Oʻzbekiston Respublikasi Prezidentining 2006-yil 18-dekabrdagi PQ-532-son “Oʻzbekiston Respublikasining 2007-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida” (Oʻzbekiston Respublikasi qonun hujjatlari toʻplami, 2007-y., 51-52-son, 507-modda) gi qaroriga muvofiq Oʻzbekiston Respublikasi Moliya vazirligi va Davlat soliq qoʻmitasi qaror qiladi:

1. Ilova qilinayotgan Oʻsimlik (paxta) yogʻi uchun toʻlanadigan aksiz soligʻining bir qismini Yogʻ-moy va oziq-ovqat sanoati uyushmasining maxsus hisobvaragʻiga oʻtkazish tartibi toʻgʻrisidagi nizom tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilganidan soʻng oʻn kundan keyin kuchga kiradi.

Mazkur Nizom Oʻzbekiston Respublikasi Prezidentining 2006-yil 18-dekabrdagi PQ-532-son “Oʻzbekiston Respublikasining 2007-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida” (Oʻzbekiston Respublikasi qonun hujjatlari toʻplami, 2006-y., 51-52-son, 507-modda)gi qaroriga muvofiq, Yogʻ-moy va oziq-ovqat sanoati uyushmasi korxonalarining Oʻzbekiston Respublikasi kafolati asosida jalb qilingan kreditlarini soʻndirish uchun oʻsimlik (paxta) yogʻi ishlab chiqaruvchi korxonalardan olinadigan aksiz soligʻining bir qismini Yogʻ-moy va oziq-ovqat sanoati uyushmasining maxsus hisobvaragʻiga (keyingi oʻrinlarda — Maxsus hisobvaraq) oʻtkazib berish tartibini belgilaydi.

1. Yogʻ-moy va oziq-ovqat sanoati uyushmasining Maxsus hisobvaragʻiga oʻtkazib beriladigan aksiz soligʻi bir qismining miqdori oʻsimlik (paxta) yogʻiga hisoblanadigan umumiy aksiz soligʻi va shundan budjetga toʻlanadigan aksiz soligʻi oʻrtasidagi farqidan kelib chiqadi.

Maxsus hisobvaraqqa va Davlat budjetiga oʻtkaziladigan oʻsimlik (paxta) yogʻiga hisoblanadigan aksiz soligʻi stavkasining miqdori Oʻzbekiston Respublikasi Prezidentining qaroriga muvofiq belgilanadi.

2. Korxonalar oʻsimlik (paxta) yogʻini, salomas va “Oʻzbekiston” yogʻini ishlab chiqarish uchun ishlatiladigan yogʻ bundan mustasno, sotishdan umumiy hisoblangan aksiz soligʻining toʻlov topshiriqnomasini aksiz soligʻini toʻlash muddatlarida xizmat koʻrsatuvchi bankka yuboradi. Toʻlov topshiriqnomasida aksiz soligʻining umumiy summasi bilan birga budjetga hamda Maxsus hisobvaraqqa oʻtkaziladigan aksiz soligʻining summasi belgilangan miqdorda alohida ajratilib koʻrsatilishi shart. Bunda, Maxsus hisobvaraqqa oʻtkaziladigan aksiz soligʻining summasi koʻrsatilmagan toʻlov topshiriqnomasini xizmat koʻrsatuvchi bankka ijro uchun topshirishga yoʻl qoʻyilmaydi.

3. Yogʻ-moy va oziq-ovqat sanoati uyushmasi oy yakunida Maxsus hisobvaraqda jamlangan aksiz soligʻi summasini Oʻzbekiston Respublikasi Moliya vazirligi bilan kelishilgan holda Oʻzbekiston Respublikasi kafolati bilan jalb qilingan kreditni soʻndirish uchun hisobot oyidan keyingi oyning 10-kunidan kechiktirmay “MT Invest-Impeks” respublika tashqi savdo firmasining TIF Milliy banki Toshkent shahar Bosh boshqarmasidagi MFO 00451, INN 201292107, 20210000300429574006 raqamli maxsus hisobvaragʻiga oʻtkazadi.

4. “MT Invest-Impeks” respublika tashqi savdo firmasi har oyda hisobot oyidan keyingi oyning 12-kunidan kechiktirmay maxsus hisobvaraqqa kelib tushgan mablagʻlarni konvertatsiya qilish uchun yoʻnaltiradi.

Konvertatsiya qilingan mablagʻlar ikki bank ishi kunida Hukumat kafolati bilan jalb qilingan kreditlarni soʻndirishga yoʻnaltiriladi.

5. Oʻsimlik (paxta) yogʻi sotishni amalga oshiruvchi korxonalar Maxsus hisobvaraqqa oʻtkaziladigan aksiz soligʻining bir qismini toʻgʻri hisoblanishiga qonun hujjatlariga muvofiq javobgar boʻladi.

6. Maxsus hisobvaraqdagi mablagʻni ushbu Nizomda koʻzda tutilmagan boshqa maqsadlar uchun ishlatish taqiqlanadi.

7. Yogʻ-moy va oziq-ovqat sanoati uyushmasi, “MT Invest-Impeks” respublika tashqi savdo firmasining maʼlumotiga muvofiq, har chorak yakuni boʻyicha keyingi oyning 15-kunigacha Oʻzbekiston Respublikasi Moliya vazirligiga Oʻzbekiston Respublikasi kafolati bilan jalb qilingan kreditlarni soʻndirilishi toʻgʻrisida maʼlumotnoma taqdim qiladi.

8. Oʻsimlik (paxta) yogʻi uchun toʻlanadigan aksiz soligʻining bir qismini oʻtkazilishining belgilangan tartibiga rioya qilinishi ustidan nazorat Yogʻ-moy va oziq-ovqat sanoati uyushmasi rahbariyati zimmasiga va ushbu mablagʻlardan foydalanishdagi javobgarlik “MT Invest-Impeks” respublika tashqi savdo firmasiga yuklatiladi.

9. Mazkur Nizom Yogʻ-moy va oziq-ovqat sanoati uyushmasi bilan kelishilgan.