|
Hujjat kuchini yo‘qotgan 10.12.2018
|
Oʻzbekiston Respublikasi Vazirlar Mahkamasining
qarori
OʻZBEKISTON RESPUBLIKASI QIShLOQ VA SUV XOʻJALIGI VAZIRLIGI HUZURIDA BOShOQLI DON EKINLARI URUGʻChILIGI RESPUBLIKA BOShQARMASINI TAShKIL ETISh TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2018-yil 7-dekabrdagi 995-sonli “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Qishloq va suv xoʻjaligi davlat boshqaruvi tizimini tubdan takomillashtirish chora-tadbirlari toʻgʻrisida” 2018-yil 17-apreldagi PF-5418-son Farmoni, Oʻzbekiston Respublikasi Prezidentining “Oʻzbekiston Respublikasi Qishloq xoʻjaligi vazirligi faoliyatini tashkil etish chora-tadbirlari toʻgʻrisida” 2018-yil 17-apreldagi PQ-3671-son qarori, “Oʻzbekiston Respublikasi Suv xoʻjaligi vazirligi faoliyatini tashkil etish chora-tadbirlari toʻgʻrisida” 2018-yil 17-apreldagi PQ-3672-son qarori)”gi qaroriga asosan oʻz kuchini yoʻqotgan.
Boshoqli Don ekinlarining oʻzimizda yetishtirilgan urugʻlarining mustahkam asosini yaratish, respublika xoʻjaliklarini boshoqli don ekinlari yuqori hosilli navlarining sifatli urugʻligi bilan kafolatli taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Qishloq va suv xoʻjaligi vazirligi:
xodimlarning umumiy soni doirasida vazirlik huzurida Boshoqli don ekinlari urugʻchiligi respublika boshqarmasini tashkil etsin;
oʻn kun muddatda Qishloq va suv xoʻjaligi vazirligi huzuridagi Boshoqli don ekinlari urugʻchiligi respublika boshqarmasi toʻgʻrisidagi nizomni ishlab chiqsin va belgilangan tartibda tasdiqlasin.
2. Oʻzbekiston Respublikasi Qishloq va suv xoʻjaligi vazirligi Qoraqalpogʻiston Respublikasi Vazirlar Kengashi, viloyatlar hokimliklari bilan birgalikda Andijon don va dukkakli don ekinlari ilmiy-tadqiqot, institutining yuridik shaxs huquqiga ega boʻlgan Qoraqalpogʻiston respublika va viloyatlar filiallarini hamda davlat nav sinash uchastkalarini xoʻjaliklar negizida 1-ilovaga* muvofiq tashkil etsin.
* 1-ilova berilmaydi.
Koʻrsatib oʻtilgan institutning Vazirlar Mahkamasining 1997-yil 25-avgustdagi 413-son qaroriga muvofiq tashkil etilgan Qoraqalpogʻiston, Fargʻona, Buxoro, Sirdaryo, Surxondaryo, Xorazm boʻlimlari tugatilsin.
3. Andijon ilmiy-tadqiqot institutining filiallari tomonidan davlat ilmiy-texnika dasturlari doirasida bajariladigan ilmiy-texnika dasturlarini mablagʻ bilan taʼminlash “Fan” tarmogʻi boʻyicha ajratiladigan budjet mablagʻlari va oʻz xoʻjalik faoliyati hisobiga amalga oshirilsin.
4. Oʻzbekiston Respublikasi Fan va texnika davlat qoʻmitasi Qishloq va suv xoʻjaligi vazirligi huzuridagi Qishloq xoʻjaligi ilmiy ishlab-chiqarish markazi bilan birgalikda 1999-yilgi ilmiy-tadqiqot ishlari prognozida Andijon don ilmiy-tadqiqot instituti va uning filiallari tomonidan tegishli davlat ilmiy-texnika dasturlari bajarilishini nazarda tutsin.
5. “Elita” Oʻzbekiston—Irlandiya qoʻshma korxonasi (“Elita” Q.K, Samarqand viloyati) tomonidan 1998-yilda boshoqli don ekinlarining 18 ming tonna elita va superelita urugʻlari yetishtirilganligi, 1999-yilda urugʻ yetishtirish hajmi 32,0 ming tonnaga yetkazilishi maʼlumot uchun qabul qilinsin.
“Oʻzdonmahsulot” davlat korporatsiyasi 1999-yil hosilidan boshlab Andijon viloyati xoʻjaliklaridan urugʻ sotib olish hajmini tegishli ravishda qisqartirgan holda koʻrsatilgan urugʻ miqdorini “Elita” qoʻshma korxonasidan sotib olsin.
Oʻzbekiston Respublikasi Qishloq va suv xoʻjaligi vazirligi 1999-yil hosilidan boshlab Boshoqli don ekinlari urugʻini Samarqand viloyatida ishlab chiqarilgan hajmni hisobga olgan holda taqsimlasin.
Oldingi tahrirga qarang.
(6-band Oʻzbekiston Respublikasi Vazirlar Mahkamasining 2009-yil 17-iyundagi 168-sonli qaroriga asosan oʻz kuchini yoʻqotgan — OʻR QHT, 2009-y., 25-son, 288-modda)
7. Moliya vazirligi Davlat soliq qoʻmitasi, Pensiya jamgʻarmasi va Mehnat vazirligi bilan birgalikda:
1-ilovada koʻrsatilgan xoʻjaliklarning budjet, Pensiya jamgʻarmasi va Ish bilan taʼminlashga koʻmaklashish jamgʻarmasi oldidagi qarzlarini qaytarishni 1998-yil 1-yanvardagi holatiga koʻra penya hisoblamasdan 3 yilga kechiktirsinlar;
budjetga muddatida toʻlanmagan toʻlovlar boʻyicha hisoblangan penyalar 1998-yil 1-yanvardagi holatiga koʻra hisobdan chiqarilsin;
Andijon don ilmiy-tadqiqot instituti filiallariga almashlab ekish va qishloq xoʻjaligi ekinlari navini almashtirishning amaldagi sxemalari doirasida xoʻjaliklarning har bir filial uchun 300 gektargacha ajratiladigan yerlari yer soligʻi toʻlashdan 1999-yil 1-yanvardan boshlab 3 yilga ozod etilsin.
8. “Oʻzdonmahsulot” davlat korporatsiyasi Andijon ilmiy-tadqiqot instituti filiallari va nav sinash uchastkalari tashkil etilgan xoʻjaliklarga va sinov oʻtkaziladigan boshqa xoʻjaliklarga boshoqli don ekinlarining istiqbolli va yuqori hosilli navlari urugʻlarini 2-ilovaga* muvofiq yetkazib bersin.
* 2-ilova berilmaydi.
Qoraqalpogʻiston Respublikasi Vazirlar Kengashi, viloyatlar hokimliklari Qishloq va suv xoʻjaligi vazirligi bilan birgalikda boshoqli don ekinlarining keng ishlab chiqarish sinovi oʻtkaziladigan xoʻjaliklarni aniqlasinlar.
9. “Oʻzdonmahsulot” davlat korporatsiyasi Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda boshoqli don ekinlari urugʻlarini qabul qiladigan, saqlaydigan va sotadigan ixtisoslashtirilgan don qabul qilish korxonalari roʻyxatini aniqlasin, boshoqli don ekinlari urugʻlarini esa faqat Qishloq va suv xoʻjaligi vazirligi huzuridagi “Oʻzdavurugʻnazoratmarkaz”ning xulosasi boʻyicha sotsin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I.H. Joʻrabekov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1998-yil 7-avgust,
344-son
