toggle_night_mode
Hujjat kuchini yo‘qotgan 08.05.2023
Oʻzbekiston Respublikasi Bosh prokurorining
buyrugʻi
Oʻzbekiston Respublikasi Bosh prokuraturasi Akademiyasi magistraturasiga qabul qilish va oʻqitishni tashkil etish toʻgʻrisidagi nizomni tasdiqlash haqida
[Oʻzbekiston Respublikasi Adliya vazirligi tomonidan 2022-yil 24-avgustda roʻyxatdan oʻtkazildi, roʻyxat raqami 3381]
 LexUZ sharhi
Mazkur buyruq Oʻzbekiston Respublikasi Bosh prokurorining 2023-yil 3-maydagi 277-sonli ““Oʻzbekiston Respublikasi Bosh prokuraturasi Akademiyasi magistraturasiga qabul qilish va oʻqitishni tashkil etish toʻgʻrisidagi nizomni tasdiqlash haqida”gi buyruqni oʻz kuchini yoʻqotgan deb topish toʻgʻrisida”gi buyrugʻiga (roʻyxat raqami 3381-1, 08.05.2023-y.) asosan oʻz kuchini yoʻqotgan.
Oʻzbekiston Respublikasining “Prokuratura toʻgʻrisida”gi Qonuni, Oʻzbekiston Respublikasi Prezidentining 2018-yil 8-maydagi PF-5438-son “Prokuratura organlari kadrlarini tayyorlash, qayta tayyorlash va ularning malakasini oshirish tizimini tubdan takomillashtirish chora-tadbirlari toʻgʻrisida”gi Farmoni hamda 2022-yil 15-iyundagi PQ-279-son “Davlat oliy taʼlim muassasalariga oʻqishga qabul qilish jarayonlarini tashkil etish toʻgʻrisida”gi qaroriga muvofiq buyuraman:
1. Oʻzbekiston Respublikasi Bosh prokuraturasi Akademiyasi magistraturasiga qabul qilish va oʻqitishni tashkil etish tartibi toʻgʻrisidagi nizom 1-ilovaga muvofiq tasdiqlansin.
2. Ayrim idoraviy normativ-huquqiy hujjatlar 2-ilovaga muvofiq oʻz kuchini yoʻqotgan deb topilsin.
3. Mazkur buyruq Oʻzbekiston Respublikasi Moliya vazirligi va Vazirlar Mahkamasi huzuridagi Davlat test markazi bilan kelishilgan.
4. Mazkur buyruq rasmiy eʼlon qilingan kundan eʼtiboran kuchga kiradi.
Bosh prokuror N. YOʻLDOShEV
Toshkent sh.,
2022-yil 13-avgust,
270-son
Kelishildi:
Davlat test markazi direktori M. KARIMOV
2022-yil 12-avgust
Moliya vaziri T. IShMETOV
2022-yil 11-avgust
Oʻzbekiston Respublikasi Bosh prokurorining 2022-yil 13-avgustdagi 270-son buyrugʻiga
1-ILOVA
Oʻzbekiston Respublikasi Bosh prokuraturasi Akademiyasi magistraturasiga qabul qilish va oʻqitishni tashkil etish tartibi toʻgʻrisidagi
NIZOM
Mazkur Nizom Oʻzbekiston Respublikasi Bosh prokuraturasi Akademiyasi (bundan buyon matnda Akademiya deb yuritiladi) magistraturasiga kunduzgi, sirtqi, kechki va masofaviy taʼlim shakllari boʻyicha oʻqishga qabul qilish va oʻqitishni tashkil etish tartibini belgilaydi.
1-bob. Umumiy qoidalar
1. Akademiya magistraturasiga (bundan buyon matnda magistratura deb yuritiladi) oʻqishga qabul qilish Oʻzbekiston Respublikasi Bosh prokuraturasi hamda Iqtisodiy taraqqiyot va kambagʻallikni qisqartirish vazirligi tomonidan tasdiqlanadigan qabul kvotalariga muvofiq amalga oshiriladi.
2. Magistraturaga quyidagi shaxslar tanlov asosida qabul qilinadilar:
“Yurisprudensiya” taʼlim yoʻnalishi boʻyicha tayanch oliy yuridik maʼlumotga ega boʻlgan fuqarolar (bundan buyon matnda tashqi nomzodlar deb yuritiladi);
“Yurisprudensiya” taʼlim yoʻnalishi boʻyicha tayanch oliy yuridik maʼlumotga ega boʻlgan prokuratura organlarining xodimlari (shu jumladan, amaldagi kadrlar zaxirasidagi xodimlari), shuningdek boshqa taʼlim yoʻnalishlari boʻyicha oliy maʼlumotga va bevosita prokuratura organlarida kamida 5 yillik mehnat stajiga ega boʻlgan prokuratura organlari xodimlari (bundan buyon matnda ichki nomzodlar deb yuritiladi).
3. Ushbu Nizomda quyidagi asosiy tushunchalardan foydalaniladi:
Akademiya qabul komissiyasi — magistraturaga oʻqishga qabul qilish boʻyicha tanlovni oʻtkazish, nomzodlardan hujjatlarni qabul qilish va ularga maslahatlar berish hamda boshqa tashkiliy masalalarni hal etish uchun har yili Oʻzbekiston Respublikasi Bosh prokurori buyrugʻi bilan Oʻzbekiston Respublikasi Bosh prokurori oʻrinbosari raisligida tuziladigan komissiya;
Apellatsiya komissiyasi — tanlov natijalari boʻyicha nomzodlarning shikoyatlarini koʻrib chiqish uchun Akademiya qabul komissiyasi faoliyatida ishtirok etmagan shaxslar orasidan Oʻzbekiston Respublikasi Bosh prokurori buyrugʻi bilan tuziladigan komissiya;
Oʻzbekiston Respublikasi Bosh prokuraturasi Akademiyasining Kengashi (bundan buyon matnda — Akademiya Kengashi deb yuritiladi) — qonunchilik hujjatlariga muvofiq Akademiya faoliyatining asosiy masalalarini koʻrib chiqish maqsadida tuziladigan kollegial maslahat organi;
attestatsiya komissiyalari — Oʻzbekiston Respublikasi Bosh prokurorining buyrugʻi bilan belgilangan tartibda prokuratura organlari xodimlarining xizmat boʻyicha lavozimga loyiqligini aniqlash maqsadida tashkil etiladigan, shuningdek ichki nomzodlar bilan suhbat oʻtkazish hamda magistraturaga tanlovda ishtirok etishga tavsiya etilgan ichki nomzodlarning roʻyxatini shakllantirish vazifalarini amalga oshiruvchi komissiyalar.
maxsus elektron platforma — Akademiya magistraturasiga oʻqishga kirish uchun nomzodlar tomonidan hujjatlarni onlayn topshirish uchun moʻljallangan maxsus axborot tizimi.
Ushbu bandda qayd etilgan komissiyalar faoliyatiga Akademiya va prokuratura organlari xodimlari, shuningdek boshqa davlat organlari va tashkilotlar, taʼlim muassasalari vakillari, tegishli fanlar boʻyicha ekspertlar jalb qilinishi mumkin.
4. Akademiya qabul komissiyasi kamida 7 nafar aʼzolardan iborat tarkibda tuziladi.
Akademiya qabul komissiyasi faoliyatini tashkiliy jihatdan taʼminlash Akademiya qabul komissiyasi masʼul kotibi (bundan buyon matnda masʼul kotib deb yuritiladi) tomonidan amalga oshiriladi.
Akademiyaning magistratura boʻlimi boshligʻi (yoki ushbu vazifalar yuklatilgan xodim) Akademiya qabul komissiyasi masʼul kotibi hisoblanadi.
Akademiya qabul komissiyasi faoliyatida uning uch va undan ortiq aʼzolari hamda komissiya raisi ishtirok etganda vakolatli hisoblanadi.
5. Magistratura bitiruvchilariga tegishli mutaxassisliklar boʻyicha davlat namunasidagi diplom va “huquq magistri” darajasi beriladi.
6. Magistraturada oʻquv jarayoni taʼlimning kunduzgi, kechki, sirtqi va masofaviy shakllari asosida tashkil etiladi.
Magistraturada oʻqish muddati:
kunduzgi va kechki taʼlim shaklida — bir yil;
sirtqi va masofaviy taʼlim shaklida — oʻquv dasturlaridan kelib chiqib Akademiya Kengashining qarori bilan bir yarim yildan ikki yilgacha etib belgilanadi.
7. Magistraturaga oʻqishga qabul qilingan prokuratura organlari xodimlarining egallab turgan lavozimi va oʻrtacha oylik ish haqi oʻqish davri mobaynida saqlab qolinadi.
8. Magistraturaga kirish uchun hujjatlar har yili 10-iyundan 10-avgustga qadar qabul qilinadi.
9. Magistraturaga oʻqishga qabul qilish nomzodlar uchun teng huquqlilik, qabulning yagona qoidalari va tanlov asosida amalga oshiriladi.
Tasdiqlangan kvotalar doirasida tanlovda eng yuqori ball toʻplagan nomzodlar davlat grantlari boʻyicha birinchi navbatda, qolganlar reyting ballari asosida toʻlov-kontrakt, shuningdek kvotadan tashqari Akademiya Kengashining qaroriga muvofiq belgilanadigan qoʻshimcha tabaqalashtirilgan toʻlov-kontrakt asosida magistraturaga oʻqishga qabul qilinadi.
Toʻlov-kontrakt asosida oʻqitishning toʻlov miqdorini belgilash bir talabani oʻqitish bilan bogʻliq asoslangan xarajatlar miqdoridan kelib chiqib Akademiya tomonidan amalga oshiriladi.
10. Tanlov har yili, qoida tariqasida, avgust oyida, bir hafta muddatda oʻtkaziladi.
Tanlov tashqi nomzodlar uchun abituriyentning bakalavriat diplom bali oʻrtacha koʻrsatkichi hamda xorijiy tilni bilish darajasi boʻyicha tegishli milliy yoki xalqaro sertifikat bali asosida, ballar ketma-ketligiga qatʼiy rioya qilgan holda amalga oshiriladi hamda qoʻshimcha imtihon oʻtkazilmaydi.
Ichki nomzodlar uchun tanlov oʻtkazish tartibi Oʻzbekiston Respublikasi Bosh prokurori tomonidan belgilanadi.
11. Magistraturaga qabul qilishni tashkil etish ushbu Nizomning ilovasiga muvofiq sxema boʻyicha amalga oshiriladi.
2-bob. Hujjatlarni qabul qilish
12. Akademiya qabul komissiyasi tomonidan har yili 10-maydan boshlab oʻqishga qabul qilish muddatlari, mutaxassislik nomlari, qabul kvotalari toʻgʻrisidagi maʼlumotlar Oʻzbekiston Respublikasi Bosh prokuraturasi va Akademiyaning rasmiy veb-saytlarida joylashtirilishi hamda ommaviy axborot vositalarida eʼlon qilinishi taʼminlanadi.
13. Magistraturaga oʻqishga qabul qilish uchun nomzodlardan quyidagi hujjatlar talab etiladi:
soʻrovnoma;
tashqi nomzodlar uchun chet tilini bilish darajasini tasdiqlovchi B2 va undan yuqori darajadagi milliy yoki xalqaro sertifikatlarning elektron nusxasi;
ichki nomzodlar uchun nomzodning bevosita rahbari tomonidan imzolangan tavsiyanoma hamda attestatsiya komissiyasi qarori.
14. Nomzodlar tomonidan hujjatlar elektron shaklda Akademiyaning maxsus elektron platformasi orqali taqdim etiladi. Nomzodlar ish tajribasi va kasb malakasiga oid qoʻshimcha maʼlumotlarni taqdim etishlari mumkin.
15. Nomzodlar tomonidan hujjatlar toʻliq taqdim etilgandan soʻng, ularga shu kunning oʻzida hujjatlar qabul qilinganligi toʻgʻrisida xabarnoma yuboriladi.
16. Hujjatlar belgilangan muddatda toʻliq taqdim etilmagan taqdirda, nomzodga kamchiliklarni bartaraf etish va hujjatlarni qabul qilishning belgilangan muddati tugagunga qadar ularni takroran taqdim etish imkoniyati beriladi.
Hujjatlarni qabul qilishning belgilangan muddati tugagandan soʻng ularga oʻzgartirish va qoʻshimchalar kiritish taqiqlanadi.
17. Hujjat topshirgan nomzodlarning roʻyxati maxsus elektron platformada avtomatik tarzda shakllantirib boriladi.
18. Ichki nomzodlarning nazariy bilim va amaliy salohiyati darajasi, shuningdek ilmiy-tadqiqot faoliyati bilan shugʻullanish uchun zarur boʻlgan qobiliyat va koʻnikmalarga ega ekanligini aniqlash maqsadida tegishliligi boʻyicha ular xizmat olib borayotgan joydagi prokuratura organlarining attestatsiya komissiyasi tomonidan suhbat oʻtkaziladi va ichki nomzodlarga oid hujjatlar oʻrganiladi.
19. Ichki nomzodlar bilan oʻtkazilgan suhbat hamda ularga oid hujjatlarni oʻrganish natijasiga koʻra, attestatsiya komissiyasi tomonidan quyidagi qarorlardan biri qabul qilinadi:
ichki nomzodni magistraturaga tanlovda ishtirok etishga tavsiya etish toʻgʻrisida;
ichki nomzodni magistraturaga tanlovda ishtirok etishga tavsiya etishni rad qilish toʻgʻrisida.
20. Attestatsiya komissiyalarida ichki nomzodlar bilan suhbat oʻtkazish, magistraturaga tanlovda ishtirok etishga tavsiya etilgan ichki nomzodlarning roʻyxatini shakllantirish, ularning hujjatlarini Akademiya qabul komissiyasiga yuborish magistraturaga kirish uchun hujjatlarni qabul qilish muddati tugaguniga qadar amalga oshiriladi.
3-bob. Tanlovni oʻtkazish
21. Tanlovni ushbu Nizomga qatʼiy rioya qilgan holda tashkil etish Akademiya qabul komissiyasiga yuklatiladi.
22. Masʼul kotib tanlovni oʻtkazish sanasini belgilash hamda unda ishtirok etish huquqiga ega boʻlgan nomzodlar roʻyxatini tasdiqlash toʻgʻrisida Akademiya qabul komissiyasi raisiga taqdimnoma kiritadi va bu haqda Akademiya qabul komissiyasi raisining buyrugʻi qabul qilinadi.
23. Tanlovni oʻtkazish jarayoni videotasvirga olinadi, undan nusxa koʻchirish taqiqlanadi. Akademiya qabul komissiyasi qaroriga asosan tanlovni oʻtkazish jarayoni Akademiya rasmiy veb-saytida toʻgʻridan toʻgʻri namoyish etib boriladi.
24. Tanlov natijalari Akademiya qabul komissiyasi tomonidan Akademiya rasmiy veb-saytida darhol eʼlon qilinadi.
25. Tanlov natijalaridan norozi boʻlgan nomzodlar natijalar Akademiya rasmiy veb-saytida eʼlon qilingan kundan boshlab uch ish kuni davomida Apellatsiya komissiyasiga apellatsiya berish huquqiga ega.
Apellatsiya komissiyasi taqdim etilgan apellatsiyani u kelib tushgan kundan boshlab ikki ish kuni ichida koʻrib chiqadi. Nomzod apellatsiyani koʻrib chiqish jarayonida ishtirok etish huquqiga ega.
Apellatsiya koʻrib chiqiladigan kun haqida nomzodga xabar beriladi.
26. Apellatsiya komissiyasi tomonidan apellatsiyani koʻrib chiqishda tanlovning toʻgʻri oʻtkazilganligiga baho beriladi va uning natijasi boʻyicha apellatsiya komissiyasi aʼzolarining oddiy koʻpchilik ovozi bilan quyidagi qarorlardan biri qabul qilinadi:
nomzodning shikoyatini qanoatlantirish toʻgʻrisida;
tanlov natijalarini oʻzgarishsiz qoldirish va shikoyatni qanoatlantirishni rad qilish toʻgʻrisida.
Apellatsiyani koʻrib chiqish jarayonida ishtirok etmagan nomzodga apellatsiyani koʻrib chiqish natijasida qabul qilingan qaror toʻgʻrisida qaror qabul qilingan kuni axborot-kommunikatsiya vositalari orqali xabar beriladi.
Apellatsiya komissiyasi qarori komissiya raisi, aʼzolari va kotibi tomonidan imzolanadigan bayonnomada rasmiylashtiriladi.
27. Apellatsiya komissiyasi qarori ustidan belgilangan tartibda sudga shikoyat qilinishi mumkin.
4-bob. Magistraturaga qabul qilish va oʻqitishni tashkil etish
28. Akademiya qabul komissiyasi tomonidan nomzodlarning tanlovda olgan ballari jamlanib, umumiy qaydnomada har bir mutaxassislik boʻyicha tashqi va ichki nomzodlarning alohida roʻyxati shakllantiriladi.
Roʻyxatda nomzodlar har bir mutaxassislik boʻyicha toʻplangan eng yuqori balldan boshlab kamayib borish tartibida hamda davlat granti va toʻlov-kontrakt asosida oʻqishga qabul qilinganlar ketma-ketligida joylashtiriladi.
Bunda, taʼlimning kunduzgi shakli boʻyicha bir oʻquv yilida ichki nomzodlardan:
bir hududdan, yaʼni Qoraqalpogʻiston Respublikasi, Toshkent shahar, viloyatlar prokuraturalari va unga tenglashtirilgan prokuraturalar, shuningdek Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti va Majburiy ijro byurosidan nomzodning toʻplagan bali ketma-ketligiga koʻra koʻpi bilan 2 nafardan;
Oʻzbekiston Respublikasi Bosh prokuraturasi markaziy mahkamasining tarkibiy tarmoqlaridan 1 nafardan, Akademiyadan koʻpi bilan 2 nafar nomzod oʻqishga qabul qilinishi mumkin.
29. Qabul kvotalari va tanlov natijalaridan kelib chiqib, Akademiya qabul komissiyasi tomonidan minimal oʻtish ballari belgilanadi.
30. Tanlov natijalariga koʻra, kvota boʻyicha belgilangan roʻyxatda oxirgi oʻrinda turuvchi nomzodning toʻplagan jami bali bilan undan keyingi oʻrinda turuvchi nomzodlarning toʻplagan ballari bir xil boʻlsa, ularning barchasi oʻqishga qabul qilinadi.
31. Umumiy qaydnoma asosida Akademiya qabul komissiyasi tomonidan nomzodlarni magistraturaga oʻqishga qabul qilishga tavsiya etish toʻgʻrisida bayonnoma rasmiylashtirilib, Akademiya qabul komissiyasi raisi tomonidan tasdiqlanadi.
32. Akademiya qabul komissiyasi bayonnomasiga asosan Akademiya boshligʻining nomzodlarni davlat granti asosida magistratura tinglovchilari safiga qabul qilish hamda toʻlov-kontrakt asosida nomzodlarni darsga qoʻyish haqidagi buyrugʻi chiqariladi hamda bu haqdagi maʼlumot Akademiya rasmiy veb-saytiga joylashtiriladi.
Toʻlov-kontrakt asosida oʻqishga qabul qilish tavsiya etilgan nomzodlar shartnomada belgilangan toʻlov summasining tegishli qismini belgilangan muddatda toʻlagan taqdirda Akademiya boshligʻining magistratura tinglovchilari safiga qabul qilish haqida buyrugʻi chiqariladi.
33. Toʻlov-kontrakt asosida darsga qoʻyilgan nomzodlar shartnomada belgilangan muddatda toʻlov summasini toʻliq amalga oshirishlari lozim.
Toʻlov-kontrakt boʻyicha shartnoma shartlarini belgilangan muddatda bajarmagan nomzodlar oʻqishdan chetlashtiriladi va bu haqda Akademiya boshligʻining buyrugʻi chiqariladi.
Oʻqishdan chetlashtirilgan nomzodning oʻrniga Akademiya qabul komissiyaning qaroriga asosan ballar ketma-ketligi boʻyicha roʻyxatdagi keyingi nomzod toʻlov-kontrakt asosida oʻqishga qabul qilinadi.
34. Magistraturaga oʻqishga qabul qilingan nomzodlarning tanlov bilan bogʻliq hujjatlari ularning shaxsiy hujjatlari yigʻmajildiga tikib qoʻyiladi.
35. Magistraturada oʻqitishni tashkil etish jarayoni magistratura boʻlimi tomonidan Akademiyaning kafedra, markaz va boʻlimlari bilan birgalikda amalga oshiriladi.
36. Magistraturada oʻqitish tinglovchilarni prokuratura organlari faoliyatining asosiy yoʻnalishlari boʻyicha ilmiy-tadqiqot ishlarini olib borishga tayyorlash maqsadida, ularni zarur oʻquv-metodik va moddiy-texnik baza bilan taʼminlagan holda tashkil etiladi.
37. Magistraturada akademik kredit tizimining joriy etilishi, Akademiya xodimlari, professor-oʻqituvchilar hamda tinglovchilarning huquq va majburiyatlari, oʻquv metodik, ilmiy-pedagogik faoliyati, amaliyot oʻtashi, magistrlik dissertatsiyasini tayyorlashi va oʻqitishni tashkil etish bilan bogʻliq boshqa masalalar Akademiya tomonidan belgilanadi.
5-bob. Yakuniy qoidalar
38. Mazkur Nizomda nazarda tutilgan tadbirlarni amalga oshirish bilan bogʻliq xarajatlar prokuratura organlarining budjetdan tashqari jamgʻarmalari mablagʻlari hisobidan qoplanadi.
39. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.
Bosh prokuratura Akademiyasi magistraturasiga qabul qilish va oʻqitishni tashkil etish tartibi toʻgʻrisidagi nizomga
ILOVA
Oʻzbekiston Respublikasi Bosh prokuraturasi Akademiyasi magistraturasiga qabul qilishni tashkil etish
SXEMASI

Bosqichlar

Masʼullar

Oʻtkaziladigan tadbirlar

Bajarish muddatlari

1-bosqich

Bosh prokuratura Akademiyasi,

Akademiya qabul komissiyasi

Bosh prokuratura Akademiyasi magistraturasiga oʻqishga qabul qilish muddatlari, mutaxassislik nomlari va qabul kvotalari toʻgʻrisida Bosh prokuratura va Akademiya rasmiy veb-saytlari hamda ommaviy axborot vositalarida eʼlon berish

har yili 10-maydan

boshlab 20-iyunga qadar

2-bosqich

Bosh prokuratura Akademiyasi, Akademiya qabul komissiyasi aʼzosi — prokuratura organlarining kadrlar tarmoqlari, Qoraqalpogʻiston Respublikasi, viloyatlar va Toshkent shahar prokurorlari, prokuratura organlari attestatsiya komissiyalari, nomzodlar

Ichki nomzodlar tomonidan ariza va tegishli hujjatlar Akademiya qabul komissiyasi aʼzosi-prokuratura organlarining kadrlar tarmoqlariga topshirish.

Ichki nomzodlar bilan suhbat oʻtkazish va ularning kirish imtihonida ishtirok etishiga oid attestatsiya komissiyasi qarorini qabul qilish.

Kirish imtihonida ishtirok etadigan nomzodlarning arizalari va ularga ilova qilingan hujjatlarni Akademiyaning maxsus elektron platformasi orqali taqdim etish.

10-iyun — 10-avgust

3-bosqich

Akademiya qabul komissiyasi

Tanlovni oʻtkazish:

Nomzodlarning bakalavriat diplom bali oʻrtacha koʻrsatkichi hamda xorijiy tilni bilish darajasi boʻyicha tegishli milliy yoki xalqaro sertifikat uchun berilgan ballni hisoblash.

bir hafta ichida

4-bosqich

Nomzodlar

1. Tanlov natijalari boʻyicha shikoyat qilish;

Tanlov natijalari eʼlon qilingan kundan boshlab 3 ish kuni mobaynida

Apellatsiya komissiyasi

2. Shikoyatlarni koʻrib chiqish.

2 ish kunida

5-bosqich

Bosh prokuratura Akademiyasi, Akademiya qabul komissiyasi

Tanlovdan muvaffaqiyatli oʻtgan nomzodlarni magistraturaga oʻqishga qabul qilishga tavsiya etish

Tanlov natijalari eʼlon qilingandan eʼtiboran 10 kun ichida

6-bosqich

Bosh prokuratura Akademiyasi boshligʻi

Qabul qilishni rasmiylashtirish:

1. Nomzodlarni davlat grantlari asosida magistraturaga qabul qilish va toʻlov-kontrakt asosida nomzodlarni darsga qoʻyish haqida buyruq chiqarish;

Qabul komissiyasi oʻz ishini yakunlagandan soʻng 3 kun ichida

2. Nomzodlarni toʻlov-kontrakt asosida magistraturaga qabul qilish haqida buyruq chiqarish.

toʻlov-kontrakt summasining tegishli qismi toʻlangandan soʻng 3 kun ichida

Oʻzbekiston Respublikasi Bosh prokurorining 2022-yil 13-avgustdagi 270-son buyrugʻiga
2-ILOVA
Oʻz kuchini yoʻqotgan deb topilayotgan idoraviy normativ-huquqiy hujjatlar
ROʻYXATI
1. Oʻzbekiston Respublikasi Bosh prokurorining 2019-yil 23-avgustdagi 217-son “Oʻzbekiston Respublikasi Bosh prokuraturasi Akademiyasi magistraturasiga qabul qilish va oʻqitishni tashkil etish tartibi toʻgʻrisidagi nizomni tasdiqlash haqida”gi buyrugʻi (roʻyxat raqami 3179, 2019-yil 30-avgust) (Qonun hujjatlari maʼlumotlari milliy bazasi, 30.08.2019-y., 10/19/3179/3675-son);
2. Oʻzbekiston Respublikasi Bosh prokurorining 2020-yil 17-apreldagi 220-son “Oʻzbekiston Respublikasi Bosh prokuraturasi Akademiyasi magistraturasiga qabul qilish va oʻqitishni tashkil etish tartibi toʻgʻrisidagi nizomning 1-bandiga oʻzgartirish kiritish haqida”gi buyrugʻi (roʻyxat raqami 3179-1, 2020-yil 29-aprel) (Qonun hujjatlari maʼlumotlari milliy bazasi, 29.04.2020-y., 10/20/3179-1/0524-son);
3. Oʻzbekiston Respublikasi Bosh prokurorining 2022-yil 21-yanvardagi 257-son “Oʻzbekiston Respublikasi Bosh prokuraturasi Akademiyasi magistraturasiga qabul qilish va oʻqitishni tashkil etish tartibi toʻgʻrisidagi nizomning 15-bandiga oʻzgartirishlar kiritish haqida”gi buyrugʻi (roʻyxat raqami 3179-2, 2022-yil 27-yanvar) (Qonunchilik maʼlumotlari milliy bazasi, 27.01.2022-y., 10/22/3179-2/0081-son).
(Qonunchilik maʼlumotlari milliy bazasi, 24.08.2022-y., 10/22/3381/0768-son)