Oʻzbekiston Respublikasi Vazirlar Mahkamasining “Kapital qurilishda iqtisodiy islohotlarni chuqurlashtirishga doir qoʻshimcha chora-tadbirlar toʻgʻrisida” 2000-yil 5-avgustdagi 305-son qarorining 7-bandiga muvofiq Vazirlar Mahkamasi qaror qiladi:

Oʻzbekiston Respublikasi Hukumatining quyidagi qarorlariga oʻzgartirish va qoʻshimchalar kiritilsin:

1. Oʻzbekiston Respublikasi Vazirlar Mahkamasining “Respublika yoʻl jamgʻarmasini tashkil etish toʻgʻrisida” 1993-yil 5-iyuldagi 334-son qarori (Oʻzbekiston Respublikasi QT, 1993-y., 7-son, 26-modda; 1996-y., 12-son, 39-modda; 2000-y., 4-son, 18-modda):

a) 3-bandning “a” kichik bandi 12-xatboshidan soʻng quyidagi xatboshi bilan toʻldirilsin:

“qurilish, qurilish-montaj, tuzatish-qurilish, ishga tushirish-sozlash, loyiha-qidiruv va ilmiy-tadqiqot tashkilotlari tomonidan oʻz kuchlari bilan bajarilgan ishlar haqiqiy hajmidan mablagʻlar ajratish — 1,5 foiz miqdorida”;

b) 1-ilovaning 6, 7 va 8-bandlarida oxirgi xatboshi oldidan quyidagi mazmundagi xatboshi kiritilsin:

“qurilish, qurilish-montaj, tuzatish-qurilish, ishga tushirish-sozlash, loyiha-qidiruv va ilmiy-tadqiqot tashkilotlari tomonidan oʻz kuchlari bilan bajarilgan ishlar haqiqiy hajmidan mablagʻlar ajratish — 1,5 foiz miqdorida”.

2. Vazirlar Mahkamasining 1998-yil 15-apreldagi 159-son qarori (Oʻzbekiston Respublikasi QT, 1998-y., 4-son, 15-modda; 1999-y., 11-son, 64-modda; 2000-y., 8-son, 45-modda) bilan tasdiqlangan Kichik korxonalar uchun soliq solishning soddalashtirilgan tizimini qoʻllash tartibi III qismining 1-bandi quyidagi mazmundagi xatboshi bilan toʻldirilsin:

“Bunda qurilish, qurilish-montaj, tuzatish-qurilish, ishga tushirish-sozlash, loyiha-qidiruv va ilmiy-tadqiqot tashkilotlari uchun oʻz kuchlari bilan bajarilgan ishlar hajmidan kelib chiqib hisoblab chiqarilgan yalpi tushum soliq solish obyekti hisoblanadi”.