Oʻzbekiston Respublikasi Vazirlar Mahkamasining
qarori
Davlat daromadiga olingan mol-mulklarni soddalashtirilgan auksion tamoyillari asosida “E-auksion shop” elektron savdo doʻkoni orqali sotish tartibi toʻgʻrisida
Oʻzbekiston Respublikasi Prezidentining “Davlat aktivlarini boshqarish agentligi faoliyatini samarali tashkil etish chora-tadbirlari toʻgʻrisida” 2023-yil 24-martdagi PQ-101-son qarori ijrosini taʼminlash maqsadida Vazirlar Mahkamasi qaror qiladi:
1. Davlat aktivlarini boshqarish agentligining davlat daromadiga olingan mol-mulklarni (oziq-ovqat mahsulotlari, avtomototransport, koʻchmas mulk va qonunchilik hujjatlarida belgilangan boshqa mulkiy huquqlar bundan mustasno) soddalashtirilgan auksion tamoyillari asosida sotish maqsadida “E-auksion” elektron savdo platformasida “E-auksion shop” elektron savdo doʻkoni faoliyatini yoʻlga qoʻyish toʻgʻrisidagi taklifiga rozilik berilsin.
 LexUZ sharhi
Qarang: Vazirlar Mahkamasining 2009-yil 15-iyuldagi 200-sonli qarori bilan tasdiqlangan Davlat daromadiga oʻtkaziladigan mol-mulkni olib qoʻyish, sotish yoki yoʻq qilib tashlash tartibi toʻgʻrisidagi nizom.
2. Quyidagilarni nazarda tutuvchi Davlat daromadiga olingan mol-mulklarni soddalashtirilgan auksion tamoyillari asosida “E-auksion shop” elektron savdo doʻkoni orqali sotish tartibi toʻgʻrisidagi nizom ilovaga muvofiq tasdiqlansin:
“E-auksion” elektron savdo platformasida roʻyxatdan oʻtish, buyurtma yaratish va savdo oʻtkazilishi toʻgʻrisidagi xabarnomani joylashtirish;
“E-auksion shop” elektron savdo doʻkonida soddalashtirilgan auksion tamoyillari asosida savdolarni tashkil etish va oʻtkazish;
“E-auksion shop” elektron savdo doʻkonida takroriy savdolarni oʻtkazish;
Oldingi tahrirga qarang.
savdo gʻolibi (zaxiradagi gʻolib) bilan hisob-kitob qilish va zakalat pulini qaytarish.
(2-bandning beshinchi xatboshisi Oʻzbekiston Respublikasi Vazirlar Mahkamasining 2025-yil 21-apreldagi 247-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/247/0383-son)
 LexUZ sharhi
Qarang: Vazirlar Mahkamasining 2022-yil 12-yanvardagi 18-sonli “Elektron onlayn-auksion va tanlovlarni tashkil etish hamda oʻtkazish tartibini takomillashtirish boʻyicha qoʻshimcha chora-tadbirlar toʻgʻrisida”gi qarori.
3. Davlat aktivlarini boshqarish agentligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
4. Raqobatni rivojlantirish va isteʼmolchilar huquqlarini himoya qilish qoʻmitasi Raqamli texnologiyalar vazirligi, Davlat aktivlarini boshqarish agentligi bilan birgalikda 2024-yil 1-sentabrga qadar davlat daromadiga olingan mol-mulklarni soddalashtirilgan auksion tamoyillari asosida sotishning xususiy operatorlar tomonidan tashkil etilishi maqsadga muvofiqligi yuzasidan Vazirlar Mahkamasiga taklif kiritsin.
5. Ushbu qaror rasmiy eʼlon qilingan kundan eʼtiboran uch oy oʻtgach kuchga kiradi.
6. Mazkur qarorning bajarilishini nazorat qilish Oʻzbekiston Respublikasi Davlat aktivlarini boshqarish agentligi direktori A.J. Ortiqov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 4-oktabr,
526-son
Vazirlar Mahkamasining 2023-yil 4-oktabrdagi 526-son qaroriga
ILOVA
Davlat daromadiga olingan mol-mulklarni soddalashtirilgan auksion tamoyillari asosida “E-auksion shop” elektron savdo doʻkoni orqali sotish tartibi toʻgʻrisidagi
NIZOM
1-bob. Umumiy qoidalar
1. Ushbu Nizom davlat daromadiga olingan mol-mulklarni (oziq-ovqat mahsulotlari, avtomototransport, koʻchmas mulk va qonunchilik hujjatlarida belgilangan boshqa mulkiy huquqlar bundan mustasno) soddalashtirilgan auksion tamoyillari asosida “E-auksion shop” elektron savdo doʻkoni orqali sotish tartibini belgilaydi.
2. Ushbu Nizomda quyidagi asosiy tushunchalardan foydalaniladi:
“E-auksion shop” elektron savdo doʻkoni (keyingi oʻrinlarda — elektron doʻkon) — davlat daromadiga olingan mol-mulklarni sotish boʻyicha elektron savdolarni tashkil etish va oʻtkazishni taʼminlovchi “E-auksion” elektron savdo platformasidagi (keyingi oʻrinlarda — savdo platformasi) elektron doʻkon;
buyurtmachi — Oʻzbekiston Respublikasi Bosh prokuraturasi huzuridagi Majburiy ijro byurosi va uning hududiy tuzilmalari (keyingi oʻrinlarda — Byuro) tomonidan belgilangan tartibda tanlab olingan savdo tashkilotlari hamda “Bojxona-servis” davlat muassasasi va (yoki) uning hududiy boʻlimlari;
lot — buyurtmachi tomonidan sotish uchun elektron doʻkonga qoʻyilgan savdo obyekti;
operator — elektron doʻkonda elektron onlayn-savdoni tashkil etish va oʻtkazishga vakolatli boʻlgan “Elektron onlayn-auksionlarni tashkil etish” AJ;
savdo ishtirokchisi (keyingi oʻrinlarda — ishtirokchi) — elektron doʻkon orqali elektron onlayn-savdoda ishtirok etish uchun elektron ariza bergan yuridik yoki jismoniy shaxs;
savdo obyekti — elektron doʻkon orqali sotiladigan davlat daromadiga olingan mol-mulklar (oziq-ovqat mahsulotlari, avtomototransport, koʻchmas mulk va qonunchilik hujjatlarida belgilangan boshqa mulkiy huquqlar bundan mustasno);
savdo qadami — savdo obyekti boshlangʻich narxiga nisbatan belgilanadigan foiz;
savdo platformasidagi texnik uzilish — elektron onlayn-savdo savdo jarayonida bir yoki bir nechta ishtirokchining qatnashishini yoki mazkur Nizom talablari asosida operatorning xizmat koʻrsatish imkoniyatini cheklaydigan savdo platformasidagi, shu jumladan, elektron doʻkondagi texnik nosozliklar;
xabarnoma — elektron doʻkonda muayyan lot boʻyicha elektron onlayn-savdo oʻtkazilishi toʻgʻrisidagi maʼlumot;
shaxsiy kabinet — buyurtmachi yoki ishtirokchiga savdo platformasidagi elektron onlayn-savdoda buyurtma berish, qatnashish, shaxsiy hisobvaraqni boshqarish, uning holati va boshqa statistik maʼlumotlarni koʻrish hamda operator tomonidan yuborilayotgan xabarlar bilan tanishib borish imkonini beruvchi savdo platformasining maxsus boʻlimi;
elektron onlayn-savdo (keyingi oʻrinlarda — savdo) — elektron doʻkon orqali savdo obyekti narxini oshirib borish tamoyili asosida oʻtkaziladigan elektron savdo usuli.
3. Davlat daromadiga olingan mol-mulklarning elektron savdolarini tashkil etish va oʻtkazish mazkur Nizomga ilovada keltirilgan sxemaga muvofiq amalga oshiriladi.
4. Savdoni tashkil etish hamda oʻtkazish doirasida operatorning majburiyatlari quyidagilardan iborat:
savdoni belgilangan vaqtda tashkil etish va oʻtkazish;
elektron doʻkonda savdolarni inson omili aralashuvisiz oʻtkazilishini taʼminlash.
5. Savdoda ishtirok etish uchun buyurtmachi va ishtirokchi savdo platformasida roʻyxatdan oʻtadi.
Savdo platformasida roʻyxatdan oʻtishda buyurtmachi va ishtirokchining pasport yoki ID-karta maʼlumotlari, STIRi, yuridik manzili, bank rekvizitlari, buyurtmachi va ishtirokchi rahbari (yoki vakolatli shaxs)ning pasport yoki ID-karta hamda aloqa maʼlumotlari koʻrsatiladi.
Roʻyxatdan oʻtish va shaxsni identifikatsiya qilish tegishli maʼlumotlar toʻldirilib, elektron raqamli imzo (keyingi oʻrinlarda — ERI) yoki savdo platformasida yaratilgan maxsus identifikatsiyalash (Yagona identifikatsiya tizimi (OneID), Mobile-ID, MyID) orqali tasdiqlangandan soʻng amalga oshiriladi.
6. Roʻyxatdan oʻtish jarayonida buyurtmachi va ishtirokchi savdoni oʻtkazish tartibi bilan tanishgani, savdo platformasining, shu jumladan, elektron doʻkonning oʻziga xos jihatlari va tartib-taomillarini qabul qilganligi yuzasidan operator bilan elektron savdolarni tashkil etish va oʻtkazish boʻyicha elektron shartnoma (oferta)ni ERI yoki maxsus identifikatsiyalash (Yagona identifikatsiya tizimi (OneID), Mobile-ID, MyID) orqali imzolaydi.
Savdo platformasida roʻyxatdan oʻtmagan shaxs savdoni oʻtkazish uchun buyurtma bera olmaydi va savdolarda ishtirok eta olmaydi.
Roʻyxatdan oʻtgan buyurtmachi va ishtirokchiga savdo platformasida shaxsiy kabinet ochiladi.
7. Savdoda ishtirok etish uchun zakalat puli mol-mulk boshlangʻich narxining 5 foizi miqdorida belgilanadi va tegishli miqdordagi mablagʻ operatorning bank hisobvaragʻiga oʻtkaziladi.
8. Bojxona organlari, Byuro va boshqa organlar tomonidan savdo obyekti bir vaqtning oʻzida sotish uchun bir nechta buyurtmachilarga berilishi mumkin emas.
9. Bojxona organlari, Byuro va boshqa organlar bilan buyurtmachi oʻrtasida tuziladigan shartnomada tomonlarning savdo obyektini ikki ish kunida savdoga chiqarish va ishtirokchilarga koʻrsatish uchun sharoitlar yaratish, toʻliq va but holatda saqlash, bir kundan oshmagan muddatda savdo gʻolibiga topshirilishini taʼminlash boʻyicha majburiyatlari nazarda tutiladi.
10. Buyurtmachi operator bilan elektron doʻkonda savdolar oʻtkazish boʻyicha xizmatlar koʻrsatish yuzasidan savdo platformasi orqali shartnoma tuzadi.
2-bob. Buyurtmani yaratish va joylashtirish tartibi
11. Savdo obyekti savdoga buyurtmachi tomonidan savdo platformasi orqali yuborilgan buyurtmaga asosan chiqariladi.
12. Buyurtmaga quyidagi maʼlumotlar va hujjatlar ilova qilinadi:
savdo obyekti nomi;
savdo obyektining boshlangʻich narxi;
savdo obyektini tavsiflovchi maʼlumotlar;
buyurtmachining manzili va telefon (mavjud boʻlganda mobil) raqami;
savdo obyekti joylashgan manzil, fotosurat (kamida 3 ta) va geolokatsiyasi;
ijro hujjatining nusxasi;
mol-mulkni xatlash (roʻyxatga olish) dalolatnomasining nusxasi;
mol-mulkni tavsiflovchi hujjatlar va (yoki) baholash toʻgʻrisidagi xulosa nusxalari;
sertifikatlanishi shart boʻlgan tovarlar boʻyicha muvofiqlik sertifikatlari;
buyurtmachi tomonidan taqdim etilgan qoʻshimcha maʼlumotlar (agar mavjud boʻlsa).
13. Agar buyurtmaga ushbu Nizomning 12-bandida nazarda tutilgan maʼlumotlar kiritilmagan va/yoki tegishli hujjatlar ilova qilinmagan boʻlsa, operator buyurtmani olgan kunidan keyingi ikki ish kunidan kechiktirmay buyurtmani savdo platformasi orqali buyurtmachiga qaytaradi.
Buyurtmachi operator tomonidan koʻrsatilgan kamchiliklarni bir hafta muddat ichida bartaraf etib, buyurtmani qayta yuborishga haqli.
14. Buyurtmachi buyurtmani ishtirokchi tomonidan narx tasdiqlangunga qadar savdo platformasi orqali elektron soʻrov berish yoʻli bilan savdodan olishi mumkin. Bunda savdodan olish avtomatik tarzda amalga oshiriladi. Savdoda narx tasdiqlangandan soʻng elektron soʻrov qabul qilinmaydi va savdoni oʻtkazish tartib-taomillari davom ettiriladi.
3-bob. Savdo oʻtkazilishi toʻgʻrisidagi xabarnomani joylashtirish
15. Buyurtmachi tomonidan taqdim etilgan buyurtma va unga ilova qilingan maʼlumot hamda hujjatlar belgilangan talablarga muvofiq boʻlgan taqdirda, operator buyurtmani olgan kundan keyingi ikki ish kunidan kechiktirmay savdo oʻtkazilishi toʻgʻrisidagi xabarnomani elektron doʻkonda eʼlon qiladi.
Operator buyurtmada koʻrsatilgan maʼlumotlarning va unga ilova qilingan hujjatlarning haqqoniyligi uchun javobgar hisoblanmaydi.
16. Savdo xabarnoma elektron doʻkonda eʼlon qilingan kundan keyingi ish kuni soat 10:00 da boshlanadi va besh ish kuni davomida, oxirgi ish kuni soat 18:00 ga qadar oʻtkaziladi.
Tegishli lot boʻyicha savdo boshlanganidan soʻng, elektron doʻkonda savdo boshlanganligi haqidagi maʼlumotlar avtomatik ravishda eʼlon qilinadi.
Elektron doʻkonda savdo yakunlangandan soʻng savdoning yakunlangan vaqti va uning natijalari toʻgʻrisidagi maʼlumotlar avtomatik ravishda eʼlon qilinadi.
17. Xabarnoma quyidagilarni oʻz ichiga olishi zarur:
savdo oʻtkaziladigan oxirgi ish kuni;
lot raqami va savdo obyekti nomi;
lotning boshlangʻich narxi;
boshlangʻich narxga nisbatan foiz koʻrinishida ifodalangan savdo qadami;
zakalat pulining boshlangʻich narxga nisbatan foiz koʻrinishida va qatʼiy summada ifodalangan miqdori;
buyurtmachining manzili va telefon (mavjud boʻlganda mobil) raqami;
savdo obyektini tavsiflovchi maʼlumotlar;
buyurtmachi tomonidan taqdim etilgan qoʻshimcha maʼlumotlar (agar mavjud boʻlsa);
savdo obyekti joylashgan manzil, fotosurat va geolokatsiyasi.
Operator tomonidan elektron doʻkonda savdo oʻtkazilishi toʻgʻrisida xabarnoma eʼlon qilingandan keyin savdo oʻtkazish shartlarini oʻzgartirishga yoʻl qoʻyilmaydi. Buyurtmachi tomonidan buyurtmani savdodan olish hamda savdo oʻtkazish shartlarini oʻzgartirilgan holda buyurtmani qayta yuborish holatlari bundan mustasno.
18. Operator tomonidan savdo platformasida savdo oʻtkazish qoidalari bilan tanishish imkoniyati taʼminlanadi.
4-bob. Savdoni oʻtkazish tartibi
19. Ishtirokchilarning savdoda ishtirok etish boʻyicha arizalari elektron doʻkonda xabarnoma joylashtirilgan kundan boshlab savdo yakunlangunga qadar avtomatik tarzda qabul qilinadi.
Ishtirokchi oʻz arizasini savdo yakunlangunga qadar chaqirib olishga va takroran yuborishga haqli, savdo jarayonida oxirgi va oxirgidan oldingi narxni tasdiqlagan ishtirokchilar bundan mustasno.
20. Operator barcha ishtirokchilar uchun savdoga kirish va qatnashishda teng imkoniyatlar taʼminlaydi.
Ishtirokchilarga savdoda ishtirok etish uchun shaxsiy raqamlar beriladi.
21. Savdo jarayonida ishtirokchilar toʻgʻrisida maʼlumotlar elektron doʻkonda aks ettirilishiga yoʻl qoʻyilmaydi.
22. Savdo xabarnomada keltirilgan kun va vaqtda boshlanadi.
23. Savdo har bitta lot uchun alohida oʻtkaziladi.
24. Savdo kamida ikki nafar ishtirokchi mavjud boʻlganda oʻtkaziladi.
25. Boshlangʻich narx buyurtmachining buyurtmasiga asosan belgilanadi.
26. Savdo qadami:
birinchi toʻrtta qadamda — savdo obyekti boshlangʻich narxining 5 foizi miqdorida;
beshinchi va undan keyingi qadamlarda — savdo obyekti boshlangʻich narxining 3 foizi miqdorida belgilanadi.
Boshlangʻich narxi xabarnoma joylashtirish paytida bazaviy hisoblash miqdorining ikki ming baravaridan yuqori boʻlgan savdo obyekti realizatsiya qilingan taqdirda, savdoning barcha qadami, savdo obyekti boshlangʻich narxining 2 foizi miqdorida belgilanadi.
27. Savdo xabarnoma joylashtirilgan kundan keyingi ish kuni soat 10:00 dan beshinchi (oxirgi) ish kuni soat 18:00 ga qadar oʻtkaziladi.
28. Savdo ishtirokchilardan lotni boshlangʻich narxdan bitta savdo qadamiga oshirilgan narxda sotib olish boʻyicha taklifni tasdiqlashni soʻrashdan boshlanadi.
29. Agar lot narxini oshirish boʻyicha taklifni oxirgi tasdiqlagan ishtirokchi buni savdoni oʻtkazish vaqti yakunlanishiga oʻn daqiqadan kam qolganda amalga oshirgan boʻlsa, savdoni oʻtkazish vaqti oxirgi taklif tasdiqlangan paytdan boshlab keyingi oʻn daqiqaga uzaytiriladi. Keyingi har bir taklif savdoni oʻtkazish vaqtini oʻn daqiqadan uzaytirib boradi.
Agar oxirgi tasdiqlangan taklifdan soʻng oʻn daqiqa davomida keyingi oshirilgan lot narxi boʻyicha taklif ishtirokchilarning birontasi tomonidan tasdiqlanmasa, savdo yakunlanadi.
30. Oxirgi taklifni tasdiqlagan ishtirokchi savdo gʻolibi deb topiladi va unga tasdiqlangan lot qiymati toʻlagandan soʻng keyingi ish kunidan kechiktirmay savdo natijalari toʻgʻrisidagi QR-kodli (matrik shtrixli kod) bayonnoma rasmiylashtiriladi.
31. Bayonnoma savdo gʻolibi va buyurtmachining shaxsiy kabinetlariga elektron shaklda yuboriladi.
Oldingi tahrirga qarang.
32. Savdo gʻolibidan bir qadam past narx taklifini tasdiqlagan ishtirokchi zaxiradagi gʻolib deb eʼtirof etiladi.
(32-band Oʻzbekiston Respublikasi Vazirlar Mahkamasining 2025-yil 21-apreldagi 247-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/247/0383-son)
Oldingi tahrirga qarang.
33. Savdo gʻolibi belgilangan muddatda lotni sotib olishdan bosh tortsa yoki lot qiymatini muddatida toʻliq toʻlamasa, operator keyingi ish kunidan kechiktirmay zaxiradagi gʻolibga u tasdiqlagan narxda lotni sotib olishni taklif qiladi.
(33-band Oʻzbekiston Respublikasi Vazirlar Mahkamasining 2025-yil 21-apreldagi 247-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/247/0383-son)
Oldingi tahrirga qarang.
34. Lot qiymatini toʻlagan zaxiradagi gʻolib savdo gʻolibi deb topiladi va unga savdo natijasi toʻgʻrisida bayonnoma taqdim etiladi.
(34-band Oʻzbekiston Respublikasi Vazirlar Mahkamasining 2025-yil 21-apreldagi 247-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/247/0383-son)
35. Savdo platformasida texnik uzilish sodir boʻlgan hollarda savdo vaqtincha toʻxtatiladi hamda bu haqda ishtirokchining shaxsiy kabineti, elektron pochta manzili va/yoki mobil telefon raqamiga xabar yuboriladi hamda ushbu savdo texnik uzilish bartaraf qilingan kundan keyingi ish kuni soat 10:00 da oxirgi tasdiqlangan narxdan bir qadam oshirilgan narxni taklif etishdan davom ettiriladi.
Toʻxtatilgan lot boʻyicha savdo ishtirokchisi davom ettiriladigan savdo ishtirokchisi sifatida uning shaxsiy kabineti, elektron pochta manzili va/yoki mobil telefon raqami orqali xabardor qilinadi. Ishtirokchi xabar bilan oʻz vaqtida tanishmaganligi uchun operator javobgar hisoblanmaydi.
Texnik uzilishni bartaraf etish davrida ishtirokchi tomonidan oʻzi tasdiqlagan takliflari qaytarib olinishiga yoʻl qoʻyilmaydi.
Ishtirokchining kompyuter va (yoki) telekommunikatsiya jihozlarida texnik uzilish yuz berganda, bu holat savdo platformasidagi texnik uzilish deb hisoblanmaydi va savdo davom ettiriladi.
36. Savdo quyidagi hollarda oʻtkazilmagan deb topiladi:
savdoda qatnashish uchun bironta ham talabgordan ariza kelib tushmagan boʻlsa;
savdoda qatnashish uchun faqat bir nafar ishtirokchidan ariza kelib tushgan boʻlsa;
savdo kuni ishtirokchilar tomonidan bironta ham taklif tasdiqlanmasa;
Oldingi tahrirga qarang.
mazkur Nizomda belgilangan tartibda savdo gʻolibi va zaxiradagi gʻolib tomonidan tasdiqlangan lot qiymati belgilangan muddatda toʻliq toʻlanmasa.
(36-bandning beshinchi xatboshisi Oʻzbekiston Respublikasi Vazirlar Mahkamasining 2025-yil 21-apreldagi 247-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/247/0383-son)
Savdo oʻtkazilmagan deb topilgan taqdirda, savdo obyekti mazkur Nizomda belgilangan tartibda takroriy savdoga chiqariladi.
5-bob. Takroriy savdo oʻtkazish tartibi
37. Takroriy savdo oʻtkazilishi toʻgʻrisidagi xabarnoma savdo oʻtkazilmagan deb topilgandan soʻng avtomatik tarzda elektron doʻkonga joylashtiriladi.
Bunda takroriy savdo savdo oʻtkazilmagan deb topilgan kundan keyingi ish kuni soat 10:00 dan 18:00 ga qadar oʻtkaziladi.
Dastlabki savdo oʻtkazilishi toʻgʻrisidagi xabarnoma joylashtirilgan vaqtdan boshlab 30 kalendar kun davomida savdo obyekti sotilmasa, avtomatik tarzda savdo obyekti buyurtmachiga qaytariladi.
Savdo obyekti dastlabki savdo oʻtkazilishi toʻgʻrisidagi xabarnoma joylashtirilgan vaqtdan boshlab ikki oy mobaynida sotilmagan taqdirda, buyurtmachi Byuro bilan kelishilgan holda savdo obyektining boshlangʻich narxini bosqichma-bosqich, lekin boshlangʻich narxining 50 foizidan koʻp boʻlmagan miqdorgacha pasaytirgan holda takroriy savdolarni tashkil etishi mumkin.
6-bob. Hisob-kitob qilish va zakalat pulini qaytarish tartibi
38. Savdo gʻolibi lot qiymatini uch ish kunidan kechiktirmay toʻlaydi.
Oldingi tahrirga qarang.
Zaxiradagi gʻolibga sotib olish boʻyicha taklif kelib tushgan kundan boshlab lot qiymatini toʻlash uchun uch ish kunlik muddat beriladi.
(38-bandning ikkinchi xatboshisi Oʻzbekiston Respublikasi Vazirlar Mahkamasining 2025-yil 21-apreldagi 247-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/247/0383-son)
Oldingi tahrirga qarang.
39. Belgilangan toʻlovni amalga oshirmagan savdo gʻolibi (zaxiradagi gʻolib)ning zakalat miqdori qaytarilmaydi.
(39-bandning birinchi xatboshisi Oʻzbekiston Respublikasi Vazirlar Mahkamasining 2025-yil 21-apreldagi 247-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/247/0383-son)
Qaytarilmagan zakalat miqdori operator tasarrufida qoladi.
40. Operator savdoni tashkil etish va oʻtkazish xizmatlari uchun savdo obyektining sotilgan qiymatidan bir foiz miqdorida xizmat haqi oladi.
41. Ishtirokchi tomonidan savdo platformasi orqali ariza chaqirib olingan taqdirda, operatorga xabarnoma yuborilishi hamda ishtirokchining soʻroviga koʻra zakalat summasi ishtirokchining bankdagi hisobvaragʻi (plastik kartasi)ga qaytarilishi savdo platformasi orqali avtomatik tarzda amalga oshiriladi.
42. Savdo boshlangandan soʻng oxirgi va oxiridan oldingi narxni tasdiqlagan ishtirokchining arizasi va kiritgan zakalati qaytarib olinishiga yoʻl qoʻyilmaydi.
43. Zakalat puli ishtirokchining savdo platformasidagi shaxsiy hisobvaragʻiga kirim qilinadi, bunda uning soʻroviga koʻra, bankdagi hisobvaragʻi (plastik kartasi)ga savdo yakunlangan deb topilgan kundan soʻng quyidagi tartibda qaytariladi:
Oldingi tahrirga qarang.
zaxiradagi gʻolibga — savdo yakunlangandan soʻng gʻolib tomonidan lot qiymati toʻlangandan boshlab uch ish kuni ichida;
(43-bandning ikkinchi xatboshisi Oʻzbekiston Respublikasi Vazirlar Mahkamasining 2025-yil 21-apreldagi 247-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/247/0383-son)
qolgan ishtirokchilarga — savdo yakunlangan yoki oʻtkazilmagan deb topilgan kundan boshlab uch ish kuni ichida.
Ishtirokchiga zakalat puli qaytarilganda, bank hisobvaragʻi (plastik karta raqamlari) notoʻgʻri koʻrsatilganligi yoki boshqa sabablarga koʻra toʻlov operatorning bank hisobvaragʻiga qaytib tushgan hollarda, operator ishtirokchini bu haqda savdo platformasi orqali ogohlantiradi. Bunda zakalat puli ishtirokchining shaxsiy hisobvaragʻiga biriktiriladi. Ishtirokchi bank hisobvaragʻi (plastik karta raqami) toʻgʻri koʻrsatilgan holda zakalat pullarini qaytarish boʻyicha soʻrov yuborishi mumkin.
44. Savdo natijalari boʻyicha pul mablagʻlari operatorning maxsus hisobvaragʻida jamlanadi va savdo gʻolibi tomonidan shaxsiy kabineti orqali savdo obyektini qabul qilib olganligi tasdiqlagandan soʻng mablagʻlar buyurtmachi hisobvaragʻiga (operator xizmat haqi chegirilgan holda) oʻtkaziladi.
Savdo gʻolibi lot rekvizitlarida koʻrsatilgan barcha parametrlarga toʻliq mos keluvchi savdo obyektini qabul qilishdan bosh tortgan taqdirda, taraflar (gʻolib, buyurtmachi va operator)ning kelishuviga asosan toʻlangan pul mablagʻlari ushbu Nizomda belgilangan tartibda (operator xizmat haqi chegirilgan holda) savdo gʻolibiga qaytariladi. Bunda buyurtma operator tomonidan buyurtmachiga avtomatik tarzda qaytariladi.
Taraflar kelisha olmagan taqdirda, ushbu nizoli masala sud tartibida koʻrib chiqiladi.
Nizoli masala hal etilmagunga qadar savdo gʻolibi tomonidan toʻlangan pul mablagʻlari operatorning maxsus hisobvaragʻida saqlanadi.
45. Savdo gʻolibi toʻlovlarni toʻlashdan bosh tortgan taqdirda, operator tegishli shaxslarni ikki oy muddatga keyingi savdoda ishtirok etishdan chetlashtirish choralarini koʻradi.
Ushbu cheklovlar savdo gʻolibi chetlashtirilgunga qadar, u tomonidan ariza berilgan lotlar va uning ishtirokida savdo boshlangan yoki yakunlangan boshqa lotlar boʻyicha savdo jarayonlariga hamda ularning natijalariga qoʻllanilmaydi.
46. Buyurtmachi savdo obyektini gʻolibga zarar yetkazilmagan holda topshirishi shart.
Operator savdo obyektini saqlash, topshirish-qabul qilish jarayonida ishtirok etmaydi va uning oqibatlari uchun javobgar hisoblanmaydi.
47. Buyurtmachi sotilgan savdo obyektining savdo gʻolibiga topshirilgunga qadar xususiyatini yoʻqotmagan holda saqlanishini taʼminlash, mol-mulk buyurtmada koʻrsatilgan fotosuratga muvofiqligi va topshirish-qabul qilish dalolatnomasining oʻz vaqtida rasmiylashtirilishi hamda mazkur Nizomga muvofiq taqdim etiladigan maʼlumotlarning haqqoniyligi uchun javobgar hisoblanadi.
7-bob. Yakunlovchi qoidalar
48. Bojxona organlari, Byuro va boshqa organlar hamda operator oʻrtasida buyurtmachiga topshirilgan mol-mulklar, savdoga chiqarilgan va sotilgan savdo obyektlari, buyurtmachiga sotishdan tushgan pul mablagʻlari toʻgʻrisidagi maʼlumotlar har chorakda hisobot choragidan keyingi oyning beshinchi sanasiga qadar integratsiyalashgan axborot tizimi orqali almashinib boriladi.
49. Buyurtmachi tomonidan bojxona organlari, Byuro va boshqa organlar bilan tuzilgan shartnoma shartlariga, shuningdek mol-mulkni sotish tartibiga rioya etilishi ustidan nazorat, shartnomani tuzgan tegishli bojxona organlari, Byuro va boshqa organlar tomonidan amalga oshiriladi.
50. Mazkur Nizom talablarini buzganlikda aybdor shaxslar qonunchilikda belgilangan tartibda javobgar boʻladilar.
 LexUZ sharhi
Qarang: Oʻzbekiston Respublikasi Maʼmuriy javobgarlik toʻgʻrisidagi kodeksining 216-moddasi.
Davlat daromadiga olingan mol-mulklarni soddalashtirilgan auksion tamoyillari asosida “E-auksion shop” elektron savdo doʻkoni orqali sotish tartibi toʻgʻrisidagi nizomga
ILOVA
Davlat daromadiga olingan mol-mulklarni soddalashtirilgan auksion tamoyillari asosida “E-auksion shop” elektron savdo doʻkoni orqali sotish
SXEMASI

Bosqichlar

Subyektlar

Tadbirlar

Muddatlar

1-bosqich

Buyurtmachi

(Oʻzbekiston Respublikasi Bosh prokuraturasi huzuridagi Majburiy ijro byurosi va uning hududiy tuzilmalari tomonidan belgilangan tartibda tanlab olingan savdo tashkilotlari va “Bojxona-servis” davlat muassasasi va (yoki) uning hududiy boʻlimlari)

1. Elektron savdo platformasida roʻyxatdan oʻtish.

1. Elektron buyurtma berish sanasiga qadar.

2. “Elektron onlayn-auksionlarni tashkil etish”AJ (keyingi oʻrinlarda — operator) bilan davlat daromadiga olingan mol-mulklarni “E-auksion shop” elektron savdo doʻkoni orqali sotish boʻyicha xizmat koʻrsatish toʻgʻrisida shartnoma tuzish.

2. Elektron buyurtma berish sanasiga qadar.

3. Obyektni “E-auksion shop” elektron savdo doʻkoni orqali sotish uchun operatorga elektron buyurtma berish.

3. Xabarnoma “E-auksion shop” elektron savdo doʻkonida joylashtirilgunga qadar.

2-bosqich

Operator

1. “E-auksion shop” elektron savdo doʻkoni orqali savdo oʻtkazilishi haqida “E-auksion shop” elektron savdo doʻkoniga xabarnoma joylashtirish.

1. Buyurtma olingan kundan keyingi ikki ish kunidan kechiktirmay.

2. Talabgorlardan ariza qabul qilish.

2. Xabarnoma “E-auksion shop” elektron savdo doʻkonida eʼlon qilingan kundan boshlab savdo yakunlangunga qadar.

3-bosqich

Ariza beruvchi

(jismoniy va yuridik shaxslar)

1. Savdo platformasidan roʻyxatdan oʻtish va auksion qoidalari, savdo platformasining tartib-taomillarini qabul qilgani yuzasidan elektron shartnoma imzolash.

1. “E-auksion shop” elektron savdo doʻkoni orqali savdoda ishtirok etish uchun ariza berish sanasiga qadar.

2. Shaxsiy hisobvaraqni zakalat pulini oʻtkazishga talab etiladigan miqdordagi pul mablagʻlari bilan toʻldirish.

2. Xabarnoma “E-auksion shop” elektron doʻkonida eʼlon qilingan kundan boshlab savdo yakunlangunga qadar.

3. Ariza yuborish.

3. Xabarnoma “E-auksion shop” elektron doʻkonida eʼlon qilingan kundan boshlab savdo yakunlangunga qadar.

4. Shaxsiy kabinet orqali zakalat pulini toʻlash.

4. “E-auksion shop” elektron savdo doʻkoni orqali savdoda ishtirok etish uchun ariza berguniga qadar.

4-bosqich

Operator

Savdoni “E-auksion shop” elektron savdo doʻkonida avtomatik tarzda oʻtkazish.

Xabarnoma elektron doʻkonda eʼlon qilingan kundan keyingi ish kuni soat 10:00 dan boshlab besh ish kuni davomida, oxirgi ish kuni soat 18:00 ga qadar.

5-bosqich

Auksion gʻolibi

Lot qiymatini toʻlash.

Uch ish kuni ichida toʻlov toʻliq amalga oshirish.

6-bosqich

Operator

1. Savdo natijalari operatorning savdo platformasida eʼlon qilish.

1. Auksion yakunlanishi bilan.

2. QR-kodini qoʻllash savdo natijalari toʻgʻrisidagi elektron bayonnomani rasmiylashtirish.

2. Lot qiymati (operator xizmat haqiga yetarli mablagʻ) toʻlangandan soʻng keyingi ish kunidan kechiktirmay.

3. Bayonnomani savdo gʻolibining va Buyurtmachining shaxsiy kabinetiga yuborish.

3. Bayonnoma rasmiylashtirilgandan soʻng.

4. Kelib tushgan pul mablagʻlarini taqsimlash.

4. Auksion gʻolibi tomonidan obyekt qabul qilinganligi tasdiqlangandan soʻng uch ish kuni ichida.

(Qonunchilik maʼlumotlari milliy bazasi, 05.10.2023-y., 09/23/526/0751-son; 23.04.2025-y., 09/25/247/0383-son)