Oʻzbekiston Respublikasi Soliq kodeksi hamda Oʻzbekiston Respublikasi Prezidentining 2017-yil 18-iyuldagi PF-5116-son “Soliq maʼmuriyatchiligini tubdan takomillashtirish, soliqlar va boshqa majburiy toʻlovlarning yigʻiluvchanligini oshirish chora-tadbirlari toʻgʻrisida”gi Farmoniga muvofiq Oʻzbekiston Respublikasi Davlat soliq qoʻmitasi qaror qiladi:

1. Yuridik shaxslarni yirik soliq toʻlovchilar toifasiga kiritishning mezonlarini belgilash toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Soliq kodeksi va Oʻzbekiston Respublikasi Prezidentining 2017-yil 18-iyuldagi PF-5116-son “Soliq maʼmuriyatchiligini tubdan takomillashtirish, soliqlar va boshqa majburiy toʻlovlarning yigʻiluvchanligini oshirish chora-tadbirlari toʻgʻrisida”gi Farmoniga asosan yuridik shaxslarni yirik soliq toʻlovchilar toifasiga kiritish mezonlarini belgilaydi.

1. Mazkur Nizom soliq maʼmuriyatchiligini amalga oshirish maqsadida ushbu Nizomning 4-bandida belgilangan mezonlar asosida aniqlangan yirik soliq toʻlovchi yuridik shaxslar toifasiga tatbiq etiladi.

2. Yirik soliq toʻlovchilar boʻyicha mezonlar Oʻzbekiston Respublikasi Soliq kodeksining 22²-moddasiga asosan soliq toʻlovchilarga soliq solish tartibini tanlash yoki oʻzgartirish huquqini bermaydi.

3. Yirik soliq toʻlovchilar boʻyicha soliq maʼmuriyatchiligi Oʻzbekiston Respublikasi Soliq kodeksida belgilangan tartibda amalga oshiriladi.

4. Yuridik shaxslarni yirik soliq toʻlovchilar toifasiga kiritish uchun oldingi soliq davri yakuni boʻyicha quyidagi mezonlarga bir vaqtning oʻzida mos keladigan yuridik shaxslar tanlab olinadi:

soliq davri yakuni bilan hisoblangan soliqlar va boshqa majburiy toʻlovlar summasi eng kam ish haqining 200 ming baravaridan kam boʻlmagan;

tovar aylanmasi hajmi eng kam ish haqining 300 ming baravaridan kam boʻlmagan;

jami aktivlari qiymati eng kam ish haqining 100 ming baravaridan kam boʻlmagan.

5. Eng kam ish haqi miqdori yirik soliq toʻlovchilar toifasini aniqlash uchun tanlangan soliq davri yakunida belgilangan eng kam ish haqi miqdoridan kelib chiqqan holda hisobga olinadi.

6. Yirik soliq toʻlovchilar toifasini belgilashda, mazkur Nizomning 4-bandida koʻrsatib oʻtilgan mezonlar, yuridik shaxslarning oʻtgan yildagi soliq davri yakuni boʻyicha soliq organlariga taqdim etgan soliq hamda moliyaviy hisobotlaridagi koʻrsatkichlariga asosan aniqlanadi.

7. Yirik soliq toʻlovchilar toifasiga kiritilgan yuridik shaxslar soliq davri yakuni bilan mazkur Nizomning 4-bandida koʻrsatilgan mezonlarga javob bermasa, ushbu yuridik shaxslar navbatdagi bir yil mobaynida yirik soliq toʻlovchilar toifasida qoladi.

8. Mazkur Nizom tatbiq etiladigan yirik soliq toʻlovchilar roʻyxati har yili keyingi soliq davri boshlangunga qadar bir oydan kechikmay Oʻzbekiston Respublikasi Davlat soliq qoʻmitasi tomonidan tasdiqlanadi.

Yirik soliq toʻlovchilar roʻyxatiga kiritilgan yuridik shaxslar Qoraqalpogʻiston Respublikasi, viloyatlar va Toshkent shahar davlat soliq boshqarmalari tomonidan tegishli qaror qabul qilingan kundan eʼtiboran besh kun ichida bu haqda hisobga qoʻyilgan joy boʻyicha yozma ravishda, shu jumladan soliq toʻlovchining shaxsiy kabineti orqali xabardor qilinadi.

9. Yirik soliq toʻlovchilar roʻyxatidan chiqarilgan yuridik shaxslar ushbu toifadan chiqarilganligi toʻgʻrisida Oʻzbekiston Respublikasi Davlat soliq qoʻmitasi tomonidan tegishli qaror qabul qilingan kundan eʼtiboran besh kun ichida yozma ravishda, shu jumladan soliq toʻlovchining shaxsiy kabineti orqali xabardor qilinadi.

10. Yirik soliq toʻlovchilar roʻyxatiga kiritilgan yuridik shaxslar ular yirik soliq toʻlovchilar roʻyxatidan chiqarilganligi toʻgʻrisidagi xabarnomani olmagunga qadar yirik soliq toʻlovchilar toifasida qoladi.

11. Mazkur Nizom talablari buzilishida aybdor boʻlgan shaxslar qonun hujjatlarida belgilangan tartibda javobgar boʻladi.

12. Mazkur Nizom Oʻzbekiston Respublikasi Moliya vazirligi, Iqtisodiyot vazirligi va Savdo-sanoat palatasi bilan kelishilgan.