“O‘zbekiston Respublikasida ma’muriy-hududiy tuzilish, toponimik obyektlarga nom berish va ularning nomlarini o‘zgartirish masalalarini hal etish tartibi to‘g‘risida”gi O‘zbekiston Respublikasi Qonunining 12-moddasiga muvofiq hamda O‘zbekiston Respublikasi Prezidentining “O‘zbekiston Respublikasi aholi punktlarining ma’muriy-hududiy tuzilishini yanada takomillashtirish chora-tadbirlari to‘g‘risida” 2005-yil 14-iyuldagi PQ-120-son qarorini bajarish yuzasidan Vazirlar Mahkamasi qaror qiladi:

1. Qoraqalpog‘iston Respublikasi Jo‘qorg‘i Kengesi va xalq deputatlari viloyat Kengashlarining qarorlari bilan ilovaga* muvofiq qishloq aholi punktlari shahar posyolkalari toifasiga kiritilganligi ma’lumot uchun qabul qilinsin.

2. Qoraqalpog‘iston Respublikasi Vazirlar Kengashi, viloyatlar hokimliklari:

manfaatdor tashkilotlar bilan birgalikda aholi punktlari toifalarining o‘zgartirilishi bilan bog‘liq ijtimoiy, iqtisodiy va huquqiy tadbirlarning amalga oshirilishini ta’minlasinlar;

shahar posyolkalari toifasiga kiritilgan aholi punktlariga nisbatan qo‘yiladigan shaharsozlik talablariga rioya etilishini ta’minlasinlar va muhandislik, transport hamda ijtimoiy infratuzilmalarni oqilona joylashtirish masalalarini hal etish bo‘yicha tadbirlarni ikki oy muddatda belgilasinlar;

shahar posyolkalari toifasiga kiritilgan aholi punktlari nomlarini “O‘zbekiston Respublikasida ma’muriy-hududiy tuzilish, toponimik obyektlarga nom berish va ularning nomlarini o‘zgartirish masalalarini hal etish tartibi to‘g‘risida”gi O‘zbekiston Respublikasi Qonunining 17-moddasi talablariga muvofiqlashtirish bo‘yicha bir oy muddatda chora-tadbirlar ko‘rsinlar.

3. O‘zbekiston Respublikasi Davlat statistika qo‘mitasi ushbu qarorga muvofiq, ilovaga kiritilgan qishloqlar va shaharlar aholi punktlarining statistik ko‘rsatkichlariga ikki hafta muddatda, belgilangan tartibda zarur o‘zgartirishlar kiritsin.

4. Qoraqalpog‘iston Respublikasi Vazirlar Kengashi, viloyatlar hokimliklari O‘zbekiston Respublikasi Mehnat va aholini ijtimoiy muhofaza qilish vazirligi, Sog‘liqni saqlash vazirligi va Moliya vazirligi bilan birgalikda, qishloq aholi punktlarining shahar posyolkalari toifasiga kiritilishi munosabati bilan, vrachlar, provizorlar, o‘rta tibbiyot va farmatsevtika xodimlariga ish haqi tayinlashda hamda ular pensiyaga chiqqanida O‘zbekiston Respublikasi Prezidentining “O‘zbekiston Respublikasi aholi punktlarining ma’muriy-hududiy tuzilishini yanada takomillashtirish chora-tadbirlari to‘g‘risida” 2005-yil 14-iyuldagi PQ–120-son qarorining 5-bandida nazarda tutilgan imtiyozlarning qo‘llanishini ta’minlasinlar.

5. O‘zbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda:

qonun hujjatlariga ushbu qarordan kelib chiqadigan o‘zgartirishlar va qo‘shimchalar to‘g‘risida Vazirlar Mahkamasiga takliflar kiritsin;

idoraviy normativ hujjatlarning ushbu qarorga muvofiqlashtirilishini ta’minlasin.

6. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari R.S. Qosimov zimmasiga yuklansin.