toggle_night_mode
Hujjat kuchini yo‘qotgan 07.12.2019
Oʻzbekiston Respublikasi Vazirlar Mahkamasining
qarori
Vazirlar Mahkamasining “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Maxsus avariya-tiklash boshqarmasi faoliyatini tashkil etish toʻgʻrisida” 1998-yil 1-iyuldagi 274-son qaroriga oʻzgartirishlar kiritish toʻgʻrisida
 LexUZ sharhi
Mazkur qaror Oʻzbekiston Respublikasi Vazirlar Mahkamasining 2019-yil 6-dekabrdagi 973-sonli “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻsmirlarni harbiy-vatanparvarlik ruhida tarbiyalash hamda Oʻzbekiston Respublikasi Qurolli Kuchlari va davlat xizmati uchun kadrlar zaxirasini tayyorlash tizimini takomillashtirishga oid qoʻshimcha chora-tadbirlar toʻgʻrisida” 2019-yil 28-iyundagi PQ-4375-son qarori)”gi qaroriga asosan oʻz kuchini yoʻqotgan.
Oʻzbekiston Respublikasining “Umumiy harbiy majburiyat va harbiy xizmat toʻgʻrisida”gi Qonuniga, Oʻzbekiston Respublikasi Prezidentining “Oʻzbekiston Respublikasi Qurolli Kuchlari harbiy xizmatchilarini uy-joy bilan taʼminlash tartibi toʻgʻrisida Nizomni tasdiqlash haqida” 2007-yil 14-sentabrdagi PQ-694-son qaroriga muvofiq, shuningdek Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Maxsus avariya-tiklash boshqarmasining yuqori jangovor shayligini saqlash vazifalarini sifatli bajarish maqsadida Vazirlar Mahkamasi qaror qiladi:
1. Vazirlar Mahkamasining “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Maxsus avariya-tiklash boshqarmasi faoliyatini tashkil etish toʻgʻrisida” 1998-yil 1-iyuldagi 274-son qaroriga ilovaga muvofiq oʻzgartirishlar kiritilsin.
2. Mazkur qarorning bajarilishini nazorat qilish Oʻzbekiston Respublikasi axborot texnologiyalari va kommunikatsiyalarini rivojlantirish vaziri vazifasini bajaruvchi Sh.X. Shermatov zimmasiga va Oʻzbekiston Respublikasi Vazirlar Mahkamasining Axborot tizimlari va telekommunikatsiyalar masalalari axborot-tahlil departamentiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2017-yil 22-avgust,
660-son
Vazirlar Mahkamasining 2017-yil 22-avgustdagi 660-son qaroriga
ILOVA
Vazirlar Mahkamasining “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Maxsus avariya-tiklash boshqarmasi faoliyatini tashkil etish toʻgʻrisida” 1998-yil 1-iyuldagi 274-son qaroriga kiritilayotgan oʻzgartirishlar
1. 5-bandning ikkinchi xatboshidagi “kontrakt boʻyicha olingan zobitlar, praporshchiklar va harbiy xizmatchilar” soʻzlari “kontrakt boʻyicha harbiy xizmatchilar” soʻzlari bilan almashtirilsin.
2. 6-band oʻz kuchini yoʻqotgan deb hisoblansin.
3. 1-ilovada:
4-band quyidagi tahrirda bayon qilinsin:
“4. Favqulodda vaziyatlar vaqtida maxsus vazifalarni bajarish va ularning oqibatlarini bartaraf etish uchun jalb etilgan Boshqarma kuchlari va vositalariga Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan kelishgan holda Oʻzbekiston Respublikasi Favqulodda vaziyatlar vazirligi bevosita rahbarlik qiladi”.
6-band quyidagi tahrirda bayon qilinsin:
“6. Boshqarmaning kontrakt boʻyicha harbiy xizmatchilari Oʻzbekiston Respublikasi Favqulodda vaziyatlar vazirligining kontrakt boʻyicha harbiy xizmatchilari uchun qabul qilingan kiyim-kechak, emblema va farqlanish belgilariga ega boʻladi.
Boshqarmaning muddatli harbiy xizmatchilari Oʻzbekiston Respublikasi Mudofaa vazirligining muddatli harbiy xizmatchilari uchun belgilangan normalarga muvofiq kiyim-kechak bilan taʼminlanadi”;
10-bandning “a” kichik bandi quyidagi tahrirda bayon qilinsin:
“a) tinch davrda:
axborot-kommunikatsiya texnologiyalarini rivojlantirish, modernizatsiya qilish, texnik va texnologik qayta jihozlash sohasida davlat siyosatini amalga oshirish maqsadida Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining tarkibiy boʻlinmalari bilan hamkorlikda Oʻzbekiston Respublikasi aloqa obyektlari va telekommunikatsiya tarmoqlarida avariya-tiklash hamda qurilish-montaj ishlarini bajarish;
safarbarlik zaxirasining moddiy vositalarini va favqulodda vaziyatlarda avariya-tiklash ishlarini bajarish uchun ularning zaxirasini toʻplash hamda va sifatli saqlash;
Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Maxsus avariya-tiklash boshqarmasini safarbarlikka jalb etish rejasini ishlab chiqish, tayyorlash va amalga oshirish;
Boshqarmani belgilangan vazifalarni bajarishga doimiy jangovar tayyorgarlik darajasida saqlash;
mobil aloqa vositalarini va Oʻzbekiston Respublikasi fuqaro muhofazasi boshligʻining mobil boshqaruv punktini belgilangan maqsadda qoʻllashga doimiy tayyor holda saqlash va ularning texnik taʼminotini modernizatsiya qilish;
Axborot texnologiyalari va kommunikatsiyalarini rivojlantirish vazirligi tuzilmasi obyektlarini harbiylashtirilgan holda qoʻriqlash;
Boshqarma harbiy xizmatchilari va xizmatchilarini oʻquv markazi bazasida oʻqitish, qayta tayyorlash va ularning malakasini oshirishni tashkil qilish va keyinchalik muddatli harbiy xizmatchilarni Oʻzbekiston Respublikasi Mudofaa vazirligining mudofaa ishlari boshqarmalari va boʻlimlari orqali maxsus tuzilmalarga biriktirish;
Boshqarma shaxsiy tarkibini Oʻzbekiston Respublikasining Prezidenti va xalqiga, harbiy qasamyod va harbiy burchga sadoqat, Vatan tarixi va anʼanalarini chuqur hurmat qilish, Oʻzbekiston Respublikasi Konstitutsiyasi va qonunlari qoidalarini soʻzsiz bajarish, komandirlarga (boshliqlarga) ongli ravishda boʻysunish ruhida tarbiyalashga qaratilgan tizimli ishlarni tashkil etish;
Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan kelishgan holda jangovar tayyorgarlik, alohida muhim va toifalarga ajratilgan aloqa obyektlarini qoʻriqlash, idoralararo oʻquv-mashgʻulotlarda tezkor aloqani taʼminlash va boshqa maxsus vazifalarni bajarish masalalarida Oʻzbekiston Respublikasi Favqulodda vaziyatlar vazirligi, Mudofaa vazirligi, Ichki ishlar vazirligi, Milliy xavfsizlik xizmati bilan hamkorlik qilish”;
19-band quyidagi tahrirda bayon qilinsin:
“19. Boshqarmaning obyektlarni qoʻriqlovchi idoraviy qoʻriqlash boʻlinmalarining taʼminoti bilan bogʻliq xarajatlar Oʻzbekiston Respublikasi Davlat budjeti mablagʻlari hisobidan, Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi tizimining nodavlat mulk obyektlarini qoʻriqlash Boshqarma bilan tuzilgan shartnomalarga muvofiq ushbu obyektlar mablagʻlari hisobidan moliyalashtiriladi”;
25-band quyidagi tahrirda bayon qilinsin:
“25. Kontrakt boʻyicha harbiy xizmatchilar qonun hujjatlarida belgilangan tartibda uy-joy bilan taʼminlanadi”.
(Oʻzbekiston Respublikasi qonun hujjatlari toʻplami, 2017-y., 34-son, 896-modda)