Ўзбекистон Республикаси Президентининг

Қарори

Автомобиль йўлларида инсон хавфсизлигини ишончли таъминлаш ва ўлим ҳолатларини кескин камайтириш чора-тадбирлари тўғрисида

Мамлакатимизда сўнгги йилларда йўл ҳаракати хавфсизлигини таъминлаш тизимини такомиллаштириш соҳасида кенг қамровли ташкилий-амалий ишлар амалга оширилди.

Шу билан бирга, кўрилаётган чора-тадбирларга қарамасдан, ўлимга олиб келган йўл-транспорт ҳодисаларининг сони ҳали ҳам юқори бўлиб, автомобиль йўлларида хавфсизликни таъминлаш тизимини тубдан ислоҳ қилиш зарурлигини кўрсатмоқда.

Жумладан, йўл инфратузилмасини ҳаракат хавфсизлигини таъминлашнинг замонавий талабларига тўлиқ мувофиқлаштириш, ушбу соҳадаги қоидабузарликларнинг барвақт профилактикасига йўналтирилган самарали тизимни йўлга қўйиш, шунингдек, инсон омилини истисно қилувчи рақамли технологияларни кенг жорий этиш талаб этилмоқда.

2022 — 2025 йилларда Ўзбекистон Республикасида жамоат хавфсизлигини таъминлаш тизимини ривожлантириш стратегиясига мувофиқ, шунингдек, Янги Ўзбекистон шароитида автомобиль йўлларида инсон ҳаёти ва соғлиғини ҳар қандай ҳодисалардан кафолатли ҳимоя қилиш мақсадида:

1. Қуйидагилар мамлакатимизда йўл ҳаракати хавфсизлигини таъминлашнинг долзарб йўналишлари этиб белгилансин:

автомобиль йўллари инфратузилмасини такомиллаштириш ва уларнинг сифатини яхшилаш, йўл ҳаракати иштирокчиларининг «пиёда — жамоат транспорти — велотранспорт — автотранспорт» устуворлиги асосида хавфсиз ҳаракатланиши учун ишончли шарт-шароитлар яратиш;

ҳайдовчиларни тайёрлаш, қайта тайёрлаш ва уларнинг малакасини ошириш тизимига инновацион педагогик технологияларни жорий қилган ҳолда, ўқув жараёнини сифат жиҳатидан янги босқичга олиб чиқиш;

ҳайдовчи ва пиёдаларнинг йўл ҳаракати қоидаларига риоя қилиш маданиятини ошириш, ҳар қандай қоидабузарлик учун жазо муқаррарлигини таъминлаш;

йўл ҳаракати қоидалари асосларини болаликдан сингдиришни йўлга қўйиш, ушбу амалиётни мактабгача таълим ташкилотлари ва умумтаълим мактабларида жорий этиш;

йўл ҳаракатини ташкил этишни тўлиқ рақамлаштириш, илғор ахборот-коммуникация технологияларини жорий қилган ҳолда, янги бошқарув ва назорат тизимларини татбиқ қилиш.

2. Йўл ҳаракати қоидаларига сўзсиз риоя қилинишини таъминлаш ҳамда уларни такроран бузиш ҳолатларининг олдини олиш мақсадида 2022 йил 1 декабрдан бошлаб қуйидаги тартибни назарда тутувчи ҳайдовчиларга йўл ҳаракати қоидабузарлиги учун жарима балларини ҳисоблаш тизими жорий этилсин:

ҳар бир йўл ҳаракати қоидабузарлиги учун 12 ой давомида алоҳида жарима баллари ҳисоблаб борилади;

ҳисобланган жарима баллари белгиланган миқдордан ошган ҳолларда ҳайдовчи маълум муддатга транспорт воситасини бошқариш ҳуқуқидан ўрнатилган тартибда маҳрум қилинади;

муайян давр мобайнида йўл ҳаракати қоидабузарлиги содир этмаган ҳайдовчиларга кейинчалик ҳисобланган жарима балларини қисқартириш орқали рағбатлантириш чоралари қўлланилади.

Ички ишлар вазирлиги (П.Р. Бобожонов), Адлия вазирлиги (Р.Қ. Давлетов) бир ой муддатда илғор хорижий тажрибани инобатга олган ҳолда, ҳайдовчиларга йўл ҳаракати қоидабузарлиги учун жарима балларини ҳисоблаш тизимини жорий этишни назарда тутувчи қонунчилик ҳужжатлари лойиҳаларини киритсин.

3. Ҳайдовчиларни тайёрлаш тизимини тубдан такомиллаштириш ва сифат жиҳатидан янги босқичга олиб чиқиш мақсадида шундай тартиб ўрнатилсинки, унга мувофиқ:

ташкилий-ҳуқуқий шаклидан қатъи назар, ҳайдовчиларни тайёрлаш, қайта тайёрлаш ва уларнинг малакасини ошириш фаолиятини амалга оширувчи барча таълим муассасалари (кейинги ўринларда — автомактаблар) ва имтиҳон марказларига фаолиятни амалга ошириш учун лицензия Ички ишлар вазирлиги томонидан берилади;

автомактабларнинг инновацион педагогик технологияларга асосланган ўқув дастурларини ишлаб чиқиш, шунингдек, уларнинг ўқитувчи, ҳайдовчи-йўриқчи ва мураббийларини шартнома асосида қайта тайёрлаш ва малакасини ошириш ишлари Ички ишлар вазирлиги Академияси томонидан амалга оширилади.

Ички ишлар вазирлиги (А.И. Икрамов, Б.Т. Абдуллаев):

бир ой муддатда автомактаблар ва имтиҳон марказларига қўйиладиган талаб ва мезонларни қайта кўриб чиқиб, уларнинг ўқув фаолияти сифатини оширишга қаратилган қатъий чораларни назарда тутувчи Ҳукумат қарори лойиҳасини киритсин;

икки ой муддатда Ички ишлар вазирлиги Академиясида автомактабларнинг ўқитувчи, ҳайдовчи-йўриқчи ва мураббийларини қайта тайёрлаш ва малакасини ошириш курсларини ташкил этиш билан боғлиқ барча зарур ўқув-услубий ва моддий-техник базани яратсин.

Ички ишлар вазири П.Р. Бобожонов зиммасига автомактаблар ва имтиҳон марказлари фаолияти бўйича янги жорий этилаётган тизимни самарали йўлга қўйиш ҳамда ҳайдовчиларни сифатли тайёрлашни ташкил этиш бўйича шахсий жавобгарлик юклансин.

4. Белгилансинки:

а) Нукус ва Тошкент шаҳарлари, вилоятлар марказларида чорраҳаларни тўлиқ рақамли бошқарув тизимига ўтказиш бўйича шахсий масъулият Қорақалпоғистон Республикаси Вазирлар Кенгаши раиси, Тошкент шаҳар ва вилоятлар ҳокимлари зиммасига юкланади;

б) Нукус ва Тошкент шаҳарлари, вилоятлар, туман (шаҳар)лар марказларида йўл белгилари, кўрсаткичлари ва светофорларни ўрнатиш, йўл чизиқларини чизиш, пиёдалар ўтиш жойларини белгилаш орқали йўл ҳаракати воситаларини тартибга солишга ички ишлар органлари йўл ҳаракати хавфсизлиги бўлинмалари (кейинги ўринларда — йўл ҳаракати хавфсизлиги бўлинмалари) масъул ҳисобланади;

Олдинги таҳрирга қаранг.

в) Қорақалпоғистон Республикаси Вазирлар Кенгаши, Тошкент шаҳар ва вилоятлар ҳокимликлари Ички ишлар вазирлиги (П.Р. Бобожонов) билан биргаликда икки ой муддатда, шу жумладан давлат-хусусий шериклик асосида инвесторларни жалб қилган ҳолда, чорраҳаларда рақамли бошқарув тизимини қуйидаги даврларда жорий қилиш бўйича ташкилий чора-тадбирларни белгилайди:

(4-банд «в» кичик бандининг биринчи хатбошиси Ўзбекистон Республикаси Президентининг 2023 йил 28 сентябрдаги ПҚ-318-сонли қарори таҳририда)

2023 йил якунига қадар пойтахтнинг барча чорраҳаларида, шунингдек, Нукус шаҳри ва вилоятлар марказларининг йирик асосий серқатнов чорраҳаларида;

2024 йил якунига қадар Нукус шаҳри ва вилоятлар марказларининг барча чорраҳаларида;

Олдинги таҳрирга қаранг.

г) туман (шаҳар) ҳокимликларига ўз ҳудудларидаги автомобиль йўлларида йўл ҳаракати қоидалари бузилишини қайд этувчи махсус автоматлаштирилган фото ва видео қайд этиш техника воситаларини ўрнатиш ҳуқуқи берилади. Мазкур техника воситалар орқали қайд этилган қоидабузарликлар учун ундирилган жарима суммасининг 30 фоизи бевосита туман (шаҳар) маҳаллий бюджетининг алоҳида ғазна ҳисобварақларига йўналтирилади ҳамда ушбу маблағлар йўл ҳаракатини рақамлаштириш, йўл инфратузилмасини ривожлантириш, шунингдек, йўл-патруль хизмати ходимларининг қўшимча штатларини киритишга сарфланади.

Ички ишлар вазирлиги (Б.Т. Абдуллаев) Қорақалпоғистон Республикаси Вазирлар Кенгаши, Тошкент шаҳар ва вилоятлар ҳокимликлари билан биргаликда бир ой муддатда транспорт ва пиёдалар оқими, пиёдалар билан боғлиқ содир этилган йўл-транспорт ҳодисаларининг таҳлили асосида туманлар ва шаҳарлардаги аҳоли гавжум ҳудудларда пиёдалар ўтиш жойларига пиёдалар бошқарадиган светофорларни 2026 йил якунига қадар ўрнатилишини назарда тутувчи манзилли дастурни тасдиқласин ва ижросини тўлиқ таъминласин;

(4-банднинг «г» кичик банди Ўзбекистон Республикаси Президентининг 2023 йил 28 сентябрдаги ПҚ-318-сонли қарори таҳририда)

Олдинги таҳрирга қаранг.

д) махсус автоматлаштирилган фото ва видео қайд этиш техника воситалари орқали қайд этилган йўл ҳаракати қоидалари бузилишлари учун ундирилиб, Қорақалпоғистон Республикаси республика бюджети ва вилоятлар маҳаллий бюджетларига йўналтирилган жарималар маблағлари алоҳида ғазна ҳисобварақларида жамланади ҳамда йўл инфратузилмаси ва йўл ҳаракати хавфсизлиги тизимини ривожлантириш, йўл ҳаракатини рақамлаштириш, шунингдек, Республикада «Хавфсиз шаҳар» ягона интеграциялашган тизимларини яратиш ва ривожлантириш концепцияси доирасида ишлаб чиқиладиган манзилли йиллик дастурларнинг чора-тадбирларини молиялаштириш мақсадларида ишлатилади.

(4-банд Ўзбекистон Республикаси Президентининг 2023 йил 28 сентябрдаги ПҚ-318-сонли қарорига асосан «д» кичик банд билан тўлдирилган)

5. Ички ишлар вазирлигининг қуйидаги таклифлари маъқуллансин:

Қорақалпоғистон Республикаси Вазирлар Кенгаши, вилоятлар ҳокимликларининг махсус эксплуатация-монтаж бўлинмалари ҳамда Тошкент шаҳар ҳокимлигининг Йўл ҳаракатини ташкил этиш марказини (кейинги ўринларда — эксплуатация-монтаж бўлинмалари) икки ой муддатда тегишинча ҳудудий ички ишлар органларининг йўл ҳаракати хавфсизлиги бошқармалари ҳузурига ўтказиш;

ички ишлар вазирига йўл ҳаракати хавфсизлиги бўлинмаларига бюджетдан ташқари маблағлар ҳисобидан малакали хорижий мутахассисларни маслаҳатчи сифатида шартнома асосида жалб қилиш ҳуқуқини бериш;

«Uzavtomotobelgi» давлат унитар корхонасида йўл ҳаракатини ташкил этишнинг техник воситаларини ишлаб чиқаришни йўлга қўйиш ва ушбу соҳада рақобат муҳитини шакллантириш;

Ички ишлар вазирлиги Йўл ҳаракати хавфсизлиги хизмати тузилмасида Йўл инфратузилмасини назорат қилиш бошқармасини, ҳудудий йўл ҳаракати хавфсизлиги бошқармалари тузилмаларида йўл инфратузилмасини назорат қилиш бўлимларини ички ишлар органларининг чекланган штат бирликлари ҳисобидан ташкил этиш.

6. Қорақалпоғистон Республикаси Вазирлар Кенгаши, Тошкент шаҳар ва вилоятлар ҳокимликлари эксплуатация-монтаж бўлинмаларини йўл ҳаракати хавфсизлиги бошқармалари ҳузурига ўтказишда:

эксплуатация-монтаж бўлинмаларининг бино ва иншоотларини, уларнинг ёндош ҳудудлари, моддий-техника базасини, шу жумладан янги замонавий махсус техника билан таъминлаган ҳолда топшириш чораларини кўрсин;

эксплуатация-монтаж бўлинмаларининг мавжуд кредитор ва дебитор қарзлари тўланишини, маънан эскирган ва яроқсиз ҳолга келган моддий-техника воситалари ҳисобдан чиқарилишини таъминласин.

Ички ишлар вазирлиги (Б.Т. Абдуллаев):

икки ой муддатда эксплуатация-монтаж бўлинмаларининг фаолиятини тартибга солувчи Ҳукумат қарори лойиҳасини Вазирлар Маҳкамасига киритсин;

эксплуатация-монтаж бўлинмалари тегишли бино ва иншоотлари, уларнинг ёндош ҳудудлари, зарур моддий-техника базаси билан таъминланган ҳолда қабул қилинишини ташкил этсин;

уч ой муддатда эксплуатация-монтаж бўлинмаларининг фаолиятини танқидий қайта кўриб чиқиб, йўл ҳаракатини ташкил этишнинг техник воситаларини тўлиқ ўрнатиш ва уларнинг доимий ишлашини таъминлаш бўйича янгича иш усулларини жорий этсин.

Молия вазирлиги (Т.А. Ишметов) бир ой муддатда:

Ички ишлар вазирлиги билан биргаликда эксплуатация-монтаж бўлинмалари бошлиқлари ва уларнинг бир нафар ўринбосари лавозимлари ушбу бўлинмаларнинг мавжуд штат бирликлари ҳисобидан офицерлик таркибидаги ходим лавозимларига ўзгартирилишини таъминласин;

ушбу қарорга мувофиқ Қорақалпоғистон Республикаси Вазирлар Кенгаши, Тошкент шаҳар ва вилоятлар ҳокимликлари ҳамда Ички ишлар вазирлигининг харажатлар сметаларига тегишли ўзгартиришлар киритсин.

7. 2022 йил 5 апрелдан бошлаб Ички ишлар вазирлиги Йўл ҳаракати хавфсизлиги хизмати ҳузурида юридик шахс ташкил этмаган ҳолда «Хавфсиз йўл ва хавфсиз пиёда» республика жамғармаси (кейинги ўринларда — Жамғарма) ташкил этилсин.

Қуйидагилар Жамғарма маблағларини шакллантириш манбалари этиб белгилансин:

1-иловага мувофиқ миқдорларда йўл ҳаракатини ташкил этиш соҳасида ундириладиган жарима, олинадиган йиғим ва тўловлар;

эксплуатация-монтаж бўлинмалари учун ҳар йили бюджет параметрларида дастурлар асосида алоҳида тадбирлар учун кўзда тутиладиган маблағлар;

Жамғарманинг вақтинча бўш турган маблағларини тижорат банкларига депозит ҳисобрақамларига жойлаштиришдан олинадиган даромадлар;

давлат, хорижий ва халқаро ташкилотлар томонидан ажратиладиган грантлар;

жисмоний ва юридик шахсларнинг ҳомийлик ва хайрия тарзидаги маблағлари;

халқаро молиявий институтлар ва банклар томонидан ажратиладиган кредитлар;

қонунчилик ҳужжатларида тақиқланмаган бошқа манбалар.

Белгилансинки, Жамғарма маблағлари фақат қуйидагилар учун мақсадли сарфланади:

йўл ҳаракатини ташкил этишнинг техник воситалари, уларнинг эҳтиёт қисмлари, ўрнатиш учун белгиланган конструкция ва қурилиш материаллари ҳамда махсус бўёқларини харид қилиш;

шаҳарлар ва бошқа аҳоли пунктлари кўчаларида йўл чизиқларини чизиш, йўл ҳаракатини ташкил этишнинг техник воситаларини ўрнатиш, алмаштириш, сақлаш, демонтаж қилиш ва уларга техник хизмат кўрсатишни молиялаштириш;

Олдинги таҳрирга қаранг.

эксплуатация-монтаж бўлинмаларининг биноларини қуриш, капитал таъмирлаш ва реконструкция қилиш ҳамда моддий-техника базасини мустаҳкамлаш, шу жумладан замонавий махсус техника воситалари билан таъминлаш, уларга иш ҳажмидан келиб чиққан ҳолда маълум муддатга қўшимча штатлар киритиш, шартномалар асосида мутахассисларни жалб қилиш, уларнинг ходимлари, ишчи ва хизматчилари учун ҳар ойлик ва бир марталик рағбатлантириш тизимини жорий этиш;

(7-банднинг ўн учинчи хатбошиси Ўзбекистон Республикаси Президентининг 2023 йил 20 ноябрдаги ПФ-197-сонли Фармони таҳририда — Қонунчилик маълумотлари миллий базаси, 20.11.2023 й., 06/23/197/0865-сон)

йўл ҳаракати хавфсизлиги соҳасидаги илғор хорижий тажрибаларни ўрганиш, йўл инфратузилмасини ривожлантириш йўналишидаги лойиҳаларни молиялаштириш;

мактабгача таълим ҳамда халқ таълими вазирликларига қарашли мактабгача таълим ташкилотлари ва умумий ўрта таълим муассасаларининг тарбияланувчи ва ўқувчиларида йўл ҳаракати қоидалари бўйича бошланғич билимларни шакллантиришга қаратилган моддий-техник ва ўқув базасини яратиш, шунингдек, маҳаллаларда болаларга йўл ҳаракати қоидаларини амалий ўргатиш майдончаларига йўл белгиларини ўрнатиш ва йўл чизиқларини чизиш чора-тадбирларини молиялаштириш;

Олдинги таҳрирга қаранг.

йўллар бўйида жойлашган мактаблар олдида, камида тўрт тасмали йўллардаги пиёдалар ўтиш жойларида ҳамда йўл-транспорт ҳодисалар ўчоқларида белгиланган тезликни ошириш, пиёдаларни ўтказмаслик ва фуқароларнинг йўлни белгиланмаган жойдан кесиб ўтиши каби қоидабузарликларни аниқловчи махсус фото-видео қайд этиш воситаларини ўрнатиш;

(7-банд Ўзбекистон Республикаси Президентининг 2023 йил 20 ноябрдаги ПФ-197-сонли Фармонига асосан ўн олтинчи хатбоши билан тўлдирилган — Қонунчилик маълумотлари миллий базаси, 20.11.2023 й., 06/23/197/0865-сон)

Олдинги таҳрирга қаранг.

имконияти чекланган ва ногиронлиги бўлган шахсларнинг хавфсиз ва тўсиқсиз ҳаракатланиши учун чорраҳаларни овозли ақлли светофорлар, тактил қопламалар, пиёдалар ўтиш йўлагидаги тасмалар, резина пандуслар, кўча модуль тўсиқлари, махсус йўл белгилар билан жиҳозлашни молиялаштириш.

(7-банд Ўзбекистон Республикаси Президентининг 2024 йил 18 июлдаги ПҚ-266-сонли қарорига асосан ўн еттинчи хатбоши билан тўлдирилган — Қонунчилик маълумотлари миллий базаси, 19.07.2024 й., 07/24/266/0533-сон)

8. Автомобиль йўлларида ҳаракатни ташкил этиш, бошқариш ва хавфсизликни таъминлаш соҳасидаги фаолият самарадорлигини ошириш мақсадида Йўл ҳаракати хавфсизлигини таъминлаш бўйича республика махсус комиссияси ва унинг ҳудудий махсус комиссиялари (кейинги ўринларда — махсус комиссиялар) 2 ва 3-иловаларга мувофиқ тузилсин.

Махсус комиссиялар зиммасига қуйидаги асосий вазифалар юклатилсин:

йўл ҳаракати хавфсизлиги соҳасида фуқароларнинг ҳаёти ва соғлиғини ишончли ҳимоя қилиш, йўл инфратузилмасининг хавфсизлик талабларига тўлиқ жавоб беришини таъминлаш;

ҳудудларда йўл ҳаракатини самарали ташкил этиш ҳолатини мунтазам равишда баҳолаб бориш, ушбу соҳада давлат органлари ва маҳаллий ҳокимликларнинг самарали фаолият кўрсатишини назорат қилиш;

йўл-транспорт ҳодисалари сабабларини чуқур ўрганиш, йўлларнинг хавфли авария участкалари рўйхатини тасдиқлаш орқали келгусида уларнинг олдини олиш юзасидан илмий асослантирилган таклифлар тайёрлаш тизимини яратиш;

йўл ҳаракати хавфсизлигини таъминлаш соҳасига замонавий ахборот технологияларини жорий этиш, инсон омили ва коррупция ҳолатларини истисно этувчи автоматлаштирилган назорат тизимларини оммалаштиришга доир тадбирларни белгилаш;

ҳудудларда йўл инфратузилмасини яхшилаш, йўл-транспорт ҳодисаларининг сонини қисқартириш бўйича дастурлар лойиҳалари ишлаб чиқилишини ташкиллаштириш ва келишиш.

Йўл ҳаракати хавфсизлигини таъминлаш бўйича республика махсус комиссияси тўғрисидаги низоми 4-иловага мувофиқ тасдиқлансин.

Республика махсус комиссияси (А.Н. Арипов):

бир ой муддатда Қорақалпоғистон Республикаси Вазирлар Кенгаши раиси, Тошкент шаҳар ва вилоятлар ҳокимлари раислигида ҳудудий махсус комиссияларнинг намунавий низомини тасдиқласин;

ҳар чоракда давлат органлари ва маҳаллий ҳокимликлар томонидан йўл ҳаракати хавфсизлигини таъминлаш соҳасида амалга оширилаётган ишларни, мавжуд камчиликларни танқидий муҳокама қилиб борсин ва тегишли чоралар кўрилишини таъминласин;

ҳар йили маҳаллий ҳокимликларнинг ўз ҳудудларида автомобиль йўллари инфратузилмасини такомиллаштириш ва йўл-транспорт ҳодисаларини кескин камайтириш бўйича аниқ механизмларни назарда тутувчи манзилли чора-тадбирларини ўз ичига олган «йўл харита»ларини тасдиқлаб, уларнинг ижроси устидан қатъий назорат олиб борсин.

9. Шундай тартиб ўрнатилсинки, унга кўра:

йўл ҳаракати хавфсизлиги бўлинмалари махсус комиссияларнинг ишчи органи ҳисобланади;

ишчи органлар мунтазам равишда тегишли давлат органларининг йўл ҳаракати хавфсизлигини таъминлаш бўйича амалга ошираётган ишларини таҳлил қилиб боради ва махсус комиссияларнинг йиғилишларида муҳокама қилиш учун ҳужжатларни тайёрлайди;

Олдинги таҳрирга қаранг.

ҳудудий махсус комиссиялар ҳар ярим йилда йўлларнинг ҳолати ва мавжуд инфратузилма, авария ўчоқлари, қоидабузарликларнинг таҳлилидан келиб чиқиб, ҳаракат хавфсизлиги, транспорт ва йўл соҳаларига масъул идоралар раҳбарлари фаолиятини танқидий ўрганади, Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашларига муҳокама қилиш учун киритади ва натижалари бўйича республика махсус комиссиясига ҳисобот тақдим этади.

(9-банднинг тўртинчи хатбошиси Ўзбекистон Республикаси Президентининг 2024 йил 2 февралдаги ПФ-28-сонли Фармони таҳририда — Қонунчилик маълумотлари миллий базаси, 06.02.2024 й., 06/24/28/0099-сон)

10. Ҳудудларда йўл ҳаракатини самарали ташкил этиш ҳолатини баҳолаш ва бу борада маҳаллий ҳокимият органларининг масъулиятини кучайтириш мақсадида 2022 йил 1 июлдан бошлаб, республиканинг барча туман (шаҳар)лари кесимида «Хавфсиз йўл» индекси (кейинги ўринларда — индекс)ни юритиш амалиёти йўлга қўйилсин.

Белгилансинки:

индекс доирасида йўл инфратузилмаси ва йўл ҳаракати қоидаларига риоя қилинишининг ҳолати махсус комиссиялар томонидан 5-иловага мувофиқ 29 та индикатор бўйича ҳар чорак якунида баҳолаб борилади;

туман (шаҳар)лар индекс кўрсаткичлари асосида йўлларда ҳаракат хавфсизлигини ташкил этишнинг ҳолати бўйича «яшил», «сариқ» ва «қизил» тоифаларга ажратилади;

индексни юритиш вазифаси йўл ҳаракати хавфсизлиги бўлинмалари зиммасига юкланади.

Вазирлар Маҳкамаси (А.Н. Арипов) икки ой муддатда етакчи илмий ташкилотлар, олимлар ва мутахассисларни жалб қилган ҳолда, индексни юритиш методологияси ишлаб чиқилиши ва тасдиқланишини таъминласин.

11. Ички ишлар вазирлиги (П.Р. Бобожонов) манфаатдор вазирлик ва идоралар билан биргаликда:

а) йўл ҳаракати хавфсизлигини ишончли таъминлаш, йўл-транспорт ҳодисаларининг барвақт олдини олиш мақсадида «Умр тезликдан муҳимдир» ва «Хавфсизлик камари — ҳаёт гарови» шиорлари остида комплекс тарғибот ва ташвиқот ишларини ташкил этсин;

б) бир ой муддатда қуйидагиларни назарда тутган ҳолда, ўқувчилар орасида йўл ҳаракати қоидалари тарғиботини кучайтиришга қаратилган Ҳукумат қарори лойиҳасини киритсин:

«Йўл ҳаракати интизоми болаликдан бошланади» шиори остида мактабгача таълим муассасалари тарбияланувчилари ва мактаб ўқувчиларига йўлларда, чорраҳаларда ва пиёдалар ўтиш жойларида ҳаракатланиш асосларини амалий-кўргазмали тарзда ўргатиш, уларнинг онгига болалигидан бошлаб йўл ҳаракати интизомини сингдириш;

мактабларда «Ҳаракат хавфсизлиги синфхоналари»ни, маҳаллаларда «Йўл ҳаракатини ўргатиш майдончалари»ни ташкил этиш;

в) икки ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

12. Ўзбекистон Республикаси Президентининг ва Ўзбекистон Республикаси Ҳукуматининг айрим қарорларига 6-иловага мувофиқ ўзгартириш ва қўшимчалар киритилсин.

13. Мазкур қарорнинг ижросини самарали ташкил қилишга масъул ва шахсий жавобгар этиб ички ишлар вазири П.Р. Бобожонов, Қорақалпоғистон Республикаси Вазирлар Кенгаши раиси, Тошкент шаҳар ва вилоятлар ҳокимлари белгилансин.

Қарор ижросини назорат қилиш Ўзбекистон Республикасининг Бош вазири А.Н. Арипов ва Ўзбекистон Республикаси Президентининг маслаҳатчиси Б.Д. Исламов зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2022 йил 4 апрель,

ПҚ-190-сон

Ўзбекистон Республикаси Президентининг 2022 йил 4 апрелдаги ПҚ-190-сон қарорига
1-ИЛОВА

Йўл ҳаракатини ташкил этиш соҳасида ундириладиган жарима, олинадиган йиғим ва тўловларнинг «Хавфсиз йўл ва хавфсиз пиёда» республика жамғармасига ўтказиладиган

МИҚДОРЛАРИ

Т/р	Жарима, йиғим ва тўловнинг номи	Жамғармага ўтказиладиган миқдор (фоизда)
1.	Йўл ҳаракати қоидаларини бузганлик учун жарималар суммаси (давлат ижрочилари томонидан ижро иши бўйича ундирилган маблағлар бундан мустасно)	5
2.	Автоматлаштирилган фото ва видео қайд этиш техника воситалари орқали қайд этилган йўл ҳаракати қоидабузарлиги учун жарималар суммаси (Ўзбекистон Республикаси Президентининг 2018 йил 30 октябрдаги «Йўл ҳаракати хавфсизлигини таъминлаш соҳасида инвестициявий лойиҳани амалга ошириш чора-тадбирлари тўғрисида»ги ПҚ-3989-сон қарори билан жорий этилган лойиҳа бўйича)	25
3.	Автотранспорт воситалари ойналарининг тусини ўзгартиришга (қорайтиришга) рухсатнома олиш ва ўзгартириш учун йиғимлар	20
4.	Жисмоний ва юридик шахсларнинг автотранспорт воситаларига ўрнатилган видеорегистраторлар, видеокузатув ва тасвирга олиш техника воситалари ҳамда мобиль қурилмалар орқали қайд этилган йўл ҳаракати қоидабузарликлари учун жарималар суммаси	100
5.	Автотранспорт воситалари учун давлат рақами белгилари оширилган тўлов ставкалари бўйича аукциондан олиниб, аукционга қўйилган бошланғич нархи бўйича умумий тартибдаги реализациясидан олинган тушумлар	50

Олдинги таҳрирга қаранг.

Ўзбекистон Республикаси Президентининг 2022 йил 4 апрелдаги ПҚ-190-сон қарорига
2-ИЛОВА

Йўл ҳаракати хавфсизлигини таъминлаш бўйича республика махсус комиссияси

ТАРКИБИ

А.Н. Арипов	—	Ўзбекистон Республикасининг Бош вазири, комиссия раиси
П.Р. Бобожонов	—	ички ишлар вазири, комиссия раисининг ўринбосари
И.Р. Махкамов	—	транспорт вазири, комиссия раисининг ўринбосари
А.Ҳ. Қўлдошев	—	фавқулодда вазиятлар вазири
А.Ж. Ташкулов	—	адлия вазири
И.Ю. Абдурахмонов	—	олий таълим, фан ва инновациялар вазири
Х.У. Умарова	—	мактабгача ва мактаб таълими вазири
А.А. Абдухакимов	—	экология, атроф-муҳитни муҳофаза қилиш ва иқлим ўзгариши вазири
Б.Б. Валиев	—	Бош прокурорнинг биринчи ўринбосари
И.И. Норқулов	—	иқтисодиёт ва молия вазирининг биринчи ўринбосари
А.К. Шадманов	—	соғлиқни сақлаш вазирининг биринчи ўринбосари
Б.Т. Абдуллаев	—	ички ишлар вазирининг ўринбосари — Жамоат хавфсизлиги департаменти бошлиғи
Ж.Т. Махсудов	—	рақамли технологиялар вазирининг ўринбосари
Ш.С. Хидоятов	—	қурилиш ва уй-жой коммунал хўжалиги вазирининг биринчи ўринбосари
Ж.Ю. Турсунов	—	автомобиль йўллари қўмитаси раиси
А.Э. Бурханов	—	Коррупцияга қарши курашиш агентлиги директори
О.Қ. Абдурахманов	—	Тошкент давлат транспорт университети ректори
А.Д. Хаджаев	—	Ўзбекистон Миллий телерадиокомпанияси раиси
О.Ч. Саидов	—	Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати бошлиғи, комиссия котиби

Изоҳ: Комиссия аъзолари бошқа ишга ўтган тақдирда, унинг таркибига ушбу лавозимларга янги тайинланган ёки зиммасига тегишли функцияларни бажариш юкланган шахслар киритилади.

(2-илова Ўзбекистон Республикаси Президентининг 2023 йил 28 сентябрдаги ПҚ-318-сонли қарори таҳририда)

Олдинги таҳрирга қаранг.

Ўзбекистон Республикаси Президентининг 2022 йил 4 апрелдаги ПҚ-190-сон қарорига
3-ИЛОВА

Йўл ҳаракати хавфсизлигини таъминлаш бўйича ҳудудий махсус комиссияларнинг намунавий

ТАРКИБИ

Лавозими бўйича	—	Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимлари, Ҳудудий комиссия раиси
Лавозими бўйича	—	Қорақалпоғистон Республикаси ички ишлар вазири, вилоятлар ички ишлар бошқармалари бошлиқлари, Тошкент шаҳар ва Тошкент вилояти ички ишлар бош бошқармалари бошлиқлари, Ҳудудий комиссия раисининг ўринбосари
Лавозими бўйича	—	Қорақалпоғистон Республикаси транспорт вазири, вилоятлар ва Тошкент шаҳар транспорт бошқармалари бошлиқлари, Ҳудудий комиссия раисининг ўринбосари
Лавозими бўйича	—	Қорақалпоғистон Республикаси, вилоятлар ва Тошкент шаҳар фавқулодда вазиятлар бошқармалари бошлиқлари
Лавозими бўйича	—	Қорақалпоғистон Республикаси ички ишлар вазири ўринбосари, вилоятлар ички ишлар бошқармалари бошлиқлари ўринбосари, Тошкент шаҳар ва Тошкент вилояти ички ишлар бош бошқармаси бошлиғи ўринбосари — Жамоат хавфсизлиги хизмати бошлиғи
Лавозими бўйича	—	Қорақалпоғистон Республикаси адлия вазири, вилоятлар ва Тошкент шаҳар адлия бошқармалари бошлиқлари
Лавозими бўйича	—	Қорақалпоғистон Республикаси олий таълим, фан ва инновациялар вазири, вилоятлар ва Тошкент шаҳар олий таълим, фан ва инновациялар бошқармалари бошлиқлари
Лавозими бўйича	—	Қорақалпоғистон Республикаси, вилоятлар ва Тошкент шаҳар прокурорларининг биринчи ўринбосарлари
Лавозими бўйича	—	Қорақалпоғистон Республикаси иқтисодиёт ва молия вазири, вилоятлар ва Тошкент шаҳар ҳокимликлари молия бош бошқармалари бошлиқлари
Лавозими бўйича	—	Қорақалпоғистон Республикаси соғлиқни сақлаш вазири, вилоятлар ва Тошкент шаҳар соғлиқни сақлаш бошқармалари бошлиқлари
Лавозими бўйича	—	Қорақалпоғистон Республикаси мактабгача ва мактаб таълими вазири, вилоятлар ва Тошкент шаҳар мактабгача ва мактаб таълими бошқармалари бошлиқлари
Лавозими бўйича	—	Рақамли технологиялар вазирлигининг ҳудудий бўлинмалари раҳбарлари
Лавозими бўйича	—	Қорақалпоғистон Республикаси қурилиш ва уй-жой коммунал хўжалиги вазири, вилоятлар ва Тошкент шаҳар қурилиш ва уй-жой коммунал хўжалиги бош бошқармалари бошлиқлари
Лавозими бўйича	—	Қорақалпоғистон Республикаси экология, атроф-муҳитни муҳофаза қилиш ва иқлим ўзгариши вазири, вилоятлар ва Тошкент шаҳар экология, атроф-муҳитни муҳофаза қилиш ва иқлим ўзгариши бошқармалари бошлиқлари
Лавозими бўйича	—	Қорақалпоғистон Республикаси ва вилоятларнинг автомобиль йўллари бош бошқармалари бошлиқлари
Лавозими бўйича	—	транспорт техникуми (коллежи) директори
Лавозими бўйича	—	Қорақалпоғистон Республикаси ва вилоятлар телерадиокомпаниялари директорлари
Лавозими бўйича	—	Йўл ҳаракати хавфсизлиги бошқармаси бошлиғи, Комиссия котиби

(3-илова Ўзбекистон Республикаси Президентининг 2023 йил 28 сентябрдаги ПҚ-318-сонли қарори таҳририда)

Ўзбекистон Республикаси Президентининг 2022 йил 4 апрелдаги ПҚ-190-сон қарорига
4-ИЛОВА

Йўл ҳаракати хавфсизлигини таъминлаш бўйича республика махсус комиссияси тўғрисида

НИЗОМ

1-боб. Умумий қоидалар

1. Мазкур Низом йўл ҳаракати хавфсизлигини таъминлаш бўйича республика махсус комиссиясининг (кейинги ўринларда — Махсус комиссия) фаолиятини белгилайди.

2. Махсус комиссия ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Олий Мажлиси палаталари қарорларига, Ўзбекистон Республикаси Вазирлар Маҳкамасининг қарорлари ва фармойишларига ҳамда мазкур Низомга амал қилади.

3. Махсус комиссия Ўзбекистон Республикаси Президенти қарори билан ташкил этилади ва доимий асосда фаолият юритади.

4. Махсус комиссия ўзига юклатилган вазифалар ва функцияларни амалга оширишда давлат органлари ва ташкилотлари, маҳаллий давлат ҳокимияти органлари, жамоат бирлашмалари, илмий-тадқиқот институтлари ва бошқа ташкилотлар билан ўзаро ҳамкорлик қилади.

5. Махсус комиссия томонидан йўл ҳаракати хавфсизлигини таъминлаш масалалари бўйича қабул қилинган қарорларнинг бажарилиши барча учун мажбурийдир.

6. Махсус комиссия йўл ҳаракати хавфсизлигини таъминлаш билан боғлиқ масалаларни ўрганишга ва тегишли ҳисоботларни тайёрлашга мутахассисларни, олимларни, вазирликлар ва идораларнинг масъул ходимларини жалб этади.

2-боб. Махсус комиссиянинг асосий вазифалари ва функциялари

7. Қуйидагилар Махсус комиссиянинг асосий вазифалари ҳисобланади:

йўл ҳаракати хавфсизлиги соҳасида фуқароларнинг ҳаёти ва соғлиғини ишончли ҳимоя қилиш, йўл инфратузилмасини хавфсизлик талабларига тўлиқ жавоб беришини таъминлаш;

ҳудудларда йўл ҳаракатини самарали ташкил этиш ҳолатини мунтазам равишда баҳолаб бориш, ушбу соҳада давлат органлари ва маҳаллий ҳокимликларнинг манзилли фаолият кўрсатишини назорат қилиш;

Махсус комиссия қонунчилик ҳужжатларида белгиланган бошқа вазифаларни ҳам амалга оширади.

8. Махсус комиссия ўзига юклатилган вазифаларга мувофиқ, қуйидаги асосий функцияларни амалга оширади:

автомобиль йўлларидаги йўл ҳаракати хавфсизлиги кўрсаткичлари (йўл-транспорт ҳодисалари, уларда тан жароҳати олган ва ҳалок бўлганлар сони) устидан объектив мониторинг юритилишини ташкил этади;

йўл ҳаракати хавфсизлиги кўрсаткичлари салбий бўлган ҳудудларда йўл ҳаракати хавфсизлигини таъминлаш доирасидаги қонунчилик ижросини таҳлил қилади;

йўл-транспорт ҳодисалари содир бўлган ҳудудлардаги аҳоли яшаш пунктлари, таълим ташкилотларида профилактика ва тушунтириш ишлари олиб борилишини таъминлаш юзасидан назоратни амалга оширади;

Қорақалпоғистон Республикаси, Тошкент шаҳри ва вилоятларда йўл инфратузилмаси ва йўл ҳаракати қоидаларига риоя қилинишининг ҳолатини ҳар чорак якунида индекснинг индикаторлари бўйича баҳолаб боради;

индекс натижаларига кўра «сариқ» ва «қизил» тоифаларга киритилган туманлар (шаҳарлар)да йўл инфратузилмасини ривожлантириш ва йўл ҳаракати қоидаларига риоя қилинишининг ҳолатини яхшилаш бўйича комплекс чора-тадбирлар дастури ишлаб чиқилиши ва амалга оширилишини ташкил этади;

индекс натижаларига кўра йўлларда ҳаракат хавфсизлигини ташкил этишнинг ҳолати бўйича «қизил» тоифага киритилган туманлар (шаҳарлар) салмоғи юқори бўлган вилоятлар ҳокимлари (Қорақалпоғистон Республикаси Вазирлар Кенгаши раиси, Тошкент шаҳар ҳокими)нинг масъулиятини ошириш чораларини белгилайди, жумладан, зарур ҳолларда уларга нисбатан ўрнатилган тартибда интизомий жазо чоралари қўлланилишини таъминлайди;

йўл ҳаракати хавфсизлигини таъминлаш доирасида илмий-тадқиқот институтлари, махсус ваколатли давлат органлари, маҳаллий давлат ҳокимияти органлари ҳамда бошқа мутасадди вазирлик ва идоралар томонидан амалга оширилган ишлар ҳамда йўл қўйилган камчиликларни ўрганади ва муҳокама қилади;

махсус ваколатли давлат органлари, маҳаллий давлат ҳокимияти органлари ҳамда бошқа вазирлик ва идораларнинг йўл ҳаракати хавфсизлигини таъминлаш соҳасига оид қонунчилик ҳужжатларини такомиллаштириш бўйича таклифлар ишлаб чиқади;

йўл ҳаракати хавфсизлигини таъминлаш соҳасига доир долзарб илмий тадқиқот йўналишларини белгилайди;

йўл ҳаракати хавфсизлигини таъминлаш соҳасидаги илмий тадқиқотларнинг натижалари жорий этилишини амалий қўллаб-қувватлайди;

алоҳида долзарб бўлган йўналишларда ўтказиладиган илмий ва тадқиқот изланишларига юқори малакали олим ва мутахассисларни жалб этиш ҳамда бундай тадбирларни молиялаштириш масалаларини ҳал қилади;

йўл-транспорт ҳодисасининг келиб чиқиш сабабларини ҳар томонлама, айниқса, йўл участкаси ва автотранспорт воситасининг техник ҳолати, ҳайдовчининг малакаси, об-ҳаво шароити каби муҳим омилларни илмий нуқтаи назардан чуқур таҳлил қилиш ишларини ташкил этади;

Тошкент ва Нукус шаҳарлари ҳамда вилоятлар марказларида, шунингдек, юқори аҳамият касб этувчи йўналишларда йўл ҳаракатини автоматик бошқариш тизимлари кенг жорий этилишини таъминлайди;

йўл ҳаракати хавфсизлиги соҳасидаги қонунчиликка риоя этиш устидан назорат тизимини инсон ва коррупция омилларини истисно этувчи автоматлаштирилган техник ва технологик воситалар орқали юритилишини йўлга қўйишга доир тадбирларни белгилайди;

йўл ҳаракати хавфсизлигини такомиллаштириш, шунингдек, йўл-транспорт ҳодисаларининг олдини олиш, уларга имкон берган шарт-шароитларни аниқлашга мўлжалланган замонавий ахборот тизимларини яратишни ташкил этади.

3-боб. Махсус комиссия фаолиятини ташкил этиш

9. Махсус комиссия раиси қуйидаги ваколатларни амалга оширади:

Махсус комиссиянинг фаолиятига раҳбарлик қилади;

Махсус комиссиянинг йиғилишини (сайёр йиғилишини) чақириш тўғрисида қарор қабул қилади ва кун тартибини белгилайди;

Махсус комиссия ва ҳудудий комиссияларнинг фаолиятини назорат қилади;

Махсус комиссияга юкланган вазифалар ва функциялар бажарилиши юзасидан комиссия аъзоларининг фаолиятини мувофиқлаштиради;

Махсус комиссия томонидан қабул қилинган қарорларни тасдиқлайди;

мазкур Низом талабларини бажармаётган Махсус комиссия аъзоларига нисбатан тегишли чоралар кўради;

Махсус комиссия баённомалари ижро этилиши устидан мониторинг олиб боради ва назорат қилади;

Махсус комиссиянинг фаолиятини самарали ташкил этишга оид бошқа функцияларни бажаради.

10. Махсус комиссия раисининг ўринбосарлари:

Махсус комиссия йиғилишини (сайёр йиғилишини) ташкил этади;

Махсус комиссия фаолиятининг асосий йўналишлари юзасидан таклифлар тайёрланишини ташкил этади;

махсус ваколатли давлат органлари, маҳаллий давлат ҳокимияти органлари ҳамда бошқа вазирлик ва идоралар билан биргаликда Махсус комиссия томонидан қабул қилинган қарорларнинг бажарилишини таъминлайди;

тегишли ахборот ва таклифларни Махсус комиссия раисига киритади;

Махсус комиссия раиси бўлмаганда ёки унинг топшириғи бўйича Махсус комиссия йиғилишларига раислик қилади;

Махсус комиссиянинг самарали иш олиб боришини таъминлаш мақсадида бошқа функцияларни ҳам бажаради.

11. Махсус комиссия аъзолари:

Махсус комиссия йиғилишлари (сайёр йиғилишлари) кун тартибидаги масалалар бўйича муҳокамаларда иштирок этади;

йўл ҳаракати хавфсизлигини таъминлаш соҳасига доир долзарб масалалар юзасидан Махсус комиссияга таклифлар киритади;

Махсус комиссия томонидан кўриб чиқиладиган масалалар юзасидан хулосалар тайёрлайди;

Махсус комиссиянинг қарорлари ва қўйилган вазифаларнинг ижроси якунлари тўғрисидаги ҳисоботни Махсус комиссия раисига тақдим этади;

Махсус комиссиянинг самарали иш олиб боришини таъминлашга оид бошқа функцияларни бажаради.

12. Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати Махсус комиссиянинг ишчи органи (кейинги ўринларда — Ишчи орган) ҳисобланади.

13. Ишчи орган:

Махсус комиссия фаолиятининг ташкилий-техник таъминотини амалга оширади;

иш режалари лойиҳаларини тайёрлайди ва Махсус комиссия муҳокамасига киритади;

Махсус комиссия раиси билан йиғилиш (сайёр йиғилиш) ўтказиш муддати ва жойини, шунингдек, таклиф этилганлар рўйхатини келишади, Махсус комиссия аъзоларини ва таклиф этилган шахсларни йиғилиш (сайёр йиғилиш) санаси, вақти ва ўтказиладиган жойи ҳақида хабардор қилади;

Махсус комиссия йиғилишида (сайёр йиғилишида) кўриб чиқиш учун материаллар ўз вақтида тайёрланишини таъминлайди;

Махсус комиссия йиғилишининг (сайёр йиғилишининг) кун тартибидаги масалалар бўйича таҳлилий материалларни тайёрлайди;

Махсус комиссия ишининг ўз вақтида ва сифатли бажарилиши учун зарур бўлган ахборот ва материалларни махсус ваколатли давлат органлари, маҳаллий давлат ҳокимияти органлари ҳамда бошқа вазирлик ва идоралардан олади;

Махсус комиссия ваколатига кирадиган масалалар юзасидан унинг қарорлари лойиҳаларини тайёрлайди;

Махсус комиссияга юридик ва жисмоний шахслардан йўл ҳаракати хавфсизлигини таъминлаш масалалари бўйича тушган мурожаатларни умумлаштиради ҳамда кўриб чиқиш учун тегишли вазирлик ва идораларга юборади;

Махсус комиссия фаолиятига оид тасдиқланган режалар ижросини мониторинг қилиб боради;

Махсус комиссия аъзоларининг таклифлари, шунингдек, мулоҳазаларини қабул қилади ва тизимлаштиради;

Махсус комиссия йиғилиши баённомаларини расмийлаштиради ва тасдиқланган баённомалар нусхалари Махсус комиссия аъзолари, ваколатли давлат органлари, маҳаллий давлат ҳокимияти органлари ҳамда бошқа вазирлик ва идораларга юборилишини таъминлайди;

Махсус комиссия қарорлари ижроси мониторингини олиб боради ва унинг якунларини Махсус комиссия йиғилишида (сайёр йиғилишида) кўриб чиқиш учун киритади;

Махсус комиссиянинг қарорларига ҳамда Махсус комиссия раиси ва ўринбосарларининг топшириқларига мувофиқ бошқа функцияларни ҳам бажаради.

14. Махсус комиссиянинг аъзолари йиғилиш ўтказилишидан камида икки иш куни олдин йиғилиш (сайёр йиғилиш) ўтказилиш вақти, жойи ва кун тартиби тўғрисида хабардор қилиниши лозим.

15. Йиғилишни (сайёр йиғилишни) Махсус комиссия раиси (раис йўқлигида унинг кўрсатмаси асосида ўринбосари) олиб боради.

16. Махсус комиссия аъзолари йиғилишларда шахсан иштирок этади. Махсус комиссия аъзоси асоссиз сабабларга кўра уч мартадан ортиқ йиғилишларда иштирок этмаган тақдирда, унга нисбатан Махсус комиссия раиси томонидан чора кўрилади.

17. Йиғилиш кун тартибидаги масалалар бўйича қарорлар очиқ овоз бериш орқали кўпчилик овоз билан қабул қилинади. Махсус комиссиянинг ҳар бир аъзоси, шу жумладан раис ҳам битта овозга эга бўлади.

18. Махсус комиссия йиғилишда аъзоларнинг камида учдан икки қисми иштирок этганда қарор қабул қилиш ҳуқуқига эга.

19. Махсус комиссия йиғилишлари (сайёр йиғилишлари) Махсус комиссиянинг иш режасига мувофиқ, бироқ ҳар чоракда камида бир марта, шунингдек, комиссия ваколатига тегишли бўлган шошилинч масалаларни кўриб чиқиш зарурати юзага келганда навбатдан ташқари ўтказилади.

Махсус комиссия йиғилишлари (сайёр йиғилишлари) баённома билан расмийлаштирилади.

20. Махсус комиссия йиғилишларига (сайёр йиғилишларига) кўриб чиқилаётган масалалардан келиб чиққан ҳолда, унинг таркибига киритилмаган давлат бошқаруви органлари, хўжалик юритувчи субъектлар, маҳаллий ижро ҳокимият органлари, илмий ва таълим ташкилотлари раҳбарлари ҳамда мутахассислари таклиф этилиши мумкин.

21. Махсус комиссия аъзоларининг иш самарадорлигини баҳолаш мезонлари ва уларни рағбатлантириш механизмлари, даврийлиги ҳамда молиявий манбалари Махсус комиссия йиғилишларида муҳокама қилиниб, тегишли қарор қабул қилиш орқали белгиланади.

4-боб. Махсус комиссия қарорларини қабул қилиш ва уларнинг бажарилишини таъминлаш

22. Махсус комиссия қарорлари унинг йиғилишида (сайёр йиғилишида) иштирок этаётган аъзоларнинг кўпчилик овози билан қабул қилинади. Овозлар тенг бўлганда раиснинг овози ҳал қилувчи ҳисобланади.

Махсус комиссиянинг ҳар бир аъзоси қабул қилинаётган қарор юзасидан ўз фикрини ёзма равишда билдиришга ҳақли.

23. Қарорларни тезкор қабул қилиш мақсадида Махсус комиссия раиси алоҳида масалалар юзасидан Махсус комиссия аъзолари билан сўровнома ўтказиш орқали қарор қабул қилиш ҳуқуқига эга.

24. Махсус комиссия йиғилишида (сайёр йиғилишида) қабул қилинган қарорлар баённома билан расмийлаштирилади. Ушбу баённома раис томонидан тасдиқланади ва бир ҳафта муддатда Махсус комиссия аъзолари, ваколатли давлат органлари, маҳаллий давлат ҳокимияти органлари ҳамда бошқа вазирлик ва идораларга юборилади.

25. Махсус комиссия томонидан қабул қилинган қарордан норози бўлган Махсус комиссия аъзолари (аъзоси) тегишли қарор қабул қилинган кундан бошлаб уч иш куни мобайнида ўз таклифлари ёки фикрларини ёзма равишда ишчи органга тақдим этиши мумкин.

26. Махсус комиссия қарорларининг бажарилишини назорат қилиш ишчи орган томонидан амалга оширилади.

27. Махсус комиссия ўтказилган йиғилиш якунлари бўйича Ўзбекистон Республикаси Президентига ахборот киритади.

5-боб. Якунловчи қоида

28. Ушбу Низом талаблари бузилишида айбдор бўлган шахслар қонун ҳужжатларига мувофиқ жавобгарликка тортилади.

Ўзбекистон Республикаси Президентининг 2022 йил 4 апрелдаги ПҚ-190-сон қарорига
5-ИЛОВА

Туманлар (шаҳарлар)да йўл ҳаракатини самарали ташкил этиш ҳолатини баҳолаш бўйича «Хавфсиз йўл» индексининг

ИНДИКАТОРЛАРИ

I. Йўл инфратузилмаси бўйича:

1. Йўл қопламасининг ҳолати.

2. Йўл белгилари билан жиҳозланганлик даражаси.

3. Йўл кўрсаткичлари билан жиҳозланганлик даражаси.

4. Пиёдалар ўтиш жойларининг тартибга солинганлиги.

5. Ер ости ва ер усти пиёдалар ўтиш жойлари мавжудлиги.

6. Пиёдалар йўлаклари мавжудлиги.

7. Велосипед йўлаклари мавжудлиги.

8. Автотураргоҳлар билан таъминланганлиги.

9. Ётиқ чизиқларнинг аҳволи.

10. Йўлни ажратувчи тўсиқ билан жиҳозланганлиги.

11. Йўлнинг ёритилганлиги.

12. Таълим муассасалари атрофининг жиҳозланганлик даражаси.

13. Таълим муассасаларида йўл ҳаракати хавфсизлиги бўйича синфхоналарнинг мавжудлиги.

14. Таълим муассасаларида йўл ҳаракати хавфсизлиги бўйича майдончаларнинг мавжудлиги.

15. Светофорларнинг мавжудлиги.

16. Йўл бўйининг кўкаламзорлаштирилганлиги.

17. Йўналтирувчи устунчалар ўрнатилганлиги.

18. Қоидабузарликларни аниқловчи мосламалар билан таъминланганлиги.

19. Видеокузатув камералари билан жиҳозланганлиги.

20. Сунъий нотекисликлар мавжудлиги.

21. Ҳудудда жойлашган корхона ва ташкилотларда йўл ҳаракати қоидаларига риоя этилиш ҳолати.

22. Йўл ҳаракати қоидаларини тарғибот ва ташвиқот қилувчи кўргазмали воситалар билан жиҳозланганлик даражаси.

23. Йўл ҳаракати қоидаларини тарғиб қилиш бўйича профилактик тадбирларнинг ўтказилиши даражаси.

24. Йўл ҳаракати хавфсизлигини таъминлашга қонун билан тақиқланмаган ҳомийлик маблағларининг жалб этилиш ҳолати.

II. Йўл ҳаракати қоидаларига риоя қилиниши бўйича:

25. Юз минг аҳолига нисбатан йўл транспорт ҳодисаларининг сони.

26. Юз минг аҳолига нисбатан йўл транспорт ҳодисалари оқибатида вафот этганлар сони.

27. Авария ўчоқлари сони.

28. Юз минг аҳолига нисбатан йўл ҳаракати қоидаларини бузиш билан боғлиқ маъмурий ҳуқуқбузарликлар сони.

29. Тирбанд жойлар сони.

Изоҳ: Мазкур индикаторлар бўйича туманлар (шаҳарлар)да йўл ҳаракатини самарали ташкил этиш ҳолатини баҳолаш «Хавфсиз йўл» индексини юритишнинг алоҳида методологиясига мувофиқ амалга оширилади.

Ўзбекистон Республикаси Президентининг 2022 йил 4 апрелдаги ПҚ-190-сон қарорига
6-ИЛОВА

Ўзбекистон Республикаси Президенти ва Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар

1. Ўзбекистон Республикаси Президентининг 2017 йил 12 апрелдаги «Ички ишлар органлари фаолиятини янада такомиллаштиришга доир ташкилий чора-тадбирлар тўғрисида»ги ПҚ-2883-сон қарорининг 6-банди қуйидаги таҳрирда баён этилсин:

«6. Ўзбекистон Республикаси Ички ишлар вазирлигининг Ўзбекистон Республикаси Ички ишлар вазирлиги Маданий-маърифий ишлар маркази, «ЖАР» спорт-соғломлаштириш мажмуаси, шунингдек, даволаш-профилактика ва тиббиёт муассасалари томонидан улар фаолияти билан боғлиқ бўлган пуллик хизматлар кўрсатиш ҳуқуқини бериш ҳақидаги таклифига розилик берилсин».

2. Ўзбекистон Республикаси Президентининг 2017 йил 11 июлдаги «Йўл ҳаракати хавфсизлигини таъминлаш тизимини янада такомиллаштириш чора-тадбирлари тўғрисида»ги ПҚ-3127-сон қарорида:

а) 2-банд «талабларига мувофиқ» сўзларидан кейин «умумий фойдаланишдаги автомобиль йўллари ва хўжаликлараро қишлоқ автомобиль йўллари учун» сўзлари билан тўлдирилсин;

б) 3-банднинг учинчи хатбошиси қуйидаги таҳрирда баён этилсин:

«республикада йўл белгилари, ахборот кўрсаткичлари, йўл ҳаракатини тартибга солишнинг бошқа техник воситаларини ишлаб чиқариш рақобат тўғрисидаги қонунчилик ҳужжатларига тўлиқ риоя қилган ҳолда тадбиркорлик субъектлари томонидан амалга оширилади»;

в) 8-банднинг биринчи хатбошиси ўз кучини йўқотган деб ҳисоблансин.

3. Ўзбекистон Республикаси Президентининг 2018 йил 30 октябрдаги «Йўл ҳаракати хавфсизлигини таъминлаш соҳасида инвестициявий лойиҳани амалга ошириш чора-тадбирлари тўғрисида»ги ПҚ-3989-сон қарорида:

а) 3-банд қуйидаги таҳрирда баён этилсин:

«3. Белгилансинки, ўрнатилган автоматлаштирилган тизим ёрдамида аниқланган йўл ҳаракати қоидаларини бузганлик учун жарима суммаси қуйидагича йўналтирилади:

30 фоиз — йўл ҳаракати қоидалари бузилиши қайд этилган жойнинг маҳаллий бюджетига, шундан (100 фоиз деб ҳисобланганда) 50 фоизи миқдорида йўл инфратузилмасини ривожлантириш ва автоматлаштирилган тизимни электр энергияси билан таъминлаш учун тўловларни амалга ошириш мақсадларида фойдаланилади;

20 фоиз — Ўзбекистон Республикаси Ички ишлар вазирлигининг бюджетдан ташқари жамғармасига;

25 фоиз — Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг «Хавфсиз йўл ва хавфсиз пиёда» республика жамғармасига;

25 фоиз — шартномада белгиланган инвестициявий харажатларнинг ҳажми тўлиқ қоплангунига қадар Инвестор ҳисобига.

Белгилансинки, инвестициявий харажатлар тўлиқ қопланганидан сўнг, мазкур қарорда назарда тутилган жарима суммасининг Инвесторга тегишли улуши Ўзбекистон Республикаси Ички ишлар вазирлигининг бюджетдан ташқари жамғармасига йўналтирилади»;

б) 4-банд қуйидаги мазмундаги бешинчи хатбоши билан тўлдирилсин:

«Инвестор билан ҳамкорликда Қорақалпоғистон Республикаси ва вилоятларда кўк ва қизил рангли ялт-ялт этувчи чироқ-маёқча, махсус товушли ишоралари ҳамда автоматлаштирилган жамоат тартибини назорат қилиш ва йўл ҳаракати қоидабузарликларини аниқлаш мосламалари ўрнатилган патруль автомобилларини амалиётга жорий қилиш»;

в) 7-банднинг иккинчи хатбошиси қуйидаги таҳрирда баён қилинсин:

«2025 йил 1 январга қадар Ўзбекистон Республикасида ишлаб чиқарилмайдиган, белгиланган тартибда шакллантириладиган рўйхатга мувофиқ олиб кириладиган жиҳозлар, бутловчи буюмлар, дастурий таъминот, ёрдамчи техника ва қурилиш материаллари — божхона божидан».

4. Ўзбекистон Республикаси Президентининг 2021 йил 15 апрелдаги «Ички ишлар органлари учун профессионал кадрларни тайёрлашнинг сифат жиҳатидан янги тизимини жорий этиш бўйича чора-тадбирлар тўғрисида»ги ПҚ-5076-сон қарорида:

а) 2-банд ўз кучини йўқотган деб ҳисоблансин;

б) 9-банднинг «в» кичик банди қуйидаги таҳрирда баён этилсин:

«в) Академия бошлиғига:

тўлов-контракт асосида ўқитиш маблағлари ҳисобидан ўқув жараёнига шартнома асосида, биринчи навбатда етакчи хорижий таълим муассасаларидан юқори илмий-педагогик маҳоратга эга бўлган малакали мутахассисларни жалб этиш ва меҳнат бозорида амалдаги конъюнктурани инобатга олган ҳолда уларнинг меҳнатига ҳақ тўлаш миқдорини белгилаш;

ҳайдовчиларни тайёрлаш, қайта тайёрлаш ва уларнинг малакасини ошириш фаолиятини амалга оширувчи таълим муассасаларининг ўқитувчи, ҳайдовчи-йўриқчи ва мураббийларини шартнома асосида қайта тайёрлаш ва малакасини оширишдан тушган маблағлар ҳисобидан Академиянинг моддий-техника ва ўқув базасини ривожлантириш, шунингдек, шартнома асосида ўқув жараёнига педагог кадрлар ва мутахассисларни жалб этиш».

5. Вазирлар Маҳкамасининг 2010 йил 2 апрелдаги «Вазирликлар, давлат қўмиталари ва идораларнинг бюджетдан ташқари жамғармаларига маблағлар ажратишни тартибга солиш чора-тадбирлари тўғрисида»ги 62-сон қарорига 1-иловада:

а) 9¹-позиция қуйидаги таҳрирда баён этилсин:

«
9¹.	Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг Давлат йўл ҳаракати хавфсизлиги хизмати моддий-техника базасини ривожлантириш, ходимларини рағбатлантириш ва мукофотлаш жамғармаси	Йўл ҳаракати қоидаларини бузганлик учун жарималар суммаси, махсус автоматлаштирилган фото ва видео қайд этиш техника воситалари қайд этган йўл ҳаракати қоидабузарлиги учун жарималар суммасидан ташқари	10
9¹.		Автотранспорт воситалари ойналарининг тусини ўзгартиришга (қорайтиришга) рухсатнома бериш ва ўзгартириш бўйича йиғимлар	40
			»;

б) қуйидаги мазмундаги 9²-позиция билан тўлдирилсин:

«
9².	Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг «Хавфсиз йўл ва хавфсиз пиёда» республика жамғармаси	Йўл ҳаракати қоидаларини бузганлик учун жарималар суммаси (давлат ижрочилари томонидан ижро иши бўйича ундирилганлар маблағлар бундан мустасно)	5
		Автоматлаштирилган фото ва видео қайд этиш техника воситалари орқали қайд этилган йўл ҳаракати қоидабузарлиги учун жарималар суммаси (Ўзбекистон Республикаси Президентининг 2018 йил 30 октябрдаги «Йўл ҳаракати хавфсизлигини таъминлаш соҳасида инвестициявий лойиҳани амалга ошириш чора-тадбирлари тўғрисида»ги ПҚ-3989-сон қарори билан жорий этилган лойиҳа бўйича)	25
		Автотранспорт воситалари ойналарининг тусини ўзгартиришга (қорайтиришга) рухсатнома бериш ва ўзгартириш бўйича йиғимлар	20
		Жисмоний ва юридик шахсларнинг автотранспорт воситаларига ўрнатилган видеорегистраторлар, видеокузатув ва тасвирга олиш техника воситалари ҳамда мобиль қурилмалар орқали қайд этилган йўл ҳаракати қоидабузарлиги учун жарималар суммаси	100
		Автотранспорт воситалари учун рўйхатдан ўтказиш давлат рақами белгиларини оширилган тўлов ставкалари бўйича аукциондан олиб, аукционга қўйилган бошланғич нархи бўйича умумий тартибда реализация қилишдан олинган тушумлар	50
			»;

в) 24¹-позицияси қуйидаги таҳрирда баён этилсин:

«
24¹.	Ахборот технологиялари ва коммуникацияларини ривожлантириш вазирлигининг «Хавфсиз шаҳар» жамоат тартибига кўмаклашиш маркази	«Хавфсиз шаҳар» комплекси орқали аниқланган ҳуқуқбузарликлар учун жарималар суммаси, алоқа каналларини ташкиллаштириш ва ижараси бўйича харажатларни қоплаш, бошқа тизимлар билан интеграциялаш ва ривожлантириш, Марказ фаолиятини, меҳнатга ҳақ тўлаш фондини молиялаштириш ҳамда унинг ходимларини қўшимча рағбатлантириш, шунингдек моддий-техникавий жиҳатдан таъминлаш учун мақсадли йўналтирилган ҳолда (Вазирлар Маҳкамасининг «2020-2021 йилларда Тошкент вилояти ва Тошкент шаҳрида инфратузилма объектларини қуриш ва реконструкция қилиш ишларини жадаллаштириш тўғрисида» 2020 йил 17 мартдаги қарорида кўрсатилган жарима суммасидан ажратмалар бундан мустасно)	10
			».

6. Вазирлар Маҳкамасининг 2017 йил 31 августдаги «Автомототранспорт воситаларини давлат рўйхатидан ўтказиш ва уларга рўйхатдан ўтказиш давлат рақами белгиларини бериш тартибини такомиллаштириш тўғрисида»ги 683-сон қарорига 2-илова 18¹-бандининг тўртинчи хатбошиси қуйидаги таҳрирда баён этилсин:

«Реализациядан келиб тушган маблағларнинг 50 фоизи — Ўзбекистон Республикаси Давлат бюджетига, 50 фоизи — Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг «Хавфсиз йўл ва хавфсиз пиёда» республика жамғармасига йўналтирилади.»

7. Вазирлар Маҳкамасининг 2018 йил 18 июлдаги «Туси ўзгартирилган (қорайтирилган) ойнали автотранспорт воситаларидан фойдаланишни тартибга солиш чора-тадбирлари тўғрисида»ги 547-сон қарори 2-бандининг «д» кичик банди қуйидаги таҳрирда баён этилсин:

«д) автотранспорт воситалари ойналарининг тусини ўзгартиришга (қорайтиришга) рухсатнома бериш ва ўзгартириш учун тушадиган маблағлар қуйидагича йўналтирилади:

40 фоизи — Ўзбекистон Республикаси Давлат бюджетига;

40 фоизи — Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг Давлат йўл ҳаракати хавфсизлиги хизмати моддий-техника базасини ривожлантириш, ходимларини рағбатлантириш ва мукофотлаш жамғармасига;

20 фоизи — Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг «Хавфсиз йўл ва хавфсиз пиёда» республика жамғармасига.

Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг Давлат йўл ҳаракати хавфсизлиги хизмати моддий-техника базасини ривожлантириш, ходимларини рағбатлантириш ва мукофотлаш жамғармасига йўналтириладиган маблағлар рухсатномалар бланкларини ва тусини ўзгартириш (қорайтириш) учун рухсатноманинг мавжудлигини тасдиқловчи махсус эмблема (голограмма)ларни тайёрлаш билан боғлиқ бўлган харажатларни қоплашга, ДЙҲХХ моддий-техника базасини ва автомобиль паркини ривожлантиришга, рақамли технологияларни жорий этишга, шунингдек, ходимларини рағбатлантиришга мақсадли йўналтирилади».

8. Ўзбекистон Республикаси Вазирлар Маҳкамасининг 2018 йил 20 сентябрдаги «Йўл ҳаракати хавфсизлиги соҳасидаги ҳуқуқбузарликларга қарши курашиш самарадорлигини оширишга доир қўшимча чора-тадбирлар тўғрисида»ги 747-сон қарорида:

а) 4-банд қуйидаги мазмундаги «а²» кичик банд билан тўлдирилсин:

«а²) жисмоний ва юридик шахсларнинг автотранспорт воситаларига ўрнатилган видеорегистраторлар, видеокузатув ва тасвирга олиш техника воситалари ҳамда мобиль қурилмалар орқали қайд этилган ҳуқуқбузарлик ҳолатлари бўйича ҳуқуқбузарлардан ундирилган жарималар Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг «Хавфсиз йўл ва хавфсиз пиёда» республика жамғармасига йўналтирилади»;

б) илованинг 13-банди қуйидаги таҳрирда баён этилсин:

«13. Рағбатлантириш ҳуқуқбузардан жарима ундирилгандан сўнг фуқаронинг уяли телефон рақами ҳисобига ёки банк пластик картасига, юридик шахснинг эса банк ҳисоб рақамига Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг «Хавфсиз йўл ва хавфсиз пиёда» республика жамғармасига ўтказилган маблағлар ҳисобидан автоматик тарзда пул ўтказиш йўли билан амалга оширилади».

(Қонунчилик маълумотлари миллий базаси, 04.04.2022 й., 07/22/190/0268-сон; 20.11.2023 й., 06/23/197/0865-сон; 06.02.2024 й., 06/24/28/0099-сон; 19.07.2024 й., 07/24/266/0533-сон)