Oʻzbekiston Respublikasining “Pochta aloqasi toʻgʻrisida”gi Qonuni va Oʻzbekiston Respublikasi Prezidentining 2023-yil 27-iyuldagi PF-114-son “Maʼmuriy islohotlar doirasida madaniyat va turizm sohasida davlat boshqaruvini samarali tashkil qilish chora-tadbirlari toʻgʻrisida”gi Farmoniga muvofiq buyuraman:

1. Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasining 2013-yil 21-oktabrdagi 58-mh-son qarori (roʻyxat raqami 2529, 2013-yil 22-noyabr) (Oʻzbekiston Respublikasi qonun hujjatlari toʻplami, 2013-y., 47-son, 624-modda) bilan tasdiqlangan Oʻzbekiston Respublikasi pochta toʻlovining davlat belgilari toʻgʻrisidagi nizomga ilovaga muvofiq oʻzgartirishlar va qoʻshimcha kiritilsin.

2. Mazkur buyruq Oʻzbekiston Respublikasi Madaniyat vazirligi hamda Raqobatni rivojlantirish va isteʼmolchilar huquqlarini himoya qilish qoʻmitasi bilan kelishilgan.

3. Mazkur buyruq rasmiy eʼlon qilingan kundan eʼtiboran kuchga kiradi.

1. Muqaddimadan “Umumjahon pochta konvensiyasi, Yozma xat-xabarlar reglamenti, Oʻzbekiston Respublikasining “Pochta aloqasi toʻgʻrisida”gi Qonuni, Oʻzbekiston Respublikasi Vazirlar Mahkamasining 2004-yil 19-iyuldagi 339-son “Pochta aloqasi sohasidagi faoliyatni takomillashtirish toʻgʻrisida”gi va 2018-yil 1-maydagi 318-son “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi hamda Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi Aloqa, axborotlashtirish va telekommunikatsiya texnologiyalari sohasida nazorat boʻyicha inspeksiya toʻgʻrisidagi nizomlarni tasdiqlash haqida”gi qarorlariga muvofiq” degan soʻzlar chiqarib tashlansin.

2. 2-bandda:

ikkinchi xatboshi quyidagi tahrirda bayon etilsin:

“ichki yozma xat-xabarlar — qabul qilish va yetkazib berish (topshirish) uchun Oʻzbekiston Respublikasi hududida amalga oshiriladigan yozma xat-xabarlar;”;

toʻrtinchi va beshinchi xatboshilar quyidagi tahrirda bayon etilsin:

“pochta toʻlovining davlat belgilari (PTDB) — pochta aloqasining milliy operatori orqali joʻnatiladigan oddiy va roʻyxatga olinadigan xatlar va banderollar, pochta varaqchalariga pochta aloqasi xizmatlari haqi toʻlanganligini tasdiqlash uchun tushiriladigan pochta markalari va frankirlash mashinalarining tamgʻa izlari;

Oʻzbekiston Respublikasi pochta markalari va maxsus xotira shtempellari izlarining katalogi — qoʻshimcha maʼlumotlar bilan chiqarilgan pochta markalarining hamda muhim sanalar yoki buyuk voqealar munosabati bilan chiqarilgan maxsus xotira shtempellari izlarining xronologik roʻyxatini oʻzida ifodalaydigan maʼlumotnoma nashri;”;

oltinchi xatboshi chiqarib tashlansin;

yettinchi — oʻttiz uchinchi xatboshilar tegishlicha oltinchi — oʻttiz ikkinchi xatboshilar deb hisoblansin;

sakkizinchi xatboshi quyidagi tahrirda bayon etilsin:

“xalqaro yozma xat-xabarlar — Oʻzbekiston Respublikasi hududidan tashqariga yetkazib berish (topshirish) uchun Oʻzbekiston Respublikasida qabul qilinadigan va uning hududiga xorijiy davlatdan kelib tushadigan yoki tranzit orqali keladigan yozma xat-xabarlar;”;

toʻqqizinchi xatboshi “bosilganidan” degan soʻzdan keyin “va muomalaga kiritilganidan” degan soʻzlar bilan toʻldirilsin;

oʻninchi va oʻn birinchi xatboshilar quyidagi tahrirda bayon etilsin:

“pochta aloqasining milliy operatori — Oʻzbekiston Respublikasi doirasida pochta aloqasi xizmatlari bozoridagi talabni qanoatlantirish, majburiy ravishda universal pochta xizmatlari koʻrsatish boʻyicha vazifalarni va Umumjahon pochta ittifoqining hujjatlaridan kelib chiqadigan majburiyatlarni bajarish vazifalari Oʻzbekiston Respublikasi Vazirlar Mahkamasi tomonidan oʻz zimmasiga yuklatilgan pochta aloqasi operatori;

pochta markasining nominal qiymati — yozma xat-xabarlarga kiruvchi oddiy va roʻyxatga olinadigan xatlar va banderollar, pochta varaqchalarni joʻnatish boʻyicha xizmatlarning pochta markasida arab raqamlari yoki lotin harflari bilan koʻrsatiladigan qiymati;”;

oʻn uchinchi xatboshi quyidagi tahrirda bayon etilsin:

“pochta aloqasi operatori — mulk huquqi yoki boshqa ashyoviy huquqlar asosida pochta aloqasi tarmogʻiga egalik qiluvchi va faoliyatning asosiy turi sifatida pochta aloqasi xizmatlari koʻrsatuvchi yuridik shaxs;”;

oʻn oltinchi xatboshi quyidagi tahrirda bayon etilsin:

“yozma xat-xabarlar — oddiy va roʻyxatga olinadigan xatlar, pochta varaqchalari, banderollar, mayda paketlar, koʻzi ojizlar uchun joʻnatmalar va “M” qoplari;”;

oʻn sakkizinchi xatboshidan “, kuryerlik” degan soʻzlar chiqarib tashlansin;

yigirma uchinchi xatboshi quyidagi tahrirda bayon etilsin:

“pochta aloqasi provayderi — pochta aloqasi operatorlarining tarmogʻi orqali pochta aloqasi xizmatlari koʻrsatuvchi yuridik shaxs;”;

yigirma sakkizinchi xatboshi quyidagi tahrirda bayon etilsin:

“frankirlash mashinasi — yozma xat-xabarlarga kiruvchi oddiy va roʻyxatga olinadigan xatlar va banderollarni, pochta varaqchalarga pochta aloqasi milliy operatorining xizmatlari uchun haq toʻlanganligini, ushbu xat-xabarlar qabul qilingan sanani va boshqa axborotni tasdiqlovchi tamgʻa izlarini tushirishga moʻljallangan mashina;”.

3. 3-band quyidagi tahrirda bayon etilsin:

“3. PTDB Umumjahon pochta konvensiyasi, Konvensiya reglamenti, Oʻzbekiston Respublikasining “Pochta aloqasi toʻgʻrisida”gi Qonuni, Pochta aloqasi xizmatlarini koʻrsatish qoidalariga (roʻyxat raqami 2219, 2011-yil 28-aprel) muvofiq oddiy va buyurtma ichki va xalqaro yozma xat-xabarlarni joʻnatish boʻyicha pochta aloqasining milliy operatori tomonidan taqdim etiladigan pochta aloqasi xizmatlariga haq toʻlash uchun moʻljallangan.”.

4. 4-band quyidagi tahrirda bayon etilsin:

“4. Oʻzbekiston Respublikasining “Pochta aloqasi toʻgʻrisida”gi Qonunining 7-moddasiga muvofiq, PTDB namunalarini tasdiqlash, pochta markalarining muomalaga kiritilish va muomaladan chiqarish, PTDB davlat kolleksiyasini shakllantirish, maxsus xotira shtempellarini tayyorlash va ulardan foydalanish tartibi hamda frankirlash mashinalaridan foydalanish tartibini belgilash Vazirlik tomonidan amalga oshiriladi.”.

5. 5-bandda:

birinchi xatboshi quyidagi tahrirda bayon etilsin:

“5. Pochta aloqasi xizmatlari uchun haq toʻlanganligini tasdiqlovchi frankirlash mashinasining tamgʻa izi quyidagilarni oʻz ichiga olishi kerak:”;

beshinchi xatboshidagi “tamgʻasining” degan soʻz “tamgʻa” degan soʻz bilan almashtirilsin.

6. 10-banddagi “pochta aloqasi operatorlari, provayderlari” degan soʻzlar “milliy operator” degan soʻzlar bilan almashtirilsin.

7. 13-bandning ikkinchi xatboshisidagi “pochta aloqasi operatorlari, provayderlari” degan soʻzlar “uning tarkibiy boʻlinmalari” degan soʻzlar bilan almashtirilsin.

8. 14-band quyidagi tahrirda bayon etilsin:

“14. Milliy operator filatelistlar va foydalanuvchilar uchun Oʻzbekiston Respublikasining Pochta markalari va MXSh izlarining katalogi hamda boshqa reklama mahsulotini chiqaradi.

Oʻzbekiston Respublikasining Pochta markalari va MXSh izlarining katalogiga quyidagi qoʻshimcha maʼlumotlar kiritiladi:

pochta markalari toʻgʻrisida — chiqarilgan sana, identifikatsiya raqami, chiqarilgan markalar bagʻishlangan seriya yoki voqea-hodisaning nomi, rassom yoki dizaynerning F.I.O., tasvirning qisqacha izohi, rangi, bosish usuli, qogʻoz turi, pochta markasi (pochta bloki)ning oʻlchami, varaqdagi pochta markalarining miqdori, perforatsiya toʻgʻrisida axborot, nominal qiymati, adadi va boshqalar;

maxsus xotira shtempellari izlari toʻgʻrisida — shtempel chiqarilishi bilan bogʻliq muhim sana va voqea-hodisa, maxsus hisobdan chiqarishni oʻtkazish sanasi va joyi koʻrsatiladi, shtempel rasmi va izining tavsifi, shtempelning identifikatsiya raqami va oʻlchami, muallif toʻgʻrisidagi maʼlumotlar.

Oʻzbekiston Respublikasi Pochta markalari va MXSh izlarining katalogini chiqarish davriyligi milliy operator tomonidan belgilanadi.”.

9. 15-bandning beshinchi xatboshisidagi “Madaniyat va turizm vazirligi” degan soʻzlar “Madaniyat vazirligi” degan soʻzlar bilan almashtirilsin.

10. 22-bandning ikkinchi xatboshisidagi “pochta aloqasi operatorlari, provayderlarining” degan soʻzlar “milliy operatorining” degan soʻzlar bilan almashtirilsin.

11. 26-bandning birinchi xatboshisidan “pochta aloqasi operatorlari, provayderlari,” degan soʻzlar chiqarib tashlansin.

12. 32-bandning birinchi xatboshisidagi “Yozma xat-xabarlar” degan soʻzlar “Konvensiya” degan soʻzlar bilan almashtirilsin.

13. 33-bandda:

birinchi xatboshi quyidagi tahrirda bayon etilsin:

“33. Milliy operator keyingi yil uchun tasdiqlangan pochta markalari, markalangan va filateliya mahsulotlarini nashr qilish mavzu rejalarini joriy yilning 1-iyuligacha oʻz tarkibiy boʻlinmalariga yetkazadi.”;

ikkinchi xatboshidagi “Pochta aloqasi operatorlari, provayderlari” degan soʻzlar “Milliy operatorning tarkibiy boʻlinmalari” degan soʻzlar bilan almashtirilsin.

14. 55-bandning uchinchi xatboshisi chiqarib tashlansin.