Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi Qonuniga va Oʻzbekiston Respublikasi Prezidentining 2019-yil 5-fevraldagi PQ-4160-son “Jahon banki va Xalqaro moliya korporatsiyasining “Biznes yuritish” yillik hisobotida Oʻzbekiston Respublikasining reytingini yaxshilashga doir qoʻshimcha chora-tadbirlar toʻgʻrisida”gi qaroriga muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasi Markaziy banki Boshqaruvining 2007-yil 8-sentabrdagi 23/1-son qarori (roʻyxat raqami 1728, 2007-yil 12-oktabr) (Oʻzbekiston Respublikasi qonun hujjatlari toʻplami, 2007-y., 41-42-son, 426-modda) bilan tasdiqlangan Mikrokredit tashkilotlarida buxgalteriya hisobini yuritish toʻgʻrisidagi yoʻriqnomaga ilovaga muvofiq oʻzgartirishlar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. 16-bandning ikkinchi xatboshisi va 88-banddagi “muhri” degan soʻz “shtampi” degan soʻz bilan almashtirilsin.

2. 170-banddagi “memorial hujjatlar bilan birga kassa hisobvaragʻi bilan oʻtkazilgan korrespondensiyalashgan va orderlarni” degan soʻzlar “kassa hisobvaragʻi bilan korrespondensiyalashgan va kassa orderlarini” degan soʻzlar bilan almashtirilsin.

3. 173-band quyidagi tahrirda bayon etilsin:

“173. Quyidagi hujjatlar kassada, omborda yoki yonmaydigan shkaflarda saqlanishi shart:

yillik hisobotning tegishli imzolar bilan rasmiylashtirilgan nusxasi hamda oylik (chorak) balans uning barcha ilovalari bilan;

oxirgi oʻn ikki oy uchun kassa hujjatlari;

yordamchi kitoblar.”.

4. 174-banddan “oʻtgan oylar uchun memorial hujjatlar va” degan soʻzlar chiqarib tashlansin.

5. 2-ilovaning 3-bandidagi “(muhr mavjud boʻlgan taqdirda)” degan soʻzlar “(muhr iziga boʻlgan talab tadbirkorlik subyektlariga nisbatan tatbiq etilmaydi)” degan soʻzlar bilan almashtirilsin.

6. 4 — 12 va 19-ilovalardan “M.Oʻ.” degan qisqartma chiqarib tashlansin.

7. 15-ilova oʻz kuchini yoʻqotgan deb topilsin.

8. 16-ilovadan “Muhr oʻrni (muhr mavjud boʻlgan taqdirda)” degan soʻzlar chiqarib tashlansin.