Тошкент шаҳри аҳолисининг уй-жой-коммунал шарт-шароитларини яхшилаш ишларини изчил амалга ошириш, кўп квартирали уйларнинг умумий фойдаланиладиган жойлари, муҳандислик коммуникацияларини таъмирлаш ҳамда уларнинг ҳудудларини ободонлаштириш, коммунал хизмат кўрсатиш ташкилотлари ва хусусий уй-жой мулкдорлари ширкатларининг моддий-техника базасини мустаҳкамлаш, шунингдек Тошкент шаҳар ҳокимлигининг муниципал мулк объектларидан самарали фойдаланиш мақсадида Вазирлар Маҳкамаси қарор қилади:

1. Тошкент шаҳар ҳокимлигининг:

1-иловага мувофиқ фойдаланилмаётган ва давлат мулкига тегишли бўлган ётоқхона биноларини Тошкент шаҳар ҳокимлигининг Бинолардан фойдаланиш департаментига бепул бериш;

2-иловага мувофиқ муниципал мулк объектларини сотиш тўғрисидаги таклифлари маъқуллансин.

2. Мазкур қарорга 1-иловада кўрсатилган объектларнинг балансда сақловчилари ушбу объектларни тегишли ҳудудлари билан биргаликда бепул топширсинлар, Тошкент шаҳар ҳокимлигининг Бинолардан фойдаланиш департаментига объектларни қабул қилиб олсин ҳамда улардан самарали фойдаланилишини таъминласин.

3. Белгилаб қўйилсинки:

1-иловада кўрсатилган объектлардан етим ва боқувчисини йўқотган «Меҳрибонлик уйлари» тарбияланувчиларини, турар жойлари бузилаётган ҳамда турар жойга муҳтож фуқароларни уй-жой билан таъминлаш мақсадида фойдаланилади;

2-иловада кўрсатилган муниципал мулк объектларини очиқ савдоларга қўйиш Ўзбекистон Республикаси Хусусийлаштириш, монополиядан чиқариш ва рақобатни ривожлантириш давлат қўмитаси томонидан амалга оширилади. Уларни сотишдан тушадиган маблағлар Ўзбекистон Республикаси Хусусийлаштириш, монополиядан чиқариш ва рақобатни ривожлантириш давлат қўмитаси ихтиёрида қолдириладиган, шунингдек баҳоловчи ташкилот ва савдо ташкилотчиси хизматлари учун харажатларни чегирган ҳолда, Тошкент шаҳар ҳокимлигининг махсус ҳисоб рақамида жамланади;

Тошкент шаҳар ҳокимлигининг махсус ҳисоб рақамида жамланган маблағлар кўп квартирали турар жойларнинг ҳудудларини ободонлаштиришга, уларнинг муҳандислик тармоқларини, томларини, лифт хўжалигини таъмирлашга, мавзелар ҳудудидаги ёритиш тизимларини тиклашга, кўп квартирали уйлар учун умумий иссиқлик энергиясини ҳисоблаш асбобларини сотиб олиш ва ўрнатишга, коммунал хизмат кўрсатиш ташкилотлари, шу жумладан «Махсустранс» ишлаб чиқариш бирлашмаси ва хусусий уй-жой мулкдорлари ширкатларининг моддий-техника базасини мустаҳкамлашга йўналтирилади.

4. Тошкент шаҳар ҳокимлиги муниципал мулк объектларини сотишдан тушадиган маблағлардан белгиланган йўналишлар учун мақсадли фойдаланилишини таъминласин.

5. Ўзбекистон Республикаси Молия вазирлигининг Назорат-тафтиш Бош бошқармаси Тошкент шаҳар ҳокимлигининг махсус ҳисоб рақамидан молиялаштириладиган маблағлардан мақсадли фойдаланилишини ҳар чоракда текширсин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Б.И. Закиров зиммасига юклансин.