O‘zbekiston Respublikasining qonun hujjatlarida taqiqlanmagan tadbirkorlik faoliyati bilan shug‘ullanish istagini bildirgan jismoniy shaxslar yuridik shaxs tuzmagan holda tadbirkor sifatida davlat ro‘yxatidan o‘tganlarida ro‘yxatga olganlik uchun undiriladigan yig‘im to‘laydilar.

Ro‘yxatga olganlik uchun undiriladigan yig‘im stavkasining eng yuqori miqdori, shuningdek yig‘im bo‘yicha imtiyozlar beriladigan yo‘lovchilarning toifalari O‘zbekiston Respublikasi Vazirlar Mahkamasi tomonidan belgilanadi. Bunday yig‘im stavkasining eng yuqori miqdori respublikada belgilangan eng kam oylik ish haqi miqdoridan oshib ketmasligi kerak.

Ayrim to‘lovchilar uchun yig‘im stavkasining aniq miqdorlari davlat hokimiyatining mahalliy organlari tomonidan belgilanadi.

Yig‘im summalari tadbirkor ro‘yxatga olingan joydagi tegishli budjetga o‘tkaziladi.

O‘zbekiston Respublikasi qonun hujjatlarida ruxsat etilgan tadbirkorlik faoliyati bilan shug‘ullanish istagini bildirgan jismoniy shaxsni davlat ro‘yxatidan o‘tkazish ana shu shaxsning doimiy istiqomat joyidagi tegishli tuman, shahar, shahardagi tuman hokimligi tomonidan amalga oshiriladi.

Ro‘yxatga olish jismoniy shaxs ariza bergan vaqtdan e’tiboran uch kunlik muddatda amalga oshirilishi lozim. Jismoniy shaxs ro‘yxatga olganlik uchun undiriladigan yig‘imni to‘laganligi to‘g‘risidagi hujjatni taqdim etganidan keyin unga arizada ko‘rsatilgan muddatga guvohnoma beriladi.

Jismoniy shaxslarni ro‘yxatdan o‘tkazish tartibi va ularga guvohnoma berishning belgilangan muddatini buzishda aybdor bo‘lgan mansabdor shaxslar qonun hujjatlariga muvofiq javobgar bo‘ladilar.

Ro‘yxatga olganlik uchun undiriladigan yig‘im bank muassasasi yoki aholidan soliq va yig‘im to‘lovlari qabul qilib oluvchi boshqa muassasalar orqali to‘lanadi. Ro‘yxatga olganlik uchun to‘langan yig‘im summasi qaytarilmaydi.

Jismoniy shaxs tadbirkor sifatida ro‘yxatga olinganligi to‘g‘risidagi guvohnoma uch nusxada rasmiylashtiriladi. Uning bir nusxasi tadbirkor ro‘yxatga olingan joydagi soliq organiga yuboriladi.

Jismoniy shaxsga davlat ro‘yxatiga olinganlik to‘g‘risida berilgan guvohnoma:

guvohnoma berilgan muddat o‘tganidan keyin;

tadbirkor guvohnoma bergan hokimlikka tadbirkorlik faoliyatini to‘xtatganligi to‘g‘risida ariza bergan vaqtdan boshlab;

to‘liq shirkat qatnashchilari tarkibidan chiqqani taqdirda;

qonun hujjatlarida nazarda tutilgan boshqa hollarda 15 kunlik muddat ichida qaytarilishi lozim.

To‘liq xo‘jalik shirkati ro‘yxatga olingan vaqtda yoki bunday shirkatga kirgan chog‘da jismoniy shaxsga — ana shunday shirkatning a’zosiga ushbu moddaning beshinchi qismida nazarda tutilgan tartibda davlat ro‘yxatiga olinganlik to‘g‘risida guvohnoma beriladi. Bunda ro‘yxatga olinganlik uchun yig‘im undirilmaydi.

Jismoniy shaxslar, shu jumladan to‘liq xo‘jalik shirkati qatnashchilari tadbirkorni ro‘yxatga olganlik to‘g‘risidagi guvohnomada ko‘rsatilgan faoliyat turlarinigina amalga oshirishlari mumkin.

Davlat ro‘yxatidan o‘tganlik to‘g‘risidagi guvohnomalar soliq organlarining va qonun hujjatlari bilan belgilab qo‘yiladigan boshqa organlarning mansabdor shaxslari o‘z vazifalarini amalga oshirish chog‘ida talab qilganlarida ko‘rsatiladi.