Pul massasi ustidan samarali nazorat qilinishini ta’minlash, pul agregatlarini tartibga solishning zamonaviy usullarini amaliyotga keng joriy etish, bank tizimiga ishonchni yanada mustahkamlash maqsadida Vazirlar Mahkamasi qaror qiladi:

1. Kassa rejalarini shakllantirish hamda naqd pul mablag‘lari emissiyasi darajasini pasaytirish prognozlari bajarilganligi uchun rahbarlar va mansabdor shaxslarni rag‘batlantirishning shakllangan tizimi 2003-yil 1-fevraldan boshlab bekor qilinsin.

2. O‘zbekiston Respublikasi Markaziy bankining quyidagilarni nazarda tutuvchi pul agregatlarini boshqarishning yangi mexanizmini joriy etish to‘g‘risidagi taklif qabul qilinsin:

pul massasi ustidan samarali nazorat qilishni ta’minlash imkonini beruvchi pul agregatlari, bank tizimining likvidligining va pulga bo‘lgan talabning faktorlar bo‘yicha tahlili va dinamikasini modellashtirish;

zaxira pullar va pul massasi o‘zgarishining choraklik va yillik maqsadli prognozlarini ishlab chiqish;

tijorat banklarining likvidligini qisqa muddatli tartibga solishning bozor vositalaridan, shu jumladan foiz stavkalarini va majburiy zaxiralar normasini boshqarishdan, valyuta depozitlari garovi, davlat qimmatli qog‘ozlari va boshqa birinchi klassli aktivlar ostida kreditlar berish va ularni jalb qilishdan keng foydalanish.

Pul agregatlari prognozini modellashtirish sxemasi ilovaga muvofiq ma’qullansin.

3. O‘zbekiston Respublikasi Markaziy banki:

pul agregatlari hajmlari va tarkibi o‘zgarishi, pul bozorining holati hamda zaxira pullar va pul massasi o‘zgarishining maqsadli prognozlari bajarilishi ustidan doimiy monitoringni amalga oshirsin;

pul agregatlari o‘zgarishi dinamikasi va tendensiyalari to‘g‘risida yilning har choragida Vazirlar Mahkamasiga axborot bersin.

4. O‘zbekiston Respublikasi Adliya vazirligi va Markaziy banki boshqa manfaatdor vazirliklar va idoralar bilan birgalikda bir oy muddatda idoraviy normativ hujjatlarga mazkur qarordan kelib chiquvchi o‘zgartirishlar kiritsin.

5. Vazirlar Mahkamasining “Naqd pul mablag‘lari emissiyasini qisqartirish chora-tadbirlari to‘g‘risida” 1996-yil 2-iyuldagi 230-son qarori va “Respublika mintaqalarida naqd pul mablag‘lari emissiyasi darajasini pasaytirish prognozlari va kassa rejalari bajarilishi uchun rahbarlar va mansabdor shaxslarning javobgarligini oshirish va ularni rag‘batlantirish tartibi to‘g‘risidagi Nizomga o‘zgartirish kiritish haqida” 1996-yil 12-sentabrdagi 315-son qarori o‘z kuchini yo‘qotgan deb hisoblansin.

6. Mazkur qarorning bajarilishini nazorat qilish O‘zbekiston Respublikasi Markaziy bankining raisi F.M. Mullajonov zimmasiga yuklansin.