|
Hujjat kuchini yo‘qotgan 21.07.2026
|
Oʻzbekiston Respublikasi Vazirlar Mahkamasining
qarori
Arxiv ishi va ish yuritish sohasida davlat xizmatlari koʻrsatishning ayrim maʼmuriy reglamentlarini tasdiqlash toʻgʻrisida
LexUZ sharhiMazkur qaror Oʻzbekiston Respublikasi Vazirlar Mahkamasining 2026-yil 20-iyuldagi 393-sonli “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida”gi qaroriga asosan oʻz kuchini yoʻqotgan.
Oʻzbekiston Respublikasi Prezidentining “Davlat xizmatlari koʻrsatish infratuzilmasini takomillashtirish va aholining davlat xizmatlaridan foydalanish imkoniyatlarini kengaytirish chora-tadbirlari toʻgʻrisida” 2021-yil 24-iyuldagi PF-6269-son Farmoni ijrosini taʼminlash hamda arxiv ishi va ish yuritish sohasida davlat xizmatlarini koʻrsatish tizimini yanada takomillashtirish maqsadida Vazirlar Mahkamasi qaror qiladi:
1. Quyidagilar:
yaroqsiz holatga kelgan yoki yoʻqotilgan mehnat daftarchasidagi yozuvlarni tasdiqlash boʻyicha davlat xizmati koʻrsatish, ariza berish va uni koʻrib chiqish, maʼlumotnomani ariza beruvchiga taqdim etish tartibini nazarda tutuvchi Yaroqsiz holatga kelgan yoki yoʻqotilgan mehnat daftarchasidagi yozuvlarni tasdiqlash boʻyicha davlat xizmati koʻrsatishning maʼmuriy reglamenti 1-ilovaga muvofiq.
Oldingi tahrirga qarang.
(1-bandning uchinchi xatboshisi Oʻzbekiston Respublikasi Vazirlar Mahkamasining 2023-yil 20-noyabrdagi 612-sonli qaroriga asosan chiqarilgan — Qonunchilik maʼlumotlari milliy bazasi, 22.11.2023-y., 09/23/612/0874-son)
2. Oʻzbekiston Respublikasi “Oʻzarxiv” agentligi oʻn kun muddatda Oʻzbekiston Respublikasi Yagona interaktiv davlat xizmatlari portalida (keyingi oʻrinlarda — YIDXP) elektron xizmatlarni joriy qilish boʻyicha texnik hujjatlarni Oʻzbekiston Respublikasi Axborot texnologiyalari va kommunikatsiyalarini rivojlantirish vazirligiga taqdim etsin.
3. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi “Oʻzarxiv” agentligi hamda Adliya vazirligi huzuridagi Davlat xizmatlari agentligi bilan birgalikda bir oy muddatda:
ushbu qaror bilan tasdiqlanayotgan maʼmuriy reglamentlar boʻyicha davlat xizmatlarining YIDXP orqali joriy etilishini taʼminlasin;
YIDXPda davlat xizmatlari koʻrsatishning har bir bosqichida murojaatlar koʻrib chiqilishini kuzatib borish tartibini joriy etsin;
davlat xizmatlarini koʻrsatish uchun yigʻimlarning Davlat xizmatlari koʻrsatilganligi uchun toʻlangan davlat bojlari va yigʻimlar summasi hisobini yurituvchi yagona billing tizimi orqali elektron tarzda toʻlanishini taʼminlasin.
4. Belgilansinki, Oʻzbekiston Respublikasi Adliya vazirligi huzuridagi “Oʻzarxiv” agentligi tizimidagi davlat arxivlari tomonidan davlat xizmatlarini koʻrsatish uchun elektron maʼlumot almashishni taʼminlovchi axborot tizimini ishlab chiqish va ishga tushirish, davlat arxivlarining axborot tizimini joriy etishda talab etiladigan moddiy-texnik bazani mustahkamlash uchun xarajatlar “Oʻzarxiv” agentligi huzuridagi Arxiv ishini rivojlantirish jamgʻarmasi hisobidan amalga oshiriladi.
(4-band Oʻzbekiston Respublikasi Vazirlar Mahkamasining 2025-yil 1-martdagi 135-sonli qarori tahririda — Qonunchilik maʼlumotlari milliy bazasi, 03.03.2025-y., 09/25/135/0208-son)
5. Oʻzbekiston Respublikasi Adliya vazirligi “Oʻzarxiv” agentligi tizimidagi davlat arxivlari tomonidan davlat xizmatlarining belgilangan tartibda koʻrsatilishi ustidan, shu jumladan, YIDXP orqali doimiy nazorat oʻrnatsin.
(5-band Oʻzbekiston Respublikasi Vazirlar Mahkamasining 2022-yil 28-sentabrdagi 541-sonli qarori tahririda — Qonunchilik maʼlumotlari milliy bazasi, 29.09.2022-y., 09/22/541/0859-son)
7. Oʻzbekiston Respublikasi “Oʻzarxiv” agentligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining maslahatchisi — IT-texnologiyalar, telekommunikatsiyalar va innovatsion faoliyatni rivojlantirish masalalari departamenti boshligʻi O.M. Umarov hamda Oʻzbekiston Respublikasi “Oʻzarxiv” agentligi direktori U.M. Yusupov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 23-sentabr,
597-son
Vazirlar Mahkamasining 2021-yil 23-sentabrdagi 597-son qaroriga
1-ILOVA
1-ILOVA
Yaroqsiz holatga kelgan yoki yoʻqotilgan mehnat daftarchasidagi yozuvlarni tasdiqlash boʻyicha davlat xizmati koʻrsatishning
MAʼMURIY REGLAMENTI
1-bob. Umumiy qoidalar
1. Ushbu Reglament jismoniy shaxslarga yoki ularning yaqin qarindoshlariga (eri yoki xotini, farzandlari, nevaralari, aka-uka va opa-singillari) (keyingi oʻrinlarda — ariza beruvchi) yaroqsiz holatga kelgan yoki yoʻqotilgan mehnat daftarchasidagi davlat arxivlarida saqlanayotgan tashkilotlar boʻyicha yozuvlarni tasdiqlash yuzasidan davlat xizmati (keyingi oʻrinlarda — davlat xizmati) koʻrsatish tartibini belgilaydi.
2. Davlat xizmati davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali davlat arxivlari tomonidan koʻrsatiladi.
3. Davlat xizmatlari markazlari va davlat arxivlari oʻrtasidagi axborot almashinuvi elektron raqamli imzoni (keyingi oʻrinlarda — ERI) majburiy tartibda qoʻllash orqali faqat idoralararo elektron bogʻlanish yordamida amalga oshiriladi.
4. Davlat xizmati ushbu Reglamentga 1-ilovaga muvofiq sxema boʻyicha koʻrsatiladi.
2-bob. Davlat xizmatini koʻrsatish tartibi
5. Ariza beruvchi davlat xizmatidan foydalanish uchun davlat xizmatlari markaziga oʻzi kelib murojaat etadi yoki davlat xizmatlaridan elektron shaklda foydalanish uchun YIDXPdan roʻyxatdan oʻtadi.
6. Ariza beruvchi oʻzi kelib murojaat etgan taqdirda, davlat xizmatlari markazi xodimi ariza beruvchi nomidan, YIDXP orqali murojaat etgan taqdirda esa — mustaqil ravishda ushbu Reglamentga 2-ilovaga muvofiq shakldagi soʻrovnomani elektron tarzda toʻldiradi. Ariza beruvchi ishonchnoma asosida harakat qilayotganda, soʻrovnomaga notarial tasdiqlangan ishonchnoma nusxasi ilova qilinadi.
7. Davlat xizmatlari markazlari tomonidan soʻrovnoma toʻldirilgandan soʻng ariza beruvchi maʼlumotlarning toʻgʻriligini tekshirib, soʻrovnomani imzolarni identifikatsiya qilishning tegishli vositalari (ERI, daktiloskopiya, elektron imzo, Mobil-ID va boshqalar) bilan tasdiqlaydi.
(7-band Oʻzbekiston Respublikasi Vazirlar Mahkamasining 2022-yil 28-sentabrdagi 541-sonli qarori tahririda — Qonunchilik maʼlumotlari milliy bazasi, 29.09.2022-y., 09/22/541/0859-son)
Oldingi tahrirga qarang.
(8-band Oʻzbekiston Respublikasi Vazirlar Mahkamasining 2022-yil 28-sentabrdagi 541-sonli qaroriga asosan oʻz kuchini yoʻqotgan — Qonunchilik maʼlumotlari milliy bazasi, 29.09.2022-y., 09/22/541/0859-son)
9. Ariza beruvchilar YIDXP orqali murojaat etgan taqdirda, soʻrovnomani ERI bilan tasdiqlash talab etilmaydi.
10. Davlat xizmati koʻrsatilganligi uchun yaroqsiz holatga kelgan yoki yoʻqotilgan mehnat daftarchasidagi 1 ta tashkilotdagi ishga kirgan va ishdan boʻshaganligi boʻyicha yozuvlarni tasdiqlash uchun bazaviy hisoblash miqdorining 0,08 barobari miqdorida yigʻim undiriladi.
Bunda davlat xizmatidan foydalanish uchun YIDXP orqali murojaat etilganda, ushbu bandning birinchi xatboshisida koʻrsatilgan yigʻim summasining 90 foizi undiriladi.
11. Yigʻim summasi quyidagi tartibda taqsimlanadi:
a) davlat xizmatlari markazlari orqali murojaat etilganda:
20 foizi — Oʻzbekiston Respublikasi Adliya vazirligining Davlat xizmatlarini rivojlantirish jamgʻarmasiga;
(11-band “a” kichik bandining ikkinchi xatboshisi Oʻzbekiston Respublikasi Vazirlar Mahkamasining 2022-yil 28-sentabrdagi 541-sonli qarori tahririda — Qonunchilik maʼlumotlari milliy bazasi, 29.09.2022-y., 09/22/541/0859-son)
0,5 foizi — Oʻzbekiston Respublikasi Davlat budjetiga;
qolgan mablagʻlar — Oʻzbekiston Respublikasi Adliya vazirligi huzuridagi “Oʻzarxiv” agentligi tizimidagi davlat xizmatini koʻrsatgan davlat arxivining hisobvaragʻiga oʻtkaziladi.
(11-band “a” kichik bandining toʻrtinchi xatboshisi Oʻzbekiston Respublikasi Vazirlar Mahkamasining 2025-yil 1-martdagi 135-sonli qarori tahririda — Qonunchilik maʼlumotlari milliy bazasi, 03.03.2025-y., 09/25/135/0208-son)
b) YIDXP orqali murojaat etilganda:
10 foizi — Oʻzbekiston Respublikasi Adliya vazirligining Davlat xizmatlarini rivojlantirish jamgʻarmasiga;
(11-band “b” kichik bandining ikkinchi xatboshisi Oʻzbekiston Respublikasi Vazirlar Mahkamasining 2022-yil 28-sentabrdagi 541-sonli qarori tahririda — Qonunchilik maʼlumotlari milliy bazasi, 29.09.2022-y., 09/22/541/0859-son)
11,25 foizi — Axborot-kommunikatsiya texnologiyalarini rivojlantirish jamgʻarmasining elektron hukumat va raqamli iqtisodiyotning idoralararo loyihalarini moliyalashtirish boʻyicha maxsus hisobvaragʻiga;
0,5 foizi — Oʻzbekiston Respublikasi Davlat budjetiga;
qolgan mablagʻlar — davlat xizmatini koʻrsatgan davlat arxivining hisobvaragʻiga oʻtkaziladi.
12. Ariza beruvchi tomonidan davlat xizmatini koʻrsatish uchun yigʻimni toʻlamaslik davlat xizmatini koʻrsatishni rad etish uchun asos hisoblanadi.
Davlat xizmatini koʻrsatishni boshqa asoslar boʻyicha rad etish taqiqlanadi.
13. Ariza beruvchi davlat xizmatidan foydalanishdan uni koʻrsatishning har qanday bosqichida bosh tortish huquqiga ega. Ariza beruvchi davlat xizmatidan foydalanishdan bosh tortganda, uning soʻrovnomasi koʻrib chiqilmasdan qoldiriladi. Bunda davlat xizmati koʻrsatilgani uchun toʻlov summasi qaytarilmaydi.
14. Ariza beruvchi davlat xizmatlari markaziga kelib murojaat etgan taqdirda, uning soʻrovnomasi davlat xizmatlari markazi xodimi tomonidan toʻldirilib, ariza beruvchi tomonidan tasdiqlangandan soʻng 10 daqiqa mobaynida, YIDXP orqali murojaat etganda, avtomatik tarzda tegishli davlat arxiviga elektron shaklda yuboriladi.
15. Soʻrovnomada soʻralayotgan tashkilotlar hujjatlari tegishli davlat arxivida mavjud boʻlmaganda, soʻrovnomani qabul qilgan davlat arxivi bir ish kuni mobaynida tegishli maʼlumot saqlanayotgan davlat arxivini aniqlaydi (tashkilotlar hujjatlari boshqa arxivda mavjud boʻlmagan holatlar bundan mustasno) va soʻrovnomani tegishliligi boʻyicha davlat arxivlariga yuboradi.
Tegishli davlat arxivi soʻrovnoma tushgan vaqtdan boshlab yoʻqotilgan mehnat daftarchasidagi yozuvlarni tasdiqlashga oid maʼlumotnomalar uchun 20 ish kunidan oshmagan muddatda tegishli QR-kodli (matrik shtrixli kod) maʼlumotnomani shakllantiradi hamda (oʻzi kelib murojaat etgan taqdirda) tegishli davlat xizmatlari markaziga yoki (elektron shaklda murojaat etgan taqdirda) YIDXP orqali elektron shaklda ariza beruvchiga yuboradi. Bunda toʻlangan yigʻim, agar mavjud boʻlsa, bank xizmati toʻlovini ayirgan holda, soʻrovnomani qabul qilgan arxivdan soʻrovnomani bajargan arxivga oʻtkaziladi.
Soʻrovnoma arxiv hujjatlari asosida koʻrib chiqilib, tegishli maʼlumot aniqlanmagan taqdirda, toʻlangan yigʻim miqdori ariza beruvchiga qaytarilmaydi.
16. Davlat xizmatlari markazi maʼlumotnoma tushgandan soʻng 10 daqiqa mobaynida uni ariza beruvchining elektron manziliga yuboradi va uni bu haqda axborot-kommunikatsiya tizimi orqali xabardor qiladi.
Ariza beruvchi davlat xizmatlari markaziga kelib murojaat qilgan taqdirda, uning soʻroviga koʻra davlat xizmatlari markazi unga maʼlumotnomani elektron yoki qogʻoz shaklda taqdim etishi mumkin.
3-bob. Yakunlovchi qoidalar
17. Davlat xizmatlari markazlari va davlat arxivlari oʻz faoliyatini amalga oshirishi natijasida olingan maʼlumotlarning sir saqlanishini taʼminlaydi.
18. Oʻzbekiston Respublikasi Adliya vazirligi, Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari va davlat xizmatlari markazlari ushbu Reglament talablari ijrosi boʻyicha davlat organlari va boshqa tashkilotlarning faoliyatini doimiy nazorat qiladi hamda monitoring olib boradi.
(18-band Oʻzbekiston Respublikasi Vazirlar Mahkamasining 2022-yil 28-sentabrdagi 541-sonli qarori tahririda — Qonunchilik maʼlumotlari milliy bazasi, 29.09.2022-y., 09/22/541/0859-son)
19. Ariza beruvchi davlat organlari va boshqa tashkilotlar xodimlarining xatti-harakatlari yuzasidan qonun hujjatlarida belgilangan tartibda shikoyat qilishi mumkin.
LexUZ sharhiQarang: Oʻzbekiston Respublikasi Konstitutsiyasining 55-moddasi, “Sudlar toʻgʻrisida”gi Qonunning 14-moddasi, “Jismoniy va yuridik shaxslarning murojaatlari toʻgʻrisida”gi Qonun.
20. Ushbu Reglament talablarining buzilishida aybdor boʻlgan shaxslar qonun hujjatlarida belgilangan tartibda javob beradilar.
LexUZ sharhiQarang: Oʻzbekiston Respublikasining Maʼmuriy javobgarlik toʻgʻrisidagi kodeksining 2154-moddasi.
Yaroqsiz holatga kelgan yoki yoʻqotilgan mehnat daftarchasidagi yozuvlarni tasdiqlash boʻyicha davlat xizmati koʻrsatishning maʼmuriy reglamentiga
1-ILOVA
1-ILOVA
Yaroqsiz holatga kelgan yoki yoʻqotilgan mehnat daftarchasidagi yozuvlarni tasdiqlash boʻyicha davlat xizmatini koʻrsatish
SXEMASI
|
Bosqichlar |
Subyektlar |
Tadbirlar |
Bajarish muddatlari | |||
|
1-bosqich |
Ariza beruvchi |
Davlat xizmatidan foydalanish uchun davlat xizmatlari markaziga oʻzi kelgan holda murojaat qiladi yoki Yagona interaktiv davlat xizmatlari portalida roʻyxatdan oʻtadi. |
Xohishiga koʻra | |||
|
2-bosqich |
1. Davlat xizmatlari markazi |
Soʻrovnomani toʻldirib, tegishli davlat arxiviga yuboradi. |
1. Soʻrovnoma toʻldirilgandan keyin | |||
|
2. Yagona interaktiv davlat xizmatlari portali |
2. Avtomatik tarzda | |||||
|
3-bosqich |
Davlat arxivlari |
QR-kod (matrik shtrixli kod) qoʻyilgan maʼlumotnomani rasmiylashtiradi hamda (oʻzi kelib murojaat etgan taqdirda) ERI bilan tasdiqlangan holda tegishli davlat xizmatlari markaziga yoki (elektron tarzda murojaat etgan taqdirda) YIDXP orqali elektron shaklda yuboradi. |
20 ish kunida | |||
|
4-bosqich |
Davlat xizmatlari markazi |
1. Maʼlumotnomani ariza beruvchining elektron manziliga yuboradi va uni bu haqda axborot-kommunikatsiya tizimi orqali xabardor qiladi. |
1. Maʼlumotnoma tushgandan soʻng | |||
|
2. Ariza beruvchi oʻzi kelib murojaat qilgan taqdirda, uning soʻroviga koʻra maʼlumotnomani elektron yoki qogʻoz shaklda taqdim etadi. |
2. Ariza beruvchining murojaatiga koʻra |
Yaroqsiz holatga kelgan yoki yoʻqotilgan mehnat daftarchasidagi yozuvlarni tasdiqlash boʻyicha davlat xizmati koʻrsatishning maʼmuriy reglamentiga
2-ILOVA
2-ILOVA
|
____________________ (sana) |
____________________ (raqam) | |||||||
|
Yaroqsiz holatga kelgan yoki yoʻqotilgan mehnat daftarchasidagi yozuvlarni tasdiqlash boʻyicha arxiv maʼlumotnomasini olish uchun SOʻROVNOMA | ||||||||
|
I. Ariza beruvchi toʻgʻrisidagi maʼlumotlar: | ||||||||
|
1. Familiyasi (oʻzgartirilgan boʻlsa, yozilishi kerak): |
||||||||
|
2. Ismi (oʻzgartirilgan boʻlsa, yozilishi kerak): |
||||||||
|
3. Otasining ismi (oʻzgartirilgan boʻlsa, yozilishi kerak): |
||||||||
|
4. Tugʻilgan yili va sanasi: |
||||||||
|
5. Doimiy yashash joyi boʻyicha roʻyxatga olingan manzil: |
||||||||
|
6. Farzandlarining tugʻilgan yili va sanasi (bir necha nafar boʻlsa ketma-ketlikda toʻldirilsin): |
||||||||
|
7. Jismoniy shaxsning shaxsiy identifikatsiya raqami: |
||||||||
|
8. Elektron pochta manzili (mavjud boʻlsa): |
||||||||
|
9. Telefon raqami: |
||||||||
|
II. Ilova qilinadigan hujjatlar: | ||||||||
|
10. Notarial tasdiqlangan ishonchnoma (agar uchinchi shaxslar manfaati uchun harakat qilinayotgan boʻlsa): |
||||||||
|
11. Ariza beruvchining mehnat faoliyati toʻgʻrisidagi maʼlumotlar: | ||||||||
|
Ish joyi, boʻlinma nomi yoki raqami va lavozimi (boʻlinma nomi yoki raqami agar mavjud boʻlsa ) |
Ishga qabul qilinganligi boʻyicha maʼlumot |
Mehnat shartnomasi bekor qilinganligi boʻyicha maʼlumot (yil, oy) |
Ishlagan tashkilotning yuqori turuvchi organi nomi (agar mavjud boʻlsa) |
Tashkilotning nomi oʻzgarganligi toʻgʻrisida maʼlumot (agar mavjud boʻlsa) |
Tashkilot joylashgan hudud (agar mavjud boʻlsa) | |||
|
Taxminiy yil, oy |
Buyruq raqami va sanasi (agar mavjud boʻlsa) |
Taxminiy yil, oy |
Buyruq raqami va sanasi (agar mavjud boʻlsa) | |||||
|
|
|
|
|
|
|
|
| |
|
Ushbu soʻrovnomada keltirilgan maʼlumotlarning haqiqiyligini tasdiqlayman. | ||||||||
|
______________________ (Ariza beruvchining imzosi) | ||||||||
Oldingi tahrirga qarang.
(2-ilova Oʻzbekiston Respublikasi Vazirlar Mahkamasining 2023-yil 20-noyabrdagi 612-sonli qaroriga asosan oʻz kuchini yoʻqotgan — Qonunchilik maʼlumotlari milliy bazasi, 22.11.2023-y., 09/23/612/0874-son)
Vazirlar Mahkamasining 2021-yil 23-sentabrdagi 597-son qaroriga
3-ILOVA
3-ILOVA
Vazirlar Mahkamasining “Oʻzbekiston Respublikasida arxiv ishini takomillashtirish toʻgʻrisida” 2012-yil 5-apreldagi 101-son qaroriga kiritilayotgan oʻzgartirishlar va qoʻshimcha
1. 1-ilovaning 131-bandi yettinchi xatboshisidagi “30 kundan” soʻzlari “20 ish kunidan” soʻzlari bilan almashtirilsin.
2. 4-ilovaning 6-bandida:
uchinchi xatboshiga “mehnat shartnomalari” soʻzlaridan keyin “, shuningdek, fuqarolik-huquqiy shartnomalar” soʻzlari qoʻshilsin;
toʻrtinchi xatboshidagi “mehnat shartnomalari” soʻzlari “fuqarolik-huquqiy shartnomalar” soʻzlari bilan almashtirilsin.
3. 6-ilovaning 20-bandi quyidagi tahrirda bayon qilinsin:
“20. Quyidagi holatlar vaqtincha olib chiqishga ruxsatnoma berishni rad etish toʻgʻrisida qaror qabul qilish uchun asos boʻlishi mumkin:
vaqtincha olib chiqilishi bildirilgan arxiv hujjatlarining mulkdori aniqlanmasligi;
arxiv hujjatlariga mulkdorlik huquqi toʻgʻrisida nizolar yuzaga kelishi;
taqdim etilgan hujjatlarning ishonchsizligi aniqlanishi;
arxiv hujjatlarining qaytib kelmasligi xavfi mavjudligi;
ruxsatnoma berilganligi uchun ariza beruvchi tomonidan maxsus yigʻim toʻlanmasligi.
Taqdim etilgan hujjatlarning ishonchliligini (yoki ishonchsizligini) aniqlash “Oʻzarxiv” agentligi tomonidan amalga oshiriladi.
Taqdim etilgan hujjatlarning yoki maʼlumotlarning ishonchliligini tasdiqlovchi qoʻshimcha materiallar talab qilish, agar qonun hujjatlarida bunday talab belgilanmagan boʻlsa, taqiqlanadi”.
(Qonunchilik maʼlumotlari milliy bazasi, 24.09.2021-y., 09/21/597/0903-son; 29.09.2022-y., 09/22/541/0859-son; 22.11.2023-y., 09/23/612/0874-son; 03.03.2025-y., 09/25/135/0208-son)
