toggle_night_mode
Oʻzbekiston Respublikasi Prezidentining
Farmoni
Korrupsiyaga qarshi murosasiz munosabatda boʻlish muhitini yaratish, davlat va jamiyat boshqaruvida korrupsiyaviy omillarni keskin kamaytirish va bunda jamoatchilik ishtirokini kengaytirish chora-tadbirlari toʻgʻrisida
Mamlakatimizda korrupsiyaning oldini olish va unga qarshi murosasiz kurashishning ilgʻor xalqaro standartlarga asoslangan tizimini joriy etish boʻyicha izchil choralar koʻrilmoqda.
Jumladan, davlat organlari va tashkilotlarining faoliyatida ochiqlik, oshkoralik va shaffoflikni taʼminlash hamda mansabdor shaxslarning aholi oldidagi hisobdorligini yoʻlga qoʻyish orqali davlat boshqaruvida samarali va taʼsirchan jamoatchilik nazoratini amalga oshirish uchun zarur sharoitlar yaratildi.
Ilk bor korrupsiyaviy xavflarni aniqlash va tizimli tahlil qilish, ularni keltirib chiqaruvchi omillarni bartaraf qilish uchun masʼul boʻlgan alohida organ — Korrupsiyaga qarshi kurashish agentligi tashkil etildi. Davlat hokimiyati organlari va yirik xoʻjalik yurituvchi subyektlarda korrupsiyaga qarshi ichki nazorat tuzilmalari faoliyati yoʻlga qoʻyilmoqda.
Raqamli texnologiyalar imkoniyatidan keng foydalangan holda transport vositalariga davlat raqam belgilarini berish, notariat va boshqa davlat xizmatlarini koʻrsatish, yer uchastkalarini ajratish, yoʻl harakati qoidalariga rioya etilishini nazorat qilish kabi koʻplab sohalarda korrupsiya va suiisteʼmolchiliklarning oldini olishga qaratilgan samarali mexanizmlar joriy etilmoqda.
Shu bilan birga, koʻrilayotgan tizimli choralarga qaramasdan, budjet mablagʻlaridan foydalanish, davlat xaridlari, kapital qurilish, litsenziya va ruxsatnomalarni olish, bank kreditlarini ajratish, ishga qabul qilish kabi yoʻnalishlarda korrupsiya holatlari saqlanib qolmoqda.
Korrupsiyaga qarshi kurashish va korrupsiyaviy holatlarning barvaqt oldini olish tizimi samaradorligini oshirish, ushbu jarayonga jamoatchilikni keng jalb etish va korrupsiyaga nisbatan murosasiz munosabatda boʻlish muhitini shakllantirish maqsadida:
1. Mamlakat rivojlanishining bugungi bosqichida korrupsiya Oʻzbekiston davlati va jamiyati taraqqiyoti uchun eng jiddiy xavf-xatarlardan biri ekanligi qayd etilsin.
Korrupsiya holatlarining har qanday koʻrinishlariga nisbatan murosasiz munosabatda boʻlish va unga qarshi ayovsiz kurashish barcha darajadagi davlat organlari rahbar va xodimlarining eng ustuvor vazifasi etib belgilansin.
Bosh prokuratura, Korrupsiyaga qarshi kurashish agentligi (keyingi oʻrinlarda — Agentlik), Davlat xavfsizlik xizmati va Ichki ishlar vazirligi korrupsiyaning har qanday koʻrinishlariga nisbatan javobgarlik muqarrarligini taʼminlash uchun barcha kuch va vositalarni safarbar etsin.
2. Keng jamoatchilikning fikri va takliflarini inobatga olib, davlat boshqaruvini korrupsiyadan xoli sohaga aylantirish maqsadida:
a) Agentlik tomonidan “Korrupsiyaga oid jinoyatlarni sodir etishda aybdor deb topilgan shaxslarning ochiq elektron reyestri” (keyingi oʻrinlarda — Reyestr) yuritilishi taʼminlansin;
b) Reyestrga kiritilgan shaxslarga quyidagilar taqiqlansin:
davlat xizmatiga kirish va davlat mukofotlari bilan taqdirlanishi;
saylanadigan va alohida tartibda tayinlanadigan lavozimlarga nomzodlarining koʻrsatilishi;
davlat organlari huzuridagi jamoatchilik kengashlari hamda idoralararo kollegial organlarning aʼzosi boʻlish;
ular tomonidan taʼsis etilgan va (yoki) ular ishtirokchisi hisoblangan tadbirkorlik subyektlari davlat xaridlarida va davlat-xususiy sheriklik toʻgʻrisidagi bitimda ishtirokchi (ijrochi) sifatida qatnashish, shuningdek, davlat aktivlarini xususiylashtirish bilan bogʻliq tender va tanlov savdolarida ishtirok etish;
davlat ulushi 50 foizdan yuqori boʻlgan tashkilotlar hamda davlat taʼlim muassasalarida rahbarlik lavozimlarida faoliyat yuritish.
3. Agentlik Bosh prokuratura, Oliy sud, Adliya vazirligi, Inson huquqlari boʻyicha Milliy markaz hamda Bandlik va mehnat munosabatlari vazirligi bilan birgalikda uch oy muddatda Reyestrni va u bilan bogʻliq cheklovlarni amaliyotga joriy etishga qaratilgan qonun loyihasini Oʻzbekiston Respublikasi Prezidenti Administratsiyasiga kiritsin.
Belgilansinki, Reyestrga mazkur bandning birinchi xatboshisida nazarda tutilgan qonun kuchga kirganidan soʻng korrupsiyaga oid jinoyatlarni sodir etgan shaxslar kiritiladi.
4. 2022-yil 1-yanvardan boshlab, davlat xizmatchilari, davlat ulushi 50 foizdan yuqori boʻlgan tashkilotlar, davlat korxonalari va muassasalari rahbarlari va oʻrinbosarlari, ularning turmush oʻrtogʻi va voyaga yetmagan farzandlarining daromadlari va mol-mulkini majburiy deklaratsiya qilish tizimi joriy etilsin.
Shunday tartib oʻrnatilsinki, unga muvofiq:
davlat xizmatchisi tomonidan deklaratsiyani taqdim etishdan bosh tortish va qasddan notoʻgʻri maʼlumotlarni kiritish uni davlat xizmatidan chetlashtirishga va qonunda belgilangan javobgarlikka tortishga asos boʻladi;
 LexUZ sharhi
Qarang: Oʻzbekiston Respublikasi Maʼmuriy javobgarlik toʻgʻrisidagi kodeksining 174-moddasi.
2022-yil 1-yanvardan boshlab davlat xizmatchilariga respublika hududidan tashqarida hisobraqamlar ochish va egalik qilish, naqd pul mablagʻlarini saqlash, koʻchmas va boshqa mol-mulkka ega boʻlish taqiqlanadi (xorijda ishlayotgan davlat xizmatchilari va davlat xizmatiga kirishdan oldin olingan mol-mulk bundan mustasno).
Agentlik Davlat xizmatini rivojlantirish agentligi va boshqa manfaatdor idoralar bilan birgalikda ikki oy muddatda davlat xizmatiga oid qonunchilik hujjatlari paketi, shuningdek, deklaratsiyalash tizimini joriy etish mexanizmlari, deklaratsiya taqdim etishi lozim boʻlgan davlat xizmatchilari va ularning oila aʼzolari toifasini nazarda tutuvchi “Davlat xizmatchilarining daromadlari va mol-mulkini deklaratsiya qilish toʻgʻrisida”gi qonun loyihasini jamoatchilik muhokamasidan oʻtkazib Vazirlar Mahkamasiga kiritsin.
5. Belgilansinki, qonunchilik hujjatlarida koʻrsatilgan lavozimni egallab turgan shaxsning bevosita yoki bilvosita shaxsiy manfaati mansab (xizmat) majburiyatlarini obyektiv va xolis bajarishiga taʼsir koʻrsatuvchi yoki shunday taʼsir koʻrsatishi mumkin boʻlgan vaziyatlar manfaatlar toʻqnashuvi hisoblanadi hamda bunday vaziyatlarni oshkor qilish va ularning oldini olish boʻyicha oʻz vaqtida chora koʻrmaganlik oʻrnatilgan tartibda javobgarlikni keltirib chiqaradi.
Agentlikka manfaatlar toʻqnashuvi bilan bogʻliq har qanday holatlar aniqlanganda, shartnoma, buyruq va boshqa hujjatning amal qilishini toʻxtatib turish toʻgʻrisida taqdimnoma yoki uni haqiqiy emas deb topish boʻyicha sudga daʼvo kiritish vakolati berilsin.
Adliya vazirligi Agentlik, Davlat xizmatini rivojlantirish agentligi va Bosh prokuratura bilan birgalikda 2022-yil 1-yanvarga qadar “Manfaatlar toʻqnashuvini tartibga solish toʻgʻrisida”gi qonun, shuningdek, davlat xaridlari, soliq imtiyozlari, yer ajratish, davlat aktivlarini xususiylashtirish sohalarida manfaatlar toʻqnashuviga yoʻl qoʻyganlik uchun javobgarlikni oʻrnatishni nazarda tutuvchi qonun loyihalarini ishlab chiqib Vazirlar Mahkamasiga kiritsin.
6. Bosh prokuratura Agentlik, Oliy sud, Davlat xavfsizlik xizmati, Ichki ishlar vazirligi va Adliya vazirligi bilan birgalikda uch oy muddatda quyidagilarni nazarda tutuvchi qonun loyihasini ishlab chiqib, Oliy Majlis Qonunchilik palatasiga kiritsin:
Jinoyat kodeksida korrupsiyaga oid jinoyatlar toifasiga kiruvchi moddalarning aniq roʻyxatini belgilash;
korrupsiyaga oid jinoyatlar uchun belgilangan jazo choralarini uzoq muddatli ozodlikdan mahrum qilish jazo chorasigacha keskin kuchaytirish;
daromadlar va mol-mulkni deklaratsiyalash jarayonida aniqlangan noqonuniy boylik orttirganlik uchun javobgarlik oʻrnatish;
korrupsiyaga oid jinoyatlarni sodir etgan shaxslarga nisbatan jinoiy jazoni oʻtashda yengillashtiruvchi normalar qoʻllanilishiga cheklovlar belgilash.
7. Davlat xaridlarida raqobatli savdo turlarini cheklovchi toʻgʻridan-toʻgʻri shartnomalar, investitsiyaviy, davlat-xususiy sheriklik, xususiylashtirish va boshqa bitimlarni tuzishni nazarda tutuvchi qonunchilik hujjatlarini ishlab chiqish boʻyicha tashabbus bilan chiqish qatʼiyan taqiqlansin.
8. Vazirlar Mahkamasi, Bosh prokuratura va Adliya vazirligi ikki oy muddatda ilgʻor xorijiy tajriba asosida davlat moliyaviy nazorat institutlarini maqbullashtirib, ularning samarali modelini joriy etish va ushbu sohada parlament nazoratini kengaytirish boʻyicha taklif kiritsin.
9. Adliya vazirligi Bosh prokuratura va boshqa manfaatdor vazirlik va idoralar bilan birgalikda 2021-yil 1-noyabrga qadar:
barcha inspeksiyalarning vazifa va funksiyalari, vakolatlari, huquq va majburiyatlari, tashkiliy tuzilmalarini qayta koʻrib chiqib, takomillashtirish;
boshqa shakldagi (qoʻmita, agentlik, xizmat) davlat boshqaruvi organlarining nazorat sohasidagi funksiyalarini maqbullashtirishni nazarda tutuvchi qonunchilik hujjatlari loyihalarini Vazirlar Mahkamasiga kiritsin.
10. Mahalliy budjet mablagʻlaridan foydalanishdagi korrupsiyaviy xavf-xatarlarni bartaraf qilish maqsadida Qoraqalpogʻiston Respublikasi Joʻqorgʻi Kengesi, xalq deputatlari viloyatlar, Toshkent shahar, tuman va shahar Kengashlari muntazam ravishda mahalliy budjetlarning qoʻshimcha manbalari hisobidan ajratilgan mablagʻlardan foydalanilishi ustidan nazorat oʻrnatsin.
Oliy Majlis palatalariga Korrupsiyaga qarshi kurashish milliy kengashi bilan birgalikda ikki oy muddatda mahalliy budjetlar hisobidan tashkil etilgan vaqtinchalik va maxsus jamgʻarmalar mablagʻlaridan foydalanish tartibi toʻgʻrisidagi namunaviy nizomni tasdiqlash tavsiya etilsin.
11. Korrupsiyaga qarshi kurashish boʻyicha 2021-2022-yillarga moʻljallangan davlat dasturi 1-ilovaga muvofiq tasdiqlansin.
Agentlik davlat dasturida nazarda tutilgan chora-tadbirlarning oʻz vaqtida va sifatli amalga oshirilishi ustidan muntazam ravishda nazorat olib borsin va har chorak yakunlari boʻyicha Korrupsiyaga qarshi kurashish milliy kengashiga axborot kiritib borsin.
Korrupsiyaga qarshi kurashish milliy kengashi (T. Narbayeva) davlat dasturida nazarda tutilgan chora-tadbirlarning amalga oshirilishini har chorakda tanqidiy muhokama qilib borsin.
12. Oʻzbekiston Respublikasi Prezidentining ayrim hujjatlariga 2-ilovaga muvofiq oʻzgartirish va qoʻshimchalar kiritilsin.
Oʻzbekiston Respublikasi Prezidentining ayrim hujjatlari 3-ilovaga muvofiq oʻz kuchini yoʻqotgan deb hisoblansin.
13. Agentlik bir oy muddatda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
14. Mazkur Farmon ijrosini samarali tashkil etishga masʼul etib Bosh prokuror N.T. Yoʻldoshev, Agentlik direktori A.E. Burxanov va Davlat xavfsizlik xizmati raisi A.A. Azizov belgilansin.
Farmon ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasining Korrupsiyaga qarshi kurashish milliy kengashi raisi T.K. Narbayeva, Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.
Amalga oshirilayotgan chora-tadbirlar natijadorligi yuzasidan Oʻzbekiston Respublikasi Prezidentiga har chorak yakuni boʻyicha axborot berib borilsin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2021-yil 6-iyul,
PF-6257-son
Oʻzbekiston Respublikasi Prezidentining 2021-yil 6-iyuldagi PF-6257-son Farmoniga
1-ILOVA
Korrupsiyaga qarshi kurashish boʻyicha 2021-2022-yillarga moʻljallangan
DAVLAT DASTURI

T/r

Chora-tadbir nomi

Amalga oshirish mexanizmi

Ijro muddati

Masʼul ijrochilar

I. Korrupsiyaga qarshi kurashish mexanizmlarini takomillashtirish

1.

Davlat fuqarolik xizmatiga ochiq tanlov asosida ishga qabul qilish hamda xodimlarning kasbga oid sifatlari va alohida xizmatlari (meritokratiya tamoyili) asosida xizmat pogʻonalarida koʻtarilishi, davlat xizmatchilarini ijtimoiy himoya qilishning shaffof mexanizmlarini joriy etish hamda ularning aniq vazifalarini belgilash.

“Davlat fuqarolik xizmati toʻgʻrisida”gi qonun loyihasini xorijiy ekspertlarning tavsiyalari va keng jamoatchilik fikri asosida takomillashtirish hamda uni amalga oshirish boʻyicha �onunosti normativ-huquqiy hujjatlar loyihalari paketini Vazirlar Mahkamasiga kiritish.

2021-yil 1-sentabr

Davlat xizmatini rivojlantirish agentligi,

Korrupsiyaga qarshi kurashish agentligi,

Bandlik va mehnat munosabatlari vazirligi,

Adliya vazirligi

2.

Davlat xizmatchilarining odob-axloq kodeksini qabul qilish.

Davlat xizmatchilarining odob-axloq kodeksi loyihasini ishlab chiqib, Oliy Majlis palatalarining qoʻshma qarori bilan tasdiqlash.

2021-yil 1-sentabr

Oliy Majlis palatalari,

Adliya vazirligi,

Davlat xizmatini rivojlantirish agentligi,

Korrupsiyaga qarshi kurashish agentligi

3.

Korrupsiyaga oid jinoyatlarni sodir etishda aybdor deb topilgan shaxslarning ochiq elektron reyestri yuritilishini yoʻlga qoʻyish.

Korrupsiyaga oid jinoyatlarni sodir etishda aybdor deb topilgan shaxslarning ochiq elektron reyestrini va u bilan bogʻliq cheklovlarni amaliyotga joriy etishga qaratilgan qonun loyihasini Oʻzbekiston Respublikasi Prezidenti Administratsiyasiga kiritish.

2021-yil 1-oktabr

Korrupsiyaga qarshi kurashish agentligi,

Oliy sud,

Bosh prokuratura,

Adliya vazirligi,

Inson huquqlari boʻyicha Milliy markaz,

Bandlik va mehnat munosabatlari vazirligi

4.

Davlat organlari va tashkilotlari, shu jumladan mahalliy davlat hokimiyati organlarida korrupsiyaga qarshi kurashish ishlarining samaradorligini reyting baholash tizimini joriy etish.

Har yili yil yakuni boʻyicha barcha davlat organlari va tashkilotlari, shu jumladan mahalliy davlat hokimiyati organlarida korrupsiyaga qarshi kurashish ishlarining samaradorligini baholovchi reytingni eʼlon qilish tartibini nazarda tutuvchi Hukumat qarori loyihasini Vazirlar Mahkamasiga kiritish.

2021-yil 1-sentabr

Korrupsiyaga qarshi kurashish agentligi,

Adliya vazirligi

5.

Davlat organlari faoliyatida korrupsiyaviy xavflarni baholash elektron tizimini yaratish.

Mutasaddi vazirlik va idoralarning axborot tizimlari va maʼlumotlar bazasi bilan Elektron hukumatning idoralararo maʼlumotlar uzatish tarmogʻi orqali integratsiyalashgan Korrupsiyaviy xavflarni baholash elektron tizimini ishga tushirish.

2022-yil 1-yanvar

Korrupsiyaga qarshi kurashish agentligi,

Axborot texnologiyalari vazirligi

6.

Davlat xizmatchilari, shu jumladan davlat ulushi 50 foizdan yuqori boʻlgan tashkilotlar, davlat korxonalari va muassasalari rahbarlari va oʻrinbosarlari, ularning turmush oʻrtogʻi va voyaga yetmagan farzandlarining daromadlari va mol-mulkini majburiy deklaratsiya qilish tizimini joriy etishning huquqiy asoslarini yaratish.

Quyidagilarni nazarda tutuv�i “Davlat xizmatchilarining daromadlari va mol-mulkini deklaratsiya qilish toʻgʻrisida”gi qonun loyihasini ishlab chiqish va Vazirlar Mahkamasiga kiritish:

deklaratsiya topshirish talab etiladigan shaxslar doirasi;

daromadlar va mol-mulkni majburiy deklaratsiya qilish tizimining har bir bosqichini joriy etish mexanizmlari;

deklaratsiyalarni monitoring qilish va natijalarini eʼlon qilib borish tartibi;

deklaratsiyani taqdim etishdan bosh tortganlik va qasddan notoʻgʻri maʼlumotlarni kiritganlik uchun javobgarlik belgilash.

2021-yil 1-sentabr

Korrupsiyaga qarshi kurashish agentligi,

Davlat xizmatini rivojlantirish agentligi,

manfaatdor vazirlik va idoralar

7.

Daromad va mol-mulk deklaratsiyalari boʻyicha maʼlumotlar bazasini yuritishni yoʻlga qoʻyish.

Daromad va mol-mulk deklaratsiyalari boʻyicha maʼlumotlar bazasini shakllantirish, ularni qayta ishlash va tekshirishning elektron axborot tizimini yaratish.

2021-yil 1-dekabr

Korrupsiyaga qarshi kurashish agentligi,

Axborot texnologiyalari vazirligi

Ushbu axborot tizimini soliq, bojxona, davlat kadastri va boshqa tegishli organlarning maʼlumotlar bazalari bilan integratsiya qilish.

2022-yil yakuniga qadar

8.

“Korrupsiyadan xoli qonunchilik” tamoyili asosida qonunchilik hujjatlari va ularning loyihalarini korrupsiyaga qarshi ekspertizadan oʻtkazish tartibini yanada takomillashtirish.

Korrupsiyaga qarshi ekspertizadan oʻtkazishning yangilangan tartibi — ilmiy va mustaqil ekspertizadan oʻtkazishni joriy etish, davlat organlari va tashkilotlarining masʼulligini oshirish, korrupsiyaga qarshi ekspertiza boʻyicha ish rejalari va aniqlangan korrupsiyaviy normalarni bartaraf etish boʻyicha chora-tadbirlarni nazarda tutuvchi qonunchilik hujjati loyihasini Vazirlar Mahkamasiga kiritish.

2021-yil 1-sentabr

Adliya vazirligi,

Korrupsiyaga qarshi kurashish agentligi,

Bosh prokuratura

9.

Davlat boshqaruvi sohasida korrupsiyaning oldini olish maqsadida davlat organlari tomonidan funksiyalaridagi korrupsiyaviy xavf-xatarlarni baholash va aniqlangan xavf-xatarlarni minimallashtirish boʻyicha samarali choralarni belgilash.

Davlat organlari faoliyatidagi korrupsiyaviy xavf-xatarlarni baholash metodikasini tasdiqlashni nazarda tutuvchi Oʻzbekiston Respublikasi Prezidenti hujjati loyihasini ishlab chiqish.

2021-yil 1-dekabr

Adliya vazirligi,

Korrupsiyaga qarshi kurashish agentligi,

Bosh prokuratura

10.

Vazirlik va idoralar tarkibidagi nazorat organlari (inspeksiyalar) faoliyatini takomillashtirish.

Barcha inspeksiyalarning vazifa va funksiyalari, vakolatlari, huquq va majburiyatlari, tashkiliy tuzilmalarini qayta koʻrib chiqib, ularni takomillashtirishni nazarda tutuvchi qonunchilik hujjatlari loyihalarini Vazirlar Mahkamasiga kiritish.

2021-yil 1-noyabr

Adliya vazirligi,

Bosh prokuratura,

manfaatdor vazirlik va idoralar

11.

Davlat moliyaviy nazorat institutlarini takomillashtirish.

Ilgʻor xorijiy tajriba asosida davlat moliyaviy nazorat institutlarini maqbullashtirib, ularning samarali modelini joriy etish va ushbu sohada parlament nazoratini kengaytirish boʻyicha takliflarni Oʻzbekiston Respublikasi Prezidenti Administratsiyasiga kiritish.

2021-yil 1-sentabr

Vazirlar Mahkamasi,

Bosh prokuratura,

Adliya vazirligi

12.

Qurilish obyektlarida nazorat oʻlchovini amalga oshirish tizimini takomillashtirish.

Davlat moliyaviy nazorati departamenti tarkibida Qurilish obyektlarida nazorat oʻlchovini amalga oshirish boʻlinmasini tashkil etish, shuningdek, davlat nazorat-taftish idoralari, operativ-qidiruv faoliyati subyektlari va tergov-surishtiruv idoralari soʻroviga muvofiq, qo�unchilikda belgilangan asoslarda oʻtkaziladigan nazorat oʻlchovi ushbu boʻlinma tomonidan bepul amalga oshirilishini nazarda tutuvchi Vazirlar Mahkamasi qarorini ishlab chiqish.

2021-yil 1-oktabr

Moliya vazirligi,

Qurilish vazirligi,

Korrupsiyaga qarshi kurashish agentligi

13.

Davlat ishtirokidagi korxonalarda moliyaviy natijadorlikka erishish va davlat mulkidan samarali foydalanish ustidan taʼsirchan nazorat tizimini yoʻlga qoʻyish.

Davlat aktivlarini boshqarish agentligining davlat ishtirokidagi korxonalarda moliyaviy natijadorlik va davlat mulkidan foydalanish holati yuzasidan Oliy Majlis Qonunchilik palatasiga hisobot berib borish amaliyotini joriy etish.

har yil yakuni boʻyicha

Oliy Majlis Qonunchilik palatasi,

Davlat aktivlarini boshqarish agentligi

14.

Davlat xizmatida suiisteʼmolchiliklarning oldini olish boʻyicha samarali mexanizmlarni joriy etish.

Davlat organlari va tashkilotlarida kadrlar bilan ishlash, xoʻjalik ishlari, moliya-iqtisod boʻlinmalari va nazorat funksiyasiga ega tuzilmalar rahbarlarini muayyan muddatda rotatsiya qilish hamda suiisteʼmolchiliklarning oldini olish boʻyicha qoʻshimcha mexanizmlarni joriy etish yuzasidan takliflarni Vazirlar Mahkamasiga kiritish. Bunda rotatsiya qilingan xodimlarning koʻchib oʻtish va uy-joy olish (ijaraga olish) bilan bogʻliq xarajatlarini qoplash mexanizmlarini nazarda tutish.

2021-yil 1-sentabr

Adliya vazirligi,

Davlat xizmatini rivojlantirish agentligi,

Axborot texnologiyalari vazirligi

15.

Davlat xizmatchilarining xizmat safarlari mobaynida korrupsiyaviy xavf-xatarlarni bartaraf etish.

Respublika hududlariga yuboriladigan davlat organ va tashkilotlari xodimlarining xizmat safarlari bilan bogʻliq xarajatlarni tanqidiy tahlil qilish hamda belgilangan meʼyorlarni haqiqiy xarajatlarga muvofiqlashtirishni nazarda tutuvchi takliflarni Vazirlar Mahkamasiga kiritish.

2021-yil 1-oktabr

Moliya vazirligi,

Bandlik va mehnat munosabatlari vazirligi,

Davlat xizmatini rivojlantirish agentligi

16.

Yoʻl qurilishi va ekspluatatsiyasi sohasiga shaffoflik standartlarini joriy qilish.

Avtomobil yoʻllari sohasiga tegishli maʼlumotlarni oʻz ichiga oladigan “SNAFFOF YO‛L” onlayn axborot platformasini ishga tushirish boʻyicha qaror loyihasini Vazirlar Mahkamasiga kiritish.

Loyihada platformada avtomobil yoʻllarini qurish, rekonstruksiya qilish va kapital taʼmirlash obyektlarining interaktiv onlayn-xaritasini ishlab chiqish hamda unda keyingi yilda quriladigan va taʼmirlanadigan yoʻl uchastkalarini aniqlash va ularni xaritaga joylash hamda buni jamoatchilikka taqdim etish amaliyotini nazarda tutish.

2022-yil 1-yanvar

Adliya vazirligi,

Transport vazirligi,

Moliya vazirligi,

Axborot texnologiyalari vazirligi, manfaatdor vazirlik va idoralar

17.

Davlat budjeti hamda shuningdek, xalqaro moliya institutlari mablagʻlari hisobidan moliyalashtiriladigan loyihalarning amalga oshirilishi ustidan samarali jamoatchilik nazoratini oʻrnatish.

Davlat budjeti, shuningdek, xalqaro moliya institutlari mablagʻlari hisobidan moliyalashtiriladigan loyihalar, shu jumladan istiqbolli investitsiya va infratuzilma loyihalari boʻyicha ularning yakuniy texnik-iqtisodiy asosini va boshqa loyiha hujjatlarini ochiq eʼlon qilinishi lozim boʻlgan maʼlumotlar sifatida belgilash.

2021-yil 1-dekabr

Korrupsiyaga qarshi kurashish agentligi,

Moliya vazirligi,

Investitsiyalar va tashqi savdo vazirligi,

manfaatdor vazirlik va idoralar

18.

Banklarda jismoniy shaxslarga kredit ajratishda mijozni identifikatsiya qilishning zamonaviy tizimini joriy etish.

Davlat personallashtirish markazi bilan integratsiya qilgan holda bank tizimida jismoniy shaxslarga kredit ajratilishida mijozning biometrik belgilari (barmoq izi yoki yuzdan)ni tekshirish orqali identifikatsiya qilish tizimini joriy etish boʻyicha tashkiliy choralarni koʻrish.

2021-yil 1-sentabr

Markaziy bank,

Davlat personallashtirish markazi,

Axborot texnologiyalari vazirligi

II. Davlat xaridlari sohasida korrupsiyaviy xavf-xatarlarni kamaytirish va manfaatlar toʻqnashuvining oldini olish

19.

Manfaatlar toʻqnashuvining oldini olish va uni tartibga solishning huquqiy asoslarini shakllantirish.

“Manfaatlar toʻqnashuvini tartibga solish toʻgʻrisida”gi qonun, shuningdek, davlat xaridlari, soliq imtiyozlari, yer ajratish, davlat aktivlarini xususiylashtirish sohalarida manfaatlar toʻqnashuviga yoʻl qoʻyganlik uchun javobgarlikni oʻrnatishni nazarda tutuvchi qonun loyihalarini ishlab chiqib, Vazirlar Mahkamasiga kiritish.

2022-yil 1-yanvar

Adliya vazirligi,

Korrupsiyaga qarshi kurashish agentligi,

Davlat xizmatini rivojlantirish agentligi,

Bosh prokuratura

20.

Davlat xaridlari sohasida manfaatlar toʻqnashuvining oldini olish.

Jismoniy shaxslarning shaxsiy identifikatsiya raqami (JShShIR) boʻyicha elektron maʼlumotlar bazasi bilan davlat xaridlari boʻyicha maxsus axborot portalining maʼlumotlar almashinuvini taʼminlash orqali manfaatlar toʻqnashuvi bilan bogʻliq xavflarni aniqlash imkonini beruvchi elektron tizimni joriy qilish.

2022-yil 1-yanvar

Moliya vazirligi,

Adliya vazirligi

21.

Davlat xaridlari sohasida ochiqlikni taʼminlash.

Davlat xaridlari boʻyicha maxsus axborot portali maʼlumotlari asosida davlat buyurtmachilarining davlat xaridlari jarayonlari monitoringini yuritish va uning natijalari boʻyicha har oylik maʼlumotlarni keyingi oyning 15 sanasiga qadar rasmiy veb-saytda ochiq eʼlon qilib borish.

belgilangan muddatda

Moliya vazirligi

Eʼlon qilib boradigan har oylik maʼlumotlarni batafsil oʻrgangan holda keyingi oyning 30 sanasiga qadar manfaatlar toʻqnashuvi yoki korrupsiya alomatlari mavjudligi toʻgʻrisida xulosani veb-saytlarda eʼlon qilib borish.

belgilangan muddatda

Korrupsiyaga qarshi kurashish agentligi

22.

Oxirgi benefitsiarga oid maʼlumotlarni olish tartibini takomillashtirish.

Benefitsiarlar reyestrini yuritish amaliyotini yoʻlga qoʻyish boʻyicha takliflarni Vazirlar Mahkamasiga kiritish.

2021-yil 1-noyabr

Monopoliyaga qarshi kurashish qoʻmitasi,

Adliya vazirligi,

Davlat soliq qoʻmitasi,

Hisob palatasi,

Davlat aktivlarini boshqarish agentligi,

Markaziy bank

23.

Davlat xaridlari boʻyicha maxsus axborot portalida shikoyatlarni elektron shaklda taqdim qilish imkoniyatini yaratish.

Davlat xaridlari boʻyicha maxsus axborot portalida murojaatlarni elektron shaklda taqdim qilish imkonini beruvchi sahifa yaratish va shikoyatlarni toʻgʻridan-toʻgʻri Davlat xaridlari sohasidagi shikoyatlarni koʻrib chiqish boʻyicha komissiyaga yuborish mexanizmlarini joriy etish.

2022-yil 1-yanvar

Moliya vazirligi,

manfaatdor vazirlik va idoralar

24.

Davlat xaridlari amalga oshiriladigan maxsus axborot portalida manfaatlar toʻqnashuvi bilan bogʻliq boʻlgan xavflarni oldini olish tizimini takomillashtirish.

Davlat xaridlari amalga oshiriladigan maxsus axborot portalida manfaatlar toʻqnashuvi bilan bogʻliq boʻlgan xavflarning oldini olish boʻyicha quyidagi maʼlumotlarni qayta ishlashga moʻljallangan avtomatlashtirilgan tizimni joriy qilish yuzasidan takliflar kiritish:

qatnashchining davlat xaridlaridagi ishtiroki tarixi (mahsulot, xizmat yetkazib beruvchining ilgari ishtirok etgan tanlovlari, bajargan ishlari);

qatnashchining benefitsiarlari haqidagi maʼlumotlar;

buyurtmachi va ishtirokchi oʻrtasidagi ehtimoliy bogʻliqliklar (qarindoshlik, birga taʼlim olganlik, mehnat faoliyati yoki biznes aloqalari va boshqalar haqidagi maʼlumotlar).

Avtomatlashtirilgan tizim orqali manfaatlar toʻqnashuvi aniqlangan hollarda avtomatik ravishda davlat xaridi jarayonida bitimga daʼvogarning ishtirokini cheklash yuzasidan takliflar tayyorlash.

2021-yil 1-dekabr

Moliya vazirligi,

Monopoliyaga qarshi kurashish qoʻmitasi,

Adliya vazirligi,

Axborot texnologiyalari vazirligi

25.

Qonunchilikka davlat xizmatiga qabul qilish va unda faoliyat olib borishda qarindosh-urugʻchilik va boshqa suiisteʼmolchiliklarning oldini olishga qaratilgan normalarni kiritish.

Mehnat kodeksi va boshqa qonun hujjatlariga oʻzgartish va qoʻshimchalar kiritish boʻyicha qonun loyihasini Vazirlar Mahkamasiga kiritish.

2021-yil 1-dekabr

Korrupsiyaga qarshi kurashish agentligi,

Bandlik va mehnat munosabatlari vazirligi,

Oʻzbekiston Kasaba uyushmalari Federatsiyasi,

Davlat xavfsizlik xizmati,

Adliya vazirligi

III. Korrupsiyaga qarshi kurashish tuzilmalari faoliyatini takomillashtirish

26.

Davlat organlari va tashkilotlarida korrupsiyaga qarshi ichki nazorat tuzilmalari samarali faoliyatini tashkil etish.

Barcha davlat organlari va tashkilotlari, shu jumladan Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarida mavjud shtat birliklari doirasida korrupsiyaga qarshi ichki nazorat tuzilmalari faoliyatini yoʻlga qoʻyish boʻyicha amaliy choralarni koʻrish.

2021-yil 1-oktabr

Korrupsiyaga qarshi kurashish agentligi,

manfaatdor vazirlik va idoralar,

Qoraqalpogʻiston Respublikasi Vazirlar Kengashi,

viloyatlar va Toshkent shahar hokimliklari

27.

Oʻzbekiston Respublikasi Korrupsiyaga qarshi kurashish milliy kengashi va uning hududiy kengashlari faoliyatining huquqiy asoslarini takomillashtirish.

Oʻzbekiston Respublikasi Korrupsiyaga qarshi kurashish milliy kengashi toʻgʻrisidagi nizom loyihasini ishlab chiqish va uni Milliy kengash tomonidan tasdiqlash.

2021-yil 1-dekabr

Korrupsiyaga qarshi kurashish milliy kengashi,

Korrupsiyaga qarshi kurashish agentligi

28.

Korrupsiyaga qarshi kurashish agentligining qonuniy faoliyatiga toʻsqinlik qilganlik uchun javobgarlik choralarini belgilash.

Korrupsiyaga qarshi kurashish agentligining qonuniy faoliyatiga toʻsqinlik qilgan va (yoki) qonuniy talablarini bajarmagan mansabdor shaxslarga nisbatan maʼmuriy javobgarlikni nazarda tutuvchi qonun loyihasini ishlab chiqish.

2022-yil 1-fevral

Korrupsiyaga qarshi kurashish agentligi

29.

Korrupsiyaga qarshi kurashish sohasida ilmiy tadqiqotlar, i�timoiy soʻrovlar oʻtkazish amaliyotini yoʻlga qoʻyish.

Korrupsiyaga qarshi kurashish agentligi huzurida olimlar, ilmiy-akademik doira vakillaridan iborat Ekspertlar guruhining faoliyatini tashkil qilish.

2021-yil 1-oktabr

Korrupsiyaga qarshi kurashish agentligi,

Moliya vazirligi

30.

Korrupsiyaning oldini olish va uning fuqarolik-huquqiy oqibatlarini bartaraf etishning huquqiy mexanizmlarini takomillashtirish.

Korrupsiyaga qarshi kurashish agentligiga manfaatlar toʻqnashuvi bilan bogʻliq har qanday holatlar aniqlanganda, shartnoma, buyruq va boshqa hujjat amal qilishini toʻxtatib turish toʻgʻrisida taqdimnoma kiritish yoki uni haqiqiy emas deb topish boʻyicha sudga daʼvo kiritish vakolatini berishni nazarda tutuvchi qonunchilik hujjati loyihasini Vazirlar Mahkamasiga kiritish.

2021-yil 1-sentabr

Korrupsiyaga qarshi kurashish agentligi,

Adliya vazirligi,

Oliy sud,

Bosh prokuratura

IV. Korrupsiyaga qarshi kurashish boʻyicha xalqaro standartlarni joriy qilish va xalqaro hamkorlikni kuchaytirish

31.

Korrupsiyaga qarshi qonunchilikni xalqaro standartlarga muvofiqlashtirish va Birlashgan Millatlar Tashkilotining Korrupsiyaga qarshi konvensiyasi ayrim normalarini implementatsiya qilish.

Quyidagilarni nazarda tutuvchi qonun loyihasini kiritish:

Jinoyat kodeksida korrupsiyaga oid jinoyatlar toifasiga kiruvchi moddalarning aniq roʻyxatini belgilash;

korrupsiyaga oid jinoyatlar uchun belgilangan jazo choralarini uzoq muddatli ozodlikdan mahrum qilish jazo chorasigacha kuchaytirish;

daromadlar va mol-mulkni deklaratsiyalash jarayonida aniqlangan noqonuniy boylik orttirganlik uchun javobgarlik oʻrnatish;

korrupsiyaga oid jinoyat sodir etgan shaxslarga nisbatan jinoiy jazoni oʻtashda yengillashtiruvchi normalarni qoʻllashga cheklov belgilash.

2021-yil 1-oktabr

Bosh prokuratura,

Korrupsiyaga qarshi kurashish agentligi,

Oliy sud,

Davlat xavfsizlik xizmati,

Ichki ishlar vazirligi,

Adliya vazirligi

32.

Iqtisodiy hamkorlik va taraqqiyot tashkilotining Sharqiy Yevropa va Markaziy Osiyo davlatlari uchun korrupsiyaga qarshi kurashish tarmogʻining Istanbul harakatlar rejasi doirasidagi chora-tadbirlarni amalga oshirish.

Toʻrtinchi raund natijalari boʻyicha Oʻzbekistonga berilgan tavsiyalarni tahlil qilib, ularni amalga oshirish boʻyicha chora-tadbirlar rejasini ishlab chiqish.

2021-yil 1-sentabr

Korrupsiyaga qarshi kurashish agentligi,

Bosh prokuratura,

Ichki ishlar vazirligi,

Adliya vazirligi,

Tashqi ishlar vazirligi,

vazirlik va idoralar

Masʼul vazirlik va idoralar bilan birgalikda tasdiqlangan rejaning amalga oshirilishini har chorakda monitoring qilish.

IHTTning Istanbul harakatlar rejasi yalpi majlisida Oʻzbekiston vakillarining hisobotlar bilan ishtirok etishini taʼminlash.

2021-2022-yillarda beshinchi raund monitoringi amalga oshirilishi boʻyicha amaliy harakatlar rejasini ishlab chiqish.

2021-2022-yillar davomida

33.

Korrupsiyaga qarshi kurashish sohasida xalqaro hamkorlikni kengaytirish.

Yevropa Ittifoqi doirasidagi Korrupsiyaga qarshi kurashish boʻyicha davlatlar guruhi (GRECO), Korrupsiyaga qarshi kurashish idoralari xalqaro assotsiatsiyasi (IAASA) tashkilotlariga aʼzolik masalalarini koʻrib chiqish, shuningdek, xorijiy davlatlarning korrupsiyaga qarshi kurashish idoralari bilan hamkorlik aloqalarini rivojlantirish choralarini koʻrish.

2021-yil 1-avgust

Korrupsiyaga qarshi kurashish agentligi,

Tashqi ishlar vazirligi

V. Davlat organlari faoliyati ochiqligini taʼminlash, korrupsiyaga qarshi kurashish boʻyicha targʻibot-tashviqot ishlarini amalga oshirish

34.

Korrupsiya davlat va jamiyat taraqqiyoti uchun eng jiddiy xavf-xatarlardan biri ekanligini aholi va davlat xizmatchilari ongiga singdirish.

Davlat organlari matbuot xizmatlari tomonidan aholi va davlat xizmatchilari oʻrtasida:

k�rrupsiyaga qarshi kurashish asoslari va bunday huquqbuzarliklar uchun javobgarlikni belgilovchi normativ-huquqiy asoslar bilan tanishtirish ishlarini olib borish;

korrupsiyaning jamiyat va davlat uchun ijtimoiy xavfli xususiyatlari va oqibatlarini keng targʻib qilish;

davlat fuqarolik xizmati nufuzini oshirish boʻyicha kompleks chora tadbirlarni amalga oshirish.

Doimiy

Adliya vazirligi,

Korrupsiyaga qarshi kurashish agentligi,

Ichki ishlar vazirligi,

Oliy sud,

Bosh prokuratura

35.

Korrupsiyaga qarshi kurashish sohasida tahlil va ilmiy izlanishlar sifati va natijadorligini tubdan oshirish.

Xorijiy va milliy hamkorlar koʻmagida va nodavlat notijorat tashkilotlarini jalb qilgan holda Toshkent davlat yuridik universitetida korrupsiyaga qarshi kurashish muammolarini tadqiq qilish boʻyicha markaz faoliyatini tashkil etish yuzasidan takliflarni kiritish.

2021-yil 1-oktabr

Adliya vazirligi,

Korrupsiyaga qarshi kurashish agentligi,

Bosh prokuratura

36.

Korrupsiyaga oid jinoyatlar boʻyicha koʻrilgan sud ishlari toʻgʻrisidagi statistik maʼlumotlarning ochiqligini taʼminlash.

“Elektron jinoiy-huquqiy statistika” yagona axborot tizimi doirasida davlat organlari va tashkilotlari xodimlari tomonidan sodir etilgan korrupsiyaga oid jinoyatlar haqidagi statistik maʼlumotlar hamda hukm qonuniy kuchga kirgan jinoyat ishlarining sohalar va hududlar kesimidagi elektron bazasini shakllantirish.

2021-yil 1-sentabr

Ichki ishlar vazirligi,

Oliy sud,

Korrupsiyaga qarshi kurashish agentligi,

Bosh prokuratura

37.

Xalqaro korrupsiyaga qarshi kurashish kuni doirasida keng koʻlamli Antikorrupsiya haftaligini oʻtkazish.

Media-reja ishlab chiqish va uning samarali amalga oshirilishini tashkil etish.

har yili noyabr-dekabr oylarida

Korrupsiyaga qarshi kurashish milliy kengashi,

Axborot va ommaviy kommunikatsiyalar agentligi,

Korrupsiyaga qarshi kurashish agentligi,

Bosh prokuratura,

Adliya vazirligi

38.

Davlat xizmatchilarining korrupsiyaga qarshi kurashish borasidagi bilimlarini doimiy oshirib borish amaliyotini yoʻlga qoʻyish.

Davlat boshqaruvi akademiyasi va uning filiallari negizida “halollik vaksinasi” tamoyili asosida davlat xizmatchilarini korrupsiyaga qarshi kurashish, manfaatlar toʻqnashuvi va odob-axloq qoidalari boʻyicha maxsus oʻquv kurslarda muntazam ravishda oʻqitish tizimini joriy etish.

2022-yil 1-yanvar

Korrupsiyaga qarshi kurashish agentligi,

Adliya vazirligi,

Davlat boshqaruvi akademiyasi,

Bosh prokuratura Akademiyasi

39.

Fuqarolar tomonidan korrupsiya holatlari haqida tezkor xabar berish imkoniyatini kengaytirish.

Korrupsiyaga qarshi kurashish agentligi huzurida fuqarolarning korrupsiya haqida tezkor xabar berish imkonini beruvchi tunu-kun faoliyat yuritadigan “Call-markaz” ishga tushirish.

2021-yil 1-sentabr

Korrupsiyaga qarshi kurashish agentligi,

Moliya vazirligi

40.

Korrupsiyaga qarshi kurashish sohasida amalga oshirilayotgan islohotlarni keng jamoatchilikka tizimli ravishda yetkazib borish.

Har oy oʻzbek, rus va ingliz tillarida chop etiladigan “Uzbekistan Anti-Corruption Digest” onlayn jurnalini taʼsis etish.

2021-yil 1-sentabr

Korrupsiyaga qarshi kurashish agentligi,

Korrupsiyaga qarshi kurashish milliy kengashi,

Tashqi ishlar vazirligi,

Moliya vazirligi

41.

Korrupsiyaga qarshi murosasiz kurashish borasidagi ishlarni jamoatchilikka yetkazib borish amaliyotini yoʻlga qoʻyish.

OAV va ijtimoiy tarmoqlarda turli formatlardagi eshittirish, koʻrsatuv, maqolalar va boshqa axborot materiallarini eʼlon qilish boʻyicha chora-tadbirlar rejasini tasdiqlash.

2021-yil 1-sentabr

Korrupsiyaga qarshi kurashish agentligi,

Adliya vazirligi,

Axborot va ommaviy kommunikatsiyalar agentligi,

Milliy teleradiokompaniya

42.

Aholini “Ochiq budjet” va “E-anticor.uz” platformalari bilan tanishtirishga qaratilgan keng koʻlamli targʻibot tadbirlarini amalga oshirish.

Tele va radiokanallarda turli formatlardagi ijtimoiy roliklar va eshittirishlarni tayyorlash va namoyish etish boʻyicha chora-tadbirlar rejasini tasdiqlash.

2021-yil 1-sentabr

Korrupsiyaga qarshi kurashish agentligi,

Moliya vazirligi,

Milliy teleradiokompaniya

43.

Taʼlim muassasalarida korrupsiyaga qarshi kurashish sohasida huquqiy taʼlim berish boʻyicha tizimli va manzilli tadbirlarni amalga oshirish.

Yoshlarga korrupsiyaga qarshi kurashish sohasida huquqiy taʼlim berish boʻyicha kompleks chora-tadbirlarni tasdiqlash.

2021-yil 1-avgust

Oliy va oʻrta maxsus taʼlim vazirligi,

Xalq taʼlimi vazirligi,

Maktabgacha taʼlim vazirligi,

Korrupsiyaga qarshi kurashish agentligi,

Adliya vazirligi,

Bosh prokuratura

44.

Korrupsiyaga qarshi kurashish agentligining OAV bilan samarali hamkorligini yoʻlga qoʻyish.

Korrupsiyaga qarshi kurashish agentligi tomonidan korrupsiyaga oid xabarlarni koʻrib chiqish va jamoatchilikka maʼlumot berish tartibi va muddatlarini aniq belgilash.

2021-yil 1-avgust

Korrupsiyaga qarshi kurashish agentligi,

Axborot va ommaviy kommunikatsiyalar agentligi

Oʻzbekiston Respublikasi Prezidentining 2021-yil 6-iyuldagi PF-6257-son Farmoniga
2-ILOVA
Oʻzbekiston Respublikasi Prezidentining ayrim hujjatlariga kiritilayotgan oʻzgartirish va qoʻshimchalar
1. Oʻzbekiston Respublikasi Prezidentining 2018-yil 21-sentabrdagi “2019 — 2021-yillarda Oʻzbekiston Respublikasini innovatsion rivojlantirish strategiyasini tasdiqlash toʻgʻrisida”gi PF-5544-son Farmoniga 3-ilovaning 42-pozitsiyasida:
a) “Asosiy masʼul organ” grafasidagi “Bosh prokuratura” soʻzlari “Korrupsiyaga qarshi kurashish agentligi” soʻzlari bilan almashtirilsin;
b) “Turdosh davlat organlari” grafasidagi “Adliya vazirligi” soʻzlari “Bosh prokuratura, Adliya vazirligi” soʻzlari bilan almashtirilsin.
2. Oʻzbekiston Respublikasi Prezidentining 2019-yil 17-yanvardagi “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid davlat dasturi toʻgʻrisida” PF-5635-son Farmoniga 3-ilovada:
a) 2.1-pozitsiyaning “Korrupsiya darajasi” indikatorida “Masʼul davlat organlari” grafasidagi “Bosh prokuratura (N. Yoʻldoshev)” soʻzlari “Korrupsiyaga qarshi kurashish agentligi (A. Burxanov)” soʻzlari bilan almashtirilsin;
b) 5.2, 6 va 17.6-pozitsiyalarning “Masʼul davlat organlari” grafasidagi “Bosh prokuratura (N. Yoʻldoshev)” soʻzlari “Korrupsiyaga qarshi kurashish agentligi (A. Burxanov)” soʻzlari bilan almashtirilsin.
3. Oʻzbekiston Respublikasi Prezidentining 2019-yil 27-maydagi “Oʻzbekiston Respublikasida korrupsiyaga qarshi kurashish tizimini yanada takomillashtirish chora-tadbirlari toʻgʻrisida” PF-5729-son Farmonida:
a) 1-band quyidagi tahrirda bayon etilsin:
“1. 2019-2020-yillarda korrupsiyaga qarshi kurashish davlat dasturi (keyingi oʻrinlarda — Davlat dasturi) 1-ilovaga muvofiq tasdiqlansin.
Davlat hokimiyati va boshqaruvi organlari, jamoat birlashmalari va boshqa tashkilotlar Davlat dasturining har bir bandi boʻyicha maqsadlarga erishishda samaradorlik indikatorlarini ishlab chiqsin va Oʻzbekiston Respublikasi korrupsiyaga qarshi kurashish milliy kengashi bilan kelishib olsin”;
b) 5-bandning “a” kichik bandida:
toʻrtinchi xatboshidagi “Idoralararo komissiya” soʻzlari “Oʻzbekiston Respublikasi korrupsiyaga qarshi kurashish milliy kengashi (keyingi oʻrinlarda — Milliy kengash)” soʻzlari bilan almashtirilsin;
beshinchi xatboshidagi “Idoralararo komissiyaga” soʻzlari “Milliy kengashga” soʻzlari bilan almashtirilsin;
v) 8-bandning birinchi xatboshisi quyidagi tahrirda bayon etilsin:
“Milliy kengash (T.K. Narbayeva):”;
g) 9-banddagi “Idoralararo komissiyaga” soʻzlari “Milliy kengashga” soʻzlari bilan almashtirilsin;
d) 2-ilova oʻz kuchini yoʻqotgan deb hisoblansin;
e) 3-ilova quyidagi mazmundagi 31-band bilan toʻldirilsin:

“

31.

A.E. Burxanov

—

Oʻzbekiston Respublikasi Korrupsiyaga qarshi kurashish agentligi direktori

”.

Oldingi tahrirga qarang.
(4-band Oʻzbekiston Respublikasi Prezidentining 2024-yil 19-iyundagi PF-91-sonli Farmoniga asosan oʻz kuchini yoʻqotgan — Qonunchilik maʼlumotlari milliy bazasi, 20.06.2024-y., 06/24/91/0429-son)
5. Oʻzbekiston Respublikasi Prezidentining 2017-yil 14-martdagi “Huquqbuzarliklar profilaktikasi va jinoyatchilikka qarshi kurashish tizimini yanada takomillashtirish chora-tadbirlari toʻgʻrisida”gi PQ-2833-son qarori 4-bandining toʻrtinchi xatboshisi chiqarib tashlansin.
6. Oʻzbekiston Respublikasi Prezidentining 2019-yil 20-sentabrdagi “Qurilish sohasiga axborot-kommunikatsiya texnologiyalarini keng joriy etish chora-tadbirlari toʻgʻrisida”gi PQ-4464-son qaroriga 1-ilovaning birinchi xatboshisi quyidagi tahrirda bayon etilsin:
“A.E. Burxanov — Oʻzbekiston Respublikasi Korrupsiyaga qarshi kurashish agentligi direktori, Komissiya raisi”.
Oʻzbekiston Respublikasi Prezidentining 2021-yil 6-iyuldagi PF-6257-son Farmoniga
3-ILOVA
Oʻzbekiston Respublikasi Prezidentining oʻz kuchini yoʻqotgan deb eʼtirof etilayotgan ayrim hujjatlari
ROʻYXATI
1. Oʻzbekiston Respublikasi Prezidentining 2017-yil 6-iyuldagi “Oʻzbekiston Respublikasi Prezidentining ayrim hujjatlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida”gi PF-5111-son Farmoniga 1-ilovaning 19-bandi.
2. Oʻzbekiston Respublikasi Prezidentining 2017-yil 14-sentabrdagi “Oʻzbekiston Respublikasi Prezidentining ayrim hujjatlariga oʻzgartirishlar va qoʻshimcha kiritish toʻgʻrisida”gi PF-5191-son Farmoniga ilovaning 11-bandi.
3. Oʻzbekiston Respublikasi Prezidentining 2018-yil 5-iyundagi “Oʻzbekiston Respublikasi Prezidentining ayrim hujjatlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida”gi PF-5456-son Farmoniga 1-ilovaning 46-bandi.
4. Oʻzbekiston Respublikasi Prezidentining 2018-yil 30-sentabrdagi “Oʻzbekiston Respublikasi Prezidentining ayrim hujjatlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida”gi PF-5547-son Farmoniga 1-ilovaning 12-bandi.
5. Oʻzbekiston Respublikasi Prezidentining 2019-yil 19-iyuldagi “Oʻzbekiston Respublikasi Prezidentining ayrim hujjatlariga oʻzgartirishlar va qoʻshimcha kiritish toʻgʻrisida”gi PF-5769-son Farmoniga ilova 1-bandining “a” kichik bandi.
6. Oʻzbekiston Respublikasi Prezidentining 2019-yil 8-noyabrdagi “Oʻzbekiston Respublikasi Prezidentining ayrim hujjatlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida”gi PF-5870-son Farmoniga 1-ilovaning 17-bandi.
7. Oʻzbekiston Respublikasi Prezidentining 2019-yil 10-dekabrdagi “Oʻzbekiston Respublikasi Prezidentining ayrim hujjatlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida”gi PF-5892-son Farmoniga 1-ilovaning 33-bandi.
8. Oʻzbekiston Respublikasi Prezidentining 2017-yil 2-fevraldagi “Korrupsiyaga qarshi kurashish toʻgʻrisida”gi Oʻzbekiston Respublikasi Qonunining qoidalarini amalga oshirish chora-tadbirlari toʻgʻrisida”gi PQ-2752-son qarori.
(Qonunchilik maʼlumotlari milliy bazasi, 07.07.2021-y., 06/21/6257/0645-son; 20.06.2024-y., 06/24/91/0429-son)