Zamonaviy talablar va xalqaro standartlarni hisobga olgan holda respublika taʼlim va tibbiyot muassasalarining moddiy-texnika bazasini tizimli asosda rivojlantirish hamda mustahkamlash, ularni eng ilgʻor oʻquv, tashxis va davolash uskunalari, axborot-kompyuter texnikasi bilan jihozlash, buning uchun jamlanadigan budjetdan tashqari va grant mablagʻlaridan oʻrinli hamda samarali foydalanish maqsadida:

1. Oʻzbekiston Respublikasi Moliya vazirligi, Iqtisodiyot vazirligi, Oliy va oʻrta maxsus taʼlim vazirligi, Xalq taʼlimi vazirligi hamda Sogʻliqni saqlash vazirligining 2012-yil 1-yanvaridan boshlab Oʻzbekiston Respublikasi Moliya vazirligi huzuridagi budjetdan tashqari Taʼlim muassasalarini rekonstruksiya qilish, mukammal taʼmirlash va jihozlash jamgʻarmasini Oʻzbekiston Respublikasi Moliya vazirligi huzuridagi budjetdan tashqari Taʼlim va tibbiyot muassasalarini rekonstruksiya qilish, mukammal taʼmirlash va jihozlash jamgʻarmasi etib qayta tashkil qilish toʻgʻrisidagi taklifi qabul qilinsin.

2. Oʻzbekiston Respublikasi Prezidentining 2010-yil 10-noyabrdagi PQ-1432-sonli qarorida avval belgilangan vazifalar bilan bir qatorda budjetdan tashqari budjetdan tashqari umumtaʼlim maktablari, kasb-hunar kollejlari, akademik litseylar va tibbiyot muassasalarini rekonstruksiya qilish, mukammal taʼmirlash va jihozlash jamgʻarmasining asosiy vazifalari etib quyidagilar belgilansin:

tasdiqlangan manzilli dasturlarga muvofiq sogʻliqni saqlash muassasalarini qurish, rekonstruksiya qilish va mukammal taʼmirlash boʻyicha ishlarni moliyalashtirish;

zamonaviy talablar va belgilangan normativlardan kelib chiqqan holda tibbiyot muassasalarini eng yangi laboratoriya, tashxis va davolash uskunalari, kompyuter texnikasi hamda boshqa tibbiyot apparatlari, maxsus mebel va anjomlar bilan jihozlash hamda doimiy asosda tizimli qayta jihozlashni moliyalashtirish.

3. Belgilab qoʻyilsinki, qayta tashkil etilayotgan budjetdan tashqari Umumtaʼlim maktablari, kasb-hunar kollejlari, akademik litseylar muassasalarini rekonstruksiya qilish, mukammal taʼmirlash va jihozlash jamgʻarmasining barcha aktivlari va passivlari 2012-yilning 1-yanvaridan boshlab Oʻzbekiston Respublikasi Moliya vazirligi huzuridagi budjetdan tashqari Umumtaʼlim maktablari, kasb-hunar kollejlari, akademik litseylar va tibbiyot muassasalarini rekonstruksiya qilish, mukammal taʼmirlash va jihozlash jamgʻarmasiga topshiriladi.

4. Quyidagilar Jamgʻarmaning daromadlarini shakllantirish manbalari etib belgilansin:

xoʻjalik yurituvchi subyektlar tomonidan Jamgʻarmaga qonun hujjatlarida belgilangan tartibda majburiy ajratmalarni toʻlashdan tushadigan mablagʻlar;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining budjetdan tashqari mablagʻlari;

xalqaro moliya institutlari hamda boshqa xorijiy donorlarning imtiyozli kreditlari (qarzlari) va grantlari;

sogʻliqni saqlash sohasi va markazlashtirilgan investitsiyalar xarajatlari hisobiga alohida boʻlim bilan ajratiladigan Oʻzbekiston Respublikasi Davlat budjeti mablagʻlari;

xayriya qiluvchilar — yuridik va jismoniy shaxslar, shu jumladan Oʻzbekiston Respublikasi norezidentlarining mablagʻlari;

Jamgʻarmaning vaqtincha boʻsh mablagʻlarini joylashtirishdan olinadigan daromadlar va qonun hujjatlarida taqiqlanmagan boshqa tushumlar.

5. Quyidagilar:

budjetdan tashqari umumtaʼlim maktablari, kasb-hunar kollejlari, akademik litseylar va tibbiyot muassasalarini rekonstruksiya qilish, mukammal taʼmirlash va jihozlash jamgʻarmasini boshqarish boʻyicha Kengash tarkibi 1-ilovaga* muvofiq;

Oʻzbekiston Respublikasi Moliya vazirligi markaziy apparatining boshqaruv xodimlari soni doirasida, Oʻzbekiston Respublikasi Moliya vazirligining markaziy apparati tarkibida boshqaruv xodimlari soni 9 nafardan iborat Jamgʻarma Ijroiya direksiyasining tuzilmasi 2-ilovaga* muvofiq tasdiqlansin.

6. Oʻzbekiston Respublikasi Sogʻliqni saqlash vazirligi tuzilmasining markaziy apparatida boshqaruv xodimlari soni 3 nafardan iborat tibbiyot muassasalarini qurish, mukammal taʼmirlash va jihozlash (toʻliq jihozlash) manzilli roʻyxatlarini shakllantirish va monitoring qilish boʻyicha guruh hamda Qoraqalpogʻiston Respublikasi Sogʻliqni saqlash vazirligi, viloyatlar va Toshkent shahar sogʻliqni saqlash boshqarmalarida belgilangan boshqaruv xodimlari umumiy soni doirasida 2 nafar xodimdan iborat tegishli shuʼbalar tashkil qilinsin.

7. Shunday tartib oʻrnatilsinki, unga muvofiq:

Oʻzbekiston Respublikasi Sogʻliqni saqlash vazirligi Qoraqalpogʻiston Respublikasi Vazirlar Kengashining, viloyatlar va Toshkent shahar hokimliklarining ishtirokida har yili hududlar boʻyicha tibbiyot muassasalarini qurish, rekonstruksiya qilish, mukammal taʼmirlashga oid takliflarni shakllantiradi hamda Oʻzbekiston Respublikasining Investitsiya dasturini tasdiqlash uchun belgilangan muddatdan uch oy oldin mana shu takliflarni Oʻzbekiston Respublikasi Iqtisodiyot vazirligiga kiritadi;

Oʻzbekiston Respublikasi Moliya vazirligi Jamgʻarmaga kelib tushadigan mablagʻlar doirasida Iqtisodiyot vazirligi bilan birgalikda Tibbiyot muassasalarini qurish, rekonstruksiya qilish, mukammal taʼmirlash Dasturining uzil-kesil parametrlarini shakllantiradi hamda uni Oʻzbekiston Respublikasi Davlat budjetining loyihasi kiritiladigan muddatlarda Vazirlar Mahkamasiga taqdim etadi;

Tibbiyot muassasalarini qurish, rekonstruksiya qilish, mukammal taʼmirlash Dasturi har yili tasdiqlanadigan Investitsiya dasturiga mustaqil boʻlim sifatida kiritiladi.

8. Quyidagilar:

Qoraqalpogʻiston Respublikasi budjeti, viloyatlar va Toshkent shahar mahalliy budjetlari hisobidan taʼminlanadigan sogʻliqni saqlash muassasalarini qurish, rekonstruksiya qilish va mukammal taʼmirlash boʻyicha buyurtmachi vazifasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi yagona buyurtmachi xizmati zimmasiga, Oʻzbekiston Respublikasining respublika budjeti mablagʻlari hisobidan taʼminlanadiganlari esa Oʻzbekiston Respublikasi Sogʻliqni saqlash vazirligining qurilish boʻyicha Birlashgan direksiyasi zimmasiga;

tibbiyot muassasalarini jihozlash (toʻliq jihozlash) boʻyicha buyurtmachi vazifasi, berilgan vakolatlar doirasida, Oʻzbekiston Respublikasi Sogʻliqni saqlash vazirligi zimmasiga yuklansin.

9. Oʻzbekiston Respublikasi Moliya vazirligi manfaatdor vazirliklar va idoralar bilan hamkorlikda bir oy muddatda Oʻzbekiston Respublikasi Vazirlar Mahkamasiga:

Oʻzbekiston Respublikasi Moliya vazirligi huzuridagi Taʼlim va tibbiyot muassasalarini rekonstruksiya qilish, mukammal taʼmirlash va jihozlash jamgʻarmasining 2012-yilgi daromadlari va xarajatlarining yangilangan parametrlarini, shuningdek tibbiyot muassasalarini qurish, rekonstruksiya qilish va mukammal taʼmirlashning 2012-yilgi Dasturini;

qonun hujjatlariga mazkur qarordan kelib chiqadigan oʻzgartish va qoʻshimchalar toʻgʻrisidagi takliflarni kiritsin.

10. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.