Vazirlar Mahkamasining 1999-yilning I yarim yilligida respublikani ijtimoiy-iqtisodiy rivojlantirishning yakunlari, iqtisodiy islohotlarning borishini hamda iqtisodiyotni rivojlantirish ustuvor yoʻnalishlarining amalga oshirilishini baholash yuzasidan qaroriga muvofiq, shuningdek Oʻzbekiston Respublikasi investitsiya dasturlarini shakllantirish va amalga oshirish samaradorligini yanada oshirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi investitsiya dasturini shakllantirish tartibi 1-ilovaga muvofiq;

Oʻzbekiston Respublikasi investitsiya dasturida nazarda tutilgan kapital qurilishni mablagʻ bilan taʼminlash va kreditlash tartibi 2-ilovaga muvofiq tasdiqlansin.

2. Vazirlar Mahkamasining Tashqi iqtisodiy aloqalar va xorijiy investitsiyalar departamenti, Oʻzbekiston Respublikasi Iqtisodiyot vazirligi, Moliya vazirligi, Markaziy banki, vazirliklar, idoralar, uyushmalar, korporatsiyalar va kompaniyalar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari investitsiya loyihalarini shakllantirish va amalga oshirishda mazkur qaror bilan tasdiqlangan meʼyoriy-huquqiy hujjatlarga qatʼiy ravishda amal qilsinlar.

3. Vazirlar Mahkamasining “Investitsiya faoliyatini taʼminlash boʻyicha normativ-huquqiy hujjatlarni tasdiqlash toʻgʻrisida” 1998-yil 15-maydagi 215-son qarori oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasi Bosh vaziri Oʻ.T. Sultonov zimmasiga yuklansin.

1. Mazkur Tartib Oʻzbekiston Respublikasi investitsiya dasturini shakllantirish qoidalari va tartibotini tartibga soladi.

Oʻzbekiston Respublikasi investitsiya dasturi (keyingi oʻrinlarda — Dastur deb ataladi) respublikani ijtimoiy-iqtisodiy rivojlantirish prognozlarining tarkibiy qismi hisoblanadi va davlat investitsiya siyosatining ustuvor yoʻnalishlarini aks ettiradi.

2. Oʻzbekiston iqtisodiyotini barqaror va tadrijiy rivojlantirishga va iqtisodiyotga zarur tarkibiy oʻzgartirishlarni, tabiiy, mineral-xomashyo, moliyaviy, moddiy va mehnat resurslaridan oqilona foydalanishni taʼminlovchi investitsiyalar qoʻyish asosida uning jahon iqtisodiy tizimiga keng integratsiyalashuviga erishish Dasturning asosiy maqsadi hisoblanadi.

3. Dastur quyidagilarni oʻz ichiga oladi:

mablagʻ bilan taʼminlash manbalari boʻyicha kapital qoʻyilmalar prognozi;

ustuvor investitsiya takliflarining yigʻma roʻyxati (keyingi oʻrinlarda — Yigʻma roʻyxat deb ataladi);

Investitsiya loyihalarining aniq dasturi (keyingi oʻrinlarda — Aniq dastur deb ataladi).

4. Dastur:

tabiiy, mineral-xomashyo, moliyaviy, moddiy va mehnat resurslaridan foydalanishning samaradorligini oshirishni;

davlat budjeti hamda respublikaning ichki va tashqi qarzlari hajmlarini oʻzaro bogʻlashni;

mablagʻ bilan taʼminlashning tasdiqlangan manbalari bilan obyektlarni ishga tushirish va kreditlarni uzishni, shuningdek, qurilish industriyasi va qurilish materiallari sanoati quvvatlarini muvozanatlashni;

mablagʻ bilan taʼminlashning tasdiqlangan manbalari bilan obyektlarni ishga tushirish va kreditlarni uzishni, shuningdek, qurilish industriyasi va qurilish materiallari sanoati quvvatlarini muvozanatlashni;

5. Dasturni ishlab chiqish va roʻyobga chiqarishga oid barcha ishlarni Vazirlar Mahkamasining Tashqi iqtisodiy aloqalar va xorijiy investitsiyalar departamenti muvofiqlashtiradi.

6. Dasturni shakllantirish davlat maqsadli dasturlari, iqtisodiyotning ustuvor yoʻnalishlarini va alohida mintaqalarni rivojlantirish boʻyicha direktiv qarorlar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar, uyushmalar, korporatsiyalar, kompaniyalar, mulkchilikning barcha shakllaridagi korxonalar va tashkilotlar, shu jumladan, xorijiy investitsiyalar ishtirokidagi korxonalarning takliflari asosida Oʻzbekiston Respublikasi Iqtisodiyot vazirligi tomonidan Moliya vazirligi va Markaziy bank bilan birgalikda amalga oshiriladi va oldingi yil dekabr oyining birinchi oʻn kunligidan kechikmay Vazirlar Mahkamasiga kiritiladi.

7. Dasturni ishlab chiqish uchun Oʻzbekiston Respublikasi Iqtisodiyot vazirligi har yili investitsiya takliflarini tayyorlashga oid metodik koʻrsatmalarni va ularni taqdim etish muddatlarini manfaatdor vazirliklar hamda idoralarga, uyushmalar, korporatsiyalar va kompaniyalarga, Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga, korxonalar va tashkilotlarga yetkazadi.

8. Ishlab chiqilgan Dastur Vazirlar Mahkamasining Ish tartibiga muvofiq Vazirlar Mahkamasi tomonidan tasdiqlanadi.

9. Kapital qoʻyilmalar prognozi Oʻzbekiston Respublikasi Iqtisodiyot vazirligi tomonidan Moliya vazirligi, Markaziy bank, vazirliklar va idoralar bilan birgalikda joriy yil va prognozlashtirilayotgan yillar uchun ishlab chiqarish va noishlab chiqarish qurilishlari boʻyicha ishlab chiqiladi.

10. Prognoz kapital qoʻyilmalarning quyidagi manbalarini hisobga olishi kerak:

a) markazlashtirilgan qoʻyilmalar, ular quyidagilarni oʻz ichiga oladi:

davlat budjeti va davlat budjetdan tashqari fondlar mablagʻlari;

tashqi qarzlar limitlaridan kelib chiqib hukumat kafolati ostida beriladigan chet el investitsiyalari va kreditlari;

b) markazlashtirilmagan kapital qoʻyilmalar, ular quyidagilarni oʻz ichiga oladi:

korxonalar mablagʻlari, shu jumladan, qoʻshma korxonalar, xorijiy korxonalar va xususiy korxonalarning mablagʻlari, shuningdek, Oʻzbekiston Respublikasining norezidentlari mablagʻlari;

davlat hokimiyati va boshqaruvi organlari mablagʻlari;

banklarning, shu jumladan, xorijiy banklarning tijorat kreditlari;

aholi mablagʻlari.

11. Markazlashtirilgan kapital qoʻyilmalar limitlari quyidagilar hisobiga belgilanadi:

Davlat budjeti va davlat budjetdan tashqari fondlar mablagʻlari — belgilangan tartibda Oʻzbekiston Respublikasi Davlat budjetini shakllantirish chogʻida va yigʻma budjet tarkibida tasdiqlanadi;

Hukumat kafolati ostida jalb qilinadigan xorijiy investitsiyalar va kreditlar — alohida ustuvor investitsiya loyihalarini amalga oshirish boʻyicha Vazirlar Mahkamasi qarorlariga muvofiq.

12. Markazlashtirilgan kapital qoʻyilmalar faqat quyidagilarga ajratiladi:

respublika iqtisodiyotini rivojlantirishning ustuvor yoʻnalishlari boʻyicha investitsiya loyihalarini, davlat maqsadli dasturlarini va davlatlararo bitimlarni amalga oshirishga;

egasining nomi koʻrsatilgan uy-joy obligatsiyalari boʻyicha uy-joy qurilishiga;

yangi yerlarni oʻzlashtirish va sugʻoriladigan yerlarni tiklashga, suv xoʻjaligi qurilishi va kichik gidroenergetikani rivojlantirishga;

aholi yashaydigan joylarning, birinchi navbatda, yakka tartibda qurilgan uy-joy mavzelarining muhandislik infratuzilmasini rivojlantirishga;

maorif, sogʻliqni saqlash, madaniyat va ijtimoiy infratuzilmaning boshqa tarmoqlari obyektlari qurilishiga;

davlat boshqaruvi organlari, huquqni muhofaza qilish organlari, davlat ilmiy muassasalarining moddiy-texnika bazasini rivojlantirish va mustahkamlashga;

umumdavlat tabiatni muhofaza qilish tadbirlarini amalga oshirishga va tabiiy ofatlardan himoya qilish inshootlari qurilishiga.

13. Ustuvor investitsiya takliflarining yigʻma roʻyxati Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar, uyushmalar, korporatsiyalar, kompaniyalar, mulkchilik shakllaridan qatʼi nazar, korxonalar va tashkilotlarning takliflaridan kelib chiqib, Oʻzbekiston Respublikasi Iqtisodiyot vazirligi tomonidan Moliya vazirligi, Tashqi iqtisodiy aloqalar agentligi va Xorijiy sarmoyalar boʻyicha agentlik bilan birgalikda tuziladi.

14. Quyidagilar (ekologiya normalari va talablariga muvofiq kelishi ular uchun majburiy shartdir) investitsiya takliflarini Dasturga kiritish uchun tanlab olishning asosiy mezoni hisoblanadi:

a) ishlab chiqarish obyektlari boʻyicha:

mahalliy xomashyo va mineral resurslarni chuqur qayta ishlash koʻlamini kengaytirish, ularni raqobatbardosh tayyor mahsulot darajasigacha yetkazish;

eksport salohiyatini rivojlantirishga moʻljallangan rentabelli, yuqori texnologiyali va resurslarni tejovchi ishlab chiqarishlarni tashkil etish;

kommunikatsiyalar, sugʻorish, ishlab chiqarish infratuzilmasining zamonaviy tizimlarini rivojlantirish;

isteʼmol bozorini eng zarur tovarlar va xizmatlar bilan toʻldirish;

b) noishlab chiqarish obyektlari boʻyicha:

aholining ijtimoiy infratuzilma xizmatlariga boʻlgan birinchi navbatdagi ehtiyojlarini qondirish;

noishlab chiqarish xizmatlari sifatini va ular bilan aholini qamrab olish darajasini oshirish.

Bunda ishlab chiqarish loyihalari boʻyicha Dasturga kiritish uchun:

texnologiya jihatidan oʻzaro bogʻlangan yoki tarmoqlararo ahamiyatga ega boʻlgan;

toʻgʻridan toʻgʻrixorijiy investitsiyalar ishtirokida amalga oshiriladigan;

qishloq joylarda va ishchi kuchi ortiqcha boʻlgan mintaqalarda joylashtiriladigan kichik va oʻrta biznes;

respublikaning eksport salohiyatini rivojlantirishni taʼminlaydigan takliflar ustuvor huquqqa ega boʻladi.

15. Yigʻma roʻyxat mamlakatimiz investorlarini va xorijiy investorlarni jalb qilish uchun aniq ustuvor yoʻnalishlarning qisqacha bayoni hisoblanadi, u ommaviy axborot vositalarida eʼlon qilinadi va tegishli kanallar, xalqaro axborotnomalar, moliya institutlari, INTERNET tarmogʻi orqali potensial investorlarga yetkaziladi.

Yigʻma roʻyxatga kiritilgan investitsiya takliflari:

keyinchalik Investitsiya loyihalarining aniq dasturiga kiritish uchun ular investitsiya loyihasi jarayoniga kelgunga qadar shakllantirishning barcha bosqichlarida ular ustidan doimiy monitoring amalga oshirilishi va injiniring jihatidan kompleks kuzatib borilishi kerak;

Hukumat kafolati ostidagi xorijiy kredit liniyalaridan foydalanishning ustuvor huquqiga ega boʻladi.

16. Yigʻma roʻyxatga kiritilgan investitsiya taklifining tashabbuskori uni amalga oshirishda qatnashishdan manfaatdor boʻlgan xorijiy sheriklar (potensial investorlar) bilan oldindan erishilgan kelishuv yakunlari boʻyicha “Oʻzinvestloyiha” kompaniyasi yoki boshqa injiniring tashkiloti bilan birgalikda yoki mustaqil ravishda loyihaning texnik-iqtisodiy asoslanishini ishlab chiqadi, loyiha ekspertiza qilinadi, belgilangan tartibda tasdiqlanadi.

17. Hukumat kafolati ostida beriladigan xorijiy investitsiyalar va kreditlar hisobiga moʻljallanayotgan investitsiya takliflarini amalga oshirish uchun potensial investorlarni (bosh pudratchilarni) jalb qilish, qoidaga koʻra, tender asosida amalga oshiriladi.

18. Investitsiya loyihalarining aniq dasturi (keyingi oʻrinlarda — Aniq dastur deb ataladi) har yili ishlab chiqiladi va mablagʻ bilan taʼminlashning asosiy manbalari boʻyicha buyurtmachilar va xorijiy sheriklar koʻrsatilgan holda ustuvor investitsiya loyihalari, eng avvalo, kelgusi yilga oʻtuvchi investitsiya loyihalari roʻyxatini, joriy yil uchun kapital qoʻyilmalarni oʻzlashtirish prognozini ifodalaydi.

19. Investitsiya loyihalarining aniq dasturi Dastur tarkibida tasdiqlanadi va unga yil davomida qoʻshimcha investitsiya loyihalari kiritilishiga yoʻl qoʻyilmaydi, xorijiy investitsiyalar ishtirokidagi loyihalar bundan mustasno.

20. Aniq dasturga kiritish uchun quyidagilar majburiy shartlar hisoblanadi:

belgilangan tartibda tasdiqlangan texnik-iqtisodiy asoslanishning mavjudligi;

mablagʻ bilan taʼminlash manbalarining va kreditlar shartnomada belgilangan muddatlarda uzilishining isbotlanganligi.

21. Tasdiqlangan Aniq dasturga muvofiq buyurtmachilar tomonidan Oʻzbekiston Respublikasi Iqtisodiyot vazirligi bilan kelishilgan holda qurilishlarning aniq roʻyxati tasdiqlanadi.

22. Investitsiya dasturiga kiritilgan investitsiya loyihalarini davlat tomonidan qoʻllab-quvvatlash chora-tadbirlari mablagʻ bilan taʼminlashda koʻmaklashish, soliq imtiyozlari va boshqa imtiyozlar berish, davlat monitoringini tashkil etish yoʻli bilan amalga oshiriladi.

23. Mablagʻ bilan taʼminlashda koʻmaklashish ustuvor investitsiya loyihalarini amalga oshirish, shu jumladan, xorijiy kreditlar boʻyicha majburiy avans toʻlovlari va boshqa toʻlovlarni toʻlash uchun qaytarish yoki qaytarmaslik asosida budjet mablagʻlari ajratish, shuningdek, xorijiy kreditlar uchun Hukumat kafolatlari berish yoʻli bilan amalga oshiriladi.

Amalga oshirilishi uchun markazlashtirilgan kapital qoʻyilmalar hisobiga davlat tomonidan qoʻllab-quvvatlash zarur boʻlgan ustuvor investitsiya loyihalari Vazirlar Mahkamasining Tashqi iqtisodiy aloqalar va xorijiy investitsiyalar departamentining Oʻzbekiston Respublikasi Iqtisodiyot vazirligi, Moliya vazirligi, boshqa vazirliklar va idoralar bilan birgalikda tayyorlagan takliflari asosida Oʻzbekiston Respublikasi Hukumati tomonidan belgilanadi.

Koʻrib chiqilayotgan yil uchun markazlashtirilgan moliyaviy resurslarning prognoz limitlari Oʻzbekiston Respublikasi Iqtisodiyot vazirligi, Moliya vazirligi tomonidan oldingi yilning sentyabr oyidan kechikmay eʼlon qilinadi.

24. Soliq imtiyozlariga va boshqa imtiyozlarga soliqlardan vaqtincha ozod qilish, imtiyozli soliq solish va jadallashtirilgan amortizatsiya tartibini belgilash, bojxona imtiyozlari berish va boshqalar kiradi. Har bir loyiha yoki umuman dastur boʻyicha imtiyozlar roʻyxati amaldagi qonun hujjatlariga muvofiq belgilanadi.

25. Davlat monitoringi Dasturga kiritilgan investitsiya loyihalarining amalga oshirilishi ustidan davlat nazoratining asosiy mexanizmi hisoblanadi.

26. Quyidagilar Dasturga kiritilgan investitsiya loyihalari ustidan Davlat monitoringini amalga oshirishning asosiy vazifalari hisoblanadi:

investitsiya loyihalarining va, birinchi navbatda, markazlashtirilgan investitsiyalar hisobiga roʻyobga chiqarilayotgan investitsiya loyihalarining oʻz vaqtida va samarali amalga oshirilishi, shu jumladan, loyihalarning belgilangan tartibda tasdiqlangan texnik-iqtisodiy asoslashlarining asosiy koʻrsatkichlariga rioya qilinishiga oid qismi ustidan nazoratni taʼminlash;

davlat hokimiyati va boshqaruvi organlari, investitsiya jarayoni boshqa qatnashchilarining faoliyatini muvofiqlashtirish, Dasturda nazarda tutilgan investitsiya loyihalarini amalga oshirish bilan bogʻliq masalalarning oʻz vaqtida hal qilinishi uchun ularning javobgarligini oshirish;

investitsiya loyihalarini tasdiqlangan hajmlar va muddatlarga qatʼiy muvofiq mablagʻ bilan uzluksiz taʼminlash;

xorijiy sheriklar oldida qabul qilingan majburiyatlarning soʻzsiz bajarilishini taʼminlash;

loyihalarni amalga oshirishda paydo boʻladigan muammoli masalalarni kuzatib borish va ularning tezkorlik bilan bartaraf etilishini taʼminlash;

investitsiya iqlimini takomillashtirish yuzasidan takliflar ishlab chiqish.

27. Davlat monitoringi investitsiya loyihalari Dasturga kiritilgan manfaatdor vazirliklar va idoralar, uyushmalar, korporatsiyalar, kompaniyalar, korxonalar va tashkilotlar, mahalliy hokimiyat va boshqaruv organlari tomonidan taqdim etiladigan axborotlar asosida Vazirlar Mahkamasining Tashqi iqtisodiy aloqalar va xorijiy investitsiyalar departamenti tomonidan tashkil etiladi.

28. Axborot taqdim etish, shuningdek, Davlat monitoringini amalga oshirish tartibi va muddatlari Vazirlar Mahkamasi tomonidan belgilanadi.

29. Investitsiya dasturiga kiritilgan investitsiya loyihalarini amalga oshirish uchun javobgarlik loyihalarning buyurtmachilari zimmasiga yuklanadi.

1. Mazkur Tartib “Investitsiya faoliyati toʻgʻrisida”gi Oʻzbekiston Respublikasi Qonuniga muvofiq ishlab chiqilgan hamda Oʻzbekiston Respublikasi investitsiya dasturida nazarda tutilgan kapital qurilishni mablagʻ bilan taʼminlash va kreditlash jarayonini tartibga soladi.

2. Tasdiqlangan davlat investitsiya dasturiga muvofiq mablagʻ bilan taʼminlanadigan va kreditlanadigan obyektlarning aniq roʻyxati (bundan keyin qurilishlarning aniq roʻyxati deb ataladi) shakllantiriladi.

3. Investitsiya dasturida nazarda tutilgan kapital qoʻyilmalar doirasida investitsiya loyihalarini mablagʻ bilan taʼminlash va kreditlash buyurtmachilar (investorlar, investorlar tomonidan investitsiya loyihalarini amalga oshirish vakolati berilgan boshqa jismoniy va yuridik shaxslar — keyingi oʻrinlarda “buyurtmachi” deb ataladi) tomonidan tasdiqlangan va Oʻzbekiston Respublikasi Iqtisodiyot vazirligi belgilagan tartibda kelishilgan qurilishlarning aniq roʻyxatiga muvofiq amalga oshiriladi.

4. Investitsiya dasturida nazarda tutilgan markazlashtirilgan kapital qoʻyilmalar limitlari doirasida qurilishlarning aniq roʻyxatini shakllantirish buyurtmachi tomonidan amalga oshiriladi.

5. Buyurtmachi investitsiya dasturi tasdiqlangandan keyin bir hafta muddatda Oʻzbekiston Respublikasi Iqtisodiyot vazirligiga qurilishlarning aniq roʻyxatlarini kelishish uchun taqdim etadi.

6. Qurilishlarning aniq roʻyxatlariga birinchi navbatda keyingi yilga oʻtuvchi obyektlar, shu jumladan bajarilgan ishlar uchun isbotlangan kreditorlik qarzlar mavjud boʻlgan obyektlar kiritiladi.

7. Aniq roʻyxatlarga yangidan boshlanadigan obyektlarni kiritishga, agar keyingi yilga oʻtuvchi qurilishlar va obyektlar, shu jumladan shunga oʻxshash quvvatlar yaratiladigan qurilishlar va obyektlar, kapital qoʻyilmalarning zarur hajmlari bilan taʼminlangan taqdirdagina yoʻl qoʻyiladi.

8. Oʻzbekiston Respublikasi Iqtisodiyot vazirligi Moliya vazirligi ishtirokida buyurtmachilar tomonidan taqdim etilgan yangidan boshlanadigan qurilishlar boʻyicha aniq roʻyxatlarni ularga rozilik berish yuzasidan qaror qabul qilish uchun koʻrib chiqadi.

9. Keyingi yilga oʻtuvchi obyektlar boʻyicha qurilishning borishini va obyektlarning tayyorlik darajasini hisobga olgan holda Iqtisodiyot vazirligi tomonidan Moliya vazirligi bilan kelishgan holda kapital qoʻyilmalar hajmlariga aniqliklar kiritilishi mumkin.

10. Belgilangan tartibda tasdiqlangan texnik-iqtisodiy asoslash, loyiha-smeta hujjatlari va mablagʻ bilan taʼminlash manbalari bilan taʼminlanmagan qurilishlarning aniq roʻyxatlarini tasdiqlashga yoʻl qoʻyilmaydi.

11. Qurilish materiallari va konstruksiyalar, butlovchi buyumlar, foydalanish davrida xomashyo va materiallar hamda bajarilgan pudrat ishlari uchun erkin muomaladagi valyuta xarajatlari bilan amalga oshiriladigan qurilishlarning aniq roʻyxatlari Pul-kredit siyosati boʻyicha respublika komissiyasi bilan kelishib olinishi kerak.

12. Yangidan boshlanadigan qurilishlar uchun ishlarni bajaruvchilarni va moddiy-texnika resurslari yetkazib beruvchilarni tanlash buyurtmachilar tomonidan, qoidaga koʻra, tender asosida amalga oshiriladi.

13. Markazlashtirilgan kapital qoʻyilmalar ajratiladigan buyurtmachi ulardan maqsadli va samarali foydalanilishi uchun javob beradi.

14. Oʻzbekiston Respublikasi Moliya vazirligi tomonidan budjet mablagʻlari ajratish buyurtmachi tomonidan tasdiqlangan ish hajmlarini bajarish, asbob-uskunalar, butlovchi materiallar, buyumlar va konstruksiyalar yetkazib berish hamda mablagʻ bilan taʼminlash jadvaliga muvofiq Iqtisodiyot vazirligi bilan kelishilgan qurilishlarning aniq roʻyxatlariga binoan amalga oshiriladi.

Budjet mablagʻlariga boʻlgan ehtiyojni aniqlashda quyidagi xarajatlar hisobga olinadi:

oʻtgan yilda bajarilgan ishlar hajmi uchun kreditorlik qarzlarni toʻlash;

qurilishlarning aniq roʻyxatlariga kiritilgan obyektlarda bajariladigan ishlar boʻyicha joriy yilning hisobot oyidagi kreditorlik qarzlarni toʻlash;

hisobot oyi kapital qoʻyilmalari hajmlarini oʻzlashtirish asosida aniqlangan joriy oyda kapital qoʻyilmalarni kutilayotgan oʻzlashtirishning 40 foizigacha miqdorda avans toʻlash.

Bunda avans miqdori xarid qilinadigan asbob-uskunalar, buyurtmachi tomonidan materiallar yetkazib berish, pudrat tashkilotlarga avans toʻlash, shuningdek har bir aniq holatda Hukumatning qaroriga koʻra respublika obyektlari qurilishini jadallashtirish maqsadida respublika tashqarisidan mahsulotlar sotib olish uchun konvertatsiya qilish mablagʻlari miqdorini hisobga olgan holda aniqlashtirilishi mumkin (tegishli hisob-kitoblar bilan isbotlangan taqdirda).

15. Belgilangan tartibda tasdiqlangan texnik-iqtisodiy asoslash, loyiha-smeta hujjatlari, boshqa zarur hujjatlar va mablagʻ bilan taʼminlash manbalari bilan taʼminlanmagan qurilishlarning aniq roʻyxatlari boʻyicha mablagʻ bilan taʼminlash boshlanishiga yoʻl qoʻyilmaydi.

16. Kapital qoʻyilmalarni mablagʻ bilan taʼminlash uchun buyurtmachilar har oyda Moliya vazirligiga toʻlovlar sxemasi bilan birgalikda mablagʻ bilan taʼminlash hisob-kitobini hamda markazlashtirilgan kapital qoʻyilmalarni mablagʻ bilan taʼminlashga yoʻnaltiriladigan ajratilgan budjet mablagʻlaridan foydalanilishi toʻgʻrisida hisobotning belgilangan shakli boʻyicha axborot ham taqdim etadilar.

17. Kapital qoʻyilmalarni mablagʻ bilan taʼminlash davlat budjeti xarajatlari iqtisodiy tasnifnomasiga muvofiq xarajat jadvali bilan rasmiylashtiriladi.

Xarajat jadvali asosida buyurtmachilar mablagʻ bilan taʼminlovchi banklarga moliya organlari tomonidan budjet mablagʻlari bilan qoplangan mablagʻ bilan taʼminlash limitlarini yetkazadilar.

18. Davlat budjeti hisobidan mablagʻ bilan taʼminlashni rasmiylashtirish uchun buyurtmachilar mablagʻ bilan taʼminlovchi banklarga:

loyihaning belgilangan tartibda tasdiqlangan texnik-iqtisodiy asoslanishini (loyiha-smeta hujjatlarini);

Iqtisodiyot vazirligi bilan kelishilgan yangidan boshlanayotgan qurilishlarning yillar boʻyicha boʻlingan aniq roʻyxatlarini, keyingi yilga oʻtuvchi qurilishlarning aniqlashtirilgan aniq roʻyxatlarini;

qurilishning barcha davri uchun bajarilgan ishlar uchun hisob-kitob shakllari koʻrsatilgan pudrat shartnomalari (kontraktlar)ni;

qurilishning yigʻma smeta hisob-kitoblarini;

loyiha hujjatlari boʻyicha “Davarxitektqurilish” qoʻmitasining davlat idoradan tashqari ekspertizasi va davlat ekologiya ekspertizasining xulosalarini taqdim etadilar.

Bajaruvchilari tender asosida aniqlanadigan obyektlar boʻyicha loyihaning belgilangan tartibda tasdiqlangan texnik-iqtisodiy asoslanishi, aniq roʻyxat va pudrat shartnomasi (kontrakt) taqdim etiladi.

19. Buyurtmachilar davlat budjeti mablagʻlari hisobiga mablagʻ bilan taʼminlash limitlarini quruvchi korxonalarga yetkazadilar hamda ularga har oyda bir yilga tasdiqlangan limitlar doirasida amalda bajarilgan ishlar hajmi uchun ajratilgan mablagʻlarni oʻtkazadilar.

20. Smetalarda nazarda tutilgan asbob-uskunalarni sotib olishga kontraktlar (shartnomalar) boʻyicha, shuningdek buyurtmachi tomonidan materiallar yetkazib berish yuzasidan import operatsiyalarga haq toʻlash ular belgilangan tartibda roʻyxatdan oʻtkazilgandan keyin amalga oshiriladi.

21. Budjet mablagʻlarini oʻtkazish yuzasidan buyurtmachilarning topshirigʻini bajarishda bank shifrlar va summalar boʻyicha koʻrsatkichlarning xarajat jadvaliga muvofiqligini tekshiradi, loyiha-smeta va qurilish-montaj ishlariga, asosiy fondlarni sotib olishga xarajatlarga haq toʻlashning yigʻma hisobini yuritadi.

22. Qurilayotgan obyektlarni kafolatli va oʻz vaqtida mablagʻ bilan taʼminlash maqsadida, budjetdan mablagʻ bilan taʼminlanadigan obyektlar boʻyicha mablagʻlar vaqtincha boʻlmagan taqdirda, mablagʻ bilan taʼminlovchi banklar Moliya vazirligi bilan kelishgan holda va uning belgilangan tartibda berilgan kafolati ostida qarz oluvchiga qisqa muddatli kreditlar berishi mumkin.

Mablagʻ bilan taʼminlovchi bankka qisqa muddatli kreditni kreditdan foydalanilganligi uchun Markaziy bank qayta moliyalash stavkasining 50 foizidan ortiq boʻlmagan stavka bilan berish tavsiya etiladi.

Kredit obyekt boʻyicha joriy yilga ajratilgan mablagʻ bilan taʼminlashning umumiy limiti hisobiga, kredit boʻyicha foizlar esa — qarz oluvchining oʻz mablagʻlari hisobiga qaytariladi.

23. Buyurtmachilarga markazlashtirilgan kapital qoʻyilmalarning tasdiqlangan limitlarida nazarda tutilgan qaytarib berish asosidagi davlat budjeti mablagʻlari Oʻzbekiston Respublikasining garov haqidagi qonun hujjatlarida nazarda tutilgan tegishli hujjatlarni rasmiylashtirgan holda binolar, inshootlar, asbob-uskunalar, qurilishi tugallanmagan obyektlar, moddiy boyliklar va boshqa mol-mulkni garovga qoʻyish shartnomasi asosida vakolatli bank tomonidan beriladi.

Foizlar miqdori va ularni hisoblab qoʻshish muddatlari, shuningdek, qaytarish asosidagi budjet mablagʻlari boʻyicha asosiy qarz va foizlarni qaytarish tartibi Moliya vazirligi bilan buyurtmachiga mablagʻlarni qayta moliyalaydigan vakolatli bank oʻrtasidagi shartnoma bilan tartibga solinadi.

24. Qoidaga koʻra, keyinchalik qarz oluvchiga qayta moliyalagan holda budjet mablagʻlari ajratish yuzasidan Moliya vazirligi tijorat banki bilan tuzadigan shartnomada qarzni qaytarish jadvaliga muvofiq navbatdagi toʻlov summasini bankning vakillik hisobvaragʻidan soʻzsiz oʻtkazib olish mexanizmi nazarda tutiladi.

Qarz oluvchining qarzni qaytarish uchun mablagʻi va qarzni qaytarish istiqboli mavjud boʻlmagan taqdirda Moliya vazirligi belgilangan tartibda bankrotlik toʻgʻrisidagi jarayon tashabbuskori boʻladi.

25. Hisob-kitob operatsiyalarini amalga oshirish va kapital qoʻyilmalarni mablagʻ bilan taʼminlash jarayonida mablagʻ bilan taʼminlovchi banklar markazlashtirilgan mablagʻlardan maqsadli foydalanilishini, qurilish muddatlariga, ajratilgan mablagʻlarni qaytarish muddatlariga rioya qilinishini va ulardan foydalanganlik uchun haq toʻlanishini nazorat qiladilar, bajarilgan ishlar hajmini nazorat tartibida oʻlchaydilar. Nazorat banklar tomonidan mablagʻ bilan taʼminlovchi tomon bilan tuzilgan shartnoma asosida bankka vositachilik haqi toʻlangan holda amalga oshirilishi mumkin.

Qonun buzilishlar, qoʻshib yozishlar yoki ishlar hajmlarini boshqacha tarzda oshirish hollari aniqlangan taqdirda mablagʻlar belgilangan tartibda olib qoʻyiladi.

Tijorat banklari tomonidan olingan davlat budjeti mablagʻlari qatʼiy ravishda maqsadli foydalanilishi kerak va ular depozit schyotlarga oʻtkazilishi, banklararo kreditlar berish uchun foydalanilishi va boshqa qisqa muddatli tusdagi operatsiyalarga jalb qilinishi mumkin emas.

Qurilishning davom etish muddatlari buzilgan, mablagʻlardan maqsadsiz foydalanilgan, kapital qoʻyilmalarni oʻzlashtirish toʻgʻrisidagi hisobot maʼlumotlari oshirib koʻrsatilgan taqdirda tijorat banklari buyurtmachilarga nisbatan, ayrim hollarda esa pudratchilarga nisbatan ham mavjud qonun hujjatlari bilan belgilangan kredit bilan taʼsir koʻrsatish choralarini qoʻllaydilar.

26. Oʻzbekiston Respublikasi tijorat banklarining uzoq muddatli kreditlari (shu jumladan, xorijiy investitsiyalar va Hukumat kafolati ostida beriladigan kreditlar) hisobiga mablagʻ bilan taʼminlash (qayta moliyalash) tomonlarning kelishuviga koʻra kreditlashning amaldagi qoidalari va normalariga muvofiq amalga oshiriladi.

Tijorat banklari (vakolatli banklar) kreditlari hisobiga mablagʻ bilan taʼminlanadigan qurilishlarning aniq roʻyxatlari Iqtisodiyot vazirligi bilan kelishishdan oldin ushbu banklar bilan kelishib olinishi shart.

Banklarning buyurtmachilar bilan oʻzaro munosabatlari kredit shartnomalari asosida quriladi. Kreditlash muddatlilik, haq toʻlash, qaytarish, taʼminlanish va maqsadli foydalanish shartlarida amalga oshiriladi.

Ssuda hisobvaragʻi boʻyicha barcha operatsiyalar banklar tomonidan smeta boʻyicha xarajatlar moddalariga rioya qilingan holda obyektning smeta qiymati doirasida shartnoma shartlariga muvofiq amalga oshiriladi.

27. Kredit obyektlarning buyurtmachilariga va pudrat qurilish tashkilotlariga aniq vaziyatdan kelib chiqib beriladi.

Bunda, buyurtmachilar kreditni qaytarish taʼminlanishi uchun mol-mulk garovi, uchinchi shaxslarning kafilligi, bank kafolati, toʻlanmagan kredit xavfi sugʻurtasi bilan bir qatorda Moliya vazirligining belgilangan tartibda berilgan kafolatini taqdim etishlari mumkin.

28. Mablagʻ bilan taʼminlashning markazlashtirilgan resurslar bilan taʼminlanishi kechikkan taqdirda tijorat banklari ularning oʻrnini oʻz mablagʻlari yoki jalb qilingan mablagʻlar bilan vaqtincha almashtirish yoʻllarini qidirib topishlari mumkin.

29. Buyurtmachining oʻz mablagʻlari hisobiga mablagʻ bilan taʼminlash tasdiqlangan loyiha hujjatlariga muvofiq va pudrat shartnomasi asosida amalga oshiriladi.

30. Aralash investitsiyalash obyektlari qurilishini mablagʻ bilan taʼminlash va kreditlash obyektlar qurilishining barcha davri mobaynida budjet mablagʻlarini, boshqa markazlashtirilgan kapital qoʻyilmalarni va oʻz mablagʻlarini xarajat qilish nisbatiga rioya qilgan holda mazkur Tartibga muvofiq amalga oshiriladi.

31. Mablagʻ bilan taʼminlash boʻyicha operatsiyalarni amalga oshiruvchi banklar buyurtmachi tomonidan taqdim etilgan hujjatlarni tekshirib chiqadilar va ular qoʻyiladigan talablarga muvofiq boʻlganda qurilishni mablagʻ bilan taʼminlash hisobvaraqlarini ochadilar. Qurilishni hisob-kitob hisobvaraqlaridan mablagʻ bilan taʼminlashga yoʻl qoʻyilmaydi.

32. Banklar buyurtmachilar, pudrat tashkilotlari va qurilishning boshqa qatnashchilari oʻrtasida bajarilgan ishlar, yetkazib berilgan moddiy-texnika resurslari va koʻrsatilgan xizmatlar uchun hisob-kitoblarni, shuningdek, boshqa hisob-kitoblarni amaldagi qonun hujjatlariga muvofiq amalga oshiradilar.

Qurilishning barcha davriga tuzilgan kontrakt (pudrat shartnomasi) buyurtmachi va pudrat tashkiloti oʻzaro munosabatlarini tartibga soluvchi asosiy hujjat hisoblanadi. Buyurtmachi bilan pudrat tashkiloti oʻrtasidagi hisob-kitoblar kontrakt (pudrat shartnomasi)da nazarda tutilgan tartibda amalga oshiriladi.

Toʻlov hujjatlarini va ularga ilova qilingan yoyilmalarni tekshirish, shuningdek toʻlov bank tomonidan 3 kun ichida amalga oshiriladi. Asoslanmagan toʻlov hujjatlari taqdim etilgan va ularga tuzatish kiritish zaruriyati paydo boʻlgan taqdirda toʻlov barcha tuzatishlar kiritilgandan keyin va bankka tuzatilgan hujjatlar taqdim etilgach amalga oshiriladi.

Investitsiya jarayonining boshqa qatnashchilari tomonidan tuzilgan shartnoma (kontrakt)lar ular oʻrtasidagi oʻzaro hisob-kitoblar uchun asosiy hujjat hisoblanadi.

33. Buyurtmachilar pudrat tashkilotlarining bajargan ishlari va boshqa xarajatlari uchun ularning hisobvaraqlariga toʻgʻridan toʻgʻrihaq toʻlaydilar.

Toʻlov shakli qonun hujjatlariga muvofiq kontraktlar (pudrat shartnomalari)da belgilanadi.

Butlovchi tashkilotlar yoki mahsulot yetkazib beruvchi tashkilotlar bilan yigʻma konstruksiyalar, buyumlar va materiallar uchun hisob-kitoblar shartnoma (kontrakt)da nazarda tutilgan tartibda amalga oshiriladi.