Oʻzbekiston Respublikasining Bojxona kodeksi va Oʻzbekiston Respublikasi Prezidentining 2018-yil 24-noyabrdagi PF-5582-son “Bojxona maʼmuriyatchiligini takomillashtirish va Oʻzbekiston Respublikasi davlat bojxona xizmati organlari faoliyati samaradorligini oshirish boʻyicha qoʻshimcha chora-tadbirlar toʻgʻrisida”gi Farmoniga muvofiq Oʻzbekiston Respublikasi Davlat bojxona qoʻmitasi qaror qiladi:

1. Tovarlarni bojxona koʻzdan kechiruvi va bojxona koʻrigidan oʻtkazishda hamda namuna va (yoki) sinamalar olishda bojxona tartib-taomillarini amalga oshirish toʻgʻrisidagi yoʻriqnoma ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Yoʻriqnoma Oʻzbekiston Respublikasining Bojxona kodeksi va Oʻzbekiston Respublikasi Prezidentining 2018-yil 24-noyabrdagi PF-5582-son “Bojxona maʼmuriyatchiligini takomillashtirish va Oʻzbekiston Respublikasi davlat bojxona xizmati organlari faoliyati samaradorligini oshirish boʻyicha qoʻshimcha chora-tadbirlar toʻgʻrisida”gi Farmoniga muvofiq bojxona organining mansabdor shaxsi tomonidan tovarlarni koʻzdan kechiruvi, bojxona koʻrigini amalga oshirish hamda namuna va (yoki) sinamalar olishda bojxona tartib-taomillarini amalga oshirish tartibini belgilaydi.

1. Ushbu Yoʻriqnoma jismoniy shaxslarning qoʻl yuki va kuzatib borilayotgan bagajiga nisbatan tatbiq etilmaydi.

2. Mazkur Yoʻriqnomada quyidagi asosiy tushunchalardan foydalaniladi:

bojxona koʻzdan kechiruvi — bojxona organining mansabdor shaxsi tomonidan transport vositalarining boʻlimlarini, tovarlarning oʻrov-idishini ochmagan, koʻzdan kechirilayotgan obyektlarni va ularning qismlarini boʻlaklarga ajratmagan va boshqa yoʻllar bilan ularning butligini buzmagan holda tovarlarning va (yoki) transport vositalarining, xalqaro pochta va kuryerlik joʻnatmalarining hamda jismoniy shaxslar bagajining, shuningdek yuk ortilgan idishlarni, konteynerlarni, bojxona identifikatsiyalash vositalarining tashqi koʻrinishini koʻzdan kechirish orqali amalga oshiriladigan bojxona nazoratining turi;

bojxona koʻrigi — qoʻyilgan plombalarni, muhrlarni yoki bojxona identifikatsiyalashining boshqa vositalarini buzgan xolda, tekshirilayotgan obyektlarni va ularning qismlarini boʻlaklarga ajratib, demontaj qilib yoki boshqa yoʻllar bilan ularning butligini buzib, tovarlarning oʻramini yoki transport vositasining yuk joylanadigan boʻlimini yoxud idishlarini, konteynerlarni va tovarlar boʻlgan yoki boʻlishi ehtimoli boʻlgan boshqa joylarni ochish orqali amalga oshiriladigan bojxona nazoratining shakli;

vakolatli shaxs — tovarning va (yoki) transport vositasining egasi yoki tovarga va (yoki) transport vositasiga nisbatan bojxona toʻgʻrisidagi qonunchilik hujjatlariga muvofiq vakolatlarga ega boʻlgan yoxud tovarning va (yoki) transport vositasining egasi nomidan tegishli shartnoma yoki ishonchnoma asosida ish koʻruvchi shaxs;

deklarant — tovarlarni va (yoki) transport vositalarini oʻz nomidan deklaratsiyalovchi shaxs yoxud uning nomidan tovarlar va (yoki) transport vositalari deklaratsiyalanayotgan shaxs;

tovarlar — bojxona chegarasi orqali olib oʻtiladigan har qanday koʻchar mol-mulk, shu jumladan Oʻzbekiston Respublikasi milliy valyutasi, valyuta boyliklari va boshqa qimmatli qogʻozlar, elektr, issiqlik energiyasi va energiyaning boshqa turlari, intellektual mulk obyektlari, transport vositasi, bundan Oʻzbekiston Respublikasi Bojxona kodeksining 13-moddasi toʻrtinchi qismida koʻrsatilgan transport vositasi mustasno;

tovarni chiqarib yuborish — bojxona organlarining bojxona rasmiylashtiruvini yakunlovchi va maʼlum qilingan bojxona rejimi shartlaridan kelib chiqqan holda tovarlardan foydalanishga va (yoki) ularni tasarruf etishga ruxsat berilganligini ifodalovchi harakati;

xavf — bojxona toʻgʻrisidagi qonunchilik hujjatlariga rioya etilmasligi ehtimolining darajasi;

xavfni boshqarish avtomatlashtirilgan tizimi (bundan buyon matnda XBAT deb yuritiladi) — xavfni oldini olish yoki uni imkon qadar kamaytirish maqsadida tovarlar toʻgʻrisidagi maʼlumotlarni tahlil qiluvchi, ularning aniqliligiga baho beruvchi hamda ushbu maʼlumotlarni qayta ishlovchi elektron axborot tizimi.

xavf profili — xavf sohasi, xavf indikatorlari toʻgʻrisidagi maʼlumotlar yigʻindisi, shuningdek xavfning oldini olish yoki uni imkon qadar kamaytirish boʻyicha zarur choralarni koʻrish toʻgʻrisidagi koʻrsatmalar;

3. Bojxona koʻzdan kechiruvi bojxona nazorati ostidagi tovarlar va (yoki) transport vositalari toʻgʻrisidagi maʼlumotlarni, tovarlarda, yuk ortilgan idishlarda, transport vositalarida va transport vositalarining boʻlimlarida plombalar, muhrlar va boshqa bojxona identifikatsiyalash vositalari mavjudligini tasdiqlash maqsadida amalga oshiriladi.

4. Oʻzbekiston Respublikasi Bojxona kodeksining 195-moddasiga muvofiq bojxona koʻrigi, qoida tariqasida, tovarga bojxona deklaratsiyasi qabul qilinganidan keyin deklarant hozirligida oʻtkaziladi. Bunda tovarga bojxona deklaratsiyasi qabul qilinguniga qadar bojxona koʻrigi:

bojxona maqsadlarida tovarni identifikatsiyalash;

bayon etilgan maʼlumotlarning toʻgʻriligini aniqlash;

bojxona toʻgʻrisidagi qonunchilik hujjatlarini buzganlik toʻgʻrisidagi mavjud axborotni tekshirish;

tanlab tekshirish prinsipiga rioya etgan holda xavfni boshqarish tizimi asosida bojxona nazoratini oʻtkazish;

ushbu Oʻzbekiston Respublikasi Bojxona kodeksining 275-moddasiga muvofiq deklarantning huquqlarini amalga oshirish zarur boʻlgan taqdirda oʻtkazilishi mumkin.

Tovarlarni tegishli bojxona rejimiga joylashtirilishida bojxona koʻrigi bojxona yuk deklaratsiyasi taqdim qilinganidan soʻng amalga oshiriladi.

Tirik hayvonlar va tez buziladigan tovarlar birinchi navbatda bojxona koʻrigidan oʻtkaziladi.

5. Tovar va transport vositalarini bojxona rasmiylashtiruvidan oʻtkazish XBAT tomonidan belgilangan quyidagi yoʻlaklarni qoʻllash yoʻli bilan amalga oshiriladi:

“sariq yoʻlak” — bojxona deklaratsiyasi, hujjatlar va maʼlumotlarni tekshirish boʻyicha bojxona nazorati shakllari xavf darajasi oʻrta koʻrsatkichga ega yoki tasodifiy tanlovda aniqlangan tovar va transport vositalariga nisbatan amalga oshiriladi;

“qizil yoʻlak” — bojxona nazorati shakllari xavf darajasi yuqori koʻrsatkichga ega yoki tasodifiy tanlovda aniqlangan tovar va transport vositalariga nisbatan amalga oshiriladi;

“yashil yoʻlak” — xavf darajasi past boʻlgan tovar va transport vositalariga nisbatan qoʻllaniladi.

“koʻk yoʻlak” — xavf darajasi oʻrta koʻrsatkichga ega yoki tasodifiy tanlov asosida aniqlangan tovarlarga nisbatan qoʻllaniladi. Bunda, bojxona nazorati shakllari tovar va transport vositalari chiqarib yuborilgandan soʻng amalga oshiriladi.

Bojxona koʻrigidan faqat “qizil yoʻlak” boʻyicha rasmiylashtirilgan tovar va transport vositalari oʻtkaziladi.

Xavf darajasi XBAT tomonidan tashqi iqtisodiy faoliyat ishtirokchilarini toifalarga ajratish, xavf profillari yoki tasodifiy tanlov asosida aniqlanadi.

6. Bojxona koʻrigi bojxona organi mansabdor shaxsining bildirgisi asosida bojxona posti boshligʻining yozma ruxsati bilan amalga oshiriladi, bundan mazkur Yoʻriqnomaning 7-bandi ikkinchi va beshinchi xatboshisi mustasno.

7. Bojxona koʻrigi quyidagi hollarda amalga oshiriladi:

bojxona koʻrigini oʻtkazish XBAT tomonidan buyurilganda;

bojxona organlariga boshqa huquqni muhofaza qilish organlari yoki davlat boshqaruvi organlaridan tushgan materiallar, shuningdek xorijiy davlatlarning bojxona va boshqa davlat organlari va xalqaro tashkilotlardan olingan maʼlumotlar mavjud boʻlganida;

bojxona organining mansabdor shaxsi tomonidan Oʻzbekiston Respublikasi Bojxona kodeksining 188-moddasida koʻrsatilgan bojxona nazoratining boshqa shakllarini qoʻllash natijasida bojxona toʻgʻrisidagi qonunchilik hujjatlari talablarini buzilganlik alomatlari mavjudligi maʼlum boʻlganida;

bojxona nazorati ostidagi tovarlarni bitta transport vositasidan boshqa transport vositasiga yoki ushbu transport vositasiga qayta yuklanayotganda.

8. XBATda bojxona koʻrigini amalga oshirish nazarda tutilmagan hollarda bojxona koʻrigi oʻtkazilsa, ushbu koʻrikni oʻtkazish uchun bojxona posti boshligʻining yozma ruxsati (asosini koʻrsatgan holda) XBATga kiritilishi hamda belgilangan yoʻlak oʻzgartirilishi lozim.

9. Bojxona organining mansabdor shaxsi bojxona koʻzdan kechiruvi va bojxona koʻrigini oʻtkazishda ishtirok etuvchi shaxslarning tovar va transport vositalariga nisbatan vakolatliligini tekshiradi.

10. Bojxona chegarasi orqali olib oʻtilayotgan barcha tovar va transport vositalari bojxona koʻzdan kechiruvidan oʻtkaziladi.

Bojxona koʻzdan kechiruvi vakolatli shaxslar ishtirokisiz oʻtkazilishi mumkin, bundan mazkur shaxslar bojxona koʻzdan kechiruvida hozir boʻlish istagini bildirgan hollar mustasno.

11. Tovarlarni bojxona koʻzdan kechiruvidan oʻtkazishda zarur hollarda koʻzdan kechirilayotgan tovar va (yoki) transport vositasining ichki tarkibiy tuzilishi, oʻziga xos fizik va tarkibiy xususiyatlari haqida aniq maʼlumotga ega boʻlish maqsadida bojxona nazorati texnik vositalaridan (bundan buyon matnda texnik vositalar deb yuritiladi) foydalanilishi mumkin.

12. Bojxona koʻrigi boshlanishidan oldin bojxona organining mansabdor shaxsi elektron yoki yozma ravishda bojxona koʻrigi oʻtkaziladigan joy va vaqt toʻgʻrisida deklarantga xabar beradi.

Agar bojxona koʻrigi uchun taqdim qilinayotgan tovarlar maxsus jihozlangan joylarda, bojxona omborlari yoki bojxona nazorati ostida boʻlsa, bojxona organining mansabdor shaxsi bojxona koʻrigini oʻtkazish vaqtini belgilaydi.

13. Bojxona organi mansabdor shaxslarining talabiga koʻra vakolatli shaxslar tovarlarning va transport vositalarining bojxona koʻrigi oʻtkazilayotganda hozir boʻlishi va ularga zarur koʻmak koʻrsatishi shart.

Bojxona organining mansabdor shaxsi bojxona koʻrigini Oʻzbekiston Respublikasi Bojxona kodeksining 195-moddasi toʻrtinchi qismida koʻrsatilgan hollarda deklarant yoki vakolatli shaxslar ishtirokisiz, ikki nafar xolis hozirligida oʻtkazishga haqli.

14. Olib kiriladigan tovarlarning bojxona koʻrigi uch oy davomida bojxona koʻrigi tartib-taomili videoyozuvi saqlanishini va Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi markaziy apparati va uning Qoraqalpogʻiston Respublikasi, viloyatlar, Toshkent shahar boʻyicha boshqarmalari va “Toshkent-AERO” ixtisoslashtirilgan bojxona kompleksi ulanishini taʼminlovchi videokuzatuv tizimi bilan jihozlangan joylardagina amalga oshiriladi.

Oʻziga xos xususiyatlarga ega, uning tashqi oʻlchamlari, fizik koʻrsatkichlari tufayli yoki kimyoviy xossalariga koʻra yoxud saqlanishiga doir alohida shartlar qoʻyilishi tufayli bojxona omboriga joylashtirilishi mumkin boʻlmagan tovarlar, shuningdek tovar yetkazib beriladigan joyda bojxona ombori mavjud boʻlmagan hollarda, bojxona koʻrigi tovarlar yetkazib berilgan joyda davlat bojxona xizmati organlari tomonidan koʻchma videoyozuv uskunalari yordamida tasvirga olingan holda amalga oshiriladi va videotasvirlar bojxona postida koʻrik oʻtkazilgan kundan boshlab uch oy davomida saqlanishi taʼminlanadi.

15. Bojxona organining mansabdor shaxsi tovarlarni bojxona koʻrigidan konteyner yoki transport vositasining maxsus yuk boʻlinmasida oʻtkazishi mumkin, agar:

XBAT tomonidan tovarlarni konteyner yoki transport vositasining maxsus yuk boʻlinmasidan toʻliq tushirish orqali bojxona koʻrigidan oʻtkazish belgilangan boʻlmasa;

bunday bojxona koʻrigi tovarlarni yoʻqolishi yoki ularning holatini oʻzgarishiga olib kelmasa.

Oʻyiluvchan, toʻkiluvchan yoki quyiluvchan holda ortiladigan va tushiriladigan tovarlar maxsus jihozlangan joylarda bojxona koʻrigidan oʻtkaziladi.

16. Bojxona koʻrigi boshlanish vaqti, bojxona organining mansabdor shaxsi tovarlar oʻramini, transport vositalari yoki konteynerlarni, yuk joylari va yuk sigʻimlarini, tovarlar joylashtirilgan yoki joylashtiriladigan boshqa joylarini koʻzdan kechirish xatti-harakatlarini boshlagan vaqtidan hisoblanadi.

17. Bojxona koʻrigi oʻtkazayotganida bojxona organining mansabdor shaxsi quyidagilarni amalga oshiradi:

a) bojxona koʻrigidan oʻtkazilayotgan barcha nomdagi tovarlar partiyasi transport vositasidan toʻliq tushirish nazarda tutilgan boʻlsa:

tovarlarni oʻlchash;

barcha yuk oʻrinlarini ochib koʻrish va sanab chiqish;

barcha yuk oʻrinlaridagi tovarlar sonini sanab chiqish;

b) yangi xavf yoki shubha va gumon paydo boʻlgan hollarda bojxona koʻrigining hajmi oshiriladi;

v) tijorat hujjatlarida tovarlar yagona oʻlchovda (dona, juft va boshqa oʻlchovda) koʻrsatilgan va ularning umumiy ogʻirligi bojxona toʻlovi summasiga taʼsir etmagan hollarda hamda XBATda boshqa holatlar koʻrsatilmagan boʻlsa, bojxona koʻrigi davomida tovarlar oʻlchanmaydi;

g) tovarlarning sonini yuk kuzatuv hujjatlarida koʻrsatilgan maʼlumotlar bilan taqqoslaydi.

18. Bojxona koʻrigi jarayoni asosli sabablarga koʻra toʻxtatilganda (tanaffus, ish vaqtini tugashi va boshqa holatlarda), bojxona organining mansabdor shaxsi tovarlarni oʻzgartirilmagan holda saqlanishini taʼminlashga qaratilgan chora-tadbirlarni amalga oshiradi, shu jumladan yuk joylariga, transport vositalariga yoki tovarlar turgan binoga identifikatsiyalash vositalarini qoʻyadi.

19. Bojxona koʻrigi natijalari boʻyicha bojxona koʻrigi dalolatnomasi rasmiylashtiriladi.

Bojxona koʻrigi davomida tovarlarning amaldagi soni, xususiyati va (yoki) tovarlar haqidagi maʼlumotlar, bojxona yuk deklaratsiyasi hamda yuk kuzatuv hujjatlarida koʻrsatilgan maʼlumotlarga mos kelmasa, ushbu maʼlumotlar bojxona koʻrigi dalolatnomasida aks ettiriladi.

20. Bojxona koʻrigi natijalariga koʻra tafovut aniqlangan taqdirda, bojxona organining mansabdor shaxsi tomonidan qonunchilik hujjatlarida belgilangan tartibda tegishli choralar qoʻllaniladi.

21. Quyidagilar Oʻzbekiston Respublikasi Bojxona kodeksining 189-moddasiga muvofiq bojxona koʻrigidan oʻtkazilmaydi:

Oʻzbekiston Respublikasi Prezidentining va Oʻzbekiston Respublikasi sobiq Prezidentining shaxsiy bagaji;

Oʻzbekiston Respublikasi Oliy Majlisi Senati aʼzolarining va Qonunchilik palatasi deputatlarining, Oʻzbekiston Respublikasi Vazirlar Mahkamasi aʼzolarining, Oʻzbekiston Respublikasi Oliy Majlisining Inson huquqlari boʻyicha vakilining (ombudsmanning) va Oʻzbekiston Respublikasi diplomatik pasportlari egalarining shaxsiy bagaji, agar mazkur shaxslar xizmat vazifalarini bajarishi bilan bogʻliq holda bojxona chegarasini kesib oʻtsalar;

qonunchilik hujjatlariga muvofiq boshqa mansabdor shaxslarning shaxsiy bagaji;

chet el harbiy kemalari, jangovar va harbiy-transport havo kemalari, shuningdek oʻzi yurib kelayotgan harbiy texnikasi.

22. Tovarni xususiyatlari haqidagi maʼlumotlar yetarli boʻlmagan va tovarni identifikatsiyalash imkoniyati mavjud boʻlmagan hollarda, bojxona organining mansabdor shaxsi bojxona ekspertizasini tayinlab, tovarlardan namuna va (yoki) sinamalar oladi.

Tovarlardan namuna va (yoki) sinamalar olish Oʻzbekiston Respublikasi Vazirlar Mahkamasining 2021-yil 17-martdagi 145-son “Oʻzbekiston Respublikasi bojxona organlari tizimida tovarlarning namuna va sinamalarini tasarruf etish toʻgʻrisidagi nizomni tasdiqlash haqida”gi qaroriga muvofiq amalga oshiriladi.

23. Qayta bojxona koʻrigini oʻtkazish uchun quyidagilardan biri asos boʻladi:

tovarlar bojxona nazorati ostida boʻlganda deklarantning asoslantirilgan yozma talabiga asosan bojxona posti boshligʻining ruxsati;

bojxona organlari, huquqni muhofaza qiluvchi organlar hamda xorijiy davlatlar yoki xalqaro tashkilotlardan olingan tezkor-qidiruv natijalari va maʼlumotlari. Bunda bojxona organi boshqarma boshligʻining ruxsati talab qilinadi.

Qayta bojxona koʻrigi mazkur Yoʻriqnomada belgilangan tartibda qisman yoki toʻliq oʻtkaziladi.

24. Qoʻshimcha bojxona koʻrigini oʻtkazish uchun quyidagilardan biri asos boʻladi:

vakolatli shaxs koʻrikdan oʻtkazish natijalari tovarning butun turkumiga tatbiq etilishi mumkin emas deb hisoblasa, tovar turkumining qolgan qismi uchun uning yozma talabiga asosan bojxona posti boshligʻining ruxsati;

bojxona koʻrigini amalga oshirish jarayonida bojxona organining mansabdor shaxsida bojxona toʻgʻrisidagi qonunchilik hujjatlari talablarining buzilishi mumkinligi haqidagi asosli shubha va gumon paydo boʻlganda bojxona organi mansabdor shaxsining bildirgisiga asosan bojxona posti boshligʻining ruxsati.

25. Bojxona organlari tovarlar chiqarib yuborilganidan keyin, basharti bojxona toʻgʻrisidagi qonunchilik hujjatlari buzilgan deb taxmin qilish uchun yetarli va tasdiqlangan asoslar mavjud boʻlsa, bojxona koʻrigini amalga oshirishga haqli.

Bunday maʼlumotlar bojxona organlari tomonidan oʻtkazilgan tezkor-qidiruv faoliyati natijasida bojxona maqsadlari uchun statistik maʼlumotlar, bojxona yuk deklaratsiyasi va boshqa hujjatlar tahlili, shaxslarning xabarnoma va arizalari, chet el davlatlari, xalqaro tashkilotlarning tegishli organlari hamda ommaviy axborot vositalaridan olinishi mumkin.

26. Bojxona koʻrigi samaradorligini oshirish hamda tovarlar haqidagi maʼlumotlarni (ularning soni, tarkibi, fizik va kimyoviy xossalari, aslliligi, maxfiy joylarning borligi) aniqlash maqsadida texnik vositalaridan foydalaniladi.

27. Bojxona organining mansabdor shaxsi texnik vositalarni qoʻllash jarayonida shaxsiy xavfsizlikka, insonlar hayoti va sogʻligʻiga, atrof muhit hamda tovar va transport vositalariga zarar yetkazmaslik choralarini koʻrishi lozim.

28. Bojxona koʻrigi amalga oshirilishida yukni tushirish va ortish hamda bojxona koʻrigini amalga oshirish bilan bogʻliq boʻlgan boshqa vazifalarni amalga oshiruvchi texnik xodimlar ishtirok etishi mumkin.

29. Oʻzbekiston Respublikasi hududiga olib kirilishi va Oʻzbekiston Respublikasi hududidan tashqariga olib chiqilishi taqiqlangan tovarlarni aniqlash maqsadida bojxona koʻrigi zarur hollarda xizmat itlaridan foydalangan holda oʻtkazilishi mumkin.

30. Deklarant bojxona deklaratsiyasi va bojxona maqsadlari uchun zarur boshqa hujjatlar berilgunga qadar tovarlarni bojxona nazorati ostida koʻzdan kechirish hamda oʻlchash, ularning namunalari va nusxalarini olish huquqiga ega.

31. Tovarlarning deklarant tomonidan koʻzdan kechiruvi, deklarantning bojxona organiga yozma yoki elektron murojaatnomasiga asosan faqat bojxona ombori hududida amalga oshiriladi.

Deklarantning yozma yoki elektron murojaatnomasi bojxona organining elektron maʼlumotlar tizimida roʻyxatga olinadi.

32. Deklarant tomonidan tovarlarning koʻzdan kechiruvi uchun murojaatnoma:

chegara bojxona postida qisqa bojxona yuk deklaratsiyasi;

tashqi iqtisodiy faoliyat bojxona postida bojxona yuk deklaratsiyasi bojxona organiga taqdim qilinguniga qadar berilishi mumkin, bundan bojxona organining qarori asosida tovarlarni oʻrganish holatlari mustasno.

Bunda bojxona organining mansabdor shaxsi:

koʻzdan kechirishni amalga oshirayotgan shaxsning tovarlarga nisbatan vakolatga egaligini aniqlashi;

transport vositalarini tashqi tarafdan koʻzdan kechirish orqali ziyon yetkazilmaganligini hamda bojxona identifikatsiyalash vositalarini buzilishi orqali tovarlarni yoʻqolish ehtimollari mavjudligini aniqlashi;

bojxona identifikatsiyalash vositalari mavjudligi hamda ularga shikast yetkazilmaganligini aniqlashi;

bojxona identifikatsiyalash vositalarining olib tashlanishi va transport vositasi yukxonasining ochilishida ishtirok etishi;

koʻzdan kechiruvi jarayoni yakuni boʻyicha maʼlumotlarni murojaatnomaga kiritishi lozim.

33. Deklarant tovarlarni oʻlchash, ulardan namuna va (yoki) sinamalar olish huquqiga ega.

34. Deklarant tomonidan tovarlardan namuna va (yoki) sinamalar olinganligi toʻgʻrisida maʼlumot bojxona yuk deklaratsiyasida koʻrsatiladi, shuningdek olinayotgan namuna va (yoki) sinamalar uchun alohida bojxona deklaratsiyasi berilmaydi.

35. Deklarant bojxona yuk deklaratsiyasi berilgunga qadar amalga oshirgan koʻzdan kechiruvi toʻgʻrisida tovarlarga ilova qilinadigan hujjatlarga belgi qoʻyadi (deklarantning F.I.O., koʻzdan kechirgan sanasi va vaqti, aniqlangan tafovut (mavjud boʻlsa)) va imzosi bilan tasdiqlaydi.

36. Bojxona koʻrigi dalolatnomasi Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining axborot tizimida, shu jumladan mobil ilovalar orqali mazkur Yoʻriqnomaning ilovasiga muvofiq shaklda elektron tarzda rasmiylashtiriladi.

Bojxona koʻrigini oʻtkazish jarayonida bojxona toʻgʻrisidagi qonunchilik hujjatlari talablari boʻzilganlik holatlari aniqlanganda bojxona koʻrigi dalolatnomasi A4 formatli oq qogʻozga chop etiladi hamda koʻrikda ishtirok etgan barcha shaxslar tomonidan imzolanadi.

37. Bojxona koʻrigi dalolatnomasining nusxasi deklarantning talabiga asosan A4 formatli oq qogʻozga chop etilib, bojxona koʻrigini amalga oshirgan bojxona organi mansabdor shaxsining imzosi hamda shaxsiy muhri bilan tasdiqlangan holda beriladi.

Bojxona koʻrigi dalolatnomasiga quyidagilar ilova qilinadi:

tovarlar oʻramida mavjud boʻlgan belgi namunalari, tamgʻalar, yorliqlar va boshqa tovarlarni identifikatsiyalash vositalari (mavjud boʻlsa);

bojxona koʻrigida qatnashgan yoki ishtirok etgan mutaxassislarni vakolatlarini tasdiqlovchi hujjatlarning nusxasi (ular koʻrikda ishtirok etishga jalb qilinsa);

bojxona organining mansabdor shaxsidan tashqari bojxona koʻrigida qatnashgan shaxslarning shaxsini tasdiqlovchi hujjatlari nusxalari.

Bojxona koʻrigi dalolatnomasiga ilova qilingan maʼlumotlar bojxona koʻrigi dalolatnomasining ajralmas qismi hisoblanadi.

38. Bojxona koʻrigi dalolatnomasi uch yil mobaynida saqlanadi. Bojxona koʻrigi dalolatnomasini saqlash muddati rasmiylashtirilgan yildan keyingi yildan hisoblanadi.

39. Tovarlarni koʻrikdan oʻtkazayotgan shaxslar uchun maʼlum boʻlgan maʼlumotlar tijorat siri hisoblanib, ushbu maʼlumotlar faqatgina belgilangan (aloqador) shaxslargagina oshkor etilishi lozim.

40. Ushbu Yoʻriqnoma talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

41. Mazkur Yoʻriqnoma Oʻzbekiston Respublikasi Savdo-sanoat palatasi bilan kelishilgan.