O‘zbekiston Respublikasi Prezidentining “Ta’lim muassasalarini rekonstruksiya qilish, mukammal ta’mirlash va jihozlash bo‘yicha budjetdan tashqari jamg‘armani tashkil etish to‘g‘risida” 2010-yil 10-noyabrdagi PQ-1432-son qarorini bajarish yuzasidan Vazirlar Mahkamasi qaror qiladi:

1. Quyidagilar:

Budjetdan tashqari Ta’lim va tibbiyot muassasalarini rekonstruksiya qilish, mukammal ta’mirlash va jihozlash jamg‘armasi to‘g‘risidagi nizom 1-ilovaga muvofiq;

Ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlashning har yilgi dasturlarini ishlab chiqish va tasdiqlash tartibi 2-ilovaga muvofiq tasdiqlansin.

2. O‘zbekiston Respublikasi Moliya vazirligi manfaatdor vazirliklar va idoralar bilan birgalikda O‘zbekiston Respublikasi Moliya vazirligi huzuridagi budjetdan tashqari Maktab ta’limi jamg‘armasi tugatilishi munosabati bilan qonun hujjatlariga kiritiladigan o‘zgartirish va qo‘shimchalar to‘g‘risida bir oy muddatda O‘zbekiston Respublikasi Vazirlar Mahkamasiga takliflar kiritsin.

3. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.

1. Mazkur Nizom budjetdan tashqari Ta’lim va tibbiyot muassasalarini rekonstruksiya qilish, mukammal ta’mirlash va jihozlash jamg‘armasi (keyingi o‘rinlarda Jamg‘arma deb ataladi) faoliyatining maqsadi va asosiy vazifalarini, Jamg‘armani boshqarish tartibini, uning mablag‘larini shakllantirish manbalarini va ulardan foydalanish yo‘nalishlarini belgilaydi.

2. Jamg‘arma respublika ta’lim va tibbiyot muassasalarining moddiy-texnika bazasini zamonaviy talablarni va xalqaro standartlarni hisobga olgan holda tizimli asosda rivojlantirish va mustahkamlash, ularni eng ilg‘or o‘quv, tashxis va davolash asbob-uskunalari, axborot-kompyuter texnikasi bilan jihozlash maqsadida O‘zbekiston Respublikasi Prezidentining “Ta’lim muassasalarini rekonstruksiya qilish, mukammal ta’mirlash va jihozlash bo‘yicha budjetdan tashqari jamg‘armani tashkil etish to‘g‘risida” 2010-yil 10-noyabrdagi PQ-1432-son qaroriga muvofiq tashkil etilgan hamda O‘zbekiston Respublikasi Prezidentining “Ta’lim muassasalarini rekonstruksiya qilish, mukammal ta’mirlash va jihozlash jamg‘armasini Ta’lim va tibbiyot muassasalarini rekonstruksiya qilish, mukammal ta’mirlash va jihozlash jamg‘armasi etib qayta tashkil etish to‘g‘risida” 2011-yil 21-noyabrdagi PQ-1645-son qaroriga muvofiq qayta tashkil etilgan.

3. Jamg‘arma o‘z faoliyatida O‘zbekiston Respublikasi Konstitutsiyasiga, O‘zbekiston Respublikasi qonunlariga, O‘zbekiston Respublikasi Oliy Majlisi palatalari qarorlariga, O‘zbekiston Respublikasi Prezidenti farmonlari, qarorlari va farmoyishlariga, O‘zbekiston Respublikasi Vazirlar Mahkamasi qarorlari va farmoyishlariga, ushbu Nizomga hamda boshqa normativ-huquqiy hujjatlarga, shuningdek Jamg‘armani boshqarish kengashi qarorlariga amal qiladi.

4. Quyidagilar Jamg‘armaning asosiy vazifalari va mablag‘laridan foydalanish yo‘nalishlari hisoblanadi:

Jamg‘armaga tushayotgan mablag‘larni keyinchalik ulardan ta’lim muassasalarini — umumta’lim maktablarini, akademik litseylar va kasb-hunar kollejlarini jihozlash (to‘liq jihozlash)da maqsadli foydalanish uchun jamlash;

ta’lim muassasalarini rekonstruksiya qilish va mukammal ta’mirlash, shu jumladan zarurat bo‘lganda, o‘quv binolarini o‘quv ustaxonalari va laboratoriyalari bilan kengaytirish, sport zallari va maydonchalarini, boshqa infratuzilma obyektlarini barpo etish ishlarini moliyalashtirish;

zamonaviy talablarni hisobga olgan holda va tasdiqlangan normativlardan kelib chiqib ta’lim muassasalarini eng yangi o‘quv-laboratoriya va ishlab chiqarish uskunalari, kompyuter texnikasi, axborot-kommunikatsiya texnologiyalarining o‘qitishga ko‘maklashuvchi boshqa elementlari, shuningdek o‘quv mebeli va anjomlari bilan tizimli jihozlash va to‘liq jihozlashni moliyalashtirish.

tasdiqlangan aniq manzilli dasturlarga muvofiq sog‘liqni saqlash muassasalarini qurish, rekonstruksiya qilish va mukammal ta’mirlash ishlarini moliyalashtirish;

zamonaviy talablar va belgilangan normativlardan kelib chiqqan holda sog‘liqni saqlash muassasalarini eng yangi laboratoriya, tashxis va davolash asbob-uskunalari, kompyuter texnikasi hamda boshqa tibbiyot apparatlari, maxsus mebel va anjomlar bilan jihozlash hamda doimiy asosda tizimli qayta jihozlashni moliyalashtirish.

5. Jamg‘arma daromadlari quyidagi manbalar hisobiga shakllantiriladi:

xo‘jalik yurituvchi subyektlar tomonidan Jamg‘armaga qonun hujjatlarida belgilangan tartibda majburiy ajratmalarni to‘lashdan tushadigan mablag‘lar;

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining budjetdan tashqari mablag‘lari;

xalqaro moliya institutlari hamda boshqa xorijiy donorlarning grantlari va imtiyozli kreditlari (qarzlari);

sog‘liqni saqlashga xarajatlar hisobiga alohida satr bilan ajratiladigan O‘zbekiston Respublikasi Davlat budjeti mablag‘lari va markazlashtirilgan investitsiyalar;

xayriya qiluvchilar — yuridik va jismoniy shaxslar, shu jumladan O‘zbekiston Respublikasi norezidentlarining mablag‘lari;

Jamg‘armaning vaqtincha bo‘sh mablag‘larini joylashtirishdan olinadigan daromadlar va qonun hujjatlarida taqiqlanmagan boshqa tushumlar.

6. Xo‘jalik yurituvchi subyektlar (to‘lovchilar) tomonidan Jamg‘armaga majburiy ajratmalar summasi har yili O‘zbekiston Respublikasi Prezidenti qaroriga ko‘ra belgilanadigan to‘lov obyekti va stavkasidan kelib chiqqan holda aniqlanadi.

7. Xalqaro moliyaviy tashkilotlar va institutlarning grantlari va imtiyozli kreditlari (qarzlari), xayriya qiluvchilar mablag‘lari, shu jumladan O‘zbekiston Respublikasi norezidentlarining mablag‘lari Jamg‘arma hisobiga qonun hujjatlarida belgilangan tartibda tushadi.

8. Tarkibi O‘zbekiston Respublikasi Prezidenti tomonidan tasdiqlanadigan Jamg‘armani boshqarish kengashi Jamg‘armani boshqarishning yuqori organi hisoblanadi.

9. Jamg‘armani boshqarish kengashi:

umumiy rahbarlikni amalga oshiradi va Jamg‘armaga yuklangan vazifalarning bajarilishini tashkil qiladi;

Jamg‘arma daromadlari barqaror shakllantirilishi, o‘z vaqtida moliyalashtirilishi va Jamg‘arma mablag‘laridan maqsadli foydalanilishi ta’minlanishini doimiy nazorat qiladi;

O‘zbekiston Respublikasi Xalq ta’limi vazirligi, Sog‘liqni saqlash vazirligi, Oliy va o‘rta maxsus ta’lim vazirligining O‘rta maxsus, kasb-hunar ta’limi markazi tomonidan ta’lim va tibbiyot muassasalari moddiy-texnika bazasining holati muntazam ravishda o‘rganilishini va ularning O‘zbekiston Respublikasi Iqtisodiyot vazirligi, “Davarxitektqurilish” qo‘mitasi va Moliya vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda ta’lim va tibbiyot muassasalarini rekonstruksiya qilish, mukammal ta’mirlash va jihozlash (to‘liq jihozlash)ning har yillik dasturlari shakllantirilishini tashkil etadi;

ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ning har yillik dasturlarini tasdiqlaydi;

umumiy tasdiqlangan parametrlar doirasida, zarurat bo‘lganda, Jamg‘arma daromadlari (manbalar bo‘yicha) va xarajatlarining prognoz parametrlariga o‘zgartirish va aniqliklar kiritadi;

Jamg‘arma Ijro etuvchi direksiyasi faoliyatini nazorat qiladi;

Jamg‘arma oldiga qo‘yilgan vazifalarni hal etish uchun manfaatdor vazirliklar, idoralar, xo‘jalik yurituvchi subyektlarni va notijorat tashkilotlarni jalb qiladi, shuningdek xayriya qiluvchilar, shu jumladan O‘zbekiston Respublikasi norezidentlarining mablag‘larini jalb etishda Jamg‘armaga ko‘maklashadi.

10. Jamg‘armani boshqarish kengashi majlislari zaruratga ko‘ra, biroq har chorakda kamida bir marta o‘tkaziladi.

Jamg‘armani boshqarish kengashi qarorlari majlisda qatnashayotgan Jamg‘armani boshqarish kengashi a’zolarining oddiy ko‘pchilik ovozi bilan qabul qilinadi. Ovozlar teng bo‘lib qolganda Jamg‘armani boshqarish kengashi raisining ovozi hal qiluvchi hisoblanadi.

11. Jamg‘armani boshqarish kengashining o‘z vakolatlari doirasida qabul qilgan qarorlari O‘zbekiston Respublikasining vazirliklari, idoralari va boshqa tashkilotlari tomonidan bajarilishi majburiydir.

12. Jamg‘armani joriy boshqarish Jamg‘armaning Ijro etuvchi direksiyasi tomonidan amalga oshiriladi.

Quyidagilar Jamg‘arma ijro etuvchi direksiyasining asosiy vazifalari hisoblanadi:

Jamg‘arma daromadlari va xarajatlari prognozini hamda ularning bajarilishi to‘g‘risidagi hisobotni tayyorlash;

Jamg‘armani boshqarish kengashiga daromadlar manbalari bilan bog‘lagan holda Jamg‘arma mablag‘laridan asosiy yo‘nalishlar (ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash) bo‘yicha foydalanish yuzasidan takliflar kiritish;

ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ning aniq manzilli ro‘yxatlarining bajarilishini tahlil qilish va monitoring olib borish hamda tegishli materiallarni Jamg‘armani boshqarish kengashiga kiritish;

zarurat bo‘lganda, joylarga chiqqan holda, ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ning har yillik dasturlarini shakllantirishda ishtirok etish;

Jamg‘arma daromadlari va xarajatlarini oyma-oy tasdiqlash, shuningdek daromadlar parametrlarini mintaqalar bo‘yicha O‘zbekiston Respublikasi Moliya vazirligi va Davlat soliq qo‘mitasining tegishli bo‘linmalariga hamda xarajatlar parametrlarini Jamg‘arma mablag‘laridan foydalanish yo‘nalishlari bo‘yicha Moliya vazirligining tegishli bo‘linmalariga va hududiy moliya organlariga yetkazish, shuningdek O‘zbekiston Respublikasi Moliya vazirligi tomonidan ishlab chiqiladigan shakllar bo‘yicha ularning o‘z vaqtida va to‘liq bajarilishi monitoringini olib borish;

ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash) uchun Jamg‘arma tomonidan jalb etiladigan imtiyozli xorijiy kreditlar va qarzlar hisobga olinishini va ulardan maqsadli foydalanilishini ta’minlash, shuningdek ularni o‘z vaqtida qaytarish va qarz bitimlari shartlariga muvofiq ularga xizmat ko‘rsatish;

Jamg‘armaning ijro etuvchi direktori vazifalari O‘zbekiston Respublikasi Moliya vazirining mutasaddi o‘rinbosariga yuklanadi.

13. Jamg‘arma daromadlari va xarajatlari prognozini tayyorlash, ko‘rib chiqish va tasdiqlash “Budjet tizimi to‘g‘risida”gi O‘zbekiston Respublikasi Qonuniga va ushbu Nizomga muvofiq O‘zbekiston Respublikasi Davlat budjetini tayyorlash bilan bog‘liq holda amalga oshiriladi.

14. Jamg‘armaning ijro etuvchi direksiyasi har yili navbatdagi yil uchun:

O‘zbekiston Respublikasi Davlat soliq qo‘mitasi bilan birgalikda — Jamg‘armaga majburiy ajratmalar tushumlari prognozini tayyorlaydi;

O‘zbekiston Respublikasi Iqtisodiyot vazirligi, Moliya vazirligi, Xalq ta’limi vazirligi, Sog‘liqni saqlash vazirligi hamda Oliy va o‘rta maxsus ta’lim vazirligining O‘rta maxsus, kasb-hunar ta’limi markazi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda — budjetdan tashqari manbalardan, shu jumladan xalqaro tashkilotlar va moliya institutlarining grantlari va kreditlarini, xayriya qiluvchilarning ehsonlarini jalb etishdan tushumlar prognozlarini tayyorlaydi.

15. O‘zbekiston Respublikasi Xalq ta’limi vazirligi, Sog‘liqni saqlash vazirligi hamda Oliy va o‘rta maxsus ta’lim vazirligining O‘rta maxsus, kasb-hunar ta’limi markazi O‘zbekiston Respublikasi Iqtisodiyot vazirligi, “Davarxitektqurilish” qo‘mitasi va Moliya vazirligi bilan birgalikda 1-avgustgacha keyingi yil uchun Jamg‘armaning Ijro etuvchi direksiyasiga barcha yo‘nalishlar bo‘yicha Jamg‘arma xarajatlari prognozlarini hamda keyingi yil uchun Qoraqalpog‘iston Respublikasi, viloyatlar va tumanlar (shaharlar) bo‘yicha ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ning har yilgi dasturlarini taqdim etadilar.

16. Jamg‘armaning Ijro etuvchi direksiyasi Jamg‘armaga tushayotgan mablag‘lar doirasida, O‘zbekiston Respublikasi Moliya vazirligi va Iqtisodiyot vazirligi bilan birgalikda Ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash) dasturining uzil-kesil parametrlarini shakllantiradi hamda O‘zbekiston Respublikasi Davlat budjeti loyihasi kiritilishi bilan bog‘langan muddatlarda O‘zbekiston Respublikasi Vazirlar Mahkamasiga ko‘rib chiqish va tasdiqlash uchun kiritadi.

17. Jamg‘arma daromadlari va xarajatlarining yillik parametrlari tasdiqlangandan keyin Jamg‘armaning ijro etuvchi direksiyasi 5 kun mobaynida Jamg‘arma mablag‘larini oluvchilarni (Xalq ta’limi vazirligi, Sog‘liqni saqlash vazirligi, Oliy va o‘rta maxsus ta’lim vazirligining O‘rta maxsus, kasb-hunar ta’limi markazi hamda Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmati, shuningdek O‘zbekiston Respublikasi Sog‘liqni saqlash vazirligining Qurilish bo‘yicha birlashgan direksiyasi) ular uchun belgilangan xarajatlar hajmi to‘g‘risida xabardor qiladi.

18. Jamg‘arma mablag‘lari:

mahalliy budjetlar mablag‘lari hisobiga ta’minlanadigan ta’lim muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ga, shuningdek tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ga xarajatlar bo‘yicha — G‘aznachilikning Qoraqalpog‘iston Respublikasi, viloyatlar va Toshkent shahri bo‘yicha boshqarmalaridagi (keyingi o‘rinlarda G‘aznachilikning hududiy boshqarmalari deb ataladi) xizmat ko‘rsatiladigan g‘aznachilik shaxsiy hisob raqamlari orqali sarflanadi;

respublika budjeti mablag‘lari hisobiga ta’minlanadigan tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ga xarajatlar bo‘yicha — O‘zbekiston Respublikasi Moliya vazirligining G‘aznachiligida xizmat ko‘rsatiladigan g‘aznachilik shaxsiy hisob raqamlari orqali sarflanadi.

19. Jamg‘arma mablag‘laridan foydalanish:

a) O‘zbekiston Respublikasi Moliya vazirligida:

respublika budjeti mablag‘lari hisobiga ta’minlanadigan tibbiyot muassasalarini qurish, rekonstruksiya qilish va mukammal ta’mirlash bo‘yicha — tender (tanlov) savdolari asosida va kapital qurilish sohasidagi qonun hujjatlari bilan belgilangan tartibga muvofiq O‘zbekiston Respublikasi Sog‘liqni saqlash vazirligining Qurilish bo‘yicha birlashgan direksiyasi tomonidan;

respublika budjeti mablag‘lari hisobiga ta’minlanadigan tibbiyot muassasalarini jihozlash (to‘liq jihozlash) bo‘yicha — qonun hujjatlarida belgilangan tartibda o‘tkazilgan tender (tanlov) savdolari asosida O‘zbekiston Respublikasi Sog‘liqni saqlash vazirligi tomonidan ro‘yxatdan o‘tkazilgan xarajatlar smetalari asosida amalga oshiriladi;

b) Qoraqalpog‘iston Respublikasi Moliya vazirligida, viloyatlar va Toshkent shahar moliya boshqarmalarida:

mahalliy budjetlar mablag‘lari hisobiga ta’minlanadigan ta’lim muassasalarini qurish, rekonstruksiya qilish va mukammal ta’mirlash, shuningdek tibbiyot muassasalarini qurish, rekonstruksiya qilish va mukammal ta’mirlash bo‘yicha — tender (tanlov) savdolari asosida va kapital qurilish sohasida qonun hujjatlarida belgilangan tartibga muvofiq Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmatlari tomonidan ro‘yxatdan o‘tkazilgan xarajatlar smetalari asosida amalga oshiriladi;

mahalliy budjetlar mablag‘lari hisobiga ta’minlanadigan ta’lim muassasalari va tibbiyot muassasalarini jihozlash (to‘liq jihozlash) bo‘yicha — Qoraqalpog‘iston Respublikasi Xalq ta’limi vazirligi, viloyatlar va Toshkent shahar xalq ta’limi boshqarmalari, shuningdek O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi hududiy boshqarmalari, Qoraqalpog‘iston Respublikasi Sog‘liqni saqlash vazirligi, viloyatlar va Toshkent shahar sog‘liqni saqlash boshqarmalari tomonidan, qonun hujjatlarida belgilangan tartibda o‘tkazilgan tender (tanlov) savdolari asosida ro‘yxatdan o‘tkazilgan xarajatlar smetalari asosida amalga oshiriladi.

19-1. Ta’lim va tibbiyot muassasalarini jihozlash (to‘liq jihozlash)ning maqsadga muvofiqligi, shuningdek miqdor, sifat va yetkazib berish muddatlari bo‘yicha shartnoma majburiyatlari bajarilishi monitoringi yuzasidan javobgarlik tender (tanlov) savdolari buyurtmachilari — O‘zbekiston Respublikasi Xalq ta’limi vazirligi, Sog‘liqni saqlash vazirligi hamda Oliy va o‘rta maxsus ta’lim vazirligining O‘rta maxsus, kasb-hunar ta’limi markaziga, shuningdek ularning hududiy bo‘linmalariga yuklanadi.

20. O‘zbekiston Respublikasi Moliya vazirligi G‘aznachiligi va uning hududiy boshqarmalari ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash) bo‘yicha shartnomalarni belgilangan tartibda ro‘yxatdan o‘tkazishni hamda ular bo‘yicha qat’iyan xarajatlar smetalarida nazarda tutilgan mablag‘lar doirasida hamda ta’lim va tibbiyot muassasalarini qurish, rekonstruksiya qilish va mukammal ta’mirlashning belgilangan tartibda tasdiqlangan aniq manzilli ro‘yxatlariga muvofiq xarajatlar to‘lovini amalga oshiradilar.

21. Xarajatlarni to‘lash:

mahalliy budjetlar mablag‘lari hisobiga ta’minlanadigan ta’lim muassasalarini qurish, rekonstruksiya qilish va mukammal ta’mirlash, shuningdek tibbiyot muassasalarini qurish, rekonstruksiya qilish va mukammal ta’mirlash bo‘yicha — viloyatlar va Toshkent shahar hokimliklari huzuridagi yagona buyurtmachi xizmatlarining to‘lov topshiriqnomalari asosida G‘aznachilikning hududiy boshqarmalari tomonidan;

respublika budjeti mablag‘lari hisobiga ta’minlanadigan tibbiyot muassasalarini qurish, rekonstruksiya qilish va mukammal ta’mirlash bo‘yicha — ta’lim va tibbiyot muassasalarini qurish, rekonstruksiya qilish va mukammal ta’mirlashning aniq manzilli ro‘yxatlari bo‘yicha belgilangan limitlar doirasida hamda tender (tanlov) savdolari natijalarini hisobga olgan holda tuzilgan shartnomalar bo‘yicha O‘zbekiston Respublikasi Sog‘liqni saqlash vazirligining Qurilish bo‘yicha birlashgan direksiyasining to‘lov topshiriqnomalari asosida O‘zbekiston Respublikasi Moliya vazirligining G‘aznachiligi tomonidan amalga oshiriladi.

Shartnomalarda:

rekonstruksiya qilish va mukammal ta’mirlashning dastlabki ikki oyi mobaynida teng ulushlar bilan, qurilishning prognoz qilinayotgan yili uchun tender (tanlov) savdolari natijalari bo‘yicha aniqlangan ishlar qiymatining 30 foizigacha miqdorda avans to‘lovlarini amalga oshirish;

har oyda, ajratilgan avansni mutanosib ravishda ushlab qolishni hisobga olgan holda, bajarilgan ishlar qiymatining 95 foizi miqdorida joriy moliyalashtirishni amalga oshirish;

shartnomada ko‘rsatilgan kafolat muddati tugagach qolgan 5 foizni pudratchiga to‘lash nazarda tutiladi.

22. Ta’lim muassasalarini jihozlash (to‘liq jihozlash) bo‘yicha xarajatlarni to‘lash:

Qoraqalpog‘iston Respublikasi Xalq ta’limi vazirligi, viloyatlar va Toshkent shahar xalq ta’limi boshqarmalarining, shuningdek O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi hududiy boshqarmalarining to‘lov topshiriqnomalari asosida Qoraqalpog‘iston Respublikasi, viloyatlar va Toshkent shahri bo‘yicha G‘aznachilik hududiy boshqarmalari tomonidan;

mahalliy budjet mablag‘lari hisobiga ta’minlanadigan tibbiyot muassasalarini jihozlash (to‘liq jihozlash) bo‘yicha xarajatlarni to‘lash — Qoraqalpog‘iston Respublikasi Xalq ta’limi vazirligi, viloyatlar va Toshkent shahar sog‘liqni saqlash boshqarmalarining to‘lov topshiriqnomalari asosida G‘aznachilikning hududiy boshqarmalari tomonidan;

respublika budjeti mablag‘lari hisobiga ta’minlanadigan tibbiyot muassasalarini jihozlash (to‘liq jihozlash) bo‘yicha xarajatlarni to‘lash — O‘zbekiston Respublikasi Sog‘liqni saqlash vazirligining to‘lov topshiriqlari asosida O‘zbekiston Respublikasi Moliya vazirligining G‘aznachiligi tomonidan amalga oshiriladi.

Shartnomalarda:

shartnoma umumiy summasining kamida 30 foizi miqdorida avans to‘lovini amalga oshirish;

har oyda, ajratilgan avans to‘lovlarini ushlab qolgan holda, yetkazib berilgan tovarlarning amaldagi hajmidan kelib chiqib joriy moliyalashtirishni amalga oshirish nazarda tutiladi”;

23. Mablag‘larni (shu jumladan tovarlarni yetkazib beruvchilar, ishlar va xizmatlarni bajaruvchilar tomonidan shartnoma majburiyatlarining bajarilmaganligi uchun jarima sanksiyalarini qo‘llashdan olingan mablag‘larni) xarajatlarning tasdiqlanmagan smetasisiz, shuningdek Jamg‘arma xarajatlari prognozida nazarda tutilmagan tadbirlarga yoki ham umuman xarajatlar smetalari bo‘yicha va ham xarajatlarning alohida turlari bo‘yicha smetalarda belgilanganidan ortiqcha sarflash taqiqlanadi.

24. Joriy moliya yili yakunlari bo‘yicha qurish, rekonstruksiya qilish va mukammal ta’mirlashning aniq manzilli ro‘yxatlarida hamda ta’lim va tibbiyot muassasalarini jihozlash (to‘liq jihozlash) bo‘yicha xarajatlar smetalarida nazarda tutilgan to‘liq moliyalashtirilmagan mablag‘lar Jamg‘armaning daromadlari va xarajatlari balanslanganligi ta’minlanishini hisobga olgan holda kelgusi moliya yilida to‘lanadi.

25. Jamg‘armaning hisob raqamlaridan mablag‘larni ushbu Nizomda nazarda tutilmagan maqsadlarga o‘tkazish va vaqtinchalik olib qo‘yish taqiqlanadi.

26. Jamg‘armaning ijro etuvchi direksiyasi Jamg‘armaning buxgalteriya hisobi, daromadlari va xarajatlari ijrosi to‘g‘risidagi hisobotlarning tuzilishi va taqdim etilishi uchun javob beradi.

Jamg‘armaning ijro etuvchi direksiyasi har oyda, hisobot oyidan keyingi oyning 10-kunidan kechikmay O‘zbekiston Respublikasi Moliya vazirligi tomonidan ishlab chiqilgan shakl bo‘yicha O‘zbekiston Respublikasi Moliya vazirligiga Jamg‘arma daromadlari va xarajatlari ijrosi to‘g‘risida hisobot taqdim etadi.

27. O‘zbekiston Respublikasi Davlat soliq qo‘mitasi va davlat soliq xizmatining hududiy organlari:

Jamg‘armaga majburiy ajratmalarning to‘g‘ri hisoblanishi, to‘liq va o‘z vaqtida to‘lanishi yuzasidan nazoratni;

to‘lovchilar bo‘yicha Jamg‘armaga majburiy ajratmalar hisobi yuritilishini;

xo‘jalik yurituvchi subyektlar tomonidan Jamg‘armaga majburiy ajratmalarning to‘g‘ri hisoblanishi va to‘lanishi bo‘yicha tekshirishlarning amalga oshirilishini ta’minlaydilar.

28. O‘zbekiston Respublikasi Davlat soliq qo‘mitasi har oyda, hisobot oyidan keyingi oyning 10-kunidan kechikmay Jamg‘armaning ijro etuvchi direksiyasiga hisobot davridan keyingi oyning 1-kunidagi holati bo‘yicha Jamg‘armaga majburiy ajratmalarning hisoblangan va tushgan summalari, shuningdek Qoraqalpog‘iston Respublikasi, viloyatlar va Toshkent shahri, shuningdek vazirliklar va idoralar bo‘yicha mazkur ajratmalar yuzasidan qarzlar to‘g‘risida tezkor hisobot taqdim etadi.

Jamg‘armaning ijro etuvchi direksiyasi O‘zbekiston Respublikasi Davlat soliq qo‘mitasidan Jamg‘armaga majburiy ajratmalar to‘lovlaridan mablag‘lar tushishiga taalluqli qo‘shimcha ma’lumotlarni so‘rab olish huquqiga ega.

29. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmatlari tomonidan ta’lim va tibbiyot muassasalarini qurish, rekonstruksiya qilish va mukammal ta’mirlashga ajratilgan Jamg‘arma mablag‘laridan foydalanilishi bo‘yicha hisobotlar har oyda, hisobot davridan keyingi oyning 5-kunidan kechikmay Qoraqalpog‘iston Respublikasi Moliya vazirligiga, viloyatlar va Toshkent shahar moliya boshqarmalariga taqdim etiladi.

29-1. O‘zbekiston Respublikasi Sog‘liqni saqlash vazirligining Qurilish bo‘yicha birlashgan direksiyasi tomonidan respublika budjeti mablag‘lari hisobiga ta’minlanadigan tibbiyot muassasalarini qurish, rekonstruksiya qilish va mukammal ta’mirlash uchun ajratiladigan Jamg‘arma mablag‘laridan foydalanish bo‘yicha hisobotlar har oyda, hisobot davridan keyingi oyning 5-kunidan kechikmay Jamg‘armaning Ijro etuvchi direksiyasiga taqdim etiladi.

30. Qoraqalpog‘iston Respublikasi Xalq ta’limi vazirligi, viloyatlar va Toshkent shahar xalq ta’limi boshqarmalari, Qoraqalpog‘iston Respublikasi Sog‘liqni saqlash vazirligi, viloyatlar va Toshkent shahar sog‘liqni saqlash boshqarmalari, shuningdek O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi hududiy boshqarmalari tomonidan ta’lim va tibbiyot muassasalarini jihozlashga (to‘liq jihozlashga) ajratilgan Jamg‘arma mablag‘laridan foydalanilishi bo‘yicha hisobotlar har oyda, hisobot davridan keyingi oyning 5-kunidan kechikmay Qoraqalpog‘iston Respublikasi Moliya vazirligiga, viloyatlar va Toshkent shahar moliya boshqarmalariga taqdim etiladi.

31. Qoraqalpog‘iston Respublikasi Moliya vazirligi, viloyatlar va Toshkent shahar moliya boshqarmalari — amalga oshirilgan xarajatlar yuzasidan har oyda, hisobot oyidan keyingi oyning 8-kunidan kechikmay Jamg‘armaning ijro etuvchi direksiyasiga O‘zbekiston Respublikasi Moliya vazirligi tomonidan ishlab chiqilgan shakl bo‘yicha hisobot taqdim etadilar.

32. O‘zbekiston Respublikasi Moliya vazirligi Davlat soliq qo‘mitasi bilan birgalikda respublika mintaqalari bo‘yicha Jamg‘armaga majburiy ajratmalar tushumlaridan Jamg‘arma daromadlar prognozining bajarilishi holatini tahlil qiladi hamda daromadlarning o‘z vaqtida va to‘liq tushishiga salbiy ta’sir ko‘rsatgan aniqlangan omillar asosida ularni bartaraf etishga doir qo‘shma chora-tadbirlar ko‘radi.

33. Jamg‘arma mablag‘laridan maqsadli foydalanilishi yuzasidan nazorat O‘zbekiston Respublikasi Moliya vazirligining Nazorat-taftish bosh boshqarmasi va uning hududiy bo‘linmalari tomonidan amalga oshiriladi.

34. Jamg‘armaning ijro etuvchi direksiyasi:

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmatlari hamda O‘zbekiston Respublikasi Sog‘liqni saqlash vazirligining Qurilish bo‘yicha birlashgan direksiyasining — ta’lim va tibbiyot muassasalarini qurish, rekonstruksiya qilish va mukammal ta’mirlash bo‘yicha bajarilgan ishlar hamda to‘langan mablag‘lar to‘g‘risidagi hisobot ma’lumotlari asosida;

Qoraqalpog‘iston Respublikasi Xalq ta’limi vazirligi, viloyatlar va Toshkent shahar xalq ta’limi boshqarmalari, Qoraqalpog‘iston Respublikasi Sog‘liqni saqlash vazirligi, viloyatlar va Toshkent shahar sog‘liqni saqlash boshqarmalarining, shuningdek O‘zbekiston Respublikasi Oliy va o‘rta maxsus ta’lim vazirligi O‘rta maxsus, kasb-hunar ta’limi markazi hududiy boshqarmalarining — ta’lim va tibbiyot muassasalariga o‘quv-laboratoriya asbob-uskunalari, kompyuter texnikasi, mebellar va boshqa anjomlarning amalda yetkazib berilganligi hamda to‘langan mablag‘lar, shuningdek ularning boshlang‘ich hujjatlarga (schyot-fakturalarga) va amalda bajarilgan ishlarga (xizmatlarga) muvofiqligi to‘g‘risidagi hisobot ma’lumotlari asosida Jamg‘arma mablag‘laridan maqsadli va oqilona foydalanilishi bo‘yicha doimiy monitoring olib boradi.

35. O‘zbekiston Respublikasi Xalq ta’limi vazirligi hamda Oliy va o‘rta maxsus ta’lim vazirligining O‘rta maxsus, kasb-hunar ta’limi markazi tuzilmalaridagi ta’lim muassasalarini rekonstruksiya qilish, mukammal ta’mirlash va jihozlash (to‘liq jihozlash)ning aniq manzilli ro‘yxatlarini shakllantirish va monitoring guruhlari hamda Qoraqalpog‘iston Respublikasi Xalq ta’limi vazirligi, viloyatlar va Toshkent shahar xalq ta’limi boshqarmalaridagi, shuningdek O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi hududiy boshqarmalaridagi tegishli shu’balar ishlab chiqiladigan baholash mezonlari asosida, ta’lim standartlari talablarini hisobga olgan holda, o‘quv jarayonida zamonaviy o‘quv-laboratoriya asbob-uskunalari, kompyuter texnikasi, mebellar va anjomlardan foydalanish samaradorligi monitoringi qat’iyan ta’minlanishi yuzasidan shaxsan javob beradilar.

O‘zbekiston Respublikasi Sog‘liqni saqlash vazirligi tuzilmasidagi tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ning aniq manzilli ro‘yxatlarini shakllantirish va monitoringni olib borish guruhi hamda Qoraqalpog‘iston Respublikasi Sog‘liqni saqlash vazirligi, viloyatlar va Toshkent shahar sog‘liqni saqlash boshqarmalaridagi tegishli sektorlar ishlab chiqilgan baholash mezonlari asosida sog‘liqni saqlash tizimida laboratoriya, tashxis va davolash uskunalari, maxsus mebel va anjomlar, kompyuter texnikasi hamda boshqa tibbiyot apparatlaridan foydalanish samaradorligi monitoringi qat’iy amalga oshirilishi yuzasidan shaxsan javob beradi.

36. Jamg‘arma mablag‘laridan tasdiqlangan xarajatlar smetalariga muvofiq qat’iyan maqsadli va samarali foydalanilishi yuzasidan javobgarlik Jamg‘arma mablag‘larini oluvchilar — Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi tegishli yagona buyurtmachi xizmatlari, Qoraqalpog‘iston Respublikasi Xalq ta’limi vazirligi, viloyatlar va Toshkent shahar xalq ta’limi boshqarmalari, Qoraqalpog‘iston Respublikasi Sog‘liqni saqlash vazirligi hamda viloyatlar va Toshkent shahar sog‘liqni saqlash boshqarmalari, O‘zbekiston Respublikasi Sog‘liqni saqlash vazirligining Qurilish bo‘yicha birlashgan direksiyasi shuningdek O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi hududiy boshqarmalari rahbarlari zimmasiga yuklanadi.

37. Jamg‘armani qayta tashkil etish va tugatish O‘zbekiston Respublikasi qonun hujjatlarida belgilangan tartibda amalga oshiriladi.

1. Ushbu Tartib O‘zbekiston Respublikasi Xalq ta’limi vazirligi, Sog‘liqni saqlash vazirligi, Oliy va o‘rta maxsus ta’lim vazirligining O‘rta maxsus, kasb-hunar ta’limi markazi, Iqtisodiyot vazirligi, Moliya vazirligi, boshqa manfaatdor vazirliklar va idoralar hamda ularning hududiy bo‘linmalarining, shuningdek Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining O‘zbekiston Respublikasi Moliya vazirligi huzuridagi Ta’lim va tibbiyot muassasalarini rekonstruksiya qilish, mukammal ta’mirlash va jihozlash jamg‘armasi (keyingi o‘rinlarda Jamg‘arma deb ataladi) mablag‘lari hisobiga ta’lim muassasalarini qurish, rekonstruksiya qilish, mukammal ta’mirlash va jihozlashning har yilgi dasturlarini ishlab chiqish va tasdiqlash borasidagi asosiy vazifalarini belgilaydi.

2. Tumanlar (shaharlar) xalq ta’limi muassasalari faoliyatini metodik ta’minlash va tashkil etish bo‘limlari:

ta’lim muassasalari binolari, infratuzilma obyektlarining texnik holati va jihozlanganligini muntazam ravishda doimiy o‘rganib boradilar;

kelgusi yilda rekonstruksiya qilinishi, mukammal ta’mirlanishi va jihozlanishi (to‘liq jihozlanishi) kerak bo‘lgan ta’lim muassasalari ro‘yxatini har yili 1-martgacha aniqlaydilar va Qoraqalpog‘iston Respublikasi Xalq ta’limi vazirligi, viloyatlar va Toshkent shahar xalq ta’limi boshqarmalariga kiritadilar.

3. Qoraqalpog‘iston Respublikasi Xalq ta’limi vazirligi, viloyatlar va Toshkent shahar xalq ta’limi boshqarmalari (tumanlar (shaharlar) xalq ta’limi muassasalari faoliyatini metodik ta’minlash va tashkil etish bo‘limlari tomonidan taqdim etilgan obyektlar ro‘yxati asosida), Qoraqalpog‘iston Respublikasi Sog‘liqni saqlash vazirligi, viloyatlar va Toshkent shahar sog‘liqni saqlash boshqarmalari hamda O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi hududiy boshqarmalari kelgusi yilda qurilishi, rekonstruksiya qilinishi, mukammal ta’mirlanishi va jihozlanishi (to‘liq jihozlanishi) kerak bo‘lgan ta’lim va tibbiyot muassasalarining dastlabki ro‘yxatini har yili 1-aprelgacha aniqlaydilar hamda Qoraqalpog‘iston Respublikasi Vazirlar Kengashiga, viloyatlar va Toshkent shahar hokimliklariga kiritadilar.

4. Qoraqalpog‘iston Respublikasi Vazirlar Kengashining Raisi, viloyatlar va Toshkent shahar hokimlari qarorlari bilan har yili 5-aprelgacha, ta’lim va tibbiyot muassasalarining taqdim etilgan dastlabki ro‘yxati asosida ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash) dasturlarini shakllantirish bo‘yicha ishchi guruhlar tuziladi.

Ishchi guruhlar tarkibiga Qoraqalpog‘iston Respublikasi Xalq ta’limi vazirligining, viloyatlar va Toshkent shahar xalq ta’limi boshqarmalarining, Qoraqalpog‘iston Respublikasi Sog‘liqni saqlash vazirligi, viloyatlar va Toshkent shahar sog‘liqni saqlash boshqarmalarining, shuningdek O‘zbekiston Respublikasi Oliy va o‘rta maxsus ta’lim vazirligi O‘rta maxsus, kasb-hunar ta’limi markazi hududiy boshqarmalarining, “Davarxitektqurilish” qo‘mitasi Davlat arxitektura-qurilish nazorati inspeksiyalarining, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmatlarining, Qoraqalpog‘iston Respublikasi Iqtisodiyot vazirligi hamda viloyatlar va Toshkent shahar iqtisodiyot boshqarmalarining, shuningdek moliya organlarining rahbarlari va mas’ul xodimlari kiritiladi.

5. Ishchi guruhlar ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ning har yilgi dasturlarini shakllantirishda har bir ta’lim va tibbiyot muassasasi binolarining amaldagi texnik holatini va ularning moddiy-texnika jihatidan ta’minlanganligini, shuningdek o‘quv korpuslarining o‘quv ustaxonalari va laboratoriyalari tashkil etish bilan kengaytirishga bo‘lgan ehtiyojini, sport zallari va maydonchalari, boshqa infratuzilma obyektlari tashkil etilishini hamda ularning tegishli asbob-uskunalar va anjomlar, shuningdek laboratoriya, tashxis, davolash uskunalari va boshqa tibbiy apparatlar, mebel va anjomlar bilan jihozlanishini hisobga oladilar.

6. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari har yili 1-iyungacha O‘zbekiston Respublikasi Xalq ta’limi vazirligi, Sog‘liqni saqlash vazirligi hamda Oliy va o‘rta maxsus ta’lim vazirligining O‘rta maxsus, kasb-hunar ta’limi markaziga ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ning dastlabki dasturlarini taqdim etadilar.

7. O‘zbekiston Respublikasi Xalq ta’limi vazirligi, Sog‘liqni saqlash vazirligi hamda Oliy va o‘rta maxsus ta’lim vazirligining O‘rta maxsus, kasb-hunar ta’limi markazi O‘zbekiston Respublikasi Iqtisodiyot vazirligi, “Davarxitektqurilish” qo‘mitasi, Moliya vazirligi bilan birgalikda ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ning taqdim etilgan dastlabki dasturlarini o‘rganadilar, zarurat bo‘lganda, joyning o‘ziga borgan holda ularni aniqlashtiradilar hamda har yili 1-iyulgacha Jamg‘armaning ijro etuvchi direksiyasiga viloyatlar va tumanlar (shaharlar) bo‘yicha ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ning keyingi yil uchun dasturini taqdim etadilar.

8. Ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash (to‘liq jihozlash)ning har yilgi dasturlarini shakllantirishda har bir ta’lim va tibbiyot muassasasining texnik holati, moddiy-texnika jihatidan amalda ta’minlanganligi, smenaliligi va o‘quvchilari soni hisobga olinadi hamda o‘quv-laboratoriya va ishlab chiqarish asbob-uskunalari, mebellar, sport anjomlari, o‘qitishning multimediy vositalari, kompyuter texnikasi, shuningdek tibbiyot uskunalari va boshqa asbob-uskunalarning asossiz ravishda hisobdan chiqarilishiga yo‘l qo‘yilmaydi.

9. Jamg‘armaning ijro etuvchi direksiyasi Jamg‘armaga tushayotgan mablag‘lar doirasida, O‘zbekiston Respublikasi Iqtisodiyot vazirligi bilan birgalikda Ta’lim va tibbiyot muassasalarini qurish, rekonstruksiya qilish, mukammal ta’mirlash va jihozlash dasturining yakuniy parametrlarini shakllantiradi hamda O‘zbekiston Respublikasi Investitsiya dasturi loyihasi kiritilishi bilan bog‘langan muddatlarda ko‘rib chiqish va tasdiqlash uchun Jamg‘armani boshqarish kengashiga kiritadi.