O‘zbekiston Respublikasi Prezidentining “Tijorat banklari depozitlariga aholi va xo‘jalik subyektlari bo‘sh mablag‘larini jalb etishni yanada rag‘batlantirish qo‘shimcha chora-tadbirlari to‘g‘risida” 2009-yil 6-apreldagi PQ-1090-son qaroriga muvofiq Vazirlar Mahkamasi qaror qiladi:

1. O‘zbekiston Respublikasi Hukumatining ilovaga muvofiq ayrim qarorlariga o‘zgartirish va qo‘shimchalar kiritilsin.

2. O‘zbekiston Respublikasi Markaziy bankiga Davlat soliq qo‘mitasi bilan birgalikda To‘lov terminallari bilan jihozlash va aholi bilan pul hisob-kitoblarini amalga oshirishda ularni qo‘llash tartibi to‘g‘risidagi Nizomni bir oy muddatda belgilangan tartibda tasdiqlash tavsiya qilinsin.

3. Vazirliklar va idoralar bir oy muddatda o‘z normativ-huquqiy hujjatlarini ushbu qarorga muvofiqlashtirsinlar.

4. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S.Azimov zimmasiga yuklansin.

1. Vazirlar Mahkamasining “Naqd pul muomalasini mustahkamlash va tijorat banklarining mas’uliyatini oshirishga doir qo‘shimcha chora-tadbirlari to‘g‘risida” 2001-yil 22-iyundagi 264-son qarori (O‘zbekiston Respublikasi QT, 2001-y., 6-son, 31-modda) 3-bandining ikkinchi xatboshi quyidagi tahrirda bayon qilinsin:

“belgilangan savdo qoidalari buzilgan, nazorat-kassa mashinalaridan foydalanilmagan, to‘lovlarni plastik kartochkalar bo‘yicha qabul qilish terminallari bilan jihozlash va to‘lovni plastik kartochkalardan foydalangan holda qabul qilishga doir belgilangan talablar buzilgan, shuningdek naqd pul mablag‘lari bank kassalariga o‘z vaqtida topshirilmagan hollarda shaharlar va tumanlar hokimliklari soliq organlarining taqdimnomasiga ko‘ra chakana savdo uchun berilgan ruxsatnomalarning amal qilishini o‘n ish kunidan ortiq bo‘lmagan muddatga to‘xtatib qo‘yadi yoxud o‘n ish kunidan ortiq muddatga to‘xtatib qo‘yish yoki ruxsatnomalarni bekor qilish to‘g‘risida sudga murojaat qiladi”.

2. Vazirlar Mahkamasining 2002-yil 26-noyabrdagi 407-son qarori (O‘zbekiston Respublikasi QT, 2002-y., 11-son, 71-modda) bilan tasdiqlangan Ulgurji va chakana savdo faoliyatini ro‘yxatdan o‘tkazish va amalga oshirish tartibi to‘g‘risidagi Nizomda:

a) 19-bandga quyidagi mazmundagi ikkinchi xatboshi qo‘shilsin:

“Savdo zalining maydoni 150 kv metrdan ortiq bo‘lgan turg‘un savdo shoxobchalarida to‘lovni plastik kartochkalardan foydalangan holda amalga oshirish uchun to‘lovlarni plastik kartochkalar bo‘yicha qabul qilish terminallarining mavjudligi ta’minlanishi kerak”;

b) 30-bandga quyidagi mazmundagi xatboshi qo‘shilsin:

“Savdo zalining maydoni 150 kv metrdan ortiq bo‘lgan turg‘un savdo shoxobchalarida to‘lovni plastik kartochkalardan foydalangan holda amalga oshirish uchun to‘lovlarni plastik kartochkalar bo‘yicha qabul qilish terminallarining mavjudligi ta’minlanishi kerak”;

3. Vazirlar Mahkamasining “O‘zbekiston Respublikasida chakana savdo qoidalarini hamda O‘zbekiston Respublikasida umumiy ovqatlanish mahsulotlarini (xizmatlarini) ishlab chiqarish va sotish qoidalarini tasdiqlash to‘g‘risida” 2003-yil 13-fevraldagi 75-son qarorida (O‘zbekiston Respublikasi QT, 2003-y., 2-son, 15-modda):

a) 1-ilovada:

21-bandga quyidagi mazmundagi xatboshi qo‘shilsin:

“Savdo zalining maydoni 150 kv metrdan ortiq bo‘lgan turg‘un savdo shoxobchalarida to‘lovni plastik kartochkalardan foydalangan holda amalga oshirish uchun to‘lovlarni plastik kartochkalar bo‘yicha qabul qilish terminallarining mavjudligi ta’minlanishi kerak”;

189-bandda:

to‘rtinchi xatboshi quyidagi tahrirda bayon qilinsin:

“tovarlar, mahsulotlarni (xizmatlarni) chek (kvitansiya, schyot) bermasdan sotish”;

o‘ninchi xatboshi quyidagi mazmundagi o‘ninchi va o‘n birinchi xatboshi bilan almashtirilsin:

“quyidagilarga:

to‘lov terminallari bilan jihozlash va pul hisob-kitoblarini amalga oshirishda ularni qo‘llash tartibiga”;

o‘n birinchi—yigirmanchi xatboshi tegishli ravishda o‘n ikkinchi — yigirma birinchi xatboshi deb hisoblansin;

b) 2-ilovada:

14-bandga quyidagi mazmundagi to‘rtinchi xatboshi qo‘shilsin:

“Barcha restoranlarda, shuningdek ish haqi plastik kartochkalardan foydalangan holda to‘lanadigan korxonalar va muassasalar huzuridagi umumiy ovqatlanish obyektlarida to‘lovni plastik kartochkalardan foydalangan holda amalga oshirish uchun to‘lovlarni plastik kartochkalar bo‘yicha qabul qilish terminallarining mavjudligi ta’minlanishi kerak”;

to‘rtinchi xatboshi beshinchi xatboshi deb hisoblansin;

25-bandda:

to‘rtinchi xatboshi quyidagi tahrirda bayon qilinsin:

“tovarlar, mahsulotlarni (xizmatlarni) chek (kvitansiya, schyot) bermasdan sotish”;

yettinchi xatboshi quyidagi mazmundagi yettinchi va sakkizinchi xatboshi bilan almashtirilsin:

“quyidagilarga:

to‘lov terminallari bilan jihozlash va pul hisob-kitoblarini amalga oshirishda ularni qo‘llash tartibiga”;

sakkizinchi—o‘n to‘rtinchi xatboshi tegishli ravishda to‘qqizinchi — o‘n beshinchi xatboshi deb hisoblansin.