|
Hujjat kuchini yo‘qotgan 01.08.2018
|
Oʻzbekiston Respublikasi Prezidentining
Farmoni
Oʻzbekiston Respublikasi Qishloq va suv xoʻjaligi vazirligi faoliyatini tubdan takomillashtirish chora-tadbirlari toʻgʻrisida
LexUZ sharhiMazkur farmon Oʻzbekiston Respublikasi Prezidentining 2018-yil 1avgustdagi PF-5497-sonli “Oʻzbekiston Respublikasi Prezidentining ayrim hujjatlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining 2018-yil 17-apreldagi PF-5418-sonli “Qishloq va suv xoʻjaligi davlat boshqaruvi tizimini tubdan takomillashtirish chora-tadbirlari toʻgʻrisida”gi Farmoni va Oʻzbekiston Respublikasi Prezidentining 2018-yil 17-apreldagi PQ-3671-sonli “Oʻzbekiston Respublikasi Qishloq xoʻjaligi vazirligi faoliyatini tashkil etish chora-tadbirlari toʻgʻrisida” hamda 2018-yil 17-apreldagi PQ-3672-sonli “Oʻzbekiston Respublikasi Suv xoʻjaligi vazirligi faoliyatini tashkil etish chora-tadbirlari toʻgʻrisida”gi qarorlari)”gi Farmoniga asosan oʻz kuchini yoʻqotgan.
Qayd etib oʻtilsinki, soʻnggi yillarda respublikada qishloq xoʻjaligi tovar ishlab chiqaruvchilari manfaatlarini ishonchli taʼminlash uchun zarur iqtisodiy va huquqiy shart-sharoitlar yaratildi, tayyorlov, qayta ishlash korxonalari, moddiy-texnika resurslari yetkazib beruvchilar, moliya-bank muassasalari va qishloq xoʻjaligiga xizmat koʻrsatuvchi boshqa tashkilotlarning masʼuliyati oshirildi. Tarmoqda tarkibiy oʻzgartirishlar amalga oshirildi va qishloqda mutlaqo yangi iqtisodiy munosabatlar joriy qilindi, fermer xoʻjaliklari qishloq xoʻjaligi mahsulotlari yetishtiruvchi asosiy subyektlar sifatida shakllandi.
Shu bilan birga, Oʻzbekiston Respublikasi Qishloq va suv xoʻjaligi vazirligi tomonidan yetarli ish olib borilmaganligi oqibatida qishloq va suv xoʻjaligini boshqarish sohasida hal etilmagan bir qator muammolar saqlanib qolmoqda, bu esa tarmoqni rivojlantirishning barqaror surʼatlari va samaradorligini taʼminlashga salbiy taʼsir oʻtkazmoqda:
birinchidan, qishloq xoʻjaligini boshqarishning tarkib topgan tizimini agrar sohada amalga oshirilayotgan bozor munosabatlarini joriy etishga va qishloq xoʻjaligi ishlab chiqarishi samaradorligini oshirishga qaratilgan tarkibiy oʻzgartirishlarning hozirgi talablariga javob bermayapti;
ikkinchidan, zamonaviy resurslar va suvni tejovchi agrotexnologiyalar hamda ilgʻor tajribani joriy etishga, tarmoqni modernizatsiya qilish va texnik jihozlashga yetarlicha eʼtibor berilmayapti, taʼlim, fan va qishloq xoʻjaligi ishlab chiqarishini integratsiyalash, agrar sektorda innovatsion ilmiy ishlanmalarni tatbiq etish darajasi pastligicha qolmoqda;
uchinchidan, suv xoʻjaligini boshqarish tizimida kamchiliklar mavjud, suv resurslaridan foydalanish samaradorligi va ratsionalligi tegishli darajada taʼminlanmayapti;
toʻrtinchidan, agrar sektorning infratuzilma tizimi yetarlicha rivojlanmagan, xizmat koʻrsatuvchi tashkilotlar bilan fermer xoʻjaliklarining hamkorlik mexanizmi samaradorligi pastligi qishloq xoʻjaligi tovar ishlab chiqaruvchilarining huquq va qonuniy manfaatlari buzilishiga, koʻrsatilayotgan xizmatlar sifati pasayishiga va ularning tariflari oshib ketishiga olib kelmoqda.
Qishloq xoʻjaligini kompleks modernizatsiya qilish va barqaror rivojlantirishni taʼminlash, qishloq xoʻjaligi ishlab chiqarishini boshqarishning zamonaviy talablarga mos tashkiliy tuzilmasini joriy etish hamda Oʻzbekiston Respublikasi Qishloq va suv xoʻjaligi vazirligi faoliyatini tubdan takomillashtirish maqsadida:
1. Quyidagilar Oʻzbekiston Respublikasi Qishloq va suv xoʻjaligi vazirligi faoliyatining asosiy vazifalari va yoʻnalishlari etib belgilansin:
tarmoqni kompleks modernizatsiya qilish, qishloq va suv xoʻjaligi tarmoqlarida fan va texnika yutuqlarini, zamonaviy resurslar va suvni tejovchi agrotexnologiyalarni, ilgʻor mahalliy va xorijiy tajribani joriy qilishga yoʻnaltirilgan yagona agrotexnika va suv xoʻjaligi siyosatini amalga oshirish;
qishloq xoʻjaligini jadal hamda mutanosib ravishda rivojlantirishni, mamlakatning oziq-ovqat xavfsizligini taʼminlashga, qishloq aholisining bandligi va daromadlarini oshirishga, ichki bozorda oziq-ovqat mahsulotlari narxlarining barqaror darajasini saqlab qolishga yoʻnaltirilgan kompleks maqsadli, tarmoq va hududiy dasturlarini ishlab chiqish;
qishloq xoʻjaligi tarmogʻiga xorijiy investitsiyalarni va texnik koʻmaklashish mablagʻlari (grantlar)ni jalb etish, loyihani boshqarish tamoyillariga muvofiq ulardan samarali foydalanilishini taʼminlash;
suv resurslarini boshqarish tamoyillari va tizimini takomillashtirish, ulardan tejab-tergab va oqilona foydalanishni taʼminlash, sugʻoriladigan yerlarning meliorativ holatini yaxshilash, suv xoʻjaligi obyektlari, gidrotexnika inshotlarini rekonstruksiyalash va modernizatsiya qilish;
qishloq xoʻjaligi tovar ishlab chiqaruvchilariga xizmat koʻrsatuvchi infratuzilma obyektlarining faoliyatini bozor tamoyillari va mexanizmlari asosida tubdan takomillashtirish;
taʼlim, fan va qishloq xoʻjaligi ishlab chiqarishini tizimli asosda chambarchas integratsiyalash, qishloq va suv xoʻjaligi tarmoqlarining yuqori malakali soha mutaxassislariga boʻlgan joriy va istiqboldagi ehtiyojlarini hisobga olgan holda kadrlar tayyorlash, qayta tayyorlash va ularning malakasini oshirishni taʼminlash.
Oʻzbekiston Respublikasi Bosh vazirining oʻrinbosari — qishloq va suv xoʻjaligi vaziri Z.T. Mirzayev zimmasiga vazirlikka yuklatilgan vazifalar hamda faoliyat yoʻnalishlari sifatli hamda toʻliq hajmda amalga oshirilishi yuzasidan shaxsiy masʼuliyat yuklansin.
2. Oʻzbekiston Respublikasi Qishloq va suv xoʻjaligi vazirligi, Moliya vazirligi, Investitsiyalar boʻyicha davlat qoʻmitasining:
Oʻzbekiston Respublikasi Qishloq va suv xoʻjaligi vazirligining markaziy apparati tarkibida tashkil etilgan qishloq xoʻjaligi tarmoqlari muammolarini hal etish boʻyicha tegishli kengashlarni tugatish;
qarzga oid bitimlarda va Oʻzbekiston Respublikasi Prezidentining tegishli qarorlarida nazarda tutilgan xodimlar sonini hisobga olgan holda Qishloq va suv xoʻjaligi vazirligining tegishli investitsiya loyihalarini amalga oshirish guruhlari negizida Oʻzbekiston Respublikasi Qishloq va suv xoʻjaligi vazirligi huzurida Qishloq va suv xoʻjaligida investitsiya loyihalarini amalga oshirish markazini (keyingi oʻrinlarda — Markaz deb ataladi) tashkil etish;
Quyisirdaryo, Quyiamudaryo va Zarafshon irrigatsiya tizimlari havza boshqarmalarini qayta tashkil etish va ularning negizida Quyisirdaryo, Sirdaryo — Zarafshon, Quyiamudaryo, Amudaryochapqirgʻoq, Zarafshon va Quyizarafshon irrigatsiya tizimlari havza boshqarmalarini tashkil etish;
irrigatsiya tizimlari havza boshqarmalari huzurida tuman irrigatsiya boʻlimlarini tashkil etish, ularga irrigatsiya tizimlari boshqarmalarining tegishli shtat birliklari bilan birga tuman ahamiyatidagi irrigatsiya obyektlarining bir qismini berish;
Oʻzbekiston Respublikasi Qishloq va suv xoʻjaligi vazirligining suv xoʻjaligi foydalanish tashkilotlari ishlab chiqarish xodimlarining 1324 shtat birligini, shu jumladan 756 shtat birligini amaldagi boshqaruv xodimlari sonini koʻpaytirish uchun, Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Qishloq va suv xoʻjaligi vazirligi, qishloq va suv xoʻjaligi viloyat boshqarmalari, qishloq va suv xoʻjaligi tuman boʻlimlari yordamchi xodimlarining 244 shtat birligi, shuningdek, 324 shtat birligini — irrigatsiya tizimlari havza boshqarmalari huzuridagi tuman irrigatsiya boʻlimlari boshqaruv apparatini shakllantirish uchun berish toʻgʻrisidagi takliflari qabul qilinsin.
3. Quyidagilar Qishloq va suv xoʻjaligida investitsiya loyihalarini amalga oshirish markazining asosiy vazifalari va faoliyat yoʻnalishlari etib belgilansin:
xorijiy investitsiyalar, imtiyozli kreditlar va texnik koʻmaklashish mablagʻlari (grantlar)ni jalb qilishda ishtirok etish, loyihani boshqarish tamoyillariga muvofiq investitsiya loyihalarining oʻz vaqtida va samarali amalga oshirilishini taʼminlash;
tender (tanlov) savdolarining belgilangan tartibda oʻz vaqtida oʻtkazilishini, kontraktlar tuzilishini, ularning vakolatli organlarda ekspertizadan oʻtkazilishini taʼminlash;
Oʻzbekiston Respublikasi qonunchiligi, tegishli xalqaro moliyaviy institutlar va xorijiy hukumat moliya tashkilotlarining xalqaro qoida va taomillariga muvofiq tuzilgan kontraktlar boʻyicha asbob-uskunalar va materiallar yetkazib berilishi, ishlar bajarilishi va xizmatlar koʻrsatilishi monitoringini amalga oshirish.
4. Belgilansinki:
Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari bir vaqtning oʻzida Qoraqalpogʻiston Respublikasi qishloq va suv xoʻjaligi vaziri hisoblanadi, viloyatlar hokimlarining qishloq va suv xoʻjaligi masalalari boʻyicha oʻrinbosarlari bir vaqtning oʻzida viloyat qishloq va suv xoʻjaligi boshqarmalari boshliqlari hisoblanadi, tumanlar (Quvasoy shahri) qishloq va suv xoʻjaligi boʻlimlari boshliqlari lavozimi boʻyicha tumanlar (Quvasoy shahri) hokimlarining oʻrinbosarlari hisoblanadi;
Quyiamudaryo irrigatsiya tizimlari havza boshqarmasi boshligʻi lavozimi boʻyicha Qoraqalpogʻiston Respublikasi qishloq va suv xoʻjaligi vazirining oʻrinbosari hisoblanadi;
irrigatsiya tizimlari havza boshqarmalari boshliqlari lavozimi boʻyicha viloyat qishloq va suv xoʻjaligi boshqarmalari boshliqlarining oʻrinbosarlari hisoblanadi;
irrigatsiya tizimlari havza boshqarmalari huzuridagi tuman irrigatsiya boʻlimlari boshliqlari lavozimi boʻyicha tuman qishloq va suv xoʻjaligi boʻlimlari boshliqlarining oʻrinbosarlari hisoblanadi.
5. Oʻzbekiston Respublikasi Qishloq va suv xoʻjaligi vazirligining Ijtimoiy rivojlantirish va ragʻbatlantirish jamgʻarmasi Oʻzbekiston Respublikasi Qishloq va suv xoʻjaligi vazirligining moddiy-texnika bazasini rivojlantirish, innovatsiya texnologiyalarini joriy qilish va xodimlarni ragʻbatlantirish jamgʻarmasi etib (keyingi oʻrinlarda — Jamgʻarma deb ataladi) qayta tashkil etilsin.
Quyidagilar Jamgʻarma mablagʻlarini shakllantirishning asosiy manbalari etib belgilansin:
vazirlik tarkibiga kiruvchi tashkilotlarning tuzilgan shartnomalar asosidagi ajratmalari;
qishloq va suv xoʻjaligi sohasida fan, texnika yutuqlari va ilmiy asoslangan resurslarni tejovchi texnologiyalarni targʻib qilish va joriy etish boʻyicha koʻrsatilgan xizmatlar uchun fermer xoʻjaliklari va boshqa qishloq xoʻjaligi tashkilotlarining tuzilgan shartnomalar asosidagi ixtiyoriy ajratmalari;
urugʻchilik subyektlariga ajratiladigan maxsus ustamalar;
jismoniy va yuridik shaxslarning xayriya mablagʻlari;
xalqaro grantlar, texnik koʻmaklashish mablagʻlari, shuningdek qonunchilikda taqiqlanmagan boshqa manbalar.
6. Budjet mablagʻlari va Jamgʻarma mablagʻlari Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Qishloq va suv xoʻjaligi vazirligi, viloyat qishloq va suv xoʻjaligi boshqarmalari, tuman qishloq va suv xoʻjaligi boʻlimlari faoliyatini moliyalashtirish manbalari hisoblanadi.
7. Qishloq xoʻjaligi tovar ishlab chiqaruvchilariga xizmat koʻrsatuvchi infratuzilma obyektlari faoliyatini takomillashtirish yuzasidan takliflar ishlab chiqish boʻyicha ilovaga* muvofiq tarkibda Komissiya (keyingi oʻrinlarda — Komissiya deb ataladi) tashkil etilsin.
* Ilova rus tilidagi matnda berilgan.
Komissiya (Z.T. Mirzayev):
ikki oy muddatda qishloq xoʻjaligi tovar ishlab chiqaruvchilariga xizmat koʻrsatuvchi mavjud infratuzilma obyektlari, shuningdek qishloq xoʻjaligi tovar ishlab chiqaruvchilari bilan tayyorlov, taʼminot va xizmat koʻrsatuvchi tashkilotlar oʻrtasidagi oʻzaro munosabatlarni tartibga soluvchi meʼyoriy-huquqiy bazaning xatlovdan oʻtkazilishini tashkil qilsin;
2018-yil 1-yanvargacha qishloq xoʻjaligi tovar ishlab chiqaruvchilariga xizmat koʻrsatuvchi infratuzilma obyektlari faoliyatini takomillashtirish va rivojlantirish hamda ularning dislokatsiyasini nazarda tutuvchi tegishli meʼyoriy-huquqiy hujjat loyihasini tayyorlasin va kiritsin.
8. Oʻzbekiston Respublikasi Vazirlar Mahkamasi bir hafta muddatda Oʻzbekiston Respublikasi Qishloq va suv xoʻjaligi vazirligi faoliyatini yanada takomillashtirish toʻgʻrisidagi Oʻzbekiston Respublikasi Prezidentining qarori loyihasini belgilangan tartibda kiritsin.
9. Oʻzbekiston Respublikasi Prezidentining “Qishloq xoʻjaligida islohotlarni chuqurlashtirishning eng muhim yoʻnalishlari toʻgʻrisida” 2003-yil 24-martdagi PF-3226-son Farmonining 6- va 7-bandlari oʻz kuchini yoʻqotgan deb hisoblansin.
10. Oʻzbekiston Respublikasi Qishloq va suv xoʻjaligi vazirligi Adliya vazirligi, boshqa manfaatdor vazirliklar va idoralar bilan birgalikda ikki oy muddatda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.
11. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidentining Davlat maslahatchisi V.A. Golishev zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2017-yil 4-avgust,
PF-5134-son
(Oʻzbekiston Respublikasi qonun hujjatlari toʻplami, 2017-y., 32-son, 793-modda)
