1.16.00.00.00 Xavfsizlik va huquq tartibot muhofazasi / 16.06.00.00 Taʼminlash vositalari / 16.06.04.00 Ovchilik qurollari, xizmat qurollari, portlovchi moddalar va boshqa qurollar muomalasi]
[TSZ:
1.Mudofaa va milliy xavfsizlik / Umumiy masalalar]
Oʻzbekiston Respublikasi Vazirlar Mahkamasi huzuridagi Yer qaʼrini geologik oʻrganish, sanoatda, konchilikda va kommunal-maishiy sektorda ishlarning bexatar olib borilishini nazorat qilish Davlat inspeksiyasi boshligʻining
buyrugʻi
Portlovchi materiallarning muomalasi sohasida faoliyatni amalga oshiruvchi tashkilotlarda portlovchi materiallarning yoʻqolishini texnik jihatdan tekshirish va hisobga olish tartibi toʻgʻrisidagi yoʻriqnomani tasdiqlash haqida
[Oʻzbekiston Respublikasi Adliya vazirligi tomonidan 2016-yil 20-iyunda roʻyxatdan oʻtkazildi, roʻyxat raqami 2803]
Oʻzbekiston Respublikasining “Xavfli ishlab chiqarish obyektlarining sanoat xavfsizligi toʻgʻrisida”gi Qonuni va Oʻzbekiston Respublikasi Vazirlar Mahkamasining 2011-yil 11-maydagi 131-son “Oʻzbekiston Respublikasi Vazirlar Mahkamasi huzuridagi Yer qaʼrini geologik oʻrganish, sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi tuzilmasini yanada takomillashtirishga doir chora-tadbirlar toʻgʻrisida”gi qaroriga asosan buyuraman:
1. Portlovchi materiallarning muomalasi sohasida faoliyatni amalga oshiruvchi tashkilotlarda portlovchi materiallarning yoʻqolishini texnik jihatdan tekshirish va hisobga olish tartibi toʻgʻrisidagi yoʻriqnoma ilovaga muvofiq tasdiqlansin.
2. Mazkur buyruq rasmiy eʼlon qilingan kundan eʼtiboran uch oy oʻtgach kuchga kiradi.
Boshliq B. GULYAMOV
Toshkent sh.,
2016-yil 20-may,
54-son
Oʻzbekiston Respublikasi Vazirlar Mahkamasi huzuridagi Yer qaʼrini geologik oʻrganish, sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi boshligʻining 2016-yil 20-maydagi 54-son buyrugʻiga ILOVA
Portlovchi materiallarning muomalasi sohasida faoliyatni amalga oshiruvchi tashkilotlarda portlovchi materiallarning yoʻqolishini texnik jihatdan tekshirish va hisobga olish tartibi toʻgʻrisidagi
YOʻRIQNOMA
Mazkur Yoʻriqnoma Oʻzbekiston Respublikasining “Xavfli ishlab chiqarish obyektlarining sanoat xavfsizligi toʻgʻrisida”gi Qonuni hamda Vazirlar Mahkamasining 2011-yil 11-maydagi 131-son qarori bilan tasdiqlangan Oʻzbekiston Respublikasi Vazirlar Mahkamasi huzuridagi Yer qaʼrini geologik oʻrganish, sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi toʻgʻrisidagi nizomga muvofiq, portlovchi materiallarning muomalasi sohasida faoliyatni amalga oshiruvchi tashkilotlarda (bundan buyon matnda tashkilot deb yuritiladi) portlovchi materiallarning yoʻqolishini texnik jihatdan tekshirish va hisobga olish tartibini belgilaydi.
1. Mazkur Yoʻriqnomada quyidagi asosiy tushunchalardan foydalaniladi:
portlovchi materiallar — sanoat maqsadidagi portlovchi moddalar va portlatish vositalari;
portlovchi materiallarning muomalasi — portlovchi moddalarni, shu jumladan ularni qoʻllagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish.
2. Mazkur Yoʻriqnoma talablari Oʻzbekiston Respublikasi Mudofaa vazirligi, Ichki ishlar vazirligi hamda Milliy xavfsizlik xizmati tuzilmalarga kiruvchi tashkilotlardan tashqari, portlovchi materiallarning muomalasi sohasida faoliyatni amalga oshiruvchi barcha tashkilotlarga nisbatan tatbiq etiladi.
3. Portlovchi materiallarning yoʻqolishini texnik jihatdan tekshirish ushbu holatning yuzaga kelish sabablarini aniqlash maqsadida va faqat shu holatlarni oʻrganish doirasida oʻtkaziladi.
4. Tashkilotda portlovchi materiallar yoʻqolganda tashkilot rahbari:
portlovchi materiallar yoʻqolgan joydagi ishni vaqtincha toʻxtatib turishi;
portlovchi materiallarning yoʻqolishini texnik jihatdan tekshirish boshlangunga qadar portlovchi materiallar yoʻqolgan joydagi dastlabki holatni saqlab turishi va uning qoʻriqlanishini taʼminlash;
yoʻqolgan portlovchi materiallarni qidirib topish hamda qaytarishga qaratilgan tezkor choralar koʻrishi;
“Sanoatgeokontexnazorat” davlat inspeksiyasining tegishli mintaqaviy inspeksiyasiga (bundan buyon matnda mintaqaviy inspeksiya deb yuritiladi), hududiy ichki ishlar organiga, Milliy xavfsizlik xizmatining hududiy boʻlinmasiga hamda yuqori turuvchi organiga (oʻzi boʻysunuvchi tashkilotga) (agar mavjud boʻlsa) zudlik bilan tezkor xabar yuborishi;
portlovchi materiallarning yoʻqolishiga olib kelgan sabab va shart-sharoitlarni bartaraf etish hamda ularning oldini olish choralarini koʻrishi;
portlovchi materiallarning yoʻqolishini texnik jihatdan tekshirishda ishtirok etishi;
portlovchi materiallar yoʻqolishining hisobini yuritishi shart.
5. Portlovchi materiallar yoʻqolganligi haqidagi tezkor xabarda quyidagi maʼlumotlar koʻrsatilishi lozim:
portlovchi materiallar yoʻqolgan tashkilotning tashkiliy-huquqiy shakli koʻrsatilgan toʻliq nomi va joylashgan yeri (pochta manzili);
portlovchi materiallar yoʻqolgan sana, vaqt va joy;
yoʻqolgan portlovchi materiallarning turi, nomi, miqdori va xossalari;
portlovchi materiallar yoʻqolishining qisqacha tafsiloti.
Portlovchi materiallarning yoʻqolishi haqidagi tezkor xabar tashkilot rahbari tomonidan imzolanadi.
6. Mintaqaviy inspeksiya, hududiy ichki ishlar organi hamda Milliy xavfsizlik xizmatining hududiy boʻlinmasi tezkor xabar kelib tushganda, bu haqda yuqori turuvchi organini darhol xabardor qilishi shart.
7. Portlovchi materiallarning yoʻqolishini texnik jihatdan tekshirish xarajatlarini moliyalashtirish tashkilot tomonidan amalga oshiriladi.
2-bob. Portlovchi materiallarning yoʻqolishini texnik jihatdan tekshirishni tashkil etish
8. Portlovchi materiallarning yoʻqolishini texnik jihatdan tekshirish “Sanoatgeokontexnazorat” davlat inspeksiyasi boshligʻining (boshliq oʻrinbosarining) buyrugʻi bilan tuziladigan mintaqaviy inspeksiya vakili raislik qiladigan Portlovchi materiallarning yoʻqolishi sabablarini texnik jihatdan tekshirish komissiyasi (bundan buyon matnda Komissiya deb yuritiladi) tomonidan amalga oshiriladi.
Komissiya yoʻqolgan portlovchi materiallarning turi, nomi, miqdori, xossalari, yoʻqolgan joy va boshqa holatlardan kelib chiqib “Sanoatgeokontexnazorat” davlat inspeksiyasi vakili raislik qiladigan tarkibda tuzilishi mumkin.
tegishlicha Qoraqalpogʻiston Respublikasi Ichki ishlar vazirligi, viloyat ichki ishlar boshqarmasi yoxud Toshkent shahar ichki ishlar bosh boshqarmasi (bundan buyon matnda hududiy ichki ishlar boshqarmasi deb yuritiladi) vakili (vakillari) (Komissiyaga “Sanoatgeokontexnazorat” davlat inspeksiyasining vakili raislik qilganda — Oʻzbekiston Respublikasi Ichki ishlar vazirligi vakili (vakillari);
portlovchi materiallar yoʻqolgan tashkilot vakili (vakillari);
portlovchi materiallar yoʻqolgan tashkilotning yuqori turuvchi organi (agar mavjud boʻlsa) vakili (vakillari) kiritiladi.
Zarurat boʻlganda, Komissiya tarkibiga tegishli davlat yoki xoʻjalik boshqaruvi yoxud mahalliy davlat hokimiyati organi vakili (vakillari) ham kelishuv asosida kiritilishi mumkin.
10. Texnik jihatdan tekshirishga portlovchi materiallarning muomalasi sohasidagi va boshqa tegishli sohalardagi ekspert tashkilotlari, ekspertlar va mutaxassislar kelishuv asosida jalb etilishi mumkin.
11. Komissiya portlovchi materiallarning yoʻqolganligi haqida mintaqaviy inspeksiyaga tezkor xabar kelib tushgan kundan boshlab bir kun ichida tuzilishi (Komissiyani tuzish haqidagi tegishli buyruq qabul qilinishi) lozim.
12. Komissiyani tuzish haqidagi buyruq qabul qilingan kuni uning nusxasi “Sanoatgeokontexnazorat” davlat inspeksiyasi tomonidan Oʻzbekiston Respublikasi Milliy xavfsizlik xizmatiga yuboriladi.
13. Komissiyani tuzish haqidagi buyruq qabul qilingan kunning ertasidan kechiktirmay Komissiya aʼzolari tashkilotga yetib kelishi va oʻz faoliyatini darhol boshlashi lozim.
14. Portlovchi materiallarning yoʻqolishini texnik jihatdan tekshirish muddati 15 kundan oshmasligi lozim. Yuz bergan holatni qoʻshimcha ravishda oʻrganish talab etilgan hollarda, texnik jihatdan tekshirish muddati Komissiya raisining asoslantirilgan yozma murojaatiga asosan “Sanoatgeokontexnazorat” davlat inspeksiyasi boshligʻi tomonidan qoʻshimcha ravishda 30 kungacha uzaytirilishi mumkin.
15. Komissiya tomonidan portlovchi materiallarning yoʻqolishini texnik jihatdan tekshirishda:
portlovchi materiallar yoʻqolgan joy koʻzdan kechiriladi, bunda koʻzdan kechirish natijalari yuzasidan bayonnoma tuziladi, joyning chizmasi chiziladi, joy suratga olinadi, zarur hollarda, videotasvirga tushiriladi;
yoʻqolgan portlovchi materiallarning turi, nomi, miqdori va xossalari aniqlanadi;
portlovchi materiallarning muomalasiga masʼul boʻlgan tashkilot xodimlari, guvohlar va tashkilotning mansabdor shaxslari bilan soʻrov oʻtkaziladi va ulardan yozma ravishda tushuntirish olinadi;
portlovchi materiallar yoʻqolishining dastlabki holatlari va ushbu holatlar yuzaga kelishi sabablari tahlil qilinadi;
portlovchi materiallarning yoʻqolishi sabablari boʻyicha jalb qilingan ekspert va mutaxassislarning yozma xulosalari olinadi;
ishlab chiqarish nazorati faoliyati tahlil qilinadi;
texnologik jarayonlarning buzilishi holatlari hamda uskunalardan foydalanish shart-sharoitlari aniqlanadi;
portlovchi materiallarning muomalasiga masʼul boʻlgan tashkilot xodimlarining mutaxassisligi va malakasi ularning egallab turgan lavozimiga muvofiqligi oʻrganiladi;
portlovchi materiallarning yoʻqolishi sabablari hamda ularni keltirib chiqargan shart-sharoitlar aniqlanadi;
portlovchi materiallarning muomalasi sohasidagi normativ-huquqiy va normativ-texnik hujjatlar talablariga rioya etilishi ahvoli tahlil qilinadi;
portlovchi materiallarning muomalasi sohasidagi normativ-huquqiy va normativ-texnik hujjatlar talablarining buzilishida aybdor boʻlgan shaxslar aniqlanadi;
portlovchi materiallarning yoʻqolishiga olib kelgan sabab va shart-sharoitlarni bartaraf etish va kelgusida bunday holatlarga yoʻl qoʻyilishining oldini olish boʻyicha tashkilot uchun bajarilishi majburiy boʻlgan chora-tadbirlarni ishlab chiqadi;
portlovchi materiallarning yoʻqolishi natijasida yetkazilgan taxminiy moddiy zarar oʻrganiladi;
portlovchi materiallarning yoʻqolishi tafsilotlari va sabablarini toʻla-toʻkis va obyektiv yoritishga qaratilgan boshqa choralar koʻriladi.
16. Portlovchi materiallarning yoʻqolishini texnik jihatdan tekshirishda Komissiya:
tashkilotning ish faoliyatiga xalaqit bermasligi;
davlat va tijorat sirlarining saqlanishini taʼminlashi;
huquqbuzarlik hollari aniqlangan taqdirda, ularni bartaraf etish va aybdor shaxslarni qonun hujjatlarida belgilangan tartibda javobgarlikka tortish choralarni koʻrishi majburdir.
17. Tashkilotning mansabdor shaxslari yoʻqolgan portlovchi materiallarga oid zarur boʻlgan barcha hujjatlar va maʼlumotlarni texnik jihatdan tekshirish jarayonida oʻrganish uchun Komissiyaga taqdim etishi shart. Komissiya aʼzolari tomonidan soʻralgan hujjatlar asl nusxada taqdim etilishi lozim. Zarur hollarda, Komissiya tomonidan hujjatlardan nusxa olinishi mumkin. Taqdim qilingan hujjatlardagi yozuvlarni oʻchirish va unga tuzatishlar kiritish taqiqlanadi.
18. Portlovchi materiallarning yoʻqolishi oqibatida yetkazilgan iqtisodiy zarar tashkilot tomonidan hisoblab chiqiladi hamda tashkilot rahbari va bosh buxgalteri (buxgalteri) tomonidan tasdiqlanadi.
3-bob. Portlovchi materiallarning yoʻqolishini texnik jihatdan tekshirish natijalarini rasmiylashtirish
19. Komissiya portlovchi materiallarning yoʻqolishini texnik jihatdan tekshirish natijalarini dalolatnoma (bundan buyon matnda dalolatnoma deb yuritiladi) bilan rasmiylashtiriladi.
20. Dalolatnomada quyidagi maʼlumotlar koʻrsatilishi shart:
dalolatnoma tuzilgan sana va joy nomi;
portlovchi materiallar yoʻqolgan tashkilotning tashkiliy-huquqiy shakli koʻrsatilgan toʻliq nomi, joylashgan yeri (pochta manzili), telefon va faks raqamlari;
tashkilot rahbarining familiyasi, ismi, otasining ismi, pasport seriyasi va raqami, doimiy yashash joyi manzili;
Komissiya raisi va aʼzolarining familiyasi, ismi, otasining ismi hamda lavozimlari;
portlovchi materiallar yoʻqolgan joyning umumiy tavsifi;
yoʻqolgan portlovchi materiallarning turi, nomi, miqdori va xossalari;
portlovchi materiallar yoʻqolishining tafsilotlari;
surishtiruv davomida topilgan portlovchi materiallarning turi, nomi, miqdori va xossalari hamda kim tomonidan, qachon va qanday holatlarda topilganligi;
portlovchi materiallar yoʻqolishining texnik va tashkiliy sabablari;
portlovchi materiallarning muomalasi sohasidagi normativ-huquqiy va normativ-texnik hujjatlar talablariga rioya etilishi ahvoli;
portlovchi materiallarning yoʻqolishida aybdor boʻlgan shaxslar va ularga tegishli javobgarlik choralarini qoʻllash boʻyicha xulosalar;
portlovchi materiallarning yoʻqolishiga olib kelgan sabab va shart-sharoitlarni bartaraf etish va kelgusida bunday holatlarga yoʻl qoʻyilishining oldini olish boʻyicha chora-tadbirlar (bajarish muddati va bajarish uchun masʼul shaxslarni koʻrsatgan holda);
portlovchi materiallarning yoʻqolishini texnik jihatdan tekshirish davomida aniqlangan boshqa muhim maʼlumotlar.
21. Dalolatnoma Komissiyaning barcha aʼzolari tomonidan imzolanadi. Dalolatnomani imzolashdan bosh tortgan Komissiya aʼzosi oʻz fikrini yozma ravishda taqdim qilishi lozim. Bunda Komissiya aʼzosining yozma ravishda taqdim qilgan fikri dalolatnomaga ilova qilinadi.
22. Dalolatnomaning bir nusxasi imzolangandan soʻng, tashkilot rahbariga taqdim etiladi.
23. Portlovchi materiallarning yoʻqolishini texnik jihatdan tekshirish boʻyicha rasmiylashtirilgan hujjatlar alohida yigʻmajildda quyidagi tartibda joylashtiriladi:
Komissiyani tuzish haqidagi buyruq;
portlovchi materiallar yoʻqolishining sabablari va holatlarini oʻrganish yuzasidan tuzilgan bayonnomalar, chizmalar va ularga ilova qilingan materiallar;
portlovchi materiallarning muomalasiga masʼul boʻlgan tashkilot xodimlari, guvohlar va tashkilotning mansabdor shaxslari tomonidan berilgan yozma tushuntirishlar;
Komissiya raisining ekspert va mutaxassislarni jalb etish toʻgʻrisidagi (agar mavjud boʻlsa) va boshqa qarorlari;
jalb qilingan ekspert va mutaxassislarning portlovchi materiallar yoʻqolishining sabablari boʻyicha yozma xulosalari (agar mavjud boʻlsa);
ishlab chiqarish nazorati faoliyatining yozma tahlili;
portlovchi materiallarning muomalasiga masʼul boʻlgan tashkilot xodimlarining mutaxassisligi va malakasi toʻgʻrisidagi maʼlumotlar;
tashkilotda mavjud boʻlgan va yoʻqolgan portlovchi materiallarning hisobiga oid hujjatlar;
portlovchi materiallarning muomalasiga masʼul boʻlgan tashkilot xodimlarining tegishli mutaxassisliklar (ishlar, lavozimlar) boʻyicha ixtisoslashtirilgan kurslarda oʻqiganligini tasdiqlovchi hujjatlari (agar mavjud boʻlsa) hamda lavozim yoʻriqnomalaridan koʻchirmalar;
portlovchi materiallarning kirimi va chiqimi hamda berilishi va qaytarilishi hisobini yuritish kitoblaridan koʻchirmalar;
portlovchi materiallar muomalasi sohasidagi normativ-huquqiy va normativ-texnik hujjatlar talablarining buzilishida aybdor boʻlgan shaxslar haqida maʼlumotlar;
talablari buzilgan portlovchi materiallar muomalasi sohasidagi normativ-huquqiy va normativ-texnik hujjatlardan (tegishli tuzilmaviy birligi koʻrsatilgan holda) koʻchirmalar;
portlovchi materiallarning yoʻqolishi natijasida yetkazilgan moddiy zarar aks ettirilgan hujjatlar;
portlovchi materiallarning yoʻqolishini texnik jihatdan tekshirish davomida rasmiylashtirilgan boshqa hujjatlar;
portlovchi materiallarning yoʻqolishini texnik jihatdan tekshirish dalolatnomasi.
Yigʻmajildda unga kiritilgan hujjatlarning roʻyxati koʻrsatiladi.
24. Tashkilot rahbari portlovchi materiallarning yoʻqolishini texnik jihatdan tekshirish boʻyicha rasmiylashtirilgan hujjatlar yigʻmajildining nusxasini:
“Sanoatgeokontexnazorat” davlat inspeksiyasi hamda Oʻzbekiston Respublikasi Ichki ishlar vazirligiga (“Sanoatgeokontexnazorat” davlat inspeksiyasi vakili Komissiya raisi boʻlganda);
tegishli mintaqaviy inspeksiyaga hamda hududiy ichki ishlar boshqarmasiga (mintaqaviy inspeksiya vakili Komissiya raisi boʻlganda) yuborilishini taʼminlaydi.
Yigʻmajildining nusxalari yuborilganligini tasdiqlovchi hujjatlar tashkilot rahbari tomonidan Komissiya raisiga taqdim etilishi lozim.
Zarurat boʻlganda, yigʻmajildining nusxasi Komissiya raisi tomonidan boshqa tashkilotga (tashkilotlarga) ularning soʻroviga asosan yuboriladi.
25. Portlovchi materiallarning yoʻqolishini texnik jihatdan tekshirish yakunlangandan soʻng, tashkilot rahbari tomonidan 3 kun ichida Komissiya xulosasiga asosan portlovchi materiallarning yoʻqolishiga olib kelgan sabab va shart-sharoitlarni bartaraf etish va kelgusida bunday holatlarga yoʻl qoʻyilishining oldini olish boʻyicha chora-tadbirlar rejasi tasdiqlanadi hamda portlovchi materiallarning yoʻqolishida aybdor boʻlgan xodimlarga nisbatan intizomiy jazo chorasini qoʻllash boʻyicha buyruq chiqariladi. Bunda tasdiqlangan chora-tadbirlar rejasi va qabul qilingan buyruqning nusxasi 1 kun ichida mazkur Yoʻriqnomaning 24-bandida nazarda tutilgan tashkilotlarga yuboriladi.
4-bob. Portlovchi materiallarning yoʻqolishini hisobga olish
26. Tashkilot tomonidan portlovchi materiallarning yoʻqolishi yuz bergan har bir holat mazkur Nizomning ilovasiga muvofiq shaklda yuritiladigan Portlovchi materiallarning yoʻqolishini hisobga olish jurnalida hisobga olinishi shart.
27. Portlovchi materiallarning yoʻqolishini hisobga olish jurnali raqamlangan, ip oʻtkazib tikilgan va tashkilot rahbari tomonidan imzolanib, muhrlangan boʻlishi lozim.
Mazkur jurnal tashkilot rahbari tomonidan tayinlangan masʼul shaxs tomonidan yuritiladi.
28. Portlovchi materiallarning yoʻqolishini hisobga olish jurnali toʻliq toʻldirilguncha yuritilishi shart.
5-bob. Yakuniy qoida
29. Mazkur Yoʻriqnoma Oʻzbekiston Respublikasi Ichki ishlar vazirligi, Mudofaa vazirligi, Favqulodda vaziyatlar vazirligi va Milliy xavfsizlik xizmati bilan kelishilgan.
Ichki ishlar vaziri A. AXMEDBAYEV
2016-yil 16-may
Mudofaa vaziri K. BERDIYEV
2016-yil 16-may
Favqulodda vaziyatlar vaziri T. XUDAYBERGENOV
2016-yil 18-may
Milliy xavfsizlik xizmati raisi R. INOYATOV
2016-yil 18-may
Portlovchi materiallarning muomalasi sohasida faoliyatni amalga oshiruvchi tashkilotlarda portlovchi materiallarning yoʻqolishini texnik jihatdan tekshirish va hisobga olish tartibi toʻgʻrisidagi yoʻriqnomaga ILOVA
PORTLOVCHI MATERIALLARNING YOʻQOLISHINI HISOBGA OLISH
JURNALI
Yuritilishi boshlandi: 20 ____ yil “____”______________.
Yuritilishi tugatildi: 20 ____ yil “____”______________.
T/r
Portlovchi materiallarning yoʻqolishi sanasi va vaqti
Portlovchi materiallarning yoʻqolishi sababi (yoʻqolish, talon-toroj, tashlab yuborish)
Portlovchi materiallarning yoʻqolgan joy (obyekt, portlatish ishlari olib borilgan joyning nomi)
Portlovchi materiallarning yoʻqolgan boʻlinma nomi (sex, uchastok, guruh)
Yoʻqolgan portlovchi materiallarning turi, nomi, miqdori va xossalari
Portlovchi materiallarning yoʻqolishi boʻyicha qisqacha tafsilot
Portlovchi materiallar yoʻqolishining holatlari va shart-sharoitlari
Portlovchi materiallarning yoʻqolishini texnik jihatdan tekshirish natijalari boʻyicha qisqacha tavsif
Topib qaytarilgan portlovchi materiallarning turi, nomi, miqdori va xossalari
Izoh
1
2
3
4
5
6
7
8
9
10
(Oʻzbekiston Respublikasi qonun hujjatlari toʻplami, 2016-y., 25-son, 310-modda; Qonun hujjatlari maʼlumotlari milliy bazasi, 14.10.2019-y., 10/19/2803-1/3904-son; Qonunchilik maʼlumotlari milliy bazasi, 28.07.2021-y., 10/21/3313/0724-son; 16.06.2023-y., 10/23/2803-2/0383-son; 23.02.2026-y., 10/26/2803-3/0168-son)
