Oʻzbekiston Respublikasi Prezidentining

Farmoni

Oʻzbekiston Respublikasi Iqtisodiyot va moliya vazirligi huzuridagi Kadastr agentligi faoliyati takomillashtirilishi munosabati bilan Oʻzbekiston Respublikasi Prezidentining ayrim hujjatlariga qoʻshimcha va oʻzgartirishlar kiritish toʻgʻrisida

Oʻzbekiston Respublikasi Iqtisodiyot va moliya vazirligi huzuridagi Kadastr agentligining yer resurslaridan oqilona foydalanish, yer hisobini yuritish hamda kadastr xizmatlari sifatini yaxshilash boʻyicha faoliyatini yanada takomillashtirish maqsadida:

1. Oʻzbekiston Respublikasi Prezidentining ayrim hujjatlariga ilovaga muvofiq quyidagilarni nazarda tutuvchi qoʻshimcha va oʻzgartirishlar kiritilsin:

Kadastr agentligining hududiy boshqarmalari boshliqlarini lavozimga tayinlash va lavozimidan ozod etish tartibini belgilash;

Bosh vazir oʻrinbosarlarining Kadastr agentligi faoliyatini muvofiqlashtirish boʻyicha vazifalarini belgilash;

kadastr, geodeziya va kartografiya sohasida kadrlar tayyorlash, ularning malakasini oshirish va qayta tayyorlash tizimini takomillashtirish.

2. Mazkur Farmonning ijrosini nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2024-yil 18-yanvar,

PF-16-son

Oʻzbekiston Respublikasi Prezidentining 2024-yil 18-yanvardagi PF-16-son Farmoniga
ILOVA

Oʻzbekiston Respublikasi Prezidentining ayrim hujjatlariga kiritilayotgan qoʻshimcha va oʻzgartirishlar

1. Oʻzbekiston Respublikasi Prezidentining 2020-yil 7-sentabrdagi “Yer hisobi va davlat kadastrlarini yuritish tizimini tubdan takomillashtirish chora-tadbirlari toʻgʻrisida”gi PF-6061-son Farmonida:

a) 3-band quyidagi mazmundagi xatboshi bilan toʻldirilsin:

“Belgilansinki, Kadastr agentligi faoliyatining yer hisobini yuritish, mazkur sohada vazirlik va idoralar, mahalliy davlat hokimiyati organlari bilan faol ishlash boʻyicha yoʻnalishlari Bosh vazir oʻrinbosari A.J. Ramatov, moliyaviy faoliyati Bosh vazir oʻrinbosari J.A. Qoʻchqorov tomonidan muvofiqlashtiriladi”;

b) 5-bandning oltinchi xatboshisidagi “Oʻzbekiston Respublikasi Milliy geografik axborot tizimida (keyingi oʻrinlarda — Milliy geoaxborot tizimi)” soʻzlari “Kadastr va koʻchmas mulkni roʻyxatdan oʻtkazish integratsion axborot tizimida (UZKAD)” soʻzlari bilan almashtirilsin;

v) 6-bandda:

uchinchi xatboshidagi “Milliy geoaxborot tizimiga” soʻzlari “Oʻzbekiston Respublikasi Milliy geografik axborot tizimiga (keyingi oʻrinlarda — Milliy geoaxborot tizimi)” soʻzlari bilan almashtirilsin;

toʻrtinchi xatboshidan “, tuman (shahar) yer kadastri daftari” soʻzlari chiqarib tashlansin.

2. Oʻzbekiston Respublikasi Prezidentining 2021-yil 8-iyundagi “Yer munosabatlarida tenglik va shaffoflikni taʼminlash, erga boʻlgan huquqlarni ishonchli himoya qilish va ularni bozor aktiviga aylantirish chora-tadbirlari toʻgʻrisida”gi PF-6243-son Farmonining 10-bandida:

birinchi — toʻrtinchi xatboshilardan “Davlat soliq qoʻmitasi huzuridagi” soʻzlari chiqarib tashlansin;

uchinchi xatboshidagi “yer maydonida noqonuniy qurilgan imoratlarni bartaraf etish” soʻzlari “yer maydonini qaytarish va/yoki unda noqonuniy qurilgan imoratlarni buzish” soʻzlari bilan almashtirilsin.

3. Oʻzbekiston Respublikasi Prezidentining 2023-yil 24-maydagi “Maʼmuriy islohotlar doirasida raqamli texnologiyalar sohasida davlat boshqaruvini samarali tashkil etish chora-tadbirlari toʻgʻrisida”gi PF-76-son Farmoniga 5-ilovaning 42-pozitsiyasi quyidagi tahrirda bayon etilsin:

“

42.

“Raqamli hudud” dasturi doirasida Raqamli rivojlanish departamenti soʻroviga asosan quyidagi maʼlumotlarning dolzarbligini taʼminlagan holda muntazam ravishda qonunchilikda belgilangan tartibda taqdim etib borilishini yoʻlga qoʻyish:

1) maʼmuriy-hududiy birliklar, mahalla fuqarolar yigʻinlari chegaralari, koʻchmas mulk obyektlari, ularning yer uchastkalari chegaralarining raqamli xaritalari;

2) Davlat kartografiya-geodeziya fondida va boshqa tashkilotlarda saqlanayotgan aerosuratlar, kosmik suratlar va ular asosida yaratilgan ortofotoplanlar, shuningdek boshqa arxiv xaritalar;

3) Davlat kadastrlari yagona tizimi maʼlumotlari.

2023-yil avgustdan doimiy

Kadastr agentligi, Raqamli rivojlanish departamenti

“Raqamli hudud” dasturi doirasida Raqamli rivojlanish departamenti aktual maʼlumotlar bilan taʼminlanadi.

”.

4. Oʻzbekiston Respublikasi Prezidentining 2020-yil 7-sentabrdagi “Oʻzbekiston Respublikasi Davlat soliq qoʻmitasi huzuridagi Kadastr agentligi faoliyatini tashkil etish chora-tadbirlari toʻgʻrisida”gi PQ-4819-son qarorida:

a) 1-bandda:

birinchi xatboshidagi “Davlat soliq qoʻmitasi” soʻzlari “Iqtisodiyot va moliya vazirligi” soʻzlari bilan almashtirilsin;

“a” kichik bandda:

uchinchi xatboshidagi “Davlat soliq qoʻmitasi” soʻzlari “Iqtisodiyot va moliya vazirligi” soʻzlari bilan almashtirilsin;

quyidagi mazmundagi xatboshi bilan toʻldirilsin:

“Toshkent geodeziya va kartografiya kolleji negizida — Toshkent geodeziya va kartografiya texnikumi”;

b) 4-bandning toʻrtinchi — yettinchi xatboshilari quyidagi mazmundagi toʻrtinchi-beshinchi xatboshilar bilan almashtirilsin:

“Kadastr agentligining tashkiliy tuzilmasiga kiruvchi tashkilotlar tomonidan koʻrsatiladigan davlat xizmatlaridan tushgan mablagʻlarning 10 foizi;

qonunchilik hujjatlarida taqiqlanmagan boshqa manbalar”;

v) 5-bandning ikkinchi — yettinchi xatboshilari quyidagi tahrirda bayon etilsin:

“Kadastr agentligiga Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan Kadastr agentligi direktori boshchilik qiladi;

Kadastr agentligi direktorining oʻrinbosarlari iqtisodiyot va moliya vaziri tavsiyasiga binoan Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimdan ozod etiladi;

Kadastr agentligining Qoraqalpogʻiston Respublikasi, viloyatlar, Toshkent shahar boshqarmalari boshliqlari iqtisodiyot va moliya vaziri bilan kelishilgan holda Kadastr agentligi direktorining tavsiyasiga binoan Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimidan ozod etiladi;

Davlat kadastrlari palatasi raisi va uning oʻrinbosarlari iqtisodiyot va moliya vaziri bilan kelishilgan holda, Kadastr agentligining tuman (shahar) boʻlimlari boshliqlari, Davlat kadastrlari palatasi hududiy boshqarmalari va tuman (shahar) filiallari boshliqlari, Kadastr agentligi tizimidagi boshqa tashkilotlar rahbarlari va ularning oʻrinbosarlari (“Respublika aerogeodeziya markazi” DK, “Kompyuterlashtirish, geoaxborot texnologiyalarini joriy etish va rivojlantirish markazi” DUK, Davlat kartografiya-geodeziya fondi, “Kartografiya” davlat ilmiy ishlab chiqarish korxonasi, Toshkent geodeziya va kartografiya texnikumi), shuningdek, ularning korrupsiyaga qarshi kurashish boʻlinmalari xodimlari Kadastr agentligi direktori tomonidan lavozimga tayinlanadi va lavozimidan ozod etiladi;

Davlat kadastrlari palatasi koʻchmas mulkka boʻlgan huquqlarning davlat reyestrini, davlat yer kadastri, binolar va inshootlar davlat kadastrini yuritadi;

Davlat kadastrlari palatasining hududiy boshqarmalari koʻchmas mulkka boʻlgan huquqlarni davlat roʻyxatidan oʻtkazadi;”.

5. Oʻzbekiston Respublikasi Prezidentining 2022-yil 22-avgustdagi “2022-2023-yillarda axborot-kommunikatsiya texnologiyalari sohasini yangi bosqichga olib chiqish chora-tadbirlari toʻgʻrisida”gi PQ-357-son qarorida:

a) 11-bandning toʻrtinchi xatboshisidagi “Vazirlar Mahkamasining 2021-yil 19-avgustdagi “Uchinchi shaxslarga soliq toʻlovchilar toʻgʻrisidagi maʼlumotlarni taqdim etish chora-tadbirlari haqida”gi 529-son qarorida” soʻzlari “tegishlicha Vazirlar Mahkamasining 2014-yil 10-iyuldagi “Davlat kadastri sohasida davlat xizmatlari narxlarini belgilashda tabaqalashtirilgan yondashuv tartibini takomillashtirish toʻgʻrisida”gi 186-son, 2021-yil 19-avgustdagi “Uchinchi shaxslarga soliq toʻlovchilar toʻgʻrisidagi maʼlumotlarni taqdim etish chora-tadbirlari haqida”gi 529-son hamda 2022-yil 18-oktabrdagi “Koʻchmas mulkka boʻlgan huquqlarning hisobini yuritishda shaffoflikni taʼminlash, shuningdek, kadastr sohasidagi ayrim maʼmuriy tartib-taomillarni takomillashtirish chora-tadbirlari toʻgʻrisida”gi 610-son qarorlarida” soʻzlari bilan almashtirilsin;

b) 2‑ilovada:

nomlanishidagi “2022-2023-yillarda” soʻzlari “2022 — 2024-yillarda” soʻzlari bilan almashtirilsin;

16-pozitsiyaning “Muddati” ustunidagi “2023-yil aprel” hamda “2023-yil iyun” soʻzlari tegishlicha “2024-yil aprel” hamda “2024-yil dekabr” soʻzlari bilan almashtirilsin.

6. Oʻzbekiston Respublikasi Prezidentining 2022-yil 20-oktabrdagi “Oʻzbekiston Respublikasi Davlat soliq qoʻmitasi huzuridagi Kadastr agentligi faoliyatini yanada takomillashtirish chora-tadbirlari toʻgʻrisida”gi PQ-405-son qarorida:

a) nomlanishi, muqaddima, 3 va 4-bandlar, 1 va 3-ilovalardagi “Davlat soliq qoʻmitasi” soʻzlari “Iqtisodiyot va moliya vazirligi” soʻzlari bilan almashtirilsin;

b) 1-bandda:

“2023-yil 1-yanvardan” soʻzlari “2026-yil 1-yanvardan” soʻzlari bilan almashtirilsin;

quyidagi mazmundagi xatboshi bilan toʻldirilsin:

“Belgilansinki, 2026-yil 1-yanvardan boshlab tegishli huquqlari kadastr organlarida davlat roʻyxatidan oʻtkazilmagan davlat koʻchmas mulk obyektlarini saqlash xarajatlari Davlat budjeti hamda vazirlik va idoralarning budjetdan tashqari manbalari hisobidan moliyalashtirilmaydi”;

v) 5-ilova quyidagi mazmundagi 9 — 11-pozitsiyalar bilan toʻldirilsin:

“
9.	Geografik obyektlarga nom berish tartibini yanada takomillashtirish.	Davlat kadastrlari palatasining Qoraqalpogʻiston Respublikasi, viloyatlar va Toshkent shahar boshqarmalari hamda tuman (shahar) filiallarida geografik obyektlarga nom berish sohasida kadastr organlariga yuklatilgan vazifalarni bajaradigan xodimlarning ish haqi xarajatlarini Vazirlar Mahkamasining 2022-yil 14-fevraldagi 71-son qaroriga muvofiq tadbirkorlik va shaharsozlik faoliyatini amalga oshirish uchun yer uchastkalarini ijara va mulk huquqi asosida sotishdan tushgan mablagʻlarning Davlat kadastrlari palatasiga yoʻnaltiriladigan qismi (“Yerelektron” AATni texnik koʻllab-quvvatlash va uni yuritish bilan bogʻliq shtat birliklarini saqlash uchun) hisobidan moliyalashtirish.	Amaliy chora-tadbirlar	2024-yildan boshlab	Kadastr agentligi
10.	Kadastr sohasida oliy taʼlim muassasalaridagi taʼlim jarayonlari va ishlab chiqarishdagi uzviylikni taʼminlash maqsadida Kadastr agentligining tashkiliy tuzilmasiga kiruvchi tashkilotlarda tegishlicha oliy taʼlim muassasalari kafedralarining amaliyot filiallarini ochish.	1. Kadastr agentligining tashkiliy tuzilmasiga kiruvchi quyidagi tashkilotlarda tegishlicha oliy taʼlim muassasalari kafedralarining amaliyot filiallarini ochish: a) “Toshkent irrigatsiya va qishloq xoʻjaligini mexanizatsiyalash muhandislari instituti” milliy tadqiqot universiteti kafedrasi filialini — Respublika aerogeodeziya markazida; b) Oʻzbekiston milliy universiteti kafedrasi filialini — Davlat kadastrlari palatasida; v) Toshkent davlat texnika universiteti kafedrasi filialini — Davlat kadastrlari palatasining Toshkent shahar boshqarmasida; g) Termiz muhandislik-texnologiya instituti kafedrasi filialini — Respublika aerogeodeziya markazining Surxondaryo hududlararo boʻlinmasida; d) Guliston davlat universiteti kafedrasi filialini — Davlat kadastrlari palatasining Sirdaryo viloyati boshqarmasida; e) Qoraqalpoq davlat universiteti kafedrasi filialini — Respublika aerogeodeziya markazining Qoraqalpogʻiston Respublikasi boʻlinmasida; j) Qarshi muhandislik-iqtisodiyot instituti kafedrasi filialini — Davlat kadastrlari palatasining Qashqadaryo viloyati boshqarmasida; z) Fargʻona politexnika instituti kafedrasi filialini — Respublika aerogeodeziya markazining Fargʻona hududlararo boʻlinmasida; i) Urganch davlat universiteti kafedrasi filialini — Respublika aerogeodeziya markazining Xorazm hududlararo boʻlinmasida; k) Samarqand davlat arxitektura-qurilish universiteti kafedrasi filialini — Respublika aerogeodeziya markazining Samarqand hududlararo boʻlinmasida.	Amaliy chora-tadbirlar	2024-yil mart	Oliy taʼlim, fan va innovatsiyalar vazirligi, Kadastr agentligi
		2. Kafedralar amaliyot filiallarining moddiy-texnik bazasini mustahkamlash, shu jumladan oʻlchash vositalari, texnika va mebel bilan jihozlash.	Amaliy chora-tadbirlar	2024-yil may	Oliy taʼlim, fan va innovatsiyalar vazirligi, Kadastr agentligi
11.	Kadastr sohasida oliy taʼlim muassasalari va Kadastr agentligining tizim tashkilotlari oʻrtasida hamkorlikni yoʻlga qoʻyish.	Oliy taʼlim va ishlab chiqarishdagi uzviylikni taʼminlash maqsadida Agentlikning hududiy tuzilmalarida tegishlicha oliy taʼlim muassasalari kafedralarining amaliyot filiallarini ochish ishlarini amalga oshirish.	Hamkorlik shartnomalari	2024-yil mart	Oliy taʼlim, fan va innovatsiyalar vazirligi, Kadastr agentligi
					”.

(Qonunchilik maʼlumotlari milliy bazasi, 19.01.2024-y., 06/24/16/0051-son)