Ўзбекистон Республикаси Президентининг

Фармони

Одил судлов соҳасида юқори малакали кадрлар тайёрлаш тизимини тубдан такомиллаштириш чора-тадбирлари тўғрисида

Суд тизими учун юқори малакали ҳуқуқшунос кадрлар тайёрлаш тизимини халқаро стандартлар асосида янада такомиллаштириш, таълим, илм-фан ва амалиёт узвийлигини таъминлаш орқали профессионал судьялар корпусини шакллантириш, шунингдек, «Ўзбекистон — 2030» стратегияси ижросини таъминлаш мақсадида қарор қиламан:

I. Мақсадлар

1. Қуйидагилар суд-ҳуқуқ соҳасида малакали кадрлар тайёрлашнинг янги тизимини жорий этишдаги устувор мақсадлар этиб белгилансин:

(а) суд тизими учун ҳар томонлама етук, замонавий билим ва зарур касбий кўникмаларга эга юқори малакали кадрлар тайёрлаш тизимини ташкил этиш;

(б) судьялик лавозимларига номзодларни тайёрлаш, судья ва суд аппарати ходимларининг малакасини ошириш, раҳбарлик лавозимларини эгаллаш учун захирада бўлган судьяларни қайта тайёрлаш, таълим олувчиларда судьялик касбий маданиятини шакллантиришга қаратилган дастурларни жорий этиш;

(в) бўлажак судяларда мустақил, холис, беғараз, фақат қонунга таянган ҳолда ва адолат билан иш юритишнинг касбий кўникмаларини ривожлантиришга қаратилган интерфаол ўқитиш услубларини таълим жараёнига татбиқ этиш;

(г) тингловчи ва талабаларда юксак маънавий ва ахлоқий фазилатларни шакллантириш, таълим жараёнида коррупцияга қарши курашиш, очиқлик ва шаффофликни таъминлашнинг таъсирчан механизмларини жорий қилиш;

(д) судьялик лавозимларига номзодлар, судья ва суд аппарати ходимларида замонавий ахборот технологиялари ва сунъий интеллект имкониятларидан амалиётда фойдаланиш кўникмаларини шакллантириш;

(ж) суд фаолиятини илмий-услубий жиҳатдан таъминлаш, фундаментал, амалий ва инновацион тадқиқотлар ўтказиш, шунингдек, суд-ҳуқуқ соҳасидаги қонунчиликни такомиллаштириш бўйича илмий асосланган тавсиялар ишлаб чиқиш;

(з) ўқув жараёни сифатини оширишга қаратилган идоралараро тажриба алмашиш, шунингдек, суд тизими учун ҳуқуқшунос кадрлар тайёрловчи, шу жумладан, судьялик лавозимларига номзодларни тайёрлаш ва судьялар малакасини оширишга ихтисослашган хорижий таълим ва илмий-тадқиқот ташкилотлари билан самарали ҳамкорликни йўлга қўйиш.

II. Судьялар олий мактаби фаолиятини тубдан ислоҳ қилиш

2. Судьялар олий кенгаши, Олий суд, Адлия вазирлиги ҳамда Олий таълим, фан ва инновациялар вазирлигининг Судьялар олий кенгаши ҳузуридаги Судьялар олий мактаби негизида Ўзбекистон Республикаси Одил судлов академиясини (кейинги ўринларда — Академия) ташкил этиш ҳақидаги таклифи маъқуллансин.

3. Белгилансинки:

(а) Академияда таълим жараёни устоз-шогирд анъанаси асосида «бўлажак судьяни судья ўқитади» тамойилига мувофиқ ташкил этилади;

(б) Академия Судьялар олий кенгаши ҳузурида фаолият юритувчи, юридик шахс мақомига эга бўлган ихтисослаштирилган давлат таълим ва илмий-тадқиқот муассасаси ҳисобланади;

(в) Академия Судьялар олий мактабининг барча ҳуқуқ ва мажбуриятлари бўйича ҳуқуқий вориси ҳисобланади;

(г) Академияга Судьялар олий кенгаши раисининг тақдимномасига мувофиқ Ўзбекистон Республикаси Президенти томонидан лавозимга тайинланадиган ва лавозимидан озод қилинадиган ректор раҳбарлик қилади;

(д) Академия ректори меҳнатга ҳақ тўлаш, моддий рағбатлантириш, тиббий ва транспорт таъминоти шартларига кўра Олий суд раисининг ўринбосарига тенглаштирилади;

(ж) Академия проректорлари Судьялар олий кенгаши раиси билан келишилган ҳолда Академия ректори томонидан лавозимга тайинланади ва лавозимидан озод қилинади;

(з) Академия проректорлари ва профессор-ўқитувчиларига Олий суд судьялари учун, Академиянинг бошқа ходимларига эса Олий суд аппарати ходимлари учун белгиланган меҳнатга ҳақ тўлаш, моддий рағбатлантириш, тиббий ва транспорт таъминоти шартлари ва бошқа имтиёзлар татбиқ этилади;

(и) Академиянинг олдинги иш жойи бўйича ҳарбий, махсус ва даражали унвонлар ҳамда малака (мансаб) даражасига эга ходимларига Олий суд учун назарда тутилган мансаб даражалари тегишлилигича берилади, кўп йиллик хизматлари учун устама ва қўшимча тўловлар тўланади, уларнинг Академияда ишлаган даври ҳарбий, махсус ва даражали унвонлар ҳамда малака (мансаб) даражаларини олиш учун зарур бўлган иш стажига қўшилади;

(к) Академияга ишга жалб этилган ва малака даражасига эга бўлган судьялар ва уларга тенглаштирилган шахсларда судья учун белгиланган устама ва қўшимча тўловлар, имтиёзлар, тиббий ва пенсия таъминоти шароитлари сақлаб қолинади. Ушбу шахсларнинг Академияда ишлаган вақти судьялик стажига қўшилади.

4. Судьялар олий кенгаши раиси Академия фаолиятини самарали ташкил этишга, натижадорликни таъминлашга ҳамда унинг бошқа давлат органлари ва ташкилотлар билан идоралараро ҳамкорлигини мувофиқлаштириб боришга шахсан масъул этиб белгилансин.

5. Академия ходимларига махсус унвонлар ва мансаб даражалари бериш Судьялар олий кенгаши раиси томонидан амалга оширилади.

LexUZ шарҳи

Қаранг: Давлат органлари ва ташкилотлари юридик хизмат ходимларига мартаба даражалари бериш тартиби тўғрисидаги низом (рўйхат рақами 2920, 2017 йил 28 август).

III. Судьяларни қайта тайёрлаш тизимини тубдан такомиллаштириш

6. Шундай тартиб ўрнатилсинки, унга мувофиқ 2025 йил 1 октябрдан бошлаб:

(а) судьялик лавозимларига номзодларни тайёрлаш Академиянинг олти ойлик касбий қайта тайёрлаш курсларида (кейинги ўринларда — касбий қайта тайёрлаш курслари) давлат гранти асосида суд ихтисосликлари бўйича ташкил этилади;

(б) касбий қайта тайёрлаш курсларига қабул қилинган шахслар уларнинг эгаллаган лавозими бутун ўқиш даври мобайнида сақланган ҳолда асосий иш жойи бўйича лавозимидан озод қилинади;

(в) касбий қайта тайёрлаш курслари тингловчиларига судья ёрдамчисининг бир ойлик меҳнатига ҳақ тўлаш фонди миқдорида ҳар ойда стипендия тўланади;

(г) касбий қайта тайёрлаш курсларига кириш учун Судьялар олий кенгаши томонидан номзодларнинг бенуқсон обрў-эътибори, ҳалоллиги ва лаёқатлилиги бўйича касбига муносиблиги ўрганилади;

(д) касбий қайта тайёрлаш курсларига қабул қилиш психология, чет тиллари ва суд ихтисослиги бўйича тест синовларини ўтказиш ҳамда Судьялар олий кенгаши томонидан ташкил этиладиган идоралараро комиссия томонидан ўтказиладиган ёзма имтиҳон ва якка тартибдаги суҳбатдан иборат танлов орқали амалга оширилади. Бунда тест синовлари Академия буюртмасига биноан Билим ва малакаларни баҳолаш агентлиги томонидан амалга оширилади;

(ж) касбий қайта тайёрлаш курслари қонунчиликни қўллаш кўникмасининг амалиёт билан узвий боғлиқлигини таъминлаган ҳолда «назария — амалиёт-имитация» тамойили асосида дуал таълим шаклида ташкил этилади;

(з) касбий қайта тайёрлаш курслари тингловчиларининг амалий кўникмасини шакллантириш мақсадида амалий машғулотлар деонтологик услубда ўтказилади. Бунда тингловчиларнинг тегишли ҳуқуқни муҳофаза қилувчи органлар, адвокатура, суд-экспертиза ва бошқа давлат органлари ва муассасалари фаолиятида бевосита иштирок этиши таъминланади;

(и) касбий қайта тайёрлаш курсларида суд мажлисларини реал вақт режимида кузатиш ва судьянинг процессуал ҳаракатларини таҳлил қилиш имконини берувчи «виртуал суд» машғулотлари жорий этилади, шунингдек, сунъий интеллект технологияларидан фойдаланиш бўйича ўқув дарслари ташкил этилади;

(к) касбий қайта тайёрлаш курсларини тамомлаганда Судьялар олий кенгаши раҳбарлигида ташкил этиладиган идоралараро комиссия томонидан якуний аттестация имтиҳони ўтказилади ҳамда ундан муваффақиятли ўтган битирувчиларга белгиланган намунадаги сертификат берилади;

(л) касбий қайта тайёрлаш курсларини муваффақиятли тугатганлиги тўғрисидаги сертификатга эга бўлган шахслар аризасига асосан бўш судьялик лавозимларига ўтказиладиган танловларда иштирок этадилар;

(м) касбий қайта тайёрлаш курсларида ўқиш дастурини ўзлаштирмаган ва якуний аттестация имтиҳонидан муваффақиятли ўтмаган тингловчилар, бўш судьялик лавозимига уч йилгача муддатда ариза топширмаган ёки таклиф этилган судьялик лавозимини эгаллашни рад этган битирувчилар ўқиш даврида олинган стипендия суммасини Давлат бюджетига тўлиқ миқдорда қоплаб берадилар.

IV. Академияда малака оширишнинг янгича услубларини татбиқ этиш

7. Академияда судья ва суд аппарати ходимларининг мажбурий малакасини оширишнинг қуйидаги тартиби жорий этилсин:

(а) беш йил муддатга тайинланган судьялар — ҳар икки йилда икки ҳафтадан кам бўлмаган;

(б) ўн йил муддатга тайинланган судьялар — ҳар уч йилда икки ҳафтадан кам бўлмаган;

(в) Олий суд судьялари, суд раислари ва раис ўринбосарлари, шунингдек, муддатсиз даврга тайинланган судьялар — ҳар уч йилда бир ҳафтадан кам бўлмаган;

(г) фаолият самарадорлиги рейтингининг паст кўрсаткичларига эга судьялар — навбатдан ташқари икки ҳафтадан кам бўлмаган;

(д) суд аппарати ходимлари (судья ёрдамчиси, девонхона ва архив мудирлари) — ҳар икки йилда бир ҳафтадан кам бўлмаган малака ошириш курсларида ўқитилади.

8. Белгилансинки:

(а) амалдаги судьялар учун Олий суд томонидан белгиланадиган мураккаб тоифадаги ишлар бўйича малака ошириш курслари ташкил этилади;

(б) суд аппарати ходимларининг малакасини ошириш Олий суд буюртмаси асосида режали, шунингдек, уларнинг хоҳишига кўра ихтиёрий амалга оширилади.

9. Шундай тартиб ўрнатилсинки, унга мувофиқ:

(а) туман (шаҳар) ва вилоят судларининг тегишли раҳбарлик лавозимларини эгаллаш учун захирада бўлган судьялар давомийлиги икки ойгача бўлган раҳбар кадрларни қайта тайёрлаш курсларида ўқитилади;

(б) раҳбар кадрларни қайта тайёрлаш ҳамда малака ошириш курслари тингловчиларининг ўқиш давомида асосий иш жойи бўйича лавозими ва ўртача ойлик иш ҳақи сақланади;

(в) туман (шаҳар) ва вилоят судларида тегишли раҳбарлик лавозимларига, қоида тариқасида, фақат раҳбар кадрларни қайта тайёрлаш курсларини муваффақиятли тамомлаган судьялар тайинланади;

(г) раҳбар кадрларни қайта тайёрлаш ва малака ошириш курслари ишдан ажралган ҳолда ташкил этилади ҳамда курсларни тамомлаган судья ва суд аппарати ходимларига белгиланган намунадаги сертификат берилади.

V. Академияда ўқитишни ташкил этиш

10. Академияда 2026/2027 ўқув йилидан бошлаб «Суд фаолияти» мутахассислиги бўйича амалий магистратура дастури асосида ўқитиш ташкил этилсин.

11. Белгилансинки:

(а) магистратура босқичида ўқув жараёни таълимнинг кундузги ва кечки шаклларида ташкил этилади;

(б) Академияга қабул қилишда номзодларнинг муайян тоифаларига республиканинг бошқа олий таълим ташкилотларига кириш учун қонунчилик ҳужжатларида назарда тутилган имтиёзлар татбиқ этилмайди;

LexUZ шарҳи

Қаранг: Ўзбекистон Республикаси Президентининг «Зулфия номидаги давлат мукофотини таъсис этиш бўйича таклифларни қўллаб-қувватлаш тўғрисида»ги 1999 йил 10 июндаги ПФ-2326-сон Фармони 2-банднинг тўртинчи хатбошиси, Муддатли ҳарбий хизматни ўтаётган ҳарбий хизматчиларга Ўзбекистон Республикаси олий таълим муассасаларига ўқишга кириш учун тавсияномалар бериш тартиби тўғрисидаги низом (рўйхат рақами 3215, 2020 йил 31 январь), Вазирлар Маҳкамасининг 2018 йил 22 июндаги 462-сон қарори билан тасдиқланган Ўзбекистон Республикаси Қуролли Кучлари ҳарбийлари ва унинг таркибига кирувчи вазирлик ҳамда идораларнинг ходимлари фарзандларининг квота асосида республика олий таълим муассасаларига ўқишга кириши учун тавсияномалар бериш тартиби тўғрисидаги низом, 2022 йил 4 июлдаги 354-сон қарор билан тасдиқланган Ўзбекистон Республикаси ички ишлар органлари шахсий таркиби ва уларнинг оила аъзоларини ижтимоий ҳимоя қилиш тартиби тўғрисидаги ва Ўзбекистон Республикаси Миллий гвардияси органлари ҳарбий хизматчилари (ходимлари) ва уларнинг оила аъзоларини ижтимоий ҳимоя қилиш тартиби тўғрисидаги низомлар.

(в) Академияда таълим олиш муддати магистратура дастури бўйича бир йилни ташкил этиб, битирувчиларга олий юридик таълимнинг тегишли босқичини якунлаганлигини тасдиқловчи давлат намунасидаги диплом берилади;

(г) Академия магистратура дастурлари бўйича қабул параметрлари ҳар йили Академия Кенгаши таклифи асосида Судьялар олий кенгаши томонидан тасдиқланади;

(д) Академия магистратурасида ўқитиш тўлов-контракт асосида ташкил этилиб, унинг қиймати Академия Кенгаши ва Судьялар олий кенгаши томонидан белгиланади.

VI. Академия фаолиятини самарали ташкил этиш ва Фармон ижросини назорат қилиш

12. Қуйидагилар:

(а) Ўзбекистон Республикаси Одил судлов академиясининг тузилмаси 1-иловага мувофиқ;

(б) Ўзбекистон Республикаси Одил судлов академияси ходимлари меҳнатига ҳақ тўлаш разрядлари 2-иловага мувофиқ;

(в) Ўзбекистон Республикаси Одил судлов академиясининг штат жадвали 3-иловага мувофиқ;

(г) Ўзбекистон Республикаси Одил судлов академиясининг фаолиятини самарали ташкил этиш бўйича «йўл харитаси» 4-иловага мувофиқ тасдиқлансин.

13. Қуйидаги ҳуқуқлар берилсин:

(а) Судьялар олий кенгашига — ҳудудларнинг ихтисослик бўйича судья кадрларга бўлган эҳтиёжини инобатга олган ҳолда касбий қайта тайёрлаш курсларига қабул қилишда ҳудудлар кесимида квоталарни белгилаш;

(б) Судьялар олий кенгаши ва Олий судга — Академияга номзодларни ўқишга қабул қилиш тартибини белгилаш;

(в) Академия Кенгашига:

(i) Академияда кадрлар тайёрлаш, қайта тайёрлаш ва малакасини ошириш бўйича ўқув режалари, дастурлари ва малакавий талабларни Судьялар олий кенгаши ва Олий суд билан келишилган ҳолда тасдиқлаш;

(ii) профессор-ўқитувчилар таркибининг меҳнатини меъёрлаштириш, иш вақтини фақат ўқув тадбирларига асосланган ҳолда мустақил ташкил этиш, шунингдек, педагогик ходимлар томонидан илмий-услубий, илмий-тадқиқот, ташкилий-услубий, маънавий-маърифий ва тарбиявий ишларни бажаришни рағбатлантириш;

(iii) бошқарув, профессор-ўқитувчилар, илмий, ўқув-ёрдамчи, техник ва хизмат кўрсатувчи ходимларни моддий рағбатлантириш махсус жамғармасини шакллантириш ва унинг маблағларидан фойдаланиш тартибини, шунингдек, ушбу маблағлар ҳисобидан Академия ходимларига ойлик устамалар белгилаш мезонларини тасдиқлаш;

(г) Академияга:

(i) етакчи таълим ташкилотлари, илмий-тадқиқот институтлари, давлат органлари ва бошқа ташкилотларнинг, шу жумладан, хорижий мамлакатларнинг юқори малакали мутахассис ва экспертларини меҳнатга соатбай ҳақ тўлаш шартларида ўқув жараёнларига жалб этиш. Бунда жалб этиладиган мутахассисларнинг меҳнатига ҳақ тўлаш миқдорлари Академия Кенгаши томонидан белгиланади;

(ii) тўлов-контракт асосида ўқитиш ва пулли хизматлардан тушган маблағларни Академия тасарруфида қолдириш ва ушбу маблағларни Академия тингловчиларининг хорижий мамлакатларда стажировка ўташига, хорижий экспертларни ўқув жараёнига жалб этишга, пулли ўқув курслари маърузачиларининг иш ҳақини тўлашга, шунингдек, ходимларни моддий рағбатлантириш ва ижтимоий ҳимоя қилишга йўналтириш;

(iii) илмий фаолият, таълим, ноширлик, матбаа ва қонунчиликда тақиқланмаган бошқа фаолият йўналишлари бўйича пулли хизматлар кўрсатиш;

(iv) Академияда илмий-педагогик фаолиятни амалга оширишда Олий суднинг «Адолат» ахборот тизимлари комплексидан фойдаланиш;

(v) корхона, муассаса ва ташкилотларнинг буюртмасига асосан судга мурожаат қилиш ва низоларни кўришда уларнинг процессуал ҳуқуқларини амалга ошириш масалалари бўйича ходимларнинг билимларини ошириш мақсадида тўлов асосида махсус малака ошириш курсларини ташкил этиш;

(д) Академия ректорига:

(i) Академия тузилмасига ходимларнинг умумий чекланган сони ва меҳнатга ҳақ тўлаш фонди доирасида ўзгартиришлар киритиш;

(ii) етакчи хорижий олий таълим ташкилотлари ва илмий-тадқиқот муассасалари билан кадрлар тайёрлаш ва уларнинг малакасини ошириш, шунингдек, қўшма таълим дастурларини амалга ошириш борасида ўзаро ҳамкорлик тўғрисида меморандум ва битимлар тузиш.

14. Қуйидагилар Академия фаолиятини молиялаштириш манбалари этиб белгилансин:

(а) Ўзбекистон Республикаси Давлат бюджети маблағлари;

(б) Академияда тўлов-контракт шаклида ўқитишдан тушадиган маблағлар;

(в) шартнома асосида бажариладиган илмий-тадқиқот, ахборот-таҳлилий ишлар, таълим ва бошқа хизматлардан тушадиган тушумлар;

(г) Олий таълим, фан ва инновациялар вазирлиги томонидан ўтказиладиган грант танловлари натижалари асосида ажратиладиган маблағлар;

(д) халқаро молия институтлари ва донор ташкилотларнинг грант ва мақсадли маблағлари;

(ж) қонунчилик ҳужжатлари билан тақиқланмаган бошқа манбалар.

Бунда 2025 йилда Академияни сақлаш билан боғлиқ харажатлар республика бюджетидан Судьялар олий мактабини сақлаш учун ажратилган маблағлар доирасида молиялаштирилади, 2026 йилдан бошлаб эса Давлат бюджети параметрларида назарда тутиб борилади.

15. Академияда бюджет муассасалари ва ташкилотлари ходимларини рағбатлантириш махсус жамғармаси билан бирга Давлат бюджети маблағлари ҳисобидан бошқарув, профессор-ўқитувчилар, илмий, ўқув-ёрдамчи, техник ва хизмат кўрсатувчи ходимларни моддий рағбатлантириш махсус жамғармаси уларнинг меҳнатига ҳақ тўлаш фондининг 50 фоизигача миқдорида ташкил этилсин.

16. Ташқи ишлар вазирлиги:

(а) Академиянинг профессор-ўқитувчилари ва тингловчиларининг етакчи хорижий таълим ташкилотлари ва илмий-тадқиқот муассасаларида малака ошириш курсларида иштирок этиши ва стажировка ўташида кўмаклашсин;

(б) Академиянинг буюртмасига биноан ўқув ва илмий жараёнида иштирок этувчи хорижий мутахассислар, профессор-ўқитувчилар таркиби ва илмий ходимларга консуллик ва бошқа йиғимларни ундирмасдан кириш визалари белгиланган тартибда расмийлаштирилишини таъминласин.

LexUZ шарҳи

Қаранг: «Ўзбекистон Республикасида чет эл фуқароларининг ва фуқаролиги бўлмаган шахсларнинг ҳуқуқий ҳолати тўғрисида»ги Қонуннинг 28-моддаси, Вазирлар Маҳкамасининг 1996 йил 21 ноябрдаги 408-сон қарори билан тасдиқланган Чет эл фуқаролари ва фуқаролиги бўлмаган шахсларнинг Ўзбекистон Республикасига келишлари ва Ўзбекистон Республикасидан кетишлари Тартиби, Вазирлар Маҳкамасининг 2020 йил 28 сентябрдаги 593-сонли қарори билан тасдиқланган Ўзбекистон Республикаси ҳудудида чет эл фуқаролари ва фуқаролиги бўлмаган шахсларни вақтинча турган жойи бўйича рўйхатга олиш тартиби тўғрисидаги низом.

17. Вазирлар Маҳкамаси:

(а) 2025 йил якунига қадар Академияни жойлаштириш ҳамда бино ва хоналарни реконструкция қилиш, замонавий ускуналар, алоқа ва телекоммуникация воситалари билан жиҳозлаш, шунингдек, Академияни зарур ўқув-услубий база билан таъминлашни назарда тутадиган Ҳукумат қарорини қабул қилсин;

(б) 2025 йил 1 октябрдан бошлаб Судьялар олий мактабининг амалдаги ўқув муддатларини қисқартиришдан иқтисод қилинаётган маблағлар ҳисобидан Академия тузилмасига 20 тагача профессор-ўқитувчилар штат бирлигини киритиш чораларини кўрсин.

18. Ўзбекистон Республикаси Президентининг айрим ҳужжатларига 5-иловага мувофиқ ўзгартиришлар киритилсин.

19. Ўзбекистон Республикаси Президентининг 2019 йил 6 январдаги «Судьялик лавозимларига номзодларни тайёрлаш, судьялар ва судлар аппарати ходимларини қайта тайёрлаш, уларнинг малакасини ошириш тизимини тубдан такомиллаштириш чора-тадбирлари тўғрисида»ги ПҚ-4096-сон қарори ўз кучини йўқотган деб ҳисоблансин.

20. Мазкур Фармон ижросини самарали ташкил қилишга масъул ва шахсий жавобгар этиб Судьялар олий кенгаши раиси Х.Б. Ёдгоров белгилансин.

21. Фармон ижросини назорат қилиш Ўзбекистон Республикаси Президенти Администрацияси раҳбарининг суд тизимини ислоҳ қилиш бўйича ўринбосари Н.Ж. Хакимова зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2025 йил 21 август,

ПФ-141-сон

Ўзбекистон Республикаси Президентининг 2025 йил 21 августдаги ПФ-141-сон Фармонига
1-ИЛОВА

Ўзбекистон Республикаси Одил судлов академиясининг

ТУЗИЛМАСИ

Матбуот хизмати

Ректор

Академия кенгаши

Фуқаролик-ҳуқуқий фанлар кафедраси

Ўқув-услубий ишлар бўйича проректор

Илмий, инновациялар ва ахборот-таҳлилий ишлар бўйича проректор

Бухгалтерия

Жиноят-ҳуқуқий фанлар кафедраси

Ўқув-услубий бўлим

Илмий тадқиқотларни мувофиқлаштириш бўлими

Кадрлар бўлими

Маъмурий-ҳуқуқий фанлар кафедраси

Магистратура факультети

Ёшлар билан ишлаш, маънавият-маърифат бўлими

Девонхона ва архив

Малака ошириш ва қайта тайёрлаш факультети

Иқтисодий-ҳуқуқий фанлар кафедраси

Хўжалик бўлими

Халқаро ҳамкорлик бўлими

Инсон ҳуқуқлари, халқаро ҳуқуқ ва ижтимоий-гуманитар фанлар кафедраси

Ахборот-ресурс маркази

Касбий кўникмалар кафедраси

Ахборот-техникавий таъминот ва масофавий ўқитиш бўлими

Изоҳ:

Штат бирликларининг умумий чекланган сони (техник, хизмат кўрсатувчи ва ўқув-ёрдамчи ходимларни ҳисобга олмаган ҳолда) — 37 бирлик, шу жумладан, профессор-ўқитувчилар таркиби — 18 бирлик, бошқарув ходимлари — 19 бирлик.

Техник, хизмат кўрсатувчи ва ўқув-ёрдамчи ходимларнинг сони олий таълим муассасалари учун ўрнатилган нормативларга мувофиқ аниқланади.

Ўзбекистон Республикаси Президентининг 2025 йил 21 августдаги ПФ-141-сон Фармонига
2-ИЛОВА

Ўзбекистон Республикаси Одил судлов академияси ходимлари меҳнатига ҳақ тўлаш

РАЗРЯДЛАРИ

Лавозимлар номи	Меҳнатга ҳақ тўлаш разрядлари	Тариф коэффициенти
Ректор	19	17,276
Проректор	18	12,211
Факультет декани, кафедра мудири, кафедра профессори	18-5%
Кафедра доценти	17	9,965
Кафедра ўқитувчиси	17-5%
Бўлим бошлиғи, бош бухгалтер	16	6,490
Матбуот хизмати раҳбари	15	6,146
Бош мутахассис, девонхона ва архив мудири	14	5,810

Ўзбекистон Республикаси Президентининг 2025 йил 21 августдаги ПФ-141-сон Фармонига
3-ИЛОВА

Ўзбекистон Республикаси Одил судлов академиясининг

ШТАТ ЖАДВАЛИ

Лавозимлар номи	Штат бирликлари сони
Ректор	1
Проректор	2
Матбуот котиби	1
Ўқув-услубий бўлим	2
Бўлим бошлиғи	1
Бош мутахассис	1
Магистратура факультети	2
Декан	1
Бош мутахассис	1
Малака ошириш ва қайта тайёрлаш факультети	1
Декан	1
Фуқаролик-ҳуқуқий фанлар кафедраси	3
Кафедра мудири	1
Кафедра ўқитувчиси (профессор, доцент)	2
Жиноят-ҳуқуқий фанлар кафедраси	3
Кафедра мудири	1
Кафедра ўқитувчиси (профессор, доцент)	2
Иқтисодий-ҳуқуқий фанлар кафедраси	3
Кафедра мудири	1
Кафедра ўқитувчиси (профессор, доцент)	2
Маъмурий-ҳуқуқий фанлар кафедраси	3
Кафедра мудири	1
Кафедра ўқитувчиси (профессор, доцент)	2
Касбий кўникмалар кафедраси	2
Кафедра мудири	1
Кафедра ўқитувчиси (профессор, доцент)	1
Инсон ҳуқуқлари, халқаро ҳуқуқ ва ижтимоий-гуманитар фанлар кафедраси	4
Кафедра мудири	1
Кафедра ўқитувчиси (профессор, доцент)	3
Ёшлар билан ишлаш, маънавият-маърифат бўлими	1
Бош мутахассис	1
Халқаро ҳамкорлик бўлими	1
Бош мутахассис	1
Ахборот-ресурс маркази	1
Бош мутахассис	1
Ахборот-техникавий таъминот ва масофавий ўқитиш бўлими	1
Бош мутахассис	1
Илмий тадқиқотларни мувофиқлаштириш бўлими	1
Бош мутахассис	1
Бухгалтерия	2
Бош бухгалтер	1
Бош мутахассис	1
Кадрлар бўлими	1
Бош мутахассис	1
Девонхона ва архив	1
Девонхона ва архив мудири	1
Хўжалик бўлими	1
Бош мутахассис	1
Жами	37

Ўзбекистон Республикаси Президентининг 2025 йил 21 августдаги ПФ-141-сон Фармонига
4-ИЛОВА

Ўзбекистон Республикаси Одил судлов академиясининг фаолиятини самарали ташкил этиш бўйича

«ЙЎЛ ХАРИТАСИ»

Т/р	Чора-тадбирларнинг номланиши	Амалга ошириш шакли	Ижро муддати	Молиялаштириш манбалари	Масъул ижрочилар
I. Ўқишга қабул қилиш тизимини ташкил этиш ва таълим сифатини ошириш
1.	Ўзбекистон Республикаси Одил судлов академияси (кейинги ўринларда — Академия) Кенгаши таркибини шакллантириш, унинг мажлисини ўтказиш ва низомини тасдиқлаш.	Идоравий ҳужжат лойиҳаси	2025 йил сентябрь	-	Академия
2.	Академиянинг уставини ишлаб чиқиш ва тасдиқлаш.	Идоравий ҳужжат лойиҳаси	2025 йил сентябрь	-	Судьялар олий кенгаши (Х. Ёдгоров)
3.	Номзодларни касбий қайта тайёрлаш курсига қабул қилиш тартибини белгилаш.	Идоравий ҳужжат лойиҳаси	2025 йил август	-	Судьялар олий кенгаши (Х. Ёдгоров), Олий суд (Б. Исламов)
4.	Академияда кадрлар тайёрлаш, қайта тайёрлаш ва малакасини ошириш бўйича ўқув режалари, дастурлари ва малакавий талабларини Судьялар олий кенгаши билан келишилган ҳолда тасдиқлаш.	Комплекс чора-тадбирлар	2025 йил сентябрь	-	Академия Кенгаши
5.	Ҳудудларнинг ихтисослик бўйича судья кадрларга бўлган эҳтиёжини инобатга олган ҳолда касбий қайта тайёрлаш курсларига қабул қилишда ҳудудлар кесимида квоталарни белгилаш.	Ташкилий чора-тадбирлар	Доимий равишда	-	Судьялар олий кенгаши (Х. Ёдгоров)
6.	Академиянинг магистратурасида ўқитишнинг тўлов-контракт қийматини белгилаш.	Идоравий ҳужжат лойиҳаси	Белгиланган муддат доирасида	-	Академия Кенгаши, Судьялар олий кенгаши (Х. Ёдгоров)
7.	Академиянинг ўқув жараёнини рақамлаштириш, шу жумладан, машғулотлар жадвалини шакллантириш, имтиҳонларни ўтказиш, таълим олувчиларни баҳолаш ва рейтингини шакллантириш, таълим йўналишлари бўйича дастурий мажмуаларни жорий этиш, тингловчиларнинг узлуксиз касбий ривожланишини мониторинг қилиш тизимини жорий этиш бўйича техник топшириқ ва дастурий таъминотни ишлаб чиқиш.	Комплекс чора-тадбирлар	Алоҳида режа асосида	Академиянинг бюджет ва бюджетдан ташқари маблағлари	Судьялар олий кенгаши (Х. Ёдгоров), Рақамли технологиялар вазирлиги (Ш. Шерматов), Иқтисодиёт ва молия вазирлиги (И. Норқулов)
8.	Академияда видеоконференция ўтказиш, шунингдек, интерфаол электрон курсларни ишлаб чиқиш, онлайн баҳолаш ва сўровномалар ўтказиш учун ускуналар, қурилмалар ва дастурий маҳсулотларни харид қилиш ва ўрнатиш.	Комплекс чора-тадбирлар	2025 йил давомида	Академиянинг бюджет ва бюджетдан ташқари маблағлари	Рақамли технологиялар вазирлиги (Ш. Шерматов), Судьялар олий кенгаши (Х. Ёдгоров), Олий таълим, фан ва инновациялар вазирлиги (К. Шарипов)
9.	Академия имижини шакллантириш бўйича қуйидаги ташкилий чораларни кўриш: Академия расмий рамзларини тасдиқлаш; Академиянинг расмий веб-сайтини замон талаблари асосида ишга тушириш; жамоатчилик билан алоқаларни жадаллаштириш ва Академия ҳақидаги холис маълумотларни етказиш.	Ташкилий чора-тадбирлар	2025 йил давомида	Академиянинг бюджет ва бюджетдан ташқари маблағлари	Судьялар олий кенгаши (Х. Ёдгоров), Рақамли технологиялар вазирлиги (Ш. Шерматов), Иқтисодиёт ва молия вазирлиги (И. Норқулов)
10.	Академиянинг магистратура мутахассислиги номи ва шифрини Олий таълим, фан ва инновациялар вазирлиги томонидан тасдиқланадиган «Олий таълимнинг Давлат таълим стандартлари. Олий таълим йўналишлари ва мутахассисликлар классификатори»га киритиш.	Идоравий ҳужжат лойиҳаси	2026 йил февраль	-	Олий таълим, фан ва инновациялар вазирлиги (К. Шарипов), Судьялар олий кенгаши (Х. Ёдгоров)
11.	Қайта тайёрлаш курсларини муваффақиятли тамомлаган битирувчиларга бериладиган сертификат намунасини тасдиқлаш.	Ташкилий чора-тадбирлар	2025 йил октябрь	-	Академия Кенгаши
II. Ўқув жараёнини ривожлантириш ва моддий-техника базасини мустаҳкамлаш
12.	Академияни амалий тажрибага эга малакали мутахассислар, ўқитишнинг замонавий шакллари ва усулларини қўллай оладиган илмий-педагог кадрлар билан тўлдириш.	Ташкилий чора-тадбирлар	2025 йил сентябрь, доимий равишда	-	Судьялар олий кенгаши (Х. Ёдгоров), Академия Кенгаши
13.	Академияни жойлаштириш ҳамда бино ва хоналарни реконструкция қилиш, замонавий ускуналар, телекоммуникация воситалари билан жиҳозлашни, шунингдек, Академияни зарур ўқув-методик базаси билан таъминлашни назарда тутувчи Ҳукумат қарорини қабул қилиш.	Норматив-ҳуқуқий ҳужжат лойиҳаси	2025 йил декабрь	Давлат бюджети маблағлари, Суд ҳокимияти органларини ривожлантириш жамғармаси маблағлари	Вазирлар Маҳкамаси (Ж. Қўчқоров)
14.	2025 йил 1 октябрдан бошлаб Академия тузилмасига 20 тагача штат бирлигини киритиш чораларини кўриш.	Норматив-ҳуқуқий ҳужжат лойиҳаси	2025 йил сентябрь, белгиланган муддат доирасида	Давлат бюджети маблағлари	Вазирлар Маҳкамаси (Ж. Қўчқоров)
15.	Ўзбекистон Республикаси Судьялар олий кенгаши ҳузуридаги Судьялар олий мактабининг мулкини, жумладан автотранспорт воситаларини Академия балансига ўтказиш.	Ташкилий чора-тадбирлар	2025 йил сентябрь	-	Судьялар олий кенгаши (Х. Ёдгоров), Академия
16.	Академия ўқитувчилари ва тингловчиларининг етакчи хорижий таълим ва илмий муассасаларда малака ошириш курслари ва стажировкани ўташи ҳамда ўқишида кўмаклашиш.	Ташкилий чора-тадбирлар	Доимий равишда	Академиянинг бюджет ва бюджетдан ташқари маблағлари	Ташқи ишлар вазирлиги (Б. Саидов), Судьялар олий кенгаши (Х. Ёдгоров)
17.	Академия буюртмаси бўйича унинг ўқув ва илмий жараёнида иштирок этувчи хорижий мутахассислар, профессор-ўқитувчилар таркиби, илмий ходимларига кириш визаларининг консуллик ва бошқа йиғимларни ундирмасдан белгиланган тартибда расмийлаштирилишини таъминлаш.	Ташкилий чора-тадбирлар	Академиянинг мурожаати асосида	-	Ташқи ишлар вазирлиги (Б. Саидов)
18.	Академиянинг таълим ва илмий-тадқиқот фаолиятини амалга ошириш мақсадида Олий суднинг «Адолат» ахборот тизимлари комплексидан фойдаланиш имкониятини яратиш.	Ташкилий чора-тадбирлар	2025 йил сентябрь	-	Олий суд (Б. Исламов), Академия Кенгаши
19.	Амалга оширилаётган ислоҳотлар ҳамда янги методика ва тактикалар асосида янги авлод дарсликлари, ўқув ва ўқув-амалий қўлланмаларни тайёрлаш.	Ташкилий чора-тадбирлар	2026 йил апрель, доимий равишда	Академиянинг бюджет ва бюджетдан ташқари маблағлари	Судьялар олий кенгаши (Х. Ёдгоров), Академия Кенгаши
20.	Академиянинг юқори тезликдаги Интернет тармоғига уланишини таъминлаш.	Ташкилий чора-тадбирлар	Академия талабига кўра	Академиянинг бюджет ва бюджетдан ташқари маблағлари	Рақамли технологиялар вазирлиги (Ш. Шерматов), Судьялар олий кенгаши (Х. Ёдгоров)
21.	Академияни «Электрон таълим» миллий тармоғига, Алишер Навоий номидаги Ўзбекистон Миллий кутубхонасининг электрон ахборот-кутубхона фондига бепул асосда уланишини таъминлаш.	Ташкилий чора-тадбирлар	2025 йил сентябрь, доимий равишда	-	Судьялар олий кенгаши (Х. Ёдгоров), Олий таълим, фан ва инновациялар вазирлиги (К. Шарипов), Ўзбекистон Миллий кутубхонаси (У. Тешабаева)
22.	Бошқарув, профессор-ўқитувчилар, илмий, ўқув-ёрдамчи, техник ва хизмат кўрсатувчи ходимларни моддий рағбатлантириш махсус жамғармасини шакллантириш ва унинг маблағларидан фойдаланиш тартибини, шунингдек, ушбу маблағлар ҳисобидан Академия ходимларига ойлик устамалар белгилаш мезонларини тасдиқлаш.	Идоравий ҳужжат лойиҳаси	2025 йил сентябрь	-	Академия Кенгаши
III. Сифатли илмий-тадқиқот ва инновацион фаолият учун шарт-шароитлар яратиш
23.	Академия ҳузурида Илмий даражалар бериш бўйича илмий кенгашларни ташкил этиш. Бунда Академия ректорига илмий кенгаш таркибига жалб этилган мутахассисларни рағбатлантиришни амалга ошириш ҳуқуқини бериш.	Ташкилий чора-тадбирлар	2025 йил ноябрь Доимий равишда	-	Олий таълим, фан ва инновациялар вазирлиги ҳузуридаги Олий аттестация комиссияси (А. Юсупов), Судьялар олий кенгаши (Х. Ёдгоров)
24.	Академияда қуйидагиларни назарда тутувчи халқаро ҳамкорлик тизимини яратиш: халқаро ҳамкорлик ва икки томонлама шартномалар доирасида хорижий давлатларнинг кадрларини тайёрлаш, қайта тайёрлаш ва уларнинг малакасини ошириш курсларини ташкил этиш; ўқув жараёнига хорижий мутахассисларни кенг жалб қилиш; хорижий таълим ва илмий-тадқиқот ташкилотлари билан кадрларни тайёрлаш ва уларнинг малакасини ошириш, қўшма таълим дастурлари доирасида ҳамкорлик тўғрисида меморандум ва битимларни тузиш.	Ташкилий чора-тадбирлар	Доимий равишда	Академиянинг бюджет ва бюджетдан ташқари маблағлари	Судьялар олий кенгаши (Х. Ёдгоров), Ташқи ишлар вазирлиги (Б. Саидов)

Изоҳ: мазкур «Йўл харитаси»даги тадбирлар тегишли чора-тадбирнинг соҳаси ва предметига қараб қайта кўриб чиқилиши, шунингдек, бир ҳужжатга бирлаштирилиши мумкин. Бунда икки ёки ундан ортиқ чора-тадбирлар бирлаштирилган ҳолларда, ушбу масалаларнинг охирги бажариш муддати қўшма чора-тадбирларнинг бажарилиши учун белгиланган охирги муддат ҳисобланади. Норматив-ҳуқуқий ҳужжатлар лойиҳаларини ишлаб чиқиш жараёнида «Йўл харитаси»да кўрсатилган тадбирлар мазмунига мос келадиган бошқа масалалар ҳам ҳисобга олиниши мумкин.

Ўзбекистон Республикаси Президентининг 2025 йил 21 августдаги ПФ-141-сон Фармонига
5-ИЛОВА

Ўзбекистон Республикаси Президентининг айрим ҳужжатларига киритилаётган ўзгартиришлар

1. Ўзбекистон Республикаси Президентининг 2018 йил 13 июлдаги «Суд-ҳуқуқ тизимини янада такомиллаштириш ва суд ҳокимияти органларига ишончни ошириш чора-тадбирлари тўғрисида»ги ПФ-5482-сон Фармони 5-бандининг тўртинчи хатбошиси қуйидаги таҳрирда баён этилсин:

«Бунда Олий суд матбуот хизмати раҳбари, Одил судлов академияси ректори ва проректорларига алоҳида меҳнат шароитлари учун устама тўланмайди».

2. Ўзбекистон Республикаси Президентининг 2020 йил 7 декабрдаги ПФ-6127-сон Фармони билан тасдиқланган Ўзбекистон Республикаси Судьялар олий кенгашининг тузилмасидаги «Судьялар олий мактаби» блоки «Одил судлов академияси» блоки билан алмаштирилсин.

3. Ўзбекистон Республикаси Президентининг 2021 йил 13 январдаги «Суд органлари фаолиятини молиялаштириш тизимини тубдан такомиллаштириш чора-тадбирлари тўғрисида»ги ПФ-6134-сон Фармонида:

1-банднинг биринчи хатбошисидаги «Судьялар олий мактаби» сўзлари «Одил судлов академияси» сўзлари билан алмаштирилсин;

2-банддан «Судьялар олий мактаби,» сўзлари чиқариб ташлансин;

4-илова ўз кучини йўқотган деб ҳисоблансин.

4. Ўзбекистон Республикаси Президентининг 2017 йил 4 майдаги «Ўзбекистон Республикаси Судьялар олий кенгаши фаолиятини моддий-техника ва молиявий жиҳатдан таъминлаш тўғрисида»ги ПҚ-2951-сон қарорининг 1-банди учинчи хатбошиси қуйидаги таҳрирда баён этилсин:

«Ўзбекистон Республикаси Судьялар олий кенгашининг раиси Суд ҳокимияти органларини ривожлантириш жамғармаси кузатув кенгашининг таркибига киради».

5. Ўзбекистон Республикаси Президентининг 2017 йил 23 августдаги «Судлар ва адлия органлари фаолиятини моддий-техник ва молиявий таъминлаш тартибини такомиллаштириш тўғрисида»ги ПҚ-3240-сон қарорида:

4-банднинг иккинчи хатбошисидаги «Ўзбекистон Республикаси Судьялар олий кенгаши ҳузуридаги Судьялар олий мактаби (кейинги ўринларда — Олий мактаб) директори» сўзлари «Ўзбекистон Республикаси Одил судлов академияси (кейинги ўринларда — Академия) ректори» сўзлари билан алмаштирилсин;

5-банддаги «Олий мактаб» ва «Олий мактабнинг» сўзлари тегишинча «Академия» ва «Академиянинг» сўзлари билан алмаштирилсин.

6. Ўзбекистон Республикаси Президентининг 2017 йил 18 июлдаги «Одил судлов саройи» комплексини ташкил этиш чора-тадбирлари тўғрисида»ги Ф-4997-сон фармойишининг 1-банди иккинчи хатбошисидан «Судьялар олий кенгаши ҳузуридаги Одил судлов муаммоларини ўрганиш тадқиқот маркази,» сўзлари чиқариб ташлансин.

(Қонунчилик маълумотлари миллий базаси, 23.08.2025 й., 06/25/141/0772-сон)