O‘zbekiston Respublikasi Soliq kodeksining 15 va 132-moddalariga muvofiq O‘zbekiston Respublikasi Davlat soliq qo‘mitasi qaror qiladi:

1. Soliq to‘lovchilar to‘g‘risida hisob ma’lumotlarini yuritish, bu ma’lumotlarni uchinchi shaxslarga taqdim etish, shuningdek soliq to‘lovchilarning ayrim toifalari uchun ma’lumotlar tarkibini shakllantirish tartibi to‘g‘risidagi nizom ilovaga muvofiq tasdiqlansin.

2. Mazkur qaror rasmiy e’lon qilingan kundan e’tiboran kuchga kiradi.

Mazkur Nizom davlat soliq xizmati organlari (bundan buyon matnda soliq organlari deb yuritiladi) tomonidan soliq to‘lovchilar to‘g‘risidagi hisob ma’lumotlarini yuritish, bu ma’lumotlarni uchinchi shaxslarga taqdim etish, shuningdek soliq to‘lovchilarning ayrim toifalari uchun ma’lumotlar tarkibini shakllantirish tartibini belgilaydi.

1. Mazkur Nizomda quyidagi asosiy tushunchalardan foydalaniladi:

soliq to‘lovchi — O‘zbekiston Respublikasining Soliq kodeksiga (bundan buyon matnda Soliq kodeksi deb yuritiladi) muvofiq zimmasiga belgilangan soliqlar hamda yig‘imlarni to‘lash majburiyati yuklatilgan yuridik va jismoniy shaxslar;

soliq to‘lovchi to‘g‘risida hisob ma’lumotlari — soliq organlariga soliq to‘lovchi tomonidan taqdim etilgan ma’lumotlar, shuningdek Soliq kodeksining 133-moddasida nazarda tutilgan tartibda davlat organlari, muassasalari va tashkilotlari tomonidan taqdim etilgan ma’lumotlar;

uchinchi shaxs — o‘z faoliyatida qonunchilikda taqiqlanmagan maqsadlarda foydalanish uchun soliq to‘lovchiga doir ma’lumotlarni taqdim etish yuzasidan soliq organlariga yoki “Ishonchli hamkor” avtomatlashtirilgan axborot tizimi (bundan buyon matnda “Ishonchli hamkor” AAT deb yuritiladi)” orqali murojaat qilgan shaxs;

kontragent — soliq to‘lovchi bilan xo‘jalik munosabatlarida shartnoma tuzuvchi taraf;

ma’lumotlarni transchegaraviy uzatish — soliq to‘lovchi to‘g‘risida hisob ma’lumotlarni soliq organlari tomonidan respublika hududidan tashqariga O‘zbekiston Respublikasining xalqaro shartnomalarida nazarda tutilgan hollarda uzatish;

soliq to‘lovchilarning ayrim toifalari — to‘g‘ridan-to‘g‘ri xususiy chet el investitsiyalari ishtirokidagi yuridik shaxslar, maxsus iqtisodiy zonalarning ishtirokchilari, mahsulot taqsimotiga oid bitimlar ishtirokchilari, advokatlar hay’atlari, advokatlik firmalari, advokatlik byurolari va advokatlar hamda xususiy amaliyot bilan shug‘ullanuvchi notariuslar;

“Ishonchli hamkor” AAT — soliq to‘lovchilar to‘g‘risidagi soliq sirini tashkil etmaydigan ma’lumotlar va hisob ma’lumotlar, hisobvaraq-fakturalar va cheklarda ko‘rsatilgan mahsulotlarning (tovar va xizmatlarning) yagona elektron milliy katalogi bo‘yicha identifikatsiya kodlarini, shuningdek, majburiy markirovkalangan mahsulotlar bo‘yicha tahliliy va qayta ishlangan ma’lumotlarni uchinchi shaxslarga real vaqt rejimida yuborish imkoniyatiga ega avtomatlashtirilgan axborot tizimi.

2. Soliq organlariga soliq to‘lovchi tomonidan, shuningdek davlat organlari, muassasalari va tashkilotlari tomonidan taqdim etilgan soliq to‘lovchi to‘g‘risidagi quyidagi hisob ma’lumotlari soliq sirini tashkil etadi:

tadbirkorlik subyekti bo‘lgan yuridik va jismoniy shaxslarni davlat ro‘yxatidan o‘tkazishni amalga oshiruvchi organlardan olingan yuridik shaxslarning davlat reyestridan ko‘chirma, bundan soliq siri hisoblanmaydigan ma’lumotlar mustasno;

ichki ishlar organlaridan olingan pasport yoki identifikatsiya ID-karta ma’lumotlari, bundan jismoniy shaxsning shaxsiy identifikatsiya raqami (JSHSHIR) mustasno;

ko‘chmas mulkka bo‘lgan huquqni davlat ro‘yxatidan o‘tkazuvchi organlardan olingan tegishli hududda joylashgan yer uchastkasi va boshqa ko‘chmas mulk, uning mulkdorlari (egalari) to‘g‘risidagi ma’lumotlar;

tabiiy resurslardan foydalanuvchilarni hisobga olishni va (yoki) ularni ro‘yxatdan o‘tkazishni, shuningdek tabiiy resurslardan foydalanish bilan bog‘liq faoliyatni litsenziyalashni amalga oshiruvchi organlardan olingan litsenziya va ruxsatnomalar to‘g‘risidagi ma’lumotlar;

suv resurslarini hisobga olishni amalga oshiruvchi organlardan olingan o‘lchov asboblarisiz foydalanilgan suv hajmlari to‘g‘risidagi ma’lumotlar;

litsenziyalar va (yoki) boshqa ruxsat etuvchi hujjatlarni beradigan organlardan olingan shunday hujjatlar berilganligi, bekor qilinganligi, to‘xtatib turilganligi yoki ularning amal qilishi tugatilganligi to‘g‘risidagi ma’lumotlar;

chet el yuridik shaxslarining vakolatxonalarini akkreditatsiyadan o‘tkazishni amalga oshiruvchi organlar hamda tashkilotlardan olingan chet el yuridik shaxslarining vakolatxonalari akkreditatsiyadan o‘tkazilganligi (akkreditatsiyadan mahrum etilganligi) to‘g‘risidagi ma’lumotlar;

xalqaro tashkilotlarning hamda chet el notijorat tashkilotlarining vakolatxonalari reyestrini yuritish vakolatiga ega bo‘lgan organdan olingan mazkur reyestrga tegishli tarzda kiritilganlik (reyestrdagi o‘zgartirishlar) to‘g‘risidagi ma’lumotlar;

vasiylik va homiylik organlaridan olingan mol-mulk mulkdorlari (egalari) bo‘lgan jismoniy shaxslarga nisbatan vasiylik, homiylik hamda mol-mulk boshqaruvi belgilanganligi to‘g‘risida, shu jumladan mol-mulk mulkdori (egasi) bo‘lgan bolaning vasiy oilaga topshirilganligi haqida, shu jumladan mazkur vasiylik, homiylik va mol-mulk boshqaruvi bilan bog‘liq keyingi o‘zgartirishlar to‘g‘risidagi ma’lumotlar;

notariuslardan olingan ko‘chmas mulk oldi-sotdi shartnomalari, mol-mulk ijarasi shartnomalari tasdiqlanganligi va ijara haqi miqdori, merosga egalik qilish huquqi to‘g‘risidagi guvohnomalar berilganligi hamda hadya etish shartnomalari notarial tarzda tasdiqlanganligi haqidagi ma’lumotlar;

chet ellik fuqarolarga yoki fuqaroligi bo‘lmagan shaxslarga ishlash uchun ruxsatnomalar yoki patentlar berishni amalga oshiruvchi organlardan olingan chet ellik fuqarolar yoxud fuqaroligi bo‘lmagan shaxslar turgan joyi bo‘yicha migratsiya hisobiga qo‘yilganligi to‘g‘risidagi ma’lumotlar;

qimmatli qog‘ozlarning markaziy depozitariysidan olingan o‘zi va investitsiya vositachilari tomonidan ro‘yxatga olingan aksiyalarga doir bitimlar to‘g‘risidagi axborotlar;

bojxona organlaridan olingan import operatsiyalari to‘g‘risidagi, tovarlar bojxona chegarasini kesib o‘tganidan keyin eksport operatsiyalari bo‘yicha, shuningdek, tovarlarni olib o‘tish, shu jumladan O‘zbekiston Respublikasining bojxona chegarasi orqali elektron tijorat shaklida amalga oshirilgan tovarlarni olib o‘tish haqidagi, O‘zbekiston Respublikasi norezidentlari tomonidan O‘zbekiston Respublikasining bojxona omborlarida tovarlar saqlanayotganligi faktlari to‘g‘risidagi axborotlar;

Internet jahon axborot tarmog‘i milliy segmentining domen nomlari tizimini belgilovchi organdan olingan domen nomlarining ma’murlari to‘g‘risidagi axborotlar.

3. Soliq organlariga soliq to‘lovchi tomonidan, shuningdek davlat organlari, muassasalari va tashkilotlari tomonidan taqdim etilgan soliq to‘lovchi to‘g‘risidagi quyidagi hisob ma’lumotlari soliq siri hisoblanmaydi:

hamma foydalanishi mumkin bo‘lgan, shu jumladan egasining roziligi bilan shunday foydalanish imkoni yaratilgan ma’lumotlar;

yuridik shaxslar uchun — soliq to‘lovchining identifikatsiya raqami (STIR), jismoniy shaxslar uchun — jismoniy shaxsning shaxsiy identifikatsiya raqami (JSHSHIR) to‘g‘risidagi ma’lumotlar;

soliq to‘g‘risidagi qonunchilik hujjatlarining buzilishlari va bu qoidabuzarliklar uchun javobgarlik choralari to‘g‘risidagi ma’lumotlar;

soliq to‘lovchilar tomonidan qo‘llaniladigan soliq rejimlari va qo‘shilgan qiymat solig‘ini to‘lovchilar sifatida hisobga qo‘yilganlik to‘g‘risidagi ma’lumotlar;

to‘langan soliqlarning va soliq qarzining summalari haqidagi ma’lumotlar;

yuridik shaxsning ishtirokchilari to‘g‘risidagi ma’lumotlar;

xodimlarning ro‘yxatdagi o‘rtacha soni to‘g‘risidagi ma’lumotlar;

moliyaviy hisobot ma’lumotlari bo‘yicha daromadlar va xarajatlar summalari to‘g‘risidagi ma’lumotlar;

O‘zbekiston Respublikasi Vazirlar Mahkamasining 2020-yil 4-sentabrdagi 539-son qarori bilan tasdiqlangan Yuridik shaxslar, faoliyatini vakolatxona, filial yoki doimiy muassasa orqali amalga oshirayotgan chet el yuridik shaxslari va tadbirkorlik faoliyati bilan shug‘ullanuvchi jismoniy shaxslarning markaziy ma’lumotlar bazasini shakllantirish va yuritish tartibi to‘g‘risida nizomda belgilangan soliq to‘lovchilarning ochiq turdagi ma’lumotlar tarkibiga kiritilgan hisob ma’lumotlari.

4. Soliq to‘lovchi bo‘yicha soliq siri hisoblanadigan ma’lumotlarni uchinchi shaxslarga berish taqiqlanadi, bundan qonunchilik hujjatlarida nazarda tutilgan hollar mustasno.

5. Muayyan jismoniy shaxsga taalluqli bo‘lgan yoki uni identifikatsiya qilish imkonini beradigan shaxsga doir ma’lumotlarni uchinchi shaxslarga taqdim etish O‘zbekiston Respublikasining “Shaxsga doir ma’lumotlar to‘g‘risida”gi Qonuniga muvofiq amalga oshiriladi.

6. Yuridik shaxs to‘g‘risidagi hisob ma’lumotlari tarkibiga quyidagilar kiradi, xususan:

soliq to‘lovchining identifikatsiya raqami (STIR);

to‘liq va qisqartirilgan nomi;

joylashgan yeri (pochta manzili);

tashkiliy-huquqiy shakli;

mulkchilik shakli;

iqtisodiy faoliyat turi;

davlat boshqaruv idoralariga taalluqliligi;

davlat ro‘yxatidan o‘tkazilgan sana, joyi va raqami, ro‘yxatdan o‘tkazuvchi organ;

rahbar ma’lumotlari;

ustav fondining (ustav kapitalining) miqdori — tijorat tashkilotlari uchun;

faollik holati;

kichik tadbirkorlik subyektiga tegishliligi;

bank rekvizitlari;

alohida bo‘linmalar to‘g‘risidagi ma’lumotlar;

soliq to‘g‘risidagi qonunchilik hujjatlarining buzilishlari va bu qoidabuzarliklar uchun javobgarlik choralari to‘g‘risidagi ma’lumotlar;

soliq to‘lovchilar tomonidan qo‘llaniladigan soliq rejimlari va qo‘shilgan qiymat solig‘ini to‘lovchilar sifatida hisobga qo‘yilganlik to‘g‘risidagi ma’lumotlar;

to‘langan soliqlarning va soliq qarzining summalari haqidagi ma’lumotlar;

xodimlarning ro‘yxatdagi o‘rtacha soni to‘g‘risidagi ma’lumotlar;

moliyaviy hisobot ma’lumotlari bo‘yicha daromadlar va xarajatlar summalari to‘g‘risidagi ma’lumotlar;

O‘zbekiston Respublikasining rezidentlari bo‘lgan ishtirokchilar soliq to‘lovchisining identifikatsiya raqami, chet ellik ishtirokchining mamlakati hamda har bir muassisning ustav fondidagi (ustav kapitalidagi) ulushi ko‘rsatilgan holda ishtirokchilarning to‘liq tarkibi — tijorat tashkilotlari uchun.

7. Jismoniy shaxslar to‘g‘risidagi hisob ma’lumotlari tarkibiga ularning quyidagi shaxsiy ma’lumotlari kiritiladi:

familiyasi, ismi, otasining ismi;

fuqaroligi;

jismoniy shaxsning shaxsiy identifikatsiya raqami;

pasportining seriyasi va raqami, berilgan sanasi va joyi yoki identifikatsiya ID-karta ma’lumotlari;

yashash joyi (manzili).

8. Yakka tartibdagi tadbirkorlar uchun hisob ma’lumotlari tarkibiga mazkur Nizomning 7-bandida ko‘rsatilgan ma’lumotlardan tashqari, quyidagilar ham kiritiladi:

davlat ro‘yxatidan o‘tkazilgan sana, joyi va raqami;

faoliyat turi;

faoliyat amalga oshiriladigan joy.

9. Chet el yuridik shaxslarining hisob ma’lumotlari tarkibiga quyidagilar kiradi:

ro‘yxatdan o‘tkazilgan mamlakatning ro‘yxatga olish organi tomonidan berilgan ro‘yxatdan o‘tkazish raqami;

ro‘yxatga olingan mamlakatning soliq organi tomonidan berilgan soliq to‘lovchining xos raqami;

yuridik shaxsning to‘liq nomi;

ro‘yxatga olingan mamlakati;

tashkiliy-huquqiy shakli;

asosiy faoliyat turi;

joylashgan yeri (pochta manzili);

rahbarining (vakolatli shaxsning) familiyasi, ismi, otasining ismi, pasport seriyasi va raqami yoki identifikatsiya ID-karta ma’lumotlari, elektron pochta manzili va telefon raqami;

alohida bo‘linmalar to‘g‘risidagi ma’lumotlar — faoliyatini alohida bo‘linmalar orqali amalga oshiradigan chet el yuridik shaxslari uchun.

10. Soliq kodeksining 39-bobida nazarda tutilgan elektron shaklda xizmatlar ko‘rsatuvchi chet el yuridik shaxslarining hisob ma’lumotlari tarkibiga ushbu Nizomning 9-bandida ko‘rsatilgan ma’lumotlardan tashqari, quyidagilar ham kiritiladi:

Internet jahon axborot tarmog‘idagi rasmiy veb-sayti va xizmat ko‘rsatayotgan veb-sayti;

elektron pochta manzili;

savdo belgisi nomi;

ko‘rsatayotgan elektron xizmat turi;

elektron xizmat taqdim etayotgan mobil ilova nomi.

10¹. Soliq to‘lovchi soliq organlarining ma’lumotlar bazasida mavjud bo‘lgan o‘z hisob ma’lumotlarini soliq organining so‘roviga ko‘ra soliq to‘lovchining shaxsiy kabineti orqali tasdiqlashi kerak.

11. Soliq to‘lovchilar to‘g‘risidagi hisob ma’lumotlarini yuritish yuridik shaxslar uchun soliq to‘lovchining identifikatsiya raqami (STIR), jismoniy shaxslar uchun jismoniy shaxsning shaxsiy identifikatsiya raqami (JSHSHIR) asosida amalga oshiriladi.

12. Soliq to‘lovchilar to‘g‘risidagi hisob ma’lumotlarini yuritish ma’lumotlarni kiritishni va ushbu ma’lumotlarni o‘zgartirishni o‘z ichiga oladi.

13. Soliq to‘lovchilar to‘g‘risidagi hisob ma’lumotlari O‘zbekiston Respublikasi soliq to‘lovchilarining yagona reyestriga kiritiladi.

14. Soliq to‘lovchilar to‘g‘risidagi hisob ma’lumotlariga o‘zgartirish kiritish soliq to‘lovchi tomonidan soliq organlariga taqdim etilgan ma’lumotlar va (yoki) Soliq kodeksining 133-moddasida nazarda tutilgan tartibda davlat organlari, muassasalari va tashkilotlaridan olingan ma’lumotlar asosida soliq to‘lovchi hisobga qo‘yilgan hamda soliq solish obyekti bo‘yicha hisobga qo‘yilgan soliq organi tomonidan amalga oshiriladi.

15. Yirik soliq to‘lovchilar toifasiga kiritilgan soliq to‘lovchilarning hisob ma’lumotlariga o‘zgartirish kiritish Yirik soliq to‘lovchilar bo‘yicha hududlararo soliq inspeksiyasi tomonidan mazkur Nizomga muvofiq amalga oshiriladi.

16. Soliq to‘lovchilar to‘g‘risidagi hisob ma’lumotlarini sudlarga, huquqni muhofaza qiluvchi organlarga hamda respublika davlat boshqaruvi organlariga taqdim etish O‘zbekiston Respublikasi Soliq qo‘mitasi bilan o‘zaro elektron axborot almashish bo‘yicha tuzilgan bitimlar asosida axborot xavfsizligi talablariga rioya qilgan holda elektron tarzda amalga oshiriladi.

Bunda, o‘zaro elektron axborot almashish tizimi yo‘lga qo‘yilmagan tashkilotlarga ma’lumotlarni taqdim etish, ularning so‘rovi asosida qog‘oz shaklda amalga oshiriladi.

17. Soliq to‘lovchilar to‘g‘risidagi ma’lumotlardan faqat ulardan foydalanishga ruxsat berilgan mansabdor shaxslar tomonidan foydalanish imkoniyati yaratiladi.

18. O‘zbekiston Respublikasi Jinoyat-protsessual kodeksining 201-moddasiga asosan sudlarga hamda huquqni muhofaza qiluvchi organlarga ularning so‘roviga asosan soliq sirini tashkil etuvchi ma’lumotlar taqdim etilishi mumkin.

19. Tijorat tashkilotlariga soliq to‘lovchilar to‘g‘risidagi hisob ma’lumotlari axborot xavfsizligi talablariga rioya qilgan holda “Ishonchli hamkor” AAT orqali taqdim etiladi.

Bunda, soliq sirini tashkil etuvchi ma’lumotlarni taqdim etish soliq to‘lovchining roziligi bilan amalga oshiriladi.

20. Soliq to‘lovchilar to‘g‘risidagi hisob ma’lumotlarini jismoniy shaxslarga taqdim etish O‘zbekiston Respublikasi Soliq qo‘mitasining rasmiy veb-saytidagi soliq to‘lovchining shaxsiy kabineti (bundan buyon matnda shaxsiy kabinet deb yuritiladi) orqali real vaqt rejimida amalga oshiriladi.

Bunda, jismoniy shaxslar tomonidan yozma tarzda murojaat qilinganda ma’lumotlarni taqdim etish O‘zbekiston Respublikasining “Jismoniy va yuridik shaxslarning murojaatlari to‘g‘risida”gi Qonunida belgilangan tartibda amalga oshiriladi.

21. Soliq to‘lovchi kontragentlarni tanlash chog‘ida ularning soliq organlarida soliq to‘lovchi sifatida hisobga qo‘yilganligi to‘g‘risidagi hamda mazkur Nizomning 3-bandida belgilangan ma’lumotlarni olishi mumkin.

Soliq to‘lovchiga kontragent bo‘yicha ma’lumotlarni taqdim etish shaxsiy kabinet yoki “Ishonchli hamkor” AAT orqali real vaqt rejimida amalga oshiriladi.

22. Soliq to‘lovchilar to‘g‘risida hisob ma’lumotlarini transchegaraviy uzatish soliq organlari tomonidan O‘zbekiston Respublikasining xalqaro shartnomalarida nazarda tutilgan hollarda amalga oshiriladi.

Bunda, boshqa davlatlarning soliq organlariga yoki boshqa tegishli organlariga soliq to‘lovchi to‘g‘risida so‘ralgan ma’lumotlarni taqdim etish soliq sirini oshkor etish sirasiga kirmaydi.

23. To‘g‘ridan-to‘g‘ri xususiy chet el investitsiyalari ishtirokidagi yuridik shaxslarning ma’lumotlar tarkibi quyidagilar asosida shakllanadi:

investitsiyalar O‘zbekiston Respublikasining kafolatini taqdim etmasdan amalga oshirilayotganligi to‘g‘risida O‘zbekiston Respublikasi Iqtisodiyot va moliya vazirligidan olingan ma’lumotlar;

to‘liq shakllantirilgan ustav kapitali (fondi) va korxonaning ustav kapitalida (fondida) xorijiy investorning ulushi to‘g‘risida tegishli organ va tashkilotlardan olingan ma’lumotlar.

24. Maxsus iqtisodiy zonalarning ishtirokchilari bo‘yicha ma’lumotlar tarkibiga maxsus zonalar direksiyalari tomonidan taqdim etilgan maxsus zonalarning ishtirokchilari maxsus zonalar ishtirokchisi sifatida ro‘yxatdan o‘tkazilganligi (ishtirokchi maqomidan mahrum etilgani) to‘g‘risidagi ma’lumotlar kiritiladi.

25. Mahsulot taqsimotiga oid bitimlar ishtirokchilari bo‘yicha ma’lumotlar tarkibiga O‘zbekiston Respublikasi Vazirlar Mahkamasi yoki u vakolat bergan organdan olingan investor yoki yuridik shaxs maqomiga ega bo‘lmagan yuridik shaxslar birlashmasi investor sifatida ish yuritayotgan bo‘lsa, bunday birlashma ishtirokchilaridan biriga berilgan mahsulot taqsimotiga oid bitimda ko‘rsatilgan yer qa’ri uchastkalaridan foydalanish huquqini beruvchi litsenziya to‘g‘risidagi (amal qilish muddati va birlashmaning boshqa barcha ishtirokchilari to‘g‘risidagi) ma’lumotlar kiritiladi.

26. Advokatlar hay’ati, advokatlik firmalari va advokatlik byurolari bo‘yicha ma’lumotlar tarkibi adliya organlaridan olingan quyidagi ma’lumotlar asosida shakllanadi:

advokatlik faoliyati bilan shug‘ullanish uchun berilgan litsenziyalarning davlat reyestridagi ma’lumotlar;

advokatlik tuzilmalari reyestridagi ma’lumotlar;

advokatlik tuzilmalarining pochta manzili o‘zgarganda bu o‘zgarishlar to‘g‘risida olingan ma’lumotlar.

27. Xususiy amaliyot bilan shug‘ullanuvchi notariuslar bo‘yicha ma’lumotlar tarkibi adliya organlaridan olingan quyidagi ma’lumotlar asosida shakllanadi:

xususiy notarial faoliyat bilan shug‘ullanish huquqi uchun berilgan litsenziyalar to‘g‘risidagi (amal qilishi to‘xtatib turilgan, tugatilgan va bekor qilingan) ma’lumotlar;

xususiy notarial amaliyot bilan shug‘ullanish uchun berilgan litsenziyalarning davlat reyestridagi ma’lumotlar.

28. Coliq to‘lovchilarning ayrim toifalari uchun ma’lumotlar tarkibi ushbu Nizomning 23 — 27-bandlarida nazarda tutilgan ma’lumotlardan tashqari tegishli organ va tashkilotlardan olingan ma’lumotlar asosida shakllantirilishi mumkin.

29. Uchinchi shaxs tomonidan soliq organlaridan olingan soliq siri hisoblangan ma’lumotlar va axborotlardan faqat xizmat doirasida foydalaniladi.

30. Ma’lumotlardan foydalanuvchi korxonalar va tashkilotlarning mansabdor shaxslari hamda fuqarolar soliq organlaridan olingan ma’lumotlar va axborotlarning sir tutilishini qonunchilik hujjatlarida belgilangan tartibda ta’minlashlari shart.

31. Soliq organlaridan olingan axborotlarni o‘z ichiga olgan hujjatlarning yo‘qotilishi yoki bunday ma’lumotlarning oshkor etilishi qonunda nazarda tutilgan javobgarlikka sabab bo‘ladi.

32. Mazkur Nizom talablarining buzilishida aybdor bo‘lgan shaxslar qonunchilik hujjatlarida belgilangan tartibda javobgarlikka tortiladilar.

33. Mazkur Nizom O‘zbekiston Respublikasi Moliya vazirligi bilan kelishilgan.