi Vazirlar Mahkamasi huzuridagi Davlat test markazi, Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazining 2008-yil 22-apreldagi 01-128/QQ, 16 va 14/QQ-sonli “Umumiy oʻrta taʼlim maktablari 11-sinflari, akademik litseylar va kasb-hunar kollejlari bitiruvchilarining umumtaʼlim fanlari boʻyicha taʼlim tayyorgarligi darajasi va sifati monitoringini oʻtkazish boʻyicha yoʻriqnomani tasdiqlash toʻgʻrisida”gi qaroriga (roʻyxat raqami 1804, 2008-yil 5-may) (Oʻzbekiston Respublikasi qonun hujjatlari toʻplami, 2008-y., 19-son, 167-modda) ilovaga muvofiq oʻzgartirishlar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. Qarorda:

a) nomi quyidagi tahrirda bayon etilsin:

“Akademik litseylar va kasb-hunar kollejlari bitiruvchilarining umumtaʼlim fanlari boʻyicha taʼlim tayyorgarligi darajasi va sifati monitoringini oʻtkazish tartibi toʻgʻrisidagi yoʻriqnomani tasdiqlash haqida”;

b) 1-band quyidagi tahrirda bayon etilsin:

“1. Akademik litseylar va kasb-hunar kollejlari bitiruvchilarining umumtaʼlim fanlari boʻyicha taʼlim tayyorgarligi darajasi va sifati monitoringini oʻtkazish tartibi toʻgʻrisidagi yoʻriqnoma ilovaga muvofiq tasdiqlansin.”;

2. Yoʻriqnomada:

a) nomi quyidagi tahrirda bayon etilsin:

“Akademik litseylar va kasb-hunar kollejlari bitiruvchilarining umumtaʼlim fanlari boʻyicha taʼlim tayyorgarligi darajasi va sifati monitoringini oʻtkazish tartibi toʻgʻrisidagi yoʻriqnoma”;

b) muqaddima quyidagi tahrirda bayon etilsin:

“Mazkur Yoʻriqnoma Oʻzbekiston Respublikasining “Taʼlim toʻgʻrisida”gi, “Kadrlar tayyorlash milliy dasturi toʻgʻrisida”gi qonunlari, Oʻzbekiston Respublikasi Vazirlar Mahkamasining 2003-yil 29-oktabrdagi 473-son “Umumiy oʻrta va oʻrta maxsus, kasb-hunar taʼlimiga izchil oʻtishni taʼminlashga doir qoʻshimcha chora-tadbirlar toʻgʻrisida”gi hamda 2004-yil 24-iyundagi 293-son “Oʻzbekiston Respublikasi Vazirlar Mahkamasi huzuridagi Davlat test markazi faoliyatini takomillashtirish toʻgʻrisida”gi qarorlariga muvofiq, akademik litsey va kasb-hunar kollejlari bitiruvchilarining (bundan buyon matnda bitiruvchilar deb yuritiladi) umumtaʼlim fanlari boʻyicha taʼlim tayyorgarligi darajasi va sifati monitoringini oʻtkazish (bundan buyon matnda monitoring deb yuritiladi) tartibini belgilaydi.”;

v) 1-band quyidagi tahrirda bayon etilsin:

“1. Monitoring har yili Oʻzbekiston Respublikasi Vazirlar Mahkamasi huzuridagi Davlat test markazi (bundan buyon matnda DTM deb yuritiladi) tomonidan Oʻrta maxsus, kasb-hunar taʼlimi markazi bilan birgalikda tashkil etiladi hamda oʻtkaziladi. Monitoring oʻtkazish muddati toʻgʻrisida oʻrta maxsus, kasb-hunar taʼlimi hududiy boshqarmalari oldindan ogohlantiriladi.”;

g) 3-band quyidagi tahrirda bayon etilsin:

“3. Monitoring oʻtkazishning asosiy maqsadi oʻrta maxsus, kasb-hunar taʼlimi muassasalarida kadrlar tayyorlash sifatini muntazam kuzatib borish orqali bitiruvchilarning umumtaʼlim fanlari boʻyicha taʼlim tayyorgarligi darajasi va sifatiga oid xolis maʼlumotlar toʻplash, ularni tahlil qilish hamda ular asosida xulosalar tayyorlab, kadrlar tayyorlash sifatini oshirish va taʼlim muassasalarining faoliyatini takomillashtirish va rivojlantirish boʻyicha qarorlar qabul qilishi uchun Oʻrta maxsus, kasb-hunar taʼlimi markazini axborot bilan taʼminlash.”;

d) 4 va 5-bandlardan “umumiy oʻrta,” degan soʻzlar chiqarib tashlansin;

e) 6-banddagi “har oʻquv yilining tugashi arafasida 15-apreldan 25-maygacha boʻlgan muddatda umumiy oʻrta,” degan soʻzlar “har yili may-iyun oylarida” degan soʻzlar bilan almashtirilsin;

j) 7-banddan “xalq taʼlimi hamda” degan soʻzlar chiqarib tashlansin;

z) 8-banddan “va xalq taʼlimi” degan soʻzlar chiqarib tashlansin;

i) 9, 10 va 11-bandlar quyidagi tahrirda bayon etilsin:

“9. Monitoring oʻtkazish uchun akademik litsey va kasb-hunar kollejlarini tanlab olish usuliga yondoshilib, bunda taʼlim muassasalarining hududiy joylashuvi, taʼlim tili va tayyorlov yoʻnalishlari xususiyatlari eʼtiborga olinadi.

10. Monitoring oʻtkazish uchun oʻrta maxsus, kasb-hunar taʼlimi muassasalari (Qoraqalpogʻiston Respublikasi, viloyatlar va Toshkent shahri markazi, tumanlari kesimida) ixtiyoriy (akademik litseylardan 1 ta, kasb-hunar kollejlaridan yoʻnalishlar boʻyicha 7 ta) tanlanadi va monitoring natijalari tahlili asosida bitiruvchilarning taʼlim tayyorgarligi darajasi va sifati haqida xulosa chiqariladi.

11. Monitoring oʻtkaziladigan tumanlar va taʼlim muassasalari tegishli oʻrta maxsus, kasb-hunar taʼlimi hududiy boshqarmalarida qurʼa tashlash yoʻli bilan tanlab olinadi.”;

k) 12-bandda:

toʻrtinchi xatboshidan “maktablardan 4 tasi (2 ta oʻzbek, 1 ta rus va 1 ta fanlarni chuqurlashtirib oʻqitadigan maktablar),” degan soʻzlar chiqarib tashlansin;

beshinchi xatboshidan “3 tadan maktab (1 ta tuman markazi, 2 ta qishloq maktablari) va” degan soʻzlar chiqarib tashlansin;

l) 14-banddan “(maktablarda oʻquvchilarning 3-chorak yakunlari boʻyicha baholari)” degan soʻzlar chiqarib tashlansin;

m) 15-band quyidagi tahrirda bayon etilsin:

“15. Monitoring guruhi tomonidan taʼlim muassasasida oʻzlashtirish koʻrsatkichi oʻrtacha boʻlgan 1 ta bitiruvchi guruh tanlanadi.”;

n) 16-banddan “, Xalq taʼlimi vazirligi yoki” hamda “xalq taʼlimi boshqarmasi,” degan soʻzlar chiqarib tashlansin;

o) 19-band quyidagi tahrirda bayon etilsin:

“19. Tanlangan guruh bitiruvchilaridan oʻquv rejadagi umumtaʼlim fanlarining uchtasidan Davlat test markazi Oʻrta maxsus, kasb-hunar taʼlimi markazi bilan kelishgan holda nazorat ishi (test yoki yozma ish) oʻtkazadi.”;

p) 20-bandda:

oltinchi xatboshidan “umumiy oʻrta va” degan soʻzlar chiqarib tashlansin;

oʻninchi xatboshidagi “soat 10.00 da bitiruvchilar uchun test sinovlari boshlanadi” degan soʻzlar “test sinovlari soat 9.00 da (2-smenada soat 14-00 da) boshlanadi” degan soʻzlar bilan almashtirilsin;

oʻn birinchi xatboshidagi “barcha fanlar boʻyicha test sinovlarini bajarish uchun oʻquvchilarga ikki astronomik soat beriladi” degan soʻzlar “matematika, fizika, biologiya, kimyo, informatika va geografiya fanlarining 1 ta savoliga 3 minut, qolgan fanlardan 1 ta savolga 2 minut vaqt beriladi” degan soʻzlar bilan almashtirilsin;

r) 22-banddan “va nazorat ishlari tugamaguncha auditoriyadan hech kim chiqarilmaydi” degan soʻzlar chiqarib tashlansin.

s) 27-banddan “umumiy oʻrta va” degan soʻzlar chiqarib tashlansin.