O‘zbekiston Respublikasi Prezidentining “O‘zbekiston Respublikasi Maktabgacha ta’lim vazirligi faoliyatini tashkil etish to‘g‘risida” 2017-yil 30-sentabrdagi PQ-3305-son qarori ijrosini ta’minlash, shuningdek, maktabgacha ta’lim tizimi xodimlari mehnatiga haq to‘lash tartibini takomillashtirish maqsadida Vazirlar Mahkamasi qaror qiladi:

1. Davlat maktabgacha ta’lim tizimi xodimlari mehnatiga haq to‘lash va ularni moddiy rag‘batlantirish tartibi to‘g‘risida nizom 1-ilovaga muvofiq tasdiqlansin.

2. O‘zbekiston Respublikasi Hukumatining 2-ilovaga muvofiq ayrim qarorlariga o‘zgartirish va qo‘shimchalar kiritilsin.

3. O‘zbekiston Respublikasi Maktabgacha ta’lim vazirligi manfaatdor vazirliklar va idoralar bilan birgalikda bir oy muddatda o‘zlari qabul qilgan normativ-huquqiy hujjatlarni ushbu qarorga muvofiqlashtirsin.

4. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari Q.V. Akmalov va O‘zbekiston Respublikasi Maktabgacha ta’lim vaziri A.V. Shin zimmasiga yuklansin.

1. Ushbu Nizom Qoraqalpog‘iston Respublikasi Maktabgacha ta’lim vazirligi, Toshkent shahar Maktabgacha ta’lim bosh boshqarmasi, viloyatlar maktabgacha ta’lim boshqarmalari metodistlari va inspektor-metodistlari, tuman (shahar) maktabgacha ta’lim bo‘limlarining, davlat maktabgacha ta’lim tashkilotlarining direktor va pedagog xodimlari (keyingi o‘rinlarda davlat maktabgacha ta’lim tizimi xodimlari deb ataladi) mehnatiga haq to‘lash va ularni moddiy rag‘batlantirish tartibi hamda shartlarini belgilaydi.

Qoraqalpog‘iston Respublikasi Maktabgacha ta’lim vazirligi, Toshkent shahar Maktabgacha ta’lim bosh boshqarmasi, viloyatlar maktabgacha ta’lim boshqarmasining boshqaruv xodimlari mehnatiga haq to‘lash tartibi va shartlari Vazirlar Mahkamasining “Davlat hokimiyati va boshqaruvi organlari, sud organlari va notarial idoralar xodimlari mehnatiga haq to‘lashning tarif setkasini joriy etish to‘g‘risida” 1996-yil 12-apreldagi 147-son qarori asosida belgilanadi.

2. Davlat maktabgacha ta’lim tizimi xodimlari mehnatiga haq to‘lash O‘zbekiston Respublikasining Mehnat kodeksi, ushbu Nizom va boshqa qonunchilik hujjatlariga muvofiq amalga oshiriladi va quyidagilarni o‘z ichiga oladi:

lavozim maoshlari (tarif stavkalari);

lavozim maoshlariga qo‘shimchalar va ustamalar.

3. Davlat maktabgacha ta’lim tizimi xodimlarining lavozim maoshlari:

davlat maktabgacha ta’lim tizimi xodimlarining lavozimi va malaka toifasi uchun belgilangan bazaviy tarif stavkalari;

qonunchilikda belgilangan lavozim maoshlariga qo‘shimchalar va ustamalar asosida shakllantiriladi.

4. Davlat maktabgacha ta’lim tizimi xodimlari mehnatiga haq to‘lashning bazaviy tarif stavkalari miqdorlari qonunchilik hujjatlariga muvofiq belgilanadi.

Davlat maktabgacha ta’lim tashkilotlari direktor xodimlari mehnatiga haq to‘lashning bazaviy tarif stavkalari muassasalar guruhidan kelib chiqib belgilanadi. Bunda 9 ta va undan ortiq guruhlari mavjud davlat maktabgacha ta’lim tashkilotlari I guruh, 8 tagacha guruhlari mavjud davlat maktabgacha ta’lim tashkilotlari II guruh hisoblanadi.

Davlat maktabgacha ta’lim tashkilotlari pedagog xodimlari mehnatiga haq to‘lashning bazaviy tarif stavkalari xodimning lavozimiga, malaka toifasiga va davlat maktabgacha ta’lim tashkilotining turiga bog‘liq ravishda tabaqalashtiriladi.

5. Davlat maktabgacha ta’lim tashkilotlarining tibbiyot xodimlariga ish haqi, ustama va qo‘shimcha to‘lovlar Vazirlar Mahkamasining “Tibbiyot xodimlari mehnatiga haq to‘lashning takomillashtirilgan tizimini tasdiqlash to‘g‘risida” 2005-yil 21-dekabrdagi 276-son qaroriga muvofiq to‘lanadi.

6. Davlat maktabgacha ta’lim tizimi xodimlari uchun quyidagi malaka toifalari belgilanadi:

o‘rta maxsus, kasb-hunar (pedagogik yoki bajarilayotgan lavozim vazifalariga muvofiq bo‘lgan) ma’lumotga ega bo‘lgan mutaxassis;

bakalavr darajasiga yoki oliy ma’lumot darajasi bo‘yicha akademik darajalar joriy etilgunga qadar olingan oliy ma’lumotga ega bo‘lgan mutaxassis;

bakalavr, magistr darajasiga yoki oliy ma’lumot darajasi bo‘yicha akademik darajalar joriy etilgunga qadar olingan oliy ma’lumotga ega bo‘lgan ikkinchi toifali mutaxassis;

bakalavr, magistr darajasiga yoki oliy ma’lumot darajasi bo‘yicha akademik darajalar joriy etilgunga qadar olingan oliy ma’lumotga ega bo‘lgan birinchi toifali mutaxassis;

bakalavr, magistr darajasiga yoki oliy ma’lumot darajasi bo‘yicha akademik darajalar joriy etilgunga qadar olingan oliy ma’lumotga ega bo‘lgan oliy toifali mutaxassis.

7. Davlat maktabgacha ta’lim tashkiloti xodimlariga malaka toifalari Vazirlar Mahkamasining 2021-yil 17-sentabrdagi 572-son qarori bilan tasdiqlangan Maktabgacha, umumiy o‘rta, o‘rta maxsus, kasbiy va maktabdan tashqari ta’lim tashkilotlari pedagog kadrlarini attestatsiyadan o‘tkazish tartibi to‘g‘risidagi nizomga muvofiq beriladi.

7¹. Davlat maktabgacha ta’lim tashkilotlarida pedagogik faoliyat yuritayotgan, oliy yoki o‘rta maxsus, kasb-hunar ma’lumotga ega bo‘lmagan xodimlar uchun, ularning pedagogik tajribasini hisobga olgan holda, o‘rta maxsus, kasb-hunar ma’lumotga ega bo‘lgan tegishli lavozimdagi xodimning bazaviy tarif stavkasi singari bazaviy tarif stavkasi belgilanadi.

Oliy yoki o‘rta maxsus, kasb-hunar ma’lumotga ega bo‘lmagan shaxslarni davlat maktabgacha ta’lim tashkilotlariga pedagog sifatida tegishli lavozimlarga ishga qabul qilishga yo‘l qo‘yilmaydi.

7². Oliy ta’lim muassasalarining pedagogika yo‘nalishlarida kunduzgi, kechki, sirtqi bo‘limlarning 3-4-kurslarida o‘qiyotgan shaxslar pedagogik faoliyatni amalga oshirishi mumkin va ularga o‘rta maxsus, kasb-hunar ma’lumotga ega bo‘lgan tegishli lavozimdagi xodimning bazaviy tarif stavkasi singari bazaviy tarif stavkasi belgilanadi.

7³. Davlat maktabgacha ta’lim tashkiloti tarbiyachisi hamda tibbiyot hamshirasi lavozimlarida faoliyat yuritayotgan xodimlar vaqtincha ishda bo‘lmagan davrda ularning vazifasini bajarish uchun ichki buyruqlarni o‘rindoshlik asosida rasmiylashtiradi hamda bajarilgan ish uchun 100 foiz miqdorda (boshqa lavozimlar uchun 50 foiz miqdorda) ish haqi to‘lanadi.

Bunda o‘rindoshlik asosida faoliyat yuritgan xodimning jami ish yuklamasi 1,5 stavkadan ortiq bo‘lishiga yo‘l qo‘yilmaydi.

8. Davlat maktabgacha ta’lim tashkilotlarining o‘z xizmat vazifalarini vijdonan bajargan, tashabbuskor va yuqori malakali xodimlarini moddiy rag‘batlantirish davlat maktabgacha ta’lim tashkilotida tashkil etiladigan Budjet muassasalari va tashkilotlari xodimlarini moddiy rag‘batlantirish maxsus jamg‘armasi mablag‘lari hisobidan amalga oshiriladi.

9. Davlat ixtisoslashtirilgan maktabgacha ta’lim tashkilotlarida ishlayotgan quyidagilarning lavozim maoshlari va bazaviy tarif stavkalariga 100 foiz miqdorida qo‘shimcha haq to‘lanadi:

davlat ko‘p tarmoqli ixtisoslashtirilgan maktabgacha ta’lim tashkilotlari rahbarlari, pedagog va tibbiyot xodimlari hamda tarbiyachi yordamchilari;

qo‘shma tipdagi davlat maktabgacha ta’lim tashkilotlaridagi rivojlanishida jismoniy yoki psixik nuqsonlar bo‘lgan bolalarga mo‘ljallangan guruhlarda ishlaydigan pedagog va tibbiyot xodimlari va tarbiyachi yordamchilari;

reabilitatsiya markaziga ega bo‘lgan davlat ko‘p tarmoqli ixtisoslashtirilgan maktabgacha ta’lim tashkilotlari rahbarlari, pedagog va tibbiyot xodimlari, hamda tarbiyachi yordamchilari.

10. Rayon koeffitsiyentlari va ustamalar joriy qilingan joylardagi davlat maktabgacha ta’lim tashkilotida ishlovchi xodimlarga qo‘shimcha to‘lovlar, shuningdek, faxriy unvon, ilmiy darajalar uchun ustamalar to‘lash shartlari qonunchilikda belgilanadi.

11. Davlat maktabgacha ta’lim tashkilotlari pedagog xodimlari mehnatini normalashtirish davlat maktabgacha ta’lim tashkilotlarining yillik, choraklik va oylik ish rejalariga asoslanadi.

Yillik ish rejasi tarbiyaviy va tashkiliy tusdagi asosiy tadbirlarni bajarish uchun zarur bo‘lgan ish vaqti sarfi ko‘rsatilgan holda ularning ro‘yxatini o‘z ichiga oladi.

12. Davlat maktabgacha ta’lim tashkilotida pedagog xodimlar uchun haftalik ish yuklamasining quyidagi miqdorlari belgilanadi:

til bo‘yicha o‘qituvchi — 18 soat;

o‘qituvchi-logoped, o‘qituvchi-defektolog — 24 soat;

ko‘p tarmoqli ixtisoslashtirilgan maktabgacha ta’lim tashkilotlarining tarbiyachisi, tarbiyachi-metodisti — 25 soat;

tarbiyachi, tarbiyachi-metodist — 36 soat;

ko‘p tarmoqli ixtisoslashtirilgan maktabgacha ta’lim tashkilotlarining yordamchi tarbiyachisi — 36 soat;

jismoniy tarbiya yo‘riqchisi — 30 soat;

musiqa xodimi, xoreograf — 24 soat.

13. Yillik ish rejasi har bir pedagog xodim uchun yakka tartibda belgilanadi va kengaytirilgan pedagogik kengashda muhokama qilingandan keyin davlat maktabgacha ta’lim tashkiloti direktori tomonidan tasdiqlanadi.

Ish rejalarining bajarilishini nazorat qilish davlat maktabgacha ta’lim tashkiloti direktori tomonidan amalga oshiriladi.

14. Davlat maktabgacha ta’lim tashkilotida pedagog xodimlarning haftalik ish yuklamasi ishning ushbu turi bo‘yicha ish vaqti normal davom etishining 1,5 baravaridan ortiq bo‘lmasligi lozim.

15. Davlat maktabgacha ta’lim tashkilotining har bir xodimi ish rejasi bajarilishi to‘g‘risida pedagogik kengashda yarim yilda kamida bir marta hisobot beradi.

16. Mazkur Nizom talablari buzilishida aybdor bo‘lgan shaxslar qonunchilikda belgilangan tartibda javob beradilar.

1. Vazirlar Mahkamasining “Xalq ta’limi xodimlari mehnatiga haq to‘lash shartlarini tartibga solish to‘g‘risida” 1994-yil 29-sentabrdagi 490-son qaroriga 2-ilovada:

a) I bandda:

“g” kichik banddan “maktabgacha muassasalari” va “maktabgacha muassasalarda” so‘zlari chiqarib tashlansin;

izohlarning ikkinchi xatboshidan birinchi jumla chiqarib tashlansin;

b) III bandga izohlarda:

1-kichik bandning ikkinchi xatboshidan “maktabgacha tarbiya muassasalari” so‘zlari chiqarib tashlansin;

2-kichik band quyidagi tahrirda bayon qilinsin:

“2. Aqliy rivojlanishda nuqsoni bo‘lgan bolalar uchun mo‘ljallangan ta’lim-tarbiya muassasalariga: aqlan zaif, ko‘r va aqlan zaif, ruhiy rivojlanishda orqada qolgan, tafakkurida nuqsoni bo‘lganlar uchun mo‘ljallangan maktablar, maktab-internatlar, bolalar uylari, (sinflar, guruhlar); O‘zbekiston Respublikasi Sog‘liqni saqlash vazirligi tizimidagi shunday bolalar muassasalari kiradi”;

3-kichik banddan “maktabgacha tarbiya bolalar muassasalari” so‘zlari chiqarib tashlansin.

2. Vazirlar Mahkamasining “Xalq ta’limi xodimlari mehnatiga haq to‘lashning takomillashtirilgan tizimini tasdiqlash to‘g‘risida” 2005-yil 21-dekabrdagi 275-son qarorida (O‘zbekiston Respublikasi QT, 2005-y., 12-son, 63-modda):

a) 1-ilovada:

7-pozitsiya chiqarib tashlansin;

8-pozitsiyaning “oliy malaka toifali” ustunidan izoh belgisi chiqarib tashlansin;

izohning ikkinchi xatboshi chiqarib tashlansin;

b) 2-ilovadan 1.5-pozitsiya chiqarib tashlansin;

v) 3-ilovaning 3-bandi sakkizinchi xatboshi quyidagi tahrirda bayon qilinsin:

“Xalq ta’limi muassasalari rahbarlarining bazaviy tarif stavkalari quyidagi jadvalga binoan o‘quvchilar (tarbiyalanuvchilar) kontingentiga qarab muassasalar guruhidan kelib chiqib belgilanadi:

3. Vazirlar Mahkamasining 2016-yil 7-apreldagi 107-son qarori (O‘zbekiston Respublikasi QT, 2016-y., 4-son, 25-modda) bilan tasdiqlangan Maktabgacha, umumiy o‘rta, o‘rta maxsus, kasb-hunar va maktabdan tashqari davlat ta’lim muassasalari pedagog kadrlarini attestatsiyadan o‘tkazish tartibi to‘g‘risidagi nizomda:

a) 2-band quyidagi tahrirda bayon qilinsin:

“2. Pedagog kadrlarning malaka tavsiflariga muvofiqligi O‘zbekiston Respublikasi Maktabgacha ta’lim vazirligi (keyingi o‘rinlarda Maktabgacha ta’lim vazirligi deb ataladi), O‘zbekiston Respublikasi Xalq ta’limi vazirligi (keyingi o‘rinlarda — Xalq ta’limi vazirligi), O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi (keyingi o‘rinlarda — O‘rta maxsus, kasb-hunar ta’limi markazi) hamda tasarrufida ta’lim muassasalari bo‘lgan vazirliklar va idoralar tomonidan belgilangan tartibda tasdiqlangan xodimlarning asosiy lavozimlari malaka tavsiflaridagi (keyingi o‘rinlarda — malaka tavsiflari) talablar asosida o‘rganiladi”;

b) 11-band quyidagi tahrirda bayon qilinsin:

“11. O‘zbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasi (keyingi o‘rinlarda — Davlat inspeksiyasi) Maktabgacha ta’lim vazirligi, Xalq ta’limi vazirligi, O‘rta maxsus, kasb-hunar ta’limi markazi hamda tasarrufida ta’lim muassasalari bo‘lgan vazirliklar va idoralar bilan birgalikda har yili 20-yanvarga qadar attestatsiyadan o‘tish muddati kelgan pedagog kadrlarni attestatsiyadan o‘tkazish jadvalini tasdiqlash uchun Vazirlar Mahkamasining Ta’lim, sog‘liqni saqlash, ekologiya, atrof muhitni muhofaza qilish, jismoniy tarbiya va sport masalalari kompleksiga taqdim etadi.

Attestatsiyadan o‘tish muddati kelgan pedagog kadrlarni attestatsiyadan o‘tkazish jadvali taqdim etilgan kundan e’tiboran bir oy ichida Vazirlar Mahkamasining Ta’lim, sog‘liqni saqlash, ekologiya, atrof muhitni muhofaza qilish, jismoniy tarbiya va sport masalalari kompleksi rahbari tomonidan tasdiqlanadi”;

v) 15-bandning uchinchi xatboshidagi “Vazirlar Mahkamasining Yoshlar siyosati, ta’lim, madaniyat va sport masalalari kompleksiga” so‘zlari “Vazirlar Mahkamasining Ta’lim, sog‘liqni saqlash, ekologiya, atrof muhitni muhofaza qilish, jismoniy tarbiya va sport masalalari kompleksiga” so‘zlari bilan almashtirilsin;

g) 17-bandning ikkinchi xatboshidagi “xalq ta’limi tizimi” so‘zlari “maktabgacha ta’lim va xalq ta’limi tizimlari” so‘zlari bilan almashtirilsin;

d) 20-band quyidagi tahrirda bayon qilinsin:

“20. Pedagog kadrlar attestatsiyasi ularning malaka tavsiflarida belgilangan vazifalarga muvofiq faoliyat ko‘rsatishini tasdiqlovchi maktabgacha ta’lim boshqarmalari va xalq ta’limi boshqarmalari attestatsiya komissiyalari, tuman (shahar), muassasalar va o‘rta maxsus, kasb-hunar ta’limi hududiy boshqarmalari attestatsiya komissiyalari (keyingi o‘rinlarda — attestatsiya komissiyalari) tomonidan amalga oshiriladi”;

e) quyidagi mazmundagi 20¹ — 20⁶-bandlar qo‘shilsin:

“20¹. Qoraqalpog‘iston Respublikasi Maktabgacha ta’lim vazirligida, viloyatlar maktabgacha ta’lim boshqarmalarida, Toshkent shahar maktabgacha ta’lim bosh boshqarmasida (keyingi o‘rinlarda — maktabgacha ta’lim boshqarmalari) oliy malaka toifasiga talabgor pedagog kadrlarni attestatsiyadan o‘tkazish uchun Maktabgacha ta’lim boshqarmalari attestatsiya komissiyalari tuziladi.

Maktabgacha ta’lim boshqarmalari attestatsiya komissiyalari tarkibi Maktabgacha ta’lim vazirligi va Davlat inspeksiyasining qo‘shma qarori bilan tasdiqlanadi.

Maktabgacha ta’lim boshqarmalari attestatsiya komissiyalari tarkibi maktabgacha ta’lim boshqarmalari boshlig‘i (komissiya raisi), Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklarining ta’lim sohasiga mas’ul xodimi, O‘zbekiston Kasaba uyushmalari Federatsiyasi (keyingi o‘rinlarda — kasaba uyushmasi) vakili, ikki nafar attestatsiyadan o‘tgan, oliy toifali pedagog kadrlardan (bir nafari komissiya kotibi) iborat bo‘ladi.

20². Quyidagilar maktabgacha ta’lim boshqarmalari attestatsiya komissiyalarining vazifalari hisoblanadi:

oliy malaka toifasiga talabgor pedagog kadrlarni attestatsiyadan o‘tkazish;

tuman (shahar) va muassasalar attestatsiya komissiyalarining birinchi va ikkinchi malaka toifasiga talabgor pedagog kadrlar attestatsiyasi yakunlari bo‘yicha hisobotlarini tahlil qilish;

oliy, birinchi va ikkinchi malaka toifali pedagog kadrlarga sertifikatlar olish uchun Davlat inspeksiyasiga buyurtmanoma berish hamda attestatsiya o‘tkazilgandan so‘ng bir oy muddatda pedagog kadrlarni sertifikatlar bilan ta’minlash.

20³. Tuman (shahar) maktabgacha ta’lim bo‘limlarida birinchi malaka toifasiga talabgor pedagog kadrlar attestatsiyasini o‘tkazish uchun tuman (shahar) attestatsiya komissiyalari tuziladi.

Tuman (shahar) attestatsiya komissiyalari tarkibi maktabgacha ta’lim boshqarmalarining buyrug‘i bilan tasdiqlanadi.

Tuman (shahar) attestatsiya komissiyalari tarkibi tuman (shahar) maktabgacha ta’lim bo‘limi mudiri (komissiya raisi), tuman (shahar) hokimligining ta’lim sohasiga mas’ul xodimi, kasaba uyushmasi vakili, ikki nafar attestatsiyadan o‘tgan, oliy toifali pedagog kadrlardan (bir nafari komissiya kotibi) iborat bo‘ladi.

20⁴. Quyidagilar tuman (shahar) attestatsiya komissiyalarining vazifalari hisoblanadi:

birinchi malaka toifasiga talabgor pedagog kadrlarni attestatsiyadan o‘tkazish;

muassasalar attestatsiya komissiyalarining ikkinchi malaka toifasiga talabgor pedagog kadrlar attestatsiyasi yakunlari bo‘yicha hisobotlarini tahlil qilish;

birinchi va ikkinchi malaka toifali pedagog kadrlarga sertifikatlar olish uchun maktabgacha ta’lim boshqarmalari komissiyalariga buyurtmanoma berish.

20⁵. Ta’lim muassasalarida ikkinchi malaka toifasiga talabgor pedagog kadrlar attestatsiyasini o‘tkazish uchun muassasalar attestatsiya komissiyalari tuziladi.

Muassasalar attestatsiya komissiyalari tarkibi tuman (shahar) maktabgacha ta’lim bo‘limlarining buyruqlari bilan tasdiqlanadi.

Muassasalar attestatsiya komissiyalari tarkibi ta’lim muassasalari rahbari (komissiya raisi), tuman (shahar) maktabgacha ta’lim bo‘limi xodimi (komissiya raisining o‘rinbosari), kasaba uyushmasi va ota-onalar qo‘mitasi vakillari, uch nafar attestatsiyadan o‘tgan, birinchi yoki oliy toifali pedagog kadrlardan (bir nafari komissiya kotibi) iborat bo‘ladi.

20⁶. Quyidagilar muassasalar attestatsiya komissiyalarining vazifalari hisoblanadi:

ikkinchi malaka toifasiga talabgor pedagog kadrlarni attestatsiyadan o‘tkazish;

ikkinchi malaka toifali pedagog kadrlarga sertifikatlar olish uchun tuman (shahar) attestatsiya komissiyasiga buyurtmanoma berish”;

j) 21-bandning uchinchi xatboshidagi “O‘zbekiston Kasaba uyushmalari Federatsiyasi (keyingi o‘rinlarda kasaba uyushmasi deb ataladi)” so‘zlari “kasaba uyushmasi” so‘zlari bilan almashtirilsin;

z) 36-bandga “O‘rta maxsus, kasb-hunar ta’limi markazi” so‘zlaridan keyin “Maktabgacha ta’lim vazirligi” so‘zlari qo‘shilsin;

i) 37-bandga “Davlat inspeksiyasi tomonidan” so‘zlaridan keyin “Maktabgacha ta’lim vazirligi” so‘zlari qo‘shilsin;

k) 51-banddagi “xalq ta’limi boshqarmalari va hududiy o‘rta maxsus, kasb-hunar ta’limi boshqarmalari boshliqlari” so‘zlari “maktabgacha ta’lim boshqarmalari, xalq ta’limi boshqarmalari va hududiy o‘rta maxsus, kasb-hunar ta’limi boshqarmalari boshliqlari, tuman (shahar) maktabgacha ta’lim bo‘limi mudirlari” so‘zlari bilan almashtirilsin;

l) 56-bandga “Davlat inspeksiyasi” so‘zlaridan keyin “Maktabgacha ta’lim vazirligi” so‘zlari qo‘shilsin;

m) 59-bandning birinchi xatboshiga “tegishliligiga ko‘ra” so‘zlaridan keyin “Maktabgacha ta’lim vazirligi” so‘zlari qo‘shilsin;

n) Nizomga 1-ilovada:

“Tadbirlar nomi” ustunidagi “Yoshlar siyosati, ta’lim, madaniyat va sport masalalari” so‘zlari “Ta’lim, sog‘liqni saqlash, ekologiya, atrof muhitni muhofaza qilish, jismoniy tarbiya va sport masalalari” so‘zlari bilan almashtirilsin;

“Subyektlar” ustunidagi “Yoshlar siyosati, ta’lim, madaniyat va sport masalalari” so‘zlari “Ta’lim, sog‘liqni saqlash, ekologiya, atrof muhitni muhofaza qilish, jismoniy tarbiya va sport masalalari” so‘zlari bilan almashtirilsin.