Oʻzbekiston Respublikasi Prezidentining 2025-yil 14-iyuldagi PF-111-son “Davlat boshqaruvi tizimida samaradorlik, proaktivlik va natijadorlikni oshirish chora-tadbirlari toʻgʻrisida”gi Farmoniga muvofiq buyuraman:

1. Oʻzbekiston Respublikasi adliya vazirining 2014-yil 28-fevraldagi 53-mh-son buyrugʻi (roʻyxat raqami 2565, 2014-yil 28-fevral) (Oʻzbekiston Respublikasi qonun hujjatlari toʻplami, 2014-y., 10-son, 110-modda) bilan tasdiqlangan Idoraviy normativ-huquqiy hujjatlarni tayyorlash va qabul qilish qoidalariga ilovaga muvofiq qoʻshimcha va oʻzgartirishlar kiritilsin.

2. Mazkur buyruq 2025-yil 1-avgustdan eʼtiboran kuchga kiradi.

1. 5-band quyidagi mazmundagi ikkinchi xatboshi bilan toʻldirilsin:

“Bunda, sanitariya qoidalari, normalari va gigiyena normativlari, fitosanitariya talablari, ekologik normalar va qoidalar, veterinariya hamda veterinariya-sanitariya qoidalari va normalarini xalqaro standartlarga moslashtirish jarayonida ularga huquqiy normalarni kiritishga yoʻl qoʻyiladi.”;

ikkinchi va uchinchi xatboshilar tegishli ravishda uchinchi va toʻrtinchi xatboshilar deb hisoblansin.

2. 93¹-band quyidagi tahrirda bayon etilsin:

“93¹. Adliya vazirligida huquqiy ekspertizadan oʻtkazilayotgan idoraviy normativ-huquqiy hujjat qayta ishlash (tahrirlash) orqali davlat roʻyxatidan oʻtkazilishi mumkin.

Idoraviy normativ-huquqiy hujjatni qayta ishlash (tahrirlash) elektron tizim orqali ushbu hujjatni qabul qilgan vazirlik yoki idoraning birinchi rahbari tomonidan imzolangan tegishli xatga asosan Adliya vazirligi tomonidan amalga oshiriladi.

Bunda, idoraviy normativ-huquqiy hujjat Oʻzbekiston Respublikasining Konstitutsiyasi va qonunlariga, unga nisbatan yuqori yuridik kuchga ega boʻlgan boshqa normativ-huquqiy hujjatlarga, mamlakatda amalga oshirilayotgan islohotlarning maqsad va vazifalariga, qonunchilik texnikasi qoidalariga muvofiqligi, shuningdek havola qiluvchi normalar qoʻllanilishining asosliligi va maqsadga muvofiqligi yuzasidan qayta ishlanadi (tahrirlanadi).”.

3. 95-bandda:

1) birinchi va ikkinchi xatboshilar quyidagi tahrirda bayon etilsin:

“95. Adliya vazirligi tomonidan davlat roʻyxatidan oʻtkazish rad etilgan idoraviy normativ-huquqiy hujjatlar rad etilgan vaqtdan eʼtiboran bekor qilingan hisoblanadi hamda vazirlik va idoralar tomonidan ularni bekor qilish uchun alohida hujjat qabul qilish talab etilmaydi.

Bunda, Adliya vazirligining davlat roʻyxatidan oʻtkazishni rad etish toʻgʻrisidagi xulosasi imzolangan vaqtdan idoraviy normativ-huquqiy hujjatda uning bekor qilinganligi haqidagi belgi avtomatik tarzda elektron tizimda qayd etiladi.”;

2) toʻrtinchi xatboshidan “yoxud hujjatni bekor qilish toʻgʻrisidagi hujjat nusxasini Oʻzbekiston Respublikasi Adliya vazirligiga yuborishga” degan soʻzlar chiqarib tashlansin;

3) beshinchi xatboshi chiqarib tashlansin.

4. 96-banddan “, ushbu hujjatni bekor qilish haqidagi hujjatning nusxasini” degan soʻzlar chiqarib tashlansin.