Ўзбекистон Республикаси Вазирлар Маҳкамасининг 2024 йил 8 августдаги 489-сон «Ўзбекистон Республикаси Олий таълим, фан ва инновациялар вазирлиги фаолиятини тартибга солиш соҳасидаги айрим норматив-ҳуқуқий ҳужжатларни тасдиқлаш тўғрисида»ги қарорига мувофиқ буюраман:

1. Олий ва ўрта махсус, профессионал таълим ташкилотларида ўқитишнинг тўлов-контракт шакли ва ундан тушган маблағларни тақсимлаш тартиби тўғрисидаги низом иловага мувофиқ тасдиқлансин.

2. Мазкур буйруқ расмий эълон қилинган кундан эътиборан кучга киради.

Мазкур Низом олий ва ўрта махсус, профессионал таълим ташкилотларида (бундан буён матнда таълим ташкилотлари деб юритилади) ўқитишнинг тўлов-контракт (бундан буён матнда контракт деб юритилади) шаклини белгилаш ва ундан келиб тушадиган маблағларни тақсимлаш тартибини белгилайди.

1. Мазкур Низом Ўзбекистон Республикаси Давлат бюджетидан молиялаштириладиган таълим ташкилотларига татбиқ этилади.

Мазкур Низом олий таълим ташкилотларида ташкил этиладиган олий ўқув юртидан кейинги таълим тизимига ҳамда малака ошириш ва қайта тайёрлаш тизимига, шунингдек ҳарбий таълим ташкилотларига татбиқ этилмайди.

2. Қонунчилик ҳужжатларига мувофиқ, таълим ташкилотларига контракт асосида ўқишга қабул қилиш Ўзбекистон Республикаси Президенти ёки Вазирлар Маҳкамасининг қарори билан тасдиқланган қабул квоталари доирасида ҳамда қабул квоталаридан ташқари Ўзбекистон Республикаси таълим ташкилотларига қабул қилиш бўйича Давлат комиссияси (бундан буён матнда Давлат комиссияси деб юритилади) томонидан амалга оширилади.

3. Хорижий фуқароларни таълим ташкилотларига ўқишга қабул қилиш Ўзбекистон Республикаси Вазирлар Маҳкамасининг 2008 йил 4 августдаги 169-сон «Хорижий фуқароларни Ўзбекистон Республикаси таълим муассасаларига ўқишга қабул қилиш ва ўқитиш тартибини такомиллаштириш тўғрисида»ги қарорига мувофиқ контракт асосида амалга оширилади.

Хорижий фуқароларни Тошкент давлат юридик университетига ўқишга қабул қилиш Ўзбекистон Республикаси Вазирлар Маҳкамасининг 2017 йил 2 июндаги 347-сон «Тошкент давлат юридик университетида кадрлар тайёрлаш тизимини янада такомиллаштириш чора-тадбирлари тўғрисида»ги қарорига мувофиқ амалга оширилади;

Ўзбекистон Республикасининг «Таълим тўғрисида»ги Қонунига асосан Ўзбекистон Республикасида истиқомат қилаётган фуқаролиги бўлмаган шахслар билим олишда Ўзбекистон Республикаси фуқаролари билан тенг ҳуқуқларга эга.

4. Олий таълим ташкилотларида иккинчи ва ундан кейинги олий маълумотни олиш Ўзбекистон Республикаси «Таълим тўғрисида»ги Қонунининг 12-моддасига асосан контракт асосида амалга оширилади.

5. Олий таълим ташкилотларида ўқитиш учун контракт икки ёки уч томонлама расмийлаштирилиши мумкин бўлиб, унинг тарафлари қуйидагилар ҳисобланади:

икки томонлама контрактда: бир томондан — олий таълим ташкилотининг ваколатли шахси, иккинчи томондан — абитуриент ёки талаба ёхуд уларнинг ота-онаси (ёки уларнинг ўрнини босувчи шахслар);

уч томонлама контрактда: бир томондан — олий таълим ташкилотининг ваколатли шахси, иккинчи томондан — юридик ёки жисмоний шахс (бундан буён матнда буюртмачи деб юритилади), учинчи томондан — абитуриент ёки талаба ёхуд уларнинг ота-онаси (ёки уларнинг ўрнини босувчи шахслар).

Контрактлар ҳар бир тараф учун бир нусхадан расмийлаштирилади.

6. Контрактда шартноманинг бажарилиш муддатлари, ҳисоб-китоб қилиш тартиби, тарафларнинг ҳуқуқлари ва мажбуриятлари, шартнома мажбуриятлари бажарилмаганда ёки лозим даражада бажарилмаганда тарафлар учун вужудга келиши мумкин бўлган ҳуқуқий оқибатлар, низоларни ҳал этиш тартиби ҳамда тарафларнинг реквизитлари, шартнома тузилган сана ва жой ҳамда бошқа муҳим шартлар назарда тутилиши лозим.

7. Контрактлар Давлат комиссиясининг абитуриентларни контракт асосида талабаликка тавсия этиш тўғрисидаги қарори (бундан буён матнда Давлат комиссиясининг қарори деб юритилади) қабул қилинганидан сўнг расмийлаштирилади.

8. Давлат комиссиясининг қарорига асосан талабаликка тавсия этилган абитуриентларни мазкур Низомда белгиланган тартибда контрактда назарда тутилган тегишли тўловлар амалга оширилгунига қадар ёки абитуриентларни талабаликка қабул қилиш бўйича олий таълим ташкилотининг буйруғи қабул қилингунга қадар олий таълим ташкилотининг тегишли буйруғига асосан дарсларда қатнашиб туришига рухсат этилади.

9. Тегишли комиссиялар томонидан белгиланган тартибда ўқишини кўчиришга ёки қайта тиклашга тавсия этилган талабаларни ҳам мазкур Низомда белгиланган тартибда контрактда назарда тутилган тегишли тўловлар амалга оширилгунига қадар олий таълим ташкилотининг тегишли буйруғига асосан дарсларда қатнашиб туришига рухсат этилади.

10. Тарафлар ўртасида тузилган контрактга мувофиқ тўловни амалга оширилганлиги тўғрисидаги банк тўлов топшириқномаси ёки квитанцияси нусхаси, шунингдек тўловларнинг олий таълим ташкилотининг ҳисобварағига келиб тушганлиги асосида абитуриентни ёки тегишли комиссиялар томонидан белгиланган тартибда ўқишини кўчиришга ёхуд қайта тиклашга тавсия этилган талабаларни олий таълим ташкилотларига талабаликка қабул қилиш тўғрисидаги буйруқ чиқарилади.

11. Қонунчилик ҳужжатларига мувофиқ, ўқув йили давомида Давлат комиссиясининг қарори қўшимча равишда чиқарилганда ёки Давлат комиссияси томонидан тўловларни амалга ошириш муддати узайтирилганда, абитуриентни ёки белгиланган тартибда ўқишини кўчиришга ёхуд қайта тиклашга тавсия этилган талабаларни олий таълим ташкилотига талабаликка қабул қилиш тўғрисидаги тегишли буйруқни чиқариш муддати ҳам узайтирилиши мумкин.

12. Олий таълим ташкилотларида контракт асосида ўқитишнинг тўлов миқдори билим соҳалари, соҳа ва таълим йўналишлари, таълим шакллари (ишлаб чиқаришдан ажралган ёки ажралмаган ҳолда) ва таълим босқичлари (бакалавриат, магистратура, иккинчи ва ундан кейинги таълим) бўйича алоҳида, ҳар ўқув йили учун белгиланади.

13. Олий таълим ташкилотларида контракт асосида ўқитишнинг тўлов миқдори Ўзбекистон Республикаси Вазирлар Маҳкамасининг 2022 йил 1 августдаги 419-сон «Молиявий мустақиллик берилган давлат олий таълим ташкилотларида давлат буюртмаси (давлат гранти) асосида кадрлар тайёрлаш учун Ўзбекистон Республикаси Давлат бюджетидан молиялаштириш тартибини тасдиқлаш тўғрисида»ги қарорига мувофиқ белгиланади.

14. Хорижий фуқароларни олий таълим ташкилотларида контракт асосида ўқитишнинг тўлов миқдори Ўзбекистон Республикаси Вазирлар Маҳкамасининг 2008 йил 4 августдаги 169-сон «Хорижий фуқароларни Ўзбекистон Республикаси таълим муассасаларига ўқишга қабул қилиш ва ўқитиш тартибини такомиллаштириш тўғрисида»ги қарорига мувофиқ, Ўзбекистон Республикаси Иқтисодиёт ва молия вазирлиги ва таълим ташкилотларига эга бўлган бошқа вазирлик ва идоралар билан келишган ҳолда Олий таълим, фан ва инновациялар вазирлигининг таклифи асосида Давлат комиссияси томонидан белгиланади.

15. Олий таълим ташкилотларида контракт асосида ўқитишнинг тўлов миқдорини белгилаш бир талабани ўқитиш билан боғлиқ харажатлар миқдоридан келиб чиқиб амалга оширилади.

16. Бир талабани ўқитиш билан боғлиқ харажатлар миқдори қуйидаги мезонларни инобатга олган ҳолда белгиланади:

қабул квотаси ва бино-иншоотлар қуввати ўртасидаги мутаносиблик;

таълим йўналишлари ва таълим жараёни хусусиятлари;

бир ўқитувчига тўғри келадиган талабалар сони нисбатининг чекланган нормативлари;

ўқитиш муддатлари ва бошқалар.

17. Олий таълим ташкилотлари фаолиятини таъминлаш учун зарур бўлган маблағларнинг етишмайдиган қисми олий таълим ташкилотларини сақлашга ажратиладиган Ўзбекистон Республикаси Давлат бюджети маблағлари ҳисобидан қопланади.

18. Иш ҳақи ва стипендиялар миқдорларининг, энергия ресурслари, коммунал ва эксплуатация хизматларининг нархлари ва тарифлари ўзгариши муносабати билан контракт асосида ўқитишнинг тўлов миқдори (қўшимча ва табақалаштирилган тўлов-контракт миқдори бундан мустасно) ўқув йили давомида қайта кўриб чиқилиши мумкин.

19. Ўқув йили давомида контракт асосида ўқитишнинг тўлов миқдори ўзгарганда олий таълим ташкилоти томонидан ўқитиш учун тўлов қайта ҳисоб-китоб қилинади ва контрактга тегишли ўзгартиришлар киритилади.

Бунда, қайта ҳисоб-китоб фақатгина ўқув йилининг қолган муддати учун амалга оширилади.

Қайта ҳисоб-китоб натижасида тўланиши лозим бўлган қўшимча маблағ, ўқитиш учун тўловни оширилганлиги тўғрисидаги хабарнома олинган кундан бошлаб бир ой муддатда амалга оширилиши лозим.

Ўқитишнинг тўлов миқдори камайтирилганда ортиқча тўланган маблағ кейинги тўловлар ҳисобига ўтказилади ёки тўловни амалга оширган тарафнинг ёзма мурожаатига кўра қайтариб берилади.

20. Олий таълим ташкилотларида контракт асосида ўқитиш учун белгиланган миқдордаги тўлов ўқув йилида тўлиқ ёки қисман (бироқ, биринчи тўлов тегишли ўқув йили учун белгиланган тўлов миқдорининг 25 фоизидан кам бўлмаган ҳолда) мазкур Низомнинг 22-бандида ёки контрактда белгиланган муддатларда амалга оширилади.

21. Ўзбекистон ёшлар иттифоқи томонидан моддий ёрдам сифатида талабаларини ўқитиш учун тўловлар қонунчилик ҳужжатларига мувофиқ амалга оширилади.

22. Контракт асосида ўқитиш учун тўлов ўқув йилининг қуйидаги муддатларида:

белгиланган тўлов миқдорининг камида 25 фоизи — талабаликка тавсия этилган абитуриентлар учун 15 сентябргача ҳамда иккинчи ва ундан юқори босқич талабалар учун 1 октябргача ёки олий таълим ташкилоти ректори (директори) томонидан узайтириладиган муддатгача;

белгиланган тўлов миқдорининг камида 50 фоизи 1 январгача, 75 фоизи 1 мартгача ва 100 фоизи 1 майгача ёки олий таълим ташкилоти ректори (директори) томонидан узайтириладиган муддатгача амалга оширилади.

Бунда, Давлат комиссияси томонидан мазкур бандда назарда тутилган тўловларни амалга ошириш муддатлари узайтирилиши мумкин.

Қўшимча ва табақалаштирилган тўлов-контракт асосида ўқиш истагини билдирган абитуриент Давлат комиссияси томонидан белгиланган муддатларда тўлов-контракт шартларининг биринчи ўқув йили учун камида 50 фоизини бажаргандан сўнг олий таълим ташкилоти ректори (директори)нинг буйруғи билан ўқишга қабул қилинади.

23. Хорижий фуқароларни ўқитиш учун белгиланган тўловлар миллий валютада амалга оширилади, қонунчилик ҳужжатларига мувофиқ тўловлар чет эл валютасида амалга оширилиши мумкин бўлган ҳолатлар бундан мустасно.

24. Қонунчилик ҳужжатларига мувофиқ, ўқув йили давомида Давлат комиссиясининг қарори қўшимча равишда чиқарилганда олий таълим ташкилотларига контракт асосида қабул қилинган абитуриентлардан ўқитиш учун тўлов фақат ўқув йилининг қолган муддати учун олинади.

Бунда, ўқув йилининг қолган муддати сифатида олий таълим ташкилотининг абитуриентни дарсларга қатнашишга рухсат бериш тўғрисидаги буйруғида дарсларга қатнашиши белгиланган ойнинг биринчи санасидан ўқув йилининг охиригача бўлган давр тушунилади.

Қўшимча ва табақалаштирилган тўлов-контракт миқдори Давлат комиссиясининг қарори ҳамда олий таълим ташкилотининг абитуриентларни дарсларга қатнашишга рухсат бериш тўғрисидаги буйруғи қабул қилинган санадан қатъи назар, тўлиқ тўланади. Бунда, стипендия абитуриентларни дарсларга қатнашишга рухсат берилган ойнинг биринчи санасидан ўрнатилган тартибда белгиланади.

25. Ўқув йилининг қолган муддати учун тўлов миқдори ўқув йилининг охирига қадар қолган ойлар сонини тегишли ўқув йилига тасдиқланган ўқитишнинг тўлов миқдорининг ўн иккидан бир қисмига кўпайтириш орқали аниқланади.

26. Олий таълим ташкилотлари битирувчи курс талабаларининг охирги ўқув йили (қисмларга бўлиб тўланганда охирги ўқув семестри) учун тўлов, тўловнинг белгиланган миқдоридан июль ва август ойлари учун тўланадиган стипендия миқдорини чегириб қолиш орқали амалга оширилади.

Бунда, чегириб қолинадиган стипендия миқдори контракт асосида ўқитиш учун тўлов миқдорининг охирги белгиланган стипендиянинг миқдори 0,75 коэффициенти қўлланган базавий миқдоридан келиб чиқиб аниқланади.

27. Талаба ўқув интизомини ва олий таълим ташкилотининг ички тартиб-қоидаларини бузганлиги, бир семестр давомида дарсларни узрли сабабларсиз 74 соатдан ортиқ қолдирганлиги ёки ўқитиш учун белгиланган миқдордаги тўловни ўз вақтида амалга оширмаганлиги сабабли талабалар сафидан четлаштирилганда ёхуд белгиланган муддатларда фанларни ўзлаштира олмаганлиги (академик қарздор бўлганлиги) сабабли курсдан қолдирилганда олий таълим ташкилоти томонидан унинг тегишли ўқув семестри учун амалга оширилган тўлови қайтариб берилмайди.

Бунда, қўшимча ва табақалаштирилган тўлов-контракт асосида талабаликка қабул қилинганлар биринчи курснинг биринчи семестри давомида талабалар сафидан четлаштирилганда улар томонидан амалга оширилган тўловнинг 50 фоизи қайтариб берилмайди.

28. Талаба қуйидаги сабабларга кўра талабалар сафидан четлаштирилганда олий таълим ташкилоти томонидан унинг ўқиган муддати учун ҳақиқатда сарфланган харажатлар чегирилган ҳолда тегишли ўқув йили ёки семестри учун олдиндан амалга оширилган тўловнинг қолган қисми контрактнинг тегишли тарафи ёзма мурожаатига кўра қайтариб берилади:

ўз хоҳишига биноан;

ўқишнинг бошқа таълим ташкилотига кўчирилиши муносабати билан;

саломатлиги туфайли (тиббий комиссия маълумотномаси асосида);

талаба суд томонидан озодликдан маҳрум этилганлиги муносабати билан;

вафот этганлиги сабабли.

Бунда, қўшимча ва табақалаштирилган тўлов-контракт асосида талабаликка қабул қилинганлар биринчи курсда талабалар сафидан четлаштирилганда қайтариладиган тўлов миқдори ўқув йилининг охирига қадар қолган ойлар сонини тегишли ўқув йилига тасдиқланган ўқитишнинг қўшимча ва табақалаштирилган тўлов-контракт миқдорининг ўн иккидан бир қисмига кўпайтириш орқали аниқланади ва контрактнинг тегишли тарафи ёзма мурожаатига кўра қайтариб берилади.

29. Талаба ўқув йили давомида қонунчилик ҳужжатларига мувофиқ академик таътилга чиққан ҳолларда ҳам олий таълим ташкилоти томонидан унинг ўқиган муддати учун ҳақиқатда сарфланган харажатлар чегирилган ҳолда тегишли ўқув йили ёки семестри учун олдиндан амалга оширилган тўловнинг қолган қисми контрактнинг тегишли тарафи ёзма мурожаатига кўра қайтариб берилади.

Бунда, ўқув йили ёки семестри бошидан олий таълим ташкилоти томонидан талабанинг талабалар сафидан четлатилганлиги ёки академик таътилга чиққанлиги ҳақидаги буйруқ чиқарилган ойнинг охирги санасигача бўлган давр, талабанинг ўқиган муддати ҳисобланади.

30. Ўқув йили давомида ўқишга қабул қилинган ёки қайта тикланган талабалар, фақат ўқув йили охиригача қолган муддат учун тўловларни амалга оширади.

Бунда, тўловлар талабани ўқишга қабул қилинганлиги ёки қайта тиклаганлиги муносабати билан дарсларга қатнашишга рухсат бериш тўғрисидаги буйруқда дарсларга қатнашиши белгиланган ойнинг биринчи санасидан ўқув йили охиригача бўлган давр учун ҳисобланади ва мазкур даврда ўрнатилган тартибда стипендия тўланади.

Белгиланган муддатларда фанларни ўзлаштира олмаган (академик қарздор бўлган) талаба курсдан қолдирилганда тўлов миқдори ўқиши давом этадиган ўқув семестри учун амалга оширилади.

31. Ҳар янги ўқув йили бошлангунига қадар олий таълим ташкилоти томонидан контракт асосида ўқитишнинг белгиланган тўлов миқдори талабалар эътиборига етказилиши лозим, тўлов миқдори ўзгармаган ҳоллар бундан мустасно.

32. Олий таълим ташкилоти билан абитуриент ёки талабани контракт асосида ўқитиш учун контракт тузган буюртмачи белгиланган муддатда тўловни амалга ошириш имкониятига эга бўлмаганда, контракт бошқа буюртмачи билан белгиланган тартибда қайта расмийлаштирилиши мумкин.

Бунда, контрактни қайта расмийлаштиришга абитуриент ёки талабанинг аризаси ёхуд аввал контрактни расмийлаштирган буюртмачининг абитуриент ёки талабани ўқитиш учун тўлов қобилияти йўқлиги тўғрисида олий таълим ташкилотига қилинган ёзма мурожаати асос қилиб олинади.

33. Бюджет ташкилотларининг Ўзбекистон Республикаси Давлат бюджети маблағлари, шунингдек ўқитишнинг контракт шаклидан тушган ёки Бюджет ташкилотларини ривожлантириш жамғармаси маблағлари ҳисобидан ўқитиш учун тўловларни амалга оширилиши тақиқланади.

34. Ўқитишнинг контракт шаклидан шу жумладан қўшимча ва табақалаштирилган тўлов-контракт асосида тушган маблағлар олий таълим ташкилоти даромадига киритилади ҳамда белгиланган тартибда тасдиқланган даромадлар ва харажатлар сметасида қуйидагиларга сарфлаш учун тақсимланиши мумкин:

олий таълим ташкилотларининг ишлаб чиқаришдан ажралган ҳолда контракт асосида таълим олаётган талабаларига (хорижий талабалардан ташқари) стипендиялар тўлашга;

олий таълим ташкилотлари ходимларининг иш ҳақи ва унга тенглаштирилган тўловлари, шунингдек ягона ижтимоий тўловлар бўйича харажатларни тўлашга;

олий таълим ташкилотларида бино ва иншоотларни сақлаш ҳамда коммунал хизматлар бўйича харажатларни тўлашга;

мавжуд кредитор қарзларни узишга;

ўқув-лаборатория бинолари, талабалар турар жойлари ҳамда бошқа бино ва иншоотларни, асбоб-ускуналарни жорий ва капитал таъмирлашга, олий таълим ташкилотининг ҳудудини ва атрофини ободонлаштиришга, шунингдек қурилиш-тиклаш ишларига;

ўқув, илмий-тадқиқот ва лаборатория жиҳозлари, юмшоқ ва қаттиқ инвентарлар, мебеллар, ўқитишнинг техник воситалари, компьютер техникаси ва уларнинг эҳтиёт ҳамда бутловчи қисмларини, керакли материалларни ва бошқаларни сотиб олиш ҳамда таъмирлашга;

олий таълим ташкилоти Ахборот-ресурс маркази (кутубхона) фондини тўлдиришга;

«Маънавият ва маърифат» тадбирлари, «Универсиада» ва «Баркамол авлод» спорт тадбирлари, «Ниҳол» ижодий фестивалларини ўтказишга;

хорижий олий таълим ташкилотларида истиқболли ёш педагог ва илмий кадрларни малакасини ошириш ва стажировка ўташларига;

Ўзбекистон Республикаси Президенти ёки Ҳукумати қарорлари асосида вазирлик ва идораларнинг Ўзбекистон Республикаси Давлат бюджетидан ташқари жамғармаларига ажратмаларни амалга оширишга;

олий таълим ташкилотлари ходимларини моддий рағбатлантиришга (устама, мукофот) ва уларга моддий ёрдам кўрсатишга;

олий таълим ташкилотлари талабаларини ижтимоий муҳофаза қилиш доирасида бир йилда бир талабага меҳнатга ҳақ тўлашнинг энг кам миқдорининг олти баробаридан ортиқ бўлмаган миқдорда бир йўла моддий ёрдам кўрсатишга;

олий таълим ташкилоти фаолиятини амалга оширишини таъминлаш учун зарур бўлган бошқа харажатларни қоплашга.

35. Харажатларни амалга оширишда маблағлар биринчи навбатда стипендия, иш ҳақи ва унга тенглаштирилган тўловлар ҳамда энергия ресурслари ва коммунал хизматларнинг ҳақини тўлаш мақсадларига йўналтирилади.

36. Олий таълим ташкилотларининг контракт асосида таълим олаётган талабаларига стипендиялар, уларни ўқитиш учун тўловлар амалга оширилгандан кейин тўланади. Бунда, стипендия фақат ўқитиш учун тўлов амалга оширилган ойлар учунгина берилади.

37. Олий таълим ташкилотларининг ўқитишнинг контракт шаклидан тушган маблағлари Бюджет ташкилотларини ривожлантириш жамғармаси таркибига киритилмайди.

38. Ўқитишнинг контракт шаклидан тушган ва вақтинчалик бўш турган маблағлар олий таълим ташкилоти томонидан Ўзбекистон Республикасининг молиявий барқарор ва тўлов қобилияти юқори бўлган банкларининг депозит ҳисобварағларига танлов асосида жойлаштирилиши мумкин. Олинган фоиз даромадлари олий таълим ташкилотининг ўқитишнинг контракт шаклидан тушган маблағлари даромадлар ва харажатлар сметасига киритилади ҳамда мазкур Низомнинг 34-бандида назарда тутилган мақсадларга сарфлаш учун тақсимланади.

39. Олий таълим ташкилотлари томонидан ўқитишнинг контракт шаклидан тушган маблағлар ва улар сарфланишининг бухгалтерия ҳисоби қонунчилик ҳужжатларида белгиланган тартибда юритилади.

40. Ҳар йили олий таълим ташкилотлари томонидан ўқитишнинг контракт шаклидан тушадиган маблағлар бўйича календарь йилга даромадлар ва харажатлар сметаси ишлаб чиқилиб тасдиқланади ҳамда бўйсунуви бўйича тегишли вазирлик ёки идорага рўйхатдан ўтказиш учун тақдим этилади.

41. Олий таълим ташкилотларининг ўқитишнинг контракт шаклидан тушган маблағлари бўйича даромадлар ва харажатлар сметаларига ўзгартиришлар, календарь йил давомида ўқитиш учун тўлов миқдори, иш ҳақи ва стипендиялар миқдорларининг, энергия ресурслари, коммунал ва эксплуатация хизматларининг нархлари ҳамда тарифлари ўзгарганда, шунингдек олий таълим ташкилотлари таклифлари асосида белгиланган тартибда киритилади.

42. Олий таълим ташкилотларида ўқитишнинг контракт шаклидан тушган маблағлар бўйича даромадлар ва харажатлар сметаларини тузиш Бюджет ташкилотлари ва бюджет маблағлари олувчиларнинг харажатлар сметаси ва штат жадвалларини тузиш, тасдиқлаш ва рўйхатдан ўтказиш тартиби тўғрисидаги низомга (рўйхат рақами 2634, 2014 йил 15 декабрь), шунингдек мазкур Низомга мувофиқ амалга оширилади.

43. Олий таълим ташкилотлари томонидан ўқитишнинг контракт шаклидан тушган маблағлар бўйича даромадлар ва харажатларнинг ҳисоботларини тузиш, тасдиқлаш ва тақдим қилиш Ўзбекистон Республикаси бюджет ҳисобининг стандарти (3-сонли БҲС) «Бюджет ҳисоботи»га (рўйхат рақами 3124, 2019 йил 18 январь) мувофиқ амалга оширилади.

44. Олий таълим ташкилотлари ўқитишнинг контракт шаклидан тушган маблағлар бўйича даромадлар ва харажатлар сметаларининг бажарилиши ҳақидаги чораклик ва йиллик ҳисоботларни бўйсунуви бўйича тегишли вазирлик ёки идорага белгиланган тартибда тақдим этишлари лозим.

45. Ўзбекистон Республикаси Вазирлар Маҳкамасининг 2020 йил 7 августдаги 466-сон «Ўзбекистон Республикасида узлуксиз бошланғич, ўрта ва ўрта махсус профессионал таълим тизимини тартибга солувчи норматив-ҳуқуқий ҳужжатларни тасдиқлаш тўғрисида»ги қарорига мувофиқ профессионал таълим дастурларида ўқувчилар тўлов-контракт асосида таълим олишлари мумкин.

46. Ўрта махсус ва профессионал таълим ташкилотларида контракт асосида ўқитишнинг тўлов миқдори Ўзбекистон Республикаси Иқтисодиёт ва молия вазирлиги томонидан Ўзбекистон Республикаси Олий таълим, фан ва инновациялар вазирлиги ҳамда бошқа манфаатдор вазирлик ва идоралар билан келишилган ҳолда белгиланади.

47. Хорижий фуқароларни ўрта махсус, профессионал таълим ташкилотларида контракт асосида ўқитишнинг тўлов миқдори мазкур Низомнинг 14-бандида кўрсатиб ўтилган тартибда белгиланади.

48. Иш ҳақи миқдорининг, энергия ресурслари, коммунал ва эксплуатация хизматларининг нархлари ва тарифлари ўзгариши муносабати билан контракт асосида ўқитишнинг тўлов миқдори ўқув йили давомида қайта кўриб чиқилиши мумкин.

49. Ўрта махсус, профессионал таълим ташкилотларида контракт асосида ўқитиш учун контрактнинг расмийлаштирилиши, тўлов миқдори ва уни амалга оширилиши мазкур Низомнинг 5—12, 15—17, 19, 20, 22—25 ва 27—33-бандларида белгиланган тартибда амалга оширилади.

50. Ўқитишнинг контракт шаклидан тушган маблағлар ўрта махсус, профессионал таълим ташкилоти даромадига киритилади ҳамда белгиланган тартибда тасдиқланган даромадлар ва харажатлар сметасида қуйидагиларга сарфлаш учун тақсимланиши мумкин:

ўрта махсус, профессионал таълим ташкилотлари ходимларининг иш ҳақи ва унга тенглаштирилган тўловлари, шунингдек ягона ижтимоий тўловлар бўйича харажатларни тўлашга;

ўрта махсус, профессионал таълим ташкилотларида бино ва иншоотларни сақлаш ҳамда коммунал хизматлар бўйича харажатларни тўлашга;

мавжуд кредитор қарзларни узишга;

ўқув-лаборатория бинолари ҳамда бошқа бино ва иншоотларни, асбоб-ускуналарни жорий ва капитал таъмирлашга, ўрта махсус, профессионал таълим ташкилотининг ҳудудини ва атрофини ободонлаштиришга, шунингдек қурилиш-тиклаш ишларига;

ўқув, илмий-тадқиқот ва лаборатория жиҳозлари, юмшоқ ва қаттиқ инвентарлар, мебеллар, ўқитишнинг техник воситалари, компьютер техникаси ва уларнинг эҳтиёт ҳамда бутловчи қисмларини, керакли материалларни ва бошқаларни сотиб олиш ҳамда таъмирлашга;

ўрта махсус, профессионал таълим ташкилоти Ахборот-ресурс маркази (кутубхона) фондини тўлдиришга;

«Маънавият ва маърифат» тадбирлари, «Универсиада» ва «Баркамол авлод» спорт тадбирлари, «Ниҳол» ижодий фестивалларини ўтказишга;

Ўзбекистон Республикаси Президенти ёки Ҳукумати қарорлари асосида вазирлик ва идораларнинг Ўзбекистон Республикаси Давлат бюджетидан ташқари жамғармаларига ажратмаларни амалга оширишга;

ўрта махсус, профессионал таълим ташкилотлари ходимларини моддий рағбатлантиришга (устама, мукофот) ва уларга моддий ёрдам кўрсатишга;

ўрта махсус, профессионал таълим ташкилотлари ўқувчиларини ижтимоий муҳофаза қилиш доирасида бир йилда бир ўқувчига меҳнатга ҳақ тўлашнинг энг кам миқдорининг олти баробаридан ортиқ бўлмаган миқдорда бир йўла моддий ёрдам кўрсатишга;

ўрта махсус, профессионал таълим ташкилоти фаолиятини амалга оширишини таъминлаш учун зарур бўлган бошқа харажатларни қоплашга.

51. Харажатларни амалга оширишда маблағлар биринчи навбатда иш ҳақи ва унга тенглаштирилган тўловлар ҳамда энергия ресурслари ва коммунал хизматларнинг ҳақини тўлаш мақсадларига йўналтирилади.

52. Ўрта махсус, профессионал таълим ташкилотларининг ўқитишнинг контракт шаклидан тушган маблағлари Бюджет ташкилотларини ривожлантириш жамғармаси таркибига киритилмайди.

53. Ўқитишнинг контракт шаклидан тушган ва вақтинчалик бўш турган маблағлар ўрта махсус, профессионал таълим ташкилоти томонидан Ўзбекистон Республикасининг молиявий барқарор ва тўлов қобилияти юқори бўлган банкларининг депозит ҳисобварағларига танлов асосида жойлаштирилиши мумкин. Олинган фоиз даромадлари ўрта махсус, профессионал таълим ташкилотининг ўқитишнинг контракт шаклидан тушган маблағлари даромадлар ва харажатлар сметасига киритилади ҳамда мазкур Низомнинг 50-бандида назарда тутилган мақсадларга сарфлаш учун тақсимланади.

54. Ўрта махсус, профессионал таълим ташкилотлари томонидан ўқитишнинг контракт шаклидан тушган маблағлар ва улар сарфланишининг бухгалтерия ҳисоби қонунчилик ҳужжатларида белгиланган тартибда юритилади.

55. Ҳар йили ўрта махсус, профессионал таълим ташкилотлари ўқитишнинг контракт шаклидан тушадиган маблағлар бўйича календарь йилга даромадлар ва харажатлар сметаси ишлаб чиқилиб тасдиқланади ҳамда бўйсунуви бўйича тегишли вазирлик ёки идорага рўйхатдан ўтказиш учун тақдим этилади.

56. Ўрта махсус, профессионал таълим ташкилотларининг ўқитишнинг контракт шаклидан тушган маблағлари бўйича даромадлар ва харажатлар сметаларига ўзгартиришлар, календарь йил давомида ўқитиш учун тўлов миқдори, иш ҳақи миқдори, ва коммунал, эксплуатация хизматлари ва энергия ресурслари нархлари ҳамда тарифларининг миқдорлари ўзгарганда, шунингдек ўрта махсус, профессионал таълим ташкилотлари таклифлари асосида белгиланган тартибда киритилади.

57. Ўрта махсус, профессионал таълим ташкилотларида ўқитишнинг контракт шаклидан тушган маблағлар бўйича даромадлар ва харажатлар сметаларини тузиш Бюджет ташкилотлари ва бюджет маблағлари олувчиларнинг харажатлар сметаси ва штат жадвалларини тузиш, тасдиқлаш ва рўйхатдан ўтказиш тартиби тўғрисидаги низомга (рўйхат рақами 2634, 2014 йил 15 декабрь), шунингдек мазкур Низомга мувофиқ амалга оширилади.

58. Ўрта махсус, профессионал таълим ташкилотлари томонидан ўқитишнинг контракт шаклидан тушган маблағлар бўйича даромадлар ва харажатларнинг ҳисоботларини тузиш, тасдиқлаш ва тақдим қилиш Ўзбекистон Республикаси бюджет ҳисобининг стандарти (3-сонли БҲС) «Бюджет ҳисоботи»га (рўйхат рақами 3124, 2019 йил 18 январь) мувофиқ амалга оширилади.

59. Ўрта махсус, профессионал таълим ташкилотлари ўқитишнинг контракт шаклидан тушган маблағлар бўйича даромадлар ва харажатлар сметаларининг бажарилиши ҳақидаги чораклик ва йиллик ҳисоботларни бўйсунуви бўйича тегишли вазирлик ёки идорага белгиланган тартибда тақдим этишлари лозим.

60. Таълим ташкилотларининг раҳбарлари, молия ва бухгалтерия хизматлари ходимлари тўлов-контракт асосида ўқитишдан тушган маблағлар бўйича даромадлар ва харажатлар сметасининг тўғри тузилиши, уларнинг бажарилиши бўйича ҳисоботларнинг ҳаққонийлиги, шунингдек бюджетдан ташқари маблағларни тасдиқланган сметаларга мувофиқ мақсадли сарфланиши учун қонунчиликда белгиланган тартибда жавобгардирлар.

61. Таълим олишнинг тўлов-контракт асосида келиб тушадиган маблағларининг тўғри сарфланиши ва маблағлардан мақсадли фойдаланиш устидан назоратни тасарруфида таълим ташкилотлари бўлган вазирликлар ва идоралар, Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаментининг Давлат молиявий назорати инспекцияси, унинг ҳудудий органлари ва жойлардаги иқтисодиёт ва молия органлари қонунчилик томонидан тақдим этилган ваколатларга мувофиқ амалга оширади.

62. Мазкур Низом Ўзбекистон Республикаси Молия вазирлиги, Халқ таълими вазирлиги, Соғлиқни сақлаш вазирлиги, Маданият ва спорт ишлари вазирлиги, Ташқи ишлар вазирлиги, Қишлоқ ва сув хўжалиги вазирлиги, Алоқа, ахборотлаштириш ва телекоммуникация технологиялари давлат қўмитаси, Давлат солиқ қўмитаси, Ўзбекистон Бадиий академияси, «Ўзбекистон темир йўллари» давлат акциядорлик темир йўл компанияси ва «Навоий кон-металлургия комбинати» давлат корхонаси билан келишилган.