O‘zbekiston Respublikasi Oliy Kengashining “Davlat uy-joy fondini xususiylashtirish to‘g‘risida” O‘zbekiston Respublikasi Qonunini amalga kiritish tartibi haqida”gi qarorini bajarish yuzasidan Vazirlar Mahkamasi qaror qiladi:

1. Quyidagilar tasdiqlansin:

Xususiylashtirilgan kvartiralar (kvartiralarning bir qismi), uylar (uylarning bir qismi)ni boshqalarga berish va meros qilib qoldirishda mulkchilik huquqi o‘tishi haqidagi shartnomalarni rasmiylashtirish to‘g‘risidagi Nizom 1-ilovaga muvofiq;

O‘zbekiston Respublikasi Mudofaa vazirligi uy-joy fondini xususiylashtirish tartibi to‘g‘risidagi Nizom 2-ilovaga muvofiq.

3. O‘zbekiston Respublikasi Davlat mulki qo‘mitasi va O‘zbekiston Respublikasi Adliya vazirligining davlat uy-joy fondini xususiylashtirish to‘g‘risida Nizomga hamda davlat uy-joy fondini xususiylashtirish, saqlash va undan foydalanish tartibi to‘g‘risidagi Qoidalariga o‘zgartirish va qo‘shimchalar kiritish, shuningdek, Vazirlar Mahkamasining ba’zi qarorlarini 3-ilovaga muvofiq o‘z kuchini yo‘qotgan deb hisoblash haqidagi taklifi qabul qilinsin.

4. Mazkur qarorning bajarilishini nazorat qilish Vazirlar Mahkamasining Kapital qurilish, transport va aloqa hamda Yuridik bo‘limlariga yuklatilsin.

1. Xususiylashtirilgan uy-joylarga pulli, imtiyozli yoki bepul asosda mulk qilib berilgan kvartiralar (kvartiralarning bir qismi), uylar (uylarning bir qismi) kiradi.

2. Xususiylashtirilgan kvartira (kvartiraning bir qismi), uy (uyning bir qismi) mulkdori jismoniy va yuridik shaxslarning huquqlarini va qonun bilan himoya qilinadigan manfaatlarini buzmagan holda ushbu uy-joyga egalik qilish, undan foydalanish va uni tasarruf etish huquqiga egadir.

Xususiylashtirilgan uy-joyning mulkdori mazkur uy-joyni o‘z xohishiga ko‘ra har qanday jismoniy yoki yuridik shaxslarga yoki ko‘chmas mulk bilan operatsiyalarni amalga oshirishga vakil qilingan organga berish va vasiyat qilib qoldirish, shuningdek, uni ko‘chmas mulk savdosi bo‘yicha kimoshdi savdosiga qo‘yish huquqiga egadir.

Kvartirani (kvartiraning bir qismini), uyni (uyning bir qismini) jismoniy yoki yuridik shaxslarga berishda mulkdor boshqalarga berish shartnomasini tasdiqlatish uchun notarial idoraga, kimoshdi savdosi orqali sotishda esa – ko‘chmas mulk savdosini amalga oshirishga vakil qilingan organga murojaat qiladi.

3. Boshqalarga berilayotgan xususiylashtirilgan uy-joyning qiymati tomonlarning kelishuviga ko‘ra, biroq boshqalarga berish paytida uy-joyning Qoraqalpog‘iston Respublikasi, viloyatlar va Toshkent shahri yer tuzish va ko‘chmas mulk kadastri davlat korxonasining tegishli tumanlar (shaharlar)dagi filiallari tomonidan baholangan qiymatidan past bo‘lmagan miqdorda belgilanadi. Meros tartibida o‘tadigan uy-joyning qiymati merosxo‘rlik tayinlangan kunda Qoraqalpog‘iston Respublikasi, viloyatlar va Toshkent shahri yer tuzish va ko‘chmas mulk kadastri davlat korxonasining tegishli tumanlar (shaharlar)dagi filiallari tomonidan belgilangan baholash ma’lumotlari hisobga olingan holda belgilanadi.

4. Xususiylashtirilgan kvartirani (kvartiraning bir qismini), uyni (uyning bir qismini) sotib olish, almashtirish huquqiga O‘zbekiston Respublikasi fuqarolari, chet el fuqarolari va doimiy yashovchi hamda O‘zbekiston Respublikasi ichki ishlar organlari tomonidan belgilangan tartibda berilgan yashash uchun ruxsatnomasi bo‘lgan fuqarolar ega bo‘ladilar.

5. Yuridik yoki jismoniy shaxslar tomonidan mulkdordan sotib olingan uy-joydan faqat uy-joy sifatida foydalanilishi mumkin.

6. Xususiylashtirilgan uy-joyni boshqa shaxsga o‘tkazish qonunchilikka muvofiq amalga oshiriladi.

Alohida uy (uyning bir qismi) yoki kvartirani xususiylashtirishga rozilik bergan shaxslar to‘g‘risidagi ma’lumotnoma berilganligi uchun bazaviy hisoblash miqdorining yarmi miqdorida yig‘im undiriladi.

8. Oldi-sotdi, ayirboshlash, hadya qilish shartnomalarini notarial tasdiqlashda va xususiylashtirilgan uy-joyga merosxo‘rlik huquqi to‘g‘risida guvohnoma berishda “Davlat boji to‘g‘risida”gi O‘zbekiston Respublikasi Qonuni bilan belgilangan stavkalar bo‘yicha davlat boji undiriladi.

9. Oldi-sotdi, ayirboshlash va hadya qilish bitishuvlari amalga oshirilgandan so‘ng, shuningdek, mulkchilik huquqi merosxo‘rlik tartibida o‘tgandan so‘ng, boshqalarga berish yoki meros qilib qoldirish vaqtidan qat’i nazar, kvartira (kvartiraning bir qismi), uy (uyning bir qismi) xususiylashtirilgan uy-joy maqomini yo‘qotadi.

10. Notarial tartibda rasmiylashtirilgan, texnik oldi-sotdi, ayirboshlash va hadya qilish shartnomasi, shuningdek, qonun bilan belgilangan tartibda berilgan merosxo‘rlik huquqi to‘g‘risidagi guvohnoma ilgari xususiylashtirilgan sotib olingan uy-joyga egalik qilish huquqini beruvchi huquqni belgilovchi hujjat bo‘lib hisoblanadi.

1. Mazkur Nizom O‘zbekiston Respublikasi Mudofaa vazirligining uy-joy fondini xususiylashtirishning asoslarini, tartibini va shartlarini belgilaydi.

Mudofaa vazirligining uy-joy fondi kvartiralarini xususiylashtirish “Davlat uy-joy fondini xususiylashtirish to‘g‘risida” O‘zbekiston Respublikasi Qonuniga va tegishli normativ hujjatlarga muvofiq amalga oshiriladi.

2. O‘zbekiston Respublikasi Qurolli Kuchlarining harbiy xizmatchilari, Mudofaa vazirligining uy-joy fondida yashayotgan ishchilar, xizmatchilar va boshqa shaxslar xususiylashtirish subyektlari hisoblanadilar.

3. Yopiq harbiy shaharchalardagi kvartiralar va uylar, yotoqxonalardagi kvartiralar, yashash uchun yaroqsiz deb topilgan yoki xizmat kvartiralari (xonalari) hisoblangan, ikki yoki undan ko‘p ijarachilar yashaydigan kvartiralar (egallab turgan kvartiralarni xususiylashtirish bo‘yicha ularning roziligi bo‘lmagan taqdirda), boshqa davlatlarning Qurolli Kuchlarida xizmatni o‘tayotgan harbiy xizmatchilar tomonidan band etib turilgan bo‘sh kvartiralar hamda band etib qo‘yilgan kvartiralar xususiylashtirilmaydi.

4. Kvartiralarni xususiylashtirishga doir hujjatlarni rasmiylashtirish shahar va viloyatlar hokimliklari huzuridagi tegishli organlar tomonidan uy-joy fondi egasi bilan tuzilgan shartnoma shartlari bo‘yicha yoki Mudofaa vazirligining kvartiralardan foydalanish organlari tomonidan amalga oshiriladi.

5. Kvartiralarni xususiylashtirgan harbiy xizmatchilar, O‘zbekiston Respublikasi Vazirlar Mahkamasi tomonidan tasdiqlangan xususiylashtirilgan kvartiralarni, uylarni (uylarning bir qismini) sotib olish-sotish shartnomalarini rasmiylashtirish tartibi to‘g‘risidagi Nizomga muvofiq sotish, almashtirish va hadya etish bilan bog‘liq barcha harakatlarni amalga oshirish huquqiga egadirlar.

6. Harbiy xizmatchilar yangi xizmat joyiga jo‘nab ketishayotganda o‘z xohishiga ko‘ra xususiylashtirgan uy-joyi bo‘yicha Mudofaa vazirligining kvartiralardan foydalanish organlari bilan yoki ularning tavsiyasiga binoan navbatdagi harbiy xizmatchi bilan qoldiq balans qiymati bo‘yicha sotib olish-sotish shartnomasini rasmiylashtirishlari mumkin, bunda ular uy-joyni topshirganligi to‘g‘risida belgilangan namunadagi ma’lumotnoma oladilar.

1. O‘zbekiston Respublikasi Vazirlar Mahkamasining “Toshkent shahrida davlat uy-joy fondini xususiylashtirish to‘g‘risida” 1992-yil 13-avgustdagi 378-son qarori;

2. O‘zbekiston Respublikasi Vazirlar Mahkamasining “O‘zbekiston Respublikasida davlat uy-joy fondini xususiylashtirishni davom ettirish to‘g‘risida” 1993-yil 1-martdagi 114-son qarorining 10-bandi.