“O‘zDEUavto” qo‘shma korxonasi ishlab chiqargan avtomobillarni samarali sotish va ularga texnik xizmat ko‘rsatishni tashkil etish uchun shart-sharoitlar yaratish maqsadida Vazirlar Mahkamasi qaror qiladi:

1. “O‘zavtosanoat”, “O‘zbeksavdo” uyushmalari, O‘zbekbirlashuv O‘zbekiston Respublikasi Tashqi iqtisodiy aloqalar vazirligi bilan birgalikda:

“Mersedes-Bens”, “DEU” kompaniyalarining va boshqa yirik avtomobil firmalarining mutaxassislarini jalb etgan holda “O‘zDEUavto” qo‘shma korxonasi avtomobillarini ham respublika ichida, ham O‘zbekiston tashqarisida sotish bo‘yicha marketing tadqiqotlari markazini tashkil etish, uning tuzilmasi va funksiyalari to‘g‘risidagi taklifni o‘n kun muddatda Vazirlar Mahkamasiga kiritsinlar;

Qoraqalpog‘iston Respublikasi Vazirlar Kengashi viloyatlar va Toshkent shahar hokimliklari ishtirokida bir oy muddatda 1996-1997-yillarda respublika mintaqalarida avtomobillarni sotish bo‘yicha marketing tadqiqotlari o‘tkazsinlar;

bir oy muddatda “O‘zDEUavto” qo‘shma korxonasi uchun buyurtmalar portfelini shakllantirishga va 2000-yil oxirigacha bo‘lgan davrda avtomobillarni ham respublika ichida, ham eksportga sotishga doir takliflarni ishlab chiqsinlar;

1996-yil oxirigacha marketing tadqiqotlari natijalarini hisobga olgan holda avtomobil modellarini yangilashga doir “DEU” korporatsiyasi bilan kelishilgan tadbirlarni taqdim etsinlar.

2. 1997-yilda “O‘zDEUavto” qo‘shma korxonasi avtomobillarini 1-ilovaga* muvofiq sotish dasturiga asosan rozilik bildirilsin, bunda avtomobillarni eksportga ustuvor sotishga, shuningdek respublika ichida erkin almashtiriladigan valyutaga sotishga, valyuta tushumi o‘z vaqtida tushishini ta’minlashga alohida e’tibor berilsin.

“O‘zavtosanoat” uyushmasi “O‘zDEUavto” qo‘shma korxonasi bilan birgalikda respublikada xaridorlar talabini o‘rganish va marketing tadqiqotlari o‘tkazish, shuningdek buyurtmalar portfelini shakllantirish natijalari bo‘yicha 1997-yilda avtomobillarni sotish dasturiga zarur tuzatishlar kiritsin.

3. “O‘zavtosanoat” uyushmasi “O‘zDEUavto” qo‘shma korxonasi bilan shartnoma asosida “O‘zbeksavdo” uyushmasi, O‘zbekbirlashuv va boshqa savdo tashkilotlarini jalb etish yo‘li bilan avtomobillarni sotish tarmog‘ini kengaytirsin.

“O‘zistiqbolstat” davlat qo‘mitasi “O‘zDEUavto” qo‘shma korxonasi avtomobillarini sotish, shu jumladan “O‘zbeksavdo” uyushmasi va O‘zbekbirlashuv tizimlarida sotish bo‘yicha statistika hisobotini joriy etsin.

4. “Asaka” banki “O‘zavtotexxizmat” aksionerlik jamiyati bilan birgalikda “O‘zDEUavto” qo‘shma korxonasi avtomobillarini O‘zbekiston Respublikasi fuqarolariga Vazirlar Mahkamasining 1996-yil 26-martdagi 118-son qarori bilan tasdiqlangan tartibga muvofiq navbatda turuvchilarning alohida ro‘yxati bo‘yicha kredit asosida sotishni ta’minlasin.

6. “O‘zavtosanoat” uyushmasi va “O‘zavtotexxizmat” aksionerlik birlashmasi:

1996-yil oxirigacha 2-ilovaga* muvofiq avtomobillarga texnik xizmat ko‘rsatish stansiyalari qurishni va ularni foydalanishga topshirishni ta’minlasinlar;

texnik xizmat ko‘rsatish viloyat stansiyalari huzurida avtomobillarga texnik xizmat ko‘rsatish bo‘yicha uch-beshtadan ko‘chma punktlar tashkil etishning hududiy sxemasini o‘n kun muddatda ko‘rib chiqish uchun Vazirlar Mahkamasiga kiritsinlar.

7. I.H. Jo‘rabekov, Q.J. Haqqulov, K.R. Parpiyev Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari bilan birgalikda bir oy muddatda:

avtomobillarga yonilg‘i quyish punktlarini;

avtoservis va texnik xizmat ko‘rsatish xizmatlarini;

savdo va maishiy xizmat ko‘rsatish obyektlarini o‘z ichiga oluvchi 2000-yilgacha avtomobil yo‘llari bo‘ylab xalqaro standartlarga javob beruvchi zamonaviy servis xizmati ko‘rsatish kompleks punktlari barpo etish dasturi loyihasini;

mablag‘ bilan ta’minlash manbalarini belgilagan holda 1997-yilda amalga oshiriladigan tadbirlarni ishlab chiqsinlar va Vazirlar Mahkamasiga kiritsinlar.

8. “O‘zbekiston temir yo‘llari” kompaniyasi:

“O‘zavtosanoat” uyushmasi va “O‘zavtotexxizmat” aksionerlik jamiyati bilan birgalikda avtomobillarni zavodlardan ularni sotish punktlarigacha tashish yo‘nalishlarini va tartibini bir hafta muddatda ishlab chiqsin va tasdiqlasin;

O‘zbekiston Respublikasi Tashqi iqtisodiy aloqalar vazirligi bilan birgalikda 1997-yilning birinchi yarim yilligida avtomobillarni tashish uchun 200 ta ixtisoslashtirilgan yopiq vagonlar xarid qilish masalasini ishlab chiqsin;

tashiladigan avtomobillarni saqlashni ta’minlash maqsadida “O‘zavtotexxizmat” aksionerlik jamiyati va “Texnolog” aksionerlik jamiyati bilan birgalikda ikki oy muddatda mavjud 110 ta ikki qavatli ixtisoslashtirilgan ochiq platformani puxta jihozlasin.

Pul-kredit siyosati bo‘yicha respublika komissiyasi ko‘rsatib o‘tilgan tadbirlarni mablag‘ bilan ta’minlash uchun kredit resurslari ajratish masalalarini belgilangan tartibda ko‘rib chiqsin.

“O‘zbekiston temir yo‘llari” kompaniyasi boshqaruvining raisi N. Ermetovga avtomobillar tashilishi va saqlanishi uchun shaxsiy javobgarlik yuklansin.

O‘zbekiston Respublikasi Adliya vazirligi, “O‘zbekiston temir yo‘llari” kompaniyasi O‘zbekiston Respublikasi Ichki ishlar vazirligi va boshqa manfaatdor vazirliklar va idoralar bilan birgalikda ikki hafta muddatda temir yo‘l transportida tashiladigan yuklarning saqlanishini ta’minlash uchun mansabdor shaxslarning javobgarligini oshirish to‘g‘risidagi qonun hujjatlari loyihalari bo‘yicha Vazirlar Mahkamasiga taklif kiritsin.

9. “O‘zdavstandart” markazi:

“O‘zavtosanoat” uyushmasi bilan birgalikda “O‘zDEUavto” qo‘shma korxonasi avtomobillariga berilgan, ularning to‘siqsiz eksport qilinishini ta’minlaydigan sertifikatlarning chet mamlakatlarda e’tirof etilishiga doir ishlarni bir oy muddatda amalga oshirsin;

“O‘zavtosanoat” uyushmasi, “O‘zavtotrans” korporatsiyasi, “O‘zavtoyo‘l” davlat-aksionerlik konserni, O‘zbekiston Respublikasi Ichki ishlar vazirligi, Toshkent avtomobil yo‘llari instituti bilan birgalikda 1997-yilning birinchi choragida avtotransport vositalarini sertifikatlash tizimini ishlab chiqishni tugallasin.

Moliya vazirligi sertifikatlash tizimini ishlab chiqish uchun hisob-kitoblarga muvofiq zarur mablag‘lar ajratsin.

10. “O‘zavtosanoat” uyushmasi, Moliya vazirligi, Davlat mulki qo‘mitasi, “O‘zdavstandart” markazi bir oy muddatda xalqaro talablarni hisobga olgan holda davlat sertifikatsiya sinovlarini o‘tkazish uchun Janubiy avtomotopoligon qurilishini tugallash bo‘yicha kelishilgan takliflarni kiritsinlar.

15. Bosh vazirning o‘rinbosari S.S. Saidqosimov respublikada ishlab chiqariladigan avtomobillarni sotish, ulardan foydalanish va ularga texnik xizmat ko‘rsatish masalalariga bag‘ishlangan har haftada namoyish qilinadigan teleko‘rsatuvlar tashkil etsin.

“Asaka” bankiga ko‘rsatib o‘tilgan teleko‘rsatuvlarni mablag‘ bilan ta’minlash uchun “O‘zavtosanoat” uyushmasiga kredit resurslari ajratish tavsiya qilinsin.

16. “O‘zavtosanoat” uyushmasi Davlat matbuot qo‘mitasi, “O‘zavtotrans” korporatsiyasi, “O‘zavtoyo‘l” konserni bilan birgalikda O‘zbekiston Respublikasi Ichki ishlar vazirligini jalb etgan holda ikki oy muddatda respublikada avtomobil ishi rivojlanishiga bag‘ishlangan oylik jurnal belgilangan tartibda nashr etilishini tashkil etsin.

17. O‘zbekiston Respublikasi Moliya vazirligi 1997-yil budjeti loyihasini ishlab chiqishda “O‘zDEUavto” qo‘shma korxonasida ishlab chiqarilgan 1200 ta “Damas” tez yordam avtomashinasini sotib olish uchun Sog‘liqni saqlash vazirligiga zarur mablag‘lar ajratishni nazarda tutsin.

18. Vazirlar Mahkamasining 1996-yil 20-martdagi 114-son qarori bilan yengil avtomobillarga belgilangan import boj poshlinalari stavkalari 1996-yil 1-oktabrdan boshlab o‘z kuchini yo‘qotgan deb hisoblansin.

19. Mazkur qarorning bajarilishini nazorat qilish O‘zbekiston Respublikasining Bosh vaziri O‘.T. Sultonov zimmasiga yuklansin.